A o oʻu leʻi faamatalaina atu le mea na tupu, seʻi oʻu faailoa atu le amataga o laʻu auaunaga faataimi atoa.

Na ou fanau i le 1942 i se motu matagofie o le Atu Karipiane o Curaçao. Na ola aʻe loʻu tamā i Suriname, ae na siitia mai o ia i le motu o Curaçao ona o galuega. I ni nai tausaga muamua atu a o oʻu leʻi fanau, na aofia ai o ia i Molimau a Ieova na muamua papatiso i Curaçao. a Na ia faia la matou suʻesuʻega ma nai oʻu tei i vaiaso uma, e ui e lē o taimi uma na matou mananaʻo ai e suʻesuʻe le Tusi Paia. Ina ua 14 oʻu tausaga, na siitia ai lo matou aiga i Suriname, ina ia mafai ai e loʻu tamā ona tausia lona tinā matua.

Na amata ona ou faauō i talavou na maelega i le auaunaga iā Ieova i le faapotopotoga i Suriname. E matutua teisi atu iā te aʻu ma na auauna o ni paeonia sauatoa. Pe a latou faamatalaina mai mea na tutupu i le talaʻiga, ou te vaaia lo latou fiafia tele. Pe a māeʻa sauniga, e matou te talatalanoa ma aʻu uō i mataupu mai i le Tusi Paia, ae o isi taimi pe a matou nofonofo i fafo ma vaavaai i fetu i se pō maninoa. Na latou fesoasoani iā te aʻu ina ia ou iloa le mea e fai i loʻu olaga, ma na ou manaʻo ai ou te galue mo Ieova. O lea na ou papatiso ai i le 16 o oʻu tausaga, ae amata laʻu paeonia sauatoa i le 18 o oʻu tausaga.

E tele lesona na ou aʻoaʻoina o se paeonia, ma na fesoasoani iā te aʻu i laʻu auaunaga faataimi atoa. O se faataʻitaʻiga, o le lesona muamua na ou aʻoaʻoina, o le tāua o le toleniina o isi. Ina ua amata laʻu paeonia, na faaalia e se misionare e igoa iā Willem van Seijl le naunau iā te aʻu. E tele mea na ia aʻoaʻoina ai aʻu, i le auala e taulima ai tiute tauave i le faapotopotoga. Na faatoʻā ou iloa ai i lenā taimi na ou matuā manaʻomia na toleniga. I le tausaga na sosoo ai, na tofia ai aʻu o se paeonia faapito ma amata ona ou fesoasoani  i uso ma tuafāfine na nonofo i vaega maotua o le vaomatua o Suriname. Maʻeu loʻu talisapaia o toleniga na ou maua mai i uso! Talu mai lenā taimi, na ou taumafai ai e mulimuli i faaaʻoaʻoga a uso e ala i le faaavanoa o le taimi e toleni ai isi.

O le lesona lona lua na ou aʻoaʻoina, o le ola i se olaga faafaigofie ma fuafua lelei. I le amataga o masina taʻitasi, e ma te vaai ai ma laʻu paga paeonia faapito po o ā meaʻai ma isi mea e ma te manaʻomia. Ona malaga lea o se tasi o i maʻua i le laumua e ui ina mamao, e faatau mai mea na ma manaʻomia. Sa tatau ona faaaogā lelei le tupe na faaagaga mo mea manaʻomia i masina taʻitasi, ma fuafua lelei le faaaogāina o meaʻai ina ia aulia ai le faaiʻuga o masina. Pe a lē faia faapea, e faigatā ona ma maua se fesoasoani mai i se isi i le vaomatua. Na ou aʻoaʻoina o le ola i se olaga faafaigofie ma fuafua lelei mai lava i loʻu laʻitiiti, ua fesoasoani iā te aʻu e taulaʻi ai pea i le galuega a Ieova i loʻu olaga atoa.

O le lesona lona tolu na ou aʻoaʻoina, o aogā o le aʻoaʻoina o tagata i la latou lava gagana. Na ou ola aʻe ou te tautala i le gagana Holani, faa-Peretania, Papiamento, ma le Sranantongo (e taʻua foʻi lenā gagana o le Sranan), o le gagana taatele i Suriname. Ae i le vaomatua, na ou iloa ai e talilelei mai tagata i le tala lelei pe a talaʻi atu i ai i la latou lava gagana. Na faigatā ona ou tautala i se tasi o na gagana e pei o le Saramaccan, lea e faamaualuga pe faamaulalo ai le leo pe a tautala. Ae na matuā aogā loʻu aʻoaʻoina o lenā gagana. E tele tausaga o oʻu aʻoaʻoina le toʻatele o tagata i le upu moni, ona na mafai ona ou tautala i la latou gagana.

Ae e iai mea na tutupu na ou māsiasi ai. O se faataʻitaʻiga, e iai le aso na ou fesili ai i se tagata aʻoga e tautala i le gagana Saramaccan. Sa tatau ona ou fesili i ai po o ā mai o ia, ona sa tigā lona manava. Ae o le mea moni na ou fesili i ai po ua maʻitaga, ma na māsiasi ai si teine. E ui i lea, ae na ou taumafai malosi e tautala i gagana a tagata na ou talaʻi i ai.

Na tofia aʻu o se ovasia o le matagaluega i le 1970. Na ou faaalia ai i le toʻatele o tagata sa nonofo i le vaomatua, le ata e faatatau i le asiasiga i le ofisa ulu o Molimau a Ieova (Visiting the World Headquarters of Jehovah’s Witnesses). Ina ia oo i na tagata, na matou faaaogā ai ma ni uso se vaa laupapa umī toe lauiti e uia ai le tele o vaitafe i lenā vaomatua. Na uta i lo matou vaa se afi eletise, se tane penisini, molī matagi, ma mea e faaaogā e faaali ai le ata. Pe a matou taunuu i le vaipanoa o loo nonofo ai tagata, ona matou ave lea o mea uma i le nofoaga e faaali ai le ata. O le mea sili na ou mātauina mai i a matou malaga, o le fiafia tele o tagata i ata na faaali. Na ou matuā fiafia e fesoasoani i tagata e aʻoaʻo e faatatau iā Ieova ma le vaega faalelalolagi o lana faalapotopotoga. E sili atu faamanuiaga faaleagaga na ou maua, nai lo o faataulaga faaletino na ou faia e auauna ai iā Ieova.

E ui na ou iloa le aogā o le nofofua i laʻu auaunaga, ae na ou manaʻo ou te faaipoipo. O lea na  ou tatalo patino ai ina ia ou maua se avā, e mafai ona onosaia ma le olioli luʻi o le auauna faataimi atoa i le vaomatua. Pe ā ma le tausaga mulimuli ane ai, na amata ai le ma faigāuō ma Ethel o se paeonia faapito na faaalia le agaga faataulaga. E mai lava i lona laʻitiiti na matuā fiafia Ethel i le faaaʻoaʻoga a le aposetolo o Paulo, ma na manaʻo ai e faaaogā lona olaga atoa i le faiva faa-Kerisiano. Na ma faaipoipo iā Setema i le 1971 ma amata ai ona ma galulue i le galuega femalagaaʻi.

Na ola aʻe Ethel i se aiga e lē tele ni meafaitino. O lea na faigofie ai iā te ia ona auai i le galuega femalagaaʻi i le vaomatua. O se faataʻitaʻiga, e lē tele ni ma mea e feaveaʻi pe a ma asiasi i faapotopotoga e tū i le ogatotonu o le vaomatua. E tatā o ma lavalava ma ma tāʻeele i vaitafe. Na ma masani foʻi i le aai i so o se meaʻai na saunia e i latou na talimālō iā i maʻua, e pei o iguanas ma piranhas, po o so o se mea e latou te maua mai i le togāvao po o vaitafe. E matou te faaaogāina laufaʻi e aai ai pe a leai ni ipu. Pe a leai ni tui ma ni sipuni, e faaaogā o matou lima e aai ai. Na ma lagona ma Ethel, o lo ma faia faatasi o faataulaga a o ma galulue mo Ieova, ua matuā faamalosia ai le maea sautuatolu i le ma faaipoipoga. (Fai. 4:12) E lē mafai ona ma faafesuiaʻia mea na tutupu i le ma auaunaga mo so o se mea!

Ina ua matou toe foʻi mai i se malaga na alu i se vaipanoa i le vaomatua, na tupu ai loa le mea na ou faamatalaina i le amataga. Ina ua oo atu le vaa i vaega aave o le vaitafe, na faafuaseʻi ona tofu i lalo o le vai mo sina taimi ae na vave ona toe ea aʻe i luga. Ae o le mea e faafetai ai, na fai o matou ofu faaola ma e matou te leʻi paʻuʻū ese mai i le vaa. Na tumu le vaa i vai. O lea na matou sasaa ai i le vai meaʻai sa i totonu o ulo, ae faaaogā ulo e asu ese ai le vai mai i le vaa.

Ona ua leai ni a matou meaʻai, na matou fagogota ai a o alu pea le matou faigāmalaga. Ae e leʻi maua ni iʻa. O lea, na matou tatalo ai iā Ieova  e foaʻi mai meaʻai mo lenā aso. O le taimi lava na uma ai la matou tatalo, na lafo ai e se tasi o uso lana ʻafa ma na maua mai ai se iʻa telē na lava lelei ai matou e toʻalima. Na matou aai ai i lenā pō ma maoona lelei ai.

Ina ua mavae le lima tausaga talu ona ma iai i le galuega femalagaaʻi, ae ma mauaina se faamanuiaga e ma te leʻi faatalitalia, o le a avea i maʻua o ni mātua. Na ou fiafia ina ua ou faalogo i lenā tala manaia, e ui e ma te lē iloa po o le ā le mea o le a tupu iā i maʻua. Na ma matuā faanaunau ma Ethel e auauna pea faataimi atoa pe a mafai. I le 1976, na fanau ai le ma tama tama o Ethniël. E lua ma le ʻafa tausaga mulimuli ane ai, ae fanau le isi ma tama tama o Giovanni.

Talu ai na iai se manaʻoga i Suriname i lenā taimi, na faia ai e le ofisa o le lālā se fuafuaga e faaauau pea ona ou auauna o se ovasia o le matagaluega, a o ma tausia le ma fanau. A o lāiti le ma fanau, na tofia ai aʻu o se ovasia femalagaaʻi i matagaluega e lē tele ni faapotopotoga e iai. O lenā faatulagaga, na mafai ai ona ou auauna o se ovasia femalagaaʻi mo ni vaiaso i masina taʻitasi, ma na ou faaaluina isi vaiaso o le masina e auauna ai o se paeonia i le faapotopotoga na tofia i ai i maʻua. E matou te ō faatasi ma Ethel ma le ma fanau e asiasi i faapotopotoga e latalata atu i lo matou fale. Ae ou te alu na o aʻu pe a ou asia faapotopotoga ma fonotaga sa faia i le vaomatua.

Na fai lelei laʻu faasologa o mea e fai ina ia mafai ai ona ou faataunuuina oʻu tiute tauave. Na ou faamautinoa e faia le suʻesuʻega a lo matou aiga i vaiaso taʻitasi. Pe a ou asia faapotopotoga i le vaomatua, e faia e Ethel le suʻesuʻega a lo matou aiga. Ae e matou te faia faatasi o se aiga i le tele e mafai ai. E masani foʻi ona matou faia faatasi mea e fiafia ai o se aiga, e pei o taaloga po o ni tafaoga. E masani ona tuai ona ou moe i le pō, ona e sauniuni mea mo le faapotopotoga. O Ethel o se avā lelei e pei ona faamatalaina i le Faataoto 31:15. E alapō o ia ina ia faamautinoa e fai faatasi le matou mau i taeao, ma inu faatasi la matou tī a o leʻi ō tamaiti i le aʻoga. Maʻeu loʻu lotofaafetai i le iai o se avā e faia faataulaga, ma e fesoasoani pea iā te aʻu e faataunuu oʻu tiute tauave faaleagaga!

E ma te galulue mamafa o ni mātua e fesoasoani i la ma fanau, ina ia alolofa iā Ieova ma fiafia i le faiva faa-Kerisiano. Na ma mananaʻo  e filifili le ma fanau e auauna faataimi atoa, e lē ona o le mea e ma te mananaʻo ai, ae o la laʻua lava filifiliga. E masani ona ma faailoa atu iā i laʻua le olioli e maua i le auaunaga faataimi atoa. Na ma faamatalaina foʻi i ai luʻi na feagai ma lo matou aiga, ae na ma faamatilatila i ai le fesoasoani ma le faamanuia a Ieova iā i matou. Na ma faamautinoa foʻi e faauō la ma fanau i Molimau e faamuamua Ieova i o latou olaga.

Na saunia e Ieova mea uma na matou manaʻomia a o tausia aʻe la ma fanau. Na fai foʻi laʻu vaega e lagolagosua ai i loʻu aiga. O mea na tutupu iā te aʻu i le vaomatua a o avea aʻu o se paeonia faapito nofofua, na aʻoaʻoina ai aʻu ina ia fuafua mamao mo o matou manaʻoga faaletino. Ae e iai taimi e tusa lava po o le ā loʻu fuafua mamao, e lē lava lenā e feagai ai ma se tulaga e tulaʻi mai. I na taimi, ou te talitonu na fesoasoani ai Ieova iā i matou. O se faataʻitaʻiga, i le 1986 e oo i le 1992, na tutupu ai ni fetauaʻiga i Suriname. I na tausaga, e oo lava i mea masani na matuā faigatā lava ona maua. E ui i lea, na saunia e Ieova mea mo i matou.​—Mata. 6:32.

I o matou olaga atoa, na tausia ai e Ieova i matou i taimi uma, ma na matou maua ai le fiafia moni ma le faamalieina. O se faamanuiaga tele iā i maʻua la ma fanau, ma o se faaeaga le tausia aʻe o i laʻua e auauna iā Ieova. O se fiafiaga tele iā i maʻua le filifili o la ma fanau e auauna faataimi atoa. Ua faauu mai Ethniël ma Giovanni mai i aʻoga faale-Tusi Paia, ma o loo la auauna faatasi ma a la avā i le ofisa o le lālā i Suriname.

O le taimi lenei ua ma matutua ma Ethel, ae o loo ma pisi pea i le auaunaga iā Ieova o ni paeonia faapito. O le mea moni, o lo ma pisi tele e leʻi maua ai lava se taimi e aʻo ai laʻu aau. Ae ou te lē o salamō ai i laʻu filifiliga na fai. Pe a toe tepa i tua, ou te lagona ai o laʻu filifiliga na fai a o oʻu talavou e auauna faataimi atoa i loʻu olaga atoa, o se tasi lea o filifiliga e sili ona lelei ua ou faia.