1-2. O le ā se tasi o māfuaaga e tatou te fia malamalama ai i le tusi o Faaaliga?

 PE NA e matamata i se tusi ata a se tasi o loo iai ni ata tuai? O le tele o tagata i na ata e te lē masani ai. Ae e iai se ata ua e pulatoʻa lava i ai. Aiseā? Talu ai o loo e iai i lenā ata. A o e faataupupula pea i le ata, na e tau mafaufau po o fea ma o anafea na puʻe ai. Na e taumafai foʻi e iloa po o ai i latou uma o loo i le ata. E matuā tāua tele iā te oe lenā ata.

² O ā māfuaaga e lua e tai pei ai le tusi o Faaaliga o lenā ata? Muamua, na tusia lenā tusi o le Tusi Paia mo i tatou. O loo faapea mai le uluaʻi fuaiupu o le tusi o Faaaliga: “O le faaaliga a Iesu Keriso na tuuina atu e le Atua iā te ia, ina ia faailoa mai i ana pologa o mea ua toeitiiti ona tutupu.” (Faaa. 1:1) O lea, o mea o loo tusia i lenei tusi e lē mo tagata lautele ae mo i tatou o auauna tuuina atu a le Atua. E lē tatau la ona faateʻia i tatou i le iloa e iai la tatou vaega fai i le faataunuuina o valoaga o loo i lenei tusi mataʻina. O lea la, o loo tatou “iai i lenā ata.”

3-4. E tusa ai ma le tusi o Faaaliga, o afea e faataunuuina ai valoaga o loo i ai, ma e faapefea ona aafia ai i tatou taʻitoʻatasi?

³ O le māfuaaga lona lua, o le taimi o le a faataunuuina ai nei valoaga. Na faailoa mai e le aposetolo matua o Ioane le  taimi e faataunuuina ai na valoaga ina ua faapea mai: “Ona ua faatumuina aʻu i le agaga, ua ou oo ai i le aso o le Alii.” (Faaa. 1:10) Ina ua tusia e Ioane na upu i le pe ā ma le 96 T.A., e leʻi taitai ona oo “i le aso o le Alii.” (Mata. 25:14, 19; Luka 19:12) E tusa ai ma le valoaga a le Tusi Paia, na amata lenā aso i le 1914 ina ua nofotupu Iesu i le lagi. Talu mai lenā tausaga na amata ai ona faataunuuina valoaga o loo i le tusi o Faaaliga, lea o loo aafia ai tagata o le Atua. Ioe, ua tatou ola nei “i le aso o le Alii”!

⁴ Talu ai o loo tatou ola i nei taimi mataʻina, e manaʻomia la ona tatou uaʻi atoatoa atu i le fautuaga alofa o loo taʻua i le Faaaliga 1:3: “E fiafia o lē e faitau leotele, ma i latou e faalogo i upu o lenei valoaga, ma tausi i mea o tusia ai; auā ua lata mai le taimi atofaina.” Ioe, e tatau ona tatou ʻfaitau leotele’ ina ia “faalogo i upu o lenei valoaga, ma tausi” i ai. O ā nisi o nei upu e tatau ona tatou tausia?

5. Ua faapefea ona faamatilatila mai e le tusi o Faaaliga le tāua o le faamautinoa e talia e Ieova la tatou tapuaʻiga?

⁵ Ua tatou iloa mai i le mataupu muamua o le tusi o Faaaliga, e silafia lelei e Iesu mea o loo tutupu i faapotopotoga a ona tagata. (Faaa. 1:12-16, 20; 2:1) O feʻau na auina atu e Iesu i faapotopotoga e fitu i Asia Itiiti, na atagia atu ai lona silafia lelei o i latou. Na iai i na feʻau ni taʻiala patino, ina ia fesoasoani i Kerisiano i le uluaʻi senituri e faamautinoa e talia e Ieova la latou tapuaʻiga, ma e faatatau foʻi na feʻau i tagata uma o le Atua i aso nei. O le ā le lesona mo i tatou? E silafia lelei e Iesu Keriso lo tatou taʻitaʻi o tatou tulaga faaleagaga. O loo ia taʻitaʻia ma puipuia i tatou, ma e leai se mea e lilo i lana silafaga. E na te silafia mea e manaʻomia ona tatou faia ina ia faaauau ai ona tatou maua le finagalo malie o Ieova. O ā taʻiala ua aumaia e Iesu e manaʻomia ona tatou tausia i aso nei?

6. (a) E tusa ai ma le Faaaliga 2:3, 4, o le ā le faafitauli na faailoa atu e Iesu i lana feʻau i le faapotopotoga i Efeso? (e) O le ā le lesona e tatou te aʻoaʻoina mai ai?

⁶ Faitau le Faaaliga 2:3, 4. E lē tatau ona mou atu lo tatou uluaʻi alofa mo Ieova. Na faailoa mai e le feʻau na avatu e Iesu i le faapotopotoga i Efeso lo latou tumau, ma na tapuaʻi pea iā Ieova e ui i luʻi eseese na latou fesagaʻia. E ui i lea, na mou atu lo latou uluaʻi alofa. E manaʻomia la ona toe faamalosia lenā alofa. Pe a lē faia faapea, e lē mafai ona talia e Ieova la latou tapuaʻiga. E faapena foʻi i aso nei, e manaʻomia ona sili atu mea e tatou te faia nai lo le tau ina tumau. E tatau ona saʻo le uunaʻiga e tatou te tumau ai. E lē gata e tāua i le Atua mea e tatou te faia, ae o le māfuaaga foʻi e tatou te faia ai. O lea la, e tāua i le Atua le uunaʻiga e tatou te faia ai mea, ona e na te faatalitalia la tatou tapuaʻiga e faavae aʻe i le alofa loloto ma le talisapaia mo ia.​—Faata. 16:2; Mare. 12:29, 30.

7. (a) I le Faaaliga 3:1-3, o le ā le faafitauli na silafia e Iesu i le faapotopotoga i Sarataisa? (e) O le ā e tatau ona tatou faia?

⁷ Faitau le Faaaliga 3:1-3. E tatau ona tatou mataala pea. E ese le faafitauli na fesagaʻia e le faapotopotoga i Sarataisa. E ui na latou maelega i le auaunaga i le Atua i le taimi ua teʻa, ae na iai le taimi na latou faapalapala ai. O lea, na fetalai atu ai Iesu ia “ala i luga.” O le ā le lapataʻiga mo i tatou? O le mea moni, e lē faagaloina e Ieova a tatou galuega. (Epe. 6:10) Ae e lē tatau ona tatou manatu e lē manaʻomia ona tatou auauna iā Ieova i le taimi lenei, ona sa tatou auauna iā te ia i le taimi ua teʻa. E ui atonu e lē o toe tele ni mea e mafai ona tatou faia, ae e manaʻomia ona tatou pisi  pea i le “galuega a le Alii,” ma mataala pea seʻia oo i le iʻuga.​—1 Kori. 15:58; Mata. 24:13; Mare. 13:33.

8. O le ā le lesona ua tatou aʻoaʻoina mai i le feʻau na auina atu i le faapotopotoga i Laotikaia o loo i le Faaaliga 3:15-17?

⁸ Faitau le Faaaliga 3:15-17. E tatau ona tatou maelega ma tapuaʻi ma le lotoatoa. E ese foʻi le faafitauli na fesagaʻia e le faapotopotoga i Laotikaia na faailoa atu e Iesu i lana feʻau. Na fetalai Iesu “ua e māfanafana e te lē vevela, e te lē maalili foʻi,” o lona uiga e leʻi maelega ma tapuaʻi ma le lotoatoa lenā faapotopotoga. O lo latou lē maelega i la latou tapuaʻiga, na fetalai atu ai Iesu ua latou i ai i se tulaga “malaia ma pagatia.” O lea, na manaʻomia ona latou faaalia le matuā maelega mo Ieova ma lana tapuaʻiga. (Faaa. 3:19) O le ā le lesona mo i tatou? Pe a mou atu lo tatou maelega, e tatau ona matuā toe faamalosia lo tatou talisapaia mo ʻoa faaleagaga ua iā i tatou. (Faaa. 3:18) E lē tatau ona tatou faatagaina le saʻilia o se olaga sologa lelei e tosina ese ai, ma lē faamuamua ai le tapuaʻiga iā Ieova.

9. O ā lamatiaga e tatau ona tatou ʻalofia e pei ona faailoa mai i feʻau a Iesu i Kerisiano i Perekamo ma Tuatira?

⁹ E tatau ona tatou teena aʻoaʻoga a ē ua liliuese mai le upu moni. Na aʻoaʻia e Iesu nisi i le faapotopotoga i Perekamo, ona na latou faatupuina fevaevaeaʻiga ma faaauiluma aʻoaʻoga a tagata. (Faaa. 2:14-16) Na ia faamālō atu i le faapotopotoga i Tuatira ona o lo latou teena o “mea loloto a Satani,” ma na ia faalaeiauina i latou ina ia “taofimau” i le upu moni. (Faaa. 2:24-26) Ae e iai Kerisiano na vaivai faaleagaga i na faapotopotoga na manaʻomia ona faaalia le salamō, ona na latou faatagaina aʻoaʻoga sesē e taaʻina ai o latou olaga. Ae e faapefea i tatou i aso nei? E tatau ona tatou teena so o se aʻoaʻoga sesē e tetee i le finagalo o Ieova. E “foliga mai e faamaoni i le Atua” ē ua liliuese mai i le upu moni, ae e “lē o ola e tusa ai” ma na mea. (2 Timo. 3:5) E faigofie ona tatou iloa ma teena aʻoaʻoga sesē, pe a tatou maelega i le suʻesuʻeina o le Afioga a le Atua.​—2 Timo. 3:14-17; Iuta 3, 4.

10. O le ā se isi lesona e tatou te aʻoaʻoina mai i le feʻau a Iesu i faapotopotoga i Perekamo ma Tuatira?

¹⁰ E lē tatau ona tatou faia, faataga pe talia amioga lē mamā uma. E iai se isi faafitauli na tupu i faapotopotoga i Perekamo ma Tuatira. Na taʻusala e Iesu nisi i na faapotopotoga ona e latou te leʻi teena amioga lē mamā. (Faaa. 2:14, 20) O le ā le lesona mo i tatou? E tusa lava  pe ua tele tausaga o tatou auauna iā Ieova ma o loo tatou olioli i le tele o faaeaga i le taimi lenei, ae e tatou te lē faatalitalia e na te talia so o se amioga lē mamā e tatou te faia. (1 Samu. 15:22; 1 Pete. 2:16) E tusa lava po o le ā le paʻū maulalo o tapulaa tauamio a le lalolagi, ae e faatalitalia i tatou e Ieova e tausisi i ana tapulaa maualuluga tauamio.​—Efe. 6:11-13.

11. O le ā ua tatou aʻoaʻoina mai i palakalafa ua mavae? (Tagaʻi i le pusa “ Lesona mo i Tatou i Aso Nei.”)

¹¹ O le ā ua tatou aʻoaʻoina mai i palakalafa ua mavae? Ua tatou aʻoaʻoina le tāua o le faamautinoa, e talia e Ieova la tatou tapuaʻiga. Pe afai o loo tatou faia se mea e lē talia ai e Ieova la tatou tapuaʻiga, e tatau ona tatou vave gaoioi e faasaʻo. (Faaa. 2:5, 16; 3:3, 16) Ae na faamatilatila mai e Iesu se isi mea i ana feʻau i na faapotopotoga. O le ā lenā mea?

12. O le ā e tatou te aʻoaʻoina mai i feʻau na tuuina atu e Iesu i faapotopotoga i Semurana ma Filatelefaia? (Faaaliga 2:10)

¹² Seʻi o tatou iloiloina feʻau na avatu e Iesu i faapotopotoga i Semurana ma Filatelefaia. Na ia fetalai atu i na Kerisiano, e lē tatau ona fefefe pe a sauāina i latou ona o le a tauia lo latou faamaoni. (Faitau le Faaaliga 2:10; 3:10) O le ā le lesona mo i tatou i aso nei? E tatau ona tatou faatalitalia o le a sauāina i tatou, ma ia lotomalilie e onosaia. (Mata. 24:9, 13; 2 Kori. 12:10) Aiseā e tāua ai lenei faamanatu?

13-14. O ā aafiaga o tagata o le Atua i mea na tutupu o loo i le Faaaliga e 12?

¹³ Ua faailoa mai e le tusi o Faaaliga, o le a sauāina tagata o le Atua i o tatou aso po o “le Aso o le Alii.” O loo taʻua i le Faaaliga e 12, le taua na tupu i le lagi ina ua faatoʻā māeʻa lava ona faavaeina le Malo o le Atua. Na tau Mikaele po o Iesu Keriso o lē ua faauuina e avea ma Tupu faatasi ma ana ʻau, faasaga iā Satani ma ana temoni. (Faaa. 12:7, 8) O le iʻuga na faatoʻilaloina ai na fili o le Atua, ma lafo mai i le lalolagi ma ua faateteleina ai mafatiaga o tagata. (Faaa. 12:9, 12) Ae ua faapefea ona aafia ai tagata o le Atua?

¹⁴ Ua taʻu mai i le tusi o Faaaliga le auala na tali atu ai Satani. Ua lē toe mafai ona alu Satani i le afioaga o le Atua i le lagi. O lea, ua taulaʻi atu ai lona ita tele i le vaega totoe o le ʻaufaauuina, o sui o le Malo o le Atua o loo i le lalolagi o loo “faia le galuega o le molimau atu e uiga iā Iesu.” (Faaa. 12:17; 2 Kori. 5:20; Efe. 6:19, 20) Ua faapefea ona faataunuuina lenei valoaga?

15. O ai o loo faaata mai ai “molimau e toʻalua” o loo taʻua i le Faaaliga e 11, ma o le ā na tupu iā i latou?

¹⁵ Na faamaʻite e Satani osofaʻiga i uso faauuina o ē na taʻimua i le talaʻia o le tala lelei  o le Malo. O na tane o loo faaata mai ai “molimau e toʻalua” na fasiotia o loo i le tusi o Faaaliga. * (Faaa. 11:3, 7-11) I le 1918, e toʻavalu ni uso taʻimua na faasala ona o ni tuuaʻiga sesē, ma o le iʻuga o le faamasinoga e faafalepuipui i latou mo se taimi umi. I le manatu o tagata, e foliga mai e pei ua “fasiotia” le galuega a le ʻaufaauuina.

16. O le ā le mea na tupu i le 1919 na faateʻia ai, ae o le ā o loo faia e Satani seʻia oo mai i le asō?

¹⁶ O loo taʻua foʻi i le valoaga i le Faaaliga e 11, o le a toetutū mai na “molimau e toʻalua” pe a mavae sina taimi. I le faataunuuga o lenā valoaga, na tupu ai se mea mataʻina i le tausaga na sosoo ai a o faafalepuipuiina i latou. I le amataga o le 1919, na faasaʻoloto ai na uso faauuina mai i le falepuipui ma mulimuli ane faalēaogāina o latou moliaga. Na vave lava ona toe amata e uso le galuega talaʻi o le Malo. Ae e leʻi taofia ai osofaʻiga a Satani i tagata o le Atua. Talu mai lenā taimi, na faapogaia ai e Satani sauāga e pei o se “vaitafe” i tagata uma o le Atua. (Faaa. 12:15) ʻO le mea lea e manaʻomia ai le tumau ma le faatuatua’ o i tatou uma.​—Faaa. 13:10.

17. O le ā le fesoasoani e leʻi faatalitalia na maua e tagata o Ieova, e ui ina taulaʻi atu osofaʻiga a Satani iā i latou?

¹⁷ I le Faaaliga e 12, o loo faamatalaina ai le foloina e “le laueleele” o sauāga e pei o se “vaitafe,” o se fesoasoani e leʻi faatalitalia na maua e tagata o le Atua. (Faaa. 12:16) O le mea tonu lava lenā na tupu. O nisi taimi e maua ai e tagata o le Atua le fesoasoani mai i nisi o vaega o le lalolagi a Satani, e pei o tulaga tau faafaamasinoga. E tele taimi ua manumalo ai auauna a Ieova i faamasinoga, ma ua mafai ai ona latou maua se saʻolotoga e talaʻi ai. O le ā le auala ua latou faaaogāina ai lenā saʻolotoga? Ua latou faaaogāina atoatoa so o se avanoa e faia ai le galuega na tuuina atu e Ieova iā i latou. (1 Kori. 16:9) O le ā e aofia ai i lenā galuega?

18. O le ā la tatou galuega autū i nei aso e gata ai?

¹⁸ Na valoia e Iesu o le a talaʻia e ona tagata le “tala lelei o le malo” o le Atua i le lalolagi aoao a o leʻi oo mai le iʻuga. (Mata. 24:14) Ua latou maua aogā mai le lagolagosua a se agelu po o ni agelu ua faamatalaina, “ua iā te ia le tala lelei e faavavau e folafola atu . . . i ē o loo nonofo i le lalolagi, ma nuu uma, ma ituaiga  uma, ma gagana uma, ma tagata uma.”​—Faaa. 14:6.

19. O le ā le isi feʻau e tatau ona talaʻia e i latou e alolofa iā Ieova?

¹⁹ E lē na o le tala lelei o le Malo le feʻau e talaʻia e tagata o le Atua. E ao foʻi ona latou lagolagosua i le galuega a agelu o loo faamatalaina i le Faaaliga mataupu e 8 i le 10. O loo faalauiloa e na agelu ni mala e oo iā i latou e teena le Malo o le Atua. O lea, ua faalauiloa ai e Molimau a Ieova le feʻau faafaamasinoga lea e faatusa atu i le “uatoʻa ma le afi.” O loo faamatalaina mai ai faamasinoga a le Atua i vaega eseese o le lalolagi amioleaga a Satani. (Faaa. 8:7, 13) E manaʻomia ona iloa e tagata ua lata mai le iʻuga o lenei lalolagi. O lea, e tatau ona latou vave faia ni suiga i o latou olaga, ina ia faasaoina ai i le aso o le toʻasā o Ieova. (Sefa. 2:2, 3) Ae e lē fiafia le toʻatele i lenā feʻau. E manaʻomia ona tatou lototetele ina ia faalauiloa atu. I le taimi o le puapuaga tele, o le a sili atu ona malosi le feʻau faafaamasinoga mulimuli e tatou te faalauiloaina ma o le a matuā feita ai tagata.​—Faaa. 16:21.

20. O le ā o le a tatou talanoaina i suʻesuʻega e lua o le a sosoo mai?

²⁰ E tatau ona tatou tausia “upu o lenei valoaga,” ona o loo aafia ai i tatou i le faataunuuina o mea na tatou faitau ai i le tusi o Faaaliga. (Faaa. 1:3) Ae e faapefea ona tatou onosaia ma le faamaoni sauāga, ma faaauau pea ona faia la tatou vaega i le talaʻia ma le lototele o nei feʻau? O le a faamalosia i tatou i ni mea se lua: muamua, e ala i mea o loo faailoa mai e le tusi o Faaaliga e faatatau i fili o le Atua, ma lona lua, e ala i faamanuiaga o le a tatou maua i le lumanaʻi pe a tumau faamaoni pea. O le a tatou talanoaina na mataupu i isi suʻesuʻega e lua o le a sosoo mai.