“MALO LAVA! O ā mai oe i lenei aso?”

E lē taumatea e masani ona e faamālō pe faafeiloaʻi atu faapena i isi. Atonu e aofia ai le faatalofa atu pe opo atu foʻi. E eseese aganuu ma faaupuga e faaaogā e atunuu pe a faamālō atu, ae e tutusa lava le fuafuaga e faamālō atu ai. O le mea moni, o le lē faamālō atu po o le lē tali atu foʻi i se tasi o loo faamālō mai, e ono manatu i ai o se gaoioiga lē alofa pe faaalia ai foʻi le lē faaaloalo.

E ui i lea, e lē o tagata uma e naunau e faamālō pe faafeiloaʻi atu i isi. E faatalatū nisi e fai atu se faamālō ona o le matamumuli pe manatu foʻi e lē amanaʻia e isi i latou. E faigatā i isi ona faamālō atu i tagata e ese o latou atunuu, aganuu, po o tulaga. Peitaʻi, o sina faamālō atu e mafai ona iai ni ona aafiaga lelei.

Ia fesili ifo: ʻO ā aogā o le faamālō atu? O le ā ou te aʻoaʻoina mai i le Afioga a le Atua e faatatau i le faamālō po o le faafeiloaʻi atu i isi?’

Ina ua talia e le aposetolo o Peteru le uluaʻi tagata o Nuu Ese o Konelio i le faapotopotoga Kerisiano, na ia faapea atu: “E lē faailogaina tagata e le Atua.” (Galu. 10:34) Mulimuli ane na tusi Peteru o le finagalo o le Atua mo tagata “ia oo uma lava i le salamō.” (2 Pete. 3:9) Atonu e tatou te manatu o lenā mau e faatatau atu i se tagata o loo ia aʻoaʻoina le upu moni. Peitaʻi, na faalaeiauina foʻi e Peteru Kerisiano: “Ia āva i ituaiga uma o tagata, ia alolofa i le ʻauuso atoa.” (1 Pete. 2:17) Po ua lē talafeagai ai la mo i tatou ona faamālō pe faafeiloaʻi atu i isi e tusa lava po o ā o latou ituaiga, aganuu, po o talaaga? O se auala lenā e tatou te faaalia atu ai le alofa ma le faaaloalo.

Na uunaʻia e le aposetolo o Paulo i latou i le faapotopotoga: “Ia talia e le tasi le isi, e faapei foʻi ona talia i tatou e Keriso.” (Roma 15:7) Na taʻua faapitoa e Paulo uso na avea ma “faamalosiau” iā te ia. Ua matuā sili atu la ona manaʻomia e uso ma tuafāfine ni faamalosiauga i aso nei, ona ua matuā osofaʻia e Satani tagata o le Atua.​—Kolo. 4:11; Faaa. 12:12, 17.

Ua faaalia mai i faaaʻoaʻoga a le Tusi Paia, o le faamālō atu po o le faafeiloaʻi o isi e tele aogā e maua mai ai nai lo o le tau ina lagona ai e isi o loo tatou taliaina i latou.

Ina ua oo i le taimi e tuuina mai ai le ola o le Alo o le Atua i le manava o Maria, na auina mai e Ieova se agelu e talanoa iā Maria. Na amata le faamatalaga a le agelu i le faapea mai: “Malo lava iā te oe o lē ua alofateleina, ua faatasi Ieova ma oe.” Na “matuā faateʻia” Maria pe aiseā ua talanoa mai ai le agelu iā te ia. Ina ua vaaia e le agelu le faateʻia o Maria na faapea mai o ia: “Maria e, aua e te fefe, auā ua alofaina oe e le Atua.” Na faamatala mai e le agelu iā Maria ua finagalo le Atua e fanau mai iā te ia le Mesia. Nai lo o le tumau pea ona lē mautonu, na usiusitaʻi loa Maria ma tali atu: “Faauta! O aʻu o le teine pologa a Ieova! Ia faia iā te aʻu le mea ua e folafolaina mai.”​—Luka 1:26-38.

O se matuā faaeaga lava i lenā agelu le avea ai ma avefeʻau a Ieova, peitaʻi, e leʻi manatu ai o ia o se tulaga faatauvaa tele le talanoa atu i se tagata lē lelei atoatoa. Na amata lana faamatalaga i le faamālō atu. Pe e mafai ona tatou aʻoaʻoina se lesona mai i lenā faaaʻoaʻoga? E tatau ona tatou nofosauni e faamālō atu i isi ma faalaeiau iā i latou. O nai upu e tatou te fai atu e mafai ona fesoasoani i isi, ma faamautinoa atu ai o i latou moni lava o se vaega o tagata o Ieova.

Na iloa lelei e Paulo le toʻatele i faapotopotoga i Asia Itiiti ma Europa. Na taʻua patino i ana tusi igoa o le toʻatele o Kerisiano na momoli i ai ona alofaaga. E tatou te mātauina lenā mea i le Roma mataupu e 16. Na  ia taʻua Fipe o “lo tatou tuafafine,” ma na ia talosaga atu i uso ia latou ʻtalia o ia o se soo o le Alii e faapei ona tatau i le ʻaupaia, ma ia latou fesoasoani iā te ia i so o se mea e na te manaʻomia ai i latou.’ Na ofo alofa atu foʻi Paulo iā Piseka ma Akula ma na ia taʻua e faapea “ou te faafetai atu iā i laʻua, e lē na o aʻu ae atoa foʻi ma faapotopotoga uma i nuu ese.” Na ofo alofa atu o ia i fafine e seāseā o tatou faalogo i ai i aso nei. O se faaaʻoaʻoga na ia taʻua “laʻu pele o Epaineto” faapea “Tufaina ma Tufosa, o fafine o loo galulue malosi o soo o le Alii.” Ioe, na naunau Paulo e momoli atu ona alofaaga i ona uso ma tuafāfine.​—Roma 16:1-16.

Seʻi faaata lo latou olioli i le iloaina na manatua i latou e Paulo. E lē taumatea na matuā faalolotoina lo latou alofa mo Paulo faapea le tasi i le isi. O le faalogo atu foʻi i na alofaaga e mautinoa na faalaeiauina ai isi Kerisiano, ma fesoasoani iā i latou e tutumau ai i le faatuatua. Ioe, o le faafeiloaʻi atu i isi ma le faamālō atu i a latou galuega lelei, e atiaʻe ai faauōga ma autasia ai auauna a le Atua.

Ina ua taunuu Paulo i le uafu i Puteoli ma agaʻi aʻe i Roma, na ō ifo Kerisiano agaʻi i le itu i saute e faafetaui iā te ia. Ina ua ia iloa atu i latou mai i se mea mamao, “ona faafetai ai lea o Paulo i le Atua ma ua lototele ai.” (Galu. 28:13-15) I nisi taimi, atonu e tatou te faamālō atu e ala i le tau lava ina ʻataʻata atu pe talotalo atu foʻi. Peitaʻi, o gaoioiga laiti faapena e mafai ona faalaeiau ai se tagata atonu o loo lotomafatia pe faanoanoa.

Na manaʻomia ona avatu e le soo o Iakopo ni fautuaga malolosi. O nisi Kerisiano na mulilulua faaleagaga e ala i le faauō atu i le lalolagi. (Iako. 4:4) Ae mātau le auala na amata ai lana tusi:

“O aʻu o Iakopo, o le pologa a le Atua ma le Alii o Iesu Keriso, o le tusi lenei i ituaiga e sefulu lua o loo nonofo solo: Talofa!” (Iako. 1:1) E lē taumatea na faigofie i uso ona talia ana fautuaga, ona na latou mātaulia mai i le faamālō a Iakopo le tutusa o o latou tulaga i luma o le Atua. Ioe, o le faamālō atu ma le lotomaulalo e mafai ona amata ai ni talanoaga lelei e oo lava i mataupu maʻaleʻale.

O se faafeiloaʻiga uigā e ui ina puupuu, e tatau ona faamaoni ma atagia atu ai le alofa moni. E tatau ona faia faapea e tusa lava pe e foliga mai e lē o amanaʻia e le isi tagata. (Mata. 22:39) Na iai se tuafafine i Aialani na taunuu i le Maota mo Sauniga ae o le a amata le sauniga. A o faatopetope atu le tuafafine, na faliu mai se uso, ʻata ma faapea mai: “Malo lava. Fiafia lava ua e sau.” E leʻi fai atu se tala a le tuafafine ae na o le savali ma nofo i lona nofoa.

I ni vaiaso mulimuli ane, na talanoa atu ai le tuafafine i le uso ma faamatala atu sa umi se taimi o ia fesagaʻia ni tulaga faigatā i lona aiga. Na faapea atu le tuafafine: “Na ou matuā mafatia lava i lenā afiafi ma na toeitiiti lava a ou lē sau i le sauniga. E leʻi tele ni mea na ou manatua mai i lenā sauniga, ae na ou manatua lelei lau faamālō mai. Na ou lagona ai le matuā talileleia o aʻu. Faafetai lava.”

E leʻi iloa e le uso aafiaga lelei o lana faamālō atu, e ui e leʻi tele ni ana upu na fai atu. Na faapea mai le uso: “Ina ua ia faailoa mai le tāua o aʻu upu na fai atu, sa ou fiafia ona na ou faia se taumafaiga e faamālō atu iā te ia. Na lelei ai oʻu faalogona.”

Na tusi Solomona: “Inā lafo atu ia lau falaoa i luga o vai, auā e toe maua mai pe a mavae aso e tele.” (Fai. 11:1) O lo tatou iloa o le tāua o le faamālō atu i isi aemaise lava i uso Kerisiano, o le a faaʻoaina ai i latou faapea foʻi i tatou. O lea, aua lava neʻi o tatou manatu māmā i aogā o le faamālō atu i isi pe faafeiloaʻi i latou.