1. O le ā e tatou te faatalitalia, ma o le ā e tatou te mautinoa i ai?

 E TATOU te faatalitalia e tatou te fesagaʻia teteega a o faia la tatou galuega talaʻi. Atonu o le a faateteleina na teteega. (Tani. 11:44; 2 Timo. 3:12; Faaa. 16:21) Ae e mafai ona tatou mautinoa, o le a saunia e Ieova le fesoasoani e tatou te manaʻomia. Aiseā? Ona sa fesoasoani Ieova i ana auauna anamua e faataunuu o latou tofiga, e tusa lava pe e faigatā. O se faaaʻoaʻoga, seʻi o tatou iloiloina ni mea na tutupu i le olaga o le perofeta o Esekielu, o lē na talaʻi i tagata Iutaia na ave faapagota i Papelonia.

2. O le ā le auala na faamatala ai e Ieova tagata i le vaipanoa na talaʻi ai Esekielu, ma o le ā o le a tatou talanoaina i lenei suʻesuʻega? (Esekielu 2:3-6)

² O ā ituaiga o tagata na iai i le vaipanoa na talaʻi ai Esekielu? Na faamatalaina i latou e Ieova, o ni tagata “mata faasiasia,” “lotomaaa,” ma le “fouvale.” O i latou o ni tagata faatigā e pei o laau matuitui ma e mataʻutia e pei o akarava. E lētioa a tele taimi na fetalai ai Ieova iā Esekielu: “Aua lava e te fefe”! (Faitau le Esekielu 2:3-6.) Na mafai e Esekielu ona faataunuu lona tofiga e talaʻi ai ona na (1) auina atu o ia e Ieova, (2) faamalosia e le agaga o le Atua, ma le (3) fafagaina i afioga a le Atua. Na faapefea ona fesoasoani nei vala e tolu iā Esekielu, ma e faapefea ona fesoasoani iā i tatou i aso nei?

3. O ā upu na faamalosia ai Esekielu, ma na faapefea ona faamautinoa atu e Ieova lana lagolagosua iā te ia?

³ Na fetalai atu Ieova iā Esekielu: “Ou te auina atu oe.” (Eseki. 2:3, 4) O na upu na matuā faamalosia ai Esekielu. Aiseā? E mautinoa na ia manatua na faaaogā foʻi e Ieova ni upu e talitutusa ma na upu, ina ua ia tofia Mose ma Isaia e avea ma  Ana perofeta. (Eso. 3:10; Isa. 6:8) Na iloa foʻi e Esekielu le auala na fesoasoani ai Ieova i na perofeta ina ia fesagaʻia ai luʻi. O lea, ina ua fetalai faalua Ieova iā Esekielu: “Ou te auina atu oe,” na faamanatu atu ai i le perofeta e tatau ona ia maufaatuatuaina le lagolagosua a Ieova. E lē gata i lea, e tele taimi o loo taʻua ai i le tusi o Esekielu faaupuga nei: “Ona oo mai lea iā te aʻu o le afioga a Ieova,” ma le “Ua toe fetalai mai Ieova iā te aʻu.” (Eseki. 3:16; 6:1) O lea, na matuā mautinoa ai Esekielu na auina atu o ia e Ieova. O Esekielu o le atalii o se ositaulaga, ma e lē taumatea na aʻoaʻoina o ia e lona tamā i auala na faamautinoa atu ai e Ieova i ana perofeta lana lagolagosua. Na fetalai atu foʻi Ieova iā Isaako, Iakopo, ma Ieremia: “Ou te faatasi ma oe.”​—Kene. 26:24; 28:15; Iere. 1:8.

4. O ā manatu faalaeiau na faamalosia ai Esekielu?

⁴ O le ā le tali atu a le toʻatele o tagata Isaraelu i le talaʻiga a Esekielu? Na fetalai Ieova: “O le aiga o Isaraelu, e latou te mumusu e faalogo iā te oe, auā latou te lē fia faalogo mai foʻi iā te aʻu.” (Eseki. 3:7) O lo latou teena o Esekielu, ua latou teena ai foʻi Ieova. O na upu ua faamautinoa atu ai iā Esekielu, o le teena o ia e tagata, e lē faapea ai ua ia lē taulau o se perofeta. Na faamautinoa atu foʻi e Ieova iā Esekielu, pe a faataunuuina feʻau faafaamasinoga na ia folafolaina atu, o le a “iloa [ai e tagata] sa iai le perofeta iā i latou.” (Eseki. 2:5; 33:33) E mautinoa o na upu faalaeiau, na maua ai e Esekielu le malosi na ia manaʻomia e faataunuu ai lana faiva.

5. E tusa ai ma le Isaia 44:8, o fea e tatou te maua mai ai le malosi?

⁵ E tatou te maua foʻi le malosi i le iloaina, o loo auina atu i tatou e Ieova. Ua ia faamamaluina i tatou e ala i le taʻua o i tatou o ana  “molimau.” (Isa. 43:10) Maʻeu se faaeaga tautele! E pei ona augani atu Ieova iā Esekielu: “Aua lava e te fefe,” ua ia augani mai foʻi iā i tatou: “Aua tou te fefefe.” Aiseā e lē tatau ai ona tatou fefefe i ē e tetee mai? Ona o loo auina atu i tatou e Ieova ma lagolagoina i tatou, e pei ona ia faia iā Esekielu.​—Faitau le Isaia 44:8.

6. (a) Ua faapefea ona faamautinoa mai e Ieova e na te lagolagoina i tatou? (e) E faapefea ona tatou maua faamāfanafanaga ma le malosi?

⁶ Ua faamautinoa mai e Ieova, e na te lagolagoina i tatou. O se faataʻitaʻiga, a o leʻi fetalai Ieova: “O outou o aʻu molimau,” na ia faapea mai: “O le a ou faatasi ma oe pe a e sopoʻia vai, ma pe a e sopoʻia vaitafe, e lē lofia ai oe. Pe a e savali i le afi, e te lē afāina ai, pe e te mū i le mumū o le afi.” (Isa. 43:2) A o faia la tatou faiva, e iai taimi e tatou te fesagaʻia ai faafitauli e pei o ni lologa, ma tofotofoga e pei o se afi. E ui i lea, e tatou te talaʻi pea ona o le fesoasoani a Ieova. (Isa. 41:13) E toʻatele tagata i aso nei e latou te teena le feʻau e pei o aso o Esekielu. Ae ia tatou manatua, o lo latou tetee mai, e lē faapea ai ua tatou lē taulau o ni Molimau a le Atua. E faamāfanafanaina ma faamalosia i tatou i le iloaina, e tatou te faafiafiaina Ieova pe a tatou faamaoni pea i le talaʻia o lana feʻau. Ua faapea mai le aposetolo o Paulo: “E maua e tagata taʻitoʻatasi lona lava taui e tusa ma ana galuega.” (1 Kori. 3:8; 4:1, 2) Ua faapea mai se tuafafine ua leva ona paeonia: “Ua ou maua le olioli i loʻu iloaina, e tauia i tatou e Ieova e tusa ai ma a tatou taumafaiga.”

7. O ā aafiaga iā Esekielu i taimi uma na manatunatu ai i le faaaliga na ia vaaia? (Tagaʻi i le ata i le faavaa.)

⁷ Na molimauina e Esekielu le malosi o le agaga o le Atua. I se faaaliga, na vaaia ai e Esekielu le auala na gaoioi ai le agaga paia i foafoaga agaga malolosi, ma uili e sili ona tetelē o le kariota faalelagi. (Eseki. 1:20, 21) O le ā le auala na tali atu ai Esekielu? Na ia tusia le mea na tupu: “Ina ua ou vaai i ai, ona ou faapaʻū faō lea.” O le maofa tele o Esekielu, na ia faapaʻū ai i lalo. (Eseki. 1:28) Mulimuli ane, o taimi uma na manatunatu ai Esekielu i lenā vaaiga mataʻina, na faamalosia ai lona mautinoa e mafai e le agaga o le Atua, ona fesoasoani iā te ia e faataunuu lana faiva.

8-9. (a) O le ā na oo iā Esekielu ina ua faatonuina o ia e Ieova e tulaʻi? (e) Na faapefea ona faamalosia atili e Ieova Esekielu e feagai ai ma luʻi faigatā e tulaʻi mai i le oganuu?

⁸ Na faatonuina e Ieova Esekielu: “Le atalii e o le tagata, inā tulaʻi ia i ou vae ae seʻi oʻu tautala atu iā te oe.” O lenā faatonuga faatasi ai ma le agaga o le Atua, na maua ai e Esekielu le malosi ina ia mafai ai ona tū i luga. Na tusi Esekielu: “Ona faatumuina ai lea o aʻu i le agaga ma faatūina ai aʻu i luga i oʻu vae.” (Eseki. 2:1, 2) Mulimuli ane ma i lana faiva atoa, na taʻitaʻia ai Esekielu e le “aao” o le Atua, po o le agaga paia o le Atua. (Eseki. 3:22; 8:1; 33:22; 37:1; 40:1) Na faamalosia Esekielu e le agaga o le Atua mo le galuega na tuuina atu iā te ia, e talaʻi atu i tagata “ulu malō ma lotomaaa” i lana oganuu. (Eseki. 3:7) Na fetalai atu Ieova iā Esekielu: “Ua ou faia ou foliga ia malō e pei o o latou foliga, ma lou muāulu ia malō e pei o o latou muāulu. Ua ou faia lou muāulu e pei o se taimane, ia sili ona malō nai lo o se maa malō. Aua lava e te fefe iā i latou pe mataʻu i o latou foliga.” (Eseki. 3:8, 9) E pei ua fetalai atu Ieova iā Esekielu: ʻAua le avea le faaulumalō ma le lotomaaa o tagata e faavaivaia ai oe, auā o le a ou faamalosia oe.’

⁹ Ona sosoo ai lea ma le aveina e le agaga o le Atua o Esekielu i le oganuu na talaʻi ai.  Na tusi Esekielu: “Na ou lagona le galue malosi o le mana o Ieova iā te aʻu.” E pe ā ma le vaiaso na faaaluina e Esekielu e manatunatu ma malamalama lelei ai i le feʻau o le a ia talaʻia, ma talaʻi ai ma le mautinoa. (Eseki. 3:14, 15) O lea na faatonuina ai e Ieova Esekielu e alu i se fanua laugatasi, lea na “faatumuina [ai o ia] i le agaga.” (Eseki. 3:23, 24) Ua saunia nei Esekielu e amata lana faiva.

10. O le ā le fesoasoani e tatou te manaʻomia e faataunuu ai la tatou galuega talaʻi, ma aiseā?

¹⁰ O le ā le fesoasoani e tatou te manaʻomia e faataunuu ai la tatou galuega talaʻi? Ina ia tali lenā fesili, mafaufau i le mea na tupu iā Esekielu. A o leʻi amataina lana galuega talaʻi, na foaʻi mai ai e le agaga o le Atua le malosi na ia manaʻomia. E faapena foʻi aso nei, e fesoasoani le agaga o le Atua iā i tatou e faataunuu le galuega talaʻi. Aiseā? Talu ai o loo faasagatau mai Satani iā i tatou, e taofia la tatou galuega talaʻi. (Faaa. 12:17) I le vaaiga faaletagata, e sili atu ona malosi Satani nai lo o i tatou. Ae o la tatou galuega talaʻi, e tatou te manumalo ai iā te ia. (Faaa. 12:9-11) E faapefea? Pe a faia so tatou sao i le galuega talaʻi, e faailoa atu ai e tatou te lē fefefe i faamataʻuga a Satani. O taimi uma e tatou te talaʻi ai, o lenā ua toʻilalo Satani. O le ā e tatou te aʻoaʻoina mai i le mafai ona tatou faataunuuina o la tatou galuega talaʻi, e ui i teteega? Ua mafai ona tatou aʻoaʻoina mai ai, e faamalosia i tatou e le agaga paia ma ua tatou maua le finagalo malie o Ieova.​—Mata. 5:10-12; 1 Pete. 4:14.

11. O le ā e faia e le agaga o le Atua mo i tatou, ma e faapefea ona tatou maua pea lenā agaga?

¹¹ O le ā le isi faamautinoaga e tatou te aʻoaʻoina mai i le iloa, na faia e Ieova foliga ma le muāulu o Esekielu ia malō i se uiga faafaatusa? E foaʻi mai foʻi e le agaga o le Atua le malosi e tatou te fesagaʻia ai so o se faafitauli e tulaʻi mai, a o auai i le galuega talaʻi. (2 Kori. 4:7-9) O le ā la e tatou te faia ina ia faamautinoa ai e tatou te maua pea le agaga o  le Atua? E manaʻomia ona tatou tatalo e lē aunoa mo le agaga o le Atua, ma ia mautinoa e faafofoga mai Ieova i a tatou tatalo. Na aʻoaʻoina e Iesu ona soo: “Ia talosaga atu pea, . . . Ia saʻili atu pea, . . . Ia tuʻituʻi atu pea.” Na tali Ieova e ala i le foaʻi mai o “le agaga paia iā i latou o ē e ōle atu iā te ia.”​—Luka 11:9, 13; Galu. 1:14; 2:4.

12. E tusa ai ma le Esekielu 2:9–3:3, o fea na aumai ai le tusi tāʻai, ma o ā mea na tusia ai?

¹² E lē gata na faamalosia e le agaga o le Atua Esekielu, ae na fafagaina foʻi o ia i afioga a le Atua. Na vaaia e Esekielu i se faaaliga se lima o loo uuina se tusi tāʻai. (Faitau le Esekielu 2:9–3:3.) O fea na aumai ai lenā tusi tāʻai? O ā mea na tusia ai? Na faapefea ona fafagaina ai Esekielu? Seʻi o tatou iloiloina. Na aumai i le nofoālii o le Atua. Atonu na faaaogā e Ieova se tasi o agelu mai i agelu e toʻafā na vaaia e Esekielu, e tuuina atu iā te ia le tusi tāʻai. (Eseki. 1:8; 10:7, 20) Na tusia i le tusi tāʻai afioga a le Atua, po o se feʻau faafaamasinoga umī lea o le a talaʻia atu e Esekielu i tagata fouvale na ave faapagota. (Eseki. 2:7) Na tusia lenā feʻau i luma ma tua o le tusi tāʻai.

13. O le ā na faatonuina e Ieova Esekielu e fai i le tusi tāʻai, ma aiseā na suamalie ai iā Esekielu?

¹³ Na faatonuina e Ieova lana perofeta, ina ia ʻai le tusi tāʻai ma “ia tumu ai [lona] laualo.” Na usitaʻi Esekielu ma na ia ʻai le tusi tāʻai atoa. O le ā le uiga o lenā vaega o le faaaliga? Na manaʻomia ona malamalama atoatoa Esekielu i le feʻau o le a ia talaʻia. Sa tatau ona ia talitonu i lenā feʻau ma uunaʻia ai o ia e talaʻi atu. Ae e iai se mea na tupu na faateʻia ai. Na tofo Esekielu i le tusi tāʻai ma na ʻsuamalie e pei o le meli.’ (Eseki. 3:3) Aiseā? O le talaʻia o le feʻau a Ieova, o se faaeaga na suamalie pe tautele iā Esekielu. (Sala. 19:8-11) Na matuā lotofaafetai Esekielu, ona na finagalo malie Ieova e tofia o ia e auauna o se perofeta.

14. O le ā na fesoasoani iā Esekielu e sauniunia ai o ia mo lona tofiga?

¹⁴ Mulimuli ane, na faatonuina e Ieova Esekielu e faapea: “Ia faalogo i upu uma ua ou fai atu ai iā te oe, ma ia talia i lou loto.” (Eseki. 3:10) O na faatonuga na taʻu atu ai e Ieova iā Esekielu, ina ia manatua upu uma o loo tusia i le tusi tāʻai ma manatunatu loloto i ai. O le faia faapea, na fafagaina ai o ia i afioga a le Atua. Na sauniunia ai foʻi o ia e faailoa atu se feʻau e lē faigofie ona taʻu atu i tagata. (Eseki. 3:11) Talu ai ua i lona loto ma ona laugutu le feʻau a le Atua, ua nofosauni ai o ia e amata ona talaʻi ma faataunuu lona tofiga.​—Faatusatusa i le Salamo 19:14.

15. O le ā e manaʻomia ona “talia i [o tatou] loto” ina ia tatou tumau ai?

¹⁵ Ina ia tatou tumau i la tatou faiva, e manaʻomia ona fafagaina pea i tatou i afioga a le Atua. E manaʻomia ona “talia i [o tatou] loto” mea uma ua fetalai mai ai Ieova iā i tatou. O loo fetalai mai Ieova iā i tatou e ala mai i lana Afioga le Tusi Paia. E faapefea ona tatou faamautinoa e taaʻina pea e le Afioga a le Atua o tatou mafaufauga, faalogona, ma uunaʻiga?

16. E faapefea ona tatou malamalama lelei i le Afioga a le Atua?

¹⁶ Pe a tatou aai ma faaalu se taimi e faamalū lelei ai meaʻai, o le a maua ai e o tatou tino le malosi. E faapena foʻi ona tatou maua le malosi, pe a tatou aai faaleagaga e ala i le suʻesuʻeina o le Afioga a le Atua ma manatunatu loloto i ai. Ia tatou manatua le lesona e faatatau  i le tusi tāʻai. E finagalo Ieova “ia tumu [o tatou] laualo” i lana Afioga. O lona uiga, ia tatou malamalama lelei i ai. E tatou te faia faapea e ala i le tatalo, faitau, ma manatunatu loloto i ai. Muamua, e tatou te tatalo ina ia sauniunia o tatou loto e talia manatu o le Atua. Ona tatou faitauina lea o se mau mai i le Tusi Paia, ma taofi ina ia manatunatu loloto i mea o loo tatou faitauina. O le ā le iʻuga? O le tele e tatou te manatunatu loloto ai, o le tele foʻi lenā o lo tatou malamalama i le Afioga a le Atua.

17. Aiseā e matuā tāua ai le manatunatu loloto i mea e tatou te faitau ai i le Afioga a le Atua?

¹⁷ Aiseā e matuā tāua ai le faitauina o le Afioga a le Atua ma manatunatu loloto i ai? O le faia faapea e tatou te maua ai le malosi e talaʻia ai le feʻau o le Malo i le taimi lenei, ma le feʻau faafaamasinoga ua toeitiiti ona tatou talaʻia lea. O lo tatou manatunatu loloto foʻi i uiga matagofie o Ieova, o le a atili ai ona faamalosia la tatou faiā ma ia. O le iʻuga, o le a tatou olioli ai i se mea e matuā suamalie pe tautele, o le filemu o le loto ma le faamalieina.​—Sala. 119:103.

18. O le ā o le a iloa e tagata o le oganuu, ma aiseā?

¹⁸ E ui e leʻi tofia i tatou o ni perofeta e pei o Esekielu, ae ua tatou maumauaʻi e talaʻia pea le feʻau a Ieova ua tusia i lana Afioga seʻia oo ina faamāeʻaina le galuega talaʻi, e tusa ai ma le finagalo o Ieova. Pe a oo mai le taimi o le faamasinoga a Ieova, e lē mafai e tagata i le oganuu ona fai ni faamolemolega, e latou te leʻi mauaina se lapataʻiga pe e leʻi amanaʻia i latou e le Atua. (Eseki. 3:19; 18:23) Nai lo o lea o le a latou iloa ai, o le feʻau na tatou talaʻia e mai i le Atua.

19. E faapefea ona tatou maua le malosi e faataunuu ai la tatou faiva?

¹⁹ E faapefea ona tatou maua le malosi e faataunuu ai la tatou faiva? E tatou te maua le malosi e ala i vala e tolu lea na faamalosia ai foʻi Esekielu. E tatou te talaʻi pea ona e tatou te iloa o loo auina atu i tatou e Ieova, o loo faamalosia i tatou e le agaga o le Atua, ma o loo fafagaina i tatou i le Afioga a le Atua. O le fesoasoani a Ieova ua uunaʻia ai i tatou e faataunuu la tatou faiva, ma tumau ai “seʻia oo i le iʻuga.”​—Mata. 24:13.