1, 2. O le ā le mea mataʻutia ua matuā telē lona aafiaga i tagata, ma o ai e tuuaʻia i lenā mea?

O TELEFONI, matāuila, taavale, ma pusaʻaisa, o nisi ia o mea faaonapōnei ua aogā i aso taʻitasi. Ae e iai foʻi nisi o mea ua lamatia ai le ola e pei o fana, maina e tatao i le palapala, sikareti, pomu atomika, ma isi lava mea. Peitaʻi, e iai se isi mea e mataʻutia atu ua leva ona iai, ua matuā telē lona aafiaga i tagata. O le ā lenā mea? O le pepelo, o le faia lea o se tala e iloa e lē moni ina ia faasesē ai se isi tagata. O ai na faia le uluaʻi pepelo? Na faailoa mai e Iesu Keriso o “le Tiapolo” o ia o “le tamā o le pepelo.” (Faitau le Ioane 8:44.) O anafea na ia faia ai lenā pepelo?

² Na tupu lenā mea i le faitau afe o tausaga ua mavae i le faatoʻaga o Etena. Na olioli le uluaʻi ulugalii o Atamu ma Eva i le Parataiso na faia e Lē na foafoaina mea mo i laʻua. Na faatonuina e le Atua i laʻua e aua le aai i “le laau e iloa ai le lelei ma le leaga,” ma pe a la lē usiusitaʻi o le a la feoti. E ui na iloa e Satani lenā mea, ae na ia fai atu iā Eva e ala i se gata: “E lua te lē oti lava [o le uluaʻi pepelo lea]. Auā ua silafia e le Atua, o le aso lava lua te aai ai e pupula ai o oulua mata, ona pei ai lea o oulua o le Atua, e iloa le lelei ma le leaga.”​—Kene. 2:15-17; 3:1-5.

3. Aiseā e faapea atu ai na faia e Satani se pepelo taufaaleaga, ma o le ā ua iʻu atu i ai?

³ Na faia e Satani se pepelo taufaaleaga, ona sa ia iloa lelei pe  a talitonu Eva iā te ia ma ʻai le fua o le laau, o le a oti ai o ia. Na lē usiusitaʻi Atamu ma Eva i le faatonuga a Ieova ma feoti ai i se taimi mulimuli ane. (Kene. 3:6; 5:5) Ae e sili ai ona leaga, o le agasala ʻua oo mai ai le oti i tagata uma.’ E lē gata i lea, ua “pule le oti e pei o se tupu . . . , e oo lava iā i latou e leʻi agasala e pei o le agasala a Atamu.” (Roma 5:12, 14) Nai lo o le maua e tagata o le tulaga lelei atoatoa ma ola e faavavau e pei o le finagalo o le Atua i le amataga, o le toʻatele ua na o le “fitu sefulu tausaga” le umi e ola ai, “ae afai e iai se malosi faaopoopo, e oo atu i le valu sefulu tausaga.” E ui i lea, ua faatumulia le olaga i “faafitauli ma mea e tigā ai.” (Sala. 90:10) Pagā le mataʻutia o āuga o le pepelo a Satani!

4. (a) O ā fesili e manaʻomia ona tatou taliina? (e) E tusa ai ma le Salamo 15:1, 2, e na o ai e mafai ona avea ma uō a Ieova?

⁴ Ina ua faamatala e Iesu le gaoioiga na faia e le Tiapolo, na ia faapea mai: “E leʻi tumau lava o ia i le upu moni, auā e lē o i totonu iā te ia le upu moni.” Talu ai e lē o i totonu lava o Satani le upu moni, o le māfuaaga lea o loo faaauau ai ona ia “faasesēina le lalolagi atoa” i ana faamatalaga pepelo. (Faaa. 12:9) E tatou te lē mananaʻo e faasesēina i tatou e le Tiapolo. O lea, seʻi o tatou iloiloina fesili nei e tolu: Ua faapefea ona faasesēina e Satani tagata? Aiseā e masani ai ona pepelo tagata? Talu ai e tatou te lē mananaʻo e melea la tatou faauōga ma Ieova e pei ona faia e Atamu ma Eva, e faapefea la ona faaalia o loo tatou ʻtautatala ma le faamaoni’ i taimi uma?​—Faitau le Salamo 15:1, 2.

5. Ua faapefea ona faasesēina e Satani tagata i aso nei?

⁵ Na iloa e le aposetolo o Paulo e mafai ona tatou ʻalofia le ʻfaasesēina o i tatou e Satani, auā tatou te lē valea i ana togafiti.’ (2 Kori. 2:11) Ua tatou iloa o loo pulea e le Tiapolo le lalolagi atoa e aofia ai lotu sesē, faiga faapolotiki piʻopiʻo, ma faiga faapisinisi matapeʻapeʻa. (1 Ioa. 5:19) E lē faateʻia la i tatou pe a taaʻina e Satani ma ana temoni tagata maualuluga, ina ia latou faia ni “tala pepelo.” (1 Timo. 4:1, 2) O le tulaga moni na o nisi o tagata o loo faia pisinisi tetele, ua latou faalauiloa oloa leaga ma faiga taufaasesē e ala i faasalalauga pepelo.

6, 7. (a) Aiseā e matuā nofosala ai taʻitaʻi lotu pepelo? (e) O ā aʻoaʻoga pepelo o loo aʻoaʻo e taʻitaʻi lotu?

⁶ E matuā nofosala taʻitaʻi lotu pepelo ona ua lamatia ai le lumanaʻi o tagata e talitonu i a latou pepelo. Pe a talia e se tagata se aʻoaʻoga sesē ma faatino se mea e taʻusalaina e le Atua, e mafai ona aafia ai le ola e faavavau o lenā tagata. (Ho. 4:9) Na tuuaʻia e Iesu taʻitaʻi lotu i ona aso mo na faiga taufaasesē. Na ia fetalai tuusaʻo iā i latou: “Oi talofa iā te outou le ʻautusiupu ma le ʻau Faresaio, tagata faafiaamiotonu! auā ua outou faimalaga i le sami ma le laueleele ina ia faaliulotu mai se tagata, ma pe a maua o ia, ona outou faia lea o ia ma tagata e tatau ona alu i Kena [faaumatiaga aʻiaʻi], e sili atu lona faasalaga i lo o outou.” (Mata. 23:15; fpl.) Na matuā taʻusalaina e Iesu na taʻitaʻi lotu sesē. O i latou ʻe mai i lo latou tamā le Tiapolo, o le fasioti tagata.’​—Ioa. 8:44.

⁷ Ua matuā toʻatele taʻitaʻi lotu i le lalolagi i aso nei, e tusa pe e taʻua o faifeʻau, patele, rapi, tagata paia, ma isi lava taʻu. E pei o taʻitaʻi lotu i le uluaʻi senituri, ua “taofiofia” e taʻitaʻi lotu i aso nei “le upu moni” mai i le Afioga a le Atua, ma ua latou “fesuiaʻia le upu moni a le Atua ma le upu pepelo.” (Roma 1:18, 25) Ua latou faaauiluma aʻoaʻoga sesē e pei o le afi i seoli, ola pea o le agaga pe a oti le tagata,  toe ola mai o le tagata i se isi tino, ma le manatu sesē e talia e le Atua faiga tauatane ma tauafafine ma le faaipoipo o le itupā lava e tasi.

8. O le ā le pepelo ua toeitiiti ona faailoa mai lea e taʻitaʻi faapolotiki, ma o le ā le auala e tatau ona tatou tali atu ai?

⁸ Ua faaaogā e taʻitaʻi faapolotiki tala pepelo e faasesēina ai tagata. O se tasi o pepelo matuiā ua toeitiiti ona tatou faalogoina lea, o le faalauiloaga: “Ua filemu ma saogalemu!” Peitaʻi, “ona oo faafuaseʻi mai loa lea o le faaumatiaga iā i latou.” Aua neʻi faasesēina i tatou i a latou faamatalaga ua taumafai e natia ai le tulaga faalētonu o lenei faiga o mea. O le mea moni, ua tatou “iloa lelei, e oo mai lava le aso o Ieova e pei o se gaoi i le pō.”​—1 Tesa. 5:1-4.

9, 10. (a) Aiseā e pepelo ai tagata, ma o le ā ua iʻu i ai? (e) O le ā e tatau ona tatou manatua e faatatau iā Ieova?

⁹ Pe a lauiloa se mea fou, e vave ona taulia. E faapena le salalau atu o tala pepelo, ua avea o se mea ua taatele i aso nei, ma e lē na o tagata maualuluga o loo faasesēina isi. Ua taʻua i le tusitusiga “Māfuaaga e Tatou te Pepelo Ai” a Y. Bhattacharjee, “ua mātaulia le pepelo o se uiga ua matuā mauaa i loto o tagata.” E masani ona pepelo tagata ina ia puipuia pe faasilisilia ai i latou. E latou te pepelo ina ia ufiufi ai a latou mea sesē, pe maua ai foʻi o latou manuia faaletino ma tamaoaiga. E pei ona taʻua i lea tusitusiga, e iai tagata “e pei o se meanoa le pepelo i mea lāiti ma mea tetele, e pepelo i tagata ese, ē e latou te faigaluega faatasi, uō, ma ē e pele iā i latou.”

¹⁰ O le ā le iʻuga o nei pepelo uma? E faaleagaina ai faiā ma lē toe maufaatuatuaina ai e le tasi le isi. Seʻi mafaufau i se tulaga faanoanoa pe a lē faamaoni se avā i lana tane ma pepelo e ufiufi ai lana mulilua. Po o se tane foʻi e sauā ma faatigā, e soonafai lana avā ma lana fanau pe a na o i latou, ae e faafoliga atu o se tane lelei i luma o tagata. Peitaʻi, e tatau ona tatou manatua, e lē mafai e na tagata taufaasesē ona natia so o se mea mai iā Ieova, auā “e taatitia fua mai mea uma, ma ua matuā faaalia mea uma” i lana silafaga.​—Epe. 4:13.

11. O le ā e tatou te aʻoaʻoina mai i le faaaʻoaʻoga leaga a Anania ma Safaira? (Tagaʻi i le ata i luga aʻe o le matua.)

¹¹ O se faaaʻoaʻoga, o loo taʻua i le Tusi Paia le auala na ʻfaatupu ai e Satani i loto’ o se ulugalii Kerisiano i le uluaʻi senituri e pepelo i le Atua. Na faufau Anania ma Safaira e faasesē le ʻauaposetolo. Na faatau atu so la fanua, ae na avatu na o se vaega o le tau o le fanua i le ʻauaposetolo. Na mananaʻo le ulugalii e taʻuleleia i laʻua i le faapotopotoga, e pei ua sili atu lo la limafoaʻi. Peitaʻi, na silafia e Ieova le mea na la faia ma na ia faasalaina i laʻua.​—Galu. 5:1-10.

12. O le ā le iʻuga o ē e lē salamō ma faia pepelo taufaaleaga, ma aiseā?

¹² O ā faalogona o Ieova e faatatau i le pepelo? O le iʻuga o Satani ma ē e lē salamō e faaaʻoaʻo iā te ia ma faia pepelo taufaaleaga, o le “lepa afi” lea. (Faaa. 20:10; 21:8; Sala. 5:6) Aiseā? Talu ai ua faavasega faatasi e Ieova tagata pepelo ma isi tagata e amioaʻi e pei o ni “taʻifau,” o ē e faia mea e inosia e ia.​—Faaa. 22:15.

13. O le ā ua tatou iloa e faatatau iā Ieova, ma o le ā ua uunaʻia ai i tatou e fai?

¹³ Ua tatou iloa o Ieova ʻe lē o se tagata e tala pepelo ai o ia,’ ma ʻe lē mafai ona pepelo le Atua.’ (Nu. 23:19; Epe. 6:18) “E matuā inosia lava e [Ieova] . . . le laulaufaiva pepelo.” (Faata. 6:16, 17) Ina ia tatou maua lona finagalo malie, e tatau ona  tatou tautatala ma le faamaoni i taimi uma. O le māfuaaga lea e tatou te lē ʻpepelo ai o le tasi i le isi.’​—Kolo. 3:9.

14. (a) E faapefea ona faaesea i tatou mai i tagata o lotu sesē? (e) Faamatala le mataupu silisili o loo i le Luka 6:45.

¹⁴ O le ā se tasi o auala e faaesea ai Kerisiano moni mai i tagata o lotu sesē? E tatou te ʻtautatala i le mea moni.’ (Faitau le Sakaria 8:16, 17.) Na faapea mai Paulo: “Ua matou faailoa atu ai i matou o ni auauna a le Atua, e ala . . . i le tautala i le upu moni.” (2 Kori. 6:4, 7) Na fetalai Iesu e faatatau i le tagata: “O le tele o mea i le loto e tautala mai ai lona gutu.” (Luka 6:45) O lea, pe a tautala faamaoni se tasi i lona loto, o le a faamaoni foʻi ana faamatalaga. O le a ia tautala faamaoni i mea tetele ma mea lāiti i tagata ese, ē e faigaluega faatasi, uō, ma ē e pele iā te ia. Seʻi mafaufau i nisi o faaaʻoaʻoga nei e iloa ai o loo tatou taumafai e faamaoni i mea uma.

15. (a) Aiseā e lē atamai ai le ola i se olaga uigalua? (e) O le ā e fesoasoani i talavou ina ia teena omiga mai i isi talavou? (Tagaʻi i le faaopoopoga i le pito i lalo.)

¹⁵ E faapefea pe afai o oe o se talavou o loo manaʻo e fiafia mai iā te oe isi e tou te tupulaga faatasi? Ia faamautinoa e te lē faia le mea na faia e isi o le ola lea i se olaga uigalua. E latou te faaalia uiga lelei pe a iai ma aiga ma le faapotopotoga, ae e matuā sui lava pe a faatasi ma talavou o le lalolagi, pe faaaogā foʻi auala o fesootaʻiga i le Initaneti. Atonu e latou te faaaogā gagana masoā, ofu lē talafeagai, musika matagā, fualaau faasāina, inu tele i le ʻava malosi, fai nanā se uō, pe faia ni mea e sili atu ona leaga. E pepelo i o latou mātua, uso talitonu faapea Ieova. (Sala. 26:4, 5) E silafia e Ieova taimi e tatou te ʻāva atu ai iā te ia i o tatou laugutu, a ua mamao ese lava o tatou loto mai iā te ia.’ (Mare. 7:6) Maʻeu le lelei o le utagia o le faataoto lenei: “Aua neʻi leaga lou loto i ē e agasala, ae ia mataʻu iā Ieova i le aso atoa.”​—Faata. 23:17. *

16. O le ā le auala e tatau ona e taliina ai fesili i le pepa talosaga mo se vala o le auaunaga faataimi atoa?

¹⁶ Atonu o loo e fia galue o se paeonia sauatoa pe i se isi vala o le auaunaga  faapitoa faataimi atoa, e pei o le Peteli. A o faatumu lau pepa talosaga, e tāua ona tali ma le faamaoni fesili uma e faatatau i lou soifua mālōlōina, o au faafiafiaga, ma au amioga. (Epe. 13:18) Ae e faapefea pe afai na e aafia i nisi o amioga e lē mamā pe e lē talafeagai e lē o iloa e toeaina? Ia saʻili la latou fesoasoani ina ia mafai ai ona e auauna ma se lotofuatiaifo mamā.​—Roma 9:1; Kala. 6:1.

17. O le ā e tatau ona tatou faia pe a fesiligia i tatou e ē tetee e faatatau i o tatou uso?

¹⁷ O le ā e tatau ona e faia pe afai e iai ni faasāsāaga i le galuega o le Malo i lou atunuu, ma ua fesiligia oe e faatatau i o tatou uso? Pe e tatau ona e taʻuina iā i latou mea uma o loo e iloaina? O le ā na faia e Iesu ina ua fesiligia o ia e le kovana o Roma? E iai taimi e leʻi tali atu ai Iesu, ma e ōgatusa lea ma le mataupu silisili, ʻe iai le taimi e filemu ai ma le taimi e tautala ai.’ (Fai. 3:1, 7; Mata. 27:11-14) I tulaga faapena, e tāua ai ona tatou faaalia le tofā mamao, ina ia aua ai neʻi lamatia o tatou uso.​—Faata. 10:19; 11:12.

18. O le ā e tatau ona e faia pe a fesiligia oe e toeaina e faatatau i se mea sesē na faia e se uso?

¹⁸ O le ā e tatau ona e faia pe a faia e se tasi i le faapotopotoga se agasala matuiā, ma o loo e iloaina le mea na tupu? O le tiute tauave o toeaina o le puipuia lea o le mamā tauamio o le faapotopotoga, ma atonu e latou te fesiligia oe e faatatau i le mea na tupu. O le ā e te faia pe afai o lē na aafia o sau uō māfana po o sou tauaiga foʻi? “O lē e tautala i le faamaoni, e taʻu atu mea ua tonu.” (Faata. 12:17; 21:28) O lea, e tatau ona e faailoa i toeaina le mea atoa na tupu, ae e lē na o ni nai faamatalaga, pe sui foʻi le faamatalaga. E manaʻomia ona iloa e toeaina mea uma na tutupu, ina ia latou iloa ai le auala sili e fesoasoani ai i le tagata faimea sesē e toe faalelei lana faiā ma Ieova.​—Iako. 5:14, 15.

19. O le ā o le a iloiloina i le mataupu o loo sosoo mai?

¹⁹ Na tatalo le faisalamo o Tavita iā Ieova: “Ua e fiafia i le faamaoni o le loto.” (Sala. 51:6) Na iloa e Tavita, o le faamaoni o se mea e sau mai i le loto. O lea, e tatau i Kerisiano moni ona ʻtautatala i le mea moni o le tasi i le isi’ i vala uma o o latou olaga. O se isi auala e mafai ona ese mai ai i tatou o auauna a le Atua, o le aʻoaʻo atu lea o upu moni a le Atua i la tatou faiva. O le mataupu lenā o le a iloiloina i le suʻesuʻega o loo sosoo mai.