Ua faamaonia na avea Iesu ma Ositaulaga Sili i le taimi na papatisoina ai i le 29 T.A. O le ā lenā faamaoniga? I lona papatisoga, na tuuina atu ai e Iesu o ia o se taulaga i luga o le fata faitaulaga, o le “finagalo” o le Atua. (Kala. 1:4; Epe. 10:5-10) Talu ai na amata ona iai lenā fata faitaulaga faafaatusa i le taimi na papatisoina ai Iesu ma faasolo mai ai, na tatau foʻi la ona iai i lenā taimi le malumalu sili faaleagaga, lea e faaāta mai ai le faatulagaga o le tapuaʻiga moni iā Ieova, e faavae i le togiola. O le fata faitaulaga, o se vaega autū lea o le malumalu faaleagaga.​—Mata. 3:16, 17; Epe. 5:4-6.

Na manaʻomia ona iai se ositaulaga sili e auauna i le malumalu sili faaleagaga lea ua faavae. Ina ia faia lenā galuega, na tofia ai e Ieova Iesu “i le agaga paia ma le mana.” (Galu. 10:37, 38; Mare. 1:9-11) Peitaʻi, e faapefea ona tatou mautinoa na tofia Iesu e avea ma Ositaulaga Sili a o leʻi maliu ma toetū mai? E iai le māfuaaga e tatou te mautinoa ai. E tatou te iloa lenā māfuaaga, pe a iloiloina le faaaʻoaʻoga a Arona, ma ē na sosoo ane iā te ia na auauna o ni ositaulaga sili i lalo o le Tulafono a Mose.

E tusa ai ma le Tulafono, e na o le ositaulaga sili na mafai ona ulu atu i le Mea e Sili Ona Paia o le faleʻie paia, po o le Mea e Sili Ona Paia o le Malumalu. O le Mea e Sili Ona Paia ma le Mea e Paia sa vaeluaina i se ʻie puipui. E faatoʻā ulu atu le ositaulaga sili i le Mea e Sili Ona Paia ma pasia ai le ʻie puipui, i le Aso o le Togisala. (Epe. 9:1-3, 6, 7) Na faauuina Arona ma ē na sosoo ane iā te ia o ni ositaulaga sili, a o leʻi ulu atu i le Mea e Sili Ona Paia e “ui atu i le ʻie puipui” o le faleʻie paia. Na tatau foʻi ona faauuina Iesu o se Ositaulaga Sili i le malumalu sili faaleagaga o Ieova, a o leʻi maliu ma mulimuli ane pasi atu pe “ui atu i le ʻie puipui, o lona tino,” i le lagi. (Epe. 10:20) O le māfuaaga lenā na taʻua ai e Paulo Iesu o loo afio mai “o se ositaulaga sili,” ma ulu atu i “le faleʻie e sili ma atoatoa ona lelei e leʻi faia e lima,” ma ulu atu ai i le “lagi.”​—Epe. 9:11, 24.

E leai se eseesega o le taimi na faavae faaletulafono ai le feagaiga fou ma le taimi na amata aloaʻia ai ona faaaogā. Aiseā? Ina ua afio aʻe Iesu i le lagi na ia ofoina atu ai le tāua o lana taulaga na faia mo tagata, ma na amata ai i inā ona faagaoioi e Iesu se faatulagaga e faavae faaletulafono ai le feagaiga fou. O le faatulagaga foʻi lenā na amata aloaʻia ai ona faaaogāina le feagaiga fou. O ā vala na aofia ai i lenā faatulagaga?

Muamua, na tulaʻi Iesu i luma o Ieova, ona sosoo ai lea ma le ofo atu e Iesu o le tāua o lana taulaga iā Ieova, ona talia ai lea e Ieova o le tāua o le toto o Iesu na faamaligiina. Pe ana lē faia vala e pei ona taʻua i luga, semanū e lē mafai ona faaaogāina le feagaiga fou.

E lē o taʻua i le Tusi Paia le taimi tonu na talia ai e Ieova le tāua o le taulaga a Iesu. O lea, e lē mafai foʻi ona tatou iloa le taimi tonu na faavae faaletulafono ai le feagaiga fou, ma le taimi na amata aloaʻia ai ona faaaogā. E ui i lea, ua tatou iloa na afio aʻe Iesu i le lagi i le toe 10 aso amata le Penetekoso. (Galu. 1:3) I se taimi o lenā taimi puupuu, na ofo atu ai e Iesu le tāua o lana taulaga iā Ieova, ma na talia e Ieova. (Epe. 9:12) Na faamonia ua amata ona faaaogā le feagaiga fou talu mai lenā taimi, ona o mea mataʻina na tutupu i le aso Penetekoso. (Galu. 2:1-4, 32, 33) Ua manino mai, na faavae i lenā taimi le feagaiga fou ma na faaaogāina ai.

I le aotelega, na faavaeina faaletulafono ma amata aloaʻia ona faaaogāina le feagaiga fou, ina ua uma ona talia e Ieova le tāua o le toto o Iesu na faamaligiina, ma faaaofia ai le ʻaufaauuina i lenā feagaiga. O lea la, o lenā feagaiga na amata ona faaaogāina ina ua auauna le Ositaulaga Sili o Iesu o se Puluvaga.​—Epe. 7:25; 8:1-3, 6; 9:13-15.