1-2. O ā faamanuiaga e maua e se tasi pe a uma ona papatiso?

 E TATOU te lagona le fiafia pe a tatou papatiso ma avea o se vaega o le aiga o Ieova. O i latou e mauaina lenā faaeaga, e latou te ioe i le moni o upu a le faisalamo o Tavita: “E fiafia lē ua e [Ieova] filifilia ma faalatalataina atu ina ia nofo i ou lotoā.”—Sala. 65:4.

² O ai i latou e taliaina e Ieova i totonu o ona lotoā? E pei ona taʻua i le mataupu ua mavae, e filifili o ia e mafuta vavalalata iā i latou e mananaʻo e maua se faiā vavalalata ma ia. (Iako. 4:8) Pe a tuuina atu oe iā Ieova ma papatiso, o le a e mafuta vavalalata atu iā te ia i se auala faapitoa. Ia e mautinoa pe a uma ona e papatiso, o le a ia ʻliligi ifo i ou luga faamanuiaga, seʻia oo ina leai se mea e te mativa ai.’—Mala. 3:10; Iere. 17:​7, 8.

3. O le ā le matafaioi tāua ua iai i Kerisiano ua tuuina atu ma papatiso? (Failauga 5:​4, 5)

³ O le mea moni, o le papatisoga ua na o se amataga. Pe a uma lenā laasaga, o le a e manaʻo e faia le mea e sili e ola ai e ōgatusa ma lau tautoga o le tuuina atu, e tusa lava po o ā faaosoosoga po o tofotofoga o le faatuatua e te fesagaʻia. (Faitau le Failauga 5:​4, 5.) I le avea ai o oe ma soo o Iesu,  o le a e taumafai malosi ai e mulimulituʻi i lana faaaʻoaʻoga ma ana poloaʻiga. (Mata. 28:​19, 20; 1 Pete. 2:21) O le a fesoasoani lenei mataupu iā te oe e faia ai faapea.

IA ʻMULIMULI PEA’ IĀ IESU E UI I TOFOTOFOGA MA FAAOSOOSOGA

4. O le ā e uiga i ai le amoina e soo o Iesu o “le laau e faapuapuagatia ai”? (Luka 9:23)

⁴ Aua e te manatu o le a leai ni faafitauli pe a uma ona e papatiso. O le mea moni, na faailoa manino mai e Iesu o le a amoina e ona soo ʻle laau e faapuapuagatia ai i lea aso ma lea aso.’ (Faitau le Luka 9:23.) Po o le uiga o le fetalaiga a Iesu o le a mafatia ona soo i taimi uma? E leai. Na ia faamatilatila mai e lē gata o le a latou maua faamanuiaga, ae o le a latou feagai ma luʻi. O nisi o na luʻi atonu o le a matuā faigatā.—2 Timo. 3:12.

5. O ā faamanuiaga na folafola mai e Iesu iā i latou e faia faataulaga?

⁵ Atonu o loo e feagai ma teteega mai i ou tauaiga, pe atonu foʻi ua e faataulaga le saʻilia o meafaitino ina ia faamuamua ai manaʻoga o le Malo i lou olaga. (Mata. 6:33) Pe afai o le tulaga lenā, ia e manatua, e silafia e Ieova mea uma o loo e faia mo ia. (Epe. 6:10) Atonu ua e tofo i le moni o upu nei a Iesu: “O so o se tasi e na te tuua se fale, po o uso, o tuafāfine, o le tinā, o le tamā, o fanau, po o fanua, ona o aʻu ma le tala lelei, e maua e ia e taʻi 100 i le taimi nei, o fale, o uso, o tuafāfine, o tinā, o fanau, ma fanua, faatasi ai ma sauāga, ma le ola e faavavau i le lumanaʻi.” (Mare. 10:​29, 30) E tele atu faamanuiaga ua e maua, nai lo o so o se faataulaga ua e faia.—Sala. 37:4.

6. Aiseā o le a faaauau ai ona e tauivi ma “tuʻinanauga o le tino” pe a uma ona e papatiso?

⁶ O le a e tauivi pea ma “tuʻinanauga o le tino” pe a uma ona e papatiso. (1 Ioa. 2:16) O le māfuaaga, ona o loo avea pea oe o se tagata e lē lelei atoatoa. Atonu e iai taimi e taitutusa ai ou faalogona ma le aposetolo o Paulo. Na ia tusi: “Ou te matuā naunau i le tulafono a le Atua e tusa ma le tagata i totonu, ae ua ou iloa i loʻu tino se isi tulafono, o loo tau ma le tulafono a loʻu mafaufau, ma ua faapologaina ai aʻu i le tulafono a le agasala o loo i loʻu tino.” (Roma 7:​22, 23) E ono iai taimi e te lotovaivai ai ona o lou tauivi ma faanaunauga agasala. Peitaʻi, o le mafaufau i lau tautoga na faia iā Ieova ina ua tuuina atu lou ola iā te ia, o le a e maumauaʻi ai e teena faaosoosoga. O le a fesoasoani iā te oe lau tautoga o le tuuina atu, pe a e feagai ma faaosoosoga. E faapefea?

7. E faapefea i le tuuina atu iā Ieova ona fesoasoani iā te oe e tumau faamaoni ai iā te ia?

⁷ Pe a tuuina atu oe iā Ieova, ua e faafitia oe lava. O lona uiga, ua e filifili e teena faanaunauga ma sini e lē fiafia i ai le finagalo o Ieova. (Mata. 16:24) O lea, pe a e feagai ma se tofotofoga, e te lē tau mafaufau po o le ā le mea e fai. Ua uma ona e filifili o le a e tumau faamaoni iā Ieova, ma o le a e maumauaʻi pea e faafiafia o ia. O le a e faaaʻoaʻo iā Iopu. E ui na ia feagai ma tofotofoga e sili ona ogaoga, ae na ia faapea mai ma le maumauaʻi: “Ou te lē aveesea loʻu faamaoni!”—Iopu 27:5.

8. E faapefea i le manatunatu loloto i lau tatalo o le tuuina atu ona fesoasoani iā te oe e teena ai faaosoosoga?

⁸ O le manatunatu loloto i lau tatalo o le tuuina atu iā Ieova, o le a e maua ai le malosi e teena ai so o se faaosoosoga. O se faaaʻoaʻoga, o le a e lē faatafai ai i le paaga a se isi tagata, auā o le mea lenā ua uma ona e filifili  e fai. Peitaʻi, o le a faigatā ona e liaʻiese na faalogona lē talafeagai, pe afai e te faataga e tuputupu aʻe pea ma mauaa i lou loto. O le mea moni, e mafai ona e “liliuese” mai i “le ala o ē e amioleaga.”—Faata. 4:​14, 15.

9. E faapefea i le manatunatu loloto i lau tatalo o le tuuina atu ona fesoasoani iā te oe e faamuamua ai pea mea faaleagaga?

⁹ Ae e faapefea pe a ofo mai e se tasi se galuega e aafia ai lou auai e lē aunoa i sauniga? Ua e iloa le gaoioiga e fai, auā ua uma ona e filifili e teena se galuega e aafia ai taimi o sauniga. O lea, o le a lē faaosoosoina oe e talia le galuega, ona taumafai lea e saʻili ni auala e faamuamua ai pea Ieova. O le manatunatu i le maumauaʻi o Iesu e faafiafia lona Tamā, o le a vave ai ona e gaoioi ma le maumauaʻi e teena so o se mea e faatigā ai i le Atua, o lē ua e tuuina atu i ai.—Mata. 4:10; Ioa. 8:29.

10. Pe a uma ona e papatiso, e faapefea ona fesoasoani Ieova iā te oe ina ia ʻmulimuli pea’ iā Iesu?

¹⁰ O tofotofoga ma faaosoosoga, o se avanoa lea e faailoa atu ai lou maumauaʻi e ʻmulimuli pea’ iā Iesu. Pe a e faia faapea, e mautinoa o le a fesoasoani mai Ieova iā te oe. Ua faapea mai le 1 Korinito 10:13: “E faamaoni le Atua, ma e na te lē tuua outou i se faaosoosoga e sili atu nai lo o le mea tou te lavātia, ae pe a oo mai le faaosoosoga, e saunia e ia se auala e sao ai outou, ina ia outou tumau ai.”

AUALA E MULIMULI AI PEA IĀ IESU

11. O le ā se tasi o auala sili e mulimuli ai pea iā Iesu? (Tagaʻi foʻi i le ata.)

¹¹ Na maelega Iesu ma mafuta vavalalata iā Ieova i le tatalo. (Luka 6:12) O se tasi o auala sili e te mulimuli ai pea iā Iesu pe a uma ona e papatiso, o le atiaʻe o se masaniga o le faia o mea e te mafuta vavalalata atu ai iā Ieova. Ua faapea mai le Tusi Paia: “Po o le  ā lava le tele o lo tatou agaʻigaʻi i luma, ae seʻi o tatou faaauau ona savavali ma le maopoopo e tusa ma lea lava ala.” (Fili. 3:16) E mai i lea taimi i lea taimi, o le a e faalogo ai i tala o uso ma tuafāfine na filifili e faalautele atu la latou auaunaga paia. Atonu na latou auai i le Aʻoga mo Tagata Talaʻi o le Malo, pe siitia atu i vaipanoa o loo telē ai le manaʻoga. Pe a talafeagai ma lou tulaga, o ni sini lelei na mo oe. E naunau tagata o Ieova e faalautele la latou faiva. (Galu. 16:9) Ae e faapefea pe afai e lē o mafai ona e faia lenā mea i le taimi lenei? Aua e te manatu e sili atu i latou o loo mafai ona faia faapea. O le mea e sili ona tāua o lou tumau. (Mata. 10:22) Ia e manatua e tautele iā Ieova lau auaunaga, pe a e faia le mea sili e tusa ai ma ou tomai ma lou tulaga. O se auala tāua lenā e fesoasoani iā te oe e mulimuli ai pea iā Iesu, pe a uma ona e papatiso.—Sala. 26:1.

12-13. O le ā e tatau ona e faia pe a amata ona mou atu lou maelega? (1 Korinito 9:​16, 17) (Tagaʻi foʻi i le pusa “ Ia Faatumauina Lou Malosi.”)

¹² Ae e faapefea pe a e manatu i nisi taimi i au tatalo ua na o se mea e tau ina fai, po ua mou atu foʻi lou olioli i lau faiva? Ae e faapefea pe afai ua e lē toe fiafia e faitau le Tusi Paia e pei o le taimi muamua? Pe afai o ou faalogona na ina ua uma ona e papatiso, aua e te manatu ua lē toe iai le agaga o Ieova iā te oe. E mafai ona femoumouaʻi o tatou faalogona ona o lo tatou tulaga lē lelei atoatoa. Pe afai ua amata ona mou atu lou maelega, ia manatunatu i le faaaʻoaʻoga a le aposetolo o Paulo. E ui na ia taumafai e faaaʻoaʻo iā Iesu, ae e iai taimi na leai ai sona faanaunauga malosi e faia mea e ao ona ia fai. (Faitau le 1 Korinito 9:​16, 17.) Na ia faapea mai: “E tusa po ou te lē faia ma le lotomalie,  ua tuuina mai pea iā te aʻu le tiute tauave ia faataunuuina.” I nisi faaupuga, sa maumauaʻi Paulo e faataunuu lana faiva e ui i ona faalogona lē mautonu i nisi taimi.

¹³ I se tulaga talitutusa, aua neʻi o tatou faia ni filifiliga e fua i o tatou faalogona. Ia maumauaʻi e faia le mea saʻo e tusa pe e te lē manaʻo i ai. Pe afai e te faia pea le mea saʻo, atonu o le a suia ai ou faalogona a o faagasolo taimi. Ae po o le ā lava le tulaga, o le tausisi pea i se faasologa lelei faaleagaga, o le a fesoasoani iā te oe e mulimuli ai pea iā Iesu pe a uma ona e papatiso. O lou tumau i le auaunaga iā Ieova, o le a faalaeiauina ai foʻi ou uso ma tuafāfine.—1 Tesa. 5:11.

“IA TOFOTOFO PEA . . . IA SUʻESUʻE IFO PEA”

14. O le ā e tatau ona e iloiloina e lē aunoa, ma aiseā? (2 Korinito 13:5)

¹⁴ O se isi vala e fesoasoani iā te oe pe a uma ona papatiso, o le faia e lē aunoa o se iloiloga o oe lava. (Faitau le 2 Korinito 13:5.) Ia iloilo mai i lea taimi i lea taimi po o e tatalo i aso taʻitasi, faitau ma suʻesuʻe le Tusi Paia, auai i sauniga, ma faia se sao i le faiva. Ia saʻili auala e te maua ai le tele o le fiafia ma aogā mai i na vala. O se faaaʻoaʻoga, ia fesili ifo: ʻPe e mafai ona ou faamatala atu i isi aʻoaʻoga faavae o le Tusi Paia? O ā ni auala e mafai ona faateleina ai loʻu fiafia i le faiva? Pe e patino aʻu tatalo ma atagia atu ai loʻu faalagolago atoatoa iā Ieova? Po ou te auai e lē aunoa i sauniga? E faapefea ona faaleleia le faia o soʻu sao ma loʻu uaʻi atu i sauniga?’

15-16. O le ā e te aʻoaʻoina mai i le auala na teena ai e Robert se faaosoosoga?

¹⁵ E tāua foʻi ona faia se iloiloga faamaoni ina ia iloa ai ou vaivaiga. Na faamatala e le uso o Robert se mea na tupu e faamatilatila ai lenā manatu: “Sa ou galue i se galuega faavaitaimi i le 20 o oʻu tausaga. I se tasi aso ina ua mānava galuega, na valaaulia ai aʻu e se teine e ma te faigaluega e ma te ō i lona fale, ma na ia faapea mai e ma te eva na o i maʻua. I le taimi muamua, na ou faia faamolemolega e ʻalofia ai, ae na iʻu lava ina ou teena ma faamatala i ai māfuaaga.” O le mea e lelei ai na teena e Robert le faaosoosoga. Ae ina ua ia toe mafaufau i le mea na tupu, na ia iloa ai e iai se isi auala e sili atu ona lelei na tatau ona ia tali atu ai. Ua ia taʻutino mai: “E leʻi vave ona ou tetee atu ma le maumauaʻi, e pei ona teena e Iosefa o le avā a Potifara. (Kene. 39:​7-9) O le mea moni, na faateʻia aʻu ona e leʻi faigofie ona ou teena le faaosoosoga. O lenei mea na tupu, na ou  iloa ai e manaʻomia ona faamalosia la ma faauōga ma Ieova.”

¹⁶ Atonu e aogā foʻi iā te oe le faia o se iloiloga o oe lava e pei ona faia e Robert. E tusa pe na e taulau e teena se faaosoosoga, ae ia fesili ifo, ʻPe na vave ona ou teena le faaosoosoga?’ Aua e te lotovaivai pe a iai se vala e manaʻomia ona faaleleia, ae ia e fiafia ua e iloa lenā vaivaiga. Ia faaaofia lenā mataupu i au tatalo, ma ia faamalosia lou faanaunauga e ola e ōgatusa ma tapulaa tauamio a Ieova.—Sala. 139:​23, 24.

17. O le ā le aafiaga i le suafa o Ieova ona o le mea na tupu iā Robert?

¹⁷ Peitaʻi, e iai se isi mea e tatou te aʻoaʻoina mai i le mea na tupu iā Robert. Ua ia faapea mai: “Ina ua ou teena le valaaulia a le teine, na ia faapea mai, ʻUa saʻo lau tali.’ O lea na ou fesili i ai po o le ā le uiga o lana tala. Na ia faapea mai na fai atu sana uō na avea muamua ma Molimau a Ieova, o talavou Molimau a Ieova uma e latou te faia faalilolilo mea leaga pe a maua le avanoa e fai ai. O lea, na ia fai ai i lana uō o le a ia tofotofoina la aʻu. Na ou matuā fiafia lava ona na ou faamamaluina le suafa o Ieova.”

18. O le ā ua e maumauaʻi e fai pe a uma ona e papatiso? (Tagaʻi foʻi i le pusa “ Se Faasologa o Mataupu o le a E Fiafia i Ai.”)

¹⁸ Pe a tuuina atu lou ola iā Ieova ma papatisoina, e faailoa atu ai e te manaʻo e faapaia lona suafa i so o se tulaga. E mautinoa e silafia e Ieova tofotofoga o loo e fesagaʻia ma faaosoosoga o loo e teena. O le a ia faamanuia i au taumafaiga ina ia e tumau faamaoni. Ia mautinoa o le a ia foaʻi mai le malosi e te manaʻomia e ala mai i lona agaga paia. (Luka 11:​11-13) O le fesoasoani a Ieova e mafai ai ona e mulimuli pea iā Iesu pe a uma ona e papatiso.