1. O le ā na taʻua e Iesu e faatatau i ʻoa i le lagi?

E LĒ o ʻoa uma e mafai ona vaaia. O le mea moni, o ʻoa e sili ona tāua e lē vaaia. I le Lauga a Iesu i le Mauga na ia taʻua ai e sili atu ʻoa i le lagi nai lo o meafaitino. Ona ia faapea atili mai lea: “O le mea e iai lo outou ʻoa, e iai foʻi ma o outou loto.” (Mata. 6:19-21) E uunaʻia i tatou e o tatou loto e saʻili mea e tatou te faatāuaina. E tatou te faaputuina “ʻoa i le lagi” e ala i le mauaina o se talaaga lelei ma le Atua. O na ʻoa e pei ona faamatalaina e Iesu, e lē mafai ona faaleagaina pe gaoia.

2. (a) E tusa ai ma le 2 Korinito 4:17, 18, o le ā ua uunaʻia i tatou e Paulo e taulaʻi i ai? (e) O le ā o le a tatou talanoaina i lenei mataupu?

² Ua uunaʻia i tatou e le aposetolo o Paulo ia “taulaʻi atu la tatou vaai i mea e lē vaaia.” (Faitau le 2 Korinito 4:17, 18.) O nei mea e lē vaaia o ʻoa e aofia ai faamanuiaga o le a tatou olioli ai i le lalolagi fou a le Atua. O le a tatou iloiloina i lenei suʻesuʻega ʻoa e lē vaaia se fā e mafai ona aogā iā i tatou i le taimi nei. O la tatou faauōga ma le Atua, le meaalofa o le tatalo, le fesoasoani a le agaga paia o le Atua, ma le lagolagosua a Ieova, Iesu ma le ʻauagelu i la tatou talaʻiga. O le a tatou talanoaina foʻi auala e faaalia ai lo tatou talisapaia o nei ʻoa e lē vaaia.

3. O le ā le ʻoa sili e lē vaaia, ma e faapefea ona tatou mauaina lenā ʻoa?

³ O le ʻoa sili e lē vaaia o le faauōga ma Ieova le Atua. (Sala. 25:14) E faapefea i le Atua ona faauō ma tagata agasala? E  mafai ona ia faia faapea ona o le taulaga togiola a Iesu lea ua “aveeseina [ai] le agasala a le lalolagi.” (Ioa. 1:29) Na silafia lelei e Ieova mai lava i le amataga, e lē iʻuvale lana fuafuaga i le saunia o se Faaola mo tagata. O le māfuaaga lea na mafai ai ona ia faauō i tagata na soifua a o leʻi maliu Keriso.​—Roma 3:25.

4. Aumai ni faaaʻoaʻoga o ni tane i aso anamua na avea ma uō a le Atua.

⁴ Seʻi mātau ni tane i aso anamua na avea ma uō a le Atua. O Aperaamo o se tane e malosi lona faatuatua. Ina ua mavae le silia ma le 1,000 tausaga talu ona maliu Aperaamo na taʻua e Ieova o ia o “laʻu uō.” (Isa. 41:8) O lea, e oo lava i le oti e lē mafai ona tuueseeseina Ieova mai i ana uō vavalalata. O loo manatua pea e Ieova Aperaamo. (Luka 20:37, 38) O se isi faaaʻoaʻoga o Iopu. A o faapotopoto agelu uma i le lagi, na fetalai atu ma le mautinoa Ieova e faatatau iā Iopu. Na taʻua o ia e Ieova “o le tagata e lē taʻuleagaina ma amio saʻo, e mataʻu i le Atua ma ʻaloʻalo ese i mea leaga.” (Iopu 1:6-8) O ā faalogona o Ieova iā Tanielu o lē na auauna ma le faamaoni i le Atua i le pe ā ma le 80 tausaga i se atunuu faapaupau? E faatolu taimi na faamautinoa atu ai e agelu i lenei tane matua, “ua faapelepeleina” o ia e le Atua. (Tani. 9:23; 10:11, 19) E tatou te mautinoa foʻi, o loo faatalitali Ieova i le aso o le a ia toe faatūina mai ai ana uō pele ua maliliu.​—Iopu 14:15.

5. O ā mea e manaʻomia ona tatou uia ina ia olioli ai i se faauōga vavalalata ma Ieova?

⁵ E toʻafia tagata lē lelei atoatoa i aso nei o loo olioli i se faauōga vavalalata ma Ieova? E faitau miliona. E tatou te iloa lenei mea ona ua faamaonia i gaoioiga a le toʻatele o tane, fafine ma tamaiti i le lalolagi aoao, e latou te mananaʻo e avea ma uō a le Atua. “E mafuta vavalalata atu [Ieova] i ē ua amio saʻo.” (Faata. 3:32) Ua mafai ona maua lenei faauōga ona o lo latou faatuatua i le taulaga togiola a Iesu. O lenā taulaga togiola ua mafai ai ona tuuina atu i tatou iā Ieova ma papatisoina. Pe a uia nei laasaga tāua, ua tatou faatasi atu la i le faitau miliona o Kerisiano ua tuuina atu ma papatisoina o loo olioli i se faauōga vavalalata ma Lē e silisili ese i le aoao o mea.

6. E faapefea ona tatou faaalia le talisapaia o la tatou faauōga ma le Atua?

⁶ E faapefea ona faaalia atu o loo tatou faatāua la tatou faauōga ma le Atua? I le pei o Aperaamo ma Iopu o ē na tutumau ma le faamaoni i le Atua mo le tele o tausaga, e tatau foʻi ona tatou tutumau ma le faamaoni e tusa lava po o le ā le umi talu ona tatou auauna iā Ieova i lenei faiga tuai o mea. I le pei o Tanielu, e tatau ona tatou faatāua la tatou faauōga ma le Atua nai lo o tatou ola. (Tani. 6:7, 10, 16, 22) E ala i le fesoasoani a Ieova, ua mafai ai ona tatou onosaia so o se faigatā ina ia tumau pea ona avea i tatou ma ana uō.​—Fili. 4:13.

7. (a) E tusa ai ma le Faataoto 15:8, o ā faalogona o Ieova i a tatou tatalo? (e) E faapefea ona tali mai Ieova i a tatou tatalo?

⁷ O le isi ʻoa e lē vaaia o le tatalo. O uō vavalalata e fiafia e talatalanoa i o latou manatu ma faalogona. Pe e moni lenā manatu i la tatou faauōga ma Ieova? Ioe. E fetalai mai Ieova iā i tatou e ala mai i lana Afioga lea o loo faaalia mai ai ona manatu ma faalogona. E tatou te talanoa atu iā te ia i le tatalo, ma e tatou te taʻu atu iā te ia o tatou manatu ma faalogona moni. O lea, e fiafia Ieova e faafofoga i a tatou tatalo. (Faitau le Faataoto 15:8.) Talu ai o Ieova o se Uō alofa, e lē gata la e faafofoga i a tatou tatalo ae e tali mai foʻi.  O nisi taimi e vave ona tali mai, ae o isi taimi e ono manaʻomia ona tatou tatalo pea i se mataupu. E ui i lea, e tatou te mautinoa o le a tali mai i le taimi tonu ma i le auala sili. E ono tali mai le Atua i se auala e tatou te leʻi faatalitalia. O se faaaʻoaʻoga, nai lo o le aveese o se faigatā, e ono foaʻi mai e ia le atamai ma le malosi e tatou te “tumau ai.”​—1 Kori. 10:13.

8. E faapefea ona tatou faaalia le talisapaia mo le meaalofa o le tatalo?

⁸ E faapefea ona tatou faaalia le talisapaia mo le meaalofa tāua o le tatalo? O se tasi o auala o le utagia lea o le fautuaga a Ieova ia “tatalo e lē aunoa.” (1 Tesa. 5:17) E lē faamalosia e Ieova i tatou e tatalo. Nai lo o lea, e na te amanaʻia la tatou filifiliga saʻoloto ma ua ia faalaeiauina i tatou ia “finafinau i le tatalo.” (Roma 12:12) O lea, e mafai ona tatou faaalia le lototalisapaia e ala i le tatalo e lē aunoa i aso taʻitasi. E lē tatau foʻi ona galo iā i tatou ona faafetai ma viia Ieova i a tatou tatalo.​—Sala. 145:2, 3.

9. O ā faalogona o se uso e faatatau i le tatalo, ma o ā ou faalogona e faatatau i le tatalo?

⁹ O le umi e tatou te auauna ai iā Ieova ma mātauina le auala e tali mai ai i a tatou tatalo, o le loloto foʻi lenā o lo tatou talisapaia o le tatalo. O se faaaʻoaʻoga o Chris, o se uso ua 47 tausaga talu ona iai i le auaunaga faataimi atoa. Na ia faapea mai, “Ou te fiafia tele e tatalo iā Ieova pe a ou ala ifo i taeaopō o aso taʻitasi. E faafouina aʻu a o talanoa atu iā Ieova ma vaai atu i le matagofie o mea uma ma le oso aʻe o le lā. O lenei vaaiga, e uunaʻia ai aʻu e faafetai atu iā te ia i meaalofa uma e aofia ai le faaeaga o le tatalo. Pe a faaiʻu le aso i le tatalo, ou te lagona le fiafia tele ona o le a ou moe ma se lotofuatiaifo mamā.”

10. Aiseā e tatau ai ona tatou faatāuaina le agaga paia o le Atua?

¹⁰ O se tasi o meaalofa e lē vaaia e tatou te faatāuaina, o le agaga paia o le Atua. Na faalaeiauina i tatou e Iesu ia tatalo pea mo le agaga paia. (Luka 11:9, 13) E foaʻi mai e Ieova  iā i tatou le malosi po o le “mana lea e sili atu i le malosi o tagata” e ala i lona agaga. (2 Kori. 4:7; Galu. 1:8) O le fesoasoani foʻi a le agaga paia o le Atua, e mafai ai ona tatou tutumau i so o se faigatā.

11. O ā auala e mafai ona fesoasoani ai le agaga paia iā i tatou?

¹¹ E mafai ona fesoasoani le agaga paia iā i tatou e taulima ai o tatou tofiga i le auaunaga iā Ieova. E mafai e le agaga paia o le Atua ona faaleleia o tatou tomai ma taleni. E tatou te iloa foʻi o le fesoasoani a le agaga paia o le Atua, ua iʻu lelei ai a tatou taumafaiga ae e lē ona o i tatou lava.

12. E tusa ai ma le Salamo 139:23, 24, o le ā e tatou te tatalo atu ai mo le fesoasoani a le agaga paia?

¹² O se tasi o auala e faaalia ai e tāua iā i tatou le agaga paia o le Atua, o le tatalo lea iā Ieova e fesoasoani iā i tatou e iloa po o iai ni faalogona ma ni mafaufauga sesē i o tatou loto. (Faitau le Salamo 139:23, 24.) Pe a tatou talosaga atu faapena, e mafai e Ieova e ala mai i lona agaga paia, ona lapataʻia i tatou i ni mafaufauga ma faalogona sesē ua iai. Pe a lapataʻia la i tatou, e tatau ona tatou tatalo mo le agaga paia o le Atua e foaʻi mai iā i tatou le malosi e teena ai na mafaufauga ma faanaunauga. O le faia faapea, ua faailoa atu ai iā Ieova lo tatou maumauaʻi e teena so o se gaoioiga e taofia ai le fesoasoani a lona agaga paia iā i tatou.​—Efe. 4:30.

13. E faapefea ona faalolotoina lo tatou talisapaia mo le agaga paia?

¹³ E faalolotoina lo tatou talisapaia mo le agaga paia, e ala i le manatunatu i mea ua faataunuuina e le agaga paia i o tatou aso. A o leʻi afio aʻe Iesu i le lagi na ia fetalai atu i ona soo: “E maua e outou le mana, pe a oo ifo iā te outou le agaga paia, ona fai lea o outou ma molimau iā te aʻu i . . . tuluʻiga uma o le lalolagi.” (Galu. 1:8) O nei upu ua faataunuuina i se auala mataʻina. O le fesoasoani a le agaga paia, ua mafai ai ona avea tagata e silia ma le 8.6 miliona mai i so o se itu o le lalolagi, ma tagata tapuaʻi o Ieova. E tatou te olioli foʻi i se parataiso faaleagaga, ona o le fesoasoani  mai a le agaga paia o le Atua iā i tatou e atiaʻe uiga matagofie e pei o le alofa, olioli, filemu, faapalepale, agalelei, mataalofa, faatuatua, agamalu ma le amio pulea. O nei uiga e faia aʻe ai “le fua o le agaga.” (Kala. 5:22, 23) Maʻeu le tāua o lenei meaalofa o le agaga paia!

14. O ā fesoasoani lē vaaia e tatou te maua a o talaʻi atu?

¹⁴ Ua iā i tatou le ʻoa e lē vaaia o le “galulue faatasi” lea ma Ieova ma le vaega faalelagi o lana faalapotopotoga. (2 Kori. 6:1) E tatou te faia faapea i so o se taimi lava e tatou te talaʻi ai. Na faapea mai Paulo e faatatau iā te ia ma isi na latou galulue faatasi: “O i matou o le ʻaufaigaluega faatasi ma le Atua.” (1 Kori. 3:9) Pe a tatou auai i le talaʻiga, e avea foʻi i tatou ma ʻaufaigaluega faatasi ma Iesu. Seʻi toe tomānatu i le taimi na māeʻa ai ona avatu e Iesu lana faatonuga i ona soo “ia outou ō atu e fai tagata o nuu uma lava ma soo,” ona ia faapea atu lea: “Ou te faatasi ma outou.” (Mata. 28:19, 20) Ae e faapefea agelu? O se faamanuiaga le taʻitaʻia o i tatou e agelu, a o tatou folafola atu “le tala lelei . . . i ē o loo nonofo i le lalolagi.”​—Faaa. 14:6.

15. Ia faamatala se faaaʻoaʻoga e faaalia ai le tāua o le matafaioi a Ieova o loo faia i la tatou galuega talaʻi.

¹⁵ A o tatou lūlū le feʻau o le Malo, o nisi fatu e paʻuʻū i loto o ē faamaoni ma e fua mai. (Mata. 13:18, 23) O ai e māfua ai ona ola nei fatu ma fua mai? Na faamatala e Iesu e leai se tasi e mafai ona avea ma ona soo seʻi vaganā ua “tosina mai o ia e le Tamā.” (Ioa. 6:44) O loo i le Tusi Paia se faaaʻoaʻoga o lenei mea. Seʻi mafaufau i le mea na tupu ina ua molimau atu Paulo i se vaega o fafine i tua o le aai o Filipi. Seʻi mātau, o loo taʻua i le Tusi Paia, o se tasi o i latou nei o se fafine e igoa iā Litia: “Ua tatalaina e Ieova lona loto e talia mea ua fai atu ai Paulo.” (Galu. 16:13-15) I le pei o Litia, e faitau miliona isi ua tosina mai e Ieova.

16. O ai e tatau ona faamamaluina i iʻuga lelei e maua mai i le galuega talaʻi?

¹⁶ O ai e tatau ona faamamaluina pe a tatou maua ni iʻuga lelei mai i la tatou galuega talaʻi? Na tali e Paulo lenā fesili ina ua ia tusia upu nei e faatatau i le faapotopotoga i Korinito: “O aʻu na totō, o Apolo na faasūsū, a o le Atua na faatupuina; o lea, e lē o lē e totō, po o lē e faasūsū, a o le Atua o lē e na te faatupuina.” (1 Kori. 3:6, 7) I le pei o Paulo, e tatau ona tatou faamamaluina Ieova i iʻuga lelei e tatou te maua mai i le talaʻiga.

17. E faapefea ona tatou faaalia le talisapaia o le “galulue faatasi” ma le Atua, Keriso ma agelu?

¹⁷ E faapefea ona tatou faaalia le talisapaia o le faaeaga o le “galulue faatasi” ma le Atua, Keriso, ma agelu? E mafai ona tatou faia faapea e ala i le maelega i le saʻilia o avanoa e talaʻi atu ai le tala lelei i isi. E tele auala e faia ai faapea e pei o le molimau i le “lautele, ma mai i lea fale i lea fale.” (Galu. 20:20) O loo olioli foʻi le toʻatele e molimau lē fuafuaina. Pe a latou feiloaʻi ma se tagata ese, e latou te faafeiloaʻi o ia i se auala faaleuō ma taumafai e amata se talanoaga. Pe a tali lelei mai le tagata, e latou te faasoa atu loa i ai ma le faautauta le feʻau o le Malo.

18-19. (a) E faapefea ona tatou faasūsū fatu o le upu moni? (e) Ia faamatala se mea na tupu e faaalia ai le auala na fesoasoani ai Ieova i se tasi o tagata aʻoga.

¹⁸ Talu ai o i tatou o le “ʻaufaigaluega faatasi ma le Atua,” e lē gata e tatau ona tatou totō fatu o le upu moni ae ia faasūsū foʻi. Pe a faaalia e se tasi le fiafia, e tatou te mananaʻo e fai le mea sili e tatou te toe foʻi ai, pe fai foʻi se fuafuaga ma se tasi e alu e asi lenā tagata  ina ia taumafai e amata sana suʻesuʻega faale-Tusi Paia. A o sologa lelei le suʻesuʻega, e tatou te olioli pe a tatou vaai i le auala e galue ai Ieova i loto ma mafaufau o soo.

¹⁹ Seʻi mātau le faaaʻoaʻoga a se uso sa avea ma sē e faia fofō faataulāitu i Aferika i Saute. Na fiafia i mea na ia aʻoaʻoina mai i lana suʻesuʻega faale-Tusi Paia. Ae na faigatā iā te ia ona talia mea na ia faitau ai i le Afioga a le Atua e faatatau i fesootaʻiga ma tuaʻā ua maliliu. (Teu. 18:10-12) Na faasolosolo ona ia faataga le Atua e sui ona mafaufauga. Mulimuli ane, e leʻi toe avea o ia o sē e faia fofō faataulāitu e ui e na o le pau lea o lana galuega. Ua faapea mai lenei uso, o lē ua 60 ona tausaga: “Ou te matuā faafetai i Molimau a Ieova ona o le fesoasoani mai iā te aʻu i le tele o auala, e pei o le fesoasoani mai ia ou maua se galuega. Ae e sili atu i lea, ou te faafetai iā Ieova i le fesoasoani mai iā te aʻu e sui loʻu olaga, lea ua mafai ai nei ona ou talaʻi o se tasi o Molimau papatiso.”

20. O le ā ua e maumauaʻi e fai?

²⁰ Na tatou talanoaina i lenei mataupu ni ʻoa e lē vaaia se fā. O le ʻoa e sili i nei ʻoa, o le faaeaga lea o le avea o Ieova ma a tatou Uō vavalalata. Ua mafai e lenei mea ona tatou maua ai aogā mai i isi ʻoa e lē vaaia e pei o le faalatalata atu iā Ieova i le tatalo, tofo i le fesoasoani a lona agaga paia, ma maua le fesoasoani mai i le lagi i la tatou faiva. Tau ina ia tatou maumauaʻi e faalolotoina pea lo tatou talisapaia o nei ʻoa e lē vaaia. Ia aua foʻi neʻi muta le faafetaia pea o Ieova ona o ia o se Uō lelei.