1. O le ā se mea e mātauina e tagata pe a auai i le taimi muamua i a tatou sauniga? (Tagaʻi foʻi i le ata.)

 SEʻI faapea faatoʻā auai se ulugalii i se sauniga i le Maota mo Sauniga. Na matuā maofa i laʻua ina ua la vaaia le faaleuō ma le alofa na faaalia e uso ma tuafāfine. Ina ua la toe foʻi i le fale na faapea atu le avā i lana tane, ʻE ese lava Molimau a Ieova mai i isi tagata na tatou feiloaʻi, ma na ou fiafia i le taimi na tatou faatasitasi ai.’

2. Aiseā ua tautevateva ai nisi?

² O se mea mataʻina le alofa o loo faaalia e i latou o loo i le faapotopotoga Kerisiano. O le mea moni, o Molimau a Ieova o ni tagata e lē lelei atoatoa. (1 Ioa. 1:8) O lea, o le tele e tatou te iloa ai i latou i le faapotopotoga, o le tele foʻi lenā e tatou te iloa ai nisi o o latou masei. (Roma 3:23) Ae pagā lea, ua avea le tulaga lē lelei atoatoa o isi e tautevateva ai nisi.

3. O le ā le faailoga e mātaulia ai soo moni o Iesu? (Ioane 13:34, 35)

³ Seʻi toe tagaʻi i le mau autū o lenei mataupu. (Faitau le Ioane 13:34, 35.) O le ā le faailoga e mātaulia ai soo moni o Keriso? O le alofa ae e lē o le tulaga lelei atoatoa. Mātau  e leʻi faapea mai Iesu: ʻO le mea lea e tou te iloa ai o oʻu soo outou.’ Ae na ia fetalai: “O le mea lea e iloa ai e tagata uma o oʻu soo outou.” O lea, ua faailoa mai ai e Iesu e iloa ona soo moni e lē gata e i latou i totonu o le faapotopotoga, ae o i latou foʻi i fafo atu o le faapotopotoga Kerisiano, ma e fefaaaliaʻi e ona soo moni le alofa lē manatu faapito.

4. O ā mea atonu e tuufesili ai tagata e lē o ni Molimau a Ieova?

⁴ Atonu e tuufesili nisi o tagata e lē o ni Molimau a Ieova: ʻE faapefea i le alofa ona matou iloa ai soo moni o Iesu? Na faapefea ona faaalia e Iesu le alofa i ona aposetolo? E faapefea ona matou faaaʻoaʻo iā Iesu i aso nei?’ E mafai ona tatou manatunatu i tali o na fesili. O le faia faapea, atonu e fesoasoani iā i tatou e faaalia ai pea le alofa aemaise pe a feagai ma tulaga lē lelei atoatoa o isi.​—Efe. 5:2.

5. Ia faamatala le uiga o le fetalaiga a Iesu o loo i le Ioane 15:12, 13.

⁵ Na taʻua manino e Iesu e iloa ona soo i se ituaiga alofa e faapitoa. (Faitau le Ioane 15:12, 13.) Mātau na poloaʻia i latou e Iesu: “Ia outou alolofa o le tasi i le isi e pei ona ou alofa iā te outou.” O le ā le uiga o lenā manatu? Na faamatala e Iesu lenā ituaiga alofa, o le alofa faataulaga. O lenā alofa e uunaʻia ai se Kerisiano e maliu mo ona uso talitonu ona o se māfuaaga talafeagai. b

6. Ua faapefea ona faamatilatila mai i le Afioga a le Atua le matuā tāua o le alofa?

⁶ O loo faamatilatila mai i le Afioga a le Atua le matuā tāua o le alofa. O nisi nei o mau o le Tusi Paia e fiafia i ai le toʻatele o tagata: “O le Atua o le alofa lava ia.” (1 Ioa. 4:8) “Ia e alofa atu i lou tuaoi e pei o oe lava  iā te oe.” (Mata. 22:39) “O le alofa e ufiufi ai le anoanoaʻi o agasala.” (1 Pete. 4:8) “E lē uma le alofa.” (1 Kori. 13:8) Ua faamanino mai i na mau ma isi mau, le tāua o le atiaʻe ma le faaalia o lenei uiga matagofie.

7. Aiseā e lē mafai ai e Satani ona autasia tagata i le alofa moni?

⁷ E toʻatele tagata e tuufesili: ʻE faapefea ona ou iloa le tapuaʻiga moni? Ua faapea mai lotu uma o loo latou aʻoaʻoina le mea moni, peitaʻi e eseese uma a latou aʻoaʻoga e faatatau i le Atua.’ Ua taulau Satani i le faafenumiaʻia o mafaufau o tagata, ma ua faigatā ai ona latou iloa le tapuaʻiga moni. Ae e lē mafai ona ia autasia tagata i le lalolagi aoao ina ia alofa le tasi i le isi. E na o Ieova e mafai ona ia faia faapea. E talafeagai lenā manatu ona o Ieova o le Puna o le alofa moni, ma e na o i latou e iai le agaga ma le faamanuia a Ieova e faaalia lenā alofa. (1 Ioa. 4:7) E lētioa fetalai Iesu e iloa ona soo moni, pe a latou faaalia le alofa e lē manatu faapito!

8-9. O ā aafiaga i nisi na vaaia le alofa na faaalia e Molimau a Ieova?

⁸ E pei ona valoia e Iesu, ua iloa e le toʻatele ona soo moni i le alofa moni e faaalia e le tasi i le isi. O se faataʻitaʻiga, e manatua e se uso e igoa iā Ian le tauaofiaga muamua na ia auai ai, lea na faia i se fale taalo e lata ane i le vaipanoa sa nofo ai. Sa iai o ia i lenā fale taalo i ni nai masina muamua atu e matamata i se taaloga. Na ia faapea mai: “Na matuā telē le eseesega ma lenei tauaofiaga. E ese le faaaloalo o tagata Molimau ma sa laʻei mamā, ma e amiolelei foʻi a latou fanau.” Na ia faapea atili mai: “E sili atu i lenā, e foliga mai sa maua e nei tagata le lotomalie ma le filemu, o mea ia sa ou faanaunau lava i ai. Ou te leʻi manatuaina se lauga na faia i lenā aso, ae e lē galo iā te aʻu amioga lelei a Molimau.” c O na amioga e māfua mai i le alofa moni lea e faaalia e le tasi i le isi. E tatou te feutagaʻi ma o tatou uso ma tuafāfine i se auala agalelei ma faaaloalo, ona e tatou te alolofa iā i latou.

⁹ O faalogona foʻi na o se uso e igoa iā John i le taimi muamua na auai ai i sauniga a le faapotopotoga: “Na faafiafiaina aʻu ona o uiga faaleuō o tagata. . . . Na pei i latou o ni tagata paia. O lo latou alofa moni, na ou talitonu ai ua ou maua le tapuaʻiga moni.” d O na tala ma isi mea na tutupu, e faamaonia ai o tagata o Ieova o Kerisiano moni.

10. O ā nisi o tulaga e tatou te faaalia ai le alofa faa-Kerisiano? (Tagaʻi foʻi i le faamatalaga pito i lalo.)

¹⁰ E pei ona taʻua i le amataga, e lē lelei atoatoa o tatou uso tapuaʻi. E iai taimi e latou te faia ai faamatalaga po o gaoioiga e faatigā ai iā i tatou. e (Iako. 3:2) O tulaga faapena e tatou te maua ai le avanoa e faaalia ai le alofa faa-Kerisiano i le auala e tatou te tali atu ai. O le a faapefea la ona tatou faaaʻoaʻo iā Iesu pe a tulaʻi mai na tulaga?​—Ioa. 13:15.

11. O ā uiga lē lelei na faaalia e Iakopo ma Ioane? (Tagaʻi foʻi i le ata.)

¹¹ E leʻi faatalitalia e Iesu ona soo ina ia lelei atoatoa. Nai lo o lea, na ia fesoasoani  ma le alofa iā i latou e faasaʻo o latou uiga lē lelei, ina ia latou maua le finagalo malie o Ieova. I se tasi taimi na tauanau ai e Iakopo ma Ioane lo la tinā, e talosaga iā Iesu ina ia la maua ni tulaga maualuluga i le Malo. (Mata. 20:20, 21) O lea, na faaalia e Iakopo ma Ioane uiga o le faamaualuga ma le fiasili.​—Faata. 16:18.

12. Pe e na o Iakopo ma Ioane na faaalia uiga lē lelei? Ia faamatala.

¹² E lē na o Iakopo ma Ioane na faaalia uiga lē lelei. Mātau le auala na tali atu ai isi aposetolo: “Ua faalogo le isi toʻasefulu i lenei mea, ona feita ai lea o i latou i lea ʻauso e toʻalua.” (Mata. 20:24) E lē taumatea na matuā fefinauaʻi Iakopo, Ioane ma isi aposetolo. Atonu na faapea mai isi: ʻUa oulua manatu ifo lava ua sili oulua nai lo o i matou? O le māfuaaga lenā na lua mananaʻo ai i ni tulaga maualuluga? E lē na o oulua na galulue mamafa faatasi ma Iesu. E matou te maua foʻi le faaeaga lenā e te lua mananaʻo i ai!’ Po o le ā lava le mea na tupu, ae na galo i le ʻauaposetolo e tatau ona latou faaalia pea le alofa faaleuso.

13. O le ā le auala na taulima ai e Iesu le mea na tupu? (Mataio 20:25-28)

¹³ O le ā le auala na taulima ai e Iesu le mea na tupu? E leʻi toʻatamaʻi o ia. E leʻi faapea atu o le a ia saʻilia nisi aposetolo e sili  atu ona lelei, sili ona lotomaulalo, ma feutagaʻi ma le isi i le alofa. Nai lo o lea, na talanoa atu ma le onosaʻi Iesu i nei tane lotofaamaoni. (Faitau le Mataio 20:25-28.) Na faaauau ona ia feutagaʻi ma i latou i se auala alofa, e ui e lē o le taimi muamua po o le taimi mulimuli lea na fefinauaʻi ai le ʻauaposetolo po o ai o i latou e sili.​—Mare. 9:34; Luka 22:24.

14. O le ā le ituaiga siʻomaga na ola aʻe ai aposetolo o Iesu?

¹⁴ E mautinoa na manatunatu Iesu i talaaga o ona aposetolo. (Ioa. 2:24, 25) Na latou ola aʻe i se siʻomaga e matuā faatāua ai e taʻitaʻi lotu tulaga aloaʻia. (Mata. 23:6; faatusatusa i le mataupu “Na Talaʻi Iesu ma Ona Soo i Sunako” i Le Olomatamata, Aperila 1, 2010, itu. 16-18.) O na taʻitaʻi lotu o ni tagata faafiaamiotonu. f (Luka 18:9-12) Na silafia e Iesu o lenā ituaiga siʻomaga e mafai ona aafia ai le vaaiga a le ʻauaposetolo iā i latou lava ma isi. (Faata. 19:11) E leʻi faatalitalia e Iesu e lē taitai faia e ona soo ni mea sesē. Ae ina ua latou faia mea sesē, na ia faaalia pea le onosaʻi iā i latou. Na ia silafia e lelei uunaʻiga o o latou loto. O lea, na ia fesoasoani iā i latou e liaʻiese uiga o le faamaualuga ma le fiasili, ae suia i le alofa.

15. O ā mea ua tatou aʻoaʻoina mai i le mea na tupu lea na aafia ai Iakopo ma Ioane?

¹⁵ E tele mea e tatou te aʻoaʻoina mai i le mea na tupu lea na aafia ai Iakopo ma Ioane. Sa lē tatau ona la talosaga mo ni tulaga maualuluga i le Malo. Sa lē tatau foʻi ona faataga e isi aposetolo le mea na tupu e faaleagaina ai lo latou autasi. E ui i lea, na feutagaʻi Iesu ma aposetolo e toʻa 12 i se auala agalelei ma alofa. O le ā le lesona mo i tatou? Po o ā lava gaoioiga e faia e isi, ae e tāua le auala e tatou te tali atu ai i o latou masei ma vaivaiga. O le ā e fesoasoani iā i tatou? Pe a tatou lē fiafia i se uso talitonu, ia fesili ifo: ʻAiseā ou te lē fiafia ai i le mea na ia faia? Po ua iloa ai se uiga lē lelei e manaʻomia ona ou galue e faaleleia? Po o feagai le tagata na faatigā mai iā te aʻu ma se tulaga faigatā? E tusa lava pe saʻo le māfuaaga ou te lē o fiafia ai, ae pe mafai ona ou faaalia pea le alofa lē manatu faapito e ala i le faamagalo i lē na faatigā mai?’ O le tele e tatou te faaalia ai le alofa i a tatou feutagaʻiga ma isi, e atili ai ona faamaonia atu o i tatou o soo moni o Iesu.

16. O le ā se isi mea e tatou te aʻoaʻoina mai i le faaaʻoaʻoga a Iesu?

¹⁶ Ua tatou aʻoaʻoina mai foʻi i le faaaʻoaʻoga a Iesu, e tāua ona taumafai e malamalama i o tatou uso ma tuafāfine. (Faata. 20:5) E silafia e Iesu loto o tagata, ae e lē mafai ona tatou faia faapea. Peitaʻi, e mafai ona tatou faaalia pea le onosaʻi i o tatou uso ma tuafāfine pe a faatigā mai. (Efe. 4:1, 2; 1 Pete. 3:8) E faigofie ona faia faapea pe a tatou malamalama i o latou talaaga. Seʻi iloilo se faaaʻoaʻoga.

17. Na faapefea ona aogā i se ovasia o le matagaluega le iloa lelei o se uso tapuaʻi?

¹⁷ E manatua e se ovasia o le matagaluega i Aferika i Sasaʻe se uso na ia manatu e iai ona uiga lē magafagafa. O le ā le auala na taulima ai e le ovasia o le matagaluega lea  tulaga? Na ia faapea mai: “Nai lo o loʻu ʻalofia o le uso, na ou filifili ia iloa lelei o ia.” O le faia faapea, na iloa ai e le ovasia o le matagaluega nisi o mea e faatatau i le talaaga o le uso lea na māfua ai ona faapea ona uiga. Na faapea atili mai le ovasia: “Ina ua ou malamalama i le tulaga faigatā na soifua aʻe ai lenei uso, o ana taumafaiga ina ia manumalo i lea tulaga ma le lelei o lona agaʻigaʻi i luma, na ou fiafia ai iā te ia. Na avea i maʻua o ni uō lelei.” Ioe, pe a tatou taumafai e malamalama i tulaga o o tatou uso ma tuafāfine, o le a faigofie ona tatou faaalia iā i latou le alofa.

18. O ā fesili e tatou te fesili ifo ai pe afai na faatigā mai se uso iā i tatou? (Faataoto 26:20)

¹⁸ E ono iai taimi e tatou te manatu ai e manaʻomia ona talanoa i se uso na faatigā mai. Peitaʻi, e manaʻomia ona tatou fesili ifo: ʻPo ua ou iloa faamatalaga moni uma?’ (Faata. 18:13) ʻPe na faia ma le loto i ai le faamatalaga?’ (Fai. 7:20) ʻPe na ou faia foʻi se mea sesē faapena?’ (Fai. 7:21, 22) ʻPo o le a faateteleina ai le faafitauli pe a ou talanoa i lē na faatigā mai?’ (Faitau le Faataoto 26:20.) Pe a faaalu se taimi e iloilo ai na fesili, atonu e tatou te iloa ai o le alofa e uunaʻia ai i tatou e faamagalo i lē na faatigā mai.

19. O le ā ua e maumauaʻi e fai?

¹⁹ E faamaonia atu e Molimau a Ieova o i latou o soo moni o Iesu, e ala i le faaalia o le alofa o le tasi i le isi. Ae e faamaonia e i tatou taʻitoʻatasi o i tatou o ni soo moni o Iesu, pe a faaalia le alofa lē manatu faapito i o tatou uso ma tuafāfine e ui i o latou tulaga lē lelei atoatoa. O le faia faapea, ua tatou fesoasoani ai i isi ia iloa le tapuaʻiga moni ma aufaatasi ma i tatou e tapuaʻi iā Ieova le Atua alofa. Tau ina ia tatou maumauaʻi e faaalia pea le alofa lea e iloa ai Kerisiano moni!