1. E faapefea ona tatou maua le atamai, ma o ā aogā e maua mai ai?

O IEOVA o le Puna o le atamai ma ua ia matuā foaʻi mai i isi lenā atamai. Ua faapea mai le Iakopo 1:5: “Pe afai ua leai se atamai i se tasi o outou, inā ōle atu pea ia i le Atua, auā o ia na te foaʻi tele mai ma le lē toe taʻutaʻua.” O se tasi o auala e tatou te mauaina ai le atamai mai i le Atua, o le talia lea o ana aʻoaʻiga. E mafai e lenā atamai ona puipuia i tatou mai i mea e faaleagaina ai a tatou amioga lelei ma lo tatou itu faaleagaga. (Faata. 2:10-12) O le iʻuga, e tatou te ʻfaatumau ai iā i tatou i le alofa o le Atua, lea e iʻu ai i le ola e faavavau.’​—Iuta 21.

2. E faapefea ona tatou atiaʻe le talisapaia o aʻoaʻiga a le Atua?

² Peitaʻi, ona o o tatou faanaunauga agasala, le auala na tausi aʻe ai i tatou, ma nisi o vala, ua faafaigatā ai ona talia aʻoaʻiga pe maua foʻi le vaaiga saʻo e faatatau i aʻoaʻiga. E atiaʻe lo tatou talisapaia o aʻoaʻiga pe a tatou tofo i aogā e maua mai ai, lea e faamaonia ai le alofa o le Atua iā i tatou. Ua faapea mai le Faataoto 3:11, 12: “Loʻu atalii e, aua e te teena le [aʻoaʻiga] a Ieova; . . . auā e aʻoaʻia e Ieova o lē e alofa i ai.” Ioe, aua lava neʻi galo iā i tatou e naunau Ieova i le mea e sili ona lelei mo i tatou. (Faitau le Eperu 12:5-11.) O aʻoaʻiga a Ieova e talafeagai i taimi uma ma e fuafua lelei, ona e na te silafia lelei i tatou. Seʻi o tatou talanoaina vala e fā o aʻoaʻiga: (1) o le pulea o i tatou lava, (2) o aʻoaʻiga a mātua, (3) o aʻoaʻiga i totonu o le faapotopotoga Kerisiano, ma le (4) o se mea e sili atu  ona tigā nai lo o faalogona tigā pe a aʻoaʻia i tatou.

3. E faapefea ona atiaʻe e se tamaitiiti le uiga o le pulea o ia lava? Aumai se faataʻitaʻiga.

³ O le pulea o le tagata lava ia, e aofia ai le amio pulea ina ia faaleleia a tatou amio ma mafaufauga. E tatou te leʻi fananau mai ma lenei uiga o le pulea o i tatou lava. O se uiga e manaʻomia ona tatou aʻoaʻoina. O se faataʻitaʻiga: Pe a amata ona aʻo le tiʻetiʻe uila a se tamaitiiti, e masani ona taofi e le matua le uila ina neʻi paʻū. Ae a o faasolo ina iloa e lē tamaitiiti ave le uila, o le a tuu atu ma le faaeteete e le matua le tamaitiiti e alu na o ia mo sina taimi. E iloa loa e le tamaitiiti ave le uila, ona tuu atu loa lea o ia e alu e aunoa ma le toe tau taofi. I se tulaga talitutusa, pe a faaauau ona toleni ma le onosaʻi e mātua a latou fanau iti “i aʻoaʻiga ma apoapoaʻiga a Ieova,” o le a fesoasoani i le fanau ina ia iloa pulea i latou lava ma faaalia le atamai.​—Efe. 6:4.

4, 5. (a) Aiseā e avea ai le pulea o le tagata lava ia o se vala tāua o le “tagata fou”? (e) Aiseā e lē tatau ai ona tatou lotovaivai e tusa pe e tatou te faia ni mea sesē?

⁴ E faatatau atu foʻi lenā tulaga iā i latou na iloa Ieova ina ua matutua. E moni atonu ua iai ni vala o o latou olaga ua mafai ona latou puleaina. Ae i le itu faaleagaga, o se soo fou o se tagata lea e leʻi matua faaleagaga. Peitaʻi, e mafai ona faasolosolo ona tuputupu aʻe e avea ma tagata matua faaleagaga, pe a taumafai ia pei o Keriso e ala i le ofu i le “tagata fou.” (Efe. 4:23, 24) E tāua tele le pulea o le tagata lava ia ina ia mafai ai ona tatou tuputupu aʻe faaleagaga. O le iʻuga, o le a fesoasoani lea iā i tatou “ina ia teena amioga faalēmataʻu ma tuʻinanauga o le lalolagi, ma ia ola ma le mafaufau lelei, ma le amiotonu, ma le faamaoni i le Atua i le faiga o mea a lenei lalolagi.”​—Tito 2:12.

⁵ Peitaʻi, e tatou te agasala uma lava. (Fai. 7:20) Pe afai e tatou te paʻuʻū atu i le faia o se mea sesē, e lē faapea ai ua tatou lē taulau po ua matuā lē mafai ona tatou puleaina i tatou lava. Ua faapea mai le Faataoto 24:16: “E faafitu ona paʻū o lē e amiotonu ma o le a toe tulaʻi o ia.” O le ā o le a fesoasoani iā te ia ina ia taulau ai? O le malosi mai i le agaga o le Atua ae e lē o sona lava malosi. (Faitau le Filipi 4:13.) O le fua o le agaga lea e aofia ai le amio pulea e fesootaʻi atu i le pulea o le tagata lava ia.

6. E faapefea ona avea i tatou ma tagata aʻoga lelei o le Afioga a le Atua? (Tagaʻi i ata i luga aʻe o le matua.)

⁶ O tatalo mai i le loto, suʻesuʻeina o le Tusi Paia, ma le manatunatu loloto, e fesoasoani foʻi e atiaʻe ai le pulea o i tatou lava. Ae faapefea pe afai e faigatā ona e suʻesuʻeina le Afioga a le Atua? Atonu e te manatu o oe o se tagata e lē fiafia e faitau tusi ma suʻesuʻe. E ui i lea, ia e manatua o le a fesoasoani mai Ieova pe afai e te manaʻo i ai. E mafai ona ia fesoasoani mai ina ia e “naunau” i lana Afioga. (1 Pete. 2:2) E faapefea? Muamua, tatalo iā Ieova ina ia mafai ona e pulea oe lava e suʻesuʻe lana Afioga. Lua, ia gaoioi e ōgatusa ma au tatalo, ma atonu e manaʻomia ona faapupuu au suʻesuʻega. A o faagasolo taimi, o le a avea au suʻesuʻega o se mea e faigofie ma e te fiafia e fai! O le mea moni, o le a e olioli i ou taimi paganoa a o e mafaufau i manatunatuga loloto o Ieova.​—1 Timo. 4:15.

7. E faapefea ona fesoasoani le pulea o i tatou lava ina ia ausia ai se sini faaleagaga?

⁷ E fesoasoani foʻi le pulea o i tatou lava ina ia ausia ai sini faaleagaga. Seʻi mātau le faaaʻoaʻoga a se tamā e tausi aiga na manatu ua amata ona mou atu lona maelega. Ina ia foʻia lenei tulaga, na ia faatū ai se sini e avea o se paeonia sauatoa, ma faitau i mataupu e faatatau i le auaunaga paeonia i a tatou mekasini. O le faia faapea faatasi ai ma le tatalo, na faamalosia ai o ia faaleagaga. Na avea foʻi o ia ma paeonia lagolago pe a talafeagai. O le ā le  iʻuga? E ui lava i luʻi, ae na taulaʻi atu pea o ia i lona sini o le avea ma paeonia sauatoa, ma na ia ausia mulimuli ane.

8-10. O le ā e fesoasoani i mātua Kerisiano ina ia taulau ai i le tausi aʻe o a latou fanau ia auauna iā Ieova? Aumai se faaaʻoaʻoga.

⁸ Ua maua e mātua Kerisiano se faaeaga tautele o le tausi aʻe o fanau i “aʻoaʻiga ma apoapoaʻiga a Ieova.” (Efe. 6:4) E lē o se tiute tauave faigofie lenei aemaise le tulaga o le lalolagi i aso nei. (2 Timo. 3:1-5) O le mea moni, e lē fananau mai tamaiti ua latou iloa le mea saʻo mai i le mea sesē. E iai o latou lotofuatiaifo i le taimi e fananau mai ai, ae e manaʻomia ni aʻoaʻiga ina ia iloa ai toleni o latou lotofuatiaifo. (Roma 2:14, 15) Ua faapea mai se tusi, o le upu Eleni lea ua faaliliuina i “aʻoaʻiga” e mafai ona uiga atu i le “tuputupu aʻe o se tamaitiiti,” po o le tausi aʻe o se tamaitiiti ina ia iloa taulima tiute tauave pe a matua.

⁹ O fanau e aʻoaʻia ma le alofa e masani lava e latou te lagona le malupuipuia. E latou te iloa e iai tapulaa o lo latou saʻolotoga, ma e iai āuga o a latou filifiliga ma gaoioiga. Maʻeu la le tāua o le faalagolago atu o mātua Kerisiano iā Ieova mo le taʻitaʻiga! Ia manatua e eseese auala e tausi aʻe ai fanau i le tasi aganuu mai i le isi aganuu, po o le tasi augātupulaga mai i le isi augātupulaga. Peitaʻi, o mātua e faalagolago i le atamai mai i le Atua e lē taumatemate po o le ā le mea e tatau ona latou faia, pe faalagolago foʻi i lo latou lava poto masani po o manatu o tagata.

¹⁰ Seʻi mātau le faaaʻoaʻoga iā Noa. Ina ua faatonuina Noa e Ieova e fau le vaa, e leʻi faalagolago Noa i lona poto masani. E na te leʻi fausia muamua se vaa. O lea, na tatau ona ia faalagolago atu iā Ieova ma na “faapea lava ona ia faia” e pei ona faatonuina ai o ia. (Kene. 6:22) O le ā le iʻuga? Na faasaoina le ola o Noa ma lona aiga i le vaa. Na taulau foʻi Noa o se tamā tausi aiga ona o lona maufaatuatuaina o le atamai mai i le Atua. Na ia aʻoaʻoina lelei lana fanau ma faataatia se faaaʻoaʻoga lelei mo i latou, o se mea e leʻi faigofie ona fai i lenā vaitaimi leaga a o leʻi oo i le Lolo.​—Kene. 6:5.

11. O le ā le tāua o faaaʻoaʻoga a mātua i le toleniina o fanau?

¹¹ I le avea ai ma mātua, e mafai faapefea ona outou pei o Noa o lē na “faapea lava ona ia faia”? Ia outou faalogo atu iā Ieova. Ia faataga o ia e faatonu outou i le auala e tausi aʻe ai a outou fanau, e ala mai i lana Afioga ma taʻiala mai i lana faalapotopotoga. E lē taumatea e iai le taimi o le a faafetai atu ai le fanau ona o lo outou faia faapea. Na tusi se uso e faapea: “Ou te matuā lotofaafetai i le auala na tausi aʻe ai aʻu e oʻu mātua. Na la faia le mea sili ina ia pāʻia ai loʻu loto. O se tasi o māfuaaga autū na ala ai ona ou agaʻigaʻi i luma faaleagaga, ona o oʻu mātua.” Peitaʻi, e ui lava i taumafaiga malolosi a nisi mātua, ae ua tuua e nisi o a latou fanau Ieova. E ui i lea, o mātua na faia le mea sili ina ia totō le upu moni i loto o fanau, e mafai pea ona lelei o latou lotofuatiaifo. E latou te faamoemoe foʻi e iai se taimi  o le a toe foʻi mai ai iā Ieova na fanau lē usiusitaʻi.

12, 13. (a) E faapefea ona faaalia e mātua Kerisiano lo latou usiusitaʻi iā Ieova pe a faateʻaina se isi o le fanau? (e) Na faapefea ona maua e se aiga aogā ona o le usiusitaʻi o mātua iā Ieova?

¹² O se tasi o vala sili e tofotofoina ai le usiusitaʻi o nisi mātua, o le faateʻaina lea o se tasi o le fanau. Seʻi mātau le faaaʻoaʻoga i se tinā na faateʻaina lana tama teine ma ia tuua le aiga. Na taʻutino mai e le tinā: “Na ou saʻilia ni faamatalaga i a tatou lomiga, e fai ma faamolemolega ina ia mafai ai ona ou faifaimea faatasi ma laʻu tama ma lana tama.” Na ia taʻua atili: “Ae na fesoasoani mai ma le alofa laʻu tane ina ia ou iloa e ma te lē o toe tausia la ma tama, ma e lē tatau ona toe iai sa matou fesootaʻiga.”

¹³ I ni tausaga mulimuli ane, na toe faaaʻe mai ai la laʻua tama teine. Na faapea mai le tinā: “O le taimi lenei, e toetoe o aso uma e vili pe text mai ai le ma tama. E na te matuā faaaloalogia foʻi i maʻua ma laʻu tane ona e na te iloa na ma usiusitaʻi i le Atua. Ua matou maua nei se faiā lelei.” Pe afai e iai sau tama e faateʻaina, po o le a e “faatuatua iā Ieova ma lou lotoatoa, ae aua le faalagolago i lou lava malamalama”? (Faata. 3:5, 6) Ia manatua, o aʻoaʻiga a Ieova e atagia mai ai le lē mafaatusalia o lona atamai ma lona alofa. Aua lava neʻi galo na ia auina mai lona Alo mo i tatou uma e aofia ai ma lau tama. E lē finagalo le Atua ina ia faaumatia se tasi. (Faitau le 2 Peteru 3:9.) O lea, ia maufaatuatuaina aʻoaʻiga ma le taʻitaʻiga a Ieova. Mātua e, ia outou faia faapea e tusa pe e oo ai ni faalogona tigā iā te outou ona o le usiusitaʻi iā Ieova. Ioe, tau ina ia outou lagolagoina aʻoaʻiga a le Atua ae e lē o le tetee atu i ai.

14. E faapefea ona tatou maua aogā mai i faatonuga a Ieova e ala mai i le “auauna pule e faamaoni”?

¹⁴ Na folafola mai e Ieova o le a ia tausia, puipuia, ma aʻoaʻoina le faapotopotoga Kerisiano. E tele auala o loo ia faia ai faapea. O se faataʻitaʻiga, na ia tofia lona Alo e na te tausia le faapotopotoga, ma na tofia e lona Alo le “auauna pule e faamaoni” e saunia mai meaʻai faaleagaga i le taimi tatau. (Luka 12:42) E tele auala ua saunia mai ai na meaʻai faaleagaga, lea e aofia ai faatonuga tāua po o aʻoaʻiga. Ia fesili ifo, ʻPe na iai se taimi na ou faalogo ai i se lauga pe faitau i se mataupu i se tasi o a tatou lomiga, na fesoasoani e suia ai oʻu mafaufauga po o amioga?’ O se mea e faafiafiaina ai oe pe afai na e faia na suiga. O lenā ua e faatagaina Ieova e faatonutonu pe aʻoaʻi oe mo lou lelei.​—Faata. 2:1-5.

15, 16. (a) E faapefea ona tatou maua aogā mai i “meaalofa i tagata” i le faapotopotoga? (e) E mafai faapefea ona tatou fesoasoani i toeaina ina ia avea o latou tiute ma mea e olioli ai?

¹⁵ Na foaʻi mai foʻi e Keriso mo le faapotopotoga “meaalofa i tagata,” o toeaina e leoleoina le lafu mamoe a le Atua. (Efe. 4:8, 11-13) E faapefea ona tatou maua aogā mai i nei meaalofa tautele? O se tasi o auala o le faaaʻoaʻo lea i le faatuatua o toeaina ma a latou faaaʻoaʻoga lelei. O se isi auala o le talia lea o a latou fautuaga mai i le Tusi Paia. (Faitau le Eperu 13:7, 17.) Ia manatua, e alolofa toeaina iā i tatou ma e mananaʻo ia o tatou agaʻigaʻi i luma faaleagaga. O se faataʻitaʻiga, pe a latou mātauina ua tatou misia sauniga po ua tau mou atu lo tatou maelega, e lē taumatea o le a vave ona latou taumafai e fesoasoani mai. O le a latou faalogologo mai ma taumafai e fesoasoani iā i tatou, e ala i faalaeiauga māfana ma fautuaga talafeagai mai i le Tusi Paia. Pe e te vaai i lenā fesoasoani o se auala o loo faaalia mai ai le alofa o Ieova mo oe?

¹⁶ Ia manatua foʻi, atonu e lē faigofie i toeaina ona talanoa mai e aumai se fautuaga mo i tatou. O se faataʻitaʻiga, seʻi mafaufau i le faigatā i le perofeta o Natano ona talanoa atu iā Tavita, ina ua taumafai le tupu e natia lana agasala matuiā. (2 Samu. 12:1-14) I se tulaga talitutusa, na manaʻomia foʻi e le aposetolo o  Paulo le lototele ina ia avatu ai se faasaʻoga mo Peteru, o se tasi o aposetolo e toʻa 12, ina ua faaituʻau Peteru i uso Iutaia. (Kala. 2:11-14) O lea, e faapefea ona e faafaigofie le tiute a toeaina i lau faapotopotoga? Ia e lotomaulalo, avea oe ma se isi e faigofie ona talanoa i ai, ma faaalia le lotofaafetai. Ia vaai i le fesoasoani a toeaina o se faaaliga o le alofa o le Atua mo oe. O le faia faapea, e lē gata o le a e maua ai aogā ae o le a maua ai foʻi e toeaina le olioli a o faatino o latou tiute.

17. Na faapefea ona maua e se tuafafine aogā mai i le fesoasoani alofa a toeaina i le faapotopotoga?

¹⁷ Na faigatā i se tasi o tuafafine ona atiaʻe le alofa iā Ieova, ona o mea na tutupu i lona olaga i le taimi ua teʻa. Na faapea mai o ia: “Pe a ou lagona le lotovaivai ona o mea na ou faia i le taimi ua teʻa ma isi faafitauli, na ou iloa e tatau ona ou talanoa atu i toeaina. E latou te leʻi inainā mai pe faitioina aʻu, ae na latou faalaeiau ma faamalosia aʻu. E ui i o latou tulaga pisi, ae e iai lava se tasi o i latou e fesili mai i sauniga taʻitasi po o ā mai aʻu. O mea na tutupu iā te aʻu i le taimi ua teʻa na faigatā ai ona ou manatu e alofa le Atua iā te aʻu. Peitaʻi, mai i lea taimi i lea taimi na faaaogā e Ieova le faapotopotoga ma toeaina e faamautinoa mai lona alofa iā te aʻu. Ou te tatalo ina ia ou lē tuulafoaʻia o ia.”

18, 19. O le ā se mea e sili atu ona tigā nai lo o faalogona tigā e maua mai i aʻoaʻiga? Aumai se faataʻitaʻiga.

¹⁸ E moni e avea aʻoaʻiga ma mea e tigā ai. Peitaʻi, e iai se mea e sili atu ona tigā nai lo o aʻoaʻiga, o āuga lē lelei ia e ono iʻu i ai ona o le lē taliaina o aʻoaʻiga. (Epe. 12:11) Seʻi mātau le faaaʻoaʻoga iā Kaino ma le tupu o Setekaia. Ina ua matuā ita Kaino iā Apelu ma manaʻo e fasioti o ia, na ʻaiʻoi atu le Atua iā Kaino: “Aiseā ua e matuā ita ai ma ua e faaʻūʻū ai? Pe afai e suia ou ala ma faia le mea lelei, po ou te lē taliaina ea oe? Ae afai e lē suia ou ala ma faia le mea lelei, o loo faatalitali mai le agasala i le faitotoʻa, e uaʻi atu foʻi lona manaʻo iā te oe; ae pe e te pule ea i ai?” (Kene. 4:6, 7) E leʻi faalogo Kaino. Na manumalo le agasala iā te ia. Pagā le tele o tigā ma puapuaga na oo iā Kaino! (Kene. 4:11, 12) Pe ana faalogo Kaino i le Atua, semanū e lē matuā ogaoga ni tigā e oo iā te ia.

¹⁹ O Setekaia o se tupu amioleaga na pule i Ierusalema a o sasao faaafi ai le amioleaga. Na lapataʻia e lē aunoa e le perofeta o Ieremia Setekaia ina ia lafoaʻia ona ala leaga, ae na teena e le tupu aʻoaʻiga a Ieova ma oo ai i iʻuga mataʻutia. (Iere. 52:8-11) E matuā naunau Ieova e puipuia i tatou mai i mafatiaga faapena, ia e mafai ona tatou ʻalofia.​—Faitau le Isaia 48:17, 18.

20. O le ā le faamoemoe mo ē e taliaina aʻoaʻiga mai i le Atua, ae e faapefea ē e latou te teena?

²⁰ O le toʻatele i le lalolagi e latou te manatu faatauvaa i aʻoaʻiga, ma le pulea o le tagata lava ia. Peitaʻi, o so o se tasi e teena aʻoaʻiga a le Atua, e lē o toe umi ae latou selesele i āuga leaga o o latou ala. (Faata. 1:24-31) O lea, seʻi o tatou “faalogo i [aʻoaʻiga] ona atamai ai lea.” Ua faapea mai le Faataoto 4:13: “Ia taofimau i [aʻoaʻiga]; aua neʻi faamaamuluina. Ia leoleo i ai, auā o lou ola lea.”