TALU ai o loo tatou ola i lenei lalolagi e tumu i faafitauli, e tatau ona tatou tauivi malosi ina ia maua le filemu. Peitaʻi, e tusa foʻi pe e tatou te maua sina filemu, ae o le tele o taimi e tatou te tauivi pea ina ia tausia lenā filemu. O le ā ua taʻu mai i le Afioga a le Atua e fesoasoani iā i tatou ina ia maua ai le filemu e moni ma tumau? E faapefea ona tatou fesoasoani i isi ina ia o latou maua foʻi le filemu moni?

Ina ia maua le filemu moni, e tatau ona tatou lagona le saogalemu ma le toʻafilemu. E tāua foʻi ona tatou atiaʻe ni faauōga māfana ma isi. O le mea e sili ona tāua ina ia tumau ai ona iā i tatou le filemu, o le atiaʻe lea o se faiā lelei ma le Atua. E faapefea ona tatou faia lenā mea?

Pe a tatou usitaʻia faatonuga ma mataupu silisili amiotonu a Ieova, e faaalia atu ai e tatou te maufaatuatuaina o ia ma o loo tatou naunau ina ia maua se faiā lelei ma ia. (Iere. 17:7, 8; Iako. 2:22, 23) O le iʻuga, o le a mafuta vavalalata mai o ia iā i tatou ma faamanuiaina i tatou i le filemu moni. Ua taʻua i le Isaia 32:17: “O le a tupu le filemu mai i le galuega a le amiotonu moni, e tupu foʻi le toʻafilemu ma le saogalemu mai i le auaunaga a le amiotonu moni, e oo i le faavavau.” E mafai ona tatou maua le filemu moni e ala i le usiusitaʻi iā Ieova mai i o tatou loto.​—Isa. 48:18, 19.

O se isi fesoasoani ina ia faaauau ai ona tatou maua le filemu, o le agaga paia, o se meaalofa tāua lea mai i lo tatou Tamā i le lagi.​—Galu. 9:31.

Na lisi mai e le aposetolo o Paulo le filemu o le vala lona tolu lea o le “fua o le agaga.” (Kala. 5:22, 23) Talu ai o le filemu moni e maua mai i le agaga o le Atua, e tatau la ona tatou gauaʻi atu i le taʻitaʻiga a le agaga paia ina ia o tatou atiaʻe ai le filemu moni. Seʻi o tatou tilofaʻia ni  auala se lua e fesoasoani ai le agaga paia iā i tatou ina ia maua le filemu.

Muamua, o le faitauina e lē aunoa o le Afioga a le Atua e fesoasoani iā i tatou ina ia atiaʻe ai le filemu. (Sala. 1:2, 3) A o tatou manatunatu loloto i le feʻau mai i le Tusi Paia, e fesoasoani le agaga o le Atua ina ia o tatou malamalama ai i le silafaga a Ieova e faatatau i le tele o mataupu. O se faataʻitaʻiga, e tatou te iloa ai māfuaaga e tumau ai ona filemu Ieova, ma le pogai e tāua tele ai iā te ia le filemu. Pe a tatou faatatauina na lesona mai i le Afioga a le Atua, o le a sili atu ona filemu o tatou olaga.​—Faata. 3:1, 2.

Lua, e tatau ona tatou tatalo mo le agaga paia o le Atua. (Luka 11:13) Ua folafola mai e Ieova pe a tatou talosaga atu mo lana fesoasoani, “ona leoleoina ai lea o o [tatou] loto ma mafaufau i le filemu mai i le Atua, e silisili i mea uma lava e manatu i ai, e ala iā Keriso Iesu.” (Fili. 4:6, 7) Pe a tatou tatalo e lē aunoa ma talosaga atu mo le agaga o Ieova, o le a foaʻiina mai e lo tatou Atua le filemu o le mafaufau, lea e na o ē e iai sa latou faiā māfana ma ia e latou te mauaina.​—Roma 15:13.

Na faapefea ona faatatauina e nisi lenei fautuaga mai i le Tusi Paia, ma faia ni suiga manaʻomia lea na latou tofo ai i le filemu o le loto atoa foʻi ma le filemu i la latou faiā ma Ieova, faapea ma isi tagata?

O loo iai i le faapotopotoga Kerisiano nisi na “itaitagofie,” ae o lea ua sili atu ona manatu mamafa i isi, agalelei, onosaʻi, ma tausia le filemu i a latou feutagaʻiga ma isi. * (Faata. 29:22) Seʻi mātau faaaʻoaʻoga a ni tagata talaʻi se toʻalua o ē na mafai ona faatoʻilaloina lo la ita, ma atiaʻe le filemu ma isi.

O uiga lē lelei o David na aafia ai le auala na tautala ai. A o leʻi tuuina atu lona ola i le Atua, na tele ina faitio o ia i isi ma faaaogā upu masoā i totonu o lona aiga. Mulimuli ane, na iloa e David le tāua o le faia o se suiga ma avea o sē e tausia le filemu. Na faapefea ona ia faia faapea? Ua ia taʻua, “Na amata ona ou faatatauina mataupu silisili o le Tusi Paia. O le iʻuga, na atiaʻe ai le faaaloalo i lo matou va ma loʻu aiga.”

 O le siʻomaga na ola aʻe ai Rachel na aafia ai ona uiga. Ua ia taʻutino mai, “E oo lava i le taimi nei o loo oʻu tauivi pea ma lagona ita talu ai sa ou ola aʻe i se aiga e maitaita tagata.” O le ā na fesoasoani iā te ia ina ia avea ai ma sē e tausia le filemu? Ua faapea mai o ia, “O le faalagolago lea iā Ieova e ala i le tatalo.”

O David ma Rachel ua na o ni faaaʻoaʻoga se lua e iloa ai, o le a tatou maua le filemu pe a tatou faatatauina mataupu silisili o le Tusi Paia, ma tatalo atu i le Atua mo le fesoasoani a lona agaga. Ioe, e mafai lava ona tatou maua le filemu o le mafaufau lea e saosaolaumea i le nonofo filemu ma o tatou aiga faapea uso Kerisiano, e ui o loo tatou ola i lenei lalolagi fevaevaeaʻi. Peitaʻi, ua uunaʻia i tatou e Ieova ina ia “nonofo filemu ma tagata uma.” (Roma 12:18) Pe e mafai moni ona faia lenā mea? O ā ni aogā e maua mai i le taumafai e tausisia le filemu?

O lo tatou talaʻi atu e faatatau i le Malo o le Atua, ua tatou fesoasoani ai i tagata ina ia latou maua le filemu. (Isa. 9:6, 7; Mata. 24:14) O le tulaga e faafiafiaina ai ona o le toʻatele ua talilelei mai. O le iʻuga, e lē o toe lofitūina i latou i lagona mafatia po o le ita ona o mea o loo tutupu i lo latou siʻomaga. Nai lo o lea, ua latou maua se faamoemoe pupula i le lumanaʻi ma uunaʻia ai i latou ina ia “saʻili e maua le filemu ma tausisi i ai.”​—Sala. 34:14.

Peitaʻi, e lē o tagata uma e talilelei mai i la tatou feʻau i le taimi muamua. (Ioa. 3:19) E ui i lea, e fesoasoani le agaga o le Atua iā i tatou ina ia faailoa atu le tala lelei iā i latou i se auala filemu ma le faaaloalo. O le faia faapea ua tatou mulimuli ai i le faatonuga a Iesu i auala e faatino ai le galuega talaʻi, e pei ona taʻua i le Mataio 10:11-13. Na ia fautua mai e faapea: “A outou ulufale atu, ia faafeiloaʻi i le aiga. Afai ua tatau le feʻau i lea aiga, ia outou faapea atu ia filemu le aiga nei. Ae afai e lē tatau, ona toe faafoʻi mai lea o la outou upu.” Pe a tatou mulimuli i le fautuaga a Iesu, o le a tatou tuua ai le aiga ma le toʻafilemu ma le faamoemoe e fesoasoani i lenā tagata i se taimi o i luma.

E faia foʻi so tatou sao i le tausia o le filemu pe a tatou feutagaʻi ma tagata maualuluga o le malo i se auala faaaloalo, e aofia ai ma i latou e tetee mai i la tatou galuega. O se faataʻitaʻiga, ona o le faaituʻau o se malo i se tasi o atunuu i Aferika, na latou taofia ai le mauaina o le faatagaga e fausia ai Maota mo Sauniga. Ina ia foʻia lenei mataupu i se auala filemu, na tofia ai se uso sa auauna muamua o se misionare i lenā atunuu i Aferika, ina ia asiasi atu i le Komesina Sili o lenā atunuu i Lonetona i Egelani. Na tatau ona ia faailoa atu i le komesina le galuega filemu o loo faatinoina e Molimau a Ieova i Aferika. O le ā le iʻuga o lenā asiasiga?

Ua faapea mai le uso, “Ina ua ou taunuu i le ofisa, na ou iloa i laʻei o le teine tali telefoni, e sau o ia mai i le ituaiga lea e tautatala i le gagana lea na ou aʻoaʻoina. Na ou faafeiloaʻi atu iā te ia i lana gagana. Na faateʻia o ia ma fesili mai, ʻO le ā le māfuaaga o lou asiasi mai?’ Na ou tali atu ma le faaaloalo ou te fia talanoa i le Komesina Sili. Na telefoni le teine i le komesina ma na sau o ia i fafo e faafeiloaʻi aʻu, ma faatalofa mai i le gagana a le atunuu. E lē gata i lea, na faalogologo lelei o ia a o oʻu faamatala atu i ai galuega o loo faia ma le filemu e Molimau a Ieova.”

O le talanoa atu ma le faaaloalo o lenei uso, na aveesea ai manatu sesē ma le faaituʻau o le komesina e faatatau i la tatou galuega. Mulimuli ane, na aveesea e le malo i lenā atunuu i Aferika a latou faasāsāaga i le fausiaina o Maota mo Sauniga. Maʻeu le olioli o uso i lea iʻuga filemu! Ioe, o le feutagaʻi ma isi i se auala faaaloalo e maua ai le tele o aogā e aofia ai ma le filemu.

O loo olioli auauna a Ieova i se parataiso faaleagaga lea ua faatumulia i le filemu. E te saosaolaumea i lenā filemu pe afai e te galue e atiaʻe lenei vala o le fua o le agaga i lou olaga. Ae e sili atu ona tāua, o le a e mauaina ai le finagalo malie o Ieova ma le tele o le filemu e faavavau i le lalolagi fou a le Atua.​—2 Pete. 3:13, 14.