1, 2. (a) O le ā le mea e sili ona tāua iā i tatou? (e) O ā upu moni e tatou te faatāuaina, ma aiseā? (Tagaʻi i ata i luga aʻe o le matua.)

O LE ā le mea e sili ona tāua iā te oe? Pe e te lotomalie e fesuiaʻi lenā mea ma se mea e itiiti ifo lona tāua? E faigofie le tali a auauna a Ieova i na fesili. O le mea e sili ona tāua iā i tatou o la tatou faiā ma Ieova, ma e tatou te lē mananaʻo e fesuiaʻi ma se isi mea. E tatou te faatāuaina foʻi upu moni o le Tusi Paia, lea ua faamalosia ai la tatou faiā ma lo tatou Tamā i le lagi.​—Kolo. 1:9, 10.

² Seʻi mafaufau i mea ua aʻoaʻoina ai i tatou e lo tatou Aʻoaʻo Sili lea o loo i lana Afioga. Ua ia faailoa mai le upu moni e faatatau i le uiga o lona suafa ma ona uiga mataʻina. E lē gata i lea, o lana meaalofa matagofie o le togiola lea na ia saunia e ala mai i lona Alo o Iesu. Ua faailoa mai foʻi e Ieova le Malo faa-Mesia, ma ua ia saunia le faamoemoe faalelagi mo le ʻaufaauuina, faapea le faamoemoe i le lalolagi Parataiso mo “isi mamoe.” (Ioa. 10:16) Ua ia aʻoaʻoina foʻi i tatou i le auala e amioaʻi ai. E tautele iā i tatou nei upu moni ona e tatou te  vavalalata atu ai i Lē na foafoaina i tatou, ma iloa ai le fuafuaga o le olaga.

3. O le ā e lē uiga i ai le faatau mai o le upu moni?

³ O Ieova o se Atua e aaomafola. E na te lē taofia se mea lelei mai iā i latou o loo saʻili mo le upu moni. Ua foaʻi mai foʻi e Ieova le ola o lona Atalii pele e avea ma meaalofa foaʻifua. E lē faatalitalia e le Atua e tatou te totogiina ni tupe ina ia maua ai le upu moni. Ina ua ofo atu e Simona ni tupe i le aposetolo o Peteru ina ia mafai ai ona ia maua le pule e tuuina atu ai i isi le agaga paia, na taʻusala e Peteru o ia ma faapea atu: “Ia fano au siliva faatasi ma oe, auā ua e manatu e mafai ona e maua le meaalofa foaʻifua a le Atua i tupe.” (Galu. 8:18-20) O le ā la le uiga o le faatonuga: “Ia faatau mai le upu moni”?

4. O le ā o le a tatou iloiloina e faatatau i le upu moni?

⁴ Faitau le Faataoto 23:23. E manaʻomia ona faia a tatou taumafaiga ma so o se faataulaga ina ia maua ai upu moni i le Afioga a le Atua. Ina ua faapea mai le tusitala atamai o le Faataoto, pe a tatou “faatau mai” pe maua le upu moni, e tatau ona tatou faaeteete ina ia aua neʻi o tatou toe “faatau atu” pe lafoaʻia. Seʻi o tatou talanoaina la le uiga o le “faatau mai” o le upu moni, ma le tau e tatou te totogiina ina ia faatau mai ai. O le a faaloloto ai lo tatou talisapaia mo le upu moni, ma tatou maumauaʻi ai e lē toe ʻfaatauina atu.’ O le a tatou iloa ai, e lē iʻuvale a tatou taumafaiga ina ia faatau mai le upu moni.

5, 6. (a) E faapefea ona tatou faatauina mai le upu moni e ui e maua fua? Aumai se faataʻitaʻiga. (e) O ā aogā e tatou te mauaina mai i upu moni?

⁵ E oo lava i se mea e maua fua e manaʻomia lava ona faia ni taumafaiga ina ia maua ai. O le upu Eperu ua faaliliuina “faatau mai” i le Faataoto 23:23, e uiga atu foʻi “ia maua.” O nei upu e faasino atu i le faia o ni taumafaiga, pe fesuiaʻi se mea ina ia maua ai se mea tāua. O se faaaʻoaʻoga o le faatauina mai o le upu moni, seʻi faapea ua aumai se faasilasilaga “E Maua Faʻi e Ave Fua.” Pe e faavavega ona tatou mauaina na faʻi? E leai. E manaʻomia ona tatou ō i le maketi ina ia maua ai. E moni e maua fua faʻi, ae e manaʻomia a tatou taumafaiga ma le taimi ina ia taunuu ai i le maketi. I se tulaga talitutusa, e tatou te lē faatauina le upu moni i ni tupe. Peitaʻi, e manaʻomia ona faia a tatou taumafaiga ina ia maua ai le upu moni.

⁶ Faitau le Isaia 55:1-3. O fetalaiga a Ieova na faamauina e Isaia ua tatou malamalama atili ai i le uiga o le faatau mai o le upu moni. I lenei mau, ua faatusa ai e Ieova lana afioga i le vai, susu, ma le uaina. E pei o se vai mālū ma mamā, e faafouina i tatou i upu moni mai i le Atua. O le susu e maua ai le malosi ma e fesoasoani i le tuputupu aʻe o se tamaitiiti, o afioga foʻi a Ieova e faamalosia ai i tatou ma fesoasoani i lo tatou tuputupu aʻe faaleagaga. E lē gata i lea, ua pei afioga a Ieova o se uaina. I le ā le itu? I le Tusi Paia, e masani ona taʻu faatasi le uaina ma le fiafia. (Sala. 104:15) O lea, ina ua fetalai Ieova i ona tagata ina ia “faatau le uaina,” ua ia faamautinoa mai ai pe a tatou ola e ōgatusa ma ana afioga, e tatou te maua ai le fiafia. (Sala. 19:8) Maʻeu se auala matagofie ua faataʻitaʻi mai ai aogā o le aʻoaʻoina ma le faatatauina o upu moni a le Atua! E mafai ona faatusa a tatou taumafaiga i le tau e tatou te faatauina mai ai le upu moni. O lea, seʻi o tatou talanoaina ni mea se lima atonu e manaʻomia ona tatou faataulagaina, ina ia faatau mai ai le upu moni.

7, 8. (a) Aiseā e tatau ai ona tatou faaalu le taimi e faatau mai ai le upu moni? (e) O le ā le tele o faataulaga na faia e se talavou ina ia faatau mai ai le upu moni, ma o le ā le iʻuga?

⁷ Taimi. O le tau lea e totogi e tagata uma ina ia faatau mai ai le upu moni. E manaʻomia ona faaalu le taimi ina ia faalogo ai i le feʻau o le Malo, faitau le Tusi Paia ma lomiga faale-Tusi Paia, suʻesuʻe le Tusi Paia ma Molimau a Ieova, ma sauniuni ma auai i sauniga. E manaʻomia ona tatou “faatau mai” le taimi mai i isi mea e lē tāua. (Faitau le Efeso 5:15, 16 ma le faaopoopoga i le pito i lalo.) O le ā le tele o le taimi e manaʻomia ona tatou faaalu ina ia maua ai le poto saʻo e faatatau i aʻoaʻoga faavae o le Tusi Paia? E fua lava i o tatou tulaga. E lē gata mai mea e tatou te aʻoaʻoina e faatatau i le atamai o Ieova, o ona ala, ma ana galuega. (Roma 11:33) I le uluaʻi lomiga o le Watch Tower, na faatusa ai le upu moni i se “tamaʻi fugālaau,” na taʻua ai e faapea: “Aua le malie gofie i sina fugālaau e tasi po o ni nai vala o le upu moni. Pe ana fai e lava i le fugālaau e tasi po o ni nai aʻoaʻoga o le upu moni, semanū e lē toe saunia mai nisi mea. Ia aoaoina pea, ia saʻiliʻili pea.” Ia tatou fesili ifo: ʻO le ā le tele o fugālaau ua ou aoaoina po o aʻoaʻoga o le upu moni ua ou iloaina?’ E oo lava i le faavavau, e tatou te aʻoaʻoina pea mea e faatatau iā Ieova. I aso nei, o se vala tāua le faia o a tatou taumafaiga e faaaogā tatau ai le taimi ina ia faatau mai ai le upu moni. Seʻi manatu i se faaaʻoaʻoga o se tasi ua leva ona galala mo le upu moni.

⁸ O Mariko, * o se tamaʻitaʻi talavou mai i Iapani, sa malaga i Niu Ioka i le Iunaite Setete ina ia aʻoga ai. I lea taimi, sa ia auai i se lotu na faavaeina i Iapani i le 1959. Sa feiloaʻi se tuafafine paeonia ma Mariko i le talaʻiga. A o amata ona ia aʻoaʻoina upu moni o le Tusi Paia, sa faatupulaʻia lona fiafia ma talosaga ai i le paeonia pe e mafai ona fai faalua lana suʻesuʻega i le vaiaso. E ui i le pisi o lana faasologa i le aʻoga ma e iai foʻi lana galuega faavaitaimi, ae na amata loa ona ia auai i sauniga. Na amata foʻi ona lē toe faaalu lona taimi i faafiafiaga ina ia maua ai le taimi e aʻoaʻoina ai le upu moni. O na faataulaga na vave ai ona ia agaʻigaʻi i luma faaleagaga. Na ia papatiso i totonu o le tasi le tausaga, ae i le ono masina mulimuli ane i le 2006 na amata ai ona paeonia, ma o loo paeonia lava i le taimi lenei.

9, 10. (a) E faapefea i le faatauina mai o le upu moni ona aafia ai la tatou vaai i meafaitino? (e) O le ā le ituaiga lumanaʻi na lafoaʻia e se tasi o talavou, ma o ā ona faalogona i lenā filifiliga?

⁹ Manuia faaletino. Ina ia faatau mai le upu moni, atonu o le a tatou tuua ai se galuega e telē le totogi. Ina ua valaaulia e Iesu ia Peteru ma Aneterea e avea ma “faifaiva i tagata,” na la ʻtuua la upega.’ (Mata. 4:18-20) O le mea moni, o le toʻatele ua aʻoaʻoina le upu moni i aso nei e lē mafai ona tuua a latou galuega, ona e iai o latou tiute tauave faale-Tusi Paia. (1 Timo. 5:8) Peitaʻi, sa manaʻomia ona suia la latou vaaiga e faatatau i meafaitino, ma fetuunaʻi mea e latou te faamuamua. Na manino le fetalaiga a Iesu i lea tulaga: “Aua tou te toe faaputuina mo outou ʻoa o le lalolagi . . . A ia outou faaputu ʻoa i le lagi.” (Mata. 6:19, 20) Seʻi mafaufau i le faaaʻoaʻoga a se tasi o tamaʻitaʻi talavou.

¹⁰ Na iloa e Maria tapolo a o laʻitiiti ma a o leʻi aʻoga. Sa faaauau ona atiaʻe ona tomai i lea taaloga a o aʻoga i kolisi seʻia oo ina maua ai lana sikolasipi i le iunivesite. Sa naunau o ia i le taaloga, ma o lona sini  ia maua sona lumanaʻi lelei o se tagata tapolo faapolofesa. Ae ina ua amata ona suʻesuʻe e Maria le Tusi Paia, sa matuā fiafia o ia i upu moni sa ia aʻoaʻoina. Sa faamalieina foʻi o ia i suiga na fesoasoani le Tusi Paia e faia i lona olaga. Na ia faapea mai: “O le tele na ou taumafai ai e suia oʻu manatu ma le auala ou te ola ai, o le faateleina foʻi lenā o loʻu fiafia.” Na iloa e Maria e faigatā ona taumafai e saʻili ʻoa faaleagaga ma ʻoa faaletino i le taimi e tasi. (Mata. 6:24) O lea, sa ia faatauina mai le upu moni, e ala i le lafoaʻia o lona sini o le avea ma tagata tapolo faapolofesa, faapea le mauaina o le ʻoa ma le tulaga taʻutaʻua. O lona faia faapea, ua mafai ai ona ia auauna nei ma le fiafia o se paeonia. Ua ia faapea mai, “o se olaga sili lea e maua ai le fiafia ma le faamalieina.”

11. O le ā e ono tupu i a tatou faiā ma isi pe a tatou faatauina mai le upu moni?

¹¹ Faiā ma isi. Pe a tatou filifili e ola e ōgatusa ma upu moni o le Tusi Paia, o le a iai se aafiaga i a tatou faiā ma aiga ma uō. Aiseā? Na tatalo Iesu e faatatau i ona soo: “Ia faapaiaina i latou i le upu moni, o lau afioga o le upu moni lea.” (Ioa. 17:17) O le faaupuga “ia faapaiaina i latou,” e uiga atu foʻi i le “vavaeesea o i latou.” Pe a tatou talia le upu moni, ua vavaeesea ai i tatou mai i le lalolagi ona e tatou te lē o toe ola e pei o tagata o le lalolagi. E ese le vaai mai a tagata iā i tatou ona ua sui mea e tatou te faatāuaina, ma ua tatou ola e ōgatusa ma tapulaa o le Tusi Paia. E ui e tatou te lē mananaʻo e fevaevaeaʻi ma a tatou uō ma tauaiga vavalalata, ae atonu o le a latou ʻalofia i tatou pe tetee mai foʻi i la tatou tapuaʻiga. Ae e lē faateʻia ai i tatou i lenā mea. Na fetalai Iesu: “O le mea moni, e fai le aiga o le tagata ma ona fili.” (Mata. 10:36) Ua ia faamautinoa mai foʻi, e sili mamao atu le taui e tatou te maua nai lo o so o se mea na tatou faataulaga ina ia faatau mai ai le upu moni.​—Faitau le Mareko 10:28-30.

12. O le ā le faataulaga na faia e Aaron ina ia faatau mai ai le upu moni?

¹² O Aaron o se faipisinisi Iutaia, sa ia aʻoaʻoina lava mai i lona laʻitiiti e lē tatau ona faaleoina le suafa o le Atua. Peitaʻi, sa ia galala mo upu moni e faatatau i le Atua. Sa matuā fiafia o ia ina ua faailoa i ai e Molimau a Ieova pe a tuufaatasi vaueli ma konesane e fā faa-Eperu o le suafa o le Atua, ona faaleoina lea o “Ieova.” Sa ia alu fiafia i le sunako ma faailoa i aʻoaʻo le mea ua ia iloaina. Na faateʻia Aaron i le auala na latou tali mai ai. Nai lo o le fiafia, ae na latou feanu iā te ia ma tuliesea o ia. Na lē fiafia foʻi ona aiga iā te ia. E ui i lea, na ia faatau mai le upu moni, ma auauna ma le lototele o se Molimau a Ieova i lona olaga atoa. E pei o Aaron, ina ia mafai ona savavali i le upu moni, e manaʻomia ona tatou lotomalilie e talia so o se suiga e oo i a tatou faiā ma aiga ma isi.

13, 14. O ā suiga e tatau ona fai i o tatou mafaufauga ma amioga ina ia faatau mai ai le upu moni? Aumai se faataʻitaʻiga.

¹³ Mafaufauga ma amioga e teena e le Atua. Ina ia talia le upu moni ma ola e ōgatusa ma tapulaa tauamio a le Tusi Paia, e tatau ona tatou lotomalilie e suia o tatou mafaufauga ma amioga. Seʻi mātau le manatu o Peteru e faatatau i nei suiga: “E faapei o fanau usiusitaʻi, aua le amioaʻi e tusa ai ma o outou tuʻinanauga na iai muamua a o leʻi malamalama outou, ae . . . ia faapea foʻi ona paia outou uma i a outou amio.” (1 Pete. 1:14, 15) Ina ia faatau mai e tagata sa ola i le aai amioleaga o Korinito le upu moni, sa tatau ona latou faia ni suiga tetele i o latou olaga. (1 Kori. 6:9-11) I se tulaga talitutusa, ina ia mafai ona faatau mai le upu moni, ua lafoaʻia e le toʻatele  i aso nei amioga leaga sa latou faia. Na faamanatu foʻi e Peteru i Kerisiano i ona aso: “Ua lava ia na taimi i aso ua mavae na outou faia ai le manaʻo o tagata o le lalolagi, o amioga matagā, ma le tuʻinanau, le inu tele i le uaina, ma patī lē taupulea, ma tauvaga o inuga ʻava, ma le ifo i tupua e inosia.”​—1 Pete. 4:3.

¹⁴ Mo le tele o tausaga, sa avea Devynn ma Jasmine o ni ē e onanā i le tele o taimi. E ui e lelei le tausi tusi a Devynn, ae o lona onā soo na lē maua ai sana galuega tumau. Na lauiloa Jasmine o sē e lotoa ma faatupu vevesi. I se tasi aso a o onā Jasmine ma savali i le auala, na ia feiloaʻi ai i ni misionare Molimau a Ieova se toʻalua. Na faatulaga e misionare se suʻesuʻega faale-Tusi Paia, ae e ō atu i le vaiaso na sosoo ai o loo onanā mai Devynn ma Jasmine. E la te leʻi faatalitalia o le a ō atu misionare i lo la fale. Peitaʻi, na suia le tulaga o mea i le taimi na sosoo ai. E mai lava i le suʻesuʻega muamua a Devynn ma Jasmine, na avea i laʻua ma tagata suʻesuʻe maelega ma na amata ona la faatatau mea na la aʻoaʻoina. I totonu o le tolu masina, ae la filifili e tuu le ʻava malosi ma lesitala faaletulafono la laʻua faaipoipoga. Na iloa e le toʻatele nei suiga, ma na uunaʻia ai isi tagata o le nuu e faia ni a latou suʻesuʻega faale-Tusi Paia.

15. O le ā se tasi o vala e sili ona faigatā e tatou te fesagaʻia i le faatauina mai o le upu moni, ma aiseā?

¹⁵ Tū ma aganuu e lē faale-Tusi Paia. O le tuua o tū ma aganuu e lē faale-Tusi Paia, o se tasi o vala e sili ona faigatā i le faatauina mai o le upu moni. E ui e faigofie ona talia e isi faavae faale-Tusi Paia e tatau ai ona tuua nei faiga, ae e faatalatū isi e faia faapea ona o teteega mai i aiga, o ē faigaluega faatasi, ma uō vavalalata. Ae e sili foʻi ona faigatā, pe afai o nei tū masani e manatua ai tauaiga ua maliliu. (Teu. 14:1) O faaaʻoaʻoga lototetele a isi e mafai ona fesoasoani iā i tatou e faia ai suiga manaʻomia. Seʻi manatu i gaoioiga lototele na faia e nisi i Efeso i le uluaʻi senituri.

16. O le ā na faia e nisi i Efeso ina ia faatau mai ai le upu moni?

¹⁶ Na lauiloa le aai o Efeso i faiga faaagaga. O le ā sa tatau ona faia e Kerisiano fou sa faia muamua faiga faaagaga ina ia tuua ai na tū e lē faale-Tusi Paia, ma faatau mai le upu moni? Ua faapea mai le Tusi Paia: “E toʻatele i latou o ē na faia faiga faaagaga, ua faaputuputu faatasi a latou tusi, ma susunu ai i le afi i luma o tagata uma. Ua latou faitauina foʻi le tau ma iloa ai, e tusa ma le lima sefulu afe tupe siliva. Ua matuā tupu tele ai le afioga a Ieova, ma ua manumalo.” (Galu. 19:19, 20) E ui i le taugatā, ae sa lotomalilie na Kerisiano faamaoni e faia nei faataulaga ma maua ai faamanuiaga.

17. (a) O ā mea e aofia i le tau e tatou te faatauina mai ai le upu moni? (e) O ā fesili o le a taliina i le mataupu o loo sosoo mai?

¹⁷ O ā ni mea na e faia ina ia faatau mai ai le upu moni? O loo tatou faaalu le taimi e aʻoaʻoina ai le upu moni. O nisi na latou tuua manuia faaletino ma talia suiga i a latou faiā ma isi. Na faia foʻi e nisi suiga i o latou mafaufauga ma amioga, ma lafoaʻia tū ma aganuu e lē faale-Tusi Paia. Ae po o ā lava mea na tatou faataulagaina, ua tatou mautinoa e lē faatusalia i le taui e tatou te mauaina. E mafai ai ona tatou maua se faiā vavalalata ma Ieova, o le mea lenā e sili ona tāua iā i tatou. Pe a tatou manatunatu i faamanuiaga ua tatou maua ona o le iloaina o le upu moni, o le a faigatā ona tatou mananaʻo e toe faatau ese atu lenā mea. Ae e faapefea ona tupu lenā mea, ma e faapefea ona tatou ʻalofia le faia o lenā mea matuā sesē? O le a taliina na fesili i le mataupu o loo sosoo mai.