O le tamā o Reopoamo o Solomona, o lē na pule i Isaraelu mo le 40 tausaga. (1 Tu. 11:42) Ina ua maliu Solomona i le 997 T.L.M., ona malaga ai lea o Reopoamo i le itu i mātū mai i Ierusalema e agaʻi atu i Sekema ina ia faauuina o ia e avea ma tupu. (2 No. 10:1) Faamata sa faatalatū Reopoamo e mulimuli i le faaaʻoaʻoga a Solomona, o lē sa lauiloa i le maoaʻe o lona atamai? Na faapefea ona iloa e Reopoamo e lē o toe umi ona tofotofoina lea o lona tomai i le auala e taulima ai mataupu faigatā?

E lē taumatea na iloa e Reopoamo le atuatuvale o tagata i Isaraelu. Mulimuli ane, na ō atu iā te ia ē sa fai ma sui o le nuu ma faailoa atu o latou popolega e faapea: “Na faamamafa e lou tamā a matou amo; a o lenei, ia e faamāmā le galuega faigatā a lou tamā ma lana amo mamafa na ia faaee mai iā i matou, ona matou auauna atu ai lea iā te oe.”​—2 No. 10:3, 4.

Atonu na lagona e Reopoamo le lē mautonu. Pe afai e lolo atu o ia i le manaʻoga o tagata, e ono manaʻomia la ona faaitiitia nisi o meafaitino na latou olioli ai ma lona aiga faapea ona tagata aloaʻia, ma faaitiitia foʻi mea e latou te tāpā mai i tagata. Ae afai e lē lolo atu o ia i le manaʻoga o tagata, atonu o le a fouvale tagata iā te ia. O le ā la le mea o le a ia faia? Na muamua talanoa atu lenei tupu fou i toeaina o ē sa avea ma faufautua iā Solomona. Peitaʻi, sa ia saʻili atu foʻi i fautuaga mai i tauleleʻa e latou te tupulaga faatasi. O le iʻuga, na mulimuli o ia i fautuaga a tauleleʻa ma ia faileagaina ai tagata. Na ia tali atu i tagata: “Ou te faamamafa atili a outou avega ma faaopoopo i ai. Na aʻoaʻi outou e loʻu tamā i sasa, a o aʻu, ou te aʻoaʻi outou i sasa matuitui.”​—2 No. 10:6-14.

O le ā se lesona ua tatou aʻoaʻoina mai i lenā mea? E manino mai, o se gaoioiga atamai i le tele o taimi le faalogo i fautuaga a Kerisiano matutua e taʻumatuaina faaleagaga. O le tele o lo latou poto masani, e latou te ono iloa ai āuga o se filifiliga ma latou aumaia fautuaga lelei.​—Iopu 12:12.

Ina ia tali atu i le fouvalega a le nuu, na faapotopoto ai e Reopoamo lana ʻautau. Peitaʻi, na faalaa ane Ieova ma faapea mai e ala i le perofeta o Semaia: “Aua tou te ō aʻe e tau ma o outou uso, o le fanauga a Isaraelu. Ia taʻitasi ma foʻi atu i lona fale, auā e mai iā te aʻu lenei mea.”​—1 Tu. 12:21-24. *

E mautinoa le faapopoleina o Reopoamo ona o lenā faatonuga. O le ā le manatu o le a iai i tagata e faatatau i le tupu sa faamataʻu i le nuu e faapea o le a sasaina i latou i “sasa matuitui,” ae o lea o le a lē tali atu i lenei fouvalega? (Faatusatusa i le 2 Nofoaiga a Tupu 13:7.) E ui i lea, na “usiusitaʻi” le tupu ma ana ʻautau ʻi le afioga a Ieova, ma ua toe foʻi atu i o latou fale e tusa ai ma lana afioga.’

O le ā e tatou te aʻoaʻoina mai i lenei mea? O se gaoioiga atamai le usiusitaʻi i le Atua e tusa lava pe ulagia ai i tatou. O le usiusitaʻi i le Atua e iʻu atu ai i le mauaina o lona finagalo malie ma ana faamanuiaga.​—Teu. 28:2.

O le ā la sa faia e Reopoamo? O lona usiusitaʻi iā Ieova e na te leʻi faataunuuina ai lana fuafuaga ina ia faasagatau i le nuu faatoʻā faavaeina. Nai lo o lea, na ia uaʻi atu i le fausia o aai i ituaiga o Iuta ma Peniamina lea sa i lalo pea o lana pulega. Na ia “matuā toe faamalosia” le tele o aai. (2 No. 11:5-12) E sili atu i lenā, na iai se taimi na ia usitaʻia ai tulafono a Ieova. Na matuā aafia ituaiga e 10 o le malo o Isaraelu i ifoga tupua a o taʻitaʻia e Ierepoamo. O le toʻatele o i latou mai i na ituaiga sa “lagolagoina pea Reopoamo,” e ala i le faimalaga atu i Ierusalema e lagolagoina le tapuaʻiga moni. (2 No. 11:16, 17) O le mea moni, o le usiusitaʻi o Reopoamo na atili faamalosia ai lona malo.

Peitaʻi, ina ua mautū le malo o Reopoamo, na ia faia se gaoioiga e leʻi faatalitalia. Na ia lafoaʻi le tulafono a Ieova ae liliu atu i tapuaʻiga faapaupau. Aiseā? Pe na māfua ona o lona lolo atu i taaʻiga a lona tinā, o se fafine Amoni? (1 Tu. 14:21) Po o le ā lava le māfuaaga, ae na mulimuli le nuu atoa iā Reopoamo. O lea, na faataga ai e Ieova le tupu o Aikupito o Sesaka ina ia faatoʻilaloina le tele o aai o Iuta, e ui lava ua uma ona faamalosia e Reopoamo na aai.​—1 Tu. 14:22-24; 2 No. 12:1-4.

Na faateteleina le leaga o le tulaga o mea ina ua taunuu atu Sesaka i Ierusalema, lea na pulea e Reopoamo. O le taimi lea na faailoa atu ai e le perofeta o Semaia le feʻau a le Atua iā Reopoamo ma ona perenise e faapea: “Talu ai ua outou tuua aʻu, o le mea lea ou te tuua ai foʻi outou i le lima o Sesaka.” O le ā le tali mai a Reopoamo? Na talia e Reopoamo lenā aʻoaʻiga. Ua faapea mai le Tusi Paia: “Ona faamaulalo ai lea o alii sili o Isaraelu ma le tupu, ua faapea atu: ʻE amiotonu Ieova.’” O le iʻuga, na laveaʻia e Ieova Reopoamo ma le aai o Ierusalema ma lē faaumatia ai.​—2 No. 12:5-7, 12.

Mulimuli ane, na faaauau pea ona pule Reopoamo i le malo i le itu i saute. A o leʻi maliu o ia, na ia tufatufa atu le tele o meaalofa i ona atalii e toʻatele. Atonu na ia faia faapea ina ia latou lē fouvale ai i lo latou uso o Avia, o lē na sosoo ane iā te ia. (2 No. 11:21-23) O lenā gaoioiga na faaalia ai e Reopoamo le faautauta, o se uiga e na te leʻi faaalia i le taimi muamua.

E ui lava i mea lelei na faia e Reopoamo, ae e na te leʻi maua le finagalo malie o le Atua. Ua faamatalaina i le Tusi Paia lana nofoaiga e faapea: “Na ia faia le mea leaga.” Aiseā? Talu ai “e leʻi maumauaʻi lona loto e saʻili atu iā Ieova.”​—2 No. 12:14.

Seʻi mafaufau i iʻuga na oo i ai: E iai taimi na usiusitaʻi ai Reopoamo i le Atua. Sa ia faia foʻi ni mea lelei mo le nuu o Ieova. Peitaʻi, e na te leʻi atiaʻe se faiā vavalalata ma Ieova, pe iai foʻi se faanaunauga moni ina ia faafiafia o Ia. O lea, na ia faia ai mea sesē ma aafia i tapuaʻiga sesē. E te ono taumānatu: ʻIna ua talia e Reopoamo le aʻoaʻiga mai iā Ieova, pe sa ia faia faapea ona o taaʻiga a isi, pe ona o lona salamō moni ma faanaunau moni ina ia faafiafia le Atua?’ (2 No. 11:3, 4; 12:6) I se taimi mulimuli ane, na ia toe faia ai mea leaga. Na matuā eseese o ia ma  le tupu o Tavita, o le tamā o lona tamā. E moni sa faia e Tavita mea sesē, ae na matilatila i lona olaga lona alofa mo Ieova, faamaoni i le tapuaʻiga moni, ma salamō moni mai i ana solitulafono.​—1 Tu. 14:8; Sala. 51:1, 17; 63:1.

E mafai ona tatou aʻoaʻoina se lesona mai iā Reopoamo. O se mea lelei pe a tausia e tagata o latou aiga ma taumafai e ausia ni mea e aogā i o latou olaga. Peitaʻi, ina ia maua le finagalo malie o le Atua, e tatau ona tatou faamuamua pea ma ia matuā lagolagoina le tapuaʻiga moni.

E mafai ona tatou faia faapea pe a tatou taumafai e faatumauina le malosi o lo tatou alofa mo Ieova. E pei lava ona tatou tuu ni fafie i le afi ina ia faaolaola ai pea, e manaʻomia foʻi ona faaolaola pea lo tatou alofa mo le Atua, e ala i le suʻesuʻe e lē aunoa i lana Afioga, manatunatu loloto i mea o loo tatou faitauina, ma finafinau i le tatalo. (Sala. 1:2; Roma 12:12) Pe afai e malosi lo tatou alofa mo Ieova, o le a faamalosia ai lo tatou faanaunauga ina ia faafiafia o ia i mea uma e tatou te faia. O le a uunaʻia ai i tatou e faaalia le salamō moni, pe afai ua tatou faia se mea sesē. I le lē pei o Reopoamo, o le a tumau pea ona tatou faamaoni i le tapuaʻiga moni.​—Iuta 20, 21.