“E TELE le saito e seleseleina, a ua toʻaitiiti le ʻaufaigaluega. O lea, ia ʻaiʻoi atu ai i le Matai o le seleselega, ina ia aauina mai se ʻaufaigaluega mo lana seleselega.” (Luka 10:2) O upu na a Iesu i le pe tusa ma le 2,000 tausaga ua mavae e fetaui lelei ona faamatalaina ai le tulaga o Myanmar i aso nei. I le ā le itu? E na o le 4,200 tagata talaʻi i Myanmar o loo talaʻia le tala lelei i tagata e 55 miliona.

Peitaʻi, ua faagaeetia e Ieova “le Matai o le seleselega” loto o le faitau selau o uso ma tuafāfine mai i isi atunuu, ina ia ō mai i lenei atunuu i le itu i saute i sasaʻe o Asia e fesoasoani i le galuega o le seleselega faaleagaga. O le ā na uunaʻia ai i latou e tuua o latou atunuu? O le ā na fesoasoani iā i latou ina ia siitia mai i Myanmar? O ā faamanuiaga o loo latou olioli ai? Seʻi mātau faamatalaga a nisi o i latou.

I nai tausaga ua mavae, na oso ai le maʻi māliu o Kazuhiro o se paeonia i Iapani ma matapogia ai, ma na ave ai o ia i se falemaʻi. Na faatonuina o ia e le fomaʻi e aua neʻi toe aveina se taavale mo le lua tausaga. Na teʻi Kazuhiro ma fesili ifo, ʻO le a faapefea la ona fai laʻu paeonia, o le mea e sili ona ou fiafia ai?’ Na tatalo faatauanau o ia iā Ieova ina ia faailoa mai se isi auala e mafai ai ona faaauau pea lana paeonia.

Ua faapea mai Kazuhiro: “Ina ua mavae le masina, na iloa e se tasi o aʻu uō o loo auauna i Myanmar le mea ua tupu. Na vili mai o ia ma fai mai: ʻO le auala autū mo femalagaaʻiga i Myanmar o le pasi. A e sau i inei, e mafai ona fai pea lau auaunaga e aunoa ma le aveina o se taavale.’ Na ou fesili i laʻu fomaʻi, pe e mafai ona ou alu pea i Myanmar pe a fua i loʻu tulaga lea ua iai. Na faateʻia aʻu i le faapea mai o le fomaʻi: ʻO loo iai i le atunuu se fomaʻi faapitoa mo le maʻi māliu mai i Myanmar. O le a ou faamatala i ai lou tulaga. Pe a toe oso sou maʻi māliu i Myanmar, o le a mafai ona ia fesoasoani iā te oe.’ Na ou vaai i le tala a le fomaʻi o se tali mai iā Ieova.”

O lea, na lafo ai loa e Kazuhiro se imeli i le ofisa o le lālā a Myanmar, ma faailoa i ai lo la faanaunauga ma lana avā e fia auauna i lenā atunuu o ni paeonia. E na o le lima aso ae tali ane le lālā, “Ō mai, o loo matou manaʻomia nisi paeonia!” O lea, na faatau ese ai loa taavale a Kazuhiro ma lana avā o Mari, maua o la visa, ma totogi o la pasese. I le taimi nei, o loo la auauna ma le fiafia i Mandalay i le vaega e faaaogāina le gagana faataga. Ua faapea mai Kazuhiro: “O lenei mea ua atili faamalosia ai lo ma faatuatua i le folafolaga a le Atua  o loo i le Salamo 37:5 e faapea: ʻIa e tuuina atu iā Ieova lou ala, ma faalagolago atu iā te ia, ona gaoioi lea o ia.’”

I le 2014, na maua e Molimau a Ieova i Myanmar le faaeaga e faia ai se tauaofiaga faapitoa. E toʻatele uso ma tuafāfine mai i isi atunuu na auai. O se tasi o i latou o Monique, o se tuafafine e 34 tausaga mai i le Iunaite Setete. Ua faapea mai o ia: “Ina ua māeʻa le tauaofiaga ma ou toe foʻi i loʻu atunuu, na ou tatalo iā Ieova i le isi laasaga e tatau ona ou faia. Na ou talanoa foʻi i oʻu mātua e faatatau i oʻu sini faaleagaga. Na matou manatu e tatau ona ou toe foʻi i Myanmar, ae na umi se taimi faatoʻā fai laʻu faaiʻuga ma na tele ina ou tatalo iā Ieova.” Aiseā? O le faamatalaga lenei a Monique.

“Na faalaeiau e Iesu ona soo ina ia ʻfaitau tupe o le a faaalu.’ O lea na ou fesili ifo ai: ʻPe e mafai ona ou faatupeina loʻu siitia atu i lea atunuu? Po o le a mafai ona ou tausia aʻu lava e aunoa ma le faaalu o le tele o le taimi i galuega totogi?’” Ua taʻutino mai o ia: “Na vave ona ou iloa e leʻi lava saʻu tupe e siitia atu ai i se atunuu mamao.” Na mafai faapefea la ona ia siitia mai i Myanmar?​—Luka 14:28.

Ua faapea mai Monique: “I se tasi aso na fai mai ai loʻu pule ou te alu atu ma te talanoa. Na ou popole o le a faamālōlō aʻu mai i laʻu galuega. Nai lo o lea, na faafetai mai o ia mo aʻu galuega lelei, ona ia faapea mai lea o le a maua saʻu ponesi. O le aofaʻiga tonu lava lenā sa ou manaʻomia e totogi uma ai aʻu aitalafu.”

Na amata ona auauna Monique i Myanmar talu mai Tesema i le 2014. O ā ni ona lagona e faatatau i lona auauna ai i le mea o loo tele ai le manaʻoga? Ua ia faapea mai, “Ua ou matuā fiafia lava i laʻu auaunaga i inei. E tolu ni suʻesuʻega faale-Tusi Paia o loo oʻu faia. O se tasi o aʻu tagata suʻesuʻe o se tinā e 67 ona tausaga. Pe a ou alu atu, e ʻataʻata mai ma sau fusi aʻu. Na maligi ona loimata ina ua ia aʻoaʻoina o Ieova le suafa o le Atua. Na fai mai o ia: ʻO le taimi muamua lea ua ou faalogo ai o le suafa o le Atua o Ieova. O oe o se tagata talavou, ae ua e aʻoaʻoina aʻu i le mea e sili ona tāua.’ Sa maligi foʻi oʻu loimata. O tala fiafia faapenei ua atili ai ona avea le auaunaga i le mea o loo tele ai le manaʻoga o se mea e matuā faamalieina ai.” E leʻi leva talu ai nei ona maua e Monique le faaeaga e auai ai i le Aʻoga mo Tagata Talaʻi o le Malo.

O se isi vala e faalaeiauina ai isi e ō mai i Myanmar, o tala e faatatau i lenei atunuu o loo taʻua i le 2013 Yearbook of Jehovah’s Witnesses. Sa nofo i le itu i saute i sasaʻe o Asia se tuafafine e igoa iā Li e silia i le 30 ona tausaga. Sa faigaluega o ia i se galuega totogi i le vaiaso atoa, ae o tala i le Yearbook na uunaʻia ai o ia e mafaufau e auauna i Myanmar. Ua faapea mai o ia, “Ina ua ou auai i le tauaofiaga faapitoa sa faia i Yangon i le 2014, na ou feiloaʻi ai i se ulugalii faaipoipo o loo auauna i le mea o loo tele ai le manaʻoga i se oganuu e tautatala i le faa-Saina i Myanmar. Talu ai ou te tautala i le gagana Saina, na ou filifili ai e siitia mai i Myanmar ina ia fesoasoani i le vaega e tautatala i le faa-Saina. Na ma galulue faatasi ma Monique ma na ma siitia ai loa i Mandalay. Na faamanuiaina i maʻua e Ieova i ni galuega faavaitaimi o ni faiaʻoga i le aʻoga lava e tasi, faapea se fale na ma mautotogi ai e lata ane. E ui lava i le vevela o le tau ma nai isi faafitauli, ae ou te fiafia i laʻu auaunaga i inei. O tagata Myanmar o ni tagata e lē tagolima, ae e faaaloalo ma e fiafia e faalogologo i le tala lelei. O se mea mataʻina le vaaia o le auala o loo faatelevave ai e Ieova le galuega. Ou te matuā mautinoa o le finagalo o Ieova ia ou auauna i inei i Mandalay.”

Na tofo foʻi le toʻatele o ē e auauna i le mea o loo tele ai le manaʻoga i le malosi o le tatalo. O se faataʻitaʻiga o Jumpei e 37 tausaga ma lana avā o Nao e 35 tausaga. Sa la auauna i se faapotopotoga i Iapani e faaaogāina le gagana faataga. Aiseā na la siitia mai ai i  Myanmar? Ua faapea mai Jumpei: “Sa avea lava ma o ma sini le auauna i se isi atunuu o loo tele ai le manaʻoga. Na siitia mai i Myanmar se uso sa matou faapotopotoga faatasi i Iapani. E ui lava e leʻi tele se ma tupe na iai, ae na ma siitia mai i Myanmar iā Me i le 2010. Na faafeiloaʻi ma le māfana i maʻua e uso ma tuafāfine i Myanmar.” O ā ni lagona o Jumpei i le auauna ai i le oganuu e faaaogāina le gagana faataga i Myanmar? Ua faapea mai o ia: “E toʻatele tagata fiafia. Pe a ma faaali atu vitiō i le gagana faataga, e maofa tagata logonoa. Ua matuā faafiafiaina lava i maʻua i le ma filifiliga ina ia ō mai i inei e auauna ai iā Ieova.”

Na faapefea ona faatupe la laʻua auaunaga? Ua faapea mai Jumpei: “Ina ua mavae le tolu tausaga, na toeitiiti uma le ma tupe sa sefe ma e leʻi lava se tupe e totogi ai le fale sa ma mautotogi ai mo le tausaga e sosoo ai. E tele taimi sa ma tatalo faatauanau atu ai iā Ieova. Peitaʻi, na faateʻia i maʻua ina ua aumai se tusi mai i le ofisa o le lālā e talosagaina i maʻua ina ia auauna o ni paeonia faapito mo sina vaitaimi. Na ma maufaatuatuaina Ieova ma e na te leʻi tuulafoaʻia lava i maʻua. E lē fesiligia auala eseese ua ia tausia ai i maʻua.” E leʻi leva talu ai nei na auai ai foʻi Jumpei ma Nao i le Aʻoga mo Tagata Talaʻi o le Malo.

O le ā na uunaʻia ai Simone o se uso e 43 tausaga mai i Italia, ma lana avā o Anna e 37 tausaga mai i Niu Sila, e siitia mai i Myanmar? Ua faapea mai Anna, “O tala o loo i le 2013 Yearbook e faatatau i Myanmar.” Ae ua faapea mai Simone: “O se matuā faaeaga le iai i inei i Myanmar. E faigofie le olaga i inei, ma e tele le taimi ua mafai ona ou faaalu e faia ai le galuega a Ieova. Ou te lagona le matuā fiafia i le tausiga a Ieova a o auauna i se vaipanoa o loo tele ai le manaʻoga.” (Sala. 121:5) Ua faapea mai Anna: “Ua faateleina loʻu fiafia. Ua faafaigofie o ma olaga. Ua tele le taimi e ma te mafuta ai ma laʻu tane, ma ua atili ai ona māfana la ma mafutaga. Ua ma maua foʻi ni uō fou e pele iā i maʻua. E talia e tagata i le oganuu Molimau a Ieova, ma e toʻatele i latou i le fanua e faaalia le fiafia.” O ā ni faamaoniga?

Ua faapea mai Anna: “I se tasi aso, na ou talaʻi ai i le maketi i se teine e aʻoga i le iunivesite ma fuafua ou te toe foʻi e asi o ia. Ina ua ou alu e asi, na ia aumai se tasi o ana uō. E oo ane i le isi taimi, ua ō mai ma isi teine. Ae o le isi taimi, ua faaopoopo mai ma isi. O loo oʻu suʻesuʻe ma le toʻalima o i latou.” Ua faapea mai Simone: “E faaleuō uiga o tagata i le fanua ma e latou te naunau e fia iloa ni mea. O le toʻatele e faaalia le fiafia ma e lē lava le taimi e suʻesuʻe ai ma i latou uma.”

Ae o ā ni fautuaga aogā e fesoasoani i le faia o se filifiliga ina ia siitia mai i Myanmar? O le faamatalaga lenei a Mizuho mai i Iapani: “O lo ma faanaunauga lava sa iai ma laʻu tane o Sachio o le auauna lea i se atunuu o loo tele ai le manaʻoga, ae e ma te leʻi iloa po o fea le atunuu. Ina ua uma ona ma faitau i tala e faatatau i Myanmar i le 2013 Yearbook, na matuā pāʻia o ma loto i na tala faalaeiau. O lea na amata ai loa ona ma mafaufau pe e mafai ona ma auauna i Myanmar.” Ua faapea mai Sachio: “Na ma filifili e asiasi mo se  vaiaso se tasi i Yangon o le aai e sili ona pisi i Myanmar, e vaavaai pe faapeʻī le olaga i inei. O lenā malaga puupuu na faatalitonuina ai i maʻua e tatau ona ma siitia mai i inei.”

Talu mai le 2010 na auauna ai Rodney ma lana avā o Jane i Myanmar i le mea o loo tele ai le manaʻoga, faatasi ai ma le la fanau e toʻalua, o le tama e igoa iā Jordan ma le teine e igoa iā Danica. Ua silia i le taʻi 50 tausaga o lenei ulugalii ma e ō mai i latou mai i Ausetalia. Ua faapea mai Rodney: “Na matuā faagaeetia i maʻua i le vaai atu i le naunau o tagata i meaʻai faaleagaga. Ou te matuā faalaeiauina isi aiga ina ia ō mai e faataʻitaʻi ona auauna i inei i Myanmar.” Aiseā? Ua faapea mai o ia: “E lē mafai ona faamatalaina aafiaga lelei o lenei mea i le itu faaleagaga o lo matou aiga. O le toʻatele o talavou e faaalu uma o latou taimi i a latou telefoni, taavale, galuega, ma isi mea. Ae o loo faaaogā e la ma fanau lo la taimi e aʻoaʻo ai ni upu fou e faaaogā i le talaʻiga. E la te taumafai e saʻili ni auala e fefulifulisaʻi ai ma tagata e lē malamalama i le Tusi Paia faapea le auala e la te tali ai i sauniga a le faapotopotoga. E faaalu foʻi lo la taimi i le tele o isi gaoioiga faaleagaga e maua ai le fiafia.”

Ua faamatala e Oliver o se uso e 37 tausaga mai i le Iunaite Setete, le māfuaaga e na te faalaeiauina ai lenei auaunaga: “E tele aogā o le auauna iā Ieova i se isi vaipanoa e lē masani ai. O loʻu siitia ese mai i loʻu aiga ua fesoasoani iā te aʻu e atiaʻe ai loʻu mautinoa ma loʻu maufaatuatuaina o Ieova po o le ā lava le tulaga ou te fesagaʻia. O le auauna faatasi ma i latou ou te leʻi masani muamua i ai ae e tutusa o matou talitonuga, ua matuā fesoasoani iā te aʻu e iloa ai e leai ma se isi mea e tāua atu nai lo o le Malo o le Atua.” O loo auauna pea ma le maelega Oliver ma lana avā o Anna i se oganuu e tautatala i le gagana Saina.

Na amata ona auauna Trazel o se tuafafine e 52 tausaga mai i Ausetalia i Myanmar i le 2004. Ua ia faapea mai: “Ou te matuā faalaeiauina i latou e talafeagai ma o latou tulaga le auauna i le mea o loo tele ai le manaʻoga. Ua ou iloa pe afai o lou faanaunauga lenā, o le a faamanuia e Ieova au taumafaiga. Ou te leʻi mafaufau o le a ou tofo i lenei ituaiga olaga manaia. O se olaga e sili ona faamanuiaina ma faamalieina ai.”

Maʻeu ni faamatalaga faalaeiau mai i ē o loo auauna i le mea o loo tele ai le manaʻoga i Myanmar! Tau ina ia uunaʻia ai oe ina ia mafaufau e fesoasoani i tagata lotofaamaoni i oganuu e leʻi galueaʻiina. Ioe, o loo valaau mai ē o loo auauna i le mea o loo tele ai le manaʻoga, “Faamolemole ō mai i Myanmar e fesoasoani iā i matou!”