Se Uiga Faale-Atua e Sili Ona Tautele Nai lo o Taimane
Ua loa ona avea taimane ma maatāua. O nisi taimane e faitau miliona tālā o latou tau. I le silafaga a le Atua, pe e iai nisi mea e sili atu ona tautele nai lo o taimane po o isi maatāua?
O Haykanush o se tagata talaʻi e leʻi papatiso e nofo i Armenia, na ia mauaina se tusi folau i se nofoaga e lata ane i lona fale. Sa maua i totonu o le tusi folau ni debit card ma se tupe telē. Na ia taʻu atu i lana tane, o ia foʻi o se tagata talaʻi e leʻi papatiso.
Na iai se faafitauli tugā tautupe a le ulugalii, ma na nofo aitalafu i laʻua, peitaʻi na la filifili e toe faafoʻi le tupe i le tuatusi o loo tusia i le tusifolau. Na matuā maofa le tamāloa e ona le tupe faapea ma lona aiga. Na faamatala atu e Haykanush ma lana tane, o mea na la aʻoaʻoina mai i le Tusi Paia ua avea ai i laʻua ma tagata faamaoni. Sa la manatu e tatau ona la faamaoni, ma sa la faaaogāina lenā avanoa e talanoa ai e faatatau i Molimau a Ieova, ma tuu ai ni lomiga i le aiga.
Na mananaʻo le aiga e ave se taui tautupe iā Haykanush, peitaʻi sa ia teena. I le aso na sosoo ai, na asiasi atu ai le avā a le tamāloa i le fale o le ulugalii, ma tauanau i laʻua e talia se mama taimane, o se faailoga o lo latou talisapaia.
E pei o lenā aiga, e toʻatele tagata o le a maofa i le faamaoni o Haykanush ma lana tane. Ae po o le a faateʻia ai ea Ieova? O le ā lana silasila i lo laʻua faamaoni? Pe sa tauia lo laʻua faamaoni?
E SILI ATU ONA TAUTELE UIGA NAI LO O MEAFAITINO
E lē faigatā tali o na fesili. O le māfuaaga, e talitonu auauna a le Atua o le faaalia o uiga o Ieova e sili atu ona tautele i lana silafaga nai lo o taimane, auro, ma isi meafaitino. Ioe, e ese le silafaga a Ieova mai le vaaiga a le toʻatele o tagata, i le mea e tāua ma le mea e lē tāua. (Isa. 55:8, 9) Ae i auauna a Ieova, o lo latou faaatagia atu o ona uiga i se auala e sili atu ona lelei, o le mea lea e sili ona tautele.
E tatou te iloa lenei mea i le auala o loo faamatala ai i le Tusi Paia le faautaga loloto ma le atamai. Ua taʻua i le Faataoto 3:13-15: “E fiafia le tagata ua maua le atamai, ma le tagata ua iai le faautaga loloto, auā e sili atu le mauaina o le poto i lo o le mauaina o oloa e pei o le siliva ma le auro. E sili lona tautele nai lo o maa tāua, e lē mafai foʻi ona faatusaina i isi mea uma e te fiafia i ai.” E lē taumatea e faatāuaina e Ieova na uiga e sili atu nai lo o ʻoa faaletino.
Ae faapefea la le faamaoni?
O Ieova lava ia e faamaoni, “e lē mafai ona tala pepelo.” (Tito 1:2) Na ia faagaeeina le aposetolo o Paulo e tusi i Kerisiano Eperu i le uluaʻi senituri: “Ia tatalo e lē aunoa mo i matou, auā ua matou talitonu ua iā i matou se lotofuatiaifo lelei, ona matou te mananaʻo ina ia faia mea uma ma le faamaoni.”—Epe. 13:18.
Na faataatia e Iesu Keriso se faaaʻoaʻoga lelei o le faamaoni. O se faaaʻoaʻoga, na faapea mai le Ositaulaga Sili o Kaiafa: “Ou te fai atu iā te oe, ia e tautō i le Atua soifua e te tautala i le mea moni, ma taʻu mai iā i matou po o oe o le Keriso, le Alo o le Atua!” Sa faailoa ma le faamaoni e Iesu o ia lava o le Mesia, e ui lava o lana taʻutinoga faamaoni o le a tuuaʻia ai o ia e le ʻau Saniterini o se tagata e upuleaga i le Atua, ma fasiotia ai o ia.—Mata. 26:63-67.
Ae faapefea i tatou? Po o le a tatou faamaoni ea i tulaga e lē faailoaina ai mea moni uma, po o le lē taʻuina o le mea saʻo ina ia maua ai ni meafaitino?
O LE LUʻI O LE FAAMAONI
O le mea moni, e faigatā ona faaalia le faamaoni i nei aso e gata ai ona ua toʻatele e ʻalolofa iā i latou lava ma mananaʻo tele i tupe.’ (2 Timo. 3:2) O faafitauli tautupe po o le faigatā ona maua o galuega, ua avea ai le faamaoni o se luʻi. Ua manatu le toʻatele, e lē afāina le gaoi, taufaasesē, po o le auai i isi faiga lē faamaoni. Ua taatele lenei manatu, ona e leai se manuia faaletino e maua pe a faamaoni. E oo lava i nisi Kerisiano, ua latou faia faaiʻuga lē lelei ma leiloa o latou tulaga lelei i le faapotopotoga ona o “faiga faapiʻopiʻo.”—1 Timo. 3:8; Tito 1:7.
Ae o le toʻatele o Kerisiano ua latou faaaʻoaʻo iā Iesu. Ua latou iloa e sili atu ona tāua uiga faale-Atua nai lo o so o se tulaga tamaoaiga. O Kerisiano talavou, e latou te lē kopi ina ia maua ai ni togi lelei i le aʻoga. (Faata. 20:23) E moni, e lē o taimi uma e tauia ai le faamaoni e pei o Haykanush. Peitaʻi, o le faamaoni o se mea e tonu i le silafaga a le Atua, ma e mafai ona tatou tausia ai se lotofuatiaifo mamā lea e tāua tele.
Na lelei ona faataʻitaʻi mai e Gagik lenā tulaga. Ua ia faapea mai: “A o leʻi avea aʻu ma Kerisiano, sa ou galue i se kamupani telē lea e lē manaʻo le pule e totogi lafoga, e ala i le lipotia na o sina vaega o le tupe faasili. I le avea ai ma faatonu, na faatalitalia aʻu e totogi tupe le tagata mai le ofisa o lafoga ina ia aua neʻi lipotia faiga piʻopiʻo a le kamupani. O le iʻuga, na iai soʻu talaaga o se tagata lē faamaoni. Ina ua ou aʻoaʻoina le upu moni, na ou musu e toe faia lenei gaoioiga e ui lava e totogi lelei le galuega. Nai lo o lea, na faatū laʻu lava pisinisi. E mai lava i le amataga, na lesitala faaletulafono laʻu kamupani ma totogi uma aʻu lafoga.”—2 Kori. 8:21.
Ua faapea mai Gagik: “Na toetoe lava ʻafa na faaitiitia ai laʻu tupe maua, o lea o se luʻi le tausia o loʻu aiga. Peitaʻi, ua sili atu loʻu fiafia i le taimi lenei. Ua ou maua se lotofuatiaifo mamā i luma o Ieova. Ua fai aʻu ma faaaʻoaʻoga lelei i oʻu atalii e toʻalua, ma ua ou agavaa mo nisi faaeaga i le faapotopotoga. Ua iloa nei aʻu e le ʻau suʻetusi ma isi e matou faipisinisi, o se tagata faamaoni.”
O IEOVA LE PUNA O LE FESOASOANI
E alofa Ieova iā i latou e faamamaluina ana aʻoaʻoga, e ala i le faaalia o ona uiga matagofie, e aofia ai le faamaoni. (Tito 2:10) Na ia faagaeeina le tupu o Tavita ina ia aumaia lenei faamautinoaga: “Sa ou talavou, a o lenei ua ou toeaina, ae ou te leʻi iloa lava se tagata amiotonu ua tuulafoaʻiina, po o ana fanau o ʻaisi mo ni meaʻai.”—Sala. 37:25.
E faamaonia lenā vala i mea na tutupu i le auauna faamaoni o Ruta. Sa la nonofo pea ma Naomi le tinā o lana tane, nai lo o le tuua o ia ina ua matua. Na siitia atu Ruta i Isaraelu ina ia tapuaʻi i le Atua moni. (Ruta 1:16, 17) A o iai Ruta i Isaraelu, sa ia faamaoni, galue mamafa, ma tinoū i le aoaoina o mea sa faatulaga i le Tulafono. E pei o le mea na tupu mulimuli ane iā Tavita, e leʻi tuulafoaʻia e Ieova Ruta ma Naomi. (Ruta 2:2-18) Sa sili atu mea na faia e Ieova mo Ruta nai lo o le tausiga faaletino. Na filifilia o ia e avea ma sē e tupuga mai ai le tupu o Tavita, ma le Mesia folafolaina.—Ruta 4:13-17; Mata. 1:5, 16.
O nisi auauna a Ieova, atonu e matuā faigatā mo i latou le mauaina o mea manaʻomia. Nai lo o le saʻili i se auala faigofie ae lē faamaoni, ua latou tauivi e galulue Faata. 12:24; Efe. 4:28.
mamafa ma filigā. Ua latou faailoa mai ai le faatāuaina o uiga matagofie o le Atua, e aofia ai le faamaoni, e sili atu nai lo o meafaitino.—E pei o Ruta i aso anamua, ua faaalia e Kerisiano i le lalolagi aoao le faatuatua i le mana fesoasoani o Ieova. Ua latou matuā maufaatuatuaina Lē e ana le folafolaga lenei o loo faamauina i lana Afioga: “Ou te lē tuua lava oe, ma ou te lē tuulafoaʻia lava oe.” (Epe. 13:5) Ua faaalia pea e Ieova e mafai ma o le a ia fesoasoani i ē e lē tagolima ae faamaoni i taimi uma. E faamaoni pea o ia i lana folafolaga e faatatau i le saunia o mea manaʻomia i le olaga.—Mata. 6:33.
Ioe, e ono faatāuaina e tagata taimane ma isi mea tautele. Peitaʻi, e tatou te mautinoa e sili atu ona tāua i lo tatou Tamā i le lagi lo tatou faaalia o le faamaoni ma isi uiga lelei, ia e sili atu ona tautele nai lo o maatāua!
O le faamaoni e tatou te maua ai se lotofuatiaifo mamā ma le saʻolotoga e tautala atu ai i le faiva