1. Aiseā ua avea ai Ieova ma Fai Ipu Omea sili?

IĀ Novema 2010, na faia ai i Lonetona i Egelani se tauofoga e toeitiiti 70 miliona tālā Amerika, mo se ipu ʻele mai i Saina, na faia i le senituri lona 18. E manino mai, e mafai e se fai ipu omea ona liua se mea e mauagofie ma faatauvaa e pei o le ʻele, e faia ai se ipu matagofie ma taugatā. Peitaʻi, e leai se fai ipu omea faaletagata e mafai ona faatusa atu iā Ieova. Mulimuli ane i le aso lona ono o le foafoaga, na faia ai e le Atua “mai i le efuefu o le eleele,” se tamāloa lelei atoatoa ma tuu atu iā te ia le tomai e faaatagia mai ai uiga o Lē na foafoaina o ia. (Kene. 2:7) Na matuā talafeagai ona taʻua “o le atalii o le Atua” lenā tamāloa lelei atoatoa o Atamu.—Luka 3:38.

2, 3. E faapefea ona tatou faaaʻoaʻo i le uiga na faaalia e tagata Isaraelu na salamō?

² Peitaʻi e leʻi toe avea Atamu ma atalii o le Atua, ina ua fouvale i Lē na faia o ia. E ui i lea, a o faagasolo tupulaga, na iai “se vaega e toʻatele” na tupuga mai iā Atamu na latou lagolagoina le pule silisili ese a le Atua. (Epe. 12:1) O lo latou lotomaulalo e gauaʻi i Lē na foafoaina i latou, ua faailoa atu ai lo latou mananaʻo e avea o ia ma o latou Tamā ma Lē e faatonutonuina i latou, nai lo o Satani.  (Ioa. 8:44) O lo latou faamaoni i le Atua, ua faamanatu mai ai upu a Isaia e faatatau i tagata Isaraelu na salamō: “Ieova e, o oe o lo matou Tamā. O i matou o omea, a o oe o lo matou Fai Ipu Omea; o le galuega a ou aao i matou uma.”—Isa. 64:8.

³ I aso nei, o le uiga lotomaulalo ma le gauaʻi foʻi lenā o loo taumafai i latou o loo tapuaʻi iā Ieova i le agaga ma le upu moni e faaalia. E latou te manatu o se faaeaga le taʻua o Ieova o le Tamā, ma gauaʻi iā te ia o lo latou Fai Ipu Omea. Pe e te manatu iā te oe o se ʻele vaivai i aao o le Atua, e te lotomalie e na te faatonutonuina oe ina ia avea ma ipu e finagalo malie i ai o ia? Pe e te vaai i ou uso ma tuafafine faaleagaga, o ni ē o loo faaauau ona faatonutonuina e le Atua? Ina ia taliina na fesili, o le a tatou iloiloina ni vala se tolu i le auala e galue ai Ieova o se Fai Ipu Omea: Le auala na te filifilia ai i latou na te faatonutonuina, le māfuaaga na te faatonutonuina ai i latou, ma le auala e na te faia ai faapea.

4. E faapefea ona filifilia e Ieova i latou na te tosina atu iā te ia? Aumai ni faaaʻoaʻoga.

⁴ Pe a silasila mai Ieova i tagata, e lē uaʻi o ia i o latou foliga vaaia. Nai lo lea, e na te iloiloina o latou loto po o tagata lilo i totonu. (Faitau le 1 Samuelu 16:7e.) Na faataʻitaʻia manino mai lenā manatu ina ua faavaeina e le Atua le faapotopotoga Kerisiano. E na te tosina atu iā te ia ma lona Alo tagata e foliga mai e lē tāua i le vaaiga a tagata. (Ioa. 6:44) O se tasi o na tagata o le Faresaio o Saulo, o lē na “upuleaga muamua ma faasauā, ma o se tagata fiasili.” (1 Timo. 1:13) Peitaʻi, e leʻi silasila lē “na te suʻesuʻeina loto” iā Saulo o sē e lē aogā. (Faata. 17:3) Nai lo o lea, na silasila le Atua iā te ia o se ʻele e mafai ona faatonutonuina e avea ma ipu matagofie, o se ʻipu ua filifilia’ e molimau atu i “nuu ese faapea foʻi ma tupu, ma le fanauga a Isaraelu.” (Galu. 9:15) E silasila foʻi le Atua i isi e ono avea ma “ipu e faaaogā mo mea taʻuleleia,” e aofia ai i latou na avea muamua ma tagata onanā, lē mamā tau amio ma gāoi. (Roma 9:21; 1 Kori. 6:9-11) Ua latou faatagaina Ieova e faatonutonuina i latou a o latou mauaina le poto saʻo i le Afioga a le Atua ma faaalia le faatuatua.

5, 6. E faapefea i lo tatou faatuatuaina o Ieova o lo tatou fai ipu omea ona aafia ai la tatou vaaiga (a) i tagata o le oganuu? (e) i o tatou uso ma tuafāfine?

⁵ E faapefea ona fesoasoani iā i tatou manatu e pei ona taʻua i luga? O lo tatou faatuatuaina o le tomai o Ieova e suʻesuʻe ai loto ma tosina atu iā te ia i latou ua ia filifilia, e taofia ai i tatou mai i le faamasinoina o isi i le oganuu ma le faapotopotoga. Seʻi o tatou iloiloina le faaaʻoaʻoga a Michael, na ia faapea mai: “Pe a asiasi mai Molimau a Ieova iā te aʻu, ou te tapunia le faitotoʻa. Sa ou matuā lē faaaloalo lava. Ae mulimuli ane, na ou feiloaʻi ai i se aiga na ou maofa i a latou amioga. I se tasi o aso, na faateʻia aʻu i le iloaina o i latou o ni Molimau a Ieova. O a latou amio, na uunaʻia ai aʻu e iloilo le māfuaaga na ou faailoga tagata ai. Na ou iloa mulimuli ane, sa faavae oʻu manatu i mea ou te leʻi iloa ma tala feaveaʻi.” Sa talia e Michael se suʻesuʻega faale-Tusi Paia, ina ia iloa mea moni e faatatau i Molimau a Ieova. Mulimuli ane, sa ia talia le upu moni ma auai i le auaunaga faataimi atoa.

⁶ O le taliaina o Ieova o lo tatou Fai Ipu Omea, e aafia ai foʻi o tatou manatu i o tatou uso talitonu. Pe e tutusa lau vaaiga i uso ma tuafāfine ma le silafaga a le Atua, e lē o i latou o ni ipu ua uma ona fai, ae o loo galue ai pea le Atua? E na te silafia le tagata lilo i totonu faapea le ituaiga tagata o le a oo iai, pe a ia fesoasoani iā i latou. O lea, e silasila Ieova i itu lelei o tagata, ma e lē uaʻi atu o ia i o latou tulaga lē lelei atoatoa lea e lē tumau. (Sala. 130:3) E mafai ona tatou faataʻitaʻi iā  te ia e ala i le vaai i itu lelei o ana auauna. E mafai ona tatou galulue faatasi ma lo tatou Fai Ipu Omea, e ala i le lagolagosua i o tatou uso ma tuafāfine, a o latou taumafai e agaʻigaʻi i luma faaleagaga. (1 Tesa. 5:14, 15) E tatau ona taʻimua toeaina i lea vaega i le avea ai o ni “meaalofa i tagata.”—Efe. 4:8, 11-13.

7. Aiseā e te talisapaia ai aʻoaʻiga a Ieova?

⁷ Atonu ua e faalogo a o faapea mai se tasi: ʻNa ou faatoʻā talisapaia atoatoa aʻoaʻiga mai i oʻu mātua, ina ua fai laʻu fanau.’ A o faateleina lo tatou poto masani i le olaga, o le a amata ona tatou vaai i aʻoaʻiga e pei o le silafaga a Ieova, o se auala e faailoa mai ai lona alofa. (Faitau le Eperu 12:5, 6, 11.) O le alofa o Ieova mo lana fanau, ua faapalepale ai o ia i le faatonutonuina o i tatou. E finagalo o ia ina ia tatou atamamai ma fiafia, ma alolofa iā te ia. (Faata. 23:15) E lē fiafia o ia pe a tatou mafatia, pe manaʻo foʻi ina ia tatou feoti e pei o le ʻfanau o le toʻasā,’ o le tofi lenā na tuufaasolo mai iā Atamu.—Efe. 2:2, 3.

8, 9. Ua faapefea ona aʻoaʻoina e Ieova i tatou i aso nei, ma o le a faapefea ona faaauau i le lumanaʻi?

⁸ I le avea ʻma fanau o le toʻasā,’ na tatou faaalia ai le tele o uiga e lē fiafia ai le Atua, e oo lava i nisi o uiga e pei o ni manufeʻai. Ae e tatou te faafetaia le faatonutonuina e Ieova o i tatou, ua suia ai i tatou ma avea e pei o ni mamoe. (Isa. 11:6-8; Kolo. 3:9, 10) O lea, o le siʻomaga ua faatonutonuina ai i tatou e Ieova, e tai pei o se parataiso faaleagaga i aso nei. E tatou te lagona le malupuipuia e ui ina siʻomia i tatou e se lalolagi amioleaga. O lenei foʻi siʻomaga, ua maua ai le alofa moni e i latou na ola aʻe i aiga e leai se alofa. (Ioa. 13:35) Ua aʻoaʻoina ai i tatou e faaalia le alofa i isi. Ae sili atu i lenā, ua tatou iloa ai Ieova ma tofo i lona alofa faatamā.—Iako. 4:8.

⁹ I le lalolagi fou, o le a tatou mauaina atoatoa ai faamanuiaga o le parataiso faaleagaga, ma o le a tatou ola ai i le parataiso faaletino, i lalo o le pulega o le Malo o le Atua. A o faagasolo lenā taimi o le toe faafouina o mea, o le a faaauau ona faatonutonuina e Ieova tagata i le lalolagi, ma aʻoaʻoina i latou i se auala silisili. (Isa. 11:9) E lē gata i lea, o le a foaʻi mai e Ieova le tino ma le mafaufau lelei atoatoa ina ia mafai ai ona tatou taliaina ana aʻoaʻoga, ma faia lona finagalo e aunoa ma se ponā. Seʻi o tatou maumauaʻi nei e faaauau ona gauaʻi iā Ieova, ma faailoa atu iā te ia e tatou te vaai i ana aʻoaʻiga o se faailoaga o lona alofa iā i tatou.—Faata. 3:11, 12.

10. Na faapefea ona faaatagia mai e Iesu le tomai ma le onosaʻi o le Fai Ipu Omea sili?

¹⁰ E pei o se fai ipu omea tomai, e silafia e Ieova le ituaiga o “ʻele” e iai i tatou ona fua ai lea o le auala e faatonutonuina ai i tatou. (Faitau le Salamo 103:10-14.) E feutagaʻi foʻi Ieova ma i tatou taʻitoʻatasi, e na te silafia o tatou vaivaiga, le mea e gata ai lo tatou malosi, ma lo tatou tuputupu aʻe faaleagaga. Ua faaatagia mai e lona Alo lana silafaga e faatatau i ana auauna lē lelei atoatoa. O le manatu i le auala na feutagaʻi ai Iesu ma vaivaiga a le ʻauaposetolo, aemaise lava taimi e fefinauaʻi ai po o ai e sili. Pe afai e te molimauina i taimi e vevela ai fefinauaʻiga a le ʻauaposetolo, pe e te manatu iā i latou o ni ē e agamalu ma faatonutonu gofie? E ui i lea, e leʻi sesē le vaai a Iesu iā i latou. Na silafia e Iesu, e mafai ona faatonutonuina ona aposetolo faamaoni, e ala i le avatu o fautuaga i se auala agalelei ma le onosaʻi, faapea lo latou mātauina o lana faaaʻoaʻoga lotomaulalo. (Mare. 9:33-37; 10:37, 41-45; Luka 22:24-27) Ina ua mavae le toetū o Iesu ma le liligiina mai o le agaga paia, e leʻi toe uaʻi le ʻauaposetolo i tulaga po o ai e sili. Nai lo o  lea, na latou uaʻi atu i le galuega na tuuina mai iā i latou.—Galu. 5:42.

11. O ā auala na faamaonia ai e Tavita o ia o se ʻele vaivai, ma e faapefea ona tatou faataʻitaʻi iā te ia?

¹¹ Ua faatonutonuina e Ieova ana auauna i aso nei e ala mai i lana Afioga, lona agaga paia, ma le faapotopotoga Kerisiano. E mafai e le Afioga a le Atua ona faatonutonuina i tatou, pe a faitau māeʻaeʻa, manatunatu loloto i ai, ma talosaga iā Ieova e fesoasoani mai ina ia faatatauina. Na tusi Tavita: “Ua ou manatua oe i loʻu moega, ou te mafaufau loloto foʻi iā te oe i leoleoga o le pō.” (Sala. 63:6) Na ia tusi foʻi: “Ou te vivii atu iā Ieova o lē na fautuaina aʻu. Ma i le pō e faasaʻoina ai aʻu e oʻu manatunatuga loloto.” (Sala. 16:7) Ioe, na faataga e Tavita fautuaga a le Atua e pāʻia ai ona faalogona loloto, lea na mafai ona faatonutonuina ai ona manatunatuga ma faalogona, e ui lava sa malolosi fautuaga. (2 Samu. 12:1-13) Maʻeu se faaaʻoaʻoga lelei o le lotomaulalo ma le gauaʻi na faataatia e Tavita mo i tatou! Pe e te manatunatu loloto i le Afioga a le Atua ma faatagaina e pāʻia ou faalogona loloto? Pe e mafai ona faaauau ona e faia faapea?—Sala. 1:2, 3.

12, 13. E faapefea ona faatonutonuina e Ieova i tatou e ala mai i le agaga paia ma le faapotopotoga Kerisiano?

¹² E tele auala e mafai ona faatonutonuina ai i tatou e le agaga paia. O se faaaʻoaʻoga, e mafai ona fesoasoani iā i tatou e atiaʻe uiga o Keriso, lea e aofia ai vala o le fua o le agaga paia. (Kala. 5:22, 23) O se tasi o vala o fua o le agaga paia o le alofa. E tatou te alolofa i le Atua ma mananaʻo e usiusitaʻi ma faatonutonuina e ia i tatou, ma iloaina e lē mamafa ana poloaʻiga. E mafai ona foaʻi mai e le agaga paia le malosi e teena ai taaʻiga malolosi a le lalolagi ma lona agaga leaga. (Efe. 2:2) A o talavou le aposetolo o Paulo, na matuā aafia o ia i le agaga faamaualuga o taʻitaʻi lotu Iutaia, ae na ia tusi mulimuli ane: “O mea uma lava, ua ou maua le malosi mai iā te ia o lē na foaʻi maia iā te aʻu le mana.” (Fili. 4:13) O lea, seʻi o tatou faataʻitaʻi iā Paulo ma talosaga pea mo Lona agaga paia. E  amanaʻia e Ieova talosaga faamaoni a ē agamalu.—Sala. 10:17.

¹³ E faaaogā e Ieova le faapotopotoga Kerisiano ma ovasia e faatonutonuina i tatou i ni auala patino. O se faaaʻoaʻoga, pe a iloa e toeaina ua tatou feagai ma se faafitauli faaleagaga, ona latou taumafai lea e fesoasoani mai, peitaʻi e lē faavaeina i se atamai faaletagata. (Kala. 6:1) Nai lo o lea, e latou te lotomaulalo ma saʻili i le Atua, talosaga mo le atamai ma le faautaga loloto. A o latou mafaufau i o tatou tulaga, e latou te gaoioi e tusa ma a latou tatalo e ala i le saʻiliʻili i le Afioga a le Atua ma lomiga faa-Kerisiano. O na vala e faaauupegaina ai i latou e aumaia le fesoasoani talafeagai. Pe a latou ofoina mai se fesoasoani i se auala alofa ma agalelei, e pei o le auala e te laʻei ai, pe e te talia a latou fautuaga o se faaaliga lea o le alofa o le Atua iā te oe? O le faia faapea, ua faamaonia atu ai o oe o se ʻele vaivai i aao o Ieova lea o le a ia faatonutonuina, ina ia e maua ai aogā.

14. E ui e pule Ieova i le mea e fai i le ʻele, ae ua faapefea ona faaalia lona faaaloalo i la tatou filifiliga saʻoloto?

¹⁴ O le malamalama i le auala o loo faatonutonuina ai i tatou e le Atua, e fesoasoani i a tatou faiā ma uso talitonu faapea o tatou uiga faaalia i tagata o le oganuu, e aofia ai a tatou suʻesuʻega faale-Tusi Paia. I taimi o le Tusi Paia, e lē tau ina aumaia e se fai ipu omea le ʻele ma amata loa ona galue ai. E muamua ona ia sauniunia le ʻele, e ala i le aveesea o maa ma isi mea e lē manaʻomia. I le itu faaleagaga, e fesoasoani le Atua i tagata taʻitoʻatasi o ē e lotomalilie ina ia mafai ona ia faatonutonuina i latou. E na te lē faamalosia i latou e faia ia suiga, ae na te faailoa mai ana tapulaa amiotonu, ona tuu lea iā i latou e faamamā o latou olaga pe faia fetuunaʻiga.

15, 16. E faapefea ona faailoa atu e tagata aʻoga o le Tusi Paia o loo latou mananaʻo e faatonutonuina i latou e Ieova? Aumai se faataʻitaʻiga.

¹⁵ Manatu i le faaaʻoaʻoga a Tessie, o se tuafafine mai i Ausetalia. Ua faapea mai le tuafafine sa la suʻesuʻe: “Sa faigofie ona talia e Tessie le poto o le Tusi Paia. Peitaʻi, e leʻi agaʻigaʻi i luma faaleagaga o ia ma e leʻi auai foʻi i sauniga faa-Kerisiano. O lea sa ou tatalo ma mafaufau loloto i ai ma ou filifili ai loa e taofi le suʻesuʻega. Peitaʻi e iai se mea mataʻina na tupu. Sa ou mafaufau o la maʻua suʻesuʻega mulimuli lea o le a fai, peitaʻi na faamatala mai e Tessie mea uma iā te aʻu. Na ia faailoa mai na ia lagona lona faagutugutulua ona sa ia fiafia i taaloga faitupe. Peitaʻi, o lea ua ia filifili e tuu lenā masaniga.”

¹⁶ E leʻi umi lava ae amata ona auai Tessie i sauniga ma faaalia uiga faa-Kerisiano, e ui i tauemuga mai i ana aumea. Na toe faapea mai le tuafafine: “Mulimuli ane, na papatiso Tessie ma auauna o se paeonia sauatoa, e ui lava sa iai lana fanau lāiti.” Ioe, pe a amata ona faamamā e tagata aʻoga o le Tusi Paia o latou olaga ina ia faafiafia ai le Atua, o le a ia mafuta vavalalata mai iā i latou ma faatonutonuina i latou ina ia avea ma ipu matagofie.

17. (a) O ā vala e te fiafia i ai i le avea o Ieova ma ou Fai Ipu Omea? (e) O ā isi vala o le faatonutonuina o le a iloiloina i le mataupu o loo mulimuli mai?

¹⁷ I aso nei, e iai lava nisi ipu omea o loo faia i lima o se fai ipu omea, ma e na te faia ma le faaeteete. I se tulaga talitutusa, o loo galue pea lo tatou Fai Ipu Omea iā i tatou ma onosaʻi mai, a o ia faatonutonuina i tatou e ala i ana fautuaga, ma mātauina le auala e tatou te tali atu ai. (Faitau le Salamo 32:8.) Po o e iloa le naunau moni o Ieova iā te oe? Po o e mātauina lona faatonutonuina o oe i ona aao agaalofa? Pe afai o lea, o ā nisi o uiga e fesoasoani iā te oe ia avea ai pei o se ʻele vaivai ma faatonutonu gofie i aao o Ieova? O ā uiga e tatau ona e ʻalofia ina ia aua neʻi avea oe ma ʻele e malō ma faigatā ona faatonutonuina? E faapefea i mātua ona galulue faatasi ma Ieova i le faatonutonuina o a latou fanau? O le a taliina na fesili i le mataupu o loo mulimuli mai.