1. O le ā e sili atu ona taaʻina ai o tatou uiga ma amioga?

 E TUSA lava pe faatoʻā uma ona tatou papatiso pe ua leva foʻi, e tatou te mananaʻo uma e faaalia uiga ma amioga e fiafia i ai Ieova. Ina ia avea ma lenā ituaiga tagata, e manaʻomia ona pulea o tatou mafaufauga. Aiseā? Talu ai ona e sili atu ona taaʻina o tatou uiga ma amioga, e o tatou mafaufauga. Pe a faaauau ona mafaufau i tuʻinanauga o le tino, o le a tatou faia ai tala ma mea leaga. (Efe. 4:17-19) Ae pe a faatumu o tatou mafaufau i mafaufauga lelei, o le a tatou talanoa ma gaoioi ai i se auala e faafiafiaina ai Ieova lo tatou Tamā.​—Kala. 5:16.

2. O ā fesili o le a tatou talanoaina i lenei suʻesuʻega?

² E pei ona taʻua i le suʻesuʻega ua mavae, e lē mafai ona tatou taofia mea leaga uma e ofi atu i o tatou mafaufau. Peitaʻi, e mafai ona tatou filifili e lē faatinoina na mafaufauga. A o tatou leʻi papatiso, na manaʻomia ona ʻalofia le talanoa ma gaoioi i se auala e ʻinoʻino i ai Ieova. O le auala muamua lenā ma e sili ona tāua, ina ia toese ai le tagata tuai. Peitaʻi ina ia faafiafiaina atoatoa Ieova, e tatau foʻi ona usitaʻia le faatonuga: “Ia oofu outou i le tagata fou.” (Kolo. 3:10) I lenei suʻesuʻega o le a tatou taliina ai fesili nei: O le ā le “tagata fou”? E faapefea ona tatou oofu i le tagata fou, ma faaauau ai pea?

3. I le Kalatia 5:22, 23 o le ā le “tagata fou,” ma e faapefea ona ofu se tasi i le tagata fou?

³ O le “tagata fou,” o se auala e mafaufau ma gaoioi ai ia atagia mai ai uiga o Ieova. Ae e ofu se tasi i le tagata fou, e ala i le faaalia o le fua o le agaga o le Atua. E na te faatagaina le  agaga paia e taaʻina ona mafaufauga, faalogona ma gaoioiga. (Faitau le Kalatia 5:22, 23.) Mo se faataʻitaʻiga e alofa o ia iā Ieova ma Ona tagata. (Mata. 22:36-39) E faaauau pea ona fiafia lenā tagata, e tusa lava pe na te fesagaʻia faigatā. (Iako. 1:2-4) O se tagata e faatupuina le filemu. (Mata. 5:9) E onosaʻi ma agalelei pe a feutagaʻi ma isi. (Kolo. 3:13) E fiafia i le mea lelei ma e na te faia foʻi. (Luka 6:35) E faamaonia i ana gaoioiga e malosi lona faatuatua i lona Tamā i le lagi. (Iako. 2:18) E tumau pea ona agamalu ma amio pulea, pe a faaosoosoina o ia.​—1 Kori. 9:25, 27; Tito 3:2.

4. Ina ia oofu i le tagata fou, pe mafai ona tatou atiaʻe auauaʻi uiga o loo taʻua i le Kalatia 5:22, 23? Faamatala.

⁴ Ina ia oofu i le tagata fou, e manaʻomia ona tatou atiaʻe uiga uma o loo taʻua i le Kalatia 5:22, 23 ma isi mau o le Tusi Paia. * E faia aʻe le ofu fou i na uiga taʻitasi. E pei ona lē mafai ona tatou ofuina auauaʻi vaega taʻitasi o se ofu, e faapena foʻi ona lē mafai ona tatou ofuina na o se uiga se tasi. O le mea moni, o vala o nei uiga e mafai ona maua i isi uiga. Mo se faataʻitaʻiga pe afai e te alofa moni i lou tuaoi, o le a e onosaʻi ma agalelei i lenā tagata. Ina ia avea ma tagata lelei  * moni, e tatau ona e faaalia le agamalu ma le amio pulea.

5. O le ā le uiga o le ʻiloa o le finagalo o Keriso,’ ma aiseā e tatau ai ona tatou suʻesuʻeina le olaga o Iesu? (1 Korinito 2:16)

⁵ Faitau le 1 Korinito 2:16. Ina ia oofu i le tagata fou, e manaʻomia ona tatou “iloa le finagalo o Keriso.” I nisi faaupuga, e tatau ona tatou aʻoaʻoina le auala e mafaufau ai Iesu, ma faaaʻoaʻo i ai. Na faaalia atoatoa e Iesu fua o le agaga o le Atua. E pei Iesu o se faata e manino lelei, e na te faaatagia atoatoa mai uiga o Ieova. (Epe. 1:3) O le tele e tatou te mafaufau ai e pei o Iesu, o le tele foʻi lenā o lo tatou gaoioi e pei o ia ma o le a tatou taulau ai i le faaataina o ona uiga.​—Fili. 2:5.

6. O ā mea moni e tatau ona tatou manatua pe a tatou taumafai e oofu i le tagata fou?

⁶ Pe e mafai moni ona tatou mulimuli i le faaaʻoaʻoga a Iesu? Atonu e tatou te mafaufau: ʻE lelei atoatoa Iesu. E lē mafai ona tatou faaaʻoaʻo atoatoa iā te ia!’ Pe afai o  tatou faalogona na, ia manatua mea moni nei. Muamua, na foafoaina i tatou i le faatusa o Ieova ma Iesu. O lea, e mafai ona tatou filifili e faaaʻoaʻo iā i laʻua, ma e tatou te taulau e ui e lē mafai ona tatou faaaʻoaʻo atoatoa iā i laʻua. (Kene. 1:26) Lua, e sili atu ona malosi le agaga paia o le Atua. O le fesoasoani a le agaga paia, e mafai ai ona tatou faia mea e lē mafai ona faia e so tatou lava malosi. Tolu, e lē faatalitalia e Ieova i tatou e faaalia atoatoa le fua o le agaga paia. O le mea moni, ua faatulaga e lo tatou Tamā alofa i le lagi tausaga e 1,000, e ausia ai e i latou e faamoemoe e ola e faavavau i le lalolagi parataiso le tulaga lelei atoatoa. (Faaa. 20:1-3) E finagalo Ieova ia tatou faia le mea sili ma faalagolago iā te ia mo le fesoasoani.

7. O le ā o le a tatou talanoaina?

⁷ E faapefea ona tatou faaaʻoaʻo iā Iesu? O le a tatou iloiloina ni vala se fā o le fua o le agaga o le Atua. I vala taʻitasi, o le a tatou aʻoaʻoina mai ai auala na faaalia ai e Iesu na uiga. O le a tatou talanoaina foʻi nisi o fesili e fesoasoani iā i tatou e iloilo ai, po o faapeʻī le auala o loo tatou oofu ai i le tagata fou.

8. Na faapefea ona faaalia e Iesu le alofa?

⁸ O le alofa tele o Iesu iā Ieova, ua uunaʻia ai o ia e faia faataulaga mo lona Tamā ma i tatou. (Ioa. 14:31; 15:13) Na faamaonia e Iesu lona alofa tele i tagata i le auala na ola ai i le lalolagi. E na te faaalia i aso uma le alofa ma le alofa mutimutivale e oo lava iā i latou na teena o ia. O le auala sili na faaalia ai lona alofa i tagata, o le aʻoaʻoina lea o i latou e faatatau i le Malo o le Atua. (Luka 4:43, 44) Na faamaonia foʻi e Iesu lona alofa faataulaga mo le Atua ma tagata, i lona lotomalie e mafatia ma maliu tigā i lima o tagata agasala. O lona faia faapea, ua tatala ai le avanoa mo i tatou e maua ai le ola e faavavau.

9. E faapefea ona tatou faaaʻoaʻo iā Iesu i le faaalia o le alofa?

⁹ O lo tatou alolofa iā Ieova lo tatou Tamā i le lagi, ua tuuina atu ai i tatou iā te ia ma papatisoina. O lea i le pei o Iesu, e tatau ona faaalia le alofa mo Ieova i le auala e tatou te feutagaʻi ai ma isi. Na tusi le aposetolo o Ioane: “O lē e lē alofa i lona uso, o lē ua ia vaai atu i ai, e lē mafai ona ia alofa i le Atua, o lē ua ia lē vaai atu i ai.” (1 Ioa. 4:20) Ia tatou fesili ifo: ʻPo o oʻu atiaʻe le alofa loloto mo tagata? Po o aʻu o se tagata e alofa mutimutivale pe a feutagaʻi ma isi e tusa lava pe latou te lē faaaloalo mai? Po o uunaʻia aʻu e le alofa e faaaogā loʻu taimi ma meafaitino e fesoasoani ai i isi e aʻoaʻo e faatatau iā Ieova? Po o oʻu lotomalie e faia faapea e tusa pe e lē talisapaia e le toʻatele o tagata aʻu taumafaiga pe tetee mai foʻi? Pe mafai ona ou saʻili nisi auala, ina ia faateleina ai le taimi i le galuega o le faia o isi ma soo?’​—Efe. 5:15, 16.

10. Na faapefea ona faatupuina e Iesu le filemu?

¹⁰ Na faatupuina e Iesu le filemu. Ina ua faileagaina o ia e tagata, e na te leʻi toe taui atu le leaga i le leaga, ae na ia faia ni mea e sili atu. Na ia tausolomua e faatupu le filemu ma faalaeiau isi e foʻia feeseeseaʻiga. Mo se faataʻitaʻiga, na ia aʻoaʻoina i latou e tatau ona faia se faaleleiga ma o latou uso, pe a mananaʻo e talia e Ieova la latou tapuaʻiga. (Mata. 5:9, 23, 24) Na fesoasoani e lē aunoa Iesu i ona aposetolo ina ia foʻia lo latou fefinauaʻi, po o ai o i latou e sili.​—Luka 9:46-48; 22:24-27.

11. E faapefea ona tatou faatupuina le filemu?

¹¹ Ina ia avea ma sē e faatupuina le filemu, e tele mea e manaʻomia ona tatou faia nai lo le tau ina ʻalofia o le faatupuina o se feeseeseaʻiga. E manaʻomia ona tatou faia taumafaiga e faatupu ai le filemu ma isi, ma faalaeiau o tatou uso ma tuafāfine e foʻia o latou feeseeseaʻiga.  (Fili. 4:2, 3; Iako. 3:17, 18) Ia fesili ifo i fesili nei: ʻO le ā ou te lotomalie e faataulaga ina ia tausia ai le filemu ma isi? Pe a faatigā mai se uso po o tuafafine, po o le a ou teuloto ai le ita? Po ou te faatali seʻia sau le isi tagata e ma te faalelei, po o le a ou tausolomua e fai le faaleleiga e tusa lava po o lenā tagata na māfua ai le faafitauli? Pe a talafeagai, po ou te faalaeiauina isi o loo feeseeseaʻi ina ia fai se faaleleiga?’

12. Na faapefea ona faaalia e Iesu le agalelei?

¹² Na agalelei Iesu. (Mata. 11:28-30) Na ia faaalia le agalelei e ala i lona agamalu ma magafagafa e tusa lava pe na feagai ma tulaga faigatā. Mo se faataʻitaʻiga, na talosaga atu se fafine Foinie iā Iesu e faamālōlō lana tama. I le taimi muamua na teena e Iesu le talosaga a lenā fafine. Ae ina ua faaalia e le fafine le faatuatua malosi na faamālōlō ai loa ma le agalelei e Iesu lana tama. (Mata. 15:22-28) E ui na faaalia e Iesu le agalelei, ae na ia avatu foʻi fautuaga. O nisi taimi na ia faaalia le agalelei, e ala i le maumauaʻi e avatu fautuaga iā i latou e alofa i ai. Mo se faataʻitaʻiga, ina ua taumafai Peteru e faalotovaivai Iesu mai le faia o le finagalo o Ieova, na aʻoaʻia o ia e Iesu i luma o isi soo. (Mare. 8:32, 33) E leʻi faia e Iesu lenā gaoioiga e faalumaina ai Peteru, ae ina ia toleni ai o ia ma lapataʻia isi soo ina ia ʻalofia le mautinoa naʻuā. E mautinoa na lagona e Peteru le māsiasi ae na aogā iā te ia le aʻoaʻiga.

13. E faapefea ona tatou faaalia le agalelei moni?

¹³ Ina ia faaalia le agalelei moni i ē e te alofa i ai, atonu e iai taimi e tatau ai ona avatu se fautuaga. Ia tatou faaaʻoaʻo iā Iesu, e ala i le faavae o a tatou fautuaga i mataupu silisili mai i le Afioga a le Atua. Ia agamalu. Ia saʻo la tatou vaaiga iā i latou, ma ia maufaatuatuaina e latou te alolofa iā Ieova ma oe, ma o le a latou tali lelei mai i lau fautuaga agalelei ma le alofa. Ia fesili ifo i fesili nei: ʻPo ou te lototele e tautala atu pe a faia e se tasi ou te alofa i ai se mea sesē? Pe a manaʻomia ona avatu se fautuaga, po ou te avatu i se auala agalelei pe inainā? O le ā le uunaʻiga ou te avatu ai se fautuaga? Po ou te avatu se fautuaga ona o loʻu ita i lenā tagata, pe ona ou te manaʻo e fesoasoani i ai?’

14. E faapefea ona faaalia e Iesu le mataalofa?

¹⁴ E lē gata e silafia e Iesu le mea lelei, ae e na te faia foʻi. E alofa Iesu i lona Tamā, o le mea lea e na te faia ai i taimi uma le mea saʻo ona o le uunaʻiga saʻo. O se tagata lelei, e na te saʻilia pea auala e fesoasoani ai i isi ma faia mea lelei mo i latou. E lē lava le tau ina iloa o le mea saʻo e tatau ona fai, ae e tatau ona faia le mea saʻo ma le uunaʻiga saʻo. E ono fesili se tasi, ʻPe e mafai ona faia le mea saʻo ona o se uunaʻiga sesē?’ Ioe. O se faataʻitaʻiga, na taʻua e Iesu i latou na avatu meaalofa i tagata matitiva ae na latou faamautinoa e iloa e isi a latou meaalofa. E ui e foliga e lelei galuega na latou faia, ae e leʻi faafiafiaina ai Ieova.​—Mata. 6:1-4.

15. E faapefea ona tatou faaalia moni le mataalofa?

¹⁵ E mafai ona tatou faaalia moni le mataalofa, pe a tatou faia le mea saʻo e aunoa ma ni māfuaaga manatu faapito. E te ono fesili ifo: ʻPe ou te iloa le mea saʻo e tatau ona fai ma faia? O le ā le uunaʻiga ou te faia ai mea lelei?’

16. O le ā e tatau ona tatou faia i aso uma, ma aiseā?

¹⁶ E lē tatau ona tatou manatu ua tatou oofu atoatoa i le tagata fou, pe a uma ona tatou papatiso. E tatau ona tausia lelei lo tatou “ofu fou” matagofie. O se tasi o auala e faia ai faapea, o le saʻili lea o auala e faaalia atu ai le fua  o le agaga paia o le Atua i aso taʻitasi. Aiseā? Talu ai o Ieova o se Atua e galue mamafa, ma o lona agaga o se mana galue. (Kene. 1:2) O lea e mafai ma e tatau ona uunaʻia i tatou e gaoioi, e so o se vala o le fua o le agaga. Mo se faataʻitaʻiga, na tusi le soo o Iakopo: “E mate le faatuatua pe a leai ni galuega.” (Iako. 2:26) E mate foʻi vala uma o le fua o le agaga o le Atua pe a leai ni galuega. O taimi uma e tatou te faaalia ai le fua o le agaga, e tatou te faamaonia atu ai o loo galue le agaga o le Atua iā i tatou.

17. O le ā e tatou te faia pe a lē taulau i le faaalia o le fua o le agaga?

¹⁷ E oo lava i Kerisiano ua papatiso mo le tele o tausaga, e iai taimi e lē taulau ai i le faaalia o le fua o le agaga. O le mea e sili ona tāua, ia aua le faavaivai ai. Seʻi mātau le faataʻitaʻiga lenei. Pe a masae le ofu e te fiafia lava i ai, pe e vave ona e tiaʻia? Leai. E masani lava e toe suʻi le masae pe a mafai, ma e te faaeteete foʻi neʻi toe masae. Pe a lē taulau ona e faaalia le agalelei, onosaʻi po o le alofa i se tasi, aua e te lotovaivai ai. O le faatoese mai le loto e mafai ona toe faaleleia ai se faauōga ua masae i se auala faafaatusa, ma faatumauina ai pea se faiā māfana ma lenā tagata. Ia maumauaʻi e faia le mea sili e faatumauina ai faauōga i le lumanaʻi.

18. O le ā ua tatou mautinoa i ai?

¹⁸ Maʻeu lo tatou lotofaafetai i le faaaʻoaʻoga a Iesu. O le tele e tatou te faaaʻoaʻo ai i ona mafaufauga ma ona uiga, o le faigofie foʻi lenā ona tatou gaoioi e pei o Iesu. O le tele e tatou te gaoioi ai e pei o Iesu, o le faigofie foʻi lenā ona tatou oofu i le tagata fou. I lenei suʻesuʻega, na tatou talanoaina ai vala e fā o le fua o le agaga o le Atua. Aiseā e lē faaalu ai se taimi e suʻesuʻe ai isi vala o le fua o le agaga, ma iloilo pe e faapeʻī le auala o loo e faaalia ai na vala? E mafai ona e maua se lisi o mataupu e faatatau i vala o le fua o le agaga, i le Tusi Taʻiala mo Saʻiliʻiliga a Molimau a Ieova i lalo o le ulutala “Olaga Faa-Kerisiano,” “Le Fua o le Agaga.” O le faia o le mea sili e tatou te mafaia, e mautinoa o le a fesoasoani Ieova iā i tatou e oofu ai pea i le tagata fou ma faaauau ai ona faia faapea.