1. O le ā se māfuaaga faapitoa o lo tatou olioli?

MAʻEU le faafiafiaina o i tatou i le faalogo atu i le faatelega o loo olioli ai tagata o Ieova! I le tausaga na teʻa nei, na tatou faia ai e lē aunoa le silia i le 10,000,000 suʻesuʻega faale-Tusi Paia. E faailoa mai i lenei mea o loo faasusulu atu e auauna a le Atua lo latou malamalama. Seʻi mafaufau foʻi i le faitau miliona o ē fiafia na auai mai i le Faamanatuga. Ua mafai ona latou aʻoaʻoina e faatatau i le alofa o Ieova na faaalia e ala i le saunia o le togiola.​—1 Ioa. 4:9.

2, 3. (a) O le ā le luʻi e lē o taofia ai i tatou mai i le ʻsusulu atu e pei o molī e faamalamalama aʻi?’ (e) O le ā o le a tatou iloiloina e tusa ai ma le fetalaiga a Iesu i le Mataio 5:14-16?

² I le lalolagi aoao, e tele gagana eseese e tautatala ai tagata o Ieova. E ui i lea, e lē taofia ai i tatou mai i le ofoina atu ma le autasi o le viiga i lo tatou Tamā o Ieova. (Faaa. 7:9) E tusa lava po o le ā la tatou gagana po o fea foʻi e tatou te nonofo ai, e mafai lava ona tatou susulu atu “e pei o molī e faamalamalama aʻi le lalolagi.”​—Fili. 2:15.

³ O le faatelega o loo tatou molimauina, le autasi ua tatou olioli ai, ma le uiga mataala o loo tatou taumafai e faatumauina, e  saosaolaumea uma i lo tatou avatuina o le viiga iā Ieova. I lenei mataupu, o le a tatou iloiloina ai auala o loo tatou faia ai faapea.​—Faitau le Mataio 5:14-16.

4, 5. (a) O le ā se isi auala e faasusulu atu ai lo tatou malamalama e ese mai i le auai i le talaʻiga? (e) O ā aogā e ono maua pe a tatou faaalia atu uiga faaleuō? (Tagaʻi i le ata i luga aʻe o le matua.)

⁴ O loo taʻua i le mataupu “Susulu Atu le Malamalama i le Pogisa,” lea na lomia i Le Olomatamata faa-Peretania o Iuni 1, 1925: ʻE leai se tasi e mafai ona tumau ma le faamaoni i le Alii i nei aso o totoe, seʻi vaganā ua ia faaaogā le avanoa e faasusulu atu ai lona malamalama. E tatau ona ia faia faapea e ala i le faailoa atu o le tala lelei i tagata i le lalolagi, ma ola e ōgatusa ma lenā malamalama.’ E manino mai la, o se tasi o auala e faasusulu atu ai lo tatou malamalama, o le talaʻia lea o le tala lelei ma faia isi ma soo. (Mata. 28:19, 20) E lē gata i lea, e mafai ona tatou viia Ieova e ala i a tatou amioga o ni Kerisiano. E mātauina e tagata o aiga ma tagata feoaʻi a tatou amioga. O lo tatou ʻataʻata atu faaleuō ma faafeiloaʻi atu ma le māfana, e faailoa atu ai iā i latou le tele o mea e faatatau i lo tatou Atua.

⁵ Na fetalai atu Iesu i ona soo, “A outou ulufale atu, ia faafeiloaʻi i le aiga.” (Mata. 10:12) O se tū masani i tagata o le vaipanoa lea na masani ona talaʻi ai Iesu ma le ʻauaposetolo, le valaaulia o tagata ese i o latou fale. E lē faapena le tele o atunuu i aso nei. E ui i lea, o ou foliga fiafia ma faaleuō a o e faailoa atu i se tagata o le aiga le māfuaaga o lou asiasi atu, e masani lava ona faatoʻafilemu ai ona faalogona popole po o le lē fiafia. O sina ʻataʻata atu faaleuō e masani lava o se faafeiloaʻiga sili lea ona lelei. O le tulaga foʻi lenā mo o tatou uso ma tuafāfine o loo faia se sao i talaʻiga i nofoaga faitele e faaaogā ai fata tusi. A o faia sou sao i lenei vala o le faiva, e te ono mātauina ai o le toʻatele o tagata, e latou te faaalia mai le fiafia ona o ou foliga ʻataʻata ma lou faamālō atu i ai. Atonu e uunaʻia ai i latou e ō mai i le fata tusi e ave se lomiga. O ou uiga faaleuō e mafai ona fesoasoani ina ia amata ai se talanoaga.

6. Na faapefea ona faalautele atu e se ulugalii matutua la laʻua faiva?

⁶ E iai se ulugalii matutua i Egelani e lē mafai ona auai i le talaʻiga mai i lea fale i lea fale, ona o ni faafitauli i lo la soifua mālōlōina. Na la filifili e faasusulu atu lo la malamalama e ala i le talaʻi i luma o lo la fale. E la te tuuina ni lomiga faale-Tusi Paia i luga o se laulau na faatū i luma o lo la fale, i le taimi e gasolo mai ai mātua e piki a latou fanau i se aʻoga e latalata ane. Na ave e le toʻatele kopi o le tusi Questions Young People Ask—Answers That Work, Tusi 1 ma le 2 faapea polosiua, ona o lo latou fia iloa. Na faatasi atu foʻi iā i laʻua se tuafafine paeonia mai i la latou faapotopotoga e latou te galulue. O uiga faaleuō o le tuafafine ma taumafaiga faamaoni a le ulugalii, na uunaʻia ai se tasi o matua e talia se suʻesuʻega faale-Tusi Paia.

7. E faapefea ona e fesoasoani i ē e fou mai i lou vaipanoa?

⁷ I tausaga talu ai nei, e tele atunuu ua lolofi atu i ai le toʻatele o tagata sulufaʻi. O le ā e mafai ona e faia e fesoasoani ai iā i latou ina ia iloa Ieova ma lona finagalo? Muamua, aiseā e te lē aʻoaʻoina ai se faafeiloaʻiga i le gagana e tautatala ai tagata e fou atu i lou vaipanoa? O le polokalame o le JW Language o se meafaigaluega e mafai ona fesoasoani iā te oe. Lua, aiseā e te lē taumafai ai e aʻoaʻoina ni nai faamatalaga e faaosofia ai lo latou fiafia? E te ono faasino foʻi i latou i le jw.org ma faailoa i ai le tele o vitiō ma lomiga ua maua i la latou gagana.​—Teu. 10:19.

8, 9. (a) O ā fautuaga aogā o loo tatou maua mai i la tatou sauniga amata o le vaiaso? (e) E faapefea ona fesoasoani mātua i a latou fanau ina ia fai ni sao i sauniga?

⁸ Ua saunia mai ma le alofa e Ieova le Sauniga o le Faiva ma le Olaga Faa-Kerisiano, ina  ia uigā atili ai la tatou faiva i le fanua. O fautuaga aogā o loo tatou maua mai i lenei sauniga, ua fesoasoani i le toʻatele o i tatou ina ia mautinoa atili ai i le auala e fai ai toe asiga ma suʻesuʻega faale-Tusi Paia.

⁹ O le toʻatele o tagata e fou mai e latou te mātauina e faia sao o a tatou fanau i sauniga. Mātua, ia fesoasoani i a outou fanau ina ia faasusulu atu lo latou malamalama, e ala i le aʻoaʻo o i latou ia tali i a latou lava upu. O a latou tali faigofie mai i o latou loto ua fesoasoani i nisi taimi i tagata fiafia ina ia latou talia le upu moni.​—1 Kori. 14:25.

10. E faapefea i le tapuaʻiga a le aiga ona faamalosia ai le autasi?

¹⁰ O se isi auala e faasusulu atu ai lo tatou malamalama, o le faamalosia lea o le autasi i o tatou aiga ma totonu o a tatou faapotopotoga. O se tasi o auala e faia ai faapea e mātua o le faia lea e lē aunoa o le Tapuaʻiga a le Aiga. O le tele o aiga e faaaofia ai le matamata i le TV i le Initaneti a Molimau a Ieova i se aso o le masina. Pe a uma ona matamata i le polokalame, aiseā e lē talanoa ai auala e faatatau ai manatu na taʻua? A o faia le tapuaʻiga a le aiga, e ao ona manatua e se matua o le fesoasoani e manaʻomia e se tamaitiiti laʻitiiti, e ese mai i le fesoasoani e avatu i se talavou. O lea, ia faia ni faatatauga e fetaui lelei o mataupu na talanoaina ina ia aogā i sui taʻitasi o le aiga.​—Sala. 148:12, 13.

11-13. E faapefea i tagata uma ona faamalosia le autasi i le faapotopotoga ma fesoasoani i isi ia faasusulu atu lo latou malamalama?

¹¹ E faapefea i talavou ona faamalosia le autasi i le faapotopotoga ma faalaeiau ai isi ina ia faasusulu atu lo latou malamalama? Pe afai o oe o se talavou Kerisiano, aiseā e lē fai ai ma ou sini le faaalia o le naunau i ē e matutua? E mafai ona e talosaga atu ma le faaaloalo iā i latou e faamatala mai se mea na tupu i la latou auaunaga i le tele o tausaga. O le a matuā faalaeiauina ai oe, ma uunaʻia atili ai outou ma ē matutua ina ia faasusulu atu le malamalama o le upu moni. E mafai foʻi ona fai ma a tatou masani le faafeiloaʻi o ē e auai mai i sauniga i le Maota mo Sauniga. O le faia faapea e faamalosia ai le autasi, ma atonu e uunaʻia ai tagata asiasi mai ina ia faia so latou sao e faasusulu atu lo latou malamalama. E mafai ona e faafeiloaʻi ma le laufofoga fiafia tagata asiasi mai, pe atonu e fesoasoani foʻi e suʻe ni o latou nofoa. Ia taumafai e faafeiloaʻi atu i latou i isi ina ia lagona ai e tagata fou o loo talileleia i latou.

 ¹² Pe a tofia oe e taulima se faatasiga mo le talaʻiga, e tele mea e mafai ona e faia e fesoasoani ai i ē matutua ina ia faia so latou sao i le faiva. Ia faamautinoa ua iai se oganuu e talafeagai lelei ma i latou. I nisi o tulaga, e mafai ona e tofia i latou e galulue faatasi ma se talavou aumalosi e fesoasoani iā i latou. E mafai foʻi ona e faaalia le fetuutuunaʻi iā i latou e tapulaa mea e latou te mafaia, ona o ni faafitauli i le soifua mālōlōina po o o latou tulaga. Ioe, o lou manatu mamafa ma le faautauta e mafai ona fesoasoani i ē talavou ma ē matutua, o ē e tele ma ē e itiiti lo latou tomai ina ia talaʻia ma le maelega le tala lelei.​—Levi. 19:32.

¹³ Na uunaʻia le faisalamo e faapea atu: “Maʻeu le lelei ma le matagofie pe a nonofo faatasi o uso i le autasi!” (Faitau le Salamo 133:1, 2.) Pe a faatasitasi tagata Isaraelu, e tele aogā na latou maua mai i taaʻiga lelei mai i isi tagata tapuaʻi iā Ieova. Na pei lenā mea o se suāuu lelei e faauu ai, lea e faafouina ai se tagata. Aiseā e te lē filifili ai loa e avea oe o se taaʻiga lelei, e ala i le faia o sou sao i le faamalosia o le autasi i le va o ou uso ma tuafāfine? Pe afai ua e faia faapea, e faamālō atu. Pe e mafai ona ʻfaalautele atu lou loto’ e ala i le faamasani lelei i isi i le faapotopotoga ma ia faia e lē aunoa?​—2 Kori. 6:11-13.

14. O le ā e mafai ona e faia ina ia faasusulu atu ai lou malamalama i lou lava vaipanoa?

¹⁴ Ae e faapefea le faateleina o a tatou taumafaiga ina ia faasusulu atu le malamalama o upu moni o le Tusi Paia i lo tatou lava vaipanoa? O au faamatalaga ma gaoioiga agalelei e ono tosina mai ai se tuaoi i le upu moni. Ia fesili ifo: ʻO le ā le vaaiga a oʻu tuaoi iā te aʻu? Po o oʻu tausia le mamā o loʻu fale ma loʻu fanua ina ia saosaolaumea ai i le tulaga mamā o lo matou vaipanoa? Po o oʻu tausolomua e avatu le fesoasoani i isi?’ Pe a outou talatalanoa ma isi Molimau, aiseā e te lē fesili atu ai e faamatala mai ni aafiaga o lo latou agalelei ma amioga lelei i tauaiga, tuaoi, o ē latou te faigaluega ma aʻoʻoga faatasi? E lē taumatea o le a e faalogo i tala o ni mea lelei na tutupu.​—Efe. 5:9.

15. Aiseā e tāua ai le faaauau ona mataala?

¹⁵ E tāua le auala e tatou te mafaufau ai, a o tatou taumafai atili e faasusulu atu lo tatou malamalama. Na fautuaina e lē aunoa e Iesu ona soo ʻia faaauau ona mataala.’ (Mata. 24:42; 25:13; 26:41) O le mea moni, pe a tatou manatu o loo mamao lava le “puapuaga tele” ma o le a oo mai i se taimi pe a mavae atu i tatou, o le a tatou lē faanatinati la e faatino le galuega talaʻi. (Mata. 24:21) O le iʻuga, nai lo o le susulu malosi atu o lo tatou malamalama i o tatou tuaoi, o le a faasolosolo ina vaivai ma iʻu lava ina mou atu.

16, 17. O ā mea e mafai ona e faia ina ia faatumauina ai le uiga o le mataala?

¹⁶ A o faasolo ina matuā leaga nei aso faigatā, e matuā manaʻomia ona faaauau ona tatou mataala. Pe a gaoioi Ieova, o le a gaoioi o ia i le taimi talafeagai lelei. E lē fesiligia lenā mea moni. (Mata. 24:42-44) Ae i le taimi nei, ia faatalitali ma le onosaʻi ma ia faaauau ona mataala. Ia faitau le Afioga a le Atua i aso taʻitasi ma ia mataala i le faia o tatalo. (1 Pete. 4:7) Ia mātau faaaʻoaʻoga mataʻina a uso ma tuafāfine o loo faaalia pea le olioli, a o faaauau ona mataala ma faasusulu atu lo latou malamalama. O se tasi o faaaʻoaʻoga lelei, o le talaaga o le soifuaga o loo i le mataupu “Fitu Sefulu Tausaga o Pipii Pea i le Pito Ofu o le Tagata Iutaia,” lea na lomia i Le Olomatamata o Aperila 15, 2012, itulau e 18-21.

¹⁷ Ia e pisi i galuega lelei ma auai e lē aunoa i aufaatasiga e faalaeiauina ai. O le a e maua ai le tele o le olioli ma o le a e lagona ai le faanatinati o le taimi. (Efe. 5:16) I le 100 tausaga ua mavae, na pisi o tatou uso ma na tele mea na latou faataunuuina. Peitaʻi, e tele atu mea ua tatou faataunuuina i aso nei i le taʻitaʻiga a Ieova. Ua tatou faasusulu atu lo  tatou malamalama i se tulaga e sili atu nai lo o mea na manatu i ai i tausaga ua teʻa.

18, 19. E faapefea ona fesoasoani toeaina o le faapotopotoga iā i tatou ina ia mataala ma maelega i mea faaleagaga? Ia aumai se faaaʻoaʻoga.

¹⁸ E faamalosia le faatuatua i le iloaina, e lē mafai e o tatou tulaga lē lelei atoatoa ona taofia i tatou mai i le auauna iā Ieova i se auala e finagalo malie i ai o ia. O lea la, ia talisapaia le sauniuniga a Ieova o “meaalofa i tagata,” o toeaina ia o le faapotopotoga. (Faitau le Efeso 4:8, 11, 12.) Pe a asiasi atu se toeaina iā te oe, ia faaaogā lelei le avanoa ina ia e maua ai aogā mai i lona atamai ma ana fautuaga.

¹⁹ E toʻalua ni toeaina i Egelani na asiasi atu ona o le talosaga a se ulugalii faaipoipo na iai o la faafitauli. Na manatu le avā e lē o faatino e lana tane ona tiute tauave faaleagaga. Na taʻutino e le tane e lē o ia o se faiaʻoga lelei, ma e na te leʻi faatulagaina foʻi le faia e lē aunoa o le tapuaʻiga a le aiga. Na faauaʻi e toeaina manatu o le ulugalii i le faaaʻoaʻoga a Iesu. Na tausia lelei e Iesu ona soo ma na manatu mamafa i o latou manaʻoga. Na fautuaina e toeaina le tane ina ia faaaʻoaʻo iā Iesu. Na la faalaeiauina foʻi le avā ina ia onosaʻi e pei o Iesu. Na avatu foʻi e toeaina ni fautuaga aogā i le auala e mafai ona la galulue faatasi ai o se ulugalii, i le faia o le tapuaʻiga a le aiga ma la laʻua fanau e toʻalua. (Efe. 5:21-29) Mulimuli ane, na faamālō atu toeaina i le tane mo ana taumafaiga. Na la faalaeiauina o ia ina ia finafinau ma faalagolago i le agaga paia e fesoasoani iā te ia, ina ia avea o se ulu lelei faaleagaga mo le aiga. O le alofa ma le lagolagosua a toeaina na fesoasoani i lenā aiga ina ia faasusulu atu lo latou malamalama.

20. O le ā e iʻu i ai pe a faasusulu atu lou malamalama?

²⁰ Na pese le faisalamo: “E fiafia i latou uma o ē e matataʻu iā Ieova, o ē e savavali i ona ala.” (Sala. 128:1) O le a e mauaina le tele o le fiafia pe a faasusulu atu lou malamalama e ala i le valaaulia o isi e auauna i le Atua, ola i se auala e faamalosia ai le autasi, ma faatumauina se uiga mataala. O le a mātauina e isi au galuega lelei ma o le a uunaʻia ai le toʻatele e vivii atu i lo tatou Tamā.​—Mata. 5:16.