1-2. Pe afai e te leʻi sauni e papatiso, aiseā e lē tatau ai ona e lotovaivai? (Tagaʻi i le ata i le faavaa.)

 PE AFAI ua e manaʻo e papatiso, ua e faatū la se sini e sili ona lelei mo oe. Po ua e sauni e papatiso i le taimi lenei? Pe afai o lea ma ua faamaonia e toeaina, aua le faatalatū e papatiso. O lou faia faapea, e mautinoa o le a e maua ai se olaga faamalieloto i le auaunaga iā Ieova.

² I le isi itu, atonu na faailoa atu e se isi iā te oe e manaʻomia ona faia ni suiga a o leʻi papatiso, pe atonu foʻi o loo e iloa e iai ni vala o lou olaga e manaʻomia ona faaleleia. Pe afai o lea, aua e te lotovaivai ai. E mafai ona e agaʻigaʻi i luma ma ausia lenā sini tāua, e tusa lava po o oe o se talavou po o se tagata matua.

3. O le ā na fesili atu ai se tagata aloaʻia mai i Aitiope iā Filipo, ma o le ā le fesili ua lāgā ai? (Galuega 8:36, 38)

³ Faitau le Galuega 8:36, 38. Na fesili se tagata aloaʻia mai i Aitiope iā Filipo le evagelia: “O le ā se mea e taofia ai aʻu mai i le papatisoina?” Na naunau le tamāloa Aitiope e papatiso. Ae pe na sauni o ia mo lenā laasaga tāua?

4. Na faapefea ona faaalia e le tagata Aitiope lona maumauaʻi e aʻoaʻo atili?

⁴ Sa alu le tamāloa Aitiope “i Ierusalema e tapuaʻi” ai. (Galu. 8:27) E foliga mai la o ia o se tagata na liliu ma talia aʻoaʻoga a le lotu Iutaia. E mautinoa na ia aʻoaʻoina e faatatau iā Ieova mai i Tusitusiga Paia Eperu. Peitaʻi, na ia maumauaʻi e aʻoaʻo atili. Ina ua feiloaʻi Filipo ma lenā tamāloa  aloaʻia i le auala, o le ā lana mea o loo fai? O loo ia faitau le tusi tāʻai o loo iai tusitusiga a le perofeta o Isaia. (Galu. 8:28) O na tusitusiga o upu moni loloto faaleagaga. E leʻi faamalieina lenā tamāloa i aʻoaʻoga faavae, ae na ia manaʻo e aʻoaʻo atili.

5. Na faapefea i le tamāloa Aitiope ona faatatauina mea na ia aʻoaʻoina?

⁵ O lenei tamāloa o se tagata aloaʻia i le maota o le tupu tamaʻitaʻi o Kanake mai i Aitiope, ma na ia ʻvaaia oloa uma’ a le tupu tamaʻitaʻi. (Galu. 8:27) E mautinoa e pisi o ia i le tele o ona tiute tauave. Ae e ui i lea, na ia faaalu se taimi e tapuaʻi ai iā Ieova. E leʻi faamalieina o ia i le tau ina aʻoaʻoina o le upu moni, ae na ia faatatauina mea na ia aʻoaʻoina. O lea, na ia malaga mamao mai lava mai i Aitiope e agaʻi i le malumalu i Ierusalema ina ia tapuaʻi iā Ieova. E mautinoa o lenā faigāmalaga e manaʻomia ai le tele o le taimi ma tupe, ae na faia e lenā tamāloa taumafaiga uma ina ia tapuaʻi ai iā Ieova.

6-7. Na faapefea ona faamalosia pea le alofa o le tagata Aitiope mo Ieova?

⁶ Na aʻoaʻoina e le tagata Aitiope mai iā Filipo nisi o upu moni fou, e aofia ai le avea o Iesu ma Mesia. (Galu. 8:34, 35) E mautinoa na fiafia lenei tamāloa aloaʻia e aʻoaʻo e faatatau i mea na faia e Iesu mo ia. O le ā na ia faia ina ua ia aʻoaʻoina na mea? Na ono mafai ona avea pea o ia ma tagata faaaloalogia ua liliu i le lotu Iutaia. Nai lo o lea, na faamalosia pea lona alofa mo Ieova ma Lona Alo. Na uunaʻia o ia e faia se filifiliga tāua, e papatiso ina ia avea ma soo o Iesu Keriso. Na iloa e Filipo ua agavaa lenei tamāloa, o lea na ia papatisoina ai o ia.

⁷ Pe afai e te mulimuli i le faaaʻoaʻoga a le tagata Aitiope, e mafai la ona e sauniuni mo le papatisoga. O le a e faapea atu foʻi ma le mautinoa, “O le ā se mea e taofia ai aʻu mai i le papatisoina?” O le a tatou iloiloina mea e mafai ona tatou faia e pei ona faia e lenei tamāloa: Na faaauau ona ia aʻoaʻoina mea fou, faatatau mea na ia aʻoaʻoina, ma faamalosia pea lona alofa mo le Atua.

8. E faapefea ona e faatatauina le Ioane 17:3?

⁸ Faitau le Ioane 17:3. Pe na fesoasoani iā te oe fetalaiga nei a Iesu e filifili ai e suʻesuʻe le Tusi Paia? O le mea moni lenā i le toʻatele o i tatou. Ae po o faailoa mai foʻi i na fetalaiga o loo tele pea mea e manaʻomia ona tatou aʻoaʻoina? Ioe, e faaauau pea ona tatou aʻoaʻoina e faatatau i “le Atua moni e toʻatasi.” (Fai. 3:11) O le a tatou aʻoaʻoina pea le tele o mea e oo i le faavavau, ma o le tele e  tatou te aʻoaʻoina ai na mea, o le atili foʻi lenā ona tatou vavalalata iā Ieova.​—Sala. 73:28.

9. O le ā e manaʻomia ona tatou faia pe a uma ona aʻoaʻoina aʻoaʻoga faavae o le Tusi Paia?

⁹ O le iloaina o Ieova e amata i le aʻoaʻoina o aʻoaʻoga faavae o le Tusi Paia. Na taʻua e le aposetolo o Paulo i lana tusi i Kerisiano Eperu, o na aʻoaʻoga o “mataupu faavae.” E leʻi faapea na ia taʻufaatauvaaina “aʻoaʻoga muamua,” ae na ia faatusaina i le suāsusu lea e fafagaina ai se pepe. (Epe. 5:12; 6:1) Na ia uunaʻia foʻi Kerisiano uma ina ia aua neʻi faamalieina i aʻoaʻoga faavae, ae ia aʻoaʻoina upu moni loloto o le Afioga a le Atua. Po ua e atiaʻe le faanaunauga e aʻoaʻoina aʻoaʻoga loloto o le Tusi Paia? Po o e lotomalie e faateleina ma faaauau ona aʻoaʻoina e faatatau iā Ieova ma lona finagalo?

10. Aiseā e ono avea ai o se luʻi i isi le suʻesuʻe?

¹⁰ O se luʻi mo le toʻatele o i tatou le suʻesuʻe. Ae e faapefea oe? I le taimi na e aʻoga ai, pe na e aʻoaʻoina le auala e faitau ma suʻesuʻe lelei ai? Pe na avea o se mea e te fiafia e fai, pe na avea o se mea e faigatā ona fai? Pe afai o le tulaga lenā, aua e te popole. E mafai ona fesoasoani Ieova iā te oe ona e lelei atoatoa o ia, ma o le Faiaʻoga silisili.

11. E faapefea ona faamaonia e Ieova o ia o le “Aʻoaʻo Sili”?

¹¹ Ua taʻua e Ieova o ia lava o “lo outou Aʻoaʻo Sili.” (Isa. 30:20, 21) O ia o se Atua e onosaʻi, agalelei, ma o se Faiaʻoga e malamalama lelei. E na te mātaulia uiga lelei o ana tagata aʻoga. (Sala. 130:3) E na te lē faatalitalia mea e sili atu nai lo o mea e mafai ona tatou faia. Na ia foafoaina o tatou faiʻai o se meaalofa ofoofogia. (Sala. 139:14) E masani ona iā i tatou le faanaunauga e aʻoaʻoina ai mea. E finagalo Lē na foafoaina i tatou, ia tatou aʻoaʻoina mea e oo i le faavavau ma olioli ai. O lea, o se mea atamai lo tatou “naunau” i upu moni o le Tusi Paia i aso nei. (1 Pete. 2:2) Ia faatutū ni sini e mafai ona e ausia, ma ia tausisi i le faasologa o le faitau ma le suʻesuʻeina e lē aunoa o le Tusi Paia. (Iosua 1:8) O le faamanuia a Ieova o le a e fiafia ai e faitau ma aʻoaʻo atili e faatatau iā te ia.

12. Aiseā e tatau ai ona tatou suʻesuʻeina le olaga ma le faiva a Iesu?

¹² Ia faaalu e lē aunoa se taimi e manatunatu ai i le olaga ma le faiva a Iesu. Ina ia tatou auauna iā Ieova i nei taimi e sili ona faigatā, e tāua ona tatou mulimulituʻi i tulaga aao o Iesu. (1 Pete. 2:21) Na faailoa manino mai e Iesu i ona soo o le a latou feagai ma luʻi. (Luka 14:27, 28) Peitaʻi, na ia mautinoa e tumau faamaoni ona soo moni e pei ona ia faia. (Ioa. 16:33) Ia suʻesuʻe faamatalaga e faatatau i le olaga o Iesu, ma faatutū ni sini i le auala e faaaʻoaʻo ai iā te ia.

13. O le ā e tatau ona e talosaga atu ai pea iā Ieova, ma aiseā?

¹³ E lē lava le tau ina iloa o le upu moni. Ae e fesoasoani e tatou te aʻoaʻoina ai le tele o mea e faatatau iā Ieova, ma atiaʻe uiga e pei o le alofa ma le faatuatua iā te ia. (1 Kori. 8:1-3) A o faaauau ona e aʻoaʻoina le tele o mea, ia talosaga atu pea iā Ieova e fesoasoani mai ina ia faatuputeleina lou faatuatua. (Luka 17:5) E na te taliina ma le agalelei na tatalo. O le faatuatua moni, e faavae i le poto saʻo i le Atua ma o le a fesoasoani iā te oe e agaʻigaʻi ai i luma.​—Iako. 2:26.

14. Na faapefea ona faamatilatila e le aposetolo o Peteru le tāua o le faatatauina o mea ua tatou aʻoaʻoina? (Tagaʻi foʻi i le ata.)

¹⁴ Na faamatilatila e le aposetolo o Peteru le tāua i soo o Keriso ona faaauau ona faatatauina  mea ua latou aʻoaʻoina. Na ia taʻua i le Tusi Paia le tala e faatatau iā Noa. Na fetalai mai Ieova iā Noa o le a ia faaumatia tagata amioleaga e ala i se lolo. E leʻi lava le iloaina e Noa ma lona aiga o le lolo e faasaoina ai i latou. Mātau na faasino atu Peteru i le taimi a o leʻi tupu le Lolo “a o fausia le vaa.” (1 Pete. 3:20) O le mea moni, na gaoioi Noa ma lona aiga e tusa ma mea na aʻoaʻoina ai i latou e le Atua, e ala i le fausia o se vaa telē. (Epe. 11:7) Na faatusa e Peteru le mea na faia e Noa i le papatisoga ina ua ia tusi: “Ua fai lenā mea ma faatusa o le papatisoga lea ua faaolaina ai nei outou.” (1 Pete. 3:21) O lea e mafai ona faatusaina mea o loo e faia e sauniuni ai mo le papatisoga, i galuega na faia e Noa ma lona aiga mo le tele o tausaga e fausia ai le vaa. O ā ni gaoioiga e manaʻomia ona e faia ina ia sauniuni ai mo le papatisoga?

15. O ā mea e aofia ai i le salamō moni?

¹⁵ O se tasi o mea e tatau ona tatou faia, o le salamō moni mai i a tatou agasala. (Galu. 2:37, 38) Pe afai e tatou te salamō moni, o le a tatou faia suiga manaʻomia. Po ua e tuua ni masaniga leaga e inosia e Ieova e pei o le ola i se olaga lē mamā, ulaula tapaa, po o le tautala i upu masoā? (1 Kori. 6:9, 10; 2 Kori. 7:1; Efe. 4:29) Pe afai e te leʻi faia faapea, ia taumafai pea e faia suiga. Ia talanoa i lē o loo oulua suʻesuʻe, pe talosaga i se toeaina i le faapotopotoga mo se fesoasoani. Pe afai o oe o se talavou ma o loo e nofo faatasi ma ou mātua, ia talosaga atu pea iā i laʻua mo le fesoasoani, ina ia tuua so o se masaniga leaga lea e ono taofia ai oe mai le papatisoina.

16. O ā mea e aofia ai i le iai o se faasologa lelei faaleagaga?

¹⁶ E tāua foʻi ona mulimuli i se faasologa lelei faaleagaga. E aofia ai le auai i sauniga faa-Kerisiano ma le faia o ni sao. (Epe. 10:24, 25) Pe afai ua e agavaa mo le talaʻiga, ia faamautinoa e faia e lē aunoa sou sao. O le tele e faia ai sou sao i lenā galuega faasaoola, o le faateleina foʻi lenā o lou olioli. (2 Timo. 4:5) Pe afai o oe o se talavou ma o loo e nofo faatasi ma ou mātua, ia fesili ifo: ʻPe e manaʻomia ona faamanatu mai e oʻu mātua i taimi uma sauniga ma talaʻiga? Pe ou te tausolomua e auai i nei vaega e aunoa ma le tau  faamanatu mai e oʻu mātua?’ Pe a e faia faapea, e faailoa atu ai lou faatuatua, alofa ma lou lotofaafetai iā Ieova le Atua. O na vala o “galuega o le faamaoni i le Atua,” o ni meaalofa e te ofoina atu iā Ieova. (2 Pete. 3:11; Epe. 13:15) O meaalofa uma e ofoina atu ma le lotomalie e faafiafiaina ai lo tatou Atua. (Faatusatusa i le 2 Korinito 9:7.) E tatou te faia faapea ona e tatou te fiafia e ofoina atu le mea e sili iā Ieova.

17-18. O le ā le uiga tāua e fesoasoani iā te oe e agaʻigaʻi ai i luma mo le papatisoga, ma aiseā? (Faataoto 3:3-6)

¹⁷ A o faaauau ona e agaʻigaʻi i luma mo le papatisoga, o le a e feagai ma luʻi. E ono tauemua oe e nisi ona o ou talitonuga, ma e latou te ono teena pe sauāina oe. (2 Timo. 3:12) A o e taumafai e manumalo mai i se masaniga leaga, e te ono toe lolo atu i le faia o lenā masaniga. Pe atonu foʻi e te lagona le fiu ma le lē fiafia ona e foliga mai e faigatā ona ausia lou sini. O le ā e fesoasoani iā te oe ina ia lē faavaivai ai? O le uiga tāua o le alofa mo Ieova.

¹⁸ O lou alofa mo Ieova o se uiga sili lea ona tāua. (Faitau le Faataoto 3:3-6.) O le malosi o lo tatou alofa mo le Atua, e tatou te taulau ai i le fesagaʻia o luʻi. E lē o se faalogona e mou atu, e tusa lava po o le ā le umi ma po o ā foʻi luʻi e tulaʻi mai. E masani ona taʻua i le Tusi Paia le alofa faamaoni o Ieova i ana auauna. O se faanaunauga malosi e lē mafai ona muta ma e tumau e faavavau. (Sala. 100:5) Ua faia oe i le faatusa o le Atua. (Kene. 1:26) E faapefea ona e faaalia lenā alofa?

19. E faapefea ona faateleina lou lotofaafetai mo mea uma ua faia e Ieova mo oe? (Kalatia 2:20)

¹⁹ Ia faaalia le lotofaafetai. (1 Tesa. 5:18) I aso taʻitasi ia fesili ifo, ʻO ā faamaoniga o le alofa o Ieova mo aʻu?’ Ona faamautinoa lea e te faafetai atu iā Ieova, ma taʻua ni mea patino ua ia faia mo oe. Ia vaai i faamaoniga o lona alofa e pei lava o loo ia faia faapitoa mo oe, ma o le mea lenā na iloa e le aposetolo o Paulo e faatatau iā Ieova. (Faitau le Kalatia 2:20.) Ia fesili ifo, ʻPe ou te manaʻo e faailoa atu iā te ia loʻu alofa e pei foʻi ona ia faia iā te aʻu?’ O le alofa mo Ieova e fesoasoani iā te oe e faaauau ai ona teena faaosoosoga ma taulau ai i le fesagaʻia o luʻi. E uunaʻia ai foʻi oe e tausisi i lau faasologa faaleagaga ma faaalia le alofa i lou Tamā i aso taʻitasi.

20. O ā mea e aofia i le tuuina atu o lou ola iā Ieova, ma aiseā e tāua ai lenā filifiliga?

 ²⁰ A o faagasolo taimi, o le a uunaʻia oe e lou alofa mo Ieova e faia se tatalo faapitoa e tuuina atu ai oe iā te ia. O le taimi lava e tuuina atu ai oe iā Ieova, o lenā ua e maua se faamoemoe matagofie, o le mafai ona avea ma ana auauna e faavavau. Pe a tuuina atu oe iā Ieova, ua e folafola atu e auauna iā te ia i taimi e sologa lelei ai ma taimi e lē sologa lelei ai. E tasi lava le taimi e faia ai lea tautoga ma o se filifiliga tāua. Seʻi manatu i le mea lenei: E tele filifiliga o le a e faia i lou olaga ma o nisi o na filifiliga e lelei, ae e leai se isi filifiliga e sili atu ona tāua nai lo o le tuuina atu iā Ieova. (Sala. 50:14) O le a taumafai Satani e faavaivaia lou alofa mo Ieova, ma iʻu ai i le lē faamaoni iā te Ia. Ia aua lava neʻi e lolo iā Satani! (Iopu 27:5) O le malosi o lou alofa mo Ieova, o le a fesoasoani iā te oe e ola ai e ōgatusa ma lau tautoga ma vavalalata atu ai pea i lou Tamā i le lagi.

21. Aiseā e faapea atu ai o le papatisoga e lē o le gataaga ae o le amataga lea o le auaunaga iā Ieova?

²¹ Pe a uma ona tuuina atu oe iā Ieova, ia talanoa atu i toeaina o lau faapotopotoga mo le isi laasaga tāua. Ia manatua, o le papatisoga e lē o le gataaga ae o le amataga lea o lau auaunaga iā Ieova. O lea, o le taimi lenei e faamalosia ai lou alofa mo lou Tamā. Ia faatutū ni sini ina ia faamalosia ai pea lenā alofa. O lou faia faapea, o le a uunaʻia ai oe e papatiso. O le a avea o se aso e sili ona fiafia ai. Ae ua na o se amataga lenā. Tau ina ia faamalosia pea lou alofa mo Ieova ma lona Alo!