1. O le ā le faanaunauga o mātua mo a latou fanau?

 MĀTUA e, e matou te iloa e tou te mananaʻo e fesoasoani i a outou fanau ia iloa ma alolofa iā Ieova. Peitaʻi, e lē mafai ona tatou vāai i le Atua. E faapefea la ona outou fesoasoani i a outou fanau, ia iloa e iai moni le Atua ma mafuta vavalalata atu iā te ia?​—Iako. 4:8.

2. E faapefea ona aʻoaʻo e mātua a latou fanau i uiga o Ieova?

² O se tasi o auala tāua e fesoasoani ai i fanau ia mafuta vavalalata atu iā Ieova, o le suʻesuʻe faatasi o le Tusi Paia ma i latou. (2 Timo. 3:14-17) Peitaʻi, o loo faailoa mai i le Tusi Paia se isi auala e mafai ona aʻoaʻo ai talavou e faatatau iā Ieova. I le tusi o Faataoto, o loo faamanatu atu e se tamā i lona atalii ia aua neʻi galo iā te ia uiga o Ieova, o loo faailoa mai i mea o le foafoaga. (Faata. 3:19-21) O le a tatou talanoaina nisi o auala e faaaogā ai e mātua mea o le foafoaga, e aʻoaʻo ai a latou fanau i uiga o Ieova.

3. O le ā le fesoasoani e tatau ona avatu e mātua i fanau?

³ Ua taʻua i le Tusi Paia o “uiga lē vaaia [o le Atua] ua vaaia lava ia talu ona foafoaina le lalolagi, ona ua mafai ona vaaia i mea na faia.” (Roma 1:20) Mātua, atonu e tou te fiafia e  tafafao faatasi ma a outou fanau. Ia faaaogā lenā taimi e fesoasoani ai i le fanau ia iloa le fesootaʻiga o “mea na faia,” ma uiga matagofie o Ieova. O lea, seʻi o tatou iloiloina po o le ā e aʻoaʻoina e mātua mai i le faaaʻoaʻoga a Iesu.

4. Na faapefea ona faaaogā e Iesu mea o le foafoaga e aʻoaʻo ai ona soo? (Luka 12:24, 27-30)

⁴ Ia mātau le auala na faaaogā ai e Iesu mea o le foafoaga e aʻoaʻo atu ai. I se tasi taimi, na ia fetalai atu ai i ona soo ia mātau oreva ma lili o le vao. (Faitau le Luka 12:24, 27-30.) Na ono taʻua e Iesu so o se manu po o so o se laau, ae na ia filifili se manulele ma se fugālaau na iloa lelei e ona soo. Atonu na iloa atu e soo le felelei aʻe o oreva ma le matagofie o fugālaau. Pe e mafai ona e faaata Iesu a o ia faasino atu i ona soo na mea ma aʻoaʻoina ai i latou? O le ā na ia faia mulimuli ane ai? Na ia aʻoaʻo ona soo i se lesona matagofie o le aaofoaʻi ma le agalelei o lo latou Tamā i le lagi: E fafaga ma faaofu e Ieova ana auauna faamaoni, e pei ona ia faia i oreva ma lili o le vao.

5. O ā ni mea o le foafoaga e mafai ona faaaogā e mātua e aʻoaʻo ai fanau e faatatau iā Ieova?

⁵ Mātua, po o le a outou faaaʻoaʻo i le auala na aʻoaʻo ai Iesu? Atonu e te faamatala atu i lou alo se mea o le foafoaga, e pei o se manu po o se laau e te fiafia lava i ai. A o e faia faapea, ia faamautinoa e te faamatala atu mea ua e aʻoaʻoina mai ai e faatatau iā Ieova. E mafai foʻi ona e fesili i ai po o le ā se manu po o se laau e sili ona fiafia i ai. Pe afai e te faaaogā se mea o le foafoaga e fiafia i ai, atonu o le a ia uaʻi mai pe a e talanoa i ai e faatatau i uiga o Ieova.

6. O le ā e tatou te aʻoaʻoina mai i le faaaʻoaʻoga a le tinā o Christopher?

⁶ Pe e tatau i mātua ona faaalu le tele o le taimi e suʻesuʻe ai se manu po o se laau, a o leʻi talanoa i uiga o Ieova o loo faailoa mai e na foafoaga matagofie? E leai. E leʻi tele se taimi na faaaluina e Iesu e faamatala ai le auala e aai ai oreva, ma le auala e tutupu aʻe ai lili o le vao. Atonu e iai taimi e fiafia ai si au tama e talanoa auʻiliʻili e faatatau i mea o le foafoaga. Ae o nisi taimi, o se faamatalaga po o se fesili faigofie e faatatau i na mea, ua lava lenā e maua ai le manatu tāua. Ia mātau se mea e manatua e le uso o Christopher a o laʻitiiti: “Na faigofie lava faamatalaga na fai e loʻu tinā lea na fesoasoani iā te aʻu ma nai oʻu tei e talisapaia ai le foafoaga. O se faaaʻoaʻoga, pe a matou vāai i mauga e ono faapea mai loʻu tinā: ʻSeʻi vaai i le maualuluga ma le matagofie o mauga. E ese le mataʻina o galuega a Ieova!’ Pe a matou vaai foʻi i galu o le sami, e fai mai: ʻVaai i le malosi o le fafati o galu. E uigaese le malosi o le Atua, a ea?’” Na toe faapea atili mai Christopher: “O na faamatalaga faigofie ma faatupu manatu, na matuā telē se aafiaga iā i matou.”

7. E faapefea ona toleni lau fanau ia mafaufau loloto i mea o le foafoaga?

⁷ A o tuputupu aʻe lau fanau, ia toleni i latou ia mafaufau i mea o le foafoaga ina ia latou aʻoaʻoina ai mea e faatatau i uiga o Ieova. E mafai ona e faamatilatila se galuega o le foafoaga a le Atua ma fesili i lau fanau, “O le ā ua e aʻoaʻoina mai i lenei mea e faatatau iā Ieova?” Atonu o le a faateʻia oe i o latou manatu.​—Mata. 21:16.

8. O ā avanoa na maua e mātua Isaraelu a o latou faimalaga “i le ala”?

⁸ Na faalaeiauina mātua Isaraelu ina ia aʻoaʻo a latou fanau i poloaʻiga a Ieova pe a  savavali “i le ala.” (Teu. 11:19) Na iai auala na ui atu i nuu maotua o Isaraelu. Na vaaia ai ituaiga o manu eseese, manufelelei, ma fugālaau. A o faimalaga atu aiga Isaraelu i na auala, na maua ai e mātua avanoa e talatalanoa ai i a latou fanau e faatatau i foafoaga a Ieova. Atonu e iai foʻi avanoa faapena i aso nei e aʻoaʻo ai e mātua a latou fanau. Seʻi mātau auala ua faia ai faapea e nisi o mātua.

9. O le ā e te aʻoaʻoina mai iā Punitha ma Katya?

⁹ Na faapea mai Punitha o se tinā e nofo i se taulaga telē i Initia: “Pe a matou asiasi i o matou aiga i nuu maotua, na ma vaai i ai o se avanoa e aʻoaʻo ai le ma fanau i foafoaga matagofie a Ieova. Na ou manatu e sili atu ona malamalama laʻu fanau i le foafoaga, pe a matou ō ese mai i le taulaga tumutumu ma magāala pisi.” Mātua e, e lē mafai ona galo i le fanau taimi e tou te faatasitasi ai i se siʻomaga matagofie. Ua faapea mai Katya o se tuafafine mai i Moldova: “E lē galo iā te aʻu taimi na matou faaalu ma oʻu mātua i nuu maotua. Ou te matuā lotofaafetai iā i laʻua ona o le aʻoaʻoina o aʻu a o oʻu laʻitiiti, ina ia faaalu se taimi e mātau ai mea na foafoaina e Ieova ma iloa ai le ituaiga Atua e iai o ia.”

10. O le ā e mafai ona fai e mātua pe a faigatā ona faimalaga ese mai i le taulaga? (Tagaʻi i le pusa “ Fesoasoani mo Mātua.”)

¹⁰ Ae e faapefea pe a faigatā iā te oe ona e faimalaga i nuu maotua? Ua faapea mai Amol e nofo foʻi i Initia: “O le vaipanoa lea ou te nofo ai, e faigaluega mātua mo le tele o itula ma e taugatā le faimalaga i nuu maotua. Peitaʻi, e mafai lava ona e mātauina foafoaga a Ieova ma talanoa i ona uiga, pe a e iai i se paka po o se faapaologa o se fale.” Pe a e vaavaai lelei, e te iloa ai nisi o mea o le foafoaga e lata ane i lou fale e mafai ona faailoa atu i le fanau. (Sala. 104:24) Atonu o le a e maua  ai manulele, iniseti, laau ma isi mea. Ua faapea mai Karina mai i Siamani: “E ese le fiafia o loʻu tinā i fugālaau. A o oʻu laʻitiiti, e na te faasino mai ni fugālaau matagofie pe a ma savalivali.” Mātua, e mafai ona outou faaaogā le tele o vitiō ma lomiga e faatatau i le foafoaga ua saunia e la tatou faalapotopotoga e aʻoaʻo ai a outou fanau. Ioe, po o le ā lava lou tulaga, e mafai ona e fesoasoani i lau fanau ia mātau mea ua faia e le Atua. Seʻi o tatou iloilo nisi o uiga o Ieova e mafai ona e faailoa i lau fanau.

11. E faapefea i mātua ona fesoasoani i a latou fanau ia iloa le alofa o Ieova?

¹¹ Ina ia fesoasoani i lau fanau ia iloa le alofa o Ieova, e mafai ona e faailoa i ai le auala alofa e puipuia ai e le tele o manu a latou toloaʻi. (Mata. 23:37) E mafai foʻi ona e faamatilatila i ai le tele o mea matagofie e tatou te olioli ai i le foafoaga. Ua faapea mai Karina lea na taʻua muamua: “Pe a ma savalivali ma loʻu tinā, e na te faalaeiau aʻu ou te tū ma mātau le eseesega o fugālaau taʻitasi, ma le auala ua faailoa mai ai e le matagofie o na fugālaau le alofa o Ieova. Ina ua ou matua, na faaauau pea ona ou mātauina le eseesega o fugālaau, o o latou foliga ma o latou lanu. E faamanatu mai ai pea iā te aʻu le tele o le alofa o Ieova iā i tatou.”

12. E faapefea i mātua ona fesoasoani i a latou fanau ia iloa le atamai o le Atua? (Salamo 139:14) (Tagaʻi foʻi i le ata.)

¹² Ia fesoasoani i lau fanau ia iloa le atamai o le Atua. E sili atu le atamai o Ieova nai lo o i tatou. (Roma 11:33) O se faataʻitaʻiga, e mafai ona e faamatala i ai le faigofie o le fegasoloaʻi o le vai lea ua liua e avea ma ao. (Iopu 38:36, 37) E mafai foʻi ona e faamatilatila i ai le auala ofoofogia ua foafoaina ai le tino o le tagata. (Faitau le Salamo 139:14.) Seʻi mātau le auala na faia ai faapea e se tamā e igoa iā Vladimir. Ua faapea mai o ia: “I se tasi aso na paʻū ai loʻu atalii mai i lana uila ma lavea ai. I ni nai aso ae pē le manuʻa. Na ma faamatalaina i ai ma laʻu avā le auala na foafoaina ai e Ieova o tatou sela, ina ia faaleleia ai e i latou i latou lava. Na ma faamatala i ai e leai ni tomai faapea i mea e faia e tagata. O se faataʻitaʻiga, e lē mafai e se taavale ua  lavea ona toe faaleleia o ia lava. O lenei mea na fesoasoani i la ma tama e malamalama ai i le atamai o Ieova.”

13. E faapefea i mātua ona fesoasoani i a latou fanau ia iloa le malosi o le Atua? (Isaia 40:26)

¹³ Ua valaaulia i tatou e Ieova ina ia tetepa aʻe i le lagi, ma mafaufau i le ofoofogia o lona malosi lea e mafai ai ona faatumauina le vateatea. (Faitau le Isaia 40:26.) E mafai foʻi ona e faalaeiau lau fanau ia tetepa aʻe i le lagi ma manatunatu loloto. E manatua e Tingting o se tuafafine mai i Taiwan se mea na tupu a o laʻitiiti: “Na iai se taimi na ma camp ai ma loʻu tinā, ma na mafai ai ona ma vaavaai i fetu o le lagi ona e ma te lē o iai i le taulaga i le mea e tele ai molī. O le taimi lenā o loo oʻu feagai ma omiga mai i tamaiti o le vasega, ma na ou popole ai pe e mafai ona ou auauna faamaoni pea iā Ieova. Na faalaeiau aʻu e loʻu tinā ia mafaufau i le malosi na faaaogā e Ieova e foafoaina ai na fetu, ma ia manatua e mafai foʻi e Ieova ona faaaogā lenā malosi e fesoasoani ai iā te aʻu e fesagaʻia so o se tofotofoga. O mea o le foafoaga na ou mātauina mai i lenā camp, na uunaʻia ai aʻu ia iloa lelei Ieova ma faamalosia ai laʻu filifiliga e auauna iā te ia.”

14. E faapefea ona faaaogā e mātua mea o le foafoaga e fesoasoani ai i fanau ia iloa o loo latou auauna iā Ieova o le Atua fiafia?

¹⁴ O loo faailoa mai e le foafoaga le olioli ma le agamālie o Ieova. Ua iloa e saienitisi o le tele o manu e fiafia e taaalo, e aofia ai manulele ma iʻa. (Iopu 40:20) Pe na iai se taimi na toē ai lau fanau a o latou matamata a o taaalo ni meaola? Atonu na latou mātauina se tamaʻi pusi o loo taalo i se vulu, po o ni tamaʻi maile o loo taaalo. O le isi taimi e te vaai ai o taliē lau fanau i uiga mālie o meaola, ia faamanatu i ai o loo tatou auauna i le Atua fiafia.​—1 Timo. 1:11.

15. O le ā e fesoasoani i mātua e iloa ai mea o loo i loto o a latou fanau? (Faataoto 20:5) (Tagaʻi foʻi i le ata.)

¹⁵ I nisi taimi, e ono faigatā i mātua ona talanoa i fanau e faailoa mai faafitauli o loo latou fesagaʻia. Afai o lou tulaga lenā, e manaʻomia la ona e iloa mea o loo i loto o le  fanau. (Faitau le Faataoto 20:5.) E faigofie i nisi mātua ona faia faapea, a o latou fiafia faatasi ma le fanau i mea o le foafoaga. Aiseā? O se tasi o māfuaaga, ona e itiiti mea e tosina ese ai le fanau ma mātua. Na taʻua e Masahiko o se tamā mai i Taiwan se isi māfuaaga: “E masani lava ona lagona e le ma fanau le toʻafilemu, pe a faaalu se taimi ma i latou e aʻe ai i mauga pe savavali ai foʻi i le matafaga. O lo ma faia faapea, na faigofie ai i le ma fanau ona talanoa mai ma na ma iloa ai mea o loo i o latou loto.” Ua faapea mai foʻi Katya lea na taʻua muamua: “Pe a tuua le aʻoga, e ave aʻu e loʻu tinā i se paka matagofie. O lenā siʻomaga toʻafilemu, na faigofie ai ona ou talanoa atu i loʻu tinā i mea na tutupu i le aʻoga ma mea na ou popole ai.”

16. E faapefea i aiga ona maua le toʻafilemu ma le fiafia i foafoaga a Ieova?

¹⁶ E mafai foʻi e aiga ona maua le toʻafilemu, fiafia, ma faamalosia a latou faiā o se aiga mai i mea o le foafoaga. Ua taʻua i le Tusi Paia, e iai “le taimi e ʻataʻata ai” ma “le taimi e osooso ai.” (Fai. 3:1, 4, fpl.) Na foafoaina e Ieova nofoaga matagofie i le lalolagi lea e mafai ona tatou faia ai mea e tatou te fiafia i ai. O le tele o aiga e fiafia e faatasitasi i nofoaga faasao, i nuu maotua, po o le matafaga. O nisi tamaiti e fiafia e tamomoʻe ma taaalo i se paka, matamata i manu, tāʻeele i se vaitafe, vaituloto po o le sami. Maʻeu ni avanoa matagofie ua tatou maua e tafafao ai ma mātau mea o le foafoaga a Ieova!

17. Aiseā e tatau ai i mātua ona fesoasoani i a latou fanau ia olioli i foafoaga a le Atua?

¹⁷ O le a sili atu ona olioli mātua ma fanau i foafoaga a Ieova i lana lalolagi fou. O le a leai se māfuaaga e tatou te fefefe ai i manu pe e fefefe foʻi manu iā i tatou. (Isa. 11:6-9) O le a tatou fiafia e faavavau i mea na foafoaina e Ieova. (Sala. 22:26) Mātua e, aua le faatali seʻia oo i lenā taimi ona faatoʻā fesoasoani lea i le fanau e olioli i mea o le foafoaga. A o e faaaogāina mea o le foafoaga e aʻoaʻo ai lau fanau e faatatau iā Ieova, e lē taumatea o le a latou ioe i upu a le tupu o Tavita: “Ieova e, . . . e leai foʻi ni galuega e pei o au galuega.”​—Sala. 86:8.