1. O ā lagona atonu e tauivi ma nisi o auauna faamaoni a Ieova?

 O SE faamautinoaga le iloaina e finagalo malie Ieova i ona tagata. Ua faapea mai le Tusi Paia: “E fiafia Ieova i lona nuu.” (Sala. 149:4) Peitaʻi, e iai taimi e lagona ai e nisi le lotovaivai ma taumānatu, ʻPo o finagalo malie Ieova iā te aʻu?’ E toʻatele foʻi auauna faamaoni a Ieova o loo taʻua i le Tusi Paia na tauivi ma lagona faapena.—1 Samu. 1:​6-10; Iopu 29:​2, 4; Sala. 51:11.

2. O ai e mauaina le finagalo malie o Ieova?

² Ua faailoa manino mai i le Tusi Paia, e mafai e tagata lē lelei atoatoa ona mauaina le finagalo malie o Ieova. E faapefea? E ao ona tatou faaalia le faatuatua iā Iesu Keriso ma papatiso. (Ioa. 3:16) O le faia faapea, ua faailoa atu ai i le lautele ua tatou salamō mai i a tatou agasala, ma folafola atu i le Atua o le a tatou faia lona finagalo. (Galu. 2:38; 3:19) E faafiafiaina Ieova pe a tatou uia na laasaga ina ia atiaʻe ai se faiā ma ia. Pe a tatou faia le mea sili e ola e tusa ai ma la tatou tautoga o le tuuina atu, o le a finagalo malie Ieova iā i tatou ma silasila iā i tatou o ni ana uō vavalalata.—Sala. 25:14.

3. O ā fesili o le a tatou talanoaina?

³ Peitaʻi, aiseā e ono manatu ai nisi e lē o finagalo malie Ieova iā i latou? E faapefea ona faailoa mai e Ieova lona finagalo malie? E faapefea i se Kerisiano ona faamalosia lona mautinoa o loo ia mauaina le finagalo malie o le Atua?

AISEĀ E MANATU AI NISI E LĒ O FINAGALO MALIE IEOVA IĀ I LATOU?

4-5. E ui e tatou te lagona le leai o se aogā, ae o le ā ua tatou mautinoa i ai?

⁴ O le toʻatele o i tatou o loo tauivi pea ma lagona o le leai o se aogā, talu mai le taimi a o tatou lāiti. (Sala. 88:15) Ua faapea mai se uso e igoa iā Adrián: “E masani ona oo iā te aʻu lagona  o le leai o se aogā. Ou te manatua a o oʻu laʻitiiti, na ou tatalo ina ia sao atu lo matou aiga i le Parataiso, e ui ou te leʻi mautinoa po o le a faasaoina atu ai ma aʻu.” E leʻi ola aʻe Tony i se aiga Molimau a Ieova. Ua ia faapea mai: “E leʻi iai lava se taimi na faapea mai ai oʻu mātua e la te alolofa pe fiafia iā te aʻu. O lea na ou mafaufau ai, po o ā lava mea ou te faia, e lē mafai ona ou faamalieina i laʻua.”

⁵ Pe a iai taimi e tatou te tauivi ai ma lagona o le leai o se aogā, ia manatua o Ieova lava ia na tosina mai i tatou iā te ia. (Ioa. 6:44) E silasila Ieova i o tatou uiga lelei lea atonu e tatou te lē o iloaina, ma e na te silafia lelei le ituaiga o tagata e iai i tatou. (1 Samu. 16:7; 2 No. 6:30) O lea, e mafai ona tatou maufaatuatuaina lana faamautinoaga e tautele i tatou iā te ia.—1 Ioa. 3:​19, 20.

6. O ā lagona o le aposetolo o Paulo e faatatau i mea sesē na ia faia i le taimi ua teʻa?

⁶ A o tatou leʻi aʻoaʻoina le upu moni, e iai nisi o i tatou na faia ni mea o loo lagona ai pea le nofosala. (1 Pete. 4:3) E oo lava i auauna faamaoni a Ieova, o loo latou tauivi pea ma faanaunauga agasala. Ae e faapefea oe? Pe e iai ni taimi e te manatu ai e lē mafai ona faamagaloina oe e Ieova? Pe afai o lea, e faalaeiauina i tatou i le iloaina, e iai foʻi auauna faamaoni a Ieova na tauivi ma na faalogona. O se faaaʻoaʻoga, na lagona e le aposetolo o Paulo le mafatia ina ua mafaufau i ona vaivaiga. (Roma 7:24) O le mea moni, na salamō Paulo mai i ana agasala ma papatisoina. E ui i lea, na ia taʻua o ia lava o “lē e aupito faatauvaa o le ʻauaposetolo” ma e ʻsili ona agasala.’—1 Kori. 15:9; 1 Timo. 1:15.

7. O le ā e tatau ona tatou manatua e faatatau i agasala na tatou faia i le taimi ua teʻa?

⁷ Ua folafola mai e lo tatou Tamā i le lagi, e na te faamagaloina i tatou pe afai e tatou te salamō. (Sala. 86:5) O lea, pe afai e tatou te salamō moni mai i a tatou agasala, e mautinoa o le a faamagaloina i tatou e Ieova.—Kolo. 2:13.

8-9. E faapefea ona tatou foʻia le lagona e lē lava mea e tatou te faia e faafiafiaina ai Ieova?

⁸ E tatou te mananaʻo uma lava e faia le mea sili e auauna ai iā Ieova. Peitaʻi, e ono manatu nisi e lē lava mea e latou te faia ina ia maua ai lona finagalo malie. Ua faapea mai se tuafafine e igoa iā Amanda: “E masani ona ou manatu o le faia o le mea sili mo Ieova, e uiga atu ia tele atu nisi mea ou te faia i taimi uma. O lea, ou te taumafai ai ia sili atu nisi mea ou te faia nai lo o le mea ou te gafatia. Pe afai e lē mafai ona ou faia na mea, ou te mafaufau ai e lē o fiafia Ieova iā te aʻu.”

⁹ E faapefea ona tatou foʻia le lagona e lē lava mea e tatou te faia e faafiafiaina ai Ieova? Ia manatua, e magafagafa Ieova ma e lē pulepuletutū. E na te lē faamalosia i tatou e faia se mea e sili atu nai lo o le mea e tatou te mafaia. E na te talisapaia so o se mea e mafai ona tatou faia. Ia manatunatu foʻi i faaaʻoaʻoga faale-Tusi Paia o i latou na auauna ma le lotoatoa iā Ieova. O se faataʻitaʻiga o Paulo. Na galue mamafa mo le tele o tausaga, faimalaga i le faitau afe o maila, ma faavaeina le tele o faapotopotoga. Peitaʻi, ina ua itiiti mea e mafai ona ia faia i le galuega talaʻi ona o suiga i lona tulaga, na ia maua pea le finagalo malie o le Atua. Na faaauau ona ia faia le mea e na te mafaia, ma na faamanuia o ia e Ieova. (Galu. 28:​30, 31) I se tulaga talitutusa, e lē tutusa mea e mafai ona tatou faia mo Ieova i taimi uma. Ae o le mea e tāua iā te ia, o le uunaʻiga e tatou te faia ai. Seʻi o tatou iloiloina nisi o auala e faailoa mai ai e Ieova lona finagalo malie iā i tatou.

 E FAAPEFEA ONA FAAILOA MAI E IEOVA LONA FINAGALO MALIE?

10. E faapefea ona tatou “faalogo atu” o faailoa mai e Ieova lona finagalo malie iā i tatou? (Ioane 16:27)

¹⁰ E ala i le Tusi Paia. E faailoa mai e Ieova lona finagalo malie iā i latou e alofa i ai. E lua taimi na ia fetalai ai o Iesu o lona Alo pele, o lē ua malie i ai lona finagalo. (Mata. 3:17; 17:5) Pe e te fia faalogo atu o fetalai mai Ieova, ʻua malie loʻu loto’ iā te oe? E lē o fetalai tuusaʻo mai Ieova iā i tatou, ae o loo ia fetalai mai e ala i le Tusi Paia. Pe a tatou faitau i fetalaiga a Iesu o loo i tusi o Evagelia, e pei lenā o loo tatou “faalogo atu” o faailoa mai e Ieova lona finagalo malie iā i tatou. (Faitau le Ioane 16:27.) Na faaatagia atoatoa mai e Iesu uiga o lona Tamā. E ui e lē lelei atoatoa soo faamaoni o Iesu, ae na ia faailoa atu i ai ua malie lona finagalo iā i latou. Pe a tatou faitau la i na faamatalaga, e mafai ona tatou faaata Ieova e pei o loo fetalai mai faapena iā i tatou.—Ioa. 15:​9, 15.

11. Aiseā e lē tatau ai ona tatou manatu ua tatou lē maua le finagalo malie o Ieova pe a feagai ma faigatā? (Iakopo 1:12)

¹¹ E ala i lana tausiga alofa. E naunau Ieova e fesoasoani mai iā i tatou, e ala i le saunia mai o mea e tatou te manaʻomia i le itu faaletino. Ae atonu e iai taimi e na te lē taofia ai mea leaga e tutupu iā i tatou, e pei ona ia faia i le tane amiotonu o Iopu. (Iopu 1:​8-11) Pe a tatou feagai ma faigatā, e lē faapea ai ua tatou lē maua le finagalo malie o le Atua. Peitaʻi, o avanoa ia e tatou te faailoa atu ai, e tatou te matuā alolofa iā Ieova ma maufaatuatuaina o ia. (Faitau le Iakopo 1:12.) Pe a tatou tumau e ui i faigatā, o le a tatou tofo ai i lana tausiga alofa ma lana lagolagosua.

12. O le ā e tatou te aʻoaʻoina mai i le mea na tupu iā Dmitrii?

¹² Seʻi mātau le mea na tupu i se uso e igoa iā Dmitrii mai i Asia. Na vāea o ia mai i lana galuega, ma e tele masina o tau saʻili se isi ana galuega. O lea na ia maufaatuatuaina ai Ieova, e ala i le filifili e faatele sona sao i le galuega talaʻi. Ua mavae le tele o masina ae e leʻi maua lava sana galuega. Na aafia foʻi o ia i se maʻi tugā, ma na iʻu ai lava ina faataotolia i le fale. Na amata ona ia mafaufau, po o tumau pea ona avea o ia o se tane ma tamā lelei, ma tuufesili po o fiafia pea le finagalo o Ieova iā te ia. I se tasi afiafi, na tusi ai e lona afafine i se pepa upu o loo i le Isaia 30:15: “O le a malolosi outou pe a outou nonofo fifilemu pea ma faatuatua.” Ona ia avatu lea i lona tamā ma faapea  atu, “Dad, pe a e lagona le faanoanoa ia manatua lenei mau.” Na iloa ai e Dmitrii, o le tausiga alofa a Ieova o loo maua ai pea e lona aiga meaʻai, lavalava, ma se fale e nonofo ai. Ua ia faapea mai, “O le mea na manaʻomia ona ou faia, o le toʻafilemu pea ma faaauau ona maufaatuatuaina loʻu Atua.” Pe afai o loo e feagai ma se tulaga faapena, ia e mautinoa e manatu mamafa mai Ieova iā te oe ma o le a ia fesoasoani mai ina ia e tumau.

13. Atonu o ai e faaaogā e Ieova e faailoa mai ai lona finagalo malie iā i tatou, ma e faapefea?

¹³ E ala mai i o tatou uso tapuaʻi. E faaaogā e Ieova o tatou uso ma tuafāfine e faailoa mai ai lona finagalo malie iā i tatou. O se faataʻitaʻiga, atonu e na te uunaʻia nisi e aumai ni faalaeiauga i le taimi e tatou te manaʻomia ai. O le mea lenā na tupu i se tuafafine i Asia ina ua ia feagai ma le tele o faafitauli. Na vāea o ia mai i lana galuega ma na aafia i se maʻi tugā. Na faia foʻi e lana tane se agasala matuiā, ma lē toe avea ai o se toeaina. Na ia faapea mai, “Ou te leʻi malamalama pe aiseā ua tutupu ai nei mea. Na ou mafaufau atonu na ou faia se mea sesē, ma lē toe maua ai le finagalo malie o Ieova.” Na ʻaiʻoi atu le tuafafine iā Ieova mo se faamautinoaga o loo ia maua pea lona finagalo malie. O le ā le auala na tali mai ai Ieova? Ua faapea mai le tuafafine, “Na talanoa mai toeaina o le faapotopotoga, ma faamautinoa mai e alofa Ieova iā te aʻu.” I se taimi mulimuli ane, na ia toe talosaga atu foʻi mo le faamautinoaga a Ieova. Ua ia faapea mai, “O le aso lava lenā na ou maua ai se tusi mai i uso ma tuafāfine o le faapotopotoga. A o oʻu faitauina a latou upu faalaeiau, na ou iloa ai na faafofoga mai Ieova iā te aʻu.” O le mea moni, e masani ona faailoa mai e Ieova lona finagalo malie, e ala i upu faalaeiau mai i isi.—Sala. 10:17.

14. O le ā se isi auala e faailoa mai ai e Ieova lona finagalo malie iā i tatou?

 ¹⁴ E faailoa mai foʻi e Ieova lona finagalo malie, e ala i le faaaogā o uso talitonu e aumai fautuaga pe a tatou manaʻomia. O se faataʻitaʻiga, i le uluaʻi senituri, na faagaeeina ai e Ieova le aposetolo o Paulo e tusia ni tusi se 14 e avatu i uso tapuaʻi. Na aofia i na tusi fautuaga tuusaʻo ae faia i se auala alofa. Aiseā na faagaeeina ai e Ieova Paulo e tusia na fautuaga? O Ieova o se Tamā alofa, ma e na te aʻoaʻia lana fanau “ua ia fiafia i ai.” (Faata. 3:​11, 12) O lea, pe a tatou maua ni fautuaga faale-Tusi Paia, o se faamaoniga lenā ua tatou maua le finagalo malie o le Atua. (Epe. 12:6) O ā isi auala e faamaonia ai ua tatou maua le finagalo malie o le Atua?

ISI FAAMAONIGA O LE FINAGALO MALIE O IEOVA IĀ I TATOU

15. O ai e foaʻi mai ai e Ieova lona agaga paia, ma e faapefea i lenā mea ona faamalosia ai lo tatou mautinoa?

¹⁵ E foaʻi mai e Ieova lona agaga paia iā i latou e finagalo malie i ai. (Mata. 12:18) Ia fesili ifo, ʻPo o oʻu faaalia se vala o le fua o le agaga o le Atua i loʻu olaga?’ Po ua sili atu ona e onosaʻi i le taimi lenei nai lo o le taimi faatoʻā e aʻoaʻoina ai e faatatau iā Ieova? O le tele lava e te faaalia ai le fua o le agaga o le Atua, o le atili foʻi lenā ona e mautinoa o loo finagalo malie Ieova iā te oe.—Tagaʻi i le pusa “ O le Fua o le Agaga o le . . .”

16. O ai e faaaogā e Ieova e talaʻia le tala lelei, ma o ā ni ou lagona e faatatau i lenā mea? (1 Tesalonia 2:4)

¹⁶ E faasafua atu e Ieova le tala lelei iā i latou e finagalo malie i ai. (Faitau le 1 Tesalonia 2:4.) Mātau aogā na maua e se tuafafine e igoa iā Jocelyn, ina ua ia faailoa atu i isi le tala lelei. I se tasi aso, na ia lagona ai le lotomafatia. Ua ia faapea mai, “Na leai soʻu malosi ma lagona le leai o soʻu aogā. Ae sa ou paeonia i lea taimi, ma o loʻu aso talaʻi foʻi lenā. O lea, na ou tatalo ai ma ou alu loa i le talaʻiga.” O le taeao lava lenā na feiloaʻi ai Jocelyn ma Mary, o se fafine agalelei na manaʻo e suʻesuʻe le Tusi Paia. I ni nai masina mulimuli ane ai, na faamatala e Mary a o ia tatalo atu i le Atua mo se fesoasoani, ae tuʻituʻi atu loa Jocelyn i le faitotoʻa o lona fale. O le ā na aʻoaʻoina e Jocelyn mai i lenā mea na tupu? Ua ia faapea mai, “E pei ua fetalai mai Ieova iā te aʻu, ʻUa malie loʻu loto iā te oe.’” O le mea moni, e lē o tagata uma e talilelei mai i la tatou galuega talaʻi. Ae e tatou te mautinoa e faafiafiaina le finagalo o Ieova, pe a tatou taumafai e  faia le mea sili e faailoa atu ai i isi le tala lelei.

17. O le ā e te aʻoaʻoina mai i le faamatalaga a Vicky e faatatau i le togiola? (Salamo 5:12)

¹⁷ E faatatau e Ieova le tāua o le togiola iā i latou e finagalo malie i ai. (1 Timo. 2:​5, 6) Ae e faapefea pe afai e tatou te lē talitonu e finagalo malie Ieova iā i tatou, e tusa po ua tatou papatiso ma faatuatua i le togiola? Ia manatua, e lē o taimi uma e tatou te faatuatuaina ai i tatou lava, ae e mafai ona tatou maufaatuatuaina Ieova. E silasila o ia iā i latou e faatuatua i le togiola o ni ē e amiotonu, ma ua ia folafola mai e na te faamanuiaina i latou. (Faitau le Salamo 5:12; Roma 3:26) Na aogā i se tuafafine e igoa iā Vicky le manatunatu loloto i le togiola. Ua ia faapea mai: “Na umi se taimi o onosaʻi Ieova iā te aʻu. . . . Ae na peiseaʻī o loo oʻu faapea atu iā Ieova: ʻE lē lava lou alofa iā te aʻu. E lē lava foʻi le taulaga a lou Alo ina ia faamagalo ai aʻu agasala.’” O le manatunatu loloto o Vicky i le meaalofa o le togiola, na ia lagona ai e alofagia o ia e Ieova. E tatou te lagona foʻi le alofagia o i tatou e Ieova ma maua lona finagalo malie, pe a tatou manatunatu loloto i le togiola.

18. O le ā e tatou te mautinoa i ai pe a faaauau ona tatou alolofa i lo tatou Tamā i le lagi?

¹⁸ Po o le ā lava lo tatou taumafai malosi e faatatau fautuaga na talanoaina i lenei mataupu, ae e iai lava taimi e tatou te lagona ai le lotovaivai ma tuufesili po o finagalo malie Ieova iā i tatou. Pe afai e tupu lenā mea, ia manatua e finagalo malie o ia iā i latou “e alolofa pea iā te Ia.” (Iako. 1:12) O lea, ia faaauau ona mafuta vavalalata iā Ieova, ma mātau auala o loo ia faailoa mai ai lona finagalo malie iā te oe. Aua lava neʻi galo, “e lē o mamao [Ieova] mai iā i tatou taʻitoʻatasi.”—Galu. 17:27.