1-2. O le ā e tatau ona faia e se tasi a o leʻi papatiso?

 A O FAAGASOLO le lima tausaga ua mavae, e silia i le tasi miliona tagata ua papatisoina e avea ma Molimau a Ieova. O le toʻatele o i latou e pei o le soo o Timoteo i le uluaʻi senituri, na aʻoaʻoina le upu moni ʻtalu mai lona laʻitiiti.’ (2 Timo. 3:​14, 15) O isi na aʻoaʻoina e faatatau iā Ieova ina ua matutua, ae o isi na faia faapea ina ua loa le soifua. I ni nai tausaga ua mavae, na suʻesuʻe ai se tinā matua ma Molimau a Ieova ma papatiso i le 97 o ona tausaga.

² Pe afai o oe o se tagata suʻesuʻe po o sē o loo tausia aʻe e ni mātua Molimau a Ieova, po o e mafaufau e papatiso? Manaia tele lenā sini. Ae a o e leʻi papatiso, e manaʻomia ona tuuina atu lou ola iā Ieova. O le a faamatalaina i lenei mataupu mea e aofia ai i le tuuina atu. O le a fesoasoani foʻi iā te oe e iloa ai, e leai se mea e taofia ai oe mai i le uia o lenā laasaga ma papatiso, pe afai ua e sauni e faia faapea.

O LE Ā LE UIGA O LE TUUINA ATU?

3. Aumai ni faaaʻoaʻoga faale-Tusi Paia o i latou na tuuina atu iā Ieova.

³ I le Tusi Paia, o le tuuina atu e faailogaina ai le tuuesea mo se fuafuaga faapitoa. Na tuuina atu le nuu o Isaraelu iā Ieova. Peitaʻi, na iai tagata taʻitoʻatasi o le nuu na tuuina atu iā Ieova i se auala faapitoa. O se faaaʻoaʻoga, na tuu e Arona i luma o lona pulou ʻie le pale auro iila o le ʻfaailoga paia o le  tuuina atu.’ O lenā pale auro iila na faailoa mai ai le tuuesea o ia mo se auaunaga faapitoa, o le avea ma ositaulaga sili o Isaraelu. (Levi. 8:9) Na tuuina atu foʻi le ʻau Naseri iā Ieova i se auala faapitoa. O le upu “Naseri,” e maua mai i le upu Eperu nazirʹ, o lona uiga “Lē ua Vavaeese” po o “Lē ua Tuuina Atu.” Sa iai poloaʻiga i le Tulafono a Mose sa tatau ona tausia e le ʻau Naseri.—Nu. 6:​2-8.

4. (a) O le ā le fuafuaga faapitoa e tuuina atu ai se tasi iā Ieova? (e) O le ā le uiga o le “faafitia” e le tagata o ia lava? (Tagaʻi foʻi i le ata.)

⁴ Pe a tuuina atu oe iā Ieova, ua e filifili ai e avea ma soo o Iesu Keriso, ma faamuamua i lou olaga le faia o le finagalo o le Atua. O ā mea e aofia ai i lou tuuina atu o se Kerisiano? Na fetalai Iesu: “A fia mulimuli mai se tasi iā te aʻu, ia faafitia e ia o ia lava.” (Mata. 16:24) I le avea ai o oe o se auauna tuuina atu a Ieova, e manaʻomia ona e teena so o se mea e feteenaʻi ma lona finagalo. (2 Kori. 5:​14, 15) E aofia ai le teena o “galuega a le tino” e pei o amioga lē mamā taufeusuaʻiga. (Kala. 5:​19-21; 1 Kori. 6:18) Pe e faigatā ona usitaʻia na poloaʻiga? E lē faigatā pe afai e te alofa iā Ieova, ma mautinoa o ana poloaʻiga e mo lou lava lelei. (Sala. 119:97; Isa. 48:​17, 18) Ua faapea mai se uso e igoa iā Nicholas: “E mafai ona e vaai i tapulaa a Ieova e pei o pā o se falepuipui e taofia ai oe mai i le faia o le mea e te manaʻo ai, po o se pā e puipuia ai oe mai i leona feʻai.”

5. (a) E faapefea ona tuuina atu lou ola iā Ieova? (e) O le ā le eseesega o le tuuina atu ma le papatisoga? (Tagaʻi foʻi i le ata.)

⁵ E faapefea ona tuuina atu lou ola iā Ieova? E te folafola atu iā te ia e ala i le tatalo, o le a e tapuaʻi atu tau lava o ia ma o le a faamuamua i lou olaga le faia o lona finagalo. O lona uiga, ua e folafola atu iā Ieova o le a faaauau ona e alofa iā te ia “ma lou lotoatoa, ma lou ola atoa, ma lou mafaufau  atoa, ma lou malosi atoa.” (Mare. 12:30) O lou tuuina atu, o se mea e faia i le vā o oe ma Ieova. Ae o le papatisoga o se mea e faia i le lautele, e faailoa atu ai i isi ua uma ona e tuuina atu iā Ieova. O lou tuuina atu o se tautoga faapitoa. E manaʻomia ona e tausia lenā tautoga, ma o le mea foʻi lenā e faatalitalia e Ieova e te faia.—Fai. 5:​4, 5.

AISEĀ E AO AI ONA TUUINA ATU LOU OLA IĀ IEOVA?

6. O le ā e uunaʻia ai se tasi e tuuina atu iā Ieova?

⁶ O le māfuaaga autū e tuuina atu ai oe iā Ieova, ona e te alofa iā te ia. O lou alofa mo Ieova e lē na o se faalogona. Nai lo o lea, e faalolotoina lou alofa mo Ieova, e ala i le aʻoaʻoina o le “poto saʻo” e faatatau iā te ia ma lona finagalo. (Kolo. 1:9) O lou suʻesuʻeina o le Tusi Paia e te mautinoa ai (1) o loo soifua Ieova, (2) o le Tusi Paia o lana Afioga faagaeeina, ma le (3) e na te faaaogā lana faalapotopotoga e faataunuuina lona finagalo.

7. O ā mea e ao ona tatou faia a o leʻi tuuina atu iā Ieova?

⁷ O i latou e tuuina atu iā Ieova, e ao ona latou iloa aʻoaʻoga faavae o loo i le Afioga a le Atua ma ola e ōgatusa ma tapulaa a le Atua. E latou te faia le mea sili e faailoa atu ai i isi mea ua latou aʻoaʻoina. (Mata. 28:​19, 20) Ua faamalosia lo latou alofa mo Ieova, ma e latou te naunau e tapuaʻi atu tau lava o ia. Po o ou faalogona foʻi na? Pe afai e te alofa iā Ieova ma lou lotoatoa, o le a e lē vaai ai i le tuuina atu ma le papatisoga o se mea e tau ina fai e faafiafia ai lou faiaʻoga po  o ou mātua, pe e faia foʻi ona ua papatiso au uō.

8. E faapefea ona fesoasoani le lotofaafetai e te faia ai se filifiliga e tuuina atu iā Ieova? (Salamo 116:​12-14)

⁸ O le a faigofie ona tuuina atu lou ola iā Ieova, pe a e manatunatu i mea uma ua ia faia mo oe. (Faitau le Salamo 116:​12-14.) Ua taʻua i le Tusi Paia Ieova o Lē e foaʻiina mai “meaalofa lelei uma ma mea uma e atoatoa ona lelei.” (Iako. 1:17) O le meaalofa silisili ua ia foaʻiina mai, o le taulaga togiola a lona Alo o Iesu. O le togiola ua mafai ai ona e maua se faiā vavalalata ma Ieova, ma ua e maua ai foʻi le avanoa e ola ai e faavavau. (1 Ioa. 4:​9, 10, 19) O le tuuina atu o lou ola iā Ieova, o se tasi lea o auala sili e faailoa atu ai lou lototalisapaia o le faailoaga silisili o lona alofa, faatasi ai ma isi faamanuiaga ua foaʻiina mai e Ieova iā te oe. (Teu. 16:17; 2 Kori. 5:15) O loo faamatilatila mai lenā manatu i le lesona 46, manatu 4, o le tusi Se Olaga Fiafia e Faavavau!, lea e aofia ai se vitiō e tolu minute le umi ua faamatuaina Ofo Atu a Tatou Meaalofa i le Atua.

PO UA E SAUNI E TUUINA ATU MA PAPATISO?

9. Aiseā e lē tatau ai ona faamalosia se tasi e faia se tuuina atu?

⁹ E te ono mafaufau e te leʻi sauni e tuuina atu ma papatiso. Pe atonu foʻi e manaʻomia ona faia pea ni suiga i lou olaga, ina ia e ola ai e ōgatusa ma tapulaa a Ieova, pe manaʻomia foʻi ona faamalosia atili lou faatuatua. (Kolo. 2:​6, 7) E lē o tagata suʻesuʻe uma e tutusa le vave e agaʻigaʻi ai i luma faaleagaga, ma e lē o talavou uma e tutusa le matutua e sauni ai e tuuina atu ma papatiso. Ia iloilo oe lava po o ā vala e manaʻomia ona faaleleia, ona fai lea o le mea e mafai ona e faia ae aua le faatusatusa i le isi tagata.—Kala. 6:​4, 5.

10. O le ā e mafai ona e faia pe a e manatu e te leʻi sauni e tuuina atu ma papatiso? (Tagaʻi foʻi i le pusa “ Mo Ē na Ola Aʻe i le Upu Moni.”)

¹⁰ E tusa pe e te manatu e te leʻi sauni e tuuina atu lou ola iā Ieova, ae ia avea pea lenā mea ma ou sini. Ia tatalo mo le faamanuia a Ieova i au taumafaiga e fai so o se suiga manaʻomia i lou olaga. (Fili. 2:13; 3:16) Ia e mautinoa, o le a faafofoga ma tali mai o ia i au tatalo.—1 Ioa. 5:14.

AISEĀ E FAATALATŪ AI NISI?

11. E faapefea ona fesoasoani mai Ieova ina ia tatou faamaoni pea iā te ia?

¹¹ E iai lava nisi e faatalatū e tuuina atu ma papatiso, e ui ua agavaa e faia faapea. Atonu e latou te popole neʻi o latou faia se agasala matuiā pe a uma ona papatiso ma faateʻaina ai. Pe afai o le mea lenā o loo e popole ai, ia e mautinoa, o le a foaʻiina mai e Ieova mea uma e te manaʻomia ina ia e ʻsavali ai e tusa ma lona finagalo, ma iʻu ina matuā faafiafiaina ai o ia.’ (Kolo. 1:10) O le a ia foaʻi mai foʻi le malosi e te faia ai le mea saʻo, e pei foʻi o le auala na ia fesoasoani ai i isi. (1 Kori. 10:13) O se tasi lenā o māfuaaga e lē toʻatele ai nisi e faateʻaina mai i le faapotopotoga Kerisiano. E fesoasoani Ieova i ona tagata ina ia tumau faamaoni.

12. E faapefea ona tatou ʻalofia le faia o se agasala matuiā?

¹² E faaosoosoina tagata lē lelei atoatoa uma e faia mea sesē. (Iako. 1:14) Peitaʻi e mafai ona e filifili po o le ā le mea e fai, pe a faaosoosoina oe. O le mea moni, o oe lava e pulea le auala e te ola ai. Ua faapea mai nisi e lē mafai ona tatou pulea o tatou faalogona ma mea e fai, ae e lē saʻo lenā manatu. E mafai lava ona tatou aʻoaʻoina le auala e pulea ai o tatou faanaunauga sesē. E tusa foʻi pe e faaosoosoina oe, e mafai lava ona e  ʻalofia le faia o le mea sesē. O lea, ia tatalo i aso uma. Ia tausisi i se faasologa lelei o au lava suʻesuʻega o le Tusi Paia. Ia auai i sauniga, ma faailoa atu i isi ou talitonuga. O le faia e lē aunoa o na vala, o le a e maua ai le malosi e ola ai e ōgatusa ma lau tautoga o le tuuina atu. Ia aua neʻi galo, o le a fesoasoani Ieova iā te oe e faia faapea.—Kala. 5:16.

13. O le ā le faaaʻoaʻoga lelei na faataatia e Iosefa mo i tatou?

¹³ O le a faigofie ona e ola e tusa ai ma lou tuuina atu, pe a e filifili le mea e fai a o leʻi tulaʻi mai se faaosoosoga. O loo taʻua i le Tusi Paia nisi o i latou na faia faapea, e ui o i latou foʻi o ni tagata lē lelei atoatoa. O se faataʻitaʻiga, e tele taimi na tauanau ai e le avā a Potifara Iosefa e la te momoe. Peitaʻi, e leʻi iai se taimi na tau mafaufau ai Iosefa i le mea e fai. O loo taʻua i le Tusi Paia, na ia “teena” faaosoosoga ma faapea atu: “Pe faapefea ona ou faia lenei mea leaga tele ma ou agasala ai i le Atua?” (Kene. 39:​8-10) E manino mai, na iloa lelei e Iosefa le auala e gaoioi ai a o leʻi taumafai le fafine e faaosoosoina o ia. O lenā mea na faigofie ai iā Iosefa ona faia le mea saʻo ina ua faaosoosoina o ia.

14. E faapefea ona tatou iloa le auala e tetee atu ai i faaosoosoga?

¹⁴ E faapefea ona tatou faaaʻoaʻo iā Iosefa pe a feagai ma faaosoosoga? E mafai ona e filifili i le taimi lenei le gaoioiga e fai pe a tulaʻi mai se faaosoosoga. Ia faamasani e vave ona teena mea e inosia e Ieova, ma teena le mafaufau i ai. (Sala. 97:10; 119:165) O lou faia faapea, o le a e lē lolo atu ai i faaosoosoga, auā ua e iloa le auala e tatau ona e tali atu ai.

15. E faapefea ona iloa o loo “matuā saʻili” se tasi iā Ieova? (Eperu 11:6)

¹⁵ Atonu ua e iloa o le upu moni lenei ma e te manaʻo e auauna iā Ieova ma lou lotoatoa, ae e iai lava se mea o loo taofia ai oe mai i le tuuina atu ma papatiso. E mafai ona e faaaʻoaʻo i le tupu o Tavita, e ala i le ōle atu iā Ieova: “Le Atua e, ia e saʻili mai iā te aʻu, ma silafia ai loʻu loto. Ia e suʻesuʻe mai iā te aʻu, ma silafia ai oʻu popolega. Ia e silasila mai po o iā te aʻu se ala e tigā ai, ma taʻitaʻi aʻu i le ala e tumau e faavavau.” (Sala. 139:​23, 24) E faamanuia e Ieova i latou e “matuā  saʻili iā te ia.” E iloa o loo e faia lenā mea, e ala i lou taumafai e ausia lou sini o le tuuina atu ma papatiso.—Faitau le Eperu 11:6.

IA MAFUTA VAVALALATA ATU PEA IĀ IEOVA

16-17. E faapefea ona tosina mai e Ieova i latou na ola aʻe i le upu moni? (Ioane 6:44)

¹⁶ Na fetalai Iesu, e tosina mai e Ieova ona soo. (Faitau le Ioane 6:44.) E ese le mataʻina o lenā manatu pe a mafaufau i lona faatatauga iā te oe. E silafia e Ieova se mea lelei i tagata taʻitoʻatasi e na te tosina mai iā te ia. E silasila o ia i tagata taʻitoʻatasi o se “nuu faapitoa,” po o se “oloa tāua.” (Teu. 7:6; fpl.) O le auala foʻi lenā e silasila ai Ieova iā te oe.

¹⁷ Ae atonu o oe o se talavou na ola aʻe i le upu moni, ma e te ono manatu e māfua ona e auauna iā Ieova ona o ou mātua. Peitaʻi ua faapea mai le Tusi Paia: “Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iako. 4:8; 1 No. 28:9) Pe a e tausolomua e mafuta vavalalata atu iā Ieova, ona ia tali mai lea e ala i le mafuta vavalalata mai iā te oe. E silasila Ieova iā i tatou taʻitoʻatasi ae e lē na o se vaega, auā e na te tosina mai tagata taʻitoʻatasi e aofia ai ma ē na ola aʻe i le upu moni. Pe a tausolomua se tasi e mafuta vavalalata atu iā Ieova, ona ia tali mai lea e pei ona taʻua i le Iakopo 4:8.—Faatusatusa i le 2 Tesalonia 2:13.

18. O le ā o le a talanoaina i le mataupu o loo sosoo mai? (Salamo 40:8)

¹⁸ Pe a tuuina atu oe iā Ieova ma papatiso, ua e faaatagia atu le uiga sa faaalia e Iesu. Na ia lotomalie e ofo atu o ia e faia so o se mea e finagalo i ai lona Tamā. (Faitau le Salamo 40:8; Epe. 10:7) I le mataupu o loo sosoo mai, o le a talanoaina ai ni vala e fesoasoani iā te oe e auauna ai pea ma le faamaoni iā Ieova pe a uma ona e papatiso.