1. O le ā le filifiliga tāua e tatau ona fai e tagata uma?

 E IAI se filifiliga tāua e tatau ona faia e tagata i aso nei. Po o le a latou filifili e lagolagoina Ieova le Atua o le Pule i le aoao o mea, po o le a latou lagolagoina Satani le Tiapolo, le fili o le Atua? E lē mafai ona faapea mai se tasi e leai se itu e na te lagolagoina. O le filifiliga e faia e tagata e faalagolago i ai lo latou mauaina ma le lē mauaina o le ola e faavavau. (Mata. 25:31-33, 46) I le taimi o le “puapuaga tele,” o le a faailogaina ai tagata o ni ē e faasaoina pe faaumatia.​—Faaa. 7:14; 14:9-11; Eseki. 9:4, 6.

2. (a) I le Eperu 10:35-39, o le ā ua faalaeiauina i tatou e fai? (e) E faapefea ona fesoasoani le tusi o Faaaliga iā i tatou?

² Faitau le Eperu 10:35-39. Pe afai ua e filifili e lagolagoina le pulega a Ieova, ua e faia la se filifiliga atamai. O lea, ua e naunau ai e fesoasoani i isi e faia le filifiliga saʻo. E mafai ona e faaaogāina faamatalaga o loo i le tusi o Faaaliga e fesoasoani ai iā i latou. O loo faailoa mai i lenā tusi mataʻina le mea o le a tupu iā i latou e tetee iā Ieova, ae o loo faamatilatila mai ai foʻi faamanuiaga e maua e i latou e lagolagoina ma le faamaoni lana pule. E tatau ona tatou iloiloina na upu moni tāua, e faamalosia ai lo tatou maumauaʻi e auauna pea iā Ieova. E lē gata i lea, e mafai ona tatou faaaogāina mea ua tatou aʻoaʻoina e fesoasoani ai i isi ina ia faia le filifiliga saʻo ma pipii i ai.

3. O le ā o le a iloiloina i lenei suʻesuʻega?

³ I lenei suʻesuʻega, o le a tatou iloiloina ai fesili nei: O le ā le taui e maua e i latou e lagolagoina le pulega a le Atua? O le ā o le a tupu iā i latou e filifili e lagolagoina le manufeʻai lanu mūmū sesega o loo taʻua i le tusi o Faaaliga?

4. O le ā le vaega o loo tutū faatasi ma Iesu i le lagi na vaaia e Ioane?

⁴ Na vaaia e le aposetolo o Ioane ni vaega se lua o loo lagolagoina le pulega a Ieova, ma ua latou maua faamanuiaga e faavavau. O le vaega muamua e 144,000 lona aofaʻi. (Faaa. 7:4) Ua avatu i latou mai i le lalolagi ina ia faia aʻe ai se pulega po o se malo ma Iesu i le lagi. Ua latou pule faatasi ma Iesu i le lalolagi. (Faaa. 5:9, 10; 14:3, 4) Ua vaaia e Ioane i latou o loo tutū faatasi ma Iesu i le Mauga o Siona i le lagi.​—Faaa. 14:1.

5. O le ā ua toeitiiti tupu i le vaega totoe o le 144,000?

⁵ Talu mai taimi o le ʻauaposetolo seʻia oo mai i aso nei, e faitau afe i latou ua filifilia e avea ma vaega o le 144,000. (Luka 12:32; Roma 8:17) Ae na faailoa atu iā Ioane e na o se vaega totoe po o se vaega toʻaitiiti o le 144,000 o le a ola i le lalolagi i aso e gata ai. O lenā “vaega totoe” o le a latou maua le faamaoniga a Ieova, pe a “faamaufaailogaina” mulimuli i latou a o leʻi amata le puapuaga tele. (Faaa. 7:2, 3; 12:17) I se taimi a o faagasolo le puapuaga tele, o le a aveina aʻe ai i le lagi le vaega totoe ina ia faatasi ma isi sui faamaoni o le 144,000 na maliliu, ae ua toe faatutūina aʻe i le lagi. O le a latou pule faatasi ma Iesu i le Malo o le Atua.​—Mata. 24:31; Faaa. 5:9, 10.

6-7. (a) O le ā le isi vaega na iloa atu e Ioane, ma o le ā ua tatou aʻoaʻoina e faatatau iā i latou? (e) Aiseā e tatau ai ona uaʻi atu le vaega totoe ma le “motu o tagata e toʻatele” i le Faaaliga mataupu e 7?

⁶ Ina ua uma ona vaaia e Ioane le vaega mo le lagi, ona ia vaaia lea o “se motu o tagata e toʻatele.” E lē mafaitaulia lenei vaega. (Faaa. 7:9, 10) O le ā ua tatou aʻoaʻoina e faatatau iā i latou? Ua faapea mai Ioane: “O i latou nei o ē ua sao mai i le puapuaga tele, ma ua tatā o latou ofu talaloa, ma faapaʻepaʻeina i le toto o le Tamaʻi Mamoe.” (Faaa. 7:14) Pe a māeʻa ona faasaoina le “motu o tagata e toʻatele” mai i le puapuaga tele, o le a latou ola ma olioli ai i faamanuiaga matagofie i le lalolagi.​—Sala. 37:9-11, 27-29; Faata. 2:21, 22; Faaa. 7:16, 17.

⁷ Pe e filifilia i tatou e ola i le lagi po o le lalolagi, po ua tatou mautinoa e tatou te iai i le vaaiga o loo faamatalaina i le Faaaliga mataupu e 7? E tatau ona tatou mautinoa i ai. Maʻeu se taimi mataʻina o le a olioli ai na vaega e lua o auauna a le Atua! O le a tatou matuā olioli ona o lo tatou filifili e lagolagoina le pulega a Ieova. O le ā le isi mea ua taʻua i le tusi o Faaaliga e faatatau i le puapuaga tele?​—Mata. 24:21.

8. O le ā le amataga o le puapuaga tele, ma o le ā o le a tupu i le toʻatele o tagata?

⁸ E pei ona taʻua i le suʻesuʻega ua teʻa, ua toeitiiti ona osofaʻia lea e malo faapolotiki o lenei lalolagi, Papelonia le Aai Tele po o lotu sesē uma. (Faaa. 17:16, 17) O lenā osofaʻiga o le faailoga lenā o le amataga o le puapuaga tele. Po o le a toʻatele ni tagata fou o le a lolofi mai i le tapuaʻiga iā Ieova i lenā taimi? Leai. O loo faailoa mai i le Faaaliga mataupu e 6, i lenā taimi o le a saʻili e i latou e lē auauna iā Ieova le puipuiga mai i malo faapolotiki ma faiga faapisinisi a lenei lalolagi, lea e pei o ni mauga. Talu ai e latou te lē lagolagoina le Malo o le Atua, e silasila la Ieova iā i latou o ona fili.​—Luka 11:23; Faaa. 6:15-17.

9. E faapefea ona tutū matilatila tagata o Ieova i le taimi o le puapuaga tele, ma o le ā le iʻuga?

⁹ O le mea moni, o le a tutū matilatila auauna a Ieova i lenā taimi faigatā o le puapuaga tele. E na o i latou lava tagata e auauna  iā Ieova le Atua, ma e latou te lē lagolagoina le “manufeʻai.” (Faaa. 13:14-17) O lo latou tumau faamaoni ua feita ai i latou e teena Ieova. O le iʻuga, o le a osofaʻia ai tagata o le Atua i le lalolagi uma e se tuufaatasiga o malo. Ua faamatalaina i le Tusi Paia lenei osofaʻiga, o le osofaʻiga a Koku o Makoku.​—Eseki. 38:14-16.

10. E pei ona faamatalaina i le Faaaliga 19:19-21, e faapefea ona tali atu Ieova i le osofaʻia o ona tagata?

¹⁰ O le ā le tali a Ieova i lenā osofaʻiga mataʻutia? Na ia fetalai: “O le a iloa ai loʻu ita tele i oʻu foliga.” (Eseki. 38:18, 21-23) O loo faamatalaina i le Faaaliga mataupu 19 le mea o le a sosoo ai. O le a auina mai e Ieova lona Alo e puipuia ona tagata, ma faaumatia o latou fili. O le a auai faatasi ma Iesu i lenā osofaʻiga “ʻautau o le lagi,” o agelu faamaoni ma le 144,000. (Faaa. 17:14; 19:11-15) O le ā le iʻuga o lenā taua? O le a faaumatia aʻiaʻi tagata ma faalapotopotoga uma e tetee iā Ieova!​—Faitau le Faaaliga 19:19-21.

11. O le ā le mea mataʻina o le a tupu ua avea ma taualuga mataʻina o le tusi o Faaaliga?

¹¹ Seʻi manatu i faalogona o tagata faamaoni uma i le lalolagi, ina ua faasaoina mai i latou i le faaumatiaga aʻiaʻi o fili o le Atua! Maʻeu se taimi fiafia o le a iai. E ui o le a iai se alaga tele o le olioli i le lagi ina ua faaumatia Papelonia le Aai Tele, ae o le a iai se isi mea o le a matuā faateleina ai le olioli. (Faaa. 19:1-3) O lenā mea o le “faaipoipoga a le Tamaʻi Mamoe,” ua avea ma taualuga mataʻina o le tusi o Faaaliga.​—Faaa. 19:6-9.

12. E tusa ai o le Faaaliga 21:1, 2, o le ā le taimi e fai ai le faaipoipoga a le Tamaʻi Mamoe?

¹² O le ā le taimi e fai ai le faaipoipoga a le Tamaʻi Mamoe? O le a iai le 144,000 i le lagi a o toeitiiti lava amata le taua o Amaketo. Peitaʻi, e lē o le taimi lenā e fai ai le faaipoipoga a le Tamaʻi Mamoe. (Faitau le Faaaliga 21:1, 2.) E fai le faaipoipoga a le Tamaʻi Mamoe pe a uma le taua o Amaketo, ma aveesea uma ai fili o le Atua.​—Sala. 45:3, 4, 13-17.

13. O le ā o le a tupu i le faaipoipoga a le Tamaʻi Mamoe?

¹³ O le ā le uiga moni o le faaipoipoga a le Tamaʻi Mamoe iā i latou o loo aofia ai? E pei lava ona tuufaatasia e se faaipoipoga se tane ma se fafine, o lea la o lenei faaipoipoga faafaatusa ua tuufaatasia ai le Tupu o Iesu Keriso ma lana “tamaʻitaʻi faaipoipo,” le 144,000. O lenā faaipoipoga faafaatusa, ua faailoa mai ai le amataga o le pulega o le malo fou i le lalolagi mo le 1,000 tausaga.​—Faaa. 20:6.

14-15. O le ā ua faatusaina ai e le Faaaliga mataupu 21 le 144,000? (Tagaʻi i le ata i le faavaa.)

¹⁴ I le Faaaliga mataupu 21 o loo faatusaina ai le 144,000 i se aai e matuā matagofie e taʻua o “Ierusalema Fou.” (Faaa. 21:2, 9) O loo faavaeina lenei aai i maa faavae e 12, o loo tusia ai i luga “igoa e sefulu ma le lua o aposetolo e toʻasefulu lua o le Tamaʻi Mamoe.” Aiseā ua naunau ai Ioane i lenei vaaiga? Auā na ia iloa atu lona igoa o loo tusia i se tasi o na maa, ma o se faaeaga mataʻina.​—Faaa. 21:10-14; Efe. 2:20.

¹⁵ E leai se aai e tutusa lona matagofie ma lenei aai faafaatusa. E fola i le auro māoʻi lona ala tele, e 12 ona faitotoʻa e teuteu i le penina, o ona aupā ma ona faavae e teuteu i maa tāua, ma e saʻo atoatoa le fuaina o lenā aai. (Faaa. 21:15-21) Ae e iai se mea e foliga mai e lē o iai. O le faamatalaga lenei a Ioane: “Ou te leʻi vaaia ai foʻi se malumalu, auā o Ieova le Atua o Lē e ona le malosi uma lava, o le malumalu lea, faapea foʻi ma le Tamaʻi  Mamoe. E lē manaʻomia ona susulu i le aai le lā po o le masina, auā ua faamalamalamaina i le mamalu o le Atua, ma o lona molī o le Tamaʻi Mamoe lea.” (Faaa. 21:22, 23) O le a fesootaʻi tuusaʻo atu iā Ieova i latou e faia aʻe ai le Ierusalema Fou. O lea la, e latou te lē toe manaʻomia ai se malumalu. (Faaa. 22:3, 4) E lē gata i lea, e taʻitaʻia e Iesu o lē ua tofia e avea ma ositaulaga sili i le lagi la latou auaunaga paia i le Atua. (Epe. 7:27) O māfuaaga na, ua faaata mai ai Ieova ma Iesu o le malumalu o lenā aai.

16. O le ā o le a tofo i ai tagata a o faagasolo le Pulega o le Malo o le Atua i le Afe Tausaga?

¹⁶ E matuā lagona e le ʻaufaauuina le fiafia pe a latou mafaufau i lenei aai. Ae e iai foʻi māfuaaga e naunau ai i lenā aai i latou e iai le faamoemoe e ola e faavavau i le lalolagi. A o faagasolo le Pulega o le Malo o le Atua i le Afe Tausaga, o le a anoanoaʻi faamanuiaga o le a aumaia e le Ierusalema Fou. Na vaaia e Ioane le tafe mai o nei faamanuiaga i le “vaitafe o le vai o le ola.” O itu uma e lua o le vaitafe o loo ola ai “laau o le ola,” o o latou lau e “faamālōlōina ai nuu.” (Faaa. 22:1, 2) O le a aogā i tagata uma e ola i lenā taimi na sauniuniga. O le a faasolosolo ona oo tagata usiusitaʻi uma i le tulaga lelei atoatoa. O le a lē toe iai se maʻi, tigā po o loimata o le faanoanoa.​—Faaa. 21:3-5.

17. I le Faaaliga 20:11-13, o ai o le a maua aogā mai i le Pulega a Iesu i le Afe Tausaga?

¹⁷ O ai o le a maua aogā mai i na sauniuniga matagofie? Muamua lava, o le motu o tagata e toʻatele o le a faasaoina mai iā Amaketo, faatasi ai ma ni fanau o le a latou fanauina i le lalolagi fou. Ae o loo folafola mai foʻi i le Faaaliga mataupu e 20, o le a toe faatutūina mai ē ua oti. (Faitau le Faaaliga 20:11-13.) O le a toe faatutūina mai i le lalolagi tagata faamaoni “amiotonu” ma ē “amiolētonu” ua maliliu, e leʻi maua se avanoa e aʻoaʻo ai e faatatau iā Ieova. (Galu. 24:15; Ioa. 5:28, 29) Po o lona uiga la, o le a toe faatutūina uma mai tagata ua maliliu i le lalolagi i le taimi o le Pulega a Iesu i le Afe Tausaga? Leai. E lē toe faatutūina mai ē amioleaga na teena le avanoa e auauna ai iā Ieova a o leʻi maliliu. Na latou maua lenā avanoa, ae na faamaonia i le auala na ola ai e latou te lē mananaʻo e ola i le lalolagi Parataiso.​—Mata. 25:46; 2 Tesa. 1:9; Faaa. 17:8; 20:15.

18. O le ā o le a tupu i le lalolagi pe a mavae le 1,000 tausaga?

¹⁸ I le faaiʻuga o le 1,000 tausaga o i latou uma o le a ola i le lalolagi, o le a avea ma tagata lelei atoatoa. E leai se tagata e toe aafia i le agasala na tuufaasolo mai iā Atamu. (Roma 5:12) O le a aveesea atoatoa aafiaga o le agasala a Atamu. I lenā auala, o ē o le a ola i le lalolagi o le a latou maua le “ola” o ni tagata lelei atoatoa i le faaiʻuga o le 1,000 tausaga.​—Faaa. 20:5.

19. Aiseā e manaʻomia ai se tofotofoga mulimuli?

¹⁹ Ua tatou iloa na teena e Iesu faaosoosoga a Satani ina ia lē faamaoni i le Atua. Na ia tumau faamaoni pea e ui i tofotofoga. Ae o le ā o le a faia e tagata lelei atoatoa uma pe a tofotofoina i latou e Satani? O le a tali e le tagata lava ia lenā fesili, pe a tatala Satani mai i le tō e lē gata i le faaiʻuga o le 1,000 tausaga. (Faaa. 20:7) O i latou o le a faamaonia lo latou faamaoni i le tofotofoga mulimuli, o le a latou maua le ola e faavavau ma olioli i le saʻolotoga moni. (Roma 8:21) O i latou e fouvale o le a faaumatia e faavavau faatasi ma le Tiapolo ma ana temoni.​—Faaa. 20:8-10.

20. O ā ni ou faalogona e faatatau i valoaga mataʻina o loo taʻua i le tusi o Faaaliga?

²⁰ O ā ni ou faalogona i lo tatou iloiloina o se aotelega puupuu o le tusi o Faaaliga? Pe e lē faaosofia ai ea lo tatou olioli i le iloa o loo tatou aofia ai i nei valoaga? Pe e lē uunaʻia ai ea oe e valaaulia isi ina ia faatasi ma i tatou i le tapuaʻiga moni i le Atua? (Faaa. 22:17) Ua faagaeetia o tatou mafaufau ma loto i nei mea mataʻina o le a tutupu i le lumanaʻi, ma ua tatou naunau ai e faaleo atu upu a le aposetolo o Ioane, na faapea mai: “Amene! Inā maliu mai ia le Alii e, Iesu.”​—Faaa. 22:20.