SUʻESUʻEGA 48
Ia Faaauau Ona E Mafaufau Lelei pe a Luʻia Lou Faamaoni
“Ia faaauau ona e mafaufau lelei i mea uma.”—2 TIMO. 4:5.
PESE 123 Gauaʻi Faamaoni i Faatonuga Faatiokarate
AOTELEGA a
1. O le ā e uiga i ai le faaupuga ia faaauau ona tatou mafaufau lelei? (2 Timoteo 4:5)
E MAFAI ona luʻia lo tatou faamaoni iā Ieova ma lana faalapotopotoga, pe a tatou feagai ma luʻi. E faapefea ona tatou foʻia na luʻi? E manaʻomia ona faaauau ona tatou mafaufau lelei ma mataala, ma tutū mausalī i le faatuatua. (Faitau le 2 Timoteo 4:5.) E faaauau ona tatou mafaufau lelei, pe a tatou toʻafilemu pea ma taumafai e vaai i mea e pei ona silasila i ai Ieova. O lo tatou faia faapea, o le a lē pulea ai o tatou mafaufauga e o tatou faalogona.
2. O ā manatu o le a tatou iloiloina i lenei suʻesuʻega?
2 I le suʻesuʻega ua mavae atu, na tatou talanoaina ai ni luʻi se tolu atonu e tatou te fesagaʻia mai i fafo atu o le faapotopotoga. I lenei suʻesuʻega, o le a tatou iloiloina ai ni luʻi se tolu mai i totonu o le faapotopotoga lea atonu e luʻia ai lo tatou faamaoni iā Ieova: (1) pe a tatou lagona ua faia e se Kerisiano se mea sesē iā i tatou, (2) pe a aʻoaʻia i tatou, ma le (3) pe a faigatā ona tatou talia suiga mai i le faalapotopotoga. E faapefea ona faaauau ona tatou mafaufau lelei, ma faamaoni pea iā Ieova ma lana faalapotopotoga pe a feagai ma na luʻi?
PE A TATOU LAGONA UA FAIA E SE KERISIANO SE MEA SESĒ IĀ I TATOU
3. O le ā le auala e tatou te ono tali atu ai pe a tatou lagona ua faia e se Kerisiano se mea sesē iā i tatou?
3 Pe na iai se taimi na e lagona ai na faia e se Kerisiano se mea sesē iā te oe, atonu o se uso taʻimua? Atonu e leʻi fuafua lenā uso e faatigā iā te oe. (Roma 3:23; Iako. 3:2) Peitaʻi o ana gaoioiga atonu ua e lē fiafia ai. Na ono lē lelei ai lau moe ona o lou mafaufau pea i le mea na tupu. Atonu na e taumānatu ai, ʻAfai o le auala lea e gaoioi ai lea uso, pe e moni lava o le faalapotopotoga lenei a le Atua?’ O le mea tonu lava lenā e manaʻo Satani e te mafaufau i ai. (2 Kori. 2:11) O na mafaufauga sesē, atonu e māfua ai ona tatou vavaeese mai iā Ieova ma lana faalapotopotoga. O lea la, pe a tatou lagona ua faia e se uso po o se tuafafine se mea sesē iā i tatou, e faapefea ona faaauau ona tatou mafaufau lelei ma ʻalofia mafaufauga e faaleagaina ai?
4. Na faapefea ona faaauau ona mafaufau lelei Iosefa ina ua faileagaina o ia, ma o ā lesona e tatou te aʻoaʻoina mai i lana faaaʻoaʻoga? (Kenese 50:19-21)
4 Aua le teulotoina le ita. A o talavou Iosefa, na faileagaina ai o ia e ona uso matutua. Na latou ʻinoʻino iā te ia, ma na mananaʻo isi ona uso e fasioti o ia. (Kene. 37:4, 18-22) Na oo lava ina latou faatauina atu o ia o se pologa. O le iʻuga, e pe ā ma le 13 tausaga na fesagaʻia ai e Iosefa ni tofotofoga ogaoga. Na ono fesiligia e Iosefa pe e alofa moni Ieova iā te ia. Na ono manatu foʻi Iosefa, pe na tuulafoaʻiina o ia e Ieova i le taimi na ia manaʻomia ai le fesoasoani. Ae e leʻi teulotoina e Iosefa le ita. Nai lo o lea, na faaauau ona ia mafaufau lelei e ala i le toʻafilemu pea. Ina ua ia maua le avanoa e tauimasui ai i ona uso, e na te leʻi faia faapea, ae na ia faaalia le alofa ma faamagalo atu iā i latou. (Kene. 45:4, 5) Na māfua ona gaoioi faapea Iosefa ona na ia mafaufau lelei. Nai lo o le uaʻi atu i ona faafitauli, ae na ia taulaʻi atu i le mea e sili ona tāua o le faia o le finagalo o Ieova. (Faitau le Kenese 50:19-21.) O le ā le lesona? Pe a faileagaina oe, aua e te teulotoina le ita iā Ieova pe manatu ua ia tuulafoaʻiina oe. Ae ia manatunatu loloto i le auala ua ia fesoasoani ai iā te oe e onosaia ai na luʻi. E lē gata i lea, pe a faileagaina oe e isi, ia lotofaamagalo ma ia manatua “o le alofa e ufiufi ai le anoanoaʻi o agasala.”—1 Pete. 4:8.
5. Na faapefea ona faaauau ona mafaufau lelei Miqueas ina ua ia lagonaina le faileagaina o ia?
5 Seʻi iloilo se mea na tupu i se uso toeaina mai i Amerika i Saute, e igoa iā Miqueas. b Na ia manatua le taimi na ia lagona ai le matuā faileagaina o ia e ni uso taʻimua. Na ia faapea mai: “O le taimi muamua lea ua oo ai iā te aʻu nei faalogona. Na ou lagona le fefe ma na lē mafai ona ou moe i le pō, ma na ou tagi ona na ou lagona e leai se mea e mafai ona ou faia.” Peitaʻi na faaauau ona mafaufau lelei Miqueas ma taumafai malosi e pulea ona faalogona. Na ia tatalo e lē aunoa iā Ieova e foaʻi mai iā te ia le agaga paia ma le malosi e tumau ai. Na ia saʻili foʻi ni faamatalaga mai i a tatou lomiga ina ia fesoasoani iā te ia. O le ā le lesona? Pe a e lagona ua faileagaina oe e se uso po o se tuafafine, ia toʻafilemu pea ma taumafai e pulea so o se faalogona lē lelei e ono tupu aʻe iā te oe. Atonu e te lē iloa le māfuaaga ua tautala pe gaoioi ai faapena lenā tagata. O lea ia talosaga iā Ieova e fesoasoani mai iā te oe, ina ia tutusa lau vaai ma le vaai a lenā tagata i mea. O le faia faapea, o le a fesoasoani iā te oe e te talitonuina ai ou uso ma tuafāfine ma faamagalo ai iā i latou. (Faata. 19:11) Ia manatua e silafia e Ieova le mea o loo tupu, ma o le a ia foaʻi mai iā te oe le malosi e te manaʻomia e tumau ai.—2 No. 16:9; Fai. 5:8.
PE A AʻOAʻIA I TATOU
6. Aiseā e tāua ai ona tatou vaai i aʻoaʻiga mai iā Ieova o se faailoaga o lona alofa? (Eperu 12:5, 6, 11)
6 O aʻoaʻiga o se mea e tigā. Pe afai e tatou te taulaʻi atu i na o faalogona tigā, atonu o le a amata ai ona tatou manatu māmā i aʻoaʻiga ma faapea ai e lē tonu ma ua mamafa naʻuā. O le iʻuga, atonu ua tatou misia ai le aogā o le aʻoaʻiga, o se faailoaga o le alofa o Ieova mo i tatou. (Faitau le Eperu 12:5, 6, 11.) Pe afai e tatou te faatagaina o tatou faalogona e pulea i tatou, ua tatou tuuina atu ai iā Satani le avanoa e faasesēina ai i tatou. E manaʻo Satani e tatou te teena aʻoaʻiga, ae e sili ona leaga ina ia tatou faamamao ese ai mai iā Ieova ma le faapotopotoga. Pe afai na aʻoaʻia oe, e faapefea ona faaauau ona e mafaufau lelei?
Na talia ma le lotomaulalo e Peteru fautuaga ma aʻoaʻiga, ma avea ai o ia o sē e matuā aogā iā Ieova (Tagaʻi i le palakalafa e 7)
7. (a) E pei ona faaalia i le ata, na faapefea ona faaaogā e Ieova Peteru ina ua ia taliaina aʻoaʻiga? (e) O le ā e te aʻoaʻoina mai i le faaaʻoaʻoga a Peteru?
7 Ia talia aʻoaʻiga, ma fai suiga e manaʻomia. E tele taimi na faasaʻo ai e Iesu Peteru i luma o isi aposetolo. (Mare. 8:33; Luka 22:31-34) Atonu na matuā māsiasi ai Peteru. Ae na tumau faamaoni Peteru iā Iesu. Na ia talia aʻoaʻiga ma aʻoaʻo mai ni lesona mai i ana mea sesē. O le iʻuga na tauia e Ieova le faamaoni o Peteru, ma tuuina atu iā te ia ni tiute tauave tāua i le faapotopotoga. (Ioa. 21:15-17; Galu. 10:24-33; 1 Pete. 1:1) O le ā e tatou te aʻoaʻoina mai i le faaaʻoaʻoga a Peteru? E tatou te maua faatasi ma isi aogā pe a lē taulaʻi i faalogona māsiasi pe a aʻoaʻia, ae ia talia faasaʻoga ma faia suiga e manaʻomia. O lo tatou faia faapea, o le a avea ai i tatou o ni ē e matuā aogā iā Ieova ma o tatou uso.
8-9. O ā faalogona o Bernardo ina ua faatoʻā aʻoaʻia o ia, ae o le ā na fesoasoani iā te ia e faasaʻo ai ona manatu?
8 Seʻi mātau le mea na tupu i le uso o Bernardo mai i Mozambique. Na aveesea lona faaeaga o se toeaina. O le ā le auala na tali atu ai Bernardo i le taimi muamua? Na ia faapea mai: “Na ou teulotoina le ita ona ou te leʻi fiafia i le aʻoaʻiga na ou maua.” Na popole o ia i le vaaiga a isi i le faapotopotoga e faatatau iā te ia. Na ia taʻutino mai, “E pe ā o ni nai masina faatoʻā ou maua le vaaiga saʻo i le mea na tupu ma toe maufaatuatuaina Ieova ma lana faalapotopotoga.” O le ā na fesoasoani iā Bernardo e maua ai se vaaiga saʻo?
9 Na faasaʻo e Bernardo ona manatu. Na ia faapea mai: “A o avea aʻu o se toeaina, na ou faaaogāina le Eperu 12:7, e fesoasoani ai i isi ina ia maua le vaaiga saʻo i aʻoaʻiga a Ieova. O lea na ou fesili ifo ai, ʻO ai e tatau ona faatatauina lenei mau?’ O auauna uma a Ieova e aofia ai ma aʻu.” O lea na faia ai e Bernardo nisi gaoioiga ina ia toe atiaʻe ai lona maufaatuatuaina o Ieova ma lana faalapotopotoga. Na ia faateleina le taimi e faitau ai le Tusi Paia ma manatunatu loloto i ai. E ui na ia lagona le māsiasi i le auala e vaai ai ona uso ma tuafāfine iā te ia, ae na latou galulue faatasi i le faiva ma na fai foʻi ona sao i sauniga a le faapotopotoga. Na iʻu ina toe tofia Bernardo o se toeaina. Pe a aʻoaʻia foʻi oe, taumafai e aua le taulaʻi atu i faalogona māsiasi ona o aʻoaʻiga, ae ia talia ma faia suiga manaʻomia. c (Faata. 8:33; 22:4) O lou faia faapea, o le a e mautinoa ai e tauia oe e Ieova ona o lou faamaoni pea iā te ia ma lana faalapotopotoga.
PE A FAIGATĀ ONA TATOU TALIA SUIGA MAI I LE FAALAPOTOPOTOGA
10. O le ā se suiga i le faalapotopotoga na ono luʻia ai le faamaoni o nisi o tane Isaraelu?
10 E mafai ona tofotofoina lo tatou faamaoni i suiga mai i le faalapotopotoga. Pe a tatou lē faaeteete, e mafai ona tatou faatagaina na suiga e vavaeesea ai i tatou mai iā Ieova. O se faataʻitaʻiga, seʻi mafaufau i se suiga i le faalapotopotoga i lalo o le Tulafono a Mose, lea atonu na aafia ai nisi o tagata Isaraelu. A o leʻi tuuina atu iā Isaraelu le Tulafono, na faia ai e ulu o aiga tiute o ositaulaga. Na latou fausia fata faitaulaga ma ofoina atu taulaga iā Ieova, mo o latou aiga. (Kene. 8:20, 21; 12:7; 26:25; 35:1, 6, 7; Iopu 1:5) Ae ina ua faavaeina le Tulafono, na lē toe faia ai loa e ulu o aiga lenā faaeaga. Na tofia e Ieova ositaulaga mai i le aiga o Arona e ofoina atu taulaga. Ina ua amata aloaʻia lenā suiga, o so o se ulu o se aiga e lē mai i le aiga o Arona e maua atu o ia ofoina se taulaga, e fasiotia o ia. d (Levi. 17:3-6, 8, 9) Pe faamata o lenā suiga o se tasi na o māfuaaga na tetee ai Koru, Tatano, Apiramo, ma taʻitaʻi o le faapotopotoga e toʻa 250 i le taʻitaʻiga a Mose ma Arona? (Nu. 16:1-3) E tatou te lē mautinoa. Po o le ā lava le māfuaaga, ae e leʻi tumau faamaoni iā Ieova Koru ma ē na lagolagoina o ia. Pe a luʻia lou faamaoni i suiga mai i le faalapotopotoga, o le ā e mafai ona e faia?
Ina ua suia le tofiga o le fanauga a Koato, na latou lotomalilie e auauna o ni tagata pepese, leoleoina faitotoʻa, pe vaavaaia fale teuoloa (Tagaʻi i le palakalafa e 11)
11. O le ā e tatou te aʻoaʻoina mai i le faaaʻoaʻoga a nisi o le fanauga a Koato?
11 Ia lagolagoina atoatoa suiga mai i le faalapotopotoga. Na taulima e le fanauga a Koato se galuega matuā tāua, a o fesavaliaʻi le nuu o Isaraelu i le toafa. O taimi uma lava e siitia ai le nuu o Isaraelu, e tauave e nisi o le fanauga a Koato le atolaau o le feagaiga e muamua atu i tagata uma. (Nu. 3:29, 31; 10:33; Iosua 3:2-4) Maʻeu se faaeaga tāua! Peitaʻi, na suia lo latou tofiga ina ua latou taunuu i le Nuu Folafolaina. E leʻi toe manaʻomia ona tauave i taimi uma le atolaau. E oo ane i le taimi na avea ai Solomona ma tupu, na tofia ai nisi o le fanauga a Koato o ni tagata pepese, o nisi e leoleoina faitotoʻa, ae o isi na vaavaaia fale teuoloa. (1 No. 6:31-33; 26:1, 24) E leai se faamaumauga e faapea na faitio le fanauga a Koato, pe na latou talosagaina se galuega e sili atu ona tāua ona na latou faia se galuega tāua a o iai i le toafa. O le ā ua tatou aʻoaʻoina mai ai? Ia lagolagoina atoatoa suiga mai i le faalapotopotoga a Ieova, e aofia ai ma suiga e aafia totino ai i tatou. Ia olioli i so o se tofiga e tuuina atu iā te oe. Ia manatua o lou tofiga e lē o le māfuaaga lenā e tāua ai oe iā Ieova. Ae e tāua iā Ieova lou usiusitaʻi nai lo o so o se tofiga.—1 Samu. 15:22.
12. O ā faalogona o Zaina ina ua suia lona tofiga?
12 Seʻi mātau le faaaʻoaʻoga a le tuafafine o Zaina mai i Sasaʻe Tutotonu. Na suia lona tofiga, o se faaeaga na tautele iā te ia. Na toe tofia o ia e galue i le fanua, ae ua silia ma le 23 tausaga o galue i le Peteli. Na ia faapea mai: “Na matuā faateʻia aʻu ina ua suia loʻu tofiga. Na ou lagona le lē aogā ma na ou fesili ifo, ʻO le ā laʻu mea sesē ua fai?’” E faanoanoa ona na faateteleina ona faalogona tigā, ina ua faapea atu nisi o uso ma tuafāfine iā te ia: “Ana e lelei e lē suia e le faalapotopotoga lou faaeaga.” E iai le taimi na lagona ai e Zaina le matuā lotovaivai ma na tagi ai i pō uma. Ae na ia faapea mai: “E leʻi iai se taimi na ou lē maufaatuatuaina ai le faalapotopotoga, pe masalosalo ai i le alofa o Ieova.” Na faapefea ona faaauau ona mafaufau lelei Zaina?
13. Na faapefea ona foʻia e Zaina ona faalogona lē lelei?
13 Na faapefea ona foʻia e Zaina ona faalogona lē lelei? Na ia faitauina mataupu mai i a tatou lomiga, o loo aumaia ai fautuaga na fesoasoani iā te ia. Na fesoasoani tele iā te ia le mataupu “E Mafai Ona E Manumalo Mai Lagona o le Faavaivai!” i Le Olomatamata o Fepuari 1, 2001. O loo faamatalaina i lenā mataupu faalogona talitutusa na tauivi ma le tusitala o le Tusi Paia o Mareko, ina ua suia lona tofiga. Na faapea mai Zaina, “Na pei le faaaʻoaʻoga a Mareko o se vaifofō i le foʻiaina o loʻu lotovaivai.” Na vavalalata atu foʻi Zaina i ana uō. E na te leʻi faaesea o ia lava ma e na te leʻi soona faamamafa foʻi ona faalogona. Na ia iloa o loo taʻitaʻia e le agaga paia faaiʻuga e faia e le faalapotopotoga a Ieova, ma e manatu mamafa uso taʻimua iā te ia. Ae na ia iloa foʻi, e tatau i le faalapotopotoga a le Atua ona faia le mea sili e faataunuu ai le galuega a Ieova.
14. O ā suiga mai i le faalapotopotoga na faigatā iā Vlado ona talia, ma o le ā na fesoasoani iā te ia?
14 Na faigatā iā Vlado o se uso toeaina e 73 tausaga mai i Slovenia ona talia le tuufaatasi o le faapotopotoga na iai ma le isi faapotopotoga, ae tapunia le Maota mo Sauniga na auai ai. Na ia faapea mai: “Ou te leʻi malamalama pe aiseā ua tapunia ai lenā Maota mo Sauniga matagofie. Na ou lagona le lē fiafia ona e leʻi leva ona matou faafouina lenā maota. O aʻu o se kamuta ma na ou faia nisi o meafale fou na iai. O lenei suiga mai i le faalapotopotoga, na manaʻomia ai le tele o fetuunaʻiga lea e leʻi faigofie mo i matou tagata talaʻi matutua.” O le ā na fesoasoani iā Vlado e lagolagoina ai lenā suiga? Na ia faapea mai: “O le lagolagoina o suiga e faia e le faalapotopotoga a Ieova e tatou te maua ai pea faamanuiaga. O nei suiga ua sauniunia ai i tatou mo suiga tetele i le lumanaʻi.” Po o faigatā iā te oe ona faia fetuunaʻiga ona ua tuufaatasi ni faapotopotoga pe suia foʻi se tofiga? E mautinoa e malamalama Ieova i ou faalogona. Pe a e lagolagoina suiga ma tumau faamaoni iā Ieova ma le faalapotopotoga ua ia faaaogāina, e mautinoa o le a ia faamanuia iā te oe.—Sala. 18:25.
IA FAAAUAU ONA E MAFAUFAU LELEI I MEA UMA
15. E faapefea ona faaauau ona tatou mafaufau lelei pe a feagai ma luʻi mai i totonu o le faapotopotoga?
15 A o tatou latalata atu i le iʻuga o lenei faiga o mea, e tatou te faatalitalia luʻi mai i totonu o le faapotopotoga. O na luʻi e mafai ona luʻia ai lo tatou faamaoni iā Ieova. O lea la, e tatau ona faaauau ona tatou mafaufau lelei. Pe a e lagona ua faileagaina oe e se Kerisiano, aua neʻi e teulotoina le ita. Pe a e maua aʻoaʻiga, aua le taulaʻi i faalogona māsiasi, ae ia talia aʻoaʻiga, ma faia suiga manaʻomia. Pe a faia e le faalapotopotoga a Ieova suiga e te aafia totino ai, ia lagolagoina atoatoa na suiga ma usiusitaʻi i taʻiala.
16. E faapefea ona e maufaatuatuaina pea Ieova ma lana faalapotopotoga?
16 E mafai ona e maufaatuatuaina pea Ieova ma lana faalapotopotoga, pe a luʻia lou faamaoni. Ae ina ia e faia faapea, e manaʻomia ona faaauau ona mafaufau lelei pe ia toʻafilemu pea ma vaai i mea e pei ona silasila i ai Ieova. Ia naunau e suʻesuʻe e faatatau i tagata o le Tusi Paia o ē na taulau i le foʻiaina o luʻi talitutusa faapena, ma manatunatu loloto i a latou faaaʻoaʻoga. Ia talosaga iā Ieova mo le fesoasoani, ma ia aua lava neʻi faaesea oe mai i le faapotopotoga. Po o le ā lava e tupu, e lē mafai e Satani ona vavaeesea oe mai iā Ieova po o Lana faalapotopotoga.—Iako. 4:7.
PESE 126 Ia Mataala, Tutū Mausalī, Ia Faamalolosi
a E mafai ona luʻia lo tatou faamaoni iā Ieova ma lana faalapotopotoga, aemaise lava pe a tatou fesagaʻia luʻi mai i totonu o le faapotopotoga. O le a tatou talanoaina i lenei suʻesuʻega ni luʻi se tolu, ma mea e tatou te faia ina ia faamaoni ai pea iā Ieova ma lana faalapotopotoga.
b Ua suia nisi igoa.
c E mafai ona e maua nisi fautuaga aogā i le mataupu “Pe na Iai Sou Faaeaga? Pe e Mafai Ona E Toe Aapa Atu?” i Le Olomatamata o Aokuso 15, 2009, itu. 30.
d E tusa ai ma le Tulafono, e manaʻomia ona ave e ulu o aiga i le lotoā o le faleʻie paia manu e latou te mananaʻo e fasia mo meaʻai. Ae e lē manaʻomia ona faia faapea e ulu o aiga e mamao mai i le faleʻie paia le mea e nonofo ai.—Teu. 12:21.