Aiseā na faapea mai ai le tagata e lē o taʻua lona igoa i le Ruta 4:1 e ʻfaalēaogāina’ lona tofi pe a faaipoipo iā Ruta? (Ruta 4:6)

I taimi o le Tusi Paia, pe a maliu se tamāloa ae e leai sana fanau, ua tulaʻi mai ai nisi o fesili: O le ā o le a tupu i lona fanua? Po o le a lē toe iai se isi e faaauau ai le gafa o le aiga? O le a fesoasoani le Tulafono faa-Mose e tali ai na fesili.

O le ā e tupu i le fanua o se tamāloa ua maliu pe mativa ae na ia toe faatauina atu? E mafai e lona uso po o se tauaiga vavalalata ona toe faatau mai lenā fanua. O le faia faapea, o le a tumau ai pea le fanua i le aiga.​—Levi. 25:23-28; Nu. 27:8-11.

Na faapefea ona faaauau le gafa o le tamāloa ua maliu? E ala i le faaipoipo o lona uso i lana avā e pei o le tulaga o Ruta. E faaipoipo le uso o le tamāloa ua maliu i lana avā, ina ia maua ai se suli e faaauau le gafa o le tamāloa ua maliu ma mauaina lona fanua. O lenei faatulagaga alofa e tausia ai foʻi le fafine ua oti lana tane.​—Teu. 25:5-7; Mata. 22:23-28.

Seʻi mafaufau i le mea na tupu iā Naomi. Na faaipoipo o ia i se tamāloa e igoa iā Elimeleka. Ina ua maliliu o ia ma le la fanau tama e toʻalua, ona lē toe iai lea o se tane i le aiga e tausia Naomi. (Ruta 1:1-5) Ina ua toe foʻi o ia i Iuta, na ia faatonuina Ruta le avā a lana tama tama, e talosagaina Poasa e toe faatau mai lona fanua, talu ai o ia o se tauaiga vavalalata o Elimeleka. (Ruta 2:1, 19, 20; 3:1-4) Ae na iloa e Poasa e iai se isi tauaiga e sili atu ona vavalalata, lea e lē o taʻua lona igoa i le Tusi Paia. O ia lenā e mauaina le avanoa muamua e toe faatauina mai le fanua.​—Ruta 3:9, 12, 13.

I le taimi muamua, na lotomalie lenei tauaiga e fesoasoani. (Ruta 4:1-4) Na ia iloa e manaʻomia le tele o tupe e faatau ai le fanua, ae na ia iloa foʻi ua matua Naomi ma e lē mafai ona ia toe fanauina ni fanau e mauaina le fanua mai iā Elimeleka. O lona uiga o le a tele ai ona fanua ma avea ai o se vaega o lona tofi, ma na foliga mai o se fefaatauaʻiga lelei.

Ae na toe sui le mafaufau o lea tauaiga ina ua ia iloa e tatau ona ia faaipoipo iā Ruta. Na ia faapea mai: “E lē mafai ona ou toe faatau mai mo aʻu, ina neʻi faalēaogā ai loʻu tofi.” (Ruta 4:5, 6) Aiseā na toe sui ai lona mafaufau?

Pe afai e faaipoipo o ia po o se isi iā Ruta ma fanauina ai se tama tama, o le a maua la e le tamaitiiti le fanua o Elimeleka. O le a faapefea ona ʻfaalēaogā ai le tofi’ o lenei tauaiga? E lē o taʻua i le Tusi Paia, ae atonu o nisi nei o auala e ono faalēaogā ai le tofi o lenā tauaiga.

• Muamua, o le a alu lē aogā le tupe e na te faaaogā e toe faatauina mai ai le fanua o Elimeleka, auā o le a ia lē mauaina le fanua ae e maua e le tama tama a Ruta.

• Lua, o le a gafa o ia ma le tausiga o Naomi ma Ruta.

• Tolu, pe afai e maua ni a la fanau ma Ruta, e tatau la ona vaevae le tofi i a la fanau ma lana ia lava fanau ua iai.

• Fā, pe afai e leai sana ia lava fanau, o le a maua e le tama tama e fanauina e Ruta le aiā i fanua o Elimeleka ma lea tauaiga. O lea, pe a maliu lenei tauaiga, e na te lē mauaina lona fanua ae e maua e le tamaitiiti e tauaveina le igoa o Elimeleka. E leʻi manaʻo lenei tauaiga e fesoasoani iā Naomi ina neʻi faalēaogāina ai lona tofi. Na ia tuu atu le avanoa iā Poasa o le isi tauaiga lea e sosoo iā te ia, e faataunuuina lenā tiute. Na faia faapea e Poasa, ona na manaʻo ʻe faatumauina le igoa o le tamāloa ua oti i lona tofi.’​—Ruta 4:10.

E foliga mai na sili atu le naunau o lenei tauaiga e faatumauina lona lava igoa ma lona tofi. Na manatu faapito o ia. E ui lava na ia taumafai e faasaoina lona gafa, ae e oo mai lava i aso nei e lē o iai ma se mea o taʻua ai lenā gafa. E na te leʻi mauaina foʻi le faaeaga faapitoa lea na maua e Poasa, o le avea ma se tasi na tupuga mai ai le Mesia o Iesu Keriso. Pagā se iʻuga faanoanoa o le teena e lenā tauaiga o le avanoa e fesoasoani ai i se tasi na manaʻomia le fesoasoani, ona o le manatu faapito!​—Mata. 1:5; Luka 3:23, 32.