1. O le ā ua valaaulia e Ieova ona tagata tapuaʻi e fai? (Tagaʻi foʻi i le ata.)

 O AI e mafai ona tatou talosaga atu i ai mo le faamāfanafanaga ma le taʻitaʻiga? E manino le tali i lenā fesili. E mafai ona tatou talosaga atu iā Ieova le Atua, ma ua ia valaaulia i tatou e faia faapea. E finagalo Ieova e tatou te “tatalo [atu] e lē aunoa” iā te ia. (1 Tesa. 5:17) Ia saʻoloto la tatou talanoa atu iā te ia i le tatalo, ma saʻili lana taʻitaʻiga mo vala uma o o tatou olaga. (Faata. 3:5, 6) Talu ai o Ieova o le Atua e agalelei, ua ia valaaulia ai i tatou e tatalo atu iā te ia i le tele e tatou te mananaʻo ai.

2. O le ā o le a iloiloina i lenei mataupu?

² E tautele iā i tatou le meaalofa o le tatalo. Peitaʻi, ona o le tele o mea e fai, e ono faigatā iā i tatou ona maua se taimi e tatalo ai. E tatou te ono lagona foʻi e manaʻomia ona faaleleia le auala e tatalo ai. Ae e tatou te lotofaafetai ona e tatou te maua le tele o faalaeiauga ma taʻiala mai i le Tusi Paia. O le a talanoaina i lenei mataupu, pe faapefea ona tatou faaaʻoaʻo iā Iesu i le auala e sema ai se taimi e tatalo ai. O le a talanoaina foʻi le auala e faaleleia ai a tatou tatalo, e ala i le faaaofia ai o ni mataupu tāua se lima.

3. O le ā na malamalama i ai Iesu e faatatau i le tatalo?

³ Na malamalama Iesu e matuā tāua iā Ieova a tatou tatalo.  A o leʻi afio mai o ia i le lalolagi, na ia molimauina le auala na tali mai ai lona Tamā i tatalo a tane ma fafine faamaoni. O se faataʻitaʻiga, a o faatasi Iesu ma lona Tamā, na tali mai lona Tamā i tatalo mai i le loto a Hana, Tavita, ma Elia, ma isi auauna faamaoni. (1 Samu. 1:10, 11, 20; 1 Tu. 19:4-6; Sala. 32:5) O le māfuaaga lenā na aʻoaʻoina ai e Iesu ona soo ina ia tatalo e lē aunoa ma se uiga mautinoa.​—Mata. 7:7-11.

4. O le ā e tatou te aʻoaʻoina mai i tatalo a Iesu?

⁴ O tatalo a Iesu iā Ieova, na ia faataatia ai se faaaʻoaʻoga e mulimuli i ai ona soo. A o faagasolo lana faiva, na ia tatalo e lē aunoa. E ui i lona pisi ma le toʻatele o tagata e ō atu pea iā te ia, ae na ia sema se taimi e tatalo ai. (Mare. 6:31, 45, 46) E ala o ia i le taeaopō ina ia maua se taimi e tatalo ai na o ia. (Mare. 1:35) I se tasi taimi, na ia tatalo ai i le pō atoa a o leʻi faia se filifiliga tāua. (Luka 6:12, 13) I le pō a o lumanaʻi le maliu o Iesu, na tatalo faatolu ai o ia, ma taulaʻi atu pea i le faamāeʻaina o le vala pito sili ona faigatā o lana faiva i le lalolagi.​—Mata. 26:39, 42, 44.

5. E faapefea ona tatou faaaʻoaʻo iā Iesu pe a tatalo?

⁵ Ua tatou aʻoaʻoina mai i le faaaʻoaʻoga a Iesu, po o le ā lava lo tatou pisi ae e manaʻomia ona sema se taimi e tatalo ai. I le pei o Iesu, atonu e manaʻomia ona faatulaga se taimi e tatalo ai, e pei o le vave ala i le taeao po o le tatalo i se taimi o le afiafi. O le faia faapea, ua faailoa atu ai iā Ieova lo tatou lotofaafetai mo lenei meaalofa tautele. Na manatua e se tuafafine e igoa iā Lynne lona lotofaafetai ina ua ia aʻoaʻoina e faatatau i le faaeaga o le tatalo. Na ia faapea mai, “Ina ua ou iloa e mafai ona ou talanoa atu iā Ieova i so o se taimi, na fesoasoani lenā iā te aʻu e vaai ai iā te ia o saʻu Uō pele ma ou manaʻo ai e faaleleia atili aʻu tatalo.” E mautinoa o o tatou lagona foʻi na. O lea, seʻi o tatou iloiloina ni mataupu tāua se lima e mafai ona faaaofia i a tatou tatalo.

6. E tusa ai ma le Faaaliga 4:10, 11, o ā mea ua alagatatau ona avatu iā Ieova?

⁶ Vivii iā Ieova. Na vaaia e le aposetolo o Ioane i se vaaiga mataʻina ni toeaina e toʻa 24 i le lagi, o loo tapuaʻi atu iā Ieova. O loo latou vivii atu i le Atua ma faapea atu, ua alagatatau ona avatu iā te ia “le viiga, ma le  mamalu, ma le mana.” (Faitau le Faaaliga 4:10, 11.) E tele foʻi māfuaaga e viia ma faamamaluina ai e agelu faamaoni Ieova. O loo latou faatasi ma ia i le lagi, ma ua latou iloa lelei o ia. E latou te iloa ona uiga i mea e na te faia. A o latou mātauina galuega a Ieova, e uunaʻia ai i latou e vivii iā te ia.​—Iopu 38:4-7.

7. O ā mea e tatou te viia ai Ieova?

⁷ E tatou te mananaʻo foʻi e faaaofia i a tatou tatalo le viia o Ieova, lea e faailoa atu ai lo tatou alofa ma le talisapaia o ia. A o e faitau ma suʻesuʻeina le Tusi Paia, ia taumafai e mātau ni uiga o Ieova e sili ona e fiafia i ai. (Iopu 37:23; Roma 11:33) Ona faailoa atu lea iā te ia ou faalogona e faatatau i na uiga. E tatou te viia foʻi Ieova ona o lana fesoasoani iā i tatou, ma lo tatou ʻauaiga atoa faaleagaga. O loo faaauau pea ona ia tausia ma puipuia i tatou.​—1 Samu. 1:27; 2:1, 2.

8. O ā nisi o māfuaaga e tatou te faafetaia ai Ieova? (1 Tesalonia 5:18)

⁸ Faafetai iā Ieova. E tele māfuaaga e tatou te faafetaia ai Ieova i le tatalo. (Faitau le 1 Tesalonia 5:18.) E tatou te faafetai iā te ia mo mea lelei uma ua tatou maua, auā o meaalofa lelei uma e mai iā te ia. (Iako. 1:17) O se faataʻitaʻiga, e mafai ona faailoa atu lo tatou lototalisapaia mo le lalolagi matagofie ma mea ofoofogia ua ia faia. E mafai foʻi ona faailoa atu lo tatou lotofaafetai mo le ola, lo tatou aiga, a tatou uō, ma lo tatou faamoemoe. E tatou te faafetaia foʻi Ieova ona ua mafai ona tatou maua se faauōga māfana ma ia.

9. Aiseā e manaʻomia ai ona tatou atiaʻe le lotofaafetai mo Ieova?

⁹ Atonu e manaʻomia ona faia ni a tatou taumafaiga maumauaʻi, e manatunatu ai i māfuaaga e tatou te lotofaafetai ai iā Ieova. Ua tatou ola i se lalolagi ua leai se lotofaafetai. E masani ona taulaʻi tagata i mea e latou te mananaʻo ai, nai lo o le faaalia o le lotofaafetai mo mea ua latou maua. Pe a amata ona tatou aafia i lenā uiga, e pau lava mea o le a taulaʻi i ai a tatou tatalo o mea e tatou te mananaʻo ai. Ina ia ʻalofia lenā tulaga, e manaʻomia ona faaauau ona tatou atiaʻe ma faaalia pea le lotofaafetai, mo mea uma ua faia e Ieova mo i tatou.​—Luka 6:45.

10. Na faapefea ona fesoasoani le lotofaafetai i se tuafafine e tumau ai? (Tagaʻi foʻi i le ata.)

¹⁰ E fesoasoani iā i tatou le iai o se uiga lotofaafetai ina ia tumau ai i tulaga faigatā. Mātau le mea na tupu iā Kyung-sook o loo taʻua i Le Olomatamata o Ianuari 15, 2015. Na aafia ona māmā i le kanesa. Na ia taʻutino mai: ʻNa ou matuā lotovaivai lava ona o lenei maʻi. Na ou mafaufau ua leai soʻu faamoemoe, ma sa ou matuā fefe lava.’ O le ā na fesoasoani iā te ia e onosaʻi ai? Na ia faapea mai, a o leʻi moe i pō uma, e alu o ia i le falealuga o lona fale ma tatalo leotele ai mo ni mea se lima na ia lotofaafetai ai i lenā aso. O lenā mea ua ia lagona ai le māfanafana,  ma uunaʻia ai o ia e faailoa atu lona alofa iā Ieova. Ua ia iloa ai le auala e faamalosia ai e Ieova ana auauna faamaoni pe a latou feagai ma tofotofoga eseese, ma iloa ai e tele atu faamanuiaga i o tatou olaga nai lo o tofotofoga. I le pei o Kyung-sook, e tele māfuaaga e tatou te faafetai ai iā Ieova e tusa po o tatou feagai ma se tofotofoga. O le faailoa atu o lo tatou lotofaafetai iā te ia i le tatalo, e fesoasoani iā i tatou e tutumau ai ma maua ai le toʻafilemu.

11. Ina ua afio Iesu i le lagi, aiseā na manaʻomia ai e ona soo le lototele?

¹¹ Talosaga iā Ieova mo le lototele e talaʻi ai. A o leʻi afio Iesu i le lagi, na ia faamanatu atu i ona soo lo latou tofiga o le molimau atu e faatatau iā te ia “i Ierusalema, i Iutaia uma ma Samaria, ma tuluʻiga uma o le lalolagi.” (Galu. 1:8; Luka 24:46-48) I se taimi mulimuli ane, na puʻea ai e taʻitaʻi o Iutaia aposetolo o Peteru ma Ioane ma tuuina atu i luma o le Faamasinoga Sili a Iutaia, ma faatonuina nei tane faamaoni e aua le toe talaʻi ma faamataʻu i laʻua. (Galu. 4:18, 21) Na faapefea ona tali atu Peteru ma Ioane?

12. E tusa ai ma le Galuega 4:29, 31, o le ā na faia e le ʻausoo?

¹² Na tali atu Peteru ma Ioane i faamataʻuga a taʻitaʻi lotu Iutaia e faapea: “E pule outou pe e tonu i le silafaga a le Atua ona ma faalogo iā te outou nai lo o le Atua. A o i maʻua, e lē mafai ona ma lē taʻu atu mea ua ma vāai ma faalogo i ai.” (Galu. 4:19, 20) Ina ua faasaʻoloto Peteru ma Ioane, na tatalo leotetele ai le ʻausoo iā Ieova e faatatau i le faia o lona finagalo e faapea: “Ia tuuina mai i au pologa le malosi e tautatala atu ai pea i lau afioga ma le lototetele.” Na faafofogaina e Ieova a latou tatalo mai i le loto.​—Faitau le Galuega 4:29, 31.

13. O le ā e tatou te aʻoaʻoina mai i le faaaʻoaʻoga a Jin-hyuk?

¹³ E mafai ona tatou faaaʻoaʻo i le ʻausoo, e ala i le faaauau pea ona talaʻi e tusa pe e faatonuina i tatou e faigāmalo e taofi le talaʻiga. Ia mātau le faaaʻoaʻoga a Jin-hyuk, o se uso na faafalepuipui ona o le lē auai i le vaegaʻau. A o iai o ia i le falepuipui, na tofia ai o ia e vaavaaia nisi o pagota na loka taʻitoʻatasi i sela. Ae na matuā faasā ona ia talanoa atu iā i latou e faatatau i se isi mataupu e aofia ai ma le Tusi Paia. Na ia tatalo mo le lototele ma le faautauta e talaʻi atu ai i so o se avanoa. (Galu. 5:29) Na ia faapea mai: “Na tali mai Ieova i aʻu tatalo e ala i le foaʻi mai o le lototele ma le atamai, e amata ai ni talanoaga faale-Tusi Paia e taʻi lima minute le uumi i faitotoʻa o sela. Pe a oo i le pō, ou te tusia ni tusi e avatu i na pagota i le aso e sosoo ai.” E mafai foʻi ona tatou mautinoa o le a fesoasoani mai Ieova ina ia faia ma le māeʻaeʻa la tatou faiva. I le pei o Jin-hyuk, e mafai ona tatou tatalo mo le lototele ma le atamai.

14. O le ā e fesoasoani iā i tatou pe a feagai ma faafitauli? (Salamo 37:3, 5)

¹⁴ Talosaga iā Ieova mo le fesoasoani e feagai ai ma faafitauli. O le toʻatele o i tatou o loo feagai ma maʻi o le tino, o faafitauli tau faalogona, o le maliu o sē pele iā i tatou, o se faafitauli i le aiga, sauāga, po o nisi luʻi. Ae ua atili ona faigatā ona fesagaʻia na tulaga ona o faamaʻi pipisi ma taua. Ia sasaa atu lou loto iā Ieova. Ia taʻu atu iā te ia ou faafitauli e pei o loo e talanoa i sau uō māfana. Ia e mautinoa o le a “gaoioi [Ieova] mo oe.”​—Faitau le Salamo 37:3, 5.

15. E faapefea ona fesoasoani le tatalo iā i tatou ʻe tutumau ai i puapuaga’? Aumai se faataʻitaʻiga.

¹⁵ O le finafinau i le tatalo, o le a fesoasoani iā i tatou ʻe tutumau ai i puapuaga.’  (Roma 12:12) E silafia e Ieova faigatā o loo fesagaʻia e ona tagata tapuaʻi, ma ʻe faafofoga o ia i a latou alaga mo se fesoasoani.’ (Sala. 145:18, 19) Na iloa e Kristie o se paeonia e 29 tausaga le moni o lenā manatu. Na faafuaseʻi ona aafia o ia i ni faafitauli tau soifua mālōlōina, ma na matuā lotovaivai ai. Mulimuli ane na ia iloa ua aafia lona tinā i se maʻi tugā. Na faapea mai Kristie: “Na ou tatalo faatauanau iā Ieova e foaʻi mai le malosi e feagai ai ma faafitauli i aso taʻitasi. Na ou taumafai e pipii i se faasologa lelei faaleagaga, e ala i le auai i sauniga ma fai aʻu lava suʻesuʻega.” Na ia toe faapea mai: “Na fesoasoani le tatalo ou te onosaia ai taimi e sili ona faigatā. Na ou iloa e fesoasoani mai pea Ieova, ma o lenā manatu na matuā faamāfanafanaina ai aʻu. E ui e leʻi foʻia ai i le taimi lava lenā oʻu maʻi, ae na tali mai Ieova i aʻu tatalo e ala i le foaʻi mai o se lototoʻafilemu.” Aua lava neʻi galo iā i tatou “e silafia e Ieova le auala e laveaʻi ai tagata e faamaoni iā te ia mai i o latou puapuaga.”​—2 Pete. 2:9.

16. Aiseā e tatou te manaʻomia ai le fesoasoani a Ieova e tetee atu ai i faaosoosoga?

¹⁶ Talosaga iā Ieova mo le fesoasoani e teena ai faaosoosoga. Talu ai o i tatou o ni tagata lē lelei atoatoa, e tatou te tauivi pea ma le faaosoosoga e faia le mea sesē. O loo faia e Satani mea uma e na te mafaia e faafaigatā ai lenā tauiviga. O se tasi o auala ua ia taumafai ai e faaleagaina o tatou mafaufau, o faafiafiaga lē mamā. O na faafiafiaga e mafai ona faatumuina ai o tatou mafaufau i manatu lē mamā, ma tatou lē mamā ai i le silafaga a Ieova ma iʻu atu ai i lo tatou faia o se agasala matuiā.​—Mare. 7:21-23; Iako. 1:14, 15.

17. E faapefea ona tatou gaoioi e ōgatusa ma la tatou talosaga ia ʻalofia faaosoosoga? (Tagaʻi foʻi i le ata.)

¹⁷ E tatou te manaʻomia le fesoasoani a Ieova ina ia manumalo ai mai i le faia o le mea sesē. Na faaaofia e Iesu i le tatalo faaaʻoaʻo  le ōlega lenei: “Aua foʻi neʻi tuua i matou e lolo atu i faaosoosoga, ae ia laveaʻi iā i matou mai i lē o loo leaga.” (Mata. 6:13) E finagalo Ieova e fesoasoani iā i tatou, ae e tatau ona tatou talosaga atu mo lana fesoasoani. E tatau foʻi ona tatou gaoioi e ōgatusa ma a tatou tatalo. E mafai ona tatou uia ni laasaga aogā, ina ia ʻalofia ai le taaʻina o i tatou i mafaufauga sesē ma manatu taatele o le lalolagi a Satani. (Sala. 97:10) Ia faatumu o tatou mafaufau i manatu aogā, e ala i le faitau ma suʻesuʻe le Tusi Paia. O le a leoleoina foʻi o tatou mafaufau, e ala i le auai i sauniga ma faia se sao i le galuega talaʻi. Ua folafola mai foʻi e Ieova, e na te lē tuua i tatou i se faaosoosoga e sili atu nai lo o le mea e tatou te lavātia.​—1 Kori. 10:12, 13.

18. O le ā e manaʻomia ona tatou faia pe a tatou tatalo?

¹⁸ Ua sili atu ona manaʻomia ona tatou tatalo faatauanau i nei aso e sili ona faigatā, ina ia tatou tumau faamaoni ai iā Ieova. Ia sema se taimi i aso taʻitasi e tatalo atu ai mai i le loto. E finagalo Ieova e “sasaa atu iā te ia o [tatou] loto” e ala i le tatalo. (Sala. 62:8) Ia viia ma faafetaia Ieova mo mea uma ua ia faia. Ia talosaga atu mo lana fesoasoani ina ia e maua ai le lototele e talaʻi ai. Ia talosaga atu iā te ia mo le fesoasoani e te feagai ai ma so o se faafitauli, ma teena ai so o se faaosoosoga e te ono fesagaʻia. Aua e te faatagaina so o se mea po o so o se tasi e taofia oe mai i le tatalo atu e lē aunoa iā Ieova. E faapefea la ona tali mai Ieova i a tatou tatalo? O le a iloiloina lenā fesili tāua i le mataupu o loo sosoo mai.