E TATOU te mananaʻo e manatu isi iā i tatou o ni tagata lelei. Peitaʻi, o se luʻi i aso nei le faaalia o le amiolelei, ona o le toʻatele o tagata “e lē fiafia i mea lelei.” (2 Timo. 3:3) Atonu e iai a latou lava tapulaa o mea lelei ma mea lē lelei. O le iʻuga, e latou te teena ai tapulaa a Ieova ma manatu ai “e lelei le leaga, ma e leaga le lelei.” (Isa. 5:20) O loo tatou tauivi foʻi ma o tatou lava vaivaiga, ma faalogona nofosala ona o mea lē lelei na tatou faia i le taimi ua teʻa. Atonu e tutusa o tatou faalogona ma Anne, * o lē ua loa ona auauna iā Ieova. Ae na ia taʻutino mai: “E faigatā ona ou talitonu e mafai ona avea aʻu o se tagata lelei.”

O le mea e faafetai ai, e mafai e i tatou uma lava ona atiaʻe le amiolelei. O le amiolelei o se tasi lea o vala o le fua o le agaga paia o le Atua, lea e sili atu ona malosi nai lo o taaʻiga leaga a le lalolagi, tagata o le lalolagi, tatou vaivaiga, ma faalogona nofosala. O le a tatou iloiloina mea e aofia ai i le amiolelei, ma auala e mafai ona tatou faaalia atili ai lenei uiga.

O le amiolelei e uiga atu i amioga e sili ona lelei, po o se mea e lelei e aunoa ma le leaga. O le tagata e amiolelei, e na te saʻili auala e fesoasoani ai i isi ma faia mea lelei mo i latou.

Ua tatou mātauina tagata e latou te faia le tele o mea lelei mo o latou aiga ma uō. Ae e tele atu isi mea e aofia ai i le faaalia o le amiolelei. O le mea moni, e lē atoatoa ona tatou faaalia le amiolelei, auā ua faapea mai le Tusi Paia: “E leai se tagata e amiotonu i le lalolagi e na te faia pea le mea lelei ma e lē agasala.” (Fai. 7:20) Na taʻutino mai foʻi le aposetolo o Paulo: “Ua ou iloa e leai se mea lelei ua nofo i totonu iā te aʻu, i loʻu tino lea.” (Roma 7:18) Ina ia tatou atiaʻe la le amiolelei, e tatau ona tatou saʻili i le fesoasoani a le Atua, le Puna o mea lelei uma.

Ua faataatia e Ieova le Atua le tapulaa mo mea lelei. Ua faapea mai le Salamo 119:68 e faatatau iā Ieova: “O oe e lelei ma o loo e faia mea lelei. Ia e aʻoaʻo mai aʻu i au tulafono.” Seʻi o tatou iloiloina vala e lua o le lelei o Ieova, e pei ona taʻua i le mau.

E lelei Ieova. E lelei atoatoa Ieova ma so o se mea e na te faia, ma e fesootaʻi atu lona lelei i isi ona uiga. Mātau le fetalaiga a Ieova iā Mose: “Ou te faapogaia oe e te vaai i loʻu lelei.” A o vaaia e Mose le mamalu o Ieova lea e aofia ai Lona lelei, na ia faalogo i le fetalaiga lenei: “O Ieova, o Ieova, o le Atua e alofa mutimutivale ma alofa fua, e telegese lona toʻasā ae e tele lona alofa faamaoni ma fai mea moni, e tausia le alofa faamaoni e oo atu i afe o tupulaga, e faamagalo mea sesē, o solitulafono ma agasala, ae e na te lē faasaoina o ē e agasala mai i faasalaga.” (Eso. 33:19; 34:6, 7) Ua faamanino mai i lenei mau, e lelei atoatoa Ieova i so o se vala. E ui lava na avea Iesu o se tagata e lelei atoatoa, ae na ia faapea mai: “E leai se tasi e lelei ua na o le toʻatasi, o le Atua lea.”​—Luka 18:19.

E faia e Ieova mea lelei. E lelei mea uma lava e faia e Ieova. ʻE lelei Ieova i mea uma lava, e alofa  mutimutivale foʻi o ia i ana galuega uma.’ (Sala. 145:9) E lē faailogatagata Ieova i le faia o mea lelei, e ala i le saunia o le ola ma mea uma e manaʻomia e tagata e tausi ai le ola. (Galu. 14:17) E faamaonia foʻi le lelei o Ieova i lona faamagaloina o tagata. Na tusi le faisalamo: “Ieova e, o oe e lelei ma ua e nofosauni e faamagalo.” (Sala. 86:5) E mafai ona tatou mautinoa “e lē taofia e Ieova se mea lelei mai iā i latou o savavali ma le lē taʻuleagaina.”​—Sala. 84:11.

Na faia i tatou i le faatusa o le Atua, o le māfuaaga lea e mafai ai ona tatou amiolelei ma faia mea lelei mo isi. (Kene. 1:27) E ui i lea, ua faalaeiauina i tatou i le Tusi Paia ina ʻia tatou faamasani e fai mea lelei.’ (Isa. 1:17) Ae e faapefea ona tatou atiaʻe lenei uiga matagofie? Ia mātau auala nei e tolu.

Muamua, e mafai ona tatou tatalo mo le agaga paia, lea e fesoasoani iā i tatou ina ia faia mea lelei i le silafaga a le Atua. (Kala. 5:22) Ioe, e fesoasoani le agaga o le Atua ina ia tatou fiafia ai i mea lelei, ae teena mea leaga. (Roma 12:9) Ua faailoa mai i le Tusi Paia, e mafai e Ieova ona “faatumauina [i tatou] i galuega ma upu lelei uma.”​—2 Tesa. 2:16, 17.

Lua, e tatau ona tatou faitau i le Afioga a le Atua. A o tatou faia faapea, e faatonu i tatou e Ieova i “ala lelei uma” ma saunia i tatou “mo galuega lelei uma.” (Faata. 2:9; 2 Timo. 3:17) O o tatou loto e mafai ona faatusaina i se pusa e teu ai oloa. Pe a tatou faitau ma manatunatu loloto i le Tusi Paia, ua faatumulia o tatou loto i oloa lelei. O le faia faapea, ua tatou faaputuina ai oloa lelei i o tatou loto, lea o le a aogā iā i tatou i se taimi mulimuli ane.​—Luka 6:45; Efe. 5:9.

Tolu, ia tatou faia le mea sili ina ia ʻfaaaʻoaʻo i mea lelei.’ (3 Ioa. 11) E maua i le Tusi Paia faaaʻoaʻoga lelei e tatou te mulimuli i ai. O Ieova ma Iesu o faaaʻoaʻoga na e sili ona lelei. Ae e mafai foʻi ona tatou iloiloina faaaʻoaʻoga a i latou na matilatila i le faaalia o le amiolelei. O se faaaʻoaʻoga, o Tapita ma Panapa. (Galu. 9:36; 11:22-24) E tele aogā e mafai ona tatou maua pe a tatou suʻesuʻeina a la faaaʻoaʻoga, ma mātau auala na la fesoasoani ai i isi. Ia mafaufau i auala e mafai ona e fesoasoani atu ai i tagata o lou aiga, po o le faapotopotoga. Ia manatunatu foʻi i faamanuiaga na maua e Tapita ma Panapa ona o le faia o mea lelei mo isi.

E mafai foʻi ona tatou manatunatu i faaaʻoaʻoga a i latou o loo faia mea lelei i aso nei. O se faaaʻoaʻoga, ia mafaufau i toeaina galulue mamafa o ē e ʻfiafia i amioga lelei’ i le faapotopotoga. Aua foʻi neʻi galo o tatou tuafāfine faamaoni, “o ē e aʻoaʻo  atu i mea lelei” e ala i a latou faamatalaga ma galuega lelei. (Tito 1:8; 2:3) Na faapea mai se tuafafine e igoa iā Roslyn: “E taumafai malosi se tasi o aʻu uō e fesoasoani ma faalaeiau i tagata o le faapotopotoga. E manatunatu o ia i o latou tulaga, ma e masani ona ia avatu ni tamaʻi meaalofa mo i latou, pe e fesoasoani atu foʻi i nisi o auala. O ia o se tuafafine lelei.”

Ua faalaeiau e Ieova ona tagata ina ia “saʻili i le lelei.” (Amo. 5:14) Pe a tatou faia faapea, o le a tatou fiafia ai i ana tapulaa ma faamalosia lo tatou faanaunauga ina ia faia le mea lelei.

E lē tatau ona tatou manatu seʻiloga e tatou te faia ni gaoioiga mataʻina pe avatu ni meaalofa taugatā i isi, ona faapea ai lea ua tatou faaalia le amiolelei. Seʻi fai se faataʻitaʻiga: Ina ia maua se ata tusi matagofie, e lē tau na o le valiina e le tagata tusiata o ni tosi tetele se tasi pe lua. Nai lo o lea, e na te valiina le tele o tositosi lāiti, ona maua ai lea o se ata matagofie. E faapena foʻi lo tatou faia o mea lelei e fesoasoani atu ai i isi. E lē faatalitalia e tatou te faia ni gaoioiga mataʻina, ae e tāua lo tatou faia o le tele o gaoioiga lāiti.

Ua faalaeiauina i tatou i le Tusi Paia ina ia “saunia” ma “nofosauni mo galuega lelei uma.” (2 Timo. 2:21; Tito 3:1) Pe a tatou mataala i tulaga o tagata, o le a tatou mātauina ni auala e faafiafia ai i latou i le faia o ʻmea lelei, ina ia atiaʻe ai.’ (Roma 15:2) Atonu e aofia ai le tufa atu o ni mea o iā i tatou. (Faata. 3:27) O se faaaʻoaʻoga, atonu e tatou te valaaulia se tasi mo se taumafataga māmā, po o ni faatasitasiga e faalaeiauina ai. Pe afai ua tatou iloa se tasi o maʻi, e mafai ona lafo i ai se tusi, pe asiasi po o le telefoni foʻi i ai. Ioe, o le a tatou saʻili avanoa e fai atu ai “ni upu lelei e atiaʻe ai i taimi e tatau ai, ina ia aogā i ē o faalogologo i ai.”​—Efe. 4:29.

I le pei o Ieova, e tatou te saʻilia avanoa e fai ai mea lelei i tagata uma. O lea, e tatou te lē faailogatagata. O le auala sili e faaaʻoaʻo ai i le lē faailogatagata o Ieova, o le talaʻia lea o le tala lelei o le Malo i tagata uma. E pei ona poloaʻia e Iesu, e tatou te taumafai e faia mea lelei e oo lava i ē e foliga mai e feita iā i tatou. (Luka 6:27) O se gaoioiga saʻo lo tatou faaalia o le agalelei i tagata ma faia mea lelei mo i latou, auā “e lē faatulafonoina mea faapena.” (Kala. 5:22, 23) O a tatou amioga lelei e ui i teteega ma luʻi, atonu e tosina mai ai isi i le upu moni ma faamamaluina ai le Atua.​—1 Pete. 3:16, 17.

O loo taʻua i le Faataoto 14:14: “O le tagata lelei e faamalieina i iʻuga o ana feutagaʻiga.” O ā nisi o na iʻuga lelei? Pe afai e tatou te faia mea lelei i isi, e lē taumatea o le a latou faia mai foʻi mea lelei iā i tatou. (Faata. 14:22) Ae e tusa pe e latou te lē faia faapea, o lo tatou finafinau pea e faia le mea lelei, atonu o le a suia ai o latou uiga ma iʻu ai ina latou faia se mea lelei mo i tatou.​—Roma 12:20.

Ua iloa e le toʻatele o Kerisiano le tele o aogā o le faia o mea lelei, ae lafoaʻi amioga leaga. Seʻi manatu i le mea na tupu iā Nancy. Na ia taʻutino mai: “A o oʻu talavou, na ou aafia i amioga lē pulea ma amioga lē mamā, ma na ou lē faaaloalo i tagata. Ae ina ua ou aʻoaʻoina ma faatatauina tapulaa a le Atua i amioga lelei, na amata ai ona ou fiafia. O le taimi la lenei, ua ou iloa e tāua aʻu i le silafaga a le Atua.”

O le māfuaaga autū e tatou te atiaʻe ai le amiolelei, ona e faafiafia ai le finagalo o Ieova. E tusa pe e lē iloa mai e tagata mea e tatou te faia, ae e silafia e Ieova. E silafia lelei e Ieova a tatou gaoioiga ma manatunatuga lelei uma. (Efe. 6:7, 8) O ā iʻuga e oo i ai? O loo faapea mai le Faataoto 12:2: “O le tagata lelei e na te maua le finagalo malie o Ieova.” O lea, ia faaauau ona tatou atiaʻe le amiolelei. Ua folafola mai e Ieova ʻle mamalu, viiga ma le filemu, mo ē e amiolelei.’​—Roma 2:10.