1, 2. (a) O ā ni manatu o nisi mātua Kerisiano pe a faailoa atu e a latou fanau ua fia papatiso? (e) Aiseā e fesiligia ai sui papatiso po ua latou faia se tuuina atu iā Ieova? (Tagaʻi i le ata i luga aʻe o le matua.)

NA TUTŪ faatasi i luga se teineitiiti o le a tatou faaigoaina iā Maria ma isi sui papatiso, a o vaavaai atu ona mātua Kerisiano. Na ia taliina i se auala manino ma le leotele fesili e lua sa fai mai e le failauga. Mulimuli ane, na papatisoina o ia.

² Na fiafia mātua o Maria i le filifiliga na fai e le la tama ina ia tuuina atu atoatoa iā Ieova ma papatiso. Ae i se taimi muamua atu na iai fesili na mafaufau i ai le tinā o Maria, e pei o le: ʻPo ua laʻitiiti tele Maria e papatiso? Pe e malamalama lelei o ia i le tāua o lana filifiliga ua fai? Pe e lē sili ona ia faatali mo sina taimi a o leʻi papatiso?’ O fesili nei e fesili ifo ai le tele o mātua alolofa pe a faailoa atu e a latou fanau le faanaunauga ua fia papatiso. (Fai. 5:5) O le mea moni, o le tuuina atu ma le papatisoga o laasaga ia e sili ona tāua i le olaga o se Kerisiano.​—Tagaʻi i le pusa “ Po ua E Faia se Tuuina Atu iā Ieova?”

3, 4. (a) O le ā le faataʻitaʻiga na taʻua e Peteru e faaalia ai le tāua o le papatisoga? (e) Aiseā e mafai ai ona faatusaina le papatisoga i le fausiaina e Noa o le vaa?

 ³ Na faasino atu le aposetolo o Peteru i le papatisoga ina ua ia taʻua le fausia e Noa o le vaa. Na tusi Peteru: “Ua fai lenā mea ma faatusa o le papatisoga lea ua faaolaina ai nei outou.” (Faitau le 1 Peteru 3:20, 21.) O le vaa na avea o se faamaoniga vaaia o le tuutoina atu o Noa i le faia o le finagalo o le Atua. Na faamaoni Noa i le faataunuuina o le galuega na tuuina mai e Ieova e na te faia. Ioe, o faamaoniga vaaia o le faatuatua o Noa na iʻu atu ai i le faasaoina o ia ma lona aiga mai i le Lolo. O le ā le manatu autū o le faataʻitaʻiga na taʻua e Peteru?

⁴ E pei lava ona avea le vaa o se faamaoniga o le faatuatua o Noa, o le papatisoga foʻi i luma o tagata o se faamaoniga vaaia lea. O le ā ua faailoa atu ai? Ua faailoa atu ai ua faia e se soo o Keriso se tuuina atu iā Ieova e faavae i le faatuatua iā Keriso o lē na toetū mai. I le pei o Noa, o loo faaauau pea ona faia e soo ua tuuina atu le galuega ua tofia i ai i latou e le Atua. E pei ona faasaoina Noa i le Lolo, o le a faasaoina foʻi tagata papatiso faamaoni pe a faaumatia lenei faiga amioleaga o mea. (Mare. 13:10; Faaa. 7:9, 10) O le māfuaaga lea e tāua tele ai le tuuina atu ma le papatisoga. Pe a faatuatuai le papatisoga o se tasi e aunoa ma se māfuaaga tatau, e ono leiloa ai lona faamoemoe o le ola e faavavau.

5. O le ā o le a tatou iloiloina i lenei mataupu?

⁵ E tolu fesili e tatau ona tatou iloiloina e malamalama ai i le tāua o le papatisoga. O le ā le faamatalaga a le Tusi Paia e faatatau i le papatisoga? O ā laasaga e tatau ona uia e se tasi a o leʻi papatiso? Aiseā e tatau ai i sē o loo faia se suʻesuʻega ona manatua le tāua o le papatisoga, a o faia le suʻesuʻega a lona alo po o se tagata aʻoga o le Tusi Paia?

6, 7. (a) Faamatala le tāua o le papatisoga na faia e Ioane. (e) O le ā le papatisoga mataʻina na faia e Ioane?

⁶ O le papatisoga muamua o loo taʻua i le Tusi Paia o le papatisoga na faia e Ioane le Papatiso. (Mata. 3:1-6) Na papatisoina le toʻatele e Ioane ina ia faamaonia atu ai lo latou salamō i a latou agasala, ia na solia ai le Tulafono a Mose. Ae ia mātau le manatu lenei, o le papatisoga e sili ona tāua na faia e Ioane e leai se sootaga ma le salamō. Na maua e Ioane le faaeaga mataʻina o le papatisoina o Iesu, le Alo lelei atoatoa o le Atua. (Mata. 3:13-17) E leʻi faia e Iesu se agasala, o lea e leʻi manaʻomia ai ona salamō o ia. (1 Pete. 2:22) O lona papatisoga na faailogaina ai le tuuina atu o ia e faia le finagalo o le Atua.​—Epe. 10:7.

⁷ I le taimi o le faiva a Iesu i le lalolagi, na faia foʻi e ona soo papatisoga. (Ioa. 3:22; 4:1, 2) I le pei o le papatisoga na faia e Ioane, o papatisoga na faia e soo o Iesu na faailogaina ai le salamō o tagata mai i a latou agasala ia na solia ai le Tulafono a Mose. Peitaʻi, ina ua mavae le maliu ma le toetū mai o Iesu, na sui le uiga o le papatisoga mo ona soo.

8. (a) O le ā le poloaʻiga na tuuina atu e Iesu i ona soo ina ua mavae lona toetū? (e) Faamatala le tāua o le papatisoga faa-Kerisiano.

⁸ I le 33 T.A., na faaali atu ai Iesu o lē ua toetū mai i se motu o tagata e silia i le 500 tane, fafine ma atonu foʻi ma tamaiti. Atonu o le taimi lenā na fetalai atu ai Iesu: “O le mea lea, ia outou ō atu e fai tagata o nuu uma lava ma soo, ma papatiso atu iā i latou i le suafa o le Tamā, ma le Atalii, ma le agaga paia, ia aʻoaʻoina i latou ia tausi i mea uma ua ou poloaʻi atu ai iā te outou.” (Mata. 28:19, 20; 1 Kori. 15:6) E foliga mai e faitau selau soo o Iesu na iai i le taimi na ia tuuina atu ai le poloaʻiga e fai isi ma soo. O lea, na faailoa mai e Iesu e tatau ona papatisoina i latou o ē e taliaina le avega o le avea ma soo o Keriso. (Mata. 11:29, 30) O so o se tasi e manaʻo e auauna i le Atua e tusa ma Lona finagalo, e tatau ona ia amanaʻia ma talia le matafaioi a Iesu i le faataunuuina o le finagalo o le Atua. Pe a māeʻa, ona mafai lea ona papatisoina lenā tagata. E na o le pau lea o le papatisoga i le vai e taliaina e le Atua. E tele faamaoniga i le Tusi Paia e iloa ai, na malamalama soo fou o Keriso i le uluaʻi senituri i le tāua o le papatisoga. O lea, e leʻi faatuatuai ona latou papatiso e aunoa ma se māfuaaga tatau.​—Galu. 2:41; 9:18; 16:14, 15, 32, 33.

9, 10. O le ā e tatou te aʻoaʻoina e faatatau i le papatisoga mai i le tagata Aitiope na liulotu ma le aposetolo o Paulo?

⁹ Faitau le Galuega 8:35, 36. Ia mātau le faaaʻoaʻoga a le tagata Aitiope na liulotu, lea na toe foʻi i lona nuu mai i lana malaga i Ierusalema e tapuaʻi ai. O le uunaʻiga a le agelu a Ieova na faalatalata atu ai Filipo i le tagata Aitiope ma “folafola atu iā te ia le tala lelei e uiga iā Iesu.” O le ā le tali mai a le tagata Aitiope? O lana gaoioiga na sosoo ai na avea o se faamaoniga manino o lona matuā talisapaia o upu moni na ia aʻoaʻoina. Na naunau o ia e mulimuli i le faatulagaga a Ieova, o lea na papatiso ai loa o ia e aunoa ma le faatuatuai.

¹⁰ O le isi faaaʻoaʻoga, o se tamāloa Iutaia na sauāina Kerisiano. Na fanau aʻe o ia i se nuu na tuuina atu i le Atua. Peitaʻi, na melea e tagata Iutaia la latou faiā faapitoa ma Ieova. Sa maelega lenā tamāloa i le tausisia o uputuu faa-Iutaia, ae na ia aʻoaʻoina mulimuli ane se isi mea e sili atu ona tāua. Na molimau tuusaʻo atu i ai Iesu Keriso o lē ua toe faatūina mai ma faamamaluina. O le ā le tali atu a le tamāloa? Na ia talia le  fesoasoani mai iā Anania le soo o Keriso. Ua faapea mai le Tusi Paia e uiga i lenā tamāloa: “Ua ia tulaʻi ma ua papatisoina o ia.” (Galu. 9:17, 18; Kala. 1:14) O lenā tamāloa Iutaia na taʻua mulimuli ane o le aposetolo o Paulo. O le taimi lava na ia taliaina ai le upu moni e faatatau i le matafaioi a Iesu i le faataunuuina o le finagalo o le Atua, na gaoioi loa o ia. Na papatiso o ia e aunoa ma le faatuatuai.​—Faitau le Galuega 22:12-16.

11. (a) O le ā e uunaʻia ai tagata aʻoga o le Tusi Paia i aso nei ina ia papatiso? (e) O ā o tatou lagona pe a tatou vaaia ua papatiso se tasi?

¹¹ E faapena foʻi tagata aʻoga o le Tusi Paia i aso nei e tusa po o le ā lo latou matutua. E naunau i latou o ē faatuatua ma matuā talisapaia upu moni o le Tusi Paia e faia se tuuina atu ma papatisoina. O se tasi o vaega mataʻina i fonotaga ma tauaofiaga uma o le lauga o le papatisoga. E olioli Molimau a Ieova pe a talia e se tagata aʻoga o le Tusi Paia le upu moni ma papatisoina. Pe e lē o se mea e faafiafiaina ai mātua i le vāai atu i a latou fanau o loo aofia i soo fou o le a papatisoina? I le tausaga faaleauaunaga o le 2017, e silia ma le 284,000 “ē ua saunia o latou loto” na faailogaina lo latou tuuina atu iā Ieova e ala i le papatisoga. (Galu. 13:48) E manino mai na malamalama lelei na soo fou, o le papatisoga o se mea e tatau mo Kerisiano. O ā laasaga na latou uia a o leʻi papatisoina i latou?

12. O ā laasaga e tatau ona uia e se tagata aʻoga o le Tusi Paia a o leʻi papatiso?

¹² A o leʻi papatisoina se tagata aʻoga o le Tusi Paia, e tatau ona ia atiaʻe le faatuatua e faavae i le poto saʻo i le Atua, o Lona finagalo, ma Lana faatulagaga mo le faaolataga. (1 Timo. 2:3-6) O lenā faatuatua e uunaʻia ai le tagata aʻoga e teena amioga e lē fiafia i ai le Atua, ma ola e tusa ai ma tapulaa amiotonu a Ieova. (Galu. 3:19) E tāua tele lenei vala, ona e lē talia e Ieova le tuuina atu e faia e se tasi o loo faaauau pea ona faatino ni amioga e inosia e Ia. (1 Kori. 6:9, 10) E iai isi mea e manaʻomia nai lo o le tau ina usitaʻia o tapulaa maualuluga tauamio a Ieova. E tatau foʻi i se tasi e saʻilia le amiotonu ona auai i sauniga a le faapotopotoga, ma faia se sao atoatoa i le galuega talaʻi faasaoola ma le faia o isi ma soo. Na fetalai Iesu o le a faia e ona soo moni lenei galuega. (Galu. 1:8) Pe a māeʻa ona uia na laasaga, ona faatoʻā mafai lea ona faia e se soo fou se tuuina atu iā Ieova e ala i le tatalo, ma faailoa atu i luma o le lautele lenā tuuina atu e ala i le papatisoga.

13. Aiseā e tatau ai i ē e aʻoaʻo atu le Tusi Paia ona manatua o le papatisoga o se mea e tatau mo Kerisiano?

¹³ A o tatou fesoasoani i a tatou fanau ma isi tagata aʻoga o le Tusi Paia e uia laasaga e manaʻomia, e tatau ona tatou manatua o le avea ma Kerisiano moni e aofia ai le papatisoga. Pe a tatou manatua lenā manatu, o le a tatou faailoa atu ai i se auala manino i a tatou tagata aʻoga. E tatou te lē faatalatū e talanoa atu iā i latou i taimi talafeagai e faatatau i le tāua o le tuuina atu ma le papatisoga. Ioe, e tatou te mananaʻo ina ia agaʻigaʻi i luma a tatou fanau ma isi tagata aʻoga o le Tusi Paia seʻia oo ina papatisoina.

14. Aiseā e tatou te lē faamalosia ai so o se tasi ina ia papatiso?

¹⁴ O le mea moni e lē tatau i se matua, o sē o loo aʻoaʻoina atu le Tusi Paia, po o se isi lava i le faapotopotoga, ona faamalosia se tasi ina ia papatiso. E lē o le auala lenā a Ieova. (1 Ioa. 4:8) Nai lo o lea, a o tatou aʻoaʻoina a tatou tagata aʻoga, e ao ona tatou faamatilatila i ai le tāua o lo latou  atiaʻe o se faiā lelei ma le Atua. O le talisapaia moni e le tagata aʻoga o le upu moni ma lona faanaunauga e talia le avega o le avea ma soo o Keriso, o le a uunaʻia ai o ia ina ia papatiso.​—2 Kori. 5:14, 15.

15, 16. (a) Pe e iai se tausaga faatulagaina e tatau ai ona papatiso se tasi? Ia faamatala. (e) Aiseā e tatau ai i se tagata aʻoga o le Tusi Paia ona papatiso e avea o se Molimau a Ieova, e tusa po ua uma ona papatiso i se isi tapuaʻiga?

¹⁵ E leai se tausaga faatulagaina e tatau ai ona papatiso se tasi. E eseese lava le vave e agaʻigaʻi ai i luma tagata aʻoga taʻitasi. O le toʻatele e papatiso a o lāiti ma auauna pea ma le faamaoni iā Ieova. Ae o isi tagata aʻoga e iloa le tāua o le papatisoga pe a uma ona aʻoaʻoina upu moni o le Tusi Paia ae ua loa o latou soifua, e aofia ai ma isi ua silia i le 100 tausaga le matutua.

¹⁶ Na fesili se tagata aʻoga ua loa le soifua i lona faiaʻoga pe e manaʻomia moni lava ona toe papatiso o ia, auā sa papatiso i lotu eseese sa iai i tausaga ua mavae. Na la autalu ma lona faiaʻoga mau o le Tusi Paia e fesootaʻi ma le papatisoga. O i inā na malamalama ai le tagata aʻoga o se laasaga tāua lea mai i le Tusi Paia, ma e leʻi umi ae papatiso loa o ia. E ui lava na lata i le 80 ona tausaga ae na manatu o ia e tatau ona papatiso. Ioe, o le papatisoga e talia e Ieova e tatau ona faavae i le poto saʻo e faatatau i lona finagalo. O lea, e tatau ai i soo fou ona papatiso e tusa lava po ua uma ona papatiso i se isi tapuaʻiga.​—Faitau le Galuega 19:3-5.

17. O le ā se vala tāua e manatunatu loloto i ai se tasi i le aso e papatiso ai?

¹⁷ O se taimi fiafia le aso e papatiso ai se tasi. O le taimi foʻi lenā e tāua ai le manatunatu loloto i mea e aofia ai i le papatisoga. O le ola o se tasi e ōgatusa ma lona tuuina atu e aofia ai taumafaiga fitā. O le māfuaaga lenā na faatusa ai e Iesu le avea o se tasi ma soo o Keriso i se avega. O soo o Iesu e “lē toe ola i latou mo i latou lava, ae ia ola mo ia o lē na maliu mo i latou ma toe faatūina mai.”​—2 Kori. 5:15; Mata. 16:24.

18. O ā fesili o le a tatou iloiloina i le mataupu o sosoo mai?

¹⁸ E pei ona tatou aʻoaʻoina i lenei mataupu, e matuā tāua le filifiliga o le avea ma soo o Keriso. O le māfuaaga lenā na fesili ifo ai le tinā o Maria i fesili na taʻua i le amataga o lenei mataupu. Pe afai o oe o se matua, atonu na e fesili ifo: ʻPo ua nofosauni laʻu tama e papatiso? Po ua lava lona malamalama e faia ai se tuuina atu? Ae e faapefea sini i le lalolagi e fesootaʻi atu i aʻoaʻoga ma galuega? Ae e faapefea pe afai e papatiso laʻu tama ae mulimuli ane ona faia se agasala matuiā?’ O le a tatou iloiloina na fesili i le mataupu o sosoo mai, ma talanoaina ai le auala e faatumauina ai pea e mātua Kerisiano se vaaiga paleni i le papatisoga.