O nisi e faitau i lenei tala, e vave lava ona latou fesili mai faapena. Ae e toʻalua ni tamāloloa e igoa iā Mefiposeta o loo taʻua i na fuaiupu, ma e mafai ona tatou aʻoaʻoina mai se lesona i le iloiloina o le mea na tupu.

E toʻafitu atalii o Saulo le tupu o Isaraelu ma ona afafine e toʻalua. O Ionatana, o le atalii ulumatua o Saulo. Mulimuli ane na fanaua ai e Risepa le palake a le tupu, se atalii e igoa iā Mefiposeta. Na i ai foʻi se atalii o Ionatana e igoa iā Mefiposeta. O lea la, e iai le atalii o le tupu o Saulo e igoa ia Mefiposeta ma le atalii o lona atalii e igoa foʻi iā Mefiposeta.

Na iai se taimi na faasagatau ai le tupu o Saulo i tagata Kipeona na nonofo i Isaraelu, ma na manaʻo e faaumatia uma i latou. O le mea moni e i ai tagata Kipeona na fasiotia. Aiseā na matuā sesē ai lenā gaoioiga? Talu ai i le taimi o Iosua, na osia ai e alii sili o Isaraelu se feagaiga o le filemu ma tagata Kipeona.​—Iosua 9:3-27.

Na aogā pea lenā feagaiga i le taimi o le tupu o Saulo. E leʻi tausia e le tupu lenā feagaiga, ma na ia taumafai ai e faaumatia uma tagata Kipeona. O lenā gaoioiga, na ʻnofosala ai Saulo ma lona aiga i le toto.’ (2 Samu. 21:1) Ina ua avea Tavita ma tupu, na faamatala atu e tagata Kipeona iā te ia lenā gaoioiga matuā leaga. O lea na fesili atu ai Tavita i tagata Kipeona, po o le ā se togisala e tatau ona fai mo le agasala a Saulo ina ia faamanuia ai e Ieova le laueleele. E leʻi talosaga tagata Kipeona mo ni tupe, ae na latou talosaga e tuuina atu atalii e toʻafitu o Saulo le tagata na manaʻo e faaumatia i latou, ina ia fasiotia. (Nu. 35:30, 31) Na talia e Tavita la latou talosaga.​—2 Samu. 21:2-6.

I lenā taimi ua maliliu Saulo ma lona atalii o Ionatana i le taua, ae e iai le atalii o Ionatana e igoa iā Mefiposeta o loo soifua pea. Na pipili o ia a o laʻitiiti ona o se faalavelave na tupu, ma e leai sana vaega na fai i le osofaʻiga a le tamā a lona tamā i tagata Kipeona. Na osia e Tavita se feagaiga o se faauōga ma Ionatana, lea na aogā i le fanau a Ionatana e aofia ai lona atalii o Mefiposeta. (1 Samu. 18:1; 20:42) Na faapea mai le tala, “na alofa mutimutivale le tupu [o Tavita] iā Mefiposeta le atalii o Ionatana, le atalii o Saulo, ona o le tautoga na la faia iā Ieova.”​—2 Samu. 21:7.

E ui i lea na tāua pea iā Tavita le talosaga a tagata Kipeona. O lea na ia tuuina atu ai atalii e toʻalua o Saulo, o se tasi o i laʻua e igoa iā Mefiposeta ma le toʻalima o atalii o atalii o Saulo. (2 Samu. 21:8, 9) O le gaoioiga na faia e Tavita, na faamutaina ai le nofosala i le toto o le laueleele.

O lenei tala e lē na o se faamaumauga o talafaasolopito. E manino le tulafono a le Atua. Ua faapea mai: “Aua foʻi neʻi fasiotia fanau ona o o latou tamā.” (Teu. 24:16) E lē mafai ona faamaonia e Ieova le fasiotia o atalii e toʻalua o Saulo ma le toʻalima o atalii o ona atalii, pe ana faapea e latou te lē agasala. Ua toe faapea mai lenā tulafono: “Ia fasiotia le tagata i lana lava agasala.” E foliga mai o i latou e toʻafitu na fasiotia lea na tupuga mai iā Saulo, na iai sa latou vaega na fai i taumafaiga a Saulo e fasiotia tagata Kipeona uma. O le iʻuga, na faasala na tane e toʻafitu ona o la latou agasala na fai.

Ua tatou aʻoaʻoina mai i lenei tala, e lē mafai e se tagata ona fai se faamolemolega mo se agasala na ia faia, e ala i le manatu pe faapea mai e pau lana mea na fai o le usitaʻi i faatonuga. Ua faapea mai le faataoto: “Ia faalaulelei le ala o ou vae, ma tau ina ia matuā faatumauina ou ala uma.”​—Faata. 4:24-27; Efe. 5:15.