UA ILOILO e le tagata vāaitau se ata o le tau i luga o le komepiuta. Ua ia iloa atu se afā mataʻutia, o loo agaʻi atu i se nofoaga e toʻatele tagata o loo nonofo ai. Talu ai ona e manatu mamafa o ia i le saogalemu o tagata, ua ia lapataʻi atu ai pea i latou a o leʻi tuai.

I se tulaga talitutusa, o loo lapataʻia foʻi e Ieova tagata uma i se “afā” e sili ona mataʻutia o le a tupu, nai lo o se isi lava lapataʻiga o afā na faalogo i ai. E faapefea ona lapataʻia e Ieova tagata? Aiseā e tatou te mautinoa ai e lava le taimi o loo ia avatu i tagata e gaoioi ai? Ina ia tali na fesili, seʻi o tatou iloilo muamua ni lapataʻiga na avatu e Ieova i taimi ua mavae.

I le taimi o le Tusi Paia, na lapataʻi mai ai Ieova e faatatau i ni “afā” po o ana gaoioiga faafaamasinoga, i tagata na lē usiusitaʻi ma le loto i ai i ana poloaʻiga. (Faata. 10:25; Iere. 30:23) I nei lapataʻiga taʻitasi, na umi se taimi na ia lapataʻia ai tagata na aafia, ma faatonu i latou e suia o latou olaga ia ōgatusa ma lona finagalo. (2 Tu. 17:12-15; Nee. 9:29, 30) Sa masani ona faaaogā e Ieova ana auauna faamaoni i le lalolagi, e faalauiloa ana faamasinoga ma fesoasoani i tagata e vave gaoioi ina ia suia o latou olaga.​—Amo. 3:7.

O Noa o se tasi o na auauna faamaoni. Mo le tele o tausaga, e leʻi fefe Noa e lapataʻia tagata na faia amioga lē mamā ma sauā, e faatatau i se Lolo na lofia ai le lalolagi. (Kene. 6:9-13, 17) Na ia taʻu atu foʻi iā i latou mea e manaʻomia ona faia ina ia faasaoina ai mai le lolo, ma o lea na faaigoa ai o ia “o lē e talaʻi le amiotonu.”​—2 Pete. 2:5.

E ui i taumafaiga a Noa, na lē amanaʻia e tagata le feʻau a le Atua e faatatau i le Lolo. Sa leai so latou faatuatua. O le iʻuga, na feoti i latou ina ua oo mai le Lolo “ma tafiesea ai i latou uma.” (Mata. 24:39; Epe. 11:7) A o lalata ane lo latou iʻuga, e lē mafai ona latou faia se faamolemolega e faapea e leʻi lapataʻia i latou e le Atua.

I isi taimi, na lapataʻia e Ieova tagata taʻitoʻatasi i se taimi puupuu a o leʻi oo ane le “afā” o lana faamasinoga. E ui na puupuu le taimi, ae na ia faamautinoa e lava le taimi e gaoioi ai i latou na aafia. O se faataʻitaʻiga, na avatu muamua e Ieova lapataʻiga i le taimi o Mala e Sefulu, na aafia ai Aikupito anamua. O se tasi o faaaʻoaʻoga, na auina atu e Ieova Mose ma Arona e lapataʻia Farao ma ana auauna e faatatau i le mala lona fitu, o se uatoʻa mataʻutia. Talu ai na amata lenā mala i le aso na sosoʻo ai, pe na lava le taimi na avatu e le Atua e latou te saʻili ai se mea e malu ai ma sao ai mai i le afā? Ua faapea mai le Tusi Paia: “O so o se tasi o auauna a Farao ua mataʻu i le fetalaiga a Ieova, ua vave lava ona ia aumaia ana auauna ma ana manu i fale, a o sē ua lē manatu i fetalaiga a Ieova, ua tuu pea ana auauna ma ana lafu i le fanua.” (Eso. 9:18-21) E manino mai, na lava le taimi na avatu ai e Ieova le lapataʻiga, ina ia faasaoina i latou na vave gaoioi mai i aafiaga mataʻutia o lenā mala.

Na lapataʻia foʻi Farao ma ana auauna a o leʻi oo i le mala lona sefulu. Peitaʻi, na latou teena le lapataʻiga, o se faaiʻuga valea. (Eso. 4:22, 23) O le iʻuga, na faaumatia o latou ulumatua uma. Pagā le faanoanoa! (Eso. 11:4-10; 12:29) Pe sa mafai ona latou utagiaina le lapataʻiga a o leʻi tuai? Ioe! Na vave lapataʻia foʻi e Mose le fanauga a Isaraelu e faatatau i le mala lona sefulu, ma faatonu i latou i le auala e faasaoina ai o latou aiga. (Eso. 12:21-28) E toʻafia na amanaʻia le lapataʻiga? E tusa ai  ma nisi o fua faatatau, e tolu miliona tagata Isaraelu e aofia ai ma “le toʻatele o tagata ese” e lē o ni Isaraelu ma tagata Aikupito, na faasaoina mai i le toʻasā o le Atua ma tuua Aikupito.​—Eso. 12:38.

Ua faailoa mai i nei faaaʻoaʻoga, e muaʻi faamautinoa e Ieova e lava le taimi e utagia ai e tagata ana lapataʻiga. (Teu. 32:4) O le ā na uunaʻia le Atua e faia faapea? Na taʻua e le aposetolo o Peteru, “e lē finagalo o ia [Ieova] e faaumatia se tasi, ae e finagalo ia oo uma lava i le salamō.” (2 Pete. 3:9) Ioe, e manatu mamafa le Atua i tagata. Na manaʻo o ia ina ia salamō tagata, ma talia ana aʻoaʻiga a o leʻi oo mai lana faamasinoga.​—Isa. 48:17, 18; Roma 2:4.

E faapena foʻi aso nei, e tatau i tagata uma ona tali atu i se lapataʻiga faanatinati o loo faalauiloa i le lalolagi aoao. A o iai Iesu i le lalolagi, na ia lapataʻia o le a faaumatia lenei faiga o mea i le taimi o le “puapuaga tele.” (Mata. 24:21) Na ia saunia se valoaga na faamatala auʻiliʻili mai ai mea o le a tutupu i le taimi o le puapuaga tele, ma taʻu mai ai mea e faatalitalia e ona soo e vāai ma oo iā i latou a o latalata i lenā taimi. O lea, na faamatala manino mai ai e Iesu mea tetele o le a tutupu, lea ua tatou vaaia i le lalolagi i aso nei.​—Mata. 24:3-12; Luka 21:10-13.

Ina ia ōgatusa ai ma lenā valoaga, o loo faalaeiau e Ieova tagata uma i aso nei, ina ia gauaʻi atu i lana pulega alofa. E finagalo o ia ina ia olioli tagata usiusitaʻi i se olaga lelei i le taimi nei, faapea faamanuiaga o le a maua i le lumanaʻi i se lalolagi fou amiotonu. (2 Pete. 3:13) O loo faalaeiau e Ieova tagata e faatuatua i ana folafolaga. Ua ia faia faapea e ala i se feʻau faasaoola, o le talaʻiina o le tala lelei o le malo, i le lalolagi atoa e fai ma molimau i atunuu uma e pei ona valoia e Iesu. (Mata. 24:14) Ua faamaopoopo e le Atua ona tagata tapuaʻi moni e faalauiloa atu lenei “molimau,” pe e talaʻi lana feʻau i atunuu e 240. E finagalo Ieova ia utagia e le toʻatele lenei lapataʻiga, ina ia sao mai ai i le “afā” o ana faamasinogatonu o loo faaloloʻi mai.​—Sefa. 1:14, 15; 2:2, 3.

O lea la, e lē tāua le fesili po o lava le taimi o tuu mai e Ieova i tagata e utagia ai ana lapataʻiga. Ua faamaonia, e lava pea le taimi ua tuu mai e Ieova e tali atu ai tagata i ana lapataʻiga. O le fesili tāua la: Po o le a utagia e tagata lapataʻiga a le Atua, a o leʻi tuai? Talu ai o i tatou o avefeʻau a le Atua, seʻi faaauau ona tatou fesoasoani i tagata i le tele e mafai ai, ina ia sao mai i le iʻuga o lenei faiga o mea.