SUʻESUʻEGA 31
“Ia Outou Tutumau, ia Mausalī”
“Oʻu uso pele e, ia outou tutumau, ia mausalī.”—1 KORI. 15:58.
PESE 122 Ia Tutumau, ma Mausalī!
AOTELEGA a
1-2. I le ā le itu ua pei ai Kerisiano o se fale e matuā maualuga? (1 Korinito 15:58)
I LE 1978, na fausia ai i Tokyo i Iapani se fale e matuā maualuga e 60 ona fogāfale. Na taumānatu tagata, pe faamata e mafai i lenei fale ona tatalia le tele o mafuiʻe e masani ona lūlū i lea aai. O le ā le metotia na faaaogā e i latou na tusia le ata o le fale? Ia fausia lenei fale ina ia matuā malosi. I le taimi e tasi, ia faigofie ona maluelue ae e lē faaleagaina pe solo i lalo, pe a lūlū se mafuiʻe. E pei Kerisiano o lenā fale e matuā maualuga. I le ā le itu?
2 E tatau i se Kerisiano ona iai se vaaiga paleni i le tutumau ma le fetuutuunaʻi. E manaʻomia ona ia malosi ma mausalī, ina ia usitaʻia ai tulafono ma tapulaa a Ieova. (Faitau le 1 Korinito 15:58.) “E gauaʻigofie” o ia ma e lē faalotolotolua. Ae i le isi itu, e manaʻomia ona ia “magafagafa” pe fetuutuunaʻi, pe afai e talafeagai ma le tulaga o loo iai. (Iako. 3:17) Pe a iai i se Kerisiano lenā vaaiga paleni, o le a ia ʻalofia ai le soona faasāsā naʻuā po o le lologofie. O le a iloiloina i lenei mataupu auala e mafai ai ona tatou mausalī. O le a tilofaʻia ai foʻi auala e lima e faaaogā e Satani e faavaivaia ai i tatou ma auala e tatou te teena ai.
E FAAPEFEA ONA TATOU TUTUMAU?
3. O ā tulafono a le Faitulafono Silisili o loo i le Galuega 15:28, 29?
3 I le avea ai o Ieova ma Faitulafono Silisili, o loo faaauau ona ia faamanino mai ana tulafono i ona tagata. (Isa. 33:22) O se faaaʻoaʻoga, na faamanino e le vaega pule i le uluaʻi senituri auala e tolu e tatau ona tutumau ai Kerisiano: (1) ia teena le ifo i tupua ae tapuaʻi atu tau lava o Ieova, (2) ia faatāua le paia o le toto, ma le (3) ia usitaʻia tapulaa maualuluga tauamio o loo i le Tusi Paia. (Faitau le Galuega 15:28, 29.) E faapefea i Kerisiano i aso nei ona tutumau i na vala e tolu?
4. E faapefea ona tatou tapuaʻi atu tau lava o Ieova? (Faaaliga 4:11)
4 E tatou te teena le ifo i tupua, ae tapuaʻi atu tau lava o Ieova. Na ia faatonuina le nuu o Isaraelu ina ia tapuaʻi atu tau lava o ia. (Teu. 5:6-10) Ina ua faaosoosoina foʻi Iesu e le Tiapolo, na manino lava lana fetalaiga, e na o Ieova lava e tatau ona tatou tapuaʻi i ai. (Mata. 4:8-10) O lea, e tatou te lē tapuaʻi ai i tupua. E tatou te lē tapuaʻi foʻi i tagata e peiseaʻī o i latou o ni atua, e tusa po o i latou o ni taʻitaʻi lotu, taʻitaʻi o malo, po o tagata taʻutaʻua i taaloga ma faafiafiaga. E tatou te lagolagoina le itu a Ieova, ma tapuaʻi atu tau lava o lē na “foafoaina mea uma lava.”—Faitau le Faaaliga 4:11.
5. Aiseā e tatou te usitaʻia ai le tulafono a Ieova e faatatau i le paia o le ola ma le toto?
5 E tatou te usitaʻia le tulafono a Ieova e faatatau i le paia o le ola ma le toto. Aiseā? Ua fetalai Ieova o le toto o le ola lea, ma o se meaalofa tautele mai iā te ia. (Levi. 17:14) Ina ua faataga e Ieova tagata e aai i aano o manu, na ia faatonuina i latou ina ia aua neʻi ʻaina le toto. (Kene. 9:4) Na ia toe taʻua lenā faatonuga, ina ua ia tuuina atu le Tulafono a Mose i le nuu o Isaraelu. (Levi. 17:10) Na ia faatonuina foʻi le vaega pule i le uluaʻi senituri, ina ia poloaʻia Kerisiano uma “ia faaauau ona taumamao mai i . . . le toto.” (Galu. 15:28, 29) E tatou te usitaʻia ma le lotoatoa lenā poloaʻiga pe a filifili togafitiga faafomaʻi. b
6. O ā taumafaiga e tatou te faia ina ia ola ai e tusa ma tapulaa maualuluga tauamio a Ieova?
6 E tatou te usitaʻia tapulaa maualuluga tauamio a Ieova. (Epe. 13:4) Na faaaogā e le aposetolo o Paulo se gagana faafaatusa, ina ua ia aumaia le fautuaga e “fasiotia” o tatou itutino. O lona uiga, ia faia taumafaiga maumauaʻi e aveesea so o se tuʻinanauga leaga. E tatou te ʻalofia le vaavaai po o le faia o so o se mea e ono iʻu atu ai i amioga lē mamā taufeusuaʻiga. (Kolo. 3:5; Iopu 31:1) Pe a faaosoosoina i tatou, ia vave ona tatou teena so o se manatu po o se gaoioiga e faaleagaina ai la tatou faauōga ma le Atua.
7. O le ā ua tatou maumauaʻi e fai, ma aiseā?
7 E finagalo Ieova ina ia tatou “usiusitaʻi ma o [tatou] loto.” (Roma 6:17) O taʻiala e na te aumaia e mo lo tatou lelei, ma e lē mafai ona suia ana tulafono. (Isa. 48:17, 18; 1 Kori. 6:9, 10) E tatou te taumafai malosi e faafiafia Ieova, ma e tutusa o tatou faalogona ma le faisalamo lea na faapea mai: “Ua ou filifili e usitaʻia au tulafono i taimi uma lava, e oo i le iʻuga.” (Sala. 119:112) Peitaʻi, e taumafai lava Satani e faavaivaia lo tatou maumauaʻi e faia le mea saʻo. O ā auala ua ia faaaogāina?
AUALA E TAUMAFAI AI SATANI E FAAVAIVAIA I TATOU
8. Ua faapefea ona faaaogā e Satani sauāga e taumafai ai e faavaivaia i tatou?
8 Sauāga. Ua faaaogā e le Tiapolo sauāga ma omiga ina ia taumafai ai e faavaivaia i tatou. O lona sini ia “ʻaina” i tatou pe faaleagaina la tatou faiā ma Ieova. (1 Pete. 5:8) Na faamataʻuina, sasaina, ma fasiotia Kerisiano i le uluaʻi senituri, ona o lo latou maumauaʻi e tutumau faamaoni. (Galu. 5:27, 28, 40; 7:54-60) O loo faaauau ona faaaogā e Satani sauāga i aso nei. E faamaonia lenā manatu i sauāga ogaoga o loo feagai ma o tatou uso ma tuafāfine i Rusia ma isi atunuu, faapea osofaʻiga tuusaʻo mai i tagata tetee.
9. Aumai se faataʻitaʻiga o se omiga e iloagatā.
9 Omiga e iloagatā. E lē gata e faaaogā e Satani osofaʻiga tuusaʻo, ae e na te faaaogā foʻi “togafiti.” (Efe. 6:11) Ia mātau le mea na tupu i se uso e igoa iā Bob, lea na faataotolia i le falemaʻi mo se taotoga telē. Na ia faailoa atu i fomaʻi e na te lē taliaina lava tuigātoto po o le ā lava le tulaga e oo i ai. Na talia e le fomaʻi lana filifiliga. Peitaʻi i le pō a o loma le taotoga, na alu atu ai se isi fomaʻi iā Bob ina ua ō ese lona aiga, ma faapea atu e lē faaaogāina le toto i le taimi o le taotoga, ae o le a faaleoleo pea pe a manaʻomia. Atonu na manatu le fomaʻi o le a sui le filifiliga a Bob ona o lea ua na o ia. Ae na tumau pea Bob ma faapea atu, e na te lē taliaina lava le toto po o le ā lava le tulaga e oo i ai.
10. Aiseā ua avea ai manatu faaletagata o se mailei? (1 Korinito 3:19, 20)
10 Manatu faaletagata. Pe afai e iā i tatou se vaaiga faaletagata, atonu o le a tatou lē amanaʻia ai Ieova ma ana tapulaa. (Faitau le 1 Korinito 3:19, 20.) E masani ona uaʻi atu “le atamai o lenei lalolagi,” i le faamalieina o tuʻinanauga o le tino. Na taaʻina nisi o Kerisiano i Perekamo ma Tuatira, i manatu o i latou na nonofo i na aai e faatatau i le ifo i tupua ma amioga lē mamā. Na avatu e Iesu se aʻoaʻiga malosi i na faapotopotoga, ona na latou vaai i amioga lē mamā taufeusuaʻiga o se meanoa. (Faaa. 2:14, 20) Ua taumafai foʻi tagata i aso nei e taaʻina i tatou ina ia talia na manatu sesē. E taumafai o tatou aiga ma uō e faatalitonu i tatou ua soona faasāsā naʻuā tulafono a Ieova. O se faataʻitaʻiga, atonu e latou te faapea mai e lē sesē le faamalieina o tuʻinanauga o le tagata lava ia, ma e lē o toe aogā tapulaa tauamio a le Tusi Paia.
11. Ina ia tutumau, o le ā e tatau ona tatou ʻalofia?
11 E iai taimi atonu e tatou te manatu ai, e lē manino lelei taʻiala mai iā Ieova. E ono faaosoosoina foʻi i tatou e “faia mea e sili atu nai lo o mea ua tusia.” (1 Kori. 4:6) O le mea lenā na faia e taʻitaʻi lotu i taimi o Iesu. Na latou faaopoopo i le Tulafono a Mose a latou lava tulafono, ma na avea o se avega mamafa mo tagata. (Mata. 23:4) E manino taʻiala ua aumaia e Ieova e ala mai i lana Afioga ma lana faalapotopotoga. E leai se māfuaaga e tatou te faaopoopo ai nisi taʻiala i taʻiala ua ia saunia. (Faata. 3:5-7) O lea, e tatou te lē faia mea e sili atu nai lo o mea ua tusia i le Tusi Paia, pe faia ni tulafono mo o tatou uso ma tuafāfine.
12. Ua faapefea ona faaaogā e Satani “manatu taufaasesē e lē aogā”?
12 Manatu taufaasesē. E faaaogā e Satani “manatu taufaasesē e lē aogā” ma “mataupu faavae a le lalolagi,” ina ia taʻitaʻisesēina ma fevaevaeaʻi ai tagata. (Kolo. 2:8) I le uluaʻi senituri, na aofia i na manatu ia filosofia faaletagata, aʻoaʻoga e lē faale-Tusi Paia a tagata Iutaia, ma le aʻoaʻoga e tatau ona tausia e Kerisiano le Tulafono a Mose. Na taufaasesē na manatu ona ua lē uaʻi atu ai tagata i le Puna moni o le atamai, o Ieova. I aso nei, ua faaaogā e Satani faasalalauga ma fesootaʻiga i le Initaneti, e faasalalau ai faamatalaga ma lipoti taufaasesē ua faapogaia e taʻitaʻi o malo. Na tatou vaaia le moni o lenā tulaga i le taimi o le KOVITI-19. c O i latou na faalogo i na faamatalaga taufaasesē na soona popolevale, ae e lē o le tulaga lenā na oo i Molimau a Ieova ona na latou usitaʻia taʻiala mai i la tatou faalapotopotoga.—Mata. 24:45.
13. Aiseā e tatau ai ona tatou faaeteete i mea e faalavelavea ai?
13 Mea e faalavelavea ai. E tatau ona tatou taulaʻi atu pea i “mea e sili ona tāua.” (Fili. 1:9, 10) E mafai e mea e faalavelavea ai ona faoa le tele o lo tatou taimi, ma tatou lē uaʻi atu ai i mea e sili ona tāua. O le ʻai, inu, faafiafiaga, ma galuega totogi, o mea masani ia o le olaga. Ae e mafai ona avea ma mea e faalavelavea ai, pe afai e tatou te soona faatāuaina i o tatou olaga. (Luka 21:34, 35) E lē gata i lea, e tatou te faitau ma faalogo i aso uma i tala e faatatau i finauga i mataupufai a tagata ma mataupu faapolotiki. E lē tatau ona tatou aafia i na finauga. Pe a tatou lē faaeteete, o le a amata ai ona tatou lagolagoina na finauga i o tatou mafaufau ma loto. E faaaogā e Satani na auala uma e faavaivaia ai lo tatou maumauaʻi e faia le mea saʻo. Seʻi o tatou talanoaina pe e faapefea ona tatou teena ana taumafaiga ma tatou tutumau.
E FAAPEFEA ONA TATOU TUTUMAU?
Ina ia tutumau, ia manatunatu i lou tuuina atu ma le papatisoga, suʻesuʻe ma manatunatu loloto i le Afioga a le Atua, atiaʻe se loto e mausalī, ma maufaatuatuaina Ieova (Tagaʻi i palakalafa e 14-18)
14. O le ā se tasi o auala e mafai ona fesoasoani iā i tatou e tumau ai i le itu a Ieova?
14 Ia manatunatu i lou tuuina atu ma le papatisoga. Na e uia na laasaga ona na e manaʻo e lagolagoina le itu a Ieova. Seʻi toe mafaufau po o le ā na faatalitonuina ai oe ua e maua le upu moni. Na e aʻoaʻoina le poto saʻo e faatatau iā Ieova, ma faalolotoina lou faaaloalo ma lou alofa mo ia. Na e atiaʻe le faatuatua ma uunaʻia ai oe e faaalia le salamō. Ua e tuua masaniga leaga ma ola e tusa ma le finagalo o Ieova. Ua e maua se lotofuatiaifo mamā ona o le faamagaloga a le Atua. (Sala. 32:1, 2) Ua e auai i sauniga ma faasoa atu i isi mea matagofie ua e aʻoaʻoina. I le avea ai o oe o se Kerisiano ua tuuina atu ma papatisoina, ua e savalia nei le ala i le ola ma ua e maumauaʻi ina ia faaauau ona e savali ai.—Mata. 7:13, 14.
15. Aiseā e tāua ai le suʻesuʻe ma le manatunatu loloto?
15 Ia suʻesuʻe ma manatunatu loloto i le Afioga a le Atua. E pei ona malosi o se laau pe a mauaa ona aa, e mafai foʻi ona tatou tutumau i le faatuatua pe a matuā mauaa le Afioga a le Atua i o tatou loto. A o tuputupu aʻe se laau, o le a atili ona sosolo ma malolosi ona aa. Pe a tatou suʻesuʻe ma manatunatu loloto, o le a faamalosia lo tatou faatuatua ma lo tatou mautinoa e sili ala o Ieova. (Kolo. 2:6, 7) Seʻi manatunatu pe na faapefea ona fesoasoani faatonuga, taʻitaʻiga, ma le puipuiga a Ieova i ana auauna i aso ua mavae. O se faataʻitaʻiga, i se vaaiga na vaaia e Esekielu, na uaʻi totoʻa atu ai o ia a o fuaina auʻiliʻili e se agelu le malumalu. O lenei vaaiga na faamalosia ai Esekielu, ma ua tatou maua ai ni lesona aogā i le auala e tausisi ai i tapulaa a Ieova mo le tapuaʻiga mamā. d (Eseki. 40:1-4; 43:10-12) E tatou te maua foʻi aogā, pe a faaalu se taimi e suʻesuʻe ma manatunatu loloto ai i mea loloto o le Afioga a le Atua.
16. Na faapefea i le atiaʻeina o se loto e mausalī ona avea ma puipuiga iā Bob? (Salamo 112:7)
16 Ia atiaʻe se loto e mausalī. Na faailoa atu e le tupu o Tavita lona alofa ma le lotoatoa iā Ieova ina ua ia pese: “Le Atua e, ua mausalī loʻu loto.” (Sala. 57:7) E mafai foʻi ona mausalī o tatou loto, pe a tatou maufaatuatuaina atoatoa Ieova. (Faitau le Salamo 112:7.) O le mea lenā na fesoasoani iā Bob lea na taʻua muamua. Ina ua fai atu le fomaʻi o le a faaleoleo le toto pe a manaʻomia, na vave ona ia tali atu e tusa lava pe tulaʻi mai se tulaga e manaʻomia ai ona tui le toto, e na te teena ma o le a ia alu ese loa mai i le falemaʻi. Mulimuli ane na faapea mai Bob, “Ou te leʻi faalotolotolua i laʻu faaiʻuga na fai ma ou te lē popole po o le ā e tupu.”
Pe afai e malosi lo tatou faatuatua, o le a mafai ona tatou tutumau e tusa lava po o ā tofotofoga e tatou te fesagaʻia (Tagaʻi i le palakalafa e 17)
17. O le ā e tatou te aʻoaʻoina mai i le mea na tupu iā Bob? (Tagaʻi foʻi i le ata.)
17 Na mafai ona mausalī le loto o Bob, ona na muaʻi faia lana faaiʻuga a o leʻi taitai alu i le falemaʻi. Muamua, na naunau o ia e faafiafia Ieova. Lua, na ia filigā e suʻesuʻe po o le ā le faamatalaga a le Tusi Paia ma a tatou lomiga, e faatatau i le paia o le ola ma le toto. Tolu, na ia mautinoa o le mulimuli i taʻiala a Ieova o le a ia maua ai aogā e tumau. E mafai foʻi ona mausalī o tatou loto e tusa lava po o ā faigatā e tatou te fesagaʻia.
O loo osofaʻia e Parako ma lana ʻautau le ʻautau a Sesera (Tagaʻi i le palakalafa e 18)
18. E faapefea i le faaaʻoaʻoga a Parako ona fesoasoani iā i tatou ia maufaatuatuaina Ieova? (Tagaʻi i le ata i le faavaa.)
18 Ia maufaatuatuaina Ieova. Mātau pe na faapefea ona taulau Parako, ona o lona maufaatuatuaina o le taʻitaʻiga a Ieova. E ui lava e leʻi vaaia se talita po o se tao i le atunuu atoa, ae na faatonuina o ia e Ieova e tau ma ʻautau ua faaauupegaina lelei a Sesera le taʻitaʻiʻau o tagata Kanana. (Faama. 5:8) Na faatonuina Parako e le perofeta fafine o Tepora, ina ia alu ifo i le fanua laugatasi e tau ma Sesera ma ana kariota e 900. E ui lava na iloa e Parako e ono faigofie ona manumalo kariota a Sesera ona o le laugatasi o le fanua, ae na ia usitaʻia pea lenā faatonuga. A o ō ifo le ʻautau mai i le mauga o Tapora, na faatotō ifo e Ieova timuga. Na mau uili o kariota i le palapala ma na tuuina atu e Ieova le manumalo iā Parako. (Faama. 4:1-7, 10, 13-16) O le a tatou manumalo foʻi, pe a tatou maufaatuatuaina Ieova ma lana taʻitaʻiga e ala mai i lana faalapotopotoga.—Teu. 31:6.
IA MAUMAUAʻI INA IA TUTUMAU
19. Aiseā e te manaʻo ai ia tutumau?
19 E faaauau pea ona tatou tauivi ina ia tutumau a o tatou ola ai i lenei faiga o mea. (1 Timo. 6:11, 12; 2 Pete. 3:17) Ia aua lava neʻi o tatou fefefe ona o sauāga, omiga e iloagatā, manatu faaletagata, manatu taufaasesē, ma mea e faalavelavea ai. (Efe. 4:14) Nai lo o lea, ia tatou tutumau ma ia mausalī i la tatou auaunaga iā Ieova, ma ia maumauaʻi e usitaʻia ana poloaʻiga. Ae i le taimi e tasi, e manaʻomia foʻi ona tatou magafagafa. I le mataupu o loo sosoo mai, o le a talanoaina ai pe e faapefea ona avea Ieova ma Iesu, ma faaaʻoaʻoga silisili o le magafagafa.
PESE 129 O le a Faaauau Ona Tatou Tumau
a Talu mai taimi o Atamu ma Eva, ua taumafai Satani e faatalitonu tagata i le manatu e tatau ona filifili e i latou lava po o le ā le mea saʻo ma le mea sesē. E manaʻo foʻi ia tatou manatu faapena i tulafono a Ieova, ma so o se taʻiala mai i lana faalapotopotoga. O le a fesoasoani lenei mataupu e leoleoina ai i tatou mai i le agaga fia tutoʻatasi o le lalolagi a Satani, ma faamalosia i tatou ina ia tumau pea i le itu a Ieova.
b Mo nisi faamatalaga i le silafaga a le Atua i le toto, tagaʻi i le lesona 39 o le tusi Se Olaga Fiafia e Faavavau!
c Tagaʻi i le jw.org i le mataupu “Ia Puipuia Oe Lava Mai i Faamatalaga Sesē.”
d Mo nisi faamatalaga, tagaʻi i le mataupu 13 ma le 14 o le tusi Toe Faafoʻisia le Tapuaʻiga Mamā iā Ieova!