1-2. E pei o Lota, o le ā le luʻi o loo fesagaʻia e Kerisiano i aso nei?

 E TUTUSA o tatou lagona ma Lota le tagata amiotonu e faatatau i tapulaa tauamio a lenei lalolagi. “Na matuā mafatia [o ia] ona o amioga faauamaaa a tagata solitulafono,” auā na ia iloa e inosia e Ieova amioga leaga. (2 Pete. 2:7, 8) O le mataʻu ma le alofa o Lota iā Ieova, na ia teena ai tapulaa tauamio a tagata na latou ola faatasi. Ua siʻomia foʻi i tatou i tagata e itiiti pe leai se faaaloalo mo tapulaa tauamio a Ieova. Peitaʻi, e mafai ona tatou tausia pea le mamā tauamio, pe afai e faatumauina lo tatou alofa i le Atua ma atiaʻe le mataʻu iā te ia.​—Faata. 14:2.

² O lea, ua saunia e Ieova faalaeiauga e ala mai i le tusi o Faataoto. E mafai e Kerisiano uma, o tane ma fafine, o ē talavou ma ē matutua, ona maua aogā mai i le iloiloina o fautuaga atamai o loo i lenei tusi.

3. I le Faataoto 17:3, o le ā se māfuaaga e manaʻomia ai ona puipuia o tatou loto? (Tagaʻi foʻi i le ata.)

³ O se tasi o māfuaaga tāua e puipuia ai o tatou loto, ona e suʻesuʻeina e Ieova o tatou loto. O lona uiga, e lē silasila Ieova iā i tatou e pei o le auala e vaai ai isi iā i tatou, ae e na te silafia lelei le ituaiga tagata e iai i tatou. (Faitau le Faataoto 17:3.) E alofa o ia iā i tatou, pe afai e tatou te manatunatu pea i ana fautuaga atamai lea e maua ai le ola e faavavau. (Ioa. 4: 14) O le faia faapea, o le a lē taaʻina ai i tatou i amioga leaga ma pepelo a Satani ma lana lalolagi. (1 Ioa. 5:18, 19) Pe a tatou mafuta vavalalata atu iā Ieova, o le a faateleina ai lo tatou alofa ma le faaaloalo mo ia. Talu ai e tatou te lē mananaʻo e faatigā i lo tatou Tamā, e oo lava i le mafaufau e faia se agasala, e tatou te matuā ʻinoʻino i ai. Pe a faaosoosoina i tatou e faia se mea sesē, ia fesili ifo, ʻE faapefea ona ou faatigā ma le loto i ai iā Ieova, o lē e sili ona alofa iā te aʻu?’​—1 Ioa. 4:9, 10.

4. Na faapefea i le mataʻu iā Ieova ona puipuia ai se tuafafine mai i le lolo atu i faaosoosoga?

⁴ Na faaosoosoina Marta o se tuafafine i Croatia e faia amioga lē mamā. Na ia tusi: “Na faigatā ona ou mafaufau lelei ma teena le tuʻinanauga e faia le agasala. Ae o le mataʻu iā Ieova na puipuia ai aʻu.” b E faapefea? Na taʻua e Marta na ia manatunatu loloto i iʻuga leaga pe a ia faia le agasala. E mafai foʻi ona tatou faia faapea. O le iʻuga e sili ona leaga e oo i ai, o le a matuā faanoanoa Ieova ma tatou lē maua ai le avanoa e tapuaʻi atu iā te ia e faavavau.​—Kene. 6:5, 6.

5. O le ā e te aʻoaʻoina mai i le mea na tupu iā Leo?

⁵ Pe a tatou matataʻu iā Ieova, e tatou te faaeteete ina neʻi o tatou manatu māmā i amioga leaga. O le lesona lenā na aʻoaʻoina e Leo e nofo i Congo. Ina ua mavae le fā tausaga talu ona papatiso, na faauō atu ai i aumea leaga. Na ia manatu e na te lē o faia se agasala, ona e na te lē o faia ni mea leaga. E leʻi umi ae taaʻina o ia e ana aumea leaga e faaaogāsesē le ʻava malosi ma faia amioga lē mamā. O lea, na ia mafaufau ai i mea na aʻoaʻoina ai o ia e ona mātua Kerisiano, ma le fiafia na ia maua a o auauna iā Ieova. O le ā le iʻuga? Na toe sagatonu ai lona mafaufau. O le fesoasoani a toeaina na ia toe foʻi mai ai iā Ieova. O loo auauna  nei ma le fiafia o ia o se toeaina ma o se paeonia faapito.

6. O ai fafine faafaatusa e toʻalua o le a tatou talanoaina?

⁶ Seʻi o tatou iloiloina le Faataoto mataupu e 9, o loo taʻua ai le atamai ma le valea lea e faaatagia mai e ni fafine faafaatusa se toʻalua. (Faatusatusa i le Roma 5:14; Kalatia 4:24.) A o faia faapea, ia manatua ua matuā tuʻinanau le lalolagi a Satani i amioga lē mamā taufeusuaʻiga ma ata matagā taufeusuaʻiga. (Efe. 4:19) O lea, e tāua ai ona faaauau ona tatou atiaʻe le mataʻu i le Atua ma liliuese mai i le leaga. (Faata. 16:6) E tusa po o oe o se tane po o se fafine, ae e mafai e i tatou uma lava ona maua aogā mai i lenei mataupu. Ua faamatalaina i lenei Faataoto ni fafine se toʻalua o loo valaaulia ē e leai se poto masani, po o “ē ua leai ni mafaufau.” E peiseaʻī o loo la fai atu, ʻAfe mai ia i le fale nei e fai se mea tausami.’ (Faata. 9:1, 5, 6, 13, 16, 17) Peitaʻi, e matuā telē le eseesega o iʻuga e oo iā i latou na talia na valaaulia.

7. I le Faataoto 9:13-18, o le ā le iʻuga o i latou e talia le valaaulia a le fafine valea? (Tagaʻi foʻi i le ata.)

⁷ Seʻi o tatou iloiloina le valaaulia mai i le “fafine valea.” (Faitau le Faataoto 9:13-18.) Ua ia valaau atu ma le lē mā i ē e leai ni mafaufau, “ia afe mai i inei” ma latou aai faatasi. O le ā le iʻuga? “Ua iai ana mālō i mea maulalo o le Tuugamau.” Atonu o loo e manatua ni faaupuga faafaatusa o loo taʻua i mataupu amata o le Faataoto. Ua lapataʻia ai i tatou e faatatau i “le fafine agasala” ma “le fafine e amio lē mamā.” O loo taʻua ai foʻi: “E goto ifo lona fale i le oti.” (Faata. 2:11-19) O loo aofia i le Faataoto 5:3-10 se lapataʻiga e faatatau i se isi ʻfafine agasala e ō ifo ona vae i le oti.’

8. O le ā se filifiliga e tatou te ono fesagaʻia?

⁸ O i latou e faalogo i le “fafine valea,” e latou te filifili pe e talia lana valaaulia pe leai. E tatou te ono feagai foʻi ma se filifiliga faapena. Pe a faaosoosoina i tatou e faia amioga lē mamā pe matamata i ata matagā i faasalalauga ma le Initaneti, o le ā e tatou te filifili e fai?

9-10. O ā nisi o māfuaaga e tatau ai ona tatou ʻalofia amioga lē mamā taufeusuaʻiga?

⁹ E iai māfuaaga tāua e tatau ai ona tatou ʻalofia amioga lē mamā taufeusuaʻiga. O le faamatalaga lenei a le “fafine valea”: “E suamalie vai ua gaoia.” O le ā e faasino i ai “vai ua gaoia”? E faatusaina e le Tusi Paia feusuaʻiga i le vā o se ulugalii faaipoipo i vai e faafouina ai. (Faata. 5:15-18) E mafai ona faamalieina  le tane ma le avā i feusuaʻiga talafeagai i totonu o le liʻo o le faaipoipoga. E tuufaafeagai lea ma “vai ua gaoia,” lea atonu e faasino atu i feusuaʻiga e lē talafeagai pe e lē mamā. O nei amioga e masani ona faia faalilolilo, e pei o se gaoi e faia faalilolilo ana gaoioiga. Atonu e suamalie “vai ua gaoia” iā i latou o loo faia le agasala, ona e latou te manatu e leai se tasi e na te iloaina. Pagā le sesē o lenā manatu! E silafia e Ieova mea uma. E leai se mea e sili atu ona tigā nai lo o le lē mauaina o le finagalo malie o Ieova. E mautinoa e lē o se mea e “suamalie” pe e tatou te olioli ai. (1 Kori. 6:9, 10) Ae e iai foʻi isi iʻuga.

¹⁰ O amioga lē mamā taufeusuaʻiga e iʻu atu ai i le māsiasi, faalogona o le lē aogā, maʻitaga e leʻi faatalitalia, ma aiga malepelepe. O lea, o se gaoioiga atamai le ʻalofia o le alu i le “fale” o le fafine valea ma aai faatasi ma ia. E lē gata i le oti faaleagaga, ae e toʻatele tagata amioleaga e aafia i faamaʻi pipisi ma vave ona maliliu ae e leʻi taitai o latou tausaga. (Faata. 7:23, 26) Ua faapea mai le Faataoto 9:18: “Ua iai ana mālō i mea maulalo o le Tuugamau.” Aiseā la e talia ai e le toʻatele lana valaaulia taufaasesē lea e iʻu atu ai i iʻuga leaga?​—Faata. 9:13-18.

11. Aiseā e matuā leaga ai le matamata i ata matagā taufeusuaʻiga?

¹¹ O se tasi o mailei taatele, o ata matagā taufeusuaʻiga. E manatu nisi e leai se afāina pe a matamata i na ata. Peitaʻi, o na ata e mafai ona faaleagaina ai, lagona ai le leai o se aogā, ma o se masaniga e faigatā ona taofia. E malosi tele aafiaga o na ata, e matuā faigatā ona aveese mai i le mafaufau. O ata matagā taufeusuaʻiga, e atili faagaee ai tuʻinanauga sesē nai lo o le fasiotia ai. (Kolo. 3:5; Iako. 1:14, 15) O le mea moni, o le toʻatele o i latou e matamata i na ata e iʻu ina latou faia amioga lē mamā.

12. E faapefea ona puipuia i tatou mai i ata e faagaee ai tuʻinanauga sesē?

¹² I le avea ai o i tatou o ni Kerisiano, o le ā e tatau ona tatou faia pe a faafuaseʻi ona vaaia se ata matagā i a tatou masini faaonapōnei? Ia vave ona tapē ese na ata. E mafai ona fesoasoani iā i tatou le manatuaina, o le mea e sili ona tāua iā i tatou o la tatou faiā ma Ieova. E oo lava i ata e lē manatu i ai o ni ata matagā, e mafai pea ona faagaee ai tuʻinanauga sesē. Aiseā e tatau ai ona tatou ʻalofia na ata? Ona e tatou te lē mananaʻo e faia e oo lava i sina gaoioiga, lea e iʻu atu ai i le mulilua i o tatou loto. (Mata. 5:28, 29) Ua faapea mai David o se toeaina i Taialani: “Ou te fesili ifo: ʻE ui lava e lē o ni ata matagā, ae pe e fiafia Ieova pe a faaauau ona ou matamata i nei ata?’ O le manatunatu faapea e fesoasoani iā te aʻu e gaoioi ai ma le atamai.”

13. O le ā e fesoasoani iā i tatou e gaoioi ai ma le atamai?

¹³ E tatou te gaoioi ma le atamai pe a atiaʻe le mataʻu iā Ieova. O le mataʻu i le Atua, “o le amataga lea o le atamai.” (Faata. 9:10) O loo faataʻitaʻia mai lenā manatu i le amataga o le Faataoto mataupu e 9, lea e taʻua ai le isi fafine faafaatusa o le “atamai moni.”

14. O le ā le isi valaaulia o loo faamatalaina i le Faataoto 9:1-6?

¹⁴ Faitau le Faataoto 9:1-6. O loo taʻua i inei se valaaulia mai i le Puna o le atamai moni, o Lē na foafoaina i tatou e silisili lona atamai. (Faata. 2:6; Roma 16:27) O loo faamatalaina i inei i se gagana faafaatusa se fale telē ma ona poutū e fitu. O loo faamatilatila mai ai le aaomafola o Ieova, ma e na te valaaulia i latou uma e mananaʻo e aʻoaʻoina lona atamai.

15. O le ā ua valaaulia i tatou e le Atua e fai?

 ¹⁵ O le “atamai moni” lea e faaatagia mai e se fafine i le Faataoto mataupu e 9, ua faamatilatila mai ai le aaomafola o Ieova ma e na te saunia le anoanoaʻi o mea lelei. O loo taʻua i le tala, ua māeʻa ona saunia atoatoa e lenā fafine faafaatusa aano o ana manu, suia lana uaina, ma saunia lana laulau i lona fale. (Faata. 9:2, fpl.) E lē gata i lea, ua faapea mai le fuaiupu e 4 ma le 5: “Ua faapea atu o ia [le atamai moni] i lē ua leai sona mafaufau: ʻŌ mai ia e aai i laʻu falaoa.’” Aiseā e tatau ai ona tatou ō i le fale o le atamai moni ma aai i meaʻai ua ia saunia? E finagalo Ieova ina ia atamamai ma saogalemu lana fanau. Ae e lē finagalo o ia ina ia tatou tofo i tigā ma faalogona nofosala, ona o le sesē o a tatou filifiliga. O le māfuaaga lenā “e na te teua [ai] le atamai aogā mo ē e amio saʻo.” (Faata. 2:7) Pe a tatou matataʻu iā Ieova, e tatou te mananaʻo e faafiafiaina o ia. E tatou te faalogo i ana fautuaga atamai ma e tatou te fiafia e faatatauina.​—Iako. 1:25.

16. Na faapefea i le mataʻu i le Atua ona fesoasoani iā Alain e faia ai se filifiliga atamai, ma o le ā le iʻuga?

¹⁶ Seʻi mātau pe na faapefea i le mataʻu i le Atua ona fesoasoani iā Alain e faia ai se filifiliga atamai. O ia o se toeaina ma o se faiaʻoga. Na ia faapea mai: “Na manatu le toʻatele o isi faiaʻoga, o ata matagā o se isi auala lea e aʻoaʻoina ai mataupu taufeusuaʻiga.” Ae e leʻi faasesēina ai o ia i lenā manatu. Na ia toe faapea mai: “O loʻu mataʻu i le Atua, na ou matuā teena ai na ata matagā. Na ou faamatala foʻi i na faiaʻoga le māfuaaga na ou faia ai faapea.” Na faatatauina e Alain le fautuaga mai i le “atamai moni” ina ia “[savali] saʻo i le ala o le malamalama.” (Faata. 9:6) Na maofa nisi o na faiaʻoga i le filifiliga a Alain, ma o loo faia a latou suʻesuʻega faale-Tusi Paia ma auai i sauniga.

17-18. O ā faamanuiaga o loo olioli ai i latou e talia le valaaulia mai i le “atamai moni,” ma o ā mea e latou te tulimataʻia? (Tagaʻi foʻi i le ata.)

¹⁷ Ua faaaogā e Ieova le faataoto i fafine faafaatusa e toʻalua, e fesoasoani iā i tatou ina ia maua ai se lumanaʻi fiafia. O ē e talia le valaaulia a le “fafine valea” ma malomaloā, e latou te taulaʻi atu i le “suamalie” o amioga lē mamā. O le mea moni, o loo latou ola mo le asō ae e lē mafaufau i lo latou lumanaʻi. O lo latou iʻuga o loo “i mea maulalo o le Tuugamau.”​—Faata. 9:13, 17, 18.

¹⁸ Peitaʻi, e ese le iʻuga e oo iā i latou e talia le valaaulia mai le “atamai moni.” Ua aai nei ma le fiafia ana mālō i se taumafataga susua, o meaʻai faaleagaga ua lava saunia. (Isa. 65:13) Ua fetalai mai Ieova e ala i le perofeta o Isaia  e faapea: “Ia faalogo lelei mai iā te aʻu, ma aai i mea lelei, ona matuā fiafia ai lea o outou loto i mea lololo.” (Isa. 55:1, 2) Ua aʻoaʻoina i tatou e naunau i mea e fiafia i ai Ieova, ae ʻinoʻino i mea e na te inosia. (Sala. 97:10) E tatou te maua le faamalieina i le valaaulia o isi ina ia maua aogā mai i le “atamai moni.” E peiseaʻī o loo tatou “valaau atu mai i mea maualuluga i luga aʻe o le aai: ʻO se tasi e leai se poto masani, ia afe mai i inei.’” O aogā e tatou te maua faapea foʻi ma isi e talia le valaaulia, e tumau e faavavau. O le a mafai ai ona tatou “ola” e faavavau a o tatou “savavali saʻo i le ala o le malamalama.”​—Faata. 9:3, 4, 6.

19. I le Failauga 12:13, 14, o le ā ua tatou maumauaʻi e fai? (Tagaʻi foʻi i le pusa “ E Tatou te Maua Aogā Mai i le Mataʻu i le Atua.”)

¹⁹ Faitau le Failauga 12:13, 14. Tau ina ia leoleoina pea o tatou loto e le mataʻu i le Atua, ma fesoasoani iā i tatou ia tausia le mamā tauamio ma le malosi faaleagaga i nei aso faigatā o le iʻuga. O lenā mataʻu o le a uunaʻia i tatou e valaaulia pea le toʻatele e mafai ai, ina ia saʻili le “atamai moni” ma maua aogā.