1. E faapefea ona tatou iloa e finagalo Ieova e mafuta vavalalata mai iā i tatou?

 UA VALAAULIA i tatou e Ieova e mafuta vavalalata atu iā te ia. (Iako. 4:8) E finagalo o ia ina ia avea o ia ma o tatou Atua, Tamā, ma a tatou Uō. E na te taliina a tatou tatalo ma fesoasoani mai iā i tatou i taimi faigatā. E na te faaaogāina lana faalapotopotoga e aʻoaʻo ma puipuia i tatou. Ae o le ā e tatau ona tatou faia ina ia vavalalata atu ai iā Ieova?

2. E faapefea ona tatou mafuta vavalalata atu iā Ieova?

² E mafai ona tatou mafuta vavalalata atu iā Ieova, e ala i le tatalo atu iā te ia, faitau i lana Afioga, ma manatunatu loloto i ai. A o tatou faia faapea, o le a faatumulia ai o tatou loto i le alofa ma le talisapaia o ia. Ua uunaʻia i tatou e usiusitaʻi iā te ia, ma avatu le viiga ua matuā alagatatau iā te ia. (Faaa. 4:11) O le tele e tatou te iloa ai Ieova, o le tele foʻi lenā o lo tatou maufaatuatuaina o ia ma le faalapotopotoga ua ia saunia e fesoasoani iā i tatou.

3. E faapefea ona taumafai le Tiapolo e vavaeese i tatou mai iā Ieova, ae o le ā e fesoasoani iā i tatou ina ia lē tuulafoaʻia lo tatou Atua ma lana faalapotopotoga? (Salamo 31:13, 14)

³ Peitaʻi, e taumafai le Tiapolo e vavaeese i tatou mai iā Ieova, aemaise lava pe a tatou feagai ma luʻi. O le ā le auala e na te faia ai faapea? E faasolosolo ona ia faavaivaia lo tatou maufaatuatuaina o Ieova ma lana faalapotopotoga. Ae e mafai  ona tatou teena ana togafiti. Pe a malosi lo tatou faatuatua ma mausalī lo tatou maufaatuatuaina o Ieova, o le a tatou lē tuulafoaʻia lo tatou Atua ma lana faalapotopotoga.​—Faitau le Salamo 31:13, 14.

4. O ā manatu o le a tatou talanoaina i lenei suʻesuʻega?

⁴ I lenei suʻesuʻega, o le a tatou talanoaina ai ni luʻi se tolu mai i fafo atu o le faapotopotoga, ma o na luʻi taʻitasi e ono faavaivaia ai lo tatou maufaatuatuaina o Ieova ma lana faalapotopotoga. E faapefea i nei luʻi ona vavaeeseina ai i tatou mai iā Ieova? O le ā e tatou te faia e tetee atu ai i togafiti a Satani?

5. E faapefea i faigatā ona faavaivaia ai lo tatou maufaatuatuaina o Ieova ma lana faalapotopotoga?

⁵ E iai taimi e tatou te fesagaʻia ai faigatā, e pei o teteega mai i aiga po o le vāea mai i le galuega. E faapefea i na faigatā ona faavaivaia ai lo tatou maufaatuatuaina o le faalapotopotoga a Ieova, ma vavaeese ai i tatou mai iā te ia? Pe a umi se taimi o tatou feagai ma faigatā, atonu e tatou te lagona ai le leai o se faamoemoe ma le lotovaivai. E faaaogā e Satani mea e tutupu e faatupu ai iā i tatou le masalosalo i le alofa o Ieova mo i tatou. E manaʻo le Tiapolo e tatou te tuuaʻia Ieova po o lana faalapotopotoga mo o tatou mafatiaga. E iai se mea faapena na tupu i nisi o tagata Isaraelu na nonofo i Aikupito. I le taimi muamua, na latou talitonu ai na tofia e Ieova Mose ma Arona e faasaʻoloto i latou mai i le nofo pologa. (Eso. 4:29-31) Ae ina ua matuā faatigāina i latou e Farao, na latou tuuaʻia ai Mose ma Arona e ala i le faapea atu: “O oulua ua māfua ai ona ʻinoʻino mai Farao ma ana auauna iā i matou, ma ua oulua tuuina le pelu i o latou lima e fasioti ai i matou.” (Eso. 5:19-21) Na latou tuuaʻia na auauna faamaoni a le Atua. Pagā le leaga o lenā mea! Pe afai ua umi se taimi o e fesagaʻia faigatā, e faapefea ona e faamalosia pea lou maufaatuatuaina o Ieova ma lana faalapotopotoga?

6. O le ā e tatou te aʻoaʻoina mai i le perofeta o Sapakuka i le auala e feagai ai ma faigatā? (Sapakuka 3:17-19)

⁶ Ia sasaa atu lou loto iā Ieova i le tatalo, ma saʻili atu mo lana fesoasoani. Na fesagaʻia e le perofeta o Sapakuka le tele o faigatā. Na iai le taimi na ia masalosalo ai pe manatu mamafa Ieova iā te ia. O lea na ia sasaa atu ai ona faalogona iā Ieova i le tatalo. Na ia faapea atu: “Ieova e, o le ā le umi ou te alaga atu ai mo se fesoasoani ae e te lē faafofoga mai? . . . Aiseā ua e silasila mai ai pea i puapuaga?” (Sapa. 1:2, 3) Na tali Ieova i le tatalo mai i le loto a lana auauna faamaoni. (Sapa. 2:2, 3) Ina ua manatunatu Sapakuka i galuega faasaoola a Ieova, na ia toe maua ai le olioli. Na ia mautinoa e manatu mamafa Ieova iā te ia, ma o le a fesoasoani iā te ia e onosaia ai so o se faigatā. (Faitau le Sapakuka 3:17-19.) O le ā le lesona mo i tatou? Pe a e feagai ma faigatā, ia e tatalo atu iā Ieova ma taʻu atu iā te ia ou faalogona, ona taulaʻi atu lea iā te ia mo lana lagolagosua. O lou faia faapea, e te mautinoa ai e foaʻi mai e Ieova le malosi e te manaʻomia e tumau ai. Pe a e tofo i lana fesoasoani, o le a atili faamalosia ai lou faatuatua iā te ia.

7. O le ā na taumafai tauaiga o Shirley e faatalitonu ai o ia, ae o le ā na mafai ai pea ona ia maufaatuatuaina Ieova?

⁷ Ia tausisi pea i lau faasologa faaleagaga. Ia mātau le auala na fesoasoani ai le faia faapea i se tuafafine e igoa iā Shirley mai i Papua Niu Kini, ina ua ia feagai ma faigatā. b Na matitiva le aiga o Shirley, ma e iai taimi na faigatā ai ona maua ni meaʻai. Na taumafai se  tauaiga e faavaivaia lona maufaatuatuaina o Ieova. Na ia fai iā Shirley: “Na e fai mai o loo fesoasoani le agaga paia o le Atua iā te oe, ae o fea la o iai lenā fesoasoani? O lenā lava e matitiva le tou aiga. Maʻimau le taimi e te talaʻi ai.” Na taʻutino mai Shirley: “Na ou fesili ifo, ʻPe e manatu mamafa mai le Atua iā i matou pe leai?’ O lea na ou tatalo ai loa iā Ieova, ma taʻu atu iā te ia mea uma o loo i loʻu mafaufau. Na faaauau pea ona ou faitauina le Tusi Paia ma a tatou lomiga, ma talaʻi pea ma auai i sauniga.” O lea na ia iloa ai o loo tausia e Ieova lona aiga. E leʻi fia aai lona aiga, ma na latou maua foʻi le fiafia. Na faapea mai Shirley: “Na ou lagona na tali mai Ieova i aʻu tatalo.” (1 Timo. 6:6-8) Pe afai e te tausisi pea i lau faasologa faaleagaga, o le a e lē faatagaina ai foʻi la faigatā po o le masalosalo e vavaeesea ai oe mai iā Ieova.

8. O le ā e ono tupu i uso taʻimua i le faalapotopotoga a Ieova?

⁸ O loo faaaogā e o tatou fili auala o faasalalauga ma fesootaʻiga i le Initaneti, e faasalalau ai faamatalaga pepelo e faatatau i uso taʻimua i le faalapotopotoga a Ieova. (Sala. 31:13) O nisi uso ua puʻea ma molia o ni tagata solitulafono. Na fesagaʻia foʻi e Kerisiano i le uluaʻi senituri se tulaga faapena, ina ua tuuaʻia sesē ma puʻea le aposetolo o Paulo. Na faapefea ona tali atu na Kerisiano?

9. O le ā le auala na tali atu ai nisi Kerisiano ina ua faafalepuipuiina le aposetolo o Paulo?

⁹ E iai nisi o Kerisiano i le uluaʻi senituri, e latou te leʻi toe lagolagoina le aposetolo o Paulo ina ua faafalepuipuiina i Roma. (2 Timo. 1:8, 15) Aiseā? Pe na latou māsiasi iā Paulo ona na vaai tagata iā te ia o sē e solitulafono? (2 Timo. 2:8, 9) Pe ona o lo latou fefefe ina neʻi sauāina ai ma i latou? Po o le ā lava le māfuaaga, ae seʻi mafaufau i faalogona o Paulo. Na ia onosaia le tele o faigatā, ma na oo ai lava ina lamatia lona ola mo na Kerisiano. (Galu. 20:18-21; 2 Kori. 1:8) Aua lava neʻi pei i tatou o i latou na tuulafoaʻiina Paulo i taimi na ia manaʻomia ai le fesoasoani!  O le ā e tatau ona tatou manatua pe a sauāina uso taʻimua?

10. O le ā e tatau ona tatou manatua pe a sauāina uso taʻimua?

¹⁰ Ia manatua le māfuaaga e sauāina ai i tatou ma lē e faapogaia. Ua faapea mai le 2 Timoteo 3:12: “E sauāina foʻi i latou uma e naunau e ola ma le faamaoni i le Atua ma aufaatasi ma Keriso Iesu.” O lea, e lē tatau ona faateʻia i tatou pe a avea uso taʻimua ma taulaʻiga o osofaʻiga a Satani. O lona faanaunauga ina ia gausia le faamaoni o na uso, ma faamataʻu i tatou.​—1 Pete. 5:8.

11. O le ā e tatou te aʻoaʻoina mai i le faaaʻoaʻoga a Oneseforo? (2 Timoteo 1:16-18)

¹¹ Ia faaauau ona e lagolagoina uso taʻimua ma pipii ma le faamaoni iā i latou. (Faitau le 2 Timoteo 1:16-18.) E ese le auala na tali atu ai se Kerisiano i le uluaʻi senituri e igoa iā Oneseforo, ina ua faafalepuipuiina Paulo. ʻE leʻi mā o ia i noanoataga’ o Paulo. Nai lo o lea, na ia saʻili iā Paulo, ma ina ua maua o ia, na ia taumafai e fesoasoani iā Paulo e maua mea na ia manaʻomia. O le faia faapea, na lamatia ai le ola o Oneseforo. O le ā le lesona mo i tatou? E lē tatau ona tatou faatagaina le fefe i tagata e faamataʻuina ai i tatou, pe taofia ai i tatou mai i le lagolagoina o o tatou uso o loo sauāina. Nai lo o lea, ia tatou faia mea uma e tatou te mafaia e fesoasoani ai iā i latou. (Faata. 17:17) E latou te manaʻomia lo tatou alofa ma le lagolagosua.

12. O le ā e tatou te aʻoaʻoina mai i o tatou uso ma tuafāfine i Rusia?

¹² Seʻi mātau le auala o loo fesoasoani ai o tatou uso ma tuafāfine i Rusia, i o latou uso pele o loo faafalepuipuiina. Pe a faia faamasinoga o nisi o i latou, e toʻatele o tatou uso ma tuafāfine e ō atu i le fale faamasino e lagolagoina i latou. O le ā le lesona mo i tatou? Pe a tuuaʻia sesē, puʻea, pe sauāina o tatou uso taʻimua, aua neʻi o tatou matataʻu ai. Ia tatalo mo i latou, fesoasoani i o latou aiga, ma saʻili nisi auala aogā e lagolagoina ai i latou.​—Galu. 12:5; 2 Kori. 1:10, 11.

13. E faapefea i tauemuga ona faavaivaia ai lo tatou maufaatuatuaina o Ieova ma lana faalapotopotoga?

¹³ E ono tauemu mai o tatou tauaiga lē talitonu, o ē e faigaluega ma aʻoʻoga faatasi, i la tatou galuega talaʻi po o le ola foʻi i tapulaa maualuluga tauamio a Ieova. (1 Pete. 4:4) E latou te ono faapea mai: “E matou te fiafia iā te oe, ae o lau lotu ua faasāsā naʻuā ma ua lē toe aogā.” E ono faitioina i tatou e nisi i le auala e tatou te feutagaʻi ai ma tagata faateʻaina. E latou te faapea mai: “E faapefea ona e faapea mai o oe o se tagata alofa?” O faamatalaga faapena e mafai ona faatupuina ai masalosaloga i o tatou mafaufau. Atonu e tatou te tuufesili: ʻPo ua tele naʻuā mea e faafinagaloina e Ieova mai iā te aʻu? Po ua faasāsā naʻuā lana faalapotopotoga?’ Pe afai o loo e feagai ma na tulaga, e faapefea ona e piiama atu pea iā Ieova ma lana faalapotopotoga?

14. E faapefea ona tatou tali atu pe a tauemua i tatou ona o le ola i tapulaa a Ieova? (Salamo 119:50-52)

¹⁴ Ia maumauaʻi e tausia tapulaa a Ieova. Na tausia pea e Iopu tapulaa a Ieova e ui na tauemua o ia i lona faia faapea. E oo lava i se tasi na faafoliga mai o se uō a Iopu, na taumafai e faatalitonu o ia e lē tāua o ia i le Atua, e tusa lava pe e mulimuli i Ana tapulaa pe leai. (Iopu 4:17, 18; 22:3) Ae na musu Iopu e talitonu i na pepelo. Na ia iloa e tonu tapulaa a Ieova i le mea saʻo ma le mea sesē, ma na ia maumauaʻi e tausia na tapulaa. (Iopu 27:5, 6) O le ā le lesona mo i tatou? Aua neʻi o tatou  faatagaina tauemuga e tatou te fesiligia ai tapulaa a Ieova. Seʻi toe mafaufau i mea na tutupu i lou olaga. Atonu e tele taimi na e tofo ai i aogā o tapulaa a Ieova. Ia maumauaʻi e lagolagoina le faalapotopotoga o loo faaauilumaina na tapulaa. E tusa lava po o ā tauemuga mai i tagata, ae e lē mafai ai ona vavaeese i tatou mai iā Ieova.​—Faitau le Salamo 119:50-52.

15. Aiseā na tauemua ai Brizit?

¹⁵ Seʻi mātau le mea na tupu i se tuafafine e igoa iā Brizit mai i Initia. Na tauemua o ia e lona aiga ona o ona talitonuga. E leʻi leva ona papatiso Brizit i le 1997, ae leai loa se galuega a lana tane lē talitonu. O lea na filifili ai lana tane e latou te ō uma ma le la fanau teine, e nonofo faatasi ma ona mātua o loo i le isi aai. Ae o le a ia fesagaʻia ai isi luʻi ogaoga. Talu ai ua lē toe faigaluega lana tane, o lea na manaʻomia ai ona faigaluega faataimi atoa Brizit ina ia tausia ai lona aiga. E lē gata i lea, o le faapotopotoga e sili ona latalata i le mea e nofo ai le tuafafine e pe ā ma le 220 maila (350 kilomita) le mamao. Na tetee foʻi le aiga o le toʻalua o Brizit i lana tapuaʻiga. Na matuā leaga lava teteega, o lea na toe siitia ai le aiga o Brizit. Na maliu faafuaseʻi lona toʻalua. Mulimuli ane, na maliu foʻi lana tama teine e 12 tausaga i le kanesa. Ae e sili atu ona leaga, na tuuaʻia e tauaiga o Brizit o ia ona o na mea na tutupu. Na latou faapea mai ana lē avea o ia ma Molimau a Ieova, e lē tutupu na mea leaga. Ae na maufaatuatuaina pea e Brizit Ieova, ma piiama pea i lana faalapotopotoga.

16. O ā faamanuiaga na maua e Brizit ona o lona piiama atu iā Ieova ma lana faalapotopotoga?

¹⁶ Talu ai e mamao le mea e nofo ai Brizit mai i le faapotopotoga, na faalaeiauina ai o ia e le ovasia o le matagaluega e talaʻi i lenā vaipanoa ma amata ona fai sauniga i lona fale. I le taimi muamua, na manatu le tuafafine e faigatā tele mo ia ona faia lenā mea. Ae na mulimuli lava i le fautuaga a le ovasia o le matagaluega. Na ia faasoa atu i isi le tala lelei, faia sauniga i lona fale, ma faatulaga le taimi mo tapuaʻiga a le aiga ma lana fanau teine. O le ā le iʻuga? Na faia e Brizit le tele o suʻesuʻega  faale-Tusi Paia, ma e toʻatele ana tagata aʻoga na papatisoina. Na amata ona ia auauna o se paeonia sauatoa i le 2005. Na tauia lona maufaatuatuaina o Ieova ma lona faamaoni i lana faalapotopotoga. O loo auauna faamaoni lana fanau teine iā Ieova, ma e lua faapotopotoga ua iai i lenā vaipanoa. Na mautinoa e Brizit na foaʻi mai e Ieova le malosi e feagai ai ma na tulaga faigatā, ma onosaia ai tauemuga mai i lona aiga.

17. O le ā e tatau ona tatou maumauaʻi e fai?

¹⁷ E manaʻo Satani ina ia tatou talitonu, e tuulafoaʻia i tatou e Ieova pe a feagai ma tulaga faigatā, ma o le a sili atu ona leaga le tulaga o mea pe a tatou lagolagoina le faalapotopotoga a Ieova. E manaʻo Satani ia tatou lagona le mataʻu pe a tuuaʻia sesē, sauāina, pe faafalepuipuiina uso taʻimua. E na te faaaogāina tauemuga e faavaivaia ai lo tatou maufaatuatuaina o tapulaa a Ieova ma lana faalapotopotoga. Peitaʻi, ua tatou iloa lelei togafiti leaga a le Tiapolo ma e tatou te lē vālea ai. (2 Kori. 2:11) Ia tatou maumauaʻi e teena pepelo a Satani, ma tumau faamaoni iā Ieova ma lana faalapotopotoga. Ia manatua, e lē mafai ona tuulafoaʻia oe e Ieova. (Sala. 28:7) O lea, ia aua lava neʻi faatagaina se mea e vavaeesea ai i tatou mai iā Ieova.​—Roma 8:35-39.

18. O le ā o le a tatou talanoaina i le mataupu o loo sosoo mai?

¹⁸ Na tatou talanoaina i lenei suʻesuʻega luʻi e tatou te ono fesagaʻia mai i fafo atu o le faapotopotoga. Ae e mafai foʻi ona luʻia lo tatou maufaatuatuaina o Ieova ma lana faalapotopotoga, mai i luʻi i totonu o le faapotopotoga. E faapefea ona tatou taulau i le fesagaʻia o na luʻi? O le a tatou talanoaina lenā manatu i le mataupu o loo sosoo mai.