1, 2. O ā mea e tatou te aʻoaʻoina a o tatou tuputupu aʻe faaleagaga? Aumai se faataʻitaʻiga.

UA MAUA e se tamaitiiti se meaalofa ma ua faapea atu ona mātua e faafetai i lē na aumai ai le meaalofa. Ua usitaʻi le tamaitiiti ona o le faatonuga a ona mātua. Peitaʻi, a o tuputupu aʻe o ia, ua amata ona ia malamalama i le māfuaaga na aʻoaʻoina ai o ia e ona mātua e faafetai i ē e agalelei iā te ia. O lea, o taimi uma e na te faafetai ai i tagata, e sau mai i lona loto. Aiseā? Talu ai ua ia aʻoaʻoina le tāua o le lotofaafetai.

² I se tulaga talitutusa, ina ua faatoʻā tatou aʻoaʻoina le upu moni, na tatou iloa ai le tāua o le usiusitaʻi i poloaʻiga a Ieova. Ae a o tatou tuputupu aʻe pea faaleagaga, na tatou aʻoaʻoina ai e faatatau i manatu o Ieova, e aofia ai mea e finagalo malie i ai o ia, o mea e na te inosia, ma le auala e silasila ai o ia i mataupu eseese. O le iloaina o na manatu ma faataga e taaʻina ai a tatou gaoioiga ma filifiliga, e faaalia atu ai o loo faaōgatusa o tatou manatu ma manatu o Ieova.

3. Aiseā e avea ai o se luʻi le faaōgatusa o o tatou manatu ma manatu o Ieova?

³ O se mea fiafia pe a tatou aʻoaʻoina ina ia mafaufau e pei  o Ieova, ae e avea foʻi o se luʻi i isi taimi ona o i tatou o tagata e lē lelei atoatoa. O se faaaʻoaʻoga, atonu e faigatā ona tatou malamalama i le silafaga a Ieova i amioga mamā, manaʻo tele i meafaitino, le galuega talaʻi, le faaaogāsesē o le toto, po o se isi mea. O le ā e manaʻomia ona tatou faia? E faapefea ona faaōgatusa pea o tatou manatu ma manatu o le Atua? O le a faapefea ona aafia ai a tatou gaoioiga i le taimi lenei ma le lumanaʻi?

4. O ā mea e aofia ai i le fautuaga a Paulo, ia ʻsuia o outou mafaufau’?

⁴ Faitau le Roma 12:2. Na faamatalaina e le aposetolo o Paulo mea e aofia ai i le mafaufau e pei o Ieova. Na talanoaina i le mataupu ua mavae ina ia ʻalofia le “mulimuli i lenei faiga o mea a le lalolagi,” e tatau ona tatou teena manatu ma uiga o le lalolagi. Ae na taʻua foʻi e Paulo e manaʻomia ona “suia o [tatou] mafaufau.” E aofia ai le suʻesuʻeina o le Afioga a le Atua ma le faanaunauga ina ia iloa manatu o le Atua, manatunatu loloto i ai, ma faaōgatusa i ai o tatou manatu.

5. O ā mea e aofia ai i le suʻesuʻe?

⁵ E tele atu mea e aofia ai i le suʻesuʻe, nai lo o le tau ina faatopelau o le faitau ma vase tali. Pe a tatou suʻesuʻe, e tatou te iloilo po o le ā o loo faailoa mai e le mataupu e uiga iā Ieova, o ona ala, ma ona manatu. E tatou te taumafai e malamalama i le māfuaaga e faatonuina ai i tatou e Ieova e faia isi mea, ae e faasā isi mea. E tatou te manatunatu foʻi i suiga e manaʻomia ona faia i o tatou olaga ma mafaufauga. E moni e lē mafai ona tatou manatunatu i nei vala uma i a tatou suʻesuʻega. Ae o se mea lelei le faaalu atonu o le ʻafa o le taimi ua e faatulagaina mo au suʻesuʻega, ina ia manatunatu loloto ai i mea o loo e suʻesuʻeina.​—Sala. 119:97; 1 Timo. 4:15.

6. O le ā e tupu pe a tatou manatunatu loloto i manatu o Ieova?

⁶ E iai se mea mataʻina e tupu, pe a tatou manatunatu loloto e lē aunoa i le Afioga a le Atua. E tatou te “faamaonia” pe faatalitonuina ai i tatou lava, e lelei atoatoa manatu o Ieova. O le a amata ona tatou vāai i mea e pei o le auala e silasila mai ai o ia, ma tatou faamaonia le moni o ona manatu. O le a ʻsuia o tatou mafaufau’ ma le auala e tatou te vaai ai i mea. O le faia faapea, o le a faasolosolo ai ona faaōgatusa o tatou manatu ma manatu o Ieova.

7, 8. (a) O le ā le manatu o Ieova e faatatau i meafaitino? (Tagaʻi i ata i luga aʻe o le matua.) (e) Pe a tutusa o tatou manatu ma le manatu o Ieova i meafaitino, o ā mea o le a sili ona tāua iā i tatou?

⁷ O o tatou mafaufauga e aafia ai o tatou faalogona ma gaoioiga. (Mare. 7:21-23; Iako. 2:17) Seʻi o tatou tilofaʻia ni faaaʻoaʻoga ina ia faamanino atili ai lenā manatu. O loo faailoa mai i tusi o Evagelia le manatu o Ieova e faatatau i meafaitino. Na ia filifilia ma le faaeteete ni mātua o le a tausia aʻe lona Alo, o se ulugalii e lē tagolima. (Levi. 12:8; Luka 2:24) Ina ua fanau mai Iesu, na faataoto o ia e Maria “i le mea e tuu ai meaʻai a manu, auā e leai se avanoa mo i latou i le fale talimālō.” (Luka 2:7) Pe ana finagalo i ai Ieova, semanū e na te saunia se isi fale e sili atu ina ia fanau ai lona Atalii. Peitaʻi, sa sili ona tāua iā te Ia le siʻomaga faaleagaga o le a tausia ma ola aʻe ai Iesu.

⁸ O lenā tala ua tatou aʻoaʻoina ai le manatu o Ieova e faatatau i meafaitino. O  nisi mātua e mananaʻo e taulau manuia a latou fanau i le itu faaletino, e ui lava e aafia ai le tulaga faaleagaga o fanau. Ae ua manino mai, e sili atu ona tāua iā Ieova mea faaleagaga. Po o lau vaaiga lenā i mea faaleagaga? O le ā o loo atagia mai i au gaoioiga?​—Faitau le Eperu 13:5.

9, 10. E faapefea ona iloa e tutusa o tatou manatu ma manatu o Ieova i le faia o se mea e tausuai ai isi?

⁹ O se isi faaaʻoaʻoga, o le manatu o le Atua i se tasi e faia se mea e tausuai ai se isi. Na fetalai Iesu: “O se tagata e na te faatausuai i se tasi o i latou nei e faatauvaa ua talitonu, e lelei pe a nonoa se maa olo e toso e asini i lona ua, ma lafo o ia i le sami.” (Mare. 9:42) E matuā malolosi na faaupuga. Talu ai na faaatagia mai e Iesu i se tulaga atoatoa uiga o lona Tamā, e mautinoa la e faapena foʻi faalogona o Ieova, pe a faia ma le loto i ai e se tasi se gaoioiga e tausuai ai se soo o Iesu.​—Ioa. 14:9.

¹⁰ Pe e tutusa lou manatu ma manatu o Ieova ma Iesu? O le ā o loo atagia mai i a tatou gaoioiga? O se faataʻitaʻiga, seʻi faapea e te fiafia i se ituaiga o āʻega i laʻei ma teuga lea e ono tausuai ai nisi i le faapotopotoga, pe faagaee ai foʻi tuʻinanauga lē mamā. Po o le a uunaʻia i tatou e lo tatou alofa mo o tatou uso ina ia ʻalofia le mulimuli i na āʻega?​—1 Timo. 2:9, 10.

11, 12. E faapefea ona puipuia i tatou pe a tatou ʻinoʻino i mea e ʻinoʻino i ai Ieova, ma atiaʻe le amio pulea?

¹¹ O le faaaʻoaʻoga lona tolu: E ʻinoʻino Ieova i le amiolētonu. (Isa. 61:8) E silafia e Ieova e iai o tatou faanaunauga sesē, ona o lo tatou tulaga lē lelei atoatoa. E ui i lea, ua timaʻi mai o ia ina ia tatou ʻinoʻino i le amiolētonu. (Faitau le Salamo 97:10.) O le manatunatu loloto i le māfuaaga e ʻinoʻino ai Ieova i le amioleaga, o le a fesoasoani iā i tatou e faaōgatusa ai o tatou manatu ma ona manatu, ma faamalosia ai i tatou e teena le amioleaga.

¹² Pe a tutusa o tatou manatu ma le manatu o Ieova e faatatau i le amiolētonu, o le a tatou iloa ai isi amioga leaga e lē o taʻua patino i le Tusi Paia. O se faaaʻoaʻoga, e iai se siva faatosina e taʻua o le lap dance ua matuā taatele i le lalolagi i aso nei. Atonu e manatu i ai nisi e leai se leaga o lea ituaiga o siva, auā e lē faapea o faia ni feusuaʻiga. * Ae po o atagia mai ai le manatu o le Atua, o lē e ʻinoʻino i so o se ituaiga o amioleaga? Seʻi o tatou taumamao mai i le faia o amioga leaga, e ala i le atiaʻe o le amio pulea faapea le ʻinoʻino i mea e ʻinoʻino i ai Ieova.​—Roma 12:9.

13. Aiseā e tatau ai ona tatou muaʻi manatunatu i manatu o Ieova i ni tulaga e manaʻomia ai ona tatou faia ni filifiliga i le lumanaʻi?

¹³ Pe a faia a tatou suʻesuʻega, e ao ona tatou manatunatu i manatu o Ieova i ni tulaga e tatou te ono fesagaʻia i le lumanaʻi. O le faia faapea, o le a lē puʻea faamanu i ofaga ai i tatou pe a tulaʻi mai se tulaga e manaʻomia ai ona vave fai sa tatou filifiliga. (Faata. 22:3) Seʻi iloilo nisi o faaaʻoaʻoga mai i le Tusi Paia.

14. O le ā e tatou te aʻoaʻoina mai i le tali atu a Iosefa i faatosinaga a le avā a Potifara?

¹⁴ Na vave gaoioi Iosefa e tetee atu i faatosinaga a le avā a Potifara. Na faaalia ai sa ia muaʻi manatunatu i le manatu o  Ieova e faatatau i le faamaoni o se tasi i lana paaga faaipoipo. (Faitau le Kenese 39:8, 9.) Na faaōgatusa foʻi ona manatu ma manatu o le Atua, e pei ona faamaonia i lana tali atu i le avā a Potifara e faapea: “Pe faapefea ona ou faia lenei mea leaga tele ma ou agasala ai i le Atua?” Ae e faapefea i tatou? Seʻi faapea ua amata ona faatafai mai se tasi e lua te faigaluega faatasi, pe lafo mai foʻi e se tasi se faamatalaga po o se ata matagā i lau telefoni. * O le a faigofie ona tatou faamaoni iā Ieova, pe afai ua māeʻa ona tatou saʻili ma talia le manatu o Ieova i lea mataupu, ma muaʻi faia se filifiliga i le gaoioiga o le a tatou faia.

15. E faapefea ona tatou faaalia le faamaoni iā Ieova e pei ona faia e talavou Eperu e toʻatolu?

¹⁵ Ia mātau le faaaʻoaʻoga a talavou Eperu e toʻatolu o Sataraka, Mesako, ma Apeteniko. O lo latou solitū e lē tapuaʻi atu i le tupua auro na faia e le tupu o Nepukanesa, ma la latou tali atu ma le lototele i le tupu, na faaalia ai na latou muaʻi manatunatu i mea e aofia ai i le faamaoni iā Ieova. (Eso. 20:4, 5; Tani. 3:4-6, 12, 16-18) Seʻi faapea ua talosagaina oe e lou pule e foaʻi atu sau tupe, e fai ai se patī mo se aso faamanatu e fesootaʻi atu i tapuaʻiga sesē. O le ā lau gaoioiga o le a fai? Nai lo o le faatalitali seʻi tupu lenā mea, aiseā e te lē manatunatu ai loa i le taimi lenei i le manatu o Ieova i lenā mataupu? Pe a tulaʻi mai la nei tulaga, o le a faigofie ona e faia le mea saʻo ma le faamatalaga saʻo, e pei ona faia e talavou Eperu e toʻatolu.

16. E faapefea i le malamalama i manatu o Ieova ona tatou nofosauni ai pe a tupu se faalavelave faafuaseʻi?

¹⁶ E aogā foʻi le muaʻi manatunatu i auala e faaalia ai le faamaoni iā Ieova, pe a tupu mai se faalavelave faafuaseʻi. E tatou te lē taliaina le tuiina o le toto atoa po o ona vaega autū e fā. Ae e iai isi togafitiga e faaaogā ai vaega ninii o le toto, lea e manaʻomia ai ona fai se filifiliga e faavae i mataupu silisili o le Tusi Paia, e atagia mai ai manatu o Ieova. (Galu. 15:28, 29) O le mea moni, e lē o se mea atamai le fai o se filifiliga a o tatou tigāina i le falemaʻi,  ma ua faamalosia i tatou e vave fai se faaiʻuga. O lea, o le taimi lenei e fai ai a tatou saʻiliʻiliga i lea mataupu, faatumu se pepa faaletulafono e faailoa ai ou manaʻoga, ma talanoa i lau fomaʻi. *

17-19. Aiseā e tāua ai ona tatou iloa i le taimi lenei manatu o Ieova i se mataupu? Aumai se faataʻitaʻiga o se tulaga e manaʻomia ona tatou nofosauni ai.

¹⁷ O le faaaʻoaʻoga mulimuli, o le tali vave atu a Iesu i le fautuaga lē atamai a Peteru: “Le Alii e, ia e alofa iā te oe lava.” E foliga mai na faaalu e Iesu le tele o le taimi e muaʻi manatunatu loloto ai i le finagalo o le Atua mo ia, ma valoaga e faatatau i lona soifuaga i le lalolagi faapea le taimi o le a maliu ai. O le iloaina o na mea, na faamalosia ai o ia ina ia faamaoni pea iā Ieova, ma foaʻi mai lona ola e fai ma taulaga mo i tatou uma.​—Faitau le Mataio 16:21-23.

¹⁸ I aso nei, e finagalo le Atua ina ia tatou atiaʻe se faauōga ma ia, ma faia le mea sili e tatou te mafai i le galuega talaʻi. (Mata. 6:33; 28:19, 20; Iako. 4:8) E ui i lea, e iai i latou e iai faanaunauga lelei e taumafai e faavaivaia i tatou, e pei o le faamatalaga a Peteru iā Iesu. O se faataʻitaʻiga, o le ā lau gaoioiga e fai pe a fai atu lou pule o le a siitia lou tulaga ma lou totogi, ae o lenā suiga o le a aafia ai au gaoioiga faaleagaga? Pe afai o oe o se talavou, o le ā e te faia pe a ofoina atu iā te oe se avanoa e faaauau ai au aʻoga i se isi vaipanoa, ma e nofo ese ai mai i lou aiga? Pe a tupu lenā mea, pe e lē manaʻomia ona e tatalo, faia ni au saʻiliʻiliga, ma talanoa atu i lou aiga po o toeaina a o leʻi faia sau filifiliga? Aiseā e te lē saʻili ai i le taimi lenei po o le ā le manatu o Ieova ma taumafai e faaōgatusa i ai ou manatu? Pe a tulaʻi mai loa ni tulaga faapea, o le a lē avea na tulaga o se faaosoosoga mo oe. Aiseā? Talu ai ua uma ona faataatitia ou sini faaleagaga, ua uma ona fai lau filifiliga, ma ua e nofosauni e faataunuu lenā filifiliga.

¹⁹ E mafai foʻi ona e mafaufau i nisi tulaga e ono tulaʻi mai faafuaseʻi. E moni e lē mafai ona tatou nofosauni i tulaga uma e tulaʻi mai. Ae pe a tatou manatunatu loloto i manatu o Ieova i taimi e faia ai a tatou lava suʻesuʻega, e lē taumatea o le a tatou manatua ma mafai ona faatatauina mea na tatou aʻoaʻoina, mo se tulaga patino e tulaʻi mai. O lea, seʻi o tatou saʻili po o le ā le manatu o Ieova i se mataupu, ia faaōgatusa i ai o tatou manatu, ma mafaufau i le aafiaga i a tatou filifiliga i le taimi lenei ma le lumanaʻi.

20, 21. (a) Aiseā e tatou te olioli ai i le saʻolotoga o le a tatou maua i le lalolagi fou? (e) E faapefea ona tatou maua le olioli i le taimi lenei?

²⁰ E tatou te tulimataʻia le lalolagi fou. O le toʻatele o i tatou e faamoemoe e ola e faavavau i se lalolagi parataiso. I le pulega o le Malo, o le a tuusaʻoloto ai tagata mai i puapuaga o loo tatou fesagaʻia i lenei faiga o mea. O le a iai pea lo tatou saʻolotoga e filifili ai, lea o le a tatou faia ai ni filifiliga lelei e tusa ma mea e tatou te fiafia ma faanaunau i ai.

²¹ Peitaʻi, e iai lava tapulaa o lo tatou saʻolotoga. O le a taʻitaʻia ē agamalu i tulafono ma manatu o Ieova, pe a fai ni a latou filifiliga i le mea saʻo ma le mea sesē. O le iʻuga, o le a maua ai le olioli ma le tele o le filemu. (Sala. 37:11) Ae i le taimi lenei, e mafai lava ona tatou maua le olioli a o tatou taumafai e faaōgatusa o tatou manatu ma manatu o Ieova.