1. O le ā le auala ua faamatalaina ai i le Tusi Paia le alofa moni?

 O LE “mumū [o le alofa] e pei o le mumū o le afi, o le afi mū saesae a Ioa. E lē mafai e vai e tele ona tineia le alofa, e lē mafai foʻi ona tafiesea e vaitafe.” b (Pese 8:6, 7) E matagofie le auala ua faamatalaina ai le alofa moni! Ua faamautinoa mai i lenā mau se upu moni tāua mo ulugalii faaipoipo: E mafai ona tumau le malosi o le alofa o le tasi mo le isi.

2. O le ā e tatau ona faia e se ulugalii ina ia aua neʻi maalili lo la alofa?

² Ina ia faatumauina pea le malosi o le alofa i le vā o se ulugalii, e manaʻomia ona la faia ni taumafaiga maumauaʻi. O se faataʻitaʻiga, ina ia mumū pea se afi e manaʻomia ona tuu pea i ai fafie. Ae pe a lē faia faapea, o le a iʻu ai ina pē. E faapena foʻi le alofa i le vā o le tane ma le avā, e mafai ona tumau pea pe afai e la te faamalosia lenā alofa. E iai taimi e lagona ai e se ulugalii ua tauau ina maalili lenā alofa, aemaise lava pe a lofitūina i laʻua i faigatā tau tamaoaiga, faalētonu le soifua mālōlōina, po o luʻi i le tausia aʻe o fanau. O lea, pe afai ua e faaipoipo, e faapefea ona e faaolaola pea “le afi mū saesae a Ioa” i lau faaipoipoga? O le a talanoaina i lenei mataupu auala e tolu e faamalosia ai pea la oulua faiā, ma faatumauina ai pea le fiafia i la oulua faaipoipoga. c

3. E faapefea i le iai o se faiā malosi ma Ieova ona fesoasoani i se ulugalii e faamalosia ai pea lo la alofa? (Failauga 4:12) (Tagaʻi foʻi i le ata.)

³ Ina ia faaolaola pea “le afi mū saesae a Ioa,” e tatau i le tane ma le avā ona galulue e faamalosia la outou faiā ma Ieova. E faapefea i lenā faiā ona fesoasoani i la laʻua faaipoipoga? Pe a faatāua e se ulugalii la latou faiā ma lo la Tamā i le lagi, e vave ona la gaoioi e faatatau ana fautuaga, lea e mafai ona la ʻalofia ma foʻia ai faafitauli e ono māfua ai ona maalili le alofa o le tasi i le isi. (Faitau le Failauga 4:12.) E taumafai malosi foʻi tagata faaleagaga e faaaʻoaʻo iā Ieova ma atiaʻe ona uiga e pei o le agalelei, onosaʻi, ma le lotofaamagalo. (Efe. 4:32–5:1) Pe a faaalia e se ulugalii na uiga, o le a faigofie ai ona faamalosia le alofa i lo laʻua vā. Ua faapea mai se tuafafine e igoa iā Lena, ua silia i le 25 tausaga talu ona faaipoipo: “E faigofie ona e alofa ma faaaloalo i se tagata faaleagaga.”

4. Aiseā na filifilia ai e Ieova Iosefa ma Maria e avea ma mātua o le Mesia na folafolaina?

⁴ Ia mātau se faaaʻoaʻoga faale-Tusi Paia. Ina ua filifili e Ieova se ulugalii e avea ma mātua o le Mesia na folafolaina, na Ia filifilia ai Iosefa ma Maria mai i le toʻatele na tupuga mai iā Tavita. Aiseā? Talu ai na iai se la faiā vavalalata ma Ieova, ma na Ia silafia o le a faavae le la faaipoipoga i le alofa iā te ia. Ulugalii faaipoipo, o le ā e mafai ona outou aʻoaʻoina mai iā Iosefa ma Maria?

5. O le ā e mafai ona aʻoaʻoina e tane mai iā Iosefa?

⁵ Na vave ona faatatau e Iosefa faatonuga mai iā Ieova, ma na avea ai o ia o se tane e sili ona lelei. E pe ā ma le tolu taimi na ia maua ai faatonuga mai i le Atua na aafia ai lona aiga. I na taimi taʻitasi, na vave ona ia usiusitaʻi e ui lava na manaʻomia ai ona faia ni suiga tetele. (Mata. 1:20, 24; 2:13-15, 19-21) O le usitaʻia e Iosefa o faatonuga a le Atua, na ia puipuia, lagolagoina, ma tausia ai Maria. E lē taumatea o gaoioiga a Iosefa na atili ai ona alofa ma faaaloalo Maria iā te ia! Tane, e mafai ona outou faaaʻoaʻo iā Iosefa, e ala i le saʻili i fautuaga mai i le Tusi Paia i le auala e tausia ai o outou aiga. d Pe a outou faatatauina na fautuaga e tusa lava pe e manaʻomia ai ona faia ni suiga, e faaalia atu ai e tou te alolofa i a outou avā ma e faamalosia ai a outou faaipoipoga. Ua faapea mai se tuafafine mai i Vanuatu, ua silia i le 20 tausaga talu ona faaipoipo: “Pe a saʻilia ma faatatauina e laʻu tane taʻiala a Ieova, e atili ai ona ou faaaloalo iā te ia. Ou te lagona le malupuipuia ma ou te maufaatuatuaina ana faaiʻuga.”

6. O le ā e mafai ona aʻoaʻoina e avā mai iā Maria?

⁶ Na iai se faiā vavalalata a Maria ma Ieova, ma e leʻi faalagolago lona faatuatua i mea na  faia e Iosefa. Na ia iloa lelei Tusitusiga Paia. e Na ia faaalu foʻi se taimi e manatunatu loloto ai i mea na ia aʻoaʻoina. (Luka 2:19, 51) E mautinoa o le malosi o le itu faaleagaga o Maria, na avea ai o ia o se avā e sili ona lelei. E toʻatele avā i aso nei o loo taumafai malosi e faaaʻoaʻo iā Maria. O se faataʻitaʻiga, ua faapea mai se tuafafine e igoa iā Emiko: “A o oʻu nofofua, na iai laʻu lava faasologa faaleagaga. Ae ina ua ou faaipoipo, na ou iloa ai ua faalagolago loʻu faatuatua i mea e faia e laʻu tane, ona e na te tatalo mo i maʻua ma taulamua i le faia o le ma tapuaʻiga a le aiga. Na ou aʻoaʻoina mai ai, ina ia faamalosia pea la ma faiā ma Ieova, e manaʻomia ona ou tauave laʻu ia lava avega. O lea ou te sema ai se taimi e na o aʻu ai ma loʻu Atua, e ala i le tatalo, faitau le Tusi Paia, ma manatunatu loloto i ona manatu.” (Kala. 6:5) Avā, a o faaauau ona faamalosia la outou faiā ma Ieova, o le a atili ai ona viia ma alofagia outou e a outou tane.​—Faata. 31:30.

7. O le ā e mafai ona aʻoaʻoina e ulugalii mai iā Iosefa ma Maria e faatatau i le tapuaʻi faatasi?

⁷ Na galulue faatasi foʻi Iosefa ma Maria e faamalosia pea le la faiā ma Ieova. Na la malamalama i le tāua o le tapuaʻi faatasi iā Ieova o se aiga. (Luka 2:22-24, 41; 4:16) Atonu o se luʻi le faia o lenā mea, aemaise lava ona ua toʻatele le la fanau. Peitaʻi, na mafai lava ona la faia faapea. Maʻeu se faaaʻoaʻoga matagofie mo ulugalii faaipoipo i aso nei! Pe afai e iai sa oulua fanau e pei o Iosefa ma Maria, atonu o se luʻi le auai i sauniga po o le faatulaga o se taimi mo tapuaʻiga a le aiga. Atonu o le a sili atu foʻi ona faigatā ona maua se taimi e suʻesuʻe pe tatalo faatasi ai o se ulugalii. Peitaʻi ia manatua, pe a oulua tapuaʻi faatasi iā Ieova, o le a atili ai ona oulua vavalalata iā te ia faapea le tasi i le isi. O lea, ia faamuamua i o oulua olaga le tapuaʻiga iā Ieova.

8. Pe afai e iai ni faafitauli i le faaipoipoga a se ulugalii, o le ā e mafai ona la faia ina ia maua ai le tele o aogā mai i le tapuaʻiga a le aiga?

⁸ Ae e faapefea pe afai e iai ni faafitauli i la oulua faaipoipoga? E ono foliga mai o le faia faatasi o le tapuaʻiga a le aiga, e lē o se mea e maua ai le fiafia. Pe afai o lea, ia amata i le talanoa i se mataupu puupuu ma e lua te fiafia uma ai. O lenā auala, o le a mafai ona faamalosia ai la oulua faiā ma le faanaunauga e faia faatasi mea faaleagaga o se ulugalii.

9. Aiseā e tatau ai i se tane ma se avā ona faaalu se taimi e faifaimea faatasi ai?

⁹ Ulugalii faaipoipo, e mafai foʻi ona faamalosia lo outou alofa e ala i le faaalu o se taimi e faifaimea faatasi ai. O le faia faapea, o le a fesoasoani iā te outou e malamalama ai i manatu ma faalogona o a outou paaga. (Kene. 2:24) Mātau le mea na iloa e Lilia ma Ruslan, ina ua uma ona la faaipoipo i le silia i le 15 tausaga ua mavae. Ua faapea mai Lilia: “Na ma iloa ane e leʻi tele se taimi na ma faifaimea faatasi ai e pei ona ma mafaufau ai. Na ma pisi i galuega totogi, feʻau i le fale, ma mulimuli ane le ma fanau. Na ma iloa ai pe afai e ma te lē faaavanoa se taimi mo i maʻua lava o se ulugalii, o le a iʻu ai ina faavaivaia le alofa o le tasi i le isi.”

10. E faapefea ona faatatauina e ulugalii le mataupu silisili o loo i le Efeso 5:15, 16?

¹⁰ O ā mea e mafai ona faia e se ulugalii ina ia faamautinoa ai e la te faaalu se taimi e faifaimea faatasi ai? Atonu e manaʻomia ona la faaavanoa pe faatulaga se taimi o le tasi mo le isi. (Faitau le Efeso 5:15, 16.) Ua faapea mai se uso e igoa iā Uzondu mai i Nigeria: “Pe a faatulaga aʻu mea e fai, ou te faaaofia ai se  taimi e ma te faifaimea faatasi ai ma laʻu avā, ma ou te faatāuaina lenā taimi.” (Fili. 1:10) Mātau le faamatalaga a Anastasia, o le avā a se ovasia o le matagaluega i Moldova, i le auala e na te faaaogā tatau ai lona taimi. Ua ia faapea mai: “Ou te taumafai e faamāeʻa uma le tele o aʻu mea e manaʻomia ona fai, a o pisi laʻu tane i ona tiute tauave. O le faia faapea, e ma te maua ai se taimi mulimuli ane e faifaimea faatasi ai.” Ae e faapefea pe a faigatā ona maua se taimi i a oulua faasologa e faia ai faapea?

11. O ā mea na faia faatasi e Akula ma Pisila?

¹¹ E mafai e ulugalii faaipoipo ona aʻoaʻoina se lesona mai iā Akula ma Pisila, o se ulugalii na alofagia e le toʻatele o Kerisiano i le uluaʻi senituri. (Roma 16:3, 4) E ui e lē tele ni faamatalaga o loo taʻua i le Tusi Paia e faatatau i le la faaipoipoga, ae o loo faailoa mai ai mea na la faia faatasi, e pei o le galulue, talaʻi, ma fesoasoani i isi. (Galu. 18:2, 3, 24-26) O le mea moni, o taimi uma e taʻua ai i le Tusi Paia Akula ma Pisila, e taʻua faatasi lava i laʻua.

12. O ā nisi o auala e mafai ona faifaimea faatasi ai se tane ma se avā? (Tagaʻi foʻi i le ata.)

¹² E faapefea ona faaaʻoaʻo ulugalii iā Akula ma Pisila? Seʻi mafaufau i le tele o mea e mafai ona oulua faia faatasi ma lau paaga. Pe e mafai ona oulua faia faatasi o se ulugalii nisi o nei mea, nai lo o le faia e le tagata lava ia? O se faataʻitaʻiga, na talaʻi faatasi Akula ma Pisila. Pe e masani ona oulua faia ni fuafuaga e galulue faatasi i le talaʻiga? Na galulue faatasi foʻi Akula ma Pisila i le faia o feʻau i le fale. Atonu e lē tutusa galuega totogi e lua te galulue ai, ae pe e mafai ona oulua galulue faatasi i le faia o feʻau i le fale? (Fai. 4:9) Pe a oulua pulupululima faatasi i le faia o se galuega, o le a pei ai oulua o se ʻau e galulue faatasi ma maua ai le avanoa e fetalanoaaʻi ai. Ua silia i le 50 tausaga talu ona faaipoipo Robert ma Linda. Ua faapea mai Robert: “O le mea moni, e lē tele se taimi e ma te tafafao faatasi ai. Ae pe a ou fufuluina ipu ae solo e laʻu avā, pe ou te vele vao ae alu atu ma fesoasoani iā te aʻu, ou te lagona ai le fiafia. O le ma galulue faatasi, e atili ai ona ma māfana ma faamalosia atili ai le alofa o le tasi i le isi.”

13. O le ā e tatau ona faia e se tane ma se avā ina ia māfana ai?

¹³ Peitaʻi ia manatua, e lē faapea a nonofo faatasi ona otometi ai lea ona māfana le tasi i le isi. Ua faapea mai se avā mai i Pasili: “I aso nei, ua tele mea e tosina ese ai, ma e ono faigofie ai ona manatu o loo faifaimea faatasi i le tele o taimi ona o loo nonofo faatasi. Na ou iloa ai e iai isi mea e manaʻomia ona fai, nai lo o le tau ina nonofo faatasi. E manaʻomia foʻi ona ou uaʻi atu i manaʻoga o laʻu paaga.” Mātau mea na faia e Bruno ma lana avā o Tays, ina ia uaʻi atu ai le tasi i le isi. Ua faapea mai Bruno: “Pe a ma faatasitasi i taimi e ma  te avanoa ai, e tuu ese ma telefoni ae ma talatalanoa fiafia.”

14. Pe afai e lē fiafia se ulugalii e faifaimea faatasi, o le ā e mafai ona la faia?

¹⁴ Ae e faapefea pe afai e lua te lē fiafia e faifaimea faatasi? Atonu e eseese mea e lua te fiafia i ai, pe atonu foʻi e faia e le tasi le mea e ita ai le isi. O le ā e mafai ona oulua faia? Seʻi toe mafaufau i le faataʻitaʻiga i le afi lea na taʻua i le amataga. E lē faapea e tutu loa vave ona mumū. E faasolosolo ona tuu i ai fafie seʻia oo ina malosi le mumū o le afi. I se tulaga talitutusa, aiseā e lē faataʻitaʻi ai ona faaalu sina taimi i aso taʻitasi e faifaimea faatasi ai? Ia faamautinoa e fai le mea e lua te fiafia uma ai, nai lo o se mea e vevesi ai. (Iako. 3:18) O le faia faapea, atonu o le a toe faamalosia ai le alofa o le tasi i le isi.

15. Aiseā e tāua ai le faaaloalo ina ia faamalosia ai pea le alofa i le faiā a se ulugalii?

¹⁵ E tāua le faaaloalo i se faaipoipoga. E tai pei o le okesene lea e mafai ona ola lelei ai se afi. Pe a leai se okesene, o le a vave ona pē le afi. I se tulaga talitutusa, pe a leai se faaaloalo i le faiā a se ulugalii, o le a vave ona maalili le alofa o le tasi i le isi. I le isi itu, pe a taumafai le tane ma le avā e faaalia e le tasi le faaaloalo i le isi, o loo la galulue faatasi e faamalosia pea lo la alofa. Peitaʻi, ia manatua, e lē tāua lou manatu po o e faaalia le faaaloalo pe leai, ae o le mea tāua ia lagona e lau paaga o loo e faaaloalo iā te ia. Ua silia i le 25 tausaga talu ona faaipoipo Penny ma Aret. Ua faapea mai Penny: “Talu ai e faaalia e le tasi le faaaloalo i le isi, ua iai se siʻomaga alofa i lo ma aiga. E ma te saʻoloto e faaali o ma manatu, ona e ma te iloa e faatāua e le tasi manatu o le isi.” O lea, o le ā e mafai ona e faia e fesoasoani ai i lau paaga ina ia lagona o loo e faaaloalo iā te ia? Seʻi iloilo faaaʻoaʻoga a Aperaamo ma Sara.

16. O le ā e mafai ona aʻoaʻoina e tane mai i le faaaʻoaʻoga a Aperaamo? (1 Peteru 3:7) (Tagaʻi foʻi i le ata.)

¹⁶ Na faaalia e Aperaamo le faaaloalo iā Sara. Na ia faatāua manatu o Sara ma manatu mamafa i ona faalogona. I se tasi taimi, na mafatia ai Sara ma faaleo atu lona lē fiafia iā Aperaamo ma tuuaʻia o ia. Pe na tali mai ma le ita Aperaamo? E leai. Na ia iloa o Sara o se avā e gauaʻi ma lagolagosua. Na faalogo Aperaamo iā te ia ma taumafai e foʻia le faafitauli. (Kene. 16:5, 6) O le ā e tatou te aʻoaʻoina mai ai? Tane, ua iā te outou le pule e faia ai filifiliga mo o outou aiga. (1 Kori. 11:3) Ae o se gaoioiga alofa le iloilo o manatu o le avā a o leʻi faia se filifiliga, aemaise lava se filifiliga e aafia ai o ia. (1 Kori. 13:4, 5) O nisi taimi e ono lagona ai e lau avā le popole ma atonu e manaʻo e faaleo atu ona faalogona. Pe e te manatu mamafa i ona faalogona e ala i le faalogologo lelei? (Faitau le 1 Peteru 3:7.) Ua  toetoe 30 tausaga talu ona faaipoipo Angela ma Dmitry. Ua faamatala mai e Angela le auala e faaalia ai e lana tane le faaaloalo iā te ia: “E masani ona faalogologo lelei mai Dmitry iā te aʻu pe a iai se mea ou te lē fiafia ai, pe ou te fia talanoa foʻi. E onosaʻi o ia iā te aʻu e oo lava i taimi e tigā ai oʻu faalogona.”

17. O le ā e mafai ona aʻoaʻoina e avā mai i le faaaʻoaʻoga a Sara? (1 Peteru 3:5, 6)

¹⁷ Na faaalia e Sara le faaaloalo iā Aperaamo, e ala i le lagolagoina o ana filifiliga. (Kene. 12:5) I se tasi aso, na filifili ai Aperaamo e faaalia le agaga talimālō i ni mālō na faafuaseʻi ona taunuu atu. Na ia talosaga atu iā Sara e tuu ana mea o loo fai, ae saunia se paluga telē o falaoamata e fai ai ni falaoa. (Kene. 18:6) Na vave ona gaoioi Sara ma fai le mea na talosaga atu ai Aperaamo. Avā, e mafai ona outou faaaʻoaʻo iā Sara e ala i le lagolagoina o filifiliga e faia e a outou tane. O le faia faapea, o le a faamalosia ai a outou faaipoipoga. (Faitau le 1 Peteru 3:5, 6.) Ua faamatala mai e Dmitry lea na taʻua muamua, le auala na faaalia ai e lana avā le faaaloalo iā te ia. Na ia faapea mai: “Ou te talisapaia taumafaiga a Angela e lagolagoina aʻu filifiliga, e tusa pe e lē ioe ai. Pe a lē iʻu lelei aʻu filifiliga, e na te lē faitioina aʻu.” E ese le faigofie ona alofa i se tasi e faaaloalo iā te oe!

18. O ā aogā e maua e ulugalii faaipoipo pe a la galulue faatasi e faamalosia pea lo laʻua alofa?

¹⁸ I aso nei, e manaʻo Satani e tineia le alofa o loo iai i faaipoipoga a ulugalii Kerisiano. E iloa e Satani pe a lē toe alofa le tasi i le isi, atonu o le a amata ona la tafetafea ese mai iā Ieova. Peitaʻi, e lē mafai ona tineia le alofa moni. O lea, tau ina ia pei le alofa o loo iai i a outou faaipoipoga, o le alofa o loo faamatalaina i le Pese a Solomona. Ia maumauaʻi e faamuamua Ieova i a outou faaipoipoga, faaavanoa le taimi e faifaimea faatasi ai, ma ia manatu mamafa i faalogona ma manaʻoga o le isi. O le faia faapea, o le a faamamaluina ai e a outou faaipoipoga Ieova le Puna o le alofa moni, ma e pei o se afi e mumū malosi, o le a tumau pea ona malosi le alofa o le tasi i le isi.