1-2. (a) O ā fesili o le a tatou taliina? (e) E faapefea ona tatou iloa e naunau Ieova e fesoasoani mai iā i tatou?

 E MAFAI ona fesoasoani Ieova iā i tatou ina ia fesagaʻia luʻi o le olaga, ma maua le olioli i la tatou auaunaga paia. O ā auala ua fesoasoani mai ai Ieova? E faapefea ona aogā atoatoa iā i tatou le fesoasoani ua saunia e Ieova? O le a taliina na fesili i lenei suʻesuʻega. Peitaʻi a o tatou leʻi taliina na fesili, seʻi o tatou iloiloina le fesili lenei: Pe e finagalo moni lava Ieova e fesoasoani mai iā i tatou?

² E mafai ona tatou maua le tali i se upu na faaaogā e le aposetolo o Paulo i lana tusi i Kerisiano Eperu. Na tusi Paulo: “O Ieova o loʻu fesoasoani ia; ou te lē fefe lava. O le ā se mea e mafai ona faia e tagata iā te aʻu?” (Epe. 13:6) O loo taʻua i nisi tusitusiga faale-Tusi Paia le uiga o le upu “fesoasoani” e pei ona tusia i lenei fuaiupu, e faasino atu i se tagata o loo momoʻe atu e fesoasoani i se tasi o loo alaga mai mo se fesoasoani. Seʻi faaata i o tatou mafaufau Ieova o loo faataalise mai e fesoasoani i se tasi ua mafatia. E mautinoa e te ioe i lenei faamatalaga, o loo faamatilatila mai ai le finagalo malie o Ieova ma lona naunau e avea ma o tatou Fesoasoani. Ioe, e mafai ona tatou onosaia ma le olioli luʻi ona o loo faatasi Ieova ma i tatou.

3. O ā auala e tolu o loo fesoasoani mai ai Ieova iā i tatou e onosaia ai ma le olioli luʻi?

³ O ā nisi o auala o loo fesoasoani ai Ieova iā i tatou e onosaia ai ma le olioli luʻi? Ina ia tali lenā fesili, seʻi o tatou iloiloina se vaega o le tusi o Isaia. Aiseā? O le tele o valoaga na faagaeeina Isaia e tusia, e faatatau mai i auauna a le Atua i aso nei. E lē gata i lea, e masani ona faamatalaina e Isaia Ieova i ni faaupuga e  faigofie ona tatou malamalama ai. O se faataʻitaʻiga o le Isaia mataupu e 30. O loo faaaogā e Isaia i lenā mataupu se gagana faafaatusa e faaata ai i o tatou mafaufau le fesoasoani a Ieova iā i tatou o ona tagata: (1) e ala i lona faafofoga lelei mai ma tali mai i a tatou tatalo, (2) e ala i lona saunia o le taʻitaʻiga mo i tatou, ma le (3) e ala i lona faamanuia o i tatou i le taimi lenei ma le lumanaʻi. Seʻi o tatou iloiloina totoʻa nei auala e tolu, o loo fesoasoani mai ai Ieova iā i tatou.

4. (a) Na faapefea ona faamatalaina e Ieova tagata Iutaia i aso o Isaia, ma o le ā e leʻi taofia e Ieova? (e) O le ā le faamoemoe na folafola atu e Ieova i tagata Iutaia faamaoni? (Isaia 30:18, 19)

⁴ I upu amata o le Isaia mataupu e 30, o loo faamatalaina ai e Ieova tagata Iutaia o ni “atalii lotomaaa,” o ē e ʻfaaopoopo le isi agasala i luga o le isi agasala.’ Na toe fetalai foʻi Ieova: “O i latou o se nuu fouvale, . . . e mumusu e faalogo i le tulafono a Ieova.” (Isa. 30:1, 9) Talu ai e leʻi fia faalogo tagata, na valoia ai e Isaia e lē taofia e Ieova mafatiaga e oo iā i latou. (Isa. 30:5, 17; Iere. 25:8-11) O lea na ave faapagota ai i latou e ʻautau a Papelonia. Peitaʻi, sa iai ni tagata faamaoni i na tagata Iutaia, ma na iai se feʻau e latou te maua ai le faamoemoe na taʻu atu e Isaia iā i latou. Na ia taʻu atu e iai le aso o le a toe faafoʻisia ai i latou e Ieova i Ierusalema. (Faitau le Isaia 30:18, 19.) O le mea tonu lenā na tupu. Na iai le aso na faasaʻoloto ai e Ieova i latou mai i le ave faapagota. Peitaʻi e leʻi vave ona tupu lenā mea. O le faaupuga “o le a faatalitali pea ma le onosaʻi Ieova ina ia agalelei atu iā te outou,” ua faailoa mai ai e umi se taimi faatoʻā faasaoina e Ieova tagata Iutaia faamaoni. O le mea moni, e 70 tausaga na ave faapagota ai tagata Isaraelu i Papelonia, a o leʻi faatagaina se vaega na totoe o i latou e toe foʻi i Ierusalema. (Isa. 10:21; Iere. 29:10) O le taimi lava na latou taunuu ai i lo latou laueleele, na suia ai loimata o le faanoanoa a o ave faapagota i latou, i loimata o le fiafia.

5. O le ā le faamautinoaga e tatou te maua mai i le Isaia 30:19?

⁵ I aso nei, e faamāfanafanaina i tatou i upu nei: “O le a matuā agalelei mai lava o ia iā te outou pe a outou alalaga atu mo se fesoasoani.” (Isa. 30:19) Ua faamautinoa mai e Isaia, e faafofoga lelei mai Ieova pe a tatou alalaga atu iā te ia ma e tali vave mai i a tatou tatalo. Na toe faapea mai Isaia: “O le taimi lava e faafofoga mai ai o ia o le a tali mai o ia iā te outou.” O nei upu faamāfanafanaloto, ua faamanatu mai ai iā i tatou le finagalo malie o lo tatou Tamā ma lona naunau e fesoasoani iā i latou e talosaga atu iā te ia. O le iloaina o lenei fesoasoani, e mafai ai ona tatou tumau ma le olioli.

6. Ua faapefea ona faailoa mai i upu a Isaia e faafofoga Ieova i tatalo a ana auauna taʻitoʻatasi?

⁶ O le ā se isi faamautinoaga e tatou te maua mai i lenei fuaiupu e faatatau i a tatou tatalo? E uaʻi mai Ieova i tatalo a i tatou taʻitoʻatasi. E faapefea ona tatou iloa? I le vaega muamua o le Isaia mataupu e 30 o le suinauna “outou” e numera tele, ona o loo fetalai atu Ieova i se vaega. Peitaʻi i le fuaiupu e 19 o le suinauna “outou” o loo iai, e numera tasi i le gagana Eperu ona o loo fetalai atu Ieova i tagata taʻitoʻatasi. Na tusi Isaia: “E tou te lē fetagisi”; “o le a matuā agalelei mai lava o ia iā te outou”; “o le a tali mai o ia iā te outou.” Talu ai o Ieova o se Tamā alofa, e na te lē faia la se faamatalaga faavaivailoto i se atalii po o se afafine e faatusatusa ai le tasi i le isi. Ae e silasila mai o ia iā i tatou taʻitoʻatasi, ma uaʻi mai i a tatou tatalo.​—Sala. 116:1; Isa. 57:15.

7. Na faapefea ona faamatilatila e Isaia ma Iesu le tāua o le tatalo faatauanau atu pea?

⁷ Pe a tatou tatalo i le Atua e faatatau i se mea o loo tatou mafatia ai, atonu e vave ona  tali mai Ieova i le foaʻi mai o le malosi e tatou te fesagaʻia ai se mafatiaga. Ae afai e lē vave ona faamutaina se mafatiaga e pei ona tatou mananaʻo ai, atonu la e manaʻomia ona tatalo pea iā Ieova e foaʻi mai le malosi e onosaia ai lenā luʻi. E finagalo Ieova e tatou te faia faapea. O loo atagia mai lenā manatu i upu nei a Isaia: “Ia faaauau ona tatalo atu iā [Ieova].” (Isa. 62:7) O le ā le uiga? E tatau ona tatou tatalo faatauanau atu pea iā Ieova e pei ua tatou lē faatagaina o ia e mālōlō. Ua faamanatu mai iā i tatou i na upu a Isaia, talafaatusa a Iesu e faatatau i le tatalo o loo maua i le Luka 11:8-10, 13. O loo faalaeiau ai i tatou e Iesu ina ia tatalo “faatauanau atu pea” ma “ia talosaga atu pea” mo le agaga paia. E mafai foʻi ona tatou faatoga atu iā Ieova e saunia mai se taʻiala, ina ia mafai ai ona tatou faia ni filifiliga talafeagai.

8. Na faapefea ona faataunuuina upu o loo i le Isaia 30:20, 21 i aso anamua?

⁸ Faitau le Isaia 30:20, 21. Ina ua siʻomia e ʻautau a Papelonia Ierusalema mo le tausaga ma le ʻafa, na avea o se mea masani i tagata mafatiaga na latou tofo i ai, ma na pei ai lava o se meaʻai ma se vai. Ae i le fuaiupu e 20 ma le 21, na folafola atu ai e Ieova i tagata Iutaia o le a ia laveaʻiina i latou pe a salamō ma sui a latou amio. Na taʻua e Isaia Ieova o lo latou “Aʻoaʻo Sili.” Na folafola atu e Isaia i tagata, o le a aʻoaʻo i latou e Ieova i le auala e na te taliaina e tapuaʻi atu ai. Na faataunuuina na upu ina ua faasaʻoloto mai tagata Iutaia na ave faapagota. Na avea Ieova ma Aʻoaʻo Sili mo ona tagata, ma na taulau ona tagata i le toe faafoʻisia o le tapuaʻiga mamā ona o lana taʻitaʻiga. Maʻeu se faamanuiaga ua tatou maua i le avea ai o Ieova ma o tatou Aʻoaʻo Sili i aso nei!

9. O le ā se tasi o auala ua tatou maua ai taʻiala a Ieova i aso nei?

⁹ O loo faaauau pea ona faaaogā e Isaia se gagana faafaatusa e faamatala ai i tatou, o ni tagata aʻoga o loo aʻoaʻo e Ieova i ni auala se lua. Muamua na taʻua e Isaia: “E tou te vāai atu i lo outou Aʻoaʻo Sili i o outou lava mata.” I lenei talafaatusa, o loo faailoa mai ai le Aʻoaʻo o loo tū i luma o ana tagata aʻoga. O lea la, o se faaeaga lo tatou mauaina o aogā mai i ana aʻoaʻoga i aso nei. E faapefea ona aʻoaʻo i tatou e Ieova? E na te aʻoaʻoina i tatou e ala i lana faalapotopotoga. Maʻeu lo tatou lotofaafetai i taʻiala manino ua tatou maua mai i lana faalapotopotoga! O aʻoaʻoga ua tatou maua mai i sauniga a le faapotopotoga, tauaofiaga, lomiga, polokalame o le TV i le Initaneti ma le tele o isi auala, ua mafai ona fesoasoani iā i tatou i nei taimi faigatā ina ia tumau ai ma le olioli.

10. O le ā le auala ua tatou faalogo ai “i le upu mai i o [tatou] tua”?

 ¹⁰ O loo taʻua e Isaia le auala lona lua o loo aʻoaʻo ai e Ieova i tatou. Na ia faapea mai: “O le a faalogo o outou taliga i le upu mai i o outou tua.” O loo faamatalaina i inei e Isaia Ieova o se aʻoaʻo mataalia o loo savali mai i tua o ana tagata aʻoga, ma faasino atu iā i latou le auala e ui ai ma avatu i ai faatonuga. I aso nei, o loo tatou faalogoina le siʻufofoga o Ieova mai i o tatou tua. E faapefea? Ua autausagā talu ona tusia afioga faagaeeina a le Atua i le Tusi Paia. O lea la, pe a tatou faitauina le Tusi Paia e pei lava o loo tatou faalogo atu i le siʻufofoga o le Atua mai i o tatou tua.​—Isa. 51:4.

11. Ina ia tatou tumau ma le olioli, o ā vala e tatau ona tatou faia, ma aiseā?

¹¹ E faapefea ona aogā atoatoa iā i tatou taʻiala ua saunia mai e Ieova, e ala i lana faalapotopotoga ma lana Afioga? Mātau, na taʻua e Isaia ni faaupuga se lua. Muamua, “o le ala lenei.” Lona lua, “ia outou savavali ai.” (Isa. 30:21) E lē lava le tau ina iloa “o le ala.” E manaʻomia foʻi ona tatou “savavali ai.” Ua tatou aʻoaʻoina mea e faafinagaloina e Ieova mai iā i tatou mai i lana Afioga, e pei ona faamalamalamaina mai e lana faalapotopotoga. Ua tatou aʻoaʻoina foʻi le auala e faatatau ai mea ua tatou aʻoaʻoina. Ina ia tatou tumau ma le olioli i la tatou auaunaga iā Ieova, e manaʻomia ona tatou faatatauina na vala e lua. E na o le pau lenā o le auala e tatou te mautinoa ai, o le a faamanuia Ieova iā i tatou.

12. E tusa ai ma le Isaia 30:23-26, na faapefea ona faamanuia e Ieova ona tagata?

¹² Faitau le Isaia 30:23-26. Na faapefea ona faataunuuina lenei valoaga i tagata Iutaia na toe foʻi i lo latou laueleele, ina ua faasaʻoloto mai i Papelonia? Na latou mauaina le anoanoaʻi o faamanuiaga faaletino ma le faaleagaga. Na matuā fau ma soloi meaʻai na faamanuia ai e Ieova ona tagata. Ae o le mea e sili ona tāua, o le anoanoaʻi o meaʻai faaleagaga na faamanuia ai Ieova iā i latou, a o faasolosolo ona toe faafoʻisia le tapuaʻiga mamā. O faamanuiaga faaleagaga na maua e tagata o le Atua i lenā taimi, na matuā sili atu i lo o so o se faamanuiaga na latou tofo muamua i ai. E pei ona taʻua i le fuaiupu e 26, na matuā faatuputeleina e Ieova le malamalama faaleagaga. (Isa. 60:2) O faamanuiaga a Ieova, na fesoasoani i ona tagata e auauna ai pea iā te ia ma le olioli, ma faamalosia ai pea i latou “ona o le lelei o o latou loto.”​—Isa. 65:14.

13. Ua faapefea ona faataunuuina i aso nei le valoaga e faatatau i le toe faafoʻisia o le tapuaʻiga mamā?

¹³ Pe e mafai ona faatatau mai iā i tatou i aso  nei, le valoaga e uiga i le toe faafoʻisia o le tapuaʻiga mamā? Ioe! E faapefea? Talu mai le 1919 T.A., e faitau miliona i latou ua saʻoloto mai iā Papelonia le Aai Tele, le emepaea o lotu sesē. Ua latou maua se nofoaga e sili ona lelei nai lo o le Nuu Folafolaina na tuuina atu iā Isaraelu. Ua latou maua se parataiso faaleagaga. (Isa. 51:3; 66:8) O le ā lenā parataiso faaleagaga?

14. O le ā le parataiso faaleagaga, ma o ai o loo ola ai i inā i aso nei? (Tagaʻi i le Uiga o Faaupuga.)

¹⁴ Talu mai le 1919 T.A., ua matuā olioli le ʻaufaauuina e ola ai i se parataiso faaleagaga. b A o faagasolo taimi, o i latou e faamoemoe e ola e faavavau i le lalolagi po o “isi mamoe,” ua latou ola foʻi i lenei parataiso faaleagaga ma olioli ai i le anoanoaʻi o faamanuiaga a Ieova.​—Ioa. 10:16; Isa. 25:6; 65:13.

15. O fea o loo iai le parataiso faaleagaga?

¹⁵ O fea o loo iai le parataiso faaleagaga i aso nei? E tatou te maua i so o se vaega o le lalolagi tagata tapuaʻi o Ieova. O lea la, o le parataiso faaleagaga o loo latou ola ai, e maua foʻi i so o se vaega o le lalolagi. Po o fea lava la o le lalolagi o loo tatou iai, e mafai ona avea i tatou o ni ē e ola ai i le parataiso faaleagaga, pe a tatou lagolagoina pea le tapuaʻiga moni.

16. E faapefea ona tatou uaʻi atu pea i le matagofie o le parataiso faaleagaga?

¹⁶ Ina ia tatou iai pea i le parataiso faaleagaga, o se tasi o mea e tatau ona tatou faia, o le faaalia pea o lo tatou talisapaia loloto o le faapotopotoga Kerisiano i le lalolagi aoao. E faapefea ona tatou faia lenā mea? E ala i lo tatou uaʻi atu pea i uiga matagofie o i latou o loo iai, ae e lē o o latou vaivaiga. (Ioa. 17:20, 21) Aiseā e matuā tāua ai le faia faapea? Seʻi manatu i le faatusatusaga lenei. E tatou te fia vāai i le tele o ni laau matagofie eseese i totonu o se paka po o se togālaau. E faapena foʻi le parataiso faaleagaga o loo iai faapotopotoga i aso nei, o loo faamatagofieina i le eseese o tagata o loo ola ai ua pei o ni laau matagofie. (Isa. 44:4; 61:3) E manaʻomia ona faamautinoa e tatou te uaʻi atu pea i le matagofie o le  togālaau, ae ʻalofia le uaʻi atu i vaega ua leaga o “laau” o loo latalata atu iā te oe. E lē mafai ona tatou faatagaina o tatou masei po o masei o isi i le faapotopotoga, e faalavelavea ai lo tatou uaʻi atu i le matagofie o le autasi o le faapotopotoga Kerisiano i le lalolagi aoao.

17. O le ā e mafai ona faia e i tatou taʻitoʻatasi e saosaolaumea ai i le autasi o le faapotopotoga?

¹⁷ E faapefea ona fai so tatou sao i le tausia o le autasi? E ala i le avea o i tatou o ni ē e faatupuina le filemu. (Mata. 5:9; Roma 12:18) O taimi uma e tatou te tausolomua ai e tausia le filemu ma isi i le faapotopotoga, ua tatou saosaolaumea ai i le matagofie o le parataiso faaleagaga. Ia tatou manatua, ua tosina mai e Ieova i le tapuaʻiga mamā tagata taʻitoʻatasi o loo iai i le parataiso faaleagaga. (Ioa. 6:44) Seʻi manatu i le fiafia tele o Ieova, pe a silasila mai o loo tatou galulue mamafa e faamalosia le filemu ma le autasi o ana auauna, o i latou e na te silasila i ai o ni ē e tautele iā te ia!​—Isa. 26:3; Ha. 2:7.

18. O le ā e tatau ona tatou manatunatu loloto pea i ai, ma aiseā?

¹⁸ E faapefea ona aogā atoatoa iā i tatou faamanuiaga ua tatou maua o ni auauna a le Atua? E manaʻomia ona tatou manatunatu loloto i mea ua tatou suʻesuʻeina i le Afioga a le Atua, ma a tatou lomiga faale-Tusi Paia. E fesoasoani iā i tatou le suʻesuʻe ma le mafaufau loloto ina ia atiaʻe ai uiga faa-Kerisiano, lea e uunaʻia ai i tatou e faaalia le “alofa faaleuso” ma “ia matuā alofa faapelepele le tasi i le isi” i le faapotopotoga. (Roma 12:10) E faamalosia la tatou faiā ma Ieova, pe a tatou manatunatu loloto i faamanuiaga ua tatou maua. O le manatunatu loloto foʻi i faamanuiaga ua saunia e Ieova mo i tatou i le lumanaʻi, o le a matuā moni ai lo tatou faamoemoe o le auauna pea iā te ia e faavavau. O na mea uma, o le a saosaolaumea i lo tatou mauaina o le fiafia i le taimi lenei i le auaunaga iā Ieova.

19. (a) E tusa ai ma le Isaia 30:18, o le ā e tatou te mautinoa i ai? (e) O le ā e fesoasoani iā i tatou e tumau ai ma le olioli?

¹⁹ “O le a tulaʻi” Ieova mo i tatou pe a ia aumaia le iʻuga i lenei lalolagi amioleaga. (Isa. 30:18) E tatou te mautinoa e lē faatagaina e Ieova le lalolagi a Satani e iai pea e oo lava i se aso se tasi, talu ai o ia o “le Atua e faamasinotonu.” (Isa. 25:9) E tatou te faatalitali ma le onosaʻi i lenā taimi o le a laveaʻiina ai i tatou e Ieova. Ae i le taimi lenei e tatou te maumauaʻi e faatāua pea le faaeaga o le tatalo, suʻesuʻe ma faatatauina le Afioga a le Atua, ma manatunatu loloto i faamanuiaga ua tatou maua. O le faia faapea, o le a fesoasoani mai Ieova iā i tatou ina ia tatou tumau ma le olioli a o tatou tapuaʻi atu iā te ia.