1. I le 3 Ioane 3, 4, o le ā e tatou te maua ai le fiafia?

SEʻI faaāta le matuā fiafia o le aposetolo o Ioane, ina ua ia faalogo o loo auauna pea ma le faamaoni iā Ieova i latou na ia fesoasoani i ai e aʻoaʻoina le upu moni. E tele faafitauli na latou fesagaʻia, ma na galue mamafa ai Ioane e faamalosia le faatuatua o nei Kerisiano faamaoni, o ē na avea ma ana fanau faaleagaga. E faapena foʻi lo tatou matuā fiafia pe a tuuina atu e a tatou lava fanau, po o a tatou fanau faaleagaga i latou lava iā Ieova, ma auauna faamaoni pea iā te ia.​—Faitau le 3 Ioane 3, 4.

2. O le ā le fuafuaga o tusi na tusia e Ioane?

² I le 98 T.A., e foliga mai na nofo Ioane i Efeso po o se nofoaga na latalata ane. Na ono siitia Ioane i inā ina ua faasaʻolotoina mai i le faaaunuua ai i le motu o Patamo. I lenā taimi, na uunaʻia ai o ia e le agaga paia o Ieova e tusia ni tusi se tolu. O le fuafuaga o nei tusi, ina ia uunaʻia ai Kerisiano faamaoni ia tumau lo latou faatuatua iā Iesu, ma ia savavali pea i le upu moni.

3. O ā fesili o le a tatou taliina?

³ O Ioane le aposetolo na mulimuli maliu, ma na popole o ia i aafiaga o aʻoaʻo pepelo i faapotopotoga. * (1 Ioa. 2:18, 19, 26) Na faapea mai nei tagata ua liliuese mai i le upu moni e latou te iloa le Atua, peitaʻi, e latou te leʻi usiusitaʻi i faatonuga a Ieova. Seʻi o tatou iloiloina faatonuga mai iā Ieova na tusi atu  ai Ioane. A o tatou iloiloina nei faatonuga, o le a tatou taliina ai fesili nei: O le ā le uiga o le savavali i le upu moni? O ā faafitauli e tatou te fesagaʻia? E faapefea ona fesoasoani le tasi i le isi ia tumau i le upu moni?

4. E tusa ai ma le 1 Ioane 2:3-6 ma le 2 Ioane 4, 6, o le ā e aofia ai i le savavali i le upu moni?

⁴ Ina ia savavali i le upu moni, e manaʻomia ona tatou iloa le upu moni o loo i le Afioga a le Atua le Tusi Paia. E tatau foʻi ona tatou tausia pe usitaʻia poloaʻiga a Ieova. (Faitau le 1 Ioane 2:3-6; 2 Ioane 4, 6.) Na faataatia e Iesu le faaaʻoaʻoga lelei atoatoa o le usitaʻi iā Ieova. O lea, o se tasi o auala tāua e usitaʻi ai iā Ieova, o le mulimulituʻi lea i tulagāaao o Iesu.​—Ioa. 8:29; 1 Pete. 2:21.

5. O le ā e tatau ona tatou talitonu atoatoa i ai?

⁵ Ina ia savavali pea i le upu moni, e tatau ona tatou talitonu atoatoa o Ieova o le Atua o le upu moni, ma o mea uma ua ia taʻu mai iā i tatou i lana Afioga le Tusi Paia, e moni. E tatau foʻi ona tatou talitonu atoatoa o Iesu o le Mesia na folafolaina mai. I aso nei, e toʻatele e lē talitonu ua faauuina Iesu e avea ma Tupu o le Malo o le Atua. Na lapataʻi mai Ioane e “toʻatele tagata taufaasesē,” e faasesē iā i latou o ē e lē talitonu atoatoa i le upu moni e faatatau iā Ieova ma Iesu. (2 Ioa. 7-11) Na tusi Ioane: “O ai ea le tagata pepelo pe afai e lē o le tagata lea ua tetee i le mea moni, o Iesu o le Keriso lea?” (1 Ioa. 2:22) O le suʻesuʻeina o le Afioga a le Atua, e pau lea o le auala e ʻalofia ai le faasesēina o i tatou. E na o le pau foʻi lenā o le auala e tatou te iloa lelei ai Ieova ma Iesu. (Ioa. 17:3) O le iloa lelei o Ieova ma Iesu, e na o le pau lenā o le auala e tatou te talitonu atoatoa ai ua tatou maua le upu moni.

6. O le ā se tasi o faafitauli o loo fesagaʻia e talavou Kerisiano?

⁶ E tatau i Kerisiano uma ona faaeteete ina neʻi taʻitaʻisesēina i latou i filosofia faaletagata. (1 Ioa. 2:26) Ae e patino lava i Kerisiano talavou, e manaʻomia ona latou faaeteete i lenei mailei. Na faapea mai Alexia * o se tuafafine 25 tausaga mai i Falani: “A o oʻu aʻoga, sa ou aʻoaʻoina ai e faatatau i le evolusione ma isi filosofia faaletagata. O na aʻoaʻoga na faatupu ai iā te aʻu le masalosalo i le upu moni. O le mea moni na iai taimi na ou fiafia ai i na aʻoaʻoga. Ae na ou manatu e sesē le na ona ou faalogo atu i mea ua aʻoaʻoina ai aʻu i le aʻoga,  e aunoa ma le taʻu atu o mea na aʻoaʻoina ai aʻu i le Tusi Paia.” Na suʻesuʻeina e Alexia le tusi Life​—How Did It Get Here? By Evolution or by Creation? I ni nai vaiaso na mou ese atu ai lona masalosalo. Na toe faapea mai Alexia: “Na ou faamaonia iā te aʻu lava ia, o loo iai i le Tusi Paia le upu moni. Na ou iloa foʻi, o le faatatauina o le Tusi Paia i loʻu olaga e maua ai le olioli ma le filemu.”

7. O ā omiga e tatau ona tatou teena, ma aiseā?

⁷ O Kerisiano uma, e aofia ai talavou ma tagata matutua, e tatau ona tetee atu i omiga o le ola i ni olaga uigalua. Na faailoa mai e le aposetolo o Ioane, e lē mafai ona tatou savavali i le upu moni ma ola i se olaga e lē mamā i le taimi e tasi. (1 Ioa. 1:6) Pe afai e tatou te mananaʻo e maua le finagalo malie o le Atua i le taimi nei ma le lumanaʻi, e tatau ona tatou amioaʻi ma manatua e silafia e Ieova mea uma e tatou te faia. E leai se mea e taʻu o se agasala faalilolilo, ona e leai se mea e lilo i le silafaga a Ieova.​—Epe. 4:13.

8. O le ā e tatau ona tatou teena?

⁸ E tatau ona tatou teena le vaaiga a le lalolagi e faatatau i agasala. Na tusi le aposetolo o Ioane: “Afai tatou te faapea atu: ʻE leai sa tatou agasala,’ ua faasesēina ai i tatou lava.” (1 Ioa. 1:8) I aso o Ioane, na faapea mai tagata ua liliu ese mai i le upu moni, e mafai e se tagata e agasala ma le loto i ai ona iai pea se la faiā māfana ma le Atua. I aso nei, o loo tatou ola faatasi ma tagata o loo iai lenā manatu. E toʻatele i latou e faapea mai e talitonu i le Atua, ae e latou te lē ioe i le silafaga a Ieova e faatatau i le agasala aemaise lava pe a aofia ai mataupu tau i feusuaʻiga. O amioga e silasila i ai Ieova o agasala, ua faaigoaina e nei tagata o filifiliga a le tagata lava ia po o se isi auala e ola ai.

9. E faapefea ona aogā i talavou lo latou pipii pea i o latou talitonuga e faavae mai i le Tusi Paia?

 ⁹ Atonu e faamalosia talavou Kerisiano e a latou uō i le aʻoga po o le galuega, e talia la latou vaaiga e faatatau i amioga lē mamā. O le mea lenā na tupu iā Aleksandar. Na ia faapea mai: “Na tauanau aʻu e nisi teine i le aʻoga e fai ni a matou feusuaʻiga. Na latou faapea mai e ma te feoaʻi ma se isi tama ona e leai saʻu teine.” Pe a e fesagaʻia luʻi faapena, manatua o lou pipii pea i ou talitonuga e faavae mai i le Tusi Paia o le a puipuia ai lou talaaga, o lou soifua mālōlōina, ou faalogona lelei, ma lau faiā ma Ieova. O taimi uma e te teena ai faaosoosoga, o le a matuā faigofie ai iā te oe ona fai le mea saʻo. Ia manatua foʻi o le vaaiga sesē a le lalolagi e faatatau i feusuaʻiga na māfua mai iā Satani. O lea la, pe a e teena le faia o le mea sesē, ʻua e faatoʻilaloina lē o loo leaga.’​—1 Ioa. 2:14.

10. E faapefea ona fesoasoani iā i tatou le 1 Ioane 1:9, ina ia tatou auauna ai iā Ieova ma se lotofuatiaifo mamā?

¹⁰ E tatou te amanaʻia e iā Ieova le aiā e faailoa mai ai iā i tatou amioga e agasala ai. E tatou te faia le mea sili ina ia lē faia ai se agasala. Ae pe a tatou faia se agasala, e faailoa atu iā Ieova a tatou agasala e ala i le tatalo. (Faitau le 1 Ioane 1:9.) Ae pe a tatou faia se agasala matuiā, e tatou te saʻili le fesoasoani a toeaina o ē na tofia e Ieova e fesoasoani iā i tatou. (Iako. 5:14-16) E ui i lea, e lē tatau ona lofitūina i tatou i faalogona nofosala ona o ni mea sesē na faia i le taimi ua teʻa. Aiseā? Talu ai na saunia e lo tatou Tamā alofa le taulaga togiola a lona Alo, ina ia faamagalo ai a tatou agasala. Pe a fetalai Ieova o le a ia faamagaloina tagata agasala ua salamō, e mautinoa e na te faia faapea. E leai lava se mea e mafai ona taofia i tatou mai i le auauna iā Ieova ma se lotofuatiaifo mamā.​—1 Ioa. 2:1, 2, 12; 3:19, 20.

11. E faapefea ona puipuia o tatou mafaufau mai i aʻoaʻoga e faaleagaina ai lo tatou faatuatua?

 ¹¹ E tatau ona tatou teena aʻoaʻoga a i latou ua liliu ese mai i le upu moni. Talu mai le amataga o le faapotopotoga Kerisiano, na faaaogā e le Tiapolo le toʻatele o tagata taufaasesē e totō i mafaufau o auauna faamaoni a le Atua le masalosalo. O lea la, e manaʻomia ona tatou iloa faamatalaga moni mai i faamatalaga pepelo. * E ono taumafai o tatou fili e faaaogā fesootaʻiga i luga o le Initaneti, e faavaivaia ai lo tatou faatuatua iā Ieova ma lo tatou alolofa i o tatou uso ma tuafāfine. Ia manatua lē o loo i tua o nei faamatalaga taufaasesē ma ia teena o ia.​—1 Ioa. 4:1, 6; Faaa. 12:9.

12. Aiseā e tatau ai ona faalolotoina lo tatou talisapaia o upu moni ua tatou aʻoaʻoina?

¹² Ina ia teena osofaʻiga a Satani, e manaʻomia ona tatou matuā maufaatuatuaina Iesu ma lana matafaioi i le faataunuuina o le finagalo o le Atua. E manaʻomia foʻi ona tatou maufaatuatuaina le auala e tasi o loo faaaogā e Ieova i aso nei. (Mata. 24:45-47) E faamalosia lo tatou maufaatuatuaina, e ala i le suʻesuʻe e lē aunoa o le Afioga a le Atua. Ona pei ai lea o lo tatou faatuatua o se laau ua mauaa i le eleele. E tai faapena foʻi le manatu na tusi atu ai Paulo i le faapotopotoga i Kolose. Na ia faapea atu: “Talu ai ua outou taliaina le Alii, o Keriso Iesu, ia faaauau pea ona savavali i le autasi ma ia, ia mauaa ma ia atiaʻe outou iā te ia, ia mausalī i le faatuatua.” (Kolo. 2:6, 7) E matuā lē mafai lava e Satani po o i latou o loo ia taaʻina, ona faavaivaia se Kerisiano ua malosi lona faatuatua.​—2 Ioa. 8, 9.

13. O le ā e tatau ona tatou faatalitalia ma aiseā?

¹³ E tatou te faatalitalia e ʻinoʻino le lalolagi iā i tatou. (1 Ioa. 3:13) Na faamanatu mai e Ioane “o le lalolagi atoa o loo nofo toʻilalo i le pule a lē o loo leaga.” (1 Ioa. 5:19) A o matuā lalata atu lava i le iʻuga o lenei faiga o mea, o le lotoa tele foʻi lenā o Satani. (Faaa. 12:12) E faaaogā e Satani osofaʻiga iloagatā, e pei o le mailei o le faia o amioga lē mamā ma pepelo a ē ua liliu ese mai i le upu moni. E na te faaaogāina foʻi osofaʻiga tuusaʻo e pei o sauāga ogaoga. Ua iloa e Satani ua matuā puupuu lona taimi o totoe, e na te taumafai ai e taofi la tatou galuega talaʻi pe faaleagaina lo tatou faatuatua. E lē o se mea la e faateʻia ai le faasāsā po o le taofia o la tatou galuega i le tele o atunuu. E ui i lea, o loo tumau pea o tatou uso ma tuafāfine i na atunuu. Ua latou faamaonia po o ā lava mea leaga e fai mai e Satani, ae e mafai lava ona tatou faamaoni.

14. O le ā se tasi o auala e tatou te fesoasoani ai i uso ma tuafāfine ia tumau i le upu moni?

¹⁴ E tatau ona tatou faaalia le alofa faapelepele, ina ia fesoasoani ai i uso ma tuafāfine e tumau i le upu moni. (1 Ioa. 3:10, 11, 16-18) E manaʻomia ona alofa o le tasi i le isi, e lē gata i taimi e sologa lelei ai mea, ae faapea foʻi taimi e tutupu ai faafitauli. O se faataʻitaʻiga, pe e te iloa se tasi ua maliu sē e pele iā te ia ma o loo ia manaʻomia ni faamāfanafanaga po o se isi fesoasoani? Pe na e faalogo ua aafia o tatou uso talitonu i se mala faalenatura, ma ua latou manaʻomia se fesoasoani i le toe fausiaina o lo latou Maota mo Sauniga po o latou fale? E tatou te faaalia le tele o lo tatou alofa ma le alofa faapelepele mo o tatou uso ma tuafāfine, e ala i a tatou upu, ae e sili atu ona tāua a tatou gaoioiga.

15. E tusa ai o le 1 Ioane 4:7, 8, o le ā e manaʻomia ona tatou faia?

¹⁵ E tatou te faaaʻoaʻo i lo tatou Tamā alofa  i le lagi, pe a tatou faaalia le alofa o le tasi i le isi. (Faitau le 1 Ioane 4:7, 8.) O se auala tāua e tatou te faaalia ai le alofa, o le fefaamagaloaʻi. O se faataʻitaʻiga, e ono faatigā mai se tasi ae mulimuli ane faatoese mai. E tatou te faaalia le alofa e ala i le faamagalo atu ma faagalo lana mea sesē. (Kolo. 3:13) Na lē fiafia le uso e igoa iā Aldo, ina ua faia e se uso e na te faaaloalo i ai ni faamatalaga lē lelei e faatatau i tagata mai i le vaipanoa e sau ai. Na faapea mai Aldo, “Na ou tatalo pea iā Ieova e fesoasoani mai, ia aua neʻi iai ni oʻu manatu lē lelei i le uso.” Ae na faia foʻi e Aldo se isi mea. Na ia fai i le uso e la te galulue faatasi i le talaʻiga. A o la galulue faatasi, na faamatala atu e Aldo i le uso lona lē fiafia i ana faamatalaga na fai. Na toe faapea mai Aldo, “Ina ua iloa e le uso loʻu lē fiafia i ana faamatalaga lē lelei na fai, na ia faatoese mai loa. Na ou mātauina mai i lona leo lona salamō i ana faamatalaga na fai. Ina ua uma ona ma talanoa, na toe avea i maʻua o ni uō māfana ma faagalo le mea na tupu.”

16-17. O le ā e ao ona tatou maumauaʻi e fai?

¹⁶ Na alofa tele ma manatu mamafa le aposetolo o Ioane i le lelei faaleagaga o ona uso, ma na matuā atagia mai na faalogona i le fautuaga na ia avatu e ala i ana tusi faagaeeina. Maʻeu se faalaeiauga i le iloa, o le a pule mai faatasi ma Iesu i le lagi tane ma fafine pei o Ioane, e alolofa ma manatu mamafa!​—1 Ioa. 2:27.

¹⁷ Seʻi o tatou faatatauina fautuaga na tatou talanoaina. Ia tatou maumauaʻi e savavali i le upu moni, e ala i le usiusitaʻi iā Ieova i vala uma o lo tatou olaga. Ia suʻesuʻe ma maufaatuatuaina lana Afioga. Ia atiaʻe se faatuatua malosi iā Iesu. Ia teena filosofia faaletagata ma aʻoaʻoga a ē ua liliu ese mai i le upu moni. Ia teena omiga e ola i se olaga uigalua ma le lolo atu i le faia o le agasala. Ia ola e tusa ai ma tapulaa maualuluga tauamio a Ieova. Ia fesoasoani i o tatou uso e tumau mausalī i le upu moni e ala i le faamagalo atu pe a faatigā mai, ma avatu le fesoasoani i ē o manaʻomia. O le faia faapea, o le a tatou savavali ai pea i le upu moni, e ui i faafitauli e tatou te fesagaʻia.