1-2. O ā mea e te mātauina i le taimi o le papatisoga, ma o le ā o le a iloiloina i lenei mataupu?

 O Ā NI mea e te mātauina iā i latou e papatiso? E te mātauina lo latou tali atu ma le mautinoa i fesili e lua o le papatisoga. E te vaaia laufofoga fiafia o o latou aiga ma uō. E patipati le aofia, ma e te vaaia foliga fiafia o sui papatiso a o ea aʻe mai i le vai. I se fua faatatau, i vaiaso taʻitasi e faitau afe i latou e tuuina atu ma papatisoina o ni Molimau a Ieova le Atua.

² Ae e faapefea oe? Pe afai o loo e mafaufau e papatiso, o oe la o sē e tautele i lenei lalolagi amioleaga ona o loo e “saʻili iā Ieova.” (Sala. 14:1, 2) O le a taulaʻi atu lenei mataupu i ē e talavou ma ē e matutua. Ae mo i latou ua uma ona papatiso, e manaʻomia foʻi ona faamalosia lo latou maumauaʻi e auauna ai iā Ieova e faavavau. O lea, seʻi iloilo ni māfuaaga se tolu e tatou te auauna ai iā Ieova.

3. Aiseā e fiafia ai auauna a Ieova i le upu moni ma le amiotonu? (Salamo 119:128, 163)

³ Na faatonuina e Ieova ona tagata ina “ia fiafia i le upu moni.” (Saka. 8:19) Na augani atu Iesu i ona soo e saʻili le amiotonu. (Mata. 5:6) E aofia ai i lenā mea le iai o se faanaunauga malosi e faia le mea saʻo, lelei, ma mamā i le silafaga a le Atua. Pe e te fiafia i le upu moni ma le amiotonu? O le mea mautinoa lenā. E te ʻinoʻino i pepelo ma mea leaga uma. (Faitau le Salamo 119:128, 163.) O pepelo ua faaatagia mai  ai uiga o Satani, le pule o lenei lalolagi. (Ioa. 8:44; 12:31) O se tasi o sini o Satani, o le faia lea o tala taufaaleaga e faatatau i le suafa paia o Ieova le Atua. Talu mai le fouvalega i Etena, ua faasalalau e Satani pepelo e uiga i lo tatou Atua. Ua ia taumafai e faatalitonu tagata o Ieova o se Pule e manatu faapito ma lē faamaoni, o loo taofia mea lelei mai i tagata. (Kene. 3:1, 4, 5) O loo faaauau ona faasesēina mafaufau ma loto o tagata i pepelo a Satani e faatatau iā Ieova. Pe a teena e tagata “upu moni,” e mafai e Satani ona taaʻina i latou e faia so o se amioga leaga.​—Roma 1:25-31.

4. Ua faapefea ona faamaonia e Ieova o ia o “le Atua o le upu moni”? (Tagaʻi foʻi i le ata.)

⁴ O Ieova o “le Atua o le upu moni,” ma ua ia faailoa mai le tele o upu moni i ē e alolofa iā te ia. (Sala. 31:5, fpl.) O le faia faapea, ua ia faasaʻolotoina ai i latou mai i pepelo a Satani. Ua aʻoaʻoina foʻi e Ieova ana auauna ina ia faamaoni ma ia amiotonu. O le iʻuga, e faamamaluina ai i latou ma lagona ai le toʻafilemu. (Faata. 13:5, 6) Pe na faia e Ieova na mea mo oe ina ua e suʻesuʻeina le Tusi Paia? Na e aʻoaʻoina ai e sili ala o Ieova mo tagata uma aemaise lava mo oe. (Sala. 18:30) O lea e te manaʻo ai e faia le mea e tonu i le silafaga a le Atua. (Mata. 6:33) E te manaʻo e faailoa atu le upu moni, ma faamaonia le pepelo o tuuaʻiga a Satani e faatatau i lo tatou Atua o Ieova. E faapefea?

5. E faapefea ona e lagolagoina le upu moni ma le amiotonu?

⁵ O le auala e te filifili e te ola ai, e faamaonia ai e te teena pepelo a Satani ae lagolagoina le upu moni. E faaalia ai foʻi ua e talia le pule a Ieova ma e te manaʻo e faia le mea e tonu i lana silafaga. E faapefea ona e faia lenā mea? Ia faalatalata iā Ieova i le tatalo ma tuuina atu oe iā te ia, ma faailoa atu lenā tuuina atu e ala i le papatisoga. O le fiafia i le mea moni ma le mea saʻo, o se uunaʻiga malosi lea e filifili ai ina ia papatiso.

6. E tusa ai ma le Salamo 45:4, o ā māfuaaga e te alofa ai iā Iesu Keriso?

⁶ Aiseā e te alofa ai iā Iesu Keriso? Ia mātau nisi o māfuaaga tatau o loo i le Salamo 45:4. (Faitau.) E faaauiluma e Iesu le upu moni, lotomaulalo, ma le amiotonu. Pe afai e te naunau i le upu moni ma le amiotonu, e  mautinoa foʻi la e te alofa iā Iesu Keriso. Seʻi manatu i le auala na tali atu ai ma le lototele Iesu e lagolagoina le mea moni ma le mea saʻo. (Ioa. 18:37) E faapefea la ona faaauiluma e Iesu le lotomaulalo?

7. O le ā se vala e te fiafia ai i le lotomaulalo o Iesu?

⁷ E faaauiluma e Iesu le lotomaulalo e ala i lana faaaʻoaʻoga. O se faataʻitaʻiga, e na te faamamaluina lona Tamā ae e lē o ia lava. (Mare. 10:17, 18; Ioa. 5:19) O ā ni ou faalogona i le iloaina o le auala e faaalia ai e Iesu le lotomaulalo? E lē taumatea e uunaʻia ai oe ina ia alofa i le Alo o le Atua ma mulimuli iā te ia. Aiseā e lotomaulalo ai Iesu? Talu ai e alofa ma faaaʻoaʻo o ia i lona Tamā, o lē e lotomaulalo. (Sala. 18:35; Epe. 1:3) Pe e lē tosina atu ai ea oe iā Iesu, o lē e faaatagia atoatoa mai uiga o Ieova?

8. Aiseā e tatou te alolofa ai iā Iesu lo tatou Tupu?

⁸ E tatou te alolofa iā Iesu lo tatou Tupu, auā o ia o le Pule e sili ona agavaa. O Ieova lava ia na toleniina lona Alo ma tofia o ia e avea ma pule. (Isa. 50:4, 5) Seʻi manatu foʻi i le alofa faataulaga na faaalia e Iesu. (Ioa. 13:1) Talu ai o Iesu o lo tatou Tupu, ua alagatatau ai ona tatou alolofa iā te ia. Na ia fetalai o ē e alolofa moni iā te ia po o ē ua ia taʻua o ana uō, e latou te faaalia le alofa e ala i le tausia o ana poloaʻiga. (Ioa. 14:15; 15:14, 15) Maʻeu se faaeaga o le avea ma uō a le Alo o Ieova!

9. O ā itu e talitutusa ai le papatisoga o Kerisiano ma le papatisoga o Keriso?

⁹ O se tasi o poloaʻiga a Iesu, e ao ona papatisoina ona soo. (Mata. 28:19, 20) Na ia faataatia le faaaʻoaʻoga. E iai vala na ese ai lona papatisoga mai i le papatisoga o ona soo. (Tagaʻi i le pusa “ O Vala e Eseese ai le Papatisoga o Iesu ma le Papatisoga o Ona Soo.”) Ae e iai itu na talitutusa ai. Ina ua papatiso Iesu, na ia tuuina atu o ia lava e faia le finagalo o lona Tamā. (Epe. 10:7) O le papatisoga o soo o Keriso e faailoa atu ai i le lautele ua māeʻa ona tuuina atu i latou lava iā Ieova le Atua, ma ua taulaʻi atu nei o latou olaga i le faia o le finagalo o le Atua, ae e lē o o latou lava loto. O lea, ua latou mulimuli ai i le faaaʻoaʻoga a lo latou Matai.

10. E faapefea i le alofa mo Iesu ona uunaʻia ai oe e papatiso?

¹⁰ E te talitonu o Iesu o le Alo e toʻatasi o Ieova, ma o lē ua Ia tofia e avea ma Tupu e pule iā i tatou. E te iloa e lotomaulalo Iesu ma ua ia faaatagia atoatoa mai uiga o lona Tamā. Ua e aʻoaʻoina na fafaga e Iesu ē na matelāina, faamāfanafana i ē e lotovaivai, ma faamālōlōina ē e mamaʻi. (Mata. 14:14-21) Ua e vaaia le auala e na te taʻitaʻia ai lana faapotopotoga i aso nei. (Mata. 23:10) E te iloa foʻi o le a sili atu mea o le a ia faia i le lumanaʻi i le avea ai ma Tupu o le Malo o le Atua. E faapefea ona e faaalia le alofa mo Iesu? E ala i le mulimuli i lana faaaʻoaʻoga. (Ioa. 14:21) E amata ona e faia lenā mea i le tuuina atu o oe lava iā Ieova ma papatisoina.

11. O le ā le māfuaaga e sili ona tāua e papatisoina ai se tasi?

¹¹ O le ā le māfuaaga e sili ona tāua e papatisoina ai se tasi? Na faailoa mai e Iesu le poloaʻiga silisili a le Atua e ala i le faapea mai: “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa, ma lou malosi atoa.” (Mare. 12:30) Pe e atagia mai i na upu lou alofa mo le Atua?

12. Aiseā e te alofa ai iā Ieova? (Tagaʻi foʻi i le ata.)

¹² E tele māfuaaga e tatou te alolofa ai iā Ieova. O se faataʻitaʻiga, ua tatou iloa o ia “o le puna o le ola” ma o Lē e foaʻiina mai “meaalofa lelei uma ma mea uma e atoatoa ona  lelei.” (Sala. 36:9; Iako. 1:17) O mea lelei uma o loo tatou olioli ai, ua foaʻi mai e lo tatou Atua aaomafola ma alofa.

13. Aiseā ua avea ai le togiola o se meaalofa matagofie?

¹³ O le togiola o se meaalofa matagofie ua saunia e Ieova mo i tatou. Aiseā? Seʻi mafaufau i le faiā māfana a Ieova ma lona Alo. Na fetalai Iesu: ʻE alofa le Tamā iā te aʻu’ ma “ou te alofa i le Tamā.” (Ioa. 10:17; 14:31) Na matuā faamalosia lenā faiā a o faagasolo le faitau piliona o tausaga. (Faata. 8:22, 23, 30) Seʻi manatu i le pagatia o le Atua, ina ua ia tuu mai lona Alo e faapuapuagatia ma maliu. O le alofa tele o Ieova i tagata e aofia ai ma oe, na ia lotomalie ai e faataulaga lona Alo pele ina ia mafai ona tatou ola e faavavau. (Ioa. 3:16; Kala. 2:20) O le māfuaaga silisili lea e tatou te alolofa ai i le Atua.

14. O le ā le filifiliga sili e te faia i lou olaga?

¹⁴ O le tele lava o mea e tatou te aʻoaʻoina e faatatau iā Ieova, o le atili faamalosia foʻi lenā o lo tatou alofa mo ia. E lē taumatea e te manaʻo ia vavalalata atu iā Ieova i le taimi lenei e oo i le faavavau, ma e mautinoa e mafai ona e faia faapea. Ua ia faalaeiau ma le māfana oe e faafiafia lona finagalo. (Faata. 23:15, 16) E mafai ona e faia faapea e lē gata i upu ae faapea foʻi i gaoioiga. O le auala e te ola ai, e iloa ai le moni o lou alofa mo Ieova. (1 Ioa. 5:3) O le ola i se olaga e  faafiafiaina ai Ieova, o le filifiliga sili lea e te faia i lou olaga.

15. E faapefea ona faaalia lou alofa mo Ieova?

¹⁵ E faapefea ona faaalia lou alofa mo Ieova? Muamua, e te faia se tatalo faapitoa lea e tuuina atu ai oe i le Atua moni e toʻatasi. (Sala. 40:8) Ona faailoa atu lea i luma o le lautele ua e faia faapea, e ala i le papatisoga. E pei ona talanoaina i le amataga o lenei mataupu, o lou papatisoga o se taimi fiafia ma o se laasaga tāua i lou olaga. O lea, ua iai se amataga fou i lou olaga, ua e ola mo Ieova ae e lē mo oe lava. (Roma 14:8; 1 Pete. 4:1, 2) Atonu e foliga mai o se filifiliga e lē faigofie ona fai. Peitaʻi, o lenā filifiliga e iʻu atu ai i se olaga e sili ona lelei. I le ā le itu?

16. E tusa ai o le 1 Ioane 2:25, o le a faapefea ona tauia e Ieova i latou e auauna iā te ia i le olaga atoa?

¹⁶ O Ieova o Lē e sili ona aaomafola. E tusa lava po o ā mea e tatou te faia mo Ieova, e lē mafaatusalia mea e na te faia mo i tatou. (Mare. 10:29, 30) E ui lava ina tatou iai i lenei lalolagi malapagā, ae e na te tauia i tatou i se olaga e sili ona matagofie ma faamalieina. Ae e lē na o le pau lenā, auā o le papatisoga ua na o se amataga. E mafai ona e auauna i lou Tamā alofa seʻia oo i le faavavau. O le a faamalosia pea lou alofa mo Ieova, faapea foʻi lona alofa mo oe. E pei lava ona soifua o Ia e faavavau, o le a mafai foʻi ona e ola e faavavau.​—Faitau le 1 Ioane 2:25.

17. O le ā se mea e mafai ona e avatu iā Ieova e na te lē o mauaina?

¹⁷ Pe a tuuina atu lou ola ma papatisoina, ua e maua la le faaeaga o le avatu i lou Tamā o se mea e sili ona tāua. Ua ia foaʻi mai mea lelei uma e te maua ai le fiafia. E faaalia lou talisapaia e ala i le avatu i Lē na foafoaina le lagi ma le lalolagi o se mea e na te lē o maua, o le auauna lea iā te ia ma le lotomalie. (Iopu 1:8; 41:11; Faata. 27:11) O le auala sili lea e faaaogā ai lou ola! E mautinoa o le alofa iā Ieova, o le māfuaaga sili lea e te papatiso ai.

18. O ā fesili e te ono fesili ifo ai?

¹⁸ O le ā la lau tali i le fesili, Po o le a e papatiso?  E na o oe e mafai ona taliina lenā fesili. Ae atonu e mafai ona e fesili ifo, ʻAiseā ua tuai ai ona ou papatiso?’ (Galu. 8:36) Ia manatua māfuaaga e tolu na tatou talanoaina. Muamua, e te fiafia i le upu moni ma le amiotonu. Ia fesili ifo, ʻPo ou te naunau i le taimi o le a tautatala ai tagata uma i le mea moni ma faia le mea saʻo?’ Lua, e te alofa iā Iesu Keriso. Ia fesili ifo, ʻPo ou te manaʻo e avea le Alo o le Atua ma oʻu Tupu, ma pe ou te manaʻo e mulimuli i lana faaaʻoaʻoga?’ O le lona tolu ma o le māfuaaga lea e pito sili ona tāua, e te alofa iā Ieova. Ia fesili ifo, ʻPo ou te manaʻo e faafiafia le finagalo o Ieova e ala i le auauna iā te ia?’ Pe afai o lau tali i nei fesili o le ioe, aiseā la ua tuai ai ona e papatiso?​—Galu. 16:33.

19. Aiseā e lē tatau ai ona e faatalatū e papatiso? Ia faataʻitaʻi. (Ioane 4:34)

¹⁹ Pe afai o loo e faatalatū e papatiso, ia manatunatu i le talafaatusa na faaaogā e Iesu. (Faitau le Ioane 4:34.) Na faatusa e Iesu le faia o le finagalo o lona Tamā i meaʻai. Aiseā? E aogā meaʻai mo i tatou. Na silafia e Iesu o so o se mea e talosaga mai ai Ieova e tatou te faia, e mo lo tatou lelei. E lē finagalo Ieova e tatou te faia se mea e afāina ai o tatou ola. Faamata o le finagalo o Ieova mo oe ia e papatiso? Ioe. (Galu. 2:38) E mautinoa la o lou usitaʻia o lenā faatonuga, e mo lou lava lelei. Afai e te lē faatalatū e tausami i se meaʻai e sili ona manaia, aiseā la e te faatalatū ai e papatiso?

20. O le ā o le a talanoaina i le mataupu o loo sosoo mai?

²⁰ Aiseā e te faatalatū ai? Atonu e toʻatele e faapea mai, “Ou te lē o sauni.” O le mea moni, o le filifiliga e tuuina atu oe iā Ieova ma papatisoina, o se filifiliga pito sili ona tāua i lou olaga. O lea, e manaʻomia ona iloilo lelei lau filifiliga, ma e manaʻomia le taimi ma taumafaiga e agavaa ai. Ae afai e te naunau moni e ausia lenā laasaga, o le ā e mafai ona e faia i le taimi lenei ina ia e sauniuni ai? O le a taliina lenā fesili i le mataupu o loo sosoo mai.