1. Aiseā e tatou te manaʻomia uma ai faamāfanafanaga?

E TATOU te manaʻomia uma faamāfanafanaga. Ua avea popolega, luʻitau, ma faigatā ma vala masani o o tatou olaga. Atonu o loo tatou tauivi ma mafatiaga ona o le soifua matua, maʻi, po o le maliu o sē e pele iā i tatou. Ua inosia nisi o i tatou ma ua faateteleina foʻi faiga sauā. Ua tatou talitonu o nei “aso e sili ona faigatā” o faamaoniga ia o loo tatou ola i “aso e gata ai,” ma ua tatou latalata atu i le lalolagi fou. (2 Timo. 3:1) E ui i lea, atonu ua umi ona tatou faatalitali i le faataunuuga o folafolaga a le Atua, ma o loo faatupulaʻia pea o tatou faafitauli. O fea la e tatou te maua ai faamāfanafanaga?

2, 3. (a) O le ā ua tatou iloa e faatatau iā Sapakuka? (e) Aiseā o le a tatou iloiloina ai le tusi o Sapakuka?

² Ina ia tali lenā fesili, seʻi o tatou iloiloina le tusi o Sapakuka. E leai ni faamatalaga patino i le Tusi Paia e faatatau i le olaga ma galuega a Sapakuka. Peitaʻi, o le tusi o loo faaigoa iā te ia ua avea ma puna o faamāfanafanaga. Atonu o le uiga o le igoa o Sapakuka, o le “Opo Māfana Atu.” E foliga mai e faasino atu i le opo māfana a Ieova, po o le pipiimau atu foʻi o ana  auauna tapuaʻi iā te ia, e pei o loo pipiimau se tamaitiiti i lona tamā. Na talanoa Sapakuka iā Ieova, ma o lona fia malamalama na ia tuufesili ai iā Ieova. O lea na uunaʻia ai o ia e Ieova ina ia faamau lea talanoaga, talu ai o fesili foʻi na e tatou te tuufesili ai.​—Sapa. 2:2.

³ O lenei talanoaga a Ieova ma lana auauna mafatia, e pau ia o faamatalaga o loo i le Tusi Paia e faatatau i le perofeta. O lana tusi o se vaega “o mea uma na tusia i aso ua mavae,” ma na faamauina i le Tusi Paia ʻina ia tatou maua ai le faamoemoe e ala i lo tatou tumau, ma le faamāfanafana mai o Tusitusiga Paia.’ (Roma 15:4) O ā aogā e tatou te maua mai i le tusi o Sapakuka? E fesoasoani iā i tatou e malamalama ai i le uiga o le faatuatua i le Atua. O le valoaga foʻi a Sapakuka ua faamautinoa mai ai, e mafai ona tatou maua ma faatumau le toʻafilemu o le loto e ui i popolega ma faafitauli e tatou te fesagaʻia. O lea, ia tatou manatua na vala a o tatou iloiloina le tusi o Sapakuka.

4. Aiseā na mafatia ai Sapakuka?

⁴ Faitau le Sapakuka 1:2, 3. Sa soifua Sapakuka i se vaitaimi e sili ona faigatā. Sa matuā faanoanoa o ia ona sa ia ola faatasi ma tagata amioleaga ma sauā. O afea o le a faaiʻuina ai le amioleaga? Aiseā ua umi ai ona lē faia e Ieova se gaoioiga? E pau mea na vaai i ai Sapakuka o faiga lē tonu ma puapuaga na faapogaia e tagata o lona nuu, ma na ia manatu ua leai sona faamoemoe. O lea na ia valaau ai iā Ieova ina ia faalaa mai e taofi nei mafatiaga. Atonu na amata ona mafaufau Sapakuka e lē o manatu mamafa mai Ieova, ma e lē vave ona ia faalaa mai. Pe e faapena foʻi ou faalogona?

5. O le ā le lesona tāua o loo i le tusi o Sapakuka? (Tagaʻi i le ata i luga aʻe o le matua.)

⁵ Pe na lē toe faatuatua Sapakuka iā Ieova? Pe na mou atu lona faatuatuaina o folafolaga a le Atua? E leai! O lona faailoa atu o ona popolega iā Ieova nai lo o le faailoa atu i tagata, e iloa ai e leʻi mou atu lona faamoemoe. Sa ia matuā mafatia, ona e leʻi malamalama i le taimi atofaina a Ieova po o le māfuaaga na faataga ai pea e Ieova na mea e tutupu. O le faagaeeina la o Sapakuka e tusia ona popolega, ua faailoa mai ai e Ieova le lesona tāua lenei: E lē tatau ona tatou fefefe e faailoa atu iā te ia o tatou popolega po o masalosaloga. Ua ia valaaulia i tatou e sasaa atu o tatou loto iā te ia e ala i le tatalo. (Sala. 50:15; 62:8) Ua faalaeiau mai le Faataoto 3:5, ia “faatuatua iā Ieova ma [o tatou] lotoatoa, ae aua le faalagolago i [lo tatou] lava malamalama.” E foliga mai sa silafia ma teuloto e Sapakuka nei upu.

6. Aiseā e tāua ai le tatalo?

⁶ Na tausolomua Sapakuka e faalatalata atu iā Ieova o lona Tamā ma o lana Uō maufaatuatuaina. E leʻi tau ina popole Sapakuka i lona tulaga, pe faalagolago i lona malamalama. Nai lo o lea, na ia tatalo e faatatau i ona faalogona ma popolega, ma faataatia se faaaʻoaʻoga lelei mo i tatou. Ae e sili atu i lenā, ua valaaulia i tatou e Ieova le Faafofoga tatalo ina ia faatuatuaina o ia, e ala i le faailoa atu o o tatou popolega i le tatalo. (Sala. 65:2) O le faia faapea, o le a tali mai ai Ieova i le opoina ma le māfana o i tatou i se tulaga faafaatusa, e ala mai i lana taʻitaʻiga agalelei. (Sala. 73:23, 24) O le a ia fesoasoani mai iā i tatou e malamalama i lona finagalo e tusa ma mea o loo tatou mafatia ai. O a tatou tatalo mai i le loto, o se faailoaga sili lea o lo tatou maufaatuatuaina o le Atua.

7. Na faapefea ona tali mai Ieova i popolega o Sapakuka?

⁷ Faitau le Sapakuka 1:5-7. Ina ua uma ona tuu atu e Sapakuka ona popolega iā Ieova, atonu na ia taumānatu po o le ā le auala o le a tali mai ai Ieova. I le avea ai o Ieova o se Tamā e tigā alofa ma malamalama, e na te leʻi aʻoaʻia Sapakuka ona o le faitio. Na silafia e Ieova sa ʻaiʻoi atu o ia ma le faanoanoa ma faalogona tigā. O lea sa taulaʻi atu ai fetalaiga a Ieova i tagata fouvale o Iuta, ma faailoa atu iā Sapakuka le mea o le a tupu. E foliga mai o Sapakuka na muamua faailoa i ai e Ieova ua toeitiiti ona faamuta lea o lenā vaitaimi leaga.

8. Aiseā na faigatā ai iā Sapakuka le tali mai a Ieova?

⁸ Na faailoa mai e Ieova iā Sapakuka o le a ia faalaa mai, ma ua toeitiiti ona ia aumaia lea o le iʻuga o lenā tupulaga amioleaga ma sauā. O le faaupuga “i o outou aso,” na faailoa mai ai e Ieova e mautinoa o le a aumaia lana faamasinoga a lē i le vaitaimi o le perofeta, po o le vaitaimi o ē na latou ola faatasi. Ae e lē o le tali lea na faatalitalia e Sapakuka. E mautinoa o le mea na faailoa mai e Ieova iā te ia o le a atili ai ona mafatia tagata o Iuta. O tagata Kaletaia (Papelonia) e sili atu ona sauā ma leaga nai lo o tagata o le nuu o Sapakuka, o ē na iloa tapulaa a Ieova. Aiseā na faaaogā ai e Ieova lenei atunuu faapaupau e faaoo mai mala i Ona lava tagata? O le ā lau tali atu pe ana faapea o loo e faalogo atu i le fetalaiga a le Atua?

9. O ā fesili na ono mafaufau i ai Sapakuka?

⁹ Faitau le Sapakuka 1:12-14, 17. Na malamalama Sapakuka o le a faaaogā e Ieova Papelonia e aumaia le faamasinoga ma le faasalaga o tagata leaga na siʻomia ai o ia, peitaʻi e leʻi mautonu lava o ia. E ui i lea, na ia faapea mai ma le lotomaulalo, o Ieova o lona “Papa.” (Teu. 32:4; Isa. 26:4) Na manaʻomia ona maufaatuatuaina pea e Sapakuka le alofa ma le agalelei o Ieova. O le maumauaʻi o le perofeta, na ia maua ai le lototele e toe fesili atu ai iā Ieova. Aiseā o le a faatagaina ai e le Atua le tulaga matuā leaga o le a oo iā Iuta? Aiseā ua lē vave ai ona gaoioi o Ia? Aiseā o le a lē taofia ai e Lē e ona le malosi uma lava le tutupu o nei mea leaga? Aiseā na ia “lē fetalai” mai ai a o tutupu mea leaga? O le mea moni, o Ieova o “Lē e Paia” ma ʻe matuā mamā ona fofoga, ma e lē fia silasila i mea leaga.’

10. O ā o tatou faalogona i nisi taimi?

¹⁰ E iai taimi e ono oo ai iā i tatou faalogona sa oo iā Sapakuka. E tatou te faalogo iā Ieova. E tatou te faatuatuaina atoatoa lana Afioga, lea e tatou te maua ai le faamoemoe. Ua tatou faalogo foʻi i ana folafolaga e ala i faatonuga mai i lana faalapotopotoga. Ae e tatou te ono taumānatu lava, ʻO afea o le a faaiʻuina ai o tatou mafatiaga?’ O le ā e tatou te aʻoaʻoina mai i le gaoioiga o le a faia e Sapakuka?

11. O le ā na maumauaʻi Sapakuka e fai ina ua uma ona la talanoa ma Ieova?

¹¹ Faitau le Sapakuka 2:1. O le talanoaga a Ieova ma Sapakuka na toʻafilemu ai lona loto. O lea na ia maumauaʻi ai e faatalitali ai ma le onosaʻi i le taimi e gaoioi ai Ieova. Peitaʻi, e lē na o le pau lenā o le taimi na ia faia ai faapea, auā na ia toe taʻua mulimuli ane “e ao ona ou nofo filemu ma faatalitali mo le aso o le puapuaga.” (Sapa. 3:16) Na faatalitali foʻi ma le onosaʻi isi auauna faamaoni a Ieova, ma e faalaeiauina ai i tatou ina ia faatalitali  pea i le taimi e gaoioi ai Ieova.​—Mika 7:7; Iako. 5:7, 8.

12. O ā lesona e tatou te aʻoaʻoina mai iā Sapakuka?

¹² O le ā e tatou te aʻoaʻoina mai i le maumauaʻi o Sapakuka? Muamua, e lē tatau ona tatou faatalatū e tatalo atu iā Ieova e tusa po o ā faigatā e tatou te fesagaʻia. Lona lua, e manaʻomia ona tatou faalogo atu i so o se mea e fetalai mai ai Ieova e ala mai i lana Afioga ma lana faalapotopotoga. Lona tolu, e tatau ona tatou faatalitali ma le onosaʻi iā Ieova, ma talitonu atoatoa o le a ia faamutaina o tatou mafatiaga i lana taimi atofaina. Pe a faaauau ona sasaa atu o tatou loto iā Ieova, ma faalogologo iā te ia ma se uiga faatalitali e pei ona faia e Sapakuka, o le a toʻafilemu o tatou loto ma fesoasoani iā i tatou ina ia tumau. O lo tatou faamoemoe e mafai ona faamalosia ai lo tatou onosaʻi, lea e tatou te maua ai pea le olioli e tusa po o ā faigatā e tatou te fesagaʻia. O le faamoemoe foʻi e tatou te mautinoa ai, e iai le taimi o le a gaoioi ai lo tatou Tamā i le lagi.​—Roma 12:12.

13. O le ā le faamautinoaga o loo i le Sapakuka 2:3?

¹³ Faitau le Sapakuka 2:3. E mautinoa le fiafia o le finagalo o Ieova ina ua filifili Sapakuka e faatalitali iā te ia. Na malamalama lelei Lē e ona le malosi uma lava i tulaga faigatā na fesagaʻia e Sapakuka. O lea, na Ia faamāfanafanaina ai le perofeta e ala i le faamautinoa iā te ia i se auala alofa, o le a taliina ana fesili. E lē o toe umi ona ia maua lea o le mapusaga. E peiseaʻī na fetalai le Atua iā Sapakuka: “Ia onosaʻi ma maufaatuatuaina aʻu. E ui e foliga mai e tuai, ae ou te tali atu lava!” Na faamanatu atu e Ieova iā Sapakuka, ua iai lana taimi atofaina e faataunuu ai ana folafolaga. Na ia fautuaina Sapakuka e faatalitali i le taimi o le a faataunuu ai Lona finagalo. E mautinoa, o le a faafiafiaina ai le perofeta.

14. O le ā e tatau ona tatou maumauaʻi e fai i taimi e feagai ai ma faigatā?

¹⁴ O le faatalitali ma le onosaʻi iā Ieova ma uaʻi totoʻa i mea ua ia fetalai mai ai, o le a tatou maua ai le mautinoa ma le toʻafilemu o le loto e ui i popolega ma mafatiaga. Na faamautinoa mai e Iesu e mafai ona tatou maufaatuatuaina Ieova le Tausi Taimi Sili, nai lo o le taulaʻi i “taimi po o taimi atofaina” e leʻi faailoaina mai e le Atua. (Galu. 1:7) O lea, ia aua neʻi o tatou faavaivai ae ia faatalitali ma le lotomaulalo, faatuatua, ma le onosaʻi. Ia faaaogā lelei foʻi o tatou taimi e fai ai le mea sili i le auaunaga iā Ieova.​—Mare. 13:35-37; Kala. 6:9.

15, 16. (a) O ā folafolaga mataʻina o loo i le tusi o Sapakuka? (e) O le ā e tatou te aʻoaʻoina mai i nei folafolaga?

¹⁵ Ua folafola mai e Ieova i ē e amiotonu e faatuatua iā te ia: “O lē e amiotonu, e ola pea o ia i lona faatuatua,” ma “o le a tumu le lalolagi i le iloaina o le mamalu o Ieova.” (Sapa. 2:4, 14) Ioe, o le a maua e i latou e faatuatua iā Ieova le taui o le ola.

¹⁶ O le taimi muamua e tatou te faitau ai i le folafolaga i le Sapakuka 2:4, e foliga mai ua na o se faamatalaga masani. Peitaʻi, na matuā tāua i le aposetolo o Paulo lenei faamautinoaga a Ieova, ma e faatolu ona ia siiina mai i ana tusi. (Roma 1:17; Kala. 3:11; Epe. 10:38) Po o ā lava mafatiaga e feagai ma le tagata amiotonu, ae o lona faatuatua e mafai ai ona ia vaai i le faataunuuina o le finagalo o le Atua. E finagalo Ieova ina ia tatou taulaʻi i le taui i le lumanaʻi.

17. O le ā le faamautinoaga ua tatou maua mai i le tusi o Sapakuka?

 ¹⁷ O loo i le tusi o Sapakuka se lesona tāua mo i tatou o loo ola i nei aso e gata ai. Ua folafola mai foʻi e Ieova o le a maua e tagata amiotonu uma e faatuatua iā te ia le ola. Seʻi faaauau ona tatou faatuatua pea iā Ieova e tusa po o ā mafatiaga ma popolega e tatou te fesagaʻia. Na faamautinoa mai e Ieova e ala mai iā Sapakuka o le a ia lagolagoina ma laveaʻia i tatou. Ua ia talosaga mai ma le agalelei ina ia tatou faatuatuaina o ia ma faatalitali ma le onosaʻi i lana taimi atofaina, e faatumulia ai le lalolagi i tagata tapuaʻi fiafia ma agamalu i le pulega o le Malo o le Atua.​—Mata. 5:5; Epe. 10:36-39.

18. O ā aafiaga o fetalaiga a Ieova iā Sapakuka?

¹⁸ Faitau le Sapakuka 3:16-19. Na matuā telē le aafiaga o fetalaiga a Ieova iā Sapakuka. Sa ia manatunatu loloto i galuega mamana na faia e Ieova mo ona tagata i le taimi ua teʻa. O lea, na mafai ai ona toe faamalosia lona faatuatua iā Ieova. Na ia iloa e lē o toe umi ona gaoioi lea o Ieova. O lenā vala na faamāfanafanaina ai le perofeta, e ui na ia iloa o le a iai pea ona mafatiaga mo sina taimi. Sa suia le masalosalo o Sapakuka i lona faatuatua ma le olioli i le mana laveaʻi o Ieova. O faamatalaga na faia e Sapakuka, atonu o faaupuga ia e sili ona mataʻina ua faia e se tagata e faaalia ai lona faatuatua. Ua faapea mai nisi faitofā, pe a faaliliu saʻo le fuaiupu e 18, e faaupu faapea, “Ou te osooso ma le olioli i le Alii, ou te taamilomilo ma le fiafia i le Atua.” Maʻeu se faamautinoaga malosi mo i tatou! E lē gata ua faia e Ieova na folafolaga mataʻina, ae ua ia faamautinoa mai foʻi o loo ia faataunuuina i se auala faanatinati lona finagalo.

19. E faapefea ona tatou maua faamāfanafanaga e pei o Sapakuka?

¹⁹ O le feʻau tāua lenei o loo i le tusi o Sapakuka: Ia faatuatua iā Ieova. (Sapa. 2:4) E mafai ona tatou maua ma faatumau lenā faatuatua pe a faamalosia la tatou faiā ma Ieova e ala i le (1) finafinau i le tatalo, ia faailoa atu iā te ia o tatou popolega ma mafatiaga uma; (2) uaʻi totoʻa atu i lana Afioga ma so o se taʻiala mai i lana faalapotopotoga; ma le (3) faatuatua ma faatalitali ma le onosaʻi iā te ia. O mea na sa faia e Sapakuka. E ui na amata lana tusi o loo faanoanoa, peitaʻi e māeʻa ane ua ia maua le mautinoa ma le olioli. Seʻi o tatou mulimuli i lana faaaʻoaʻoga ma tatou lagonaina ai le opo māfana a lo tatou Tamā o Ieova. Pe e lē avea ea lenā ma faalaeiauga sili i lenei lalolagi pogisa?