1. O le ā le auala e masani ona faamatala ai aʻoaʻiga i le Tusi Paia?

O LE ā e tau i ai lou mafaufau pe a e faalogo i le upu “aʻoaʻiga”? Atonu e muamua lava ona e mafaufau i faasalaga, peitaʻi e tele atu isi mea e aofia ai. I le Tusi Paia, e masani ona faamatala ai aʻoaʻiga o se mea lelei ma e iai taimi e taʻua faatasi ai ma le poto, atamai, alofa, ma le ola. (Faata. 1:2-7; 4:11-13) Aiseā? Talu ai o aʻoaʻiga a le Atua o se faailoaga o lona alofa mo i tatou ma lona naunau ina ia o tatou maua le ola e faavavau. (Epe. 12:6) E ui o ana aʻoaʻiga e ono aofia ai ma faasalaga, ae e lē taitai ona soonafai pe sauā. O le mea moni, o le uiga autū o le upu “aʻoaʻiga,” o le aʻoaʻoina lea o se tasi e pei o le aʻoaʻoina e se matua o sana tama e alofa i ai.

2, 3. E faapefea i aʻoaʻiga ona aofia ai le aʻoaʻoina o se tasi ma se faasalaga? (Tagaʻi i ata i luga aʻe o le matua.)

² Seʻi mātau le faaaʻoaʻoga lenei: O loo saposapo e se tamaitiiti e igoa iā Ioane se polo i totonu o le fale. Ua faapea atu i ai lona tinā: “Ioane, o lenā e te iloa e lē tatau ona e taalo i totonu o le fale neʻi taʻe se mea iā te oe!” Peitaʻi, ua lē amanaʻia e Ioane le faatonuga a lona tinā ma faaauau ona taalo ma iʻu ina taʻe ai le mea tuu teu. O le ā le auala o le a aʻoaʻi ai o ia e lona tinā? O lana aʻoaʻiga e ono aofia ai le aʻoaʻoina o lana tama faapea ma sina faasalaga. Ina ia aʻoaʻoina lana tama, atonu e na te faamanatu i ai le māfuaaga  e sesē ai lana gaoioiga na fai. E manaʻo e faailoa atu i lana tama le atamai o le usiusitaʻi i ona mātua, ma faamatala i ai e manaʻomia ma e talafeagai a la faatonuga. Ae ina ia faamamafa le tāua o ana upu, e ono tuu atu e le tinā i lana tama se faasalaga talafeagai. O se faataʻitaʻiga, atonu e na te aveeseina le polo mai iā Ioane mo sina taimi. O le faia faapea e iloa ai e Ioane āuga lē lelei o le lē usiusitaʻi.

³ I le avea ai ma sui o le faapotopotoga Kerisiano, o i tatou o se vaega o le aiga o le Atua. (1 Timo. 3:15) O lea, e tatou te amanaʻia ai le aiā a Ieova e na te faatulagaina ai tapulaa, ma aumaia aʻoaʻiga alofa pe a tatou solia na tapulaa. E lē gata i lea, pe a iai ni iʻuga lē lelei o a tatou gaoioiga, o ana aʻoaʻiga e faamanatu mai ai le tāua o lo tatou usiusitaʻi iā te ia o lo tatou Tamā i le lagi. (Kala. 6:7) E matuā manatu mamafa mai le Atua iā i tatou, ma e manaʻo ia puipuia i tatou mai i mea e tigā ai.​—1 Pete. 5:6, 7.

4. (a) O le ā le ituaiga toleniga e faamanuia e Ieova? (e) O le ā o le a tatou iloiloina i lenei mataupu?

⁴ O le avatuina o aʻoaʻiga e faavae mai i le Tusi Paia, e mafai ona tatou fesoasoani ai i a tatou fanau po o se tagata aʻoga o le Tusi Paia ina ia ausia le sini o le avea ma soo o Keriso. O le Tusi Paia la tatou meafaigaluega autū mo toleniga ina ia “faatonu ai i le amiotonu.” O lea, o le a mafai ai ona fesoasoani i a tatou fanau ma tagata aʻoga ina ia malamalama ma “tausi i mea uma na poloaʻi mai ai Iesu iā i tatou.” (2 Timo. 3:16; Mata. 28:19, 20) E faamanuia e Ieova lenei ituaiga o toleniga, lea e faaauupegaina ai tagata aʻoga ina ia o latou faia foʻi nisi soo o Keriso. (Faitau le Tito 2:11-14.) Seʻi o tatou iloiloina tali o fesili tāua nei e tolu: (1) E faapefea i aʻoaʻiga a le Atua ona atagia mai ai lona alofa iā i tatou? (2) O le ā e tatou te aʻoaʻoina mai i ē na aʻoaʻia e le Atua i taimi ua teʻa? (3) E faapefea ona tatou faaaʻoaʻo iā Ieova ma lona Alo pe a tatou avatu aʻoaʻiga?

5. E faapefea ona atagia mai i aʻoaʻiga a Ieova lona alofa mo i tatou?

⁵ O le alofa o Ieova ua uunaʻia ai o ia e faasaʻo, aʻoaʻo, ma toleni i tatou ina ia mafai ai ona tatou tumau i lona alofa ma iai pea i le ala i le ola. (1 Ioa. 4:16) E lē taitai ona ia taʻufaatauvaaina pe faalumaina i tatou, ma tatou manatu ai e leai so tatou tāua. (Faata. 12:18) Nai lo o lea, e faamamaluina i tatou e Ieova ma e taulaʻi o ia i o tatou uiga lelei ma amanaʻia lo tatou saʻolotoga e filifili ai. Po o le auala lenā e te vaai ai i aʻoaʻiga a le Atua e tusa pe e ala mai i lana Afioga, lomiga faale-Tusi Paia, mātua Kerisiano, po o toeaina i le faapotopotoga? O le mea moni, e taumafai toeaina e faasaʻo i tatou i se auala agamalu ma alofa pe a tatou uia “se laasaga sesē” e aunoa ma lo tatou iloa. O le faia faapea, e latou te faaatagia mai ai le alofa o Ieova mo i tatou.​—Kala. 6:1.

6. E faapefea ona atagia mai le alofa o le Atua i ana aʻoaʻiga e tusa pe e aveesea ai faaeaga o se tasi?

⁶ I nisi taimi e lē lava le tau ina avatu o se fautuaga po o se faasaʻoga. Pe a faia e se tasi se agasala matuiā, o le a lē toe agavaa o ia i nisi o faaeaga i le faapotopotoga. E tusa lava po o le tulaga lea e oo i ai, ae o lenā aʻoaʻiga e atagia mai ai le alofa o le Atua mo i tatou. O se faataʻitaʻiga, o le aveesea o faaeaga o se tasi e fesoasoani iā te ia e iloa ai le tāua o lona uaʻi atili i ana lava suʻesuʻega o le Tusi Paia, le manatunatu loloto ma tatalo. O le iʻuga o le a faamalosia ai o ia faaleagaga. (Sala. 19:7) Atonu o le a toe maua ona faaeaga i se taimi mulimuli ane. E oo lava foʻi i le faateʻaina o se tasi, e atagia ai le alofa o Ieova auā e puipuia ai le faapotopotoga mai i taaʻiga leaga. (1 Kori. 5:6, 7, 11) Talu ai o aʻoaʻiga a le Atua e talafeagai lelei, o le faateʻaina la e mafai ona iloa ai e le tagata fai mea sesē le matuiā o lana agasala ma uunaʻia ai o ia e salamō.​—Galu. 3:19.

7. O ai Sevena, ma o le ā le uiga leaga na ia atiaʻe?

⁷ Ina ia faamamafa le tāua o aʻoaʻiga, seʻi o tatou tilofaʻia ni tagata se toʻalua na aʻoaʻia e Ieova: O Sevena lea na ola i taimi o le tupu o Esekia, ma Graham o se uso i aso nei. Na tele le pule na tuuina atu iā Sevena ona o ia o le auauna pule na “vaavaaia le aiga,” lea e foliga mai o le aiga o Esekia. (Isa. 22:15) Ae o le mea e faanoanoa ai ona na iʻu ina faamaualuga Sevena ma manaʻo ia viiviia o ia e tagata. Na oo lava foʻi ina ia fausia se tuugamau taugatā mo ia ma tiʻetiʻe i “kariota matagofie”!​—Isa. 22:16-18.

8. Na faapefea ona aʻoaʻia e Ieova Sevena, ma o le ā le iʻuga?

⁸ Talu ai na taumafai Sevena ia viiviia o ia lava, o lea na ʻaveese ai o ia mai i lona tulaga aloaʻia’ e le Atua ma suitulaga i ai Eliakimo. (Isa. 22:19-21) Na faia lea suiga a o fuafua Sanerivi le tupu o Asuria e osofaʻia Ierusalema. I se taimi mulimuli ane, na aauina atu e le tupu o Sanerivi tagata maualuluga o lona malo i Ierusalema faatasi ma se ʻautau toʻatele e faalotovaivai i tagata Iutaia, ma faafefe Esekia ina ia siilima. (2 Tu. 18:17-25) Na aauina atu e Esekia Eliakimo ma isi tamāloloa e toʻalua e talanoa i na tagata maualuluga o le malo. O se tasi o na tamāloloa o Sevena lea ua galue nei o se failautusi. Pe e lē faailoa mai ai e leʻi teuloto e Sevena ni faalogona ita ma le lē fiafia, ae na ia talia ma le lotomaulalo lona tulaga lea ua maualalo ifo? Pe afai o lea, o le ā e mafai ona tatou aʻoaʻoina mai i lenei tala? Seʻi o tatou tilofaʻia ni lesona se tolu.

9-11. (a) O ā lesona tāua e tatou te aʻoaʻoina mai i le mea na tupu iā Sevena? (e) E faapefea ona faalaeiauina oe i le auala na feutagaʻi ai Ieova ma Sevena?

⁹ Muamua, na aveesea le tulaga o Sevena. O lenei mea na tupu iā Sevena ua faamanatu mai ai le lapataʻiga “e muamua le faamaualuga i le paʻū, e muamua foʻi le agaga faualuga i le tautevateva.” (Faata. 16:18) Pe a iai ni ou faaeaga i le faapotopotoga lea atonu e faamamaluina ai oe, po o le a faaauau ona e manatu faamaulalo iā te oe lava? Po o le a e avatu le viiga iā Ieova mo so o se tomai ua e mauaina, po o se mea foʻi ua e ausia? (1 Kori. 4:7) Na tusi le aposetolo o Paulo: “Ou te fai atu ai iā te outou taʻitoʻatasi, ina ia aua neʻi faasili le manatu o se tasi iā te ia lava, i lo o le mea e tatau ona manatu i ai; a ia mafaufau lelei.”​—Roma 12:3.

¹⁰ Lua, o le aʻoaʻiga na avatu e Ieova iā Sevena atonu e faaalia ai na ia talitonu e mafai ona faia e Sevena ni suiga. (Faata. 3:11, 12) Maʻeu se faaaʻoaʻoga lelei mo i latou ua aveesea ni faaeaga i le auaunaga i le faapotopotoga a le Atua i aso nei! Nai lo o le teuloto o ni faalogona ita ma le lē fiafia, tau ina ia  faaauau pea ona latou auauna i le Atua i le mea e gata ai lo latou mafai i o latou tulaga fou. Ia vaai foʻi i aʻoaʻiga o se faamaoniga o le alofa o Ieova. Ia manatua, pe afai e tatou te faamaulalo i luma o le Atua, o le a lē manatu o ia e faapea ua leai so tatou faamoemoe. (Faitau le 1 Peteru 5:6, 7.) O aʻoaʻiga alofa a le Atua e mafai ona faatonutonuina ai i tatou. O lea, ia avea pea i tatou o ni ē e faigofie ona faatonutonuina i ona aao.

¹¹ Tolu, o le auala na feutagaʻi ai Ieova ma Sevena e aumai ai se lesona tāua mo i latou ua faaaogā e avatuina aʻoaʻiga, e pei o mātua ma ovasia Kerisiano. O le ā le lesona? E moni e inoino Ieova i le agasala, peitaʻi, e alofa o ia i le tagata na faia le agasala. O lea la, pe afai o oe o se matua po o se ovasia ma ua manaʻomia ona e avatuina ni aʻoaʻiga, po o le a e faaaʻoaʻo iā Ieova e ala i le inoino i le mea sesē, ae taulaʻi atu i uiga lelei o lau tama po o lou uso talitonu?​—Iuta 22, 23.

12-14. (a) O ā auala e ono tali atu ai nisi i aʻoaʻiga mai i le Atua? (e) Na faapefea ona fesoasoani le Afioga a le Atua i se uso ina ia suia ona uiga, ma o ā iʻuga?

¹² O se tulaga e faanoanoa ai, e faaauau ona tigā faalogona o nisi pe a latou maua ni aʻoaʻiga, ma iʻu ai ina latou tuulafoaʻia le Atua ma ona tagata. (Epe. 3:12, 13) Po o lona uiga la ua lē mafai ona toe fesoasoani atu iā i latou na? Seʻi mātau le faaaʻoaʻoga a Graham o sē na faateʻaina ma na toe faaaʻe mai i se taimi mulimuli ane, ae na iʻu ina lē toe talaʻi ma lē toe auai i sauniga. A o faagasolo tausaga, na talosaga atu o ia i se toeaina na faauō atu iā te ia ina ia la suʻesuʻeina le Tusi Paia.

¹³ Na faamatala e le toeaina e faapea: “O le faafitauli o Graham o le faamaualuga. Na faitio o ia i toeaina na taulimaina le mataupu lea na faateʻaina ai. O lea na ma faaaogā ai nisi o ma suʻesuʻega e talanoa ai i mau e faatatau i le faamaualuga ma ona aafiaga. Na amata ona manino le vaai a Graham e faatatau iā te ia lava e ala i le faaaogāina o le Afioga a le Atua e pei o se faata, ma e leʻi fiafia o ia i mea na ia iloa e faatatau iā te ia. E mataʻina le iʻuga na oo i ai! Na ia taʻutino mai na faatauasoina o ia i le ʻutupoto’ na iai i lona mata po o lona uiga faamaualuga, ma o lona faafitauli o le faitio. O lea, na vave lava ona ia faia ni suiga e faaleleia ai. Na amata loa ona auai e lē aunoa i sauniga faa-Kerisiano, finafinau e suʻesuʻe le Afioga a le Atua, ma tatalo e lē aunoa i aso taʻitasi. Na ia faatinoina foʻi ona tiute tauave faaleagaga o se ulu o le aiga, lea na matuā faafiafiaina ai lana avā ma lana fanau.”​—Luka 6:41, 42; Iako. 1:23-25.

¹⁴ Na taʻua atili e le toeaina: “I se tasi aso na taʻu mai ai e Graham se mea na pāʻia ai loʻu loto. Na ia faapea mai, ʻUa leva ona ou iloa le upu moni ma na ou auauna foʻi o se paeonia. Ae o lea ua faatoʻā mafai ona ou faapea atu ma le faamaoni ou te alofa iā Ieova.’ E leʻi umi ae tofia loa o ia e tauaveina maikorofoni i le Maota mo Sauniga, ma o se faaeaga e na te matuā faatāuaina. O lana faaaʻoaʻoga ua ou iloa ai, pe a faamaulalo e se tasi o ia lava i luma o le Atua e ala i le talia o aʻoaʻiga, o le a ia maua ai le anoanoaʻi o faamanuiaga!”

15. O le ā e tatau ona tatou faia ina ia pāʻia ai loto o isi i a tatou aʻoaʻiga?

¹⁵ Ina ia avea i tatou ma faiaʻoga lelei, e tatau ona avea muamua i tatou o ni tagata aʻoga lelei. (1 Timo. 4:15, 16) I se tulaga talitutusa, o i latou o loo faaaogā e Ieova e avatu aʻoaʻiga e tatau ona faaauau ona latou gauaʻi ma le lotomaulalo i lana taʻitaʻiga. O le gauaʻi atu ma le lotomaulalo, o le a faaaloalogia ai i latou ma maua ai le saʻolotoga e tautala ai a o toleni pe avatu faasaʻoga i isi. O le a tatou iloiloina le faaaʻoaʻoga a Iesu.

16. O ā nisi o lesona e faatatau i aʻoaʻiga talafeagai ma toleniga uigā e tatou te aʻoaʻoina mai iā Iesu?

 ¹⁶ Na usiusitaʻi Iesu i lona Tamā i taimi uma e oo lava foʻi i le taimi na matuā faigatā ai ona ia faia faapea. (Mata. 26:39) Na ia avatu foʻi i lona Tamā le viiga ona o lona atamai ma mea na ia aʻoaʻo atu. (Ioa. 5:19, 30) O le lotomaulalo ma le usiusitaʻi o Iesu na tosina atu ai tagata loto faamaoni iā te ia, ma na fesoasoani e avea ai o ia ma faiaʻoga e alofa mutimutivale ma logolelei ana fetalaiga. (Faitau le Mataio 11:29.) O ana upu agalelei na faalaeiauina ai ē na pei o ni ū ua vaivai, po o ni vavae ua mū itiiti. (Mata. 12:20) E oo lava i taimi na tofotofoina ai lona onosaʻi, sa agalelei pea ma agaalofa Iesu. Na faamaonia lea manatu i le taimi na ia faasaʻoina ai ona aposetolo i lo latou faaalia o le manatu faapito ma le fia matamuamua.​—Mare. 9:33-37; Luka 22:24-27.

17. O ā uiga e mafai ona fesoasoani i toeaina ina ia avea ai ma leoleo mamoe lelei i le lafu mamoe a le Atua?

¹⁷ O toeaina e avatuina aʻoaʻiga e faavae mai i le Tusi Paia, e latou te faaalia le atamai pe a faaaʻoaʻo iā Keriso. O lo latou faia faapea, e faailoa atu ai lo latou faanaunauga ina ia faatonutonuina i latou e le Atua ma lona Alo. Na tusi le aposetolo o Peteru: “Ia leoleo i le lafu mamoe a le Atua o loo outou tausia, aua le manatu i ai o se avega mamafa, ae ia faia ma le lotomalie; aua le faia ona o le fia maua o mea i se auala faapiʻopiʻo, ae ia faia ma le lotonaunau; aua foʻi le fia pule i tagata o le Atua, a ia avea ma faaaʻoaʻoga lelei i le lafu mamoe.” (1 Pete. 5:2-4) O ovasia e gauaʻi atu ma le olioli i le Atua ma Keriso le ulu o le faapotopotoga, e lē gata o le a latou maua aogā ae faapea foʻi ē o loo latou tausia.​—Isa. 32:1, 2, 17, 18.

18. (a) O le ā e finagalo Ieova e faia e mātua? (e) E faapefea ona fesoasoani Ieova i mātua ina ia faataunuu o latou tiute?

¹⁸ E mafai foʻi ona faatatauina na mataupu silisili i totonu o aiga. Ua faatonuina ulu o aiga: “Aua le faatigā loto i a outou fanau, a ia tausia pea i latou i aʻoaʻiga ma apoapoaʻiga a Ieova.” (Efe. 6:4) Aiseā e tāua ai lenei faatonuga? Ua taʻua i le Faataoto 19:18, o le aʻoaʻia o le fanau e faalagolago i ai o latou ola. Ioe, e tali atu mātua Kerisiano iā Ieova pe a lē taulau ona latou avatu aʻoaʻiga o loo manaʻomia e le fanau! (1 Samu. 3:12-14) Peitaʻi, e foaʻi atu e Ieova i mātua le atamai ma le malosi e latou te manaʻomia, pe afai e tatalo atu ma le lotomaulalo, ma saʻili i lana Afioga ma le agaga paia mo le taʻitaʻiga.​—Faitau le Iakopo 1:5.

19, 20. (a) O ā faamanuiaga e iʻu i ai pe a talia aʻoaʻiga mai i le Atua? (e) O le ā o le a talanoaina i le mataupu o sosoo mai?

¹⁹ E lē mafaitaulia faamanuiaga e maua mai i le talia o aʻoaʻiga mai i le Atua, faapea le faaaʻoaʻo iā Ieova ma Iesu pe a avatu aʻoaʻiga i isi. O nisi o na faamanuiaga o le avea o o tatou aiga ma faapotopotoga o ni siʻomaga e maua ai le filemu. O le a lagona ai e tagata taʻitoʻatasi le alofagia ma le faatāuaina o i latou, faapea le malupuipuia. O se faaataga lea o faamanuiaga o le a maua i le lumanaʻi. (Sala. 72:7) O le mea moni, e mafai ona faapea atu o aʻoaʻiga a Ieova e toleni ai i tatou i le auala e ola faatasi ai e faavavau i le filemu ma le autasi, o se aiga o loo tausia e Ieova lo tatou Tamā. (Faitau le Isaia 11:9.) Pe a iā i tatou lenā vaaiga e faatatau i aʻoaʻiga mai i le Atua, o le a tatou talisapaia ai le fuafuaga moni o aʻoaʻiga: o se faamaoniga matagofie lea o le alofa e lē mafaatusalia o le Atua mo i tatou.

²⁰ I le mataupu o sosoo mai, o le a tatou talanoa atili ai e faatatau i aʻoaʻiga i totonu o le aiga ma le faapotopotoga. O le a tatou iloiloina foʻi le tāua o le pulea o i tatou lava, faapea se mea e sili atu ona tigā nai lo o faalogona tigā pe a aʻoaʻia i tatou.