1. Aiseā e na o Ieova e tatau ona tatou tuutoina atu atoatoa i ai?

E NA o Ieova e tatau ona tatou tuutoina atu atoatoa i ai, ona o ia o Lē na foafoaina i tatou, ma o Lē na foaʻi mai le Ola. (Faaa. 4:11) Peitaʻi, e i ai se lamatiaga. E ui e tatou te alolofa ma faaaloalo iā Ieova, ae e ono maileia lo tatou tuutoina atu atoatoa iā te ia, lea e tatau ona tatou faia. E tatau ona malamalama i auala e ono maileia ai i tatou. Ae muamua, seʻi o tatou iloilo le uiga o le tuutoina atu atoatoa iā Ieova.

2. I le Esoto 20:5, o le ā e tatou te faia pe a tatou tuutoina atu atoatoa iā Ieova?

² I le Tusi Paia, o le tuutoina atu i le Atua e uiga atu i le iai o se alofa loloto mo ia. Pe a tatou tuutoina atu atoatoa iā Ieova, o le a tatou tapuaʻi tau lava o ia. E tatou te lē faatagaina se tasi po o se mea, e aveesea ai le tulaga o Ieova mai i o tatou loto.​—Faitau le Esoto 20:5.

3. Aiseā e lē otometi ai lo tatou tuutoina atu iā Ieova?

³ E lē otometi ona tatou tuutoina atu iā Ieova. Aiseā? Talu ai e faavae lo tatou tuutoina atu i mea moni ua tatou aʻoaʻoina e faatatau iā te ia. Ua tatou tosina atu i ona uiga matagofie. Ua tatou iloa ma talia mea e fiafia ma mea e lē fiafia i ai Ieova. Ua tatou malamalama ma lagolagoina lona finagalo mo i tatou. O se faaeaga lona faatagaina o i tatou, e avea ma ana uō. (Sala. 25:14) O so o se vala o mea ua tatou aʻoaʻoina e faatatau i Lē na foafoaina i tatou, ua mafai ona tatou vavalalata atu ai iā te ia.​—Iako. 4:8.

4. (a) O le ā o loo faaaogā e le Tiapolo e faavaivaia ai lo tatou tuutoina atu iā Ieova? (e) O le ā o le a tatou talanoaina i lenei mataupu?

 ⁴ O loo pulea e le Tiapolo lenei faiga o mea. Ua ia faaaogā lenei faiga o mea, ina ia matuā faatāuaina ai o tatou faanaunauga masani, ma faigatā ai ona teena o tatou vaivaiga. (Efe. 2:1-3; 1 Ioa. 5:19) O le sini o Satani, ia vaeluaina lo tatou alofa ina ia lē atoatoa ai lo tatou tuutoina atu iā Ieova. Seʻi o tatou iloiloina la ni auala se lua atonu o loo taulau ai Satani. Muamua, o loo ia faaosoosoina i tatou ina ia faamuamua le saʻilia o ʻoa, ma le lua, o loo ia taumafai e taaʻina i tatou e faia filifiliga sesē e faatatau i faafiafiaga.

5. Aiseā e tatau ai ona leoleoina i tatou mai i le manaʻo tele i tupe?

⁵ O se faanaunauga masani lo tatou mananaʻo ia lava a tatou meaʻai, lelei o tatou ofu ma lelei fale e tatou te nonofo ai. Peitaʻi, e tatau ona leoleoina i tatou mai i le manaʻo tele i tupe. O le toʻatele o loo avea ma vaega o le lalolagi a Satani, “e mananaʻo tele i tupe” ma meafaitino. (2 Timo. 3:2) Na silafia e Iesu e ono faaosoosoina foʻi ona soo e atiaʻe le manaʻo tele. Na ia faapea atu, “E lē mafai ona pologa se tasi i ni matai se toʻalua, auā e ʻinoʻino o ia i le tasi ae alofa atu i le isi, pe e pipii atu i le tasi ae manatu faatauvaa i le isi. E lē mafai ona e pologa i le Atua atoa ma ʻOa.” (Mata. 6:24) O se tasi e tapuaʻi iā Ieova ae e faaalu le tele o lona taimi ma taumafaiga e saʻili ai ʻoa a le lalolagi, o lona uiga o loo ia taumafai e auauna i matai e toʻalua. O lea, e lē o tuutoina atu atoatoa iā Ieova.

6. O le ā se lesona e tatou te aʻoaʻoina mai i fetalaiga a Iesu i le faapotopotoga i Laotikaia?

⁶ A o latalata i le faaiʻuga o le uluaʻi senituri T.A., na mimita le faapotopotoga i le aai o Laotikaia ma faapea mai: “Ua ou mauoloa  ma ua tele aʻu ʻoa, ou te lē toe manaʻomia se isi mea.” Ae i le silafaga a Ieova ma Iesu, o i latou o ni tagata ʻmalaia, pagatia, mativa, tauaso, ma lē lavalavā.’ Na aʻoaʻia i latou e Iesu, e lē ona o lo latou tamaoaiga, ae ona o lo latou mananaʻo tele i tupe ua faaleagaina ai la latou faiā ma Ieova. (Faaa. 3:14-17) Pe a tatou iloa ua tupu aʻe lenā faanaunauga o le manaʻo tele i tupe i o tatou loto, e tatau la ona tatou vave gaoioi ia faasaʻo o tatou mafaufauga. (1 Timo. 6:7, 8) Pe a tatou lē faia faapea, o le a vaeluaina o tatou loto, ma lē taliaina ai e Ieova la tatou tapuaʻiga. O ia o le Atua “e finagalo e tapuaʻi atu tau lava o ia.” (Teu. 4:24) E ono faapefea ona lē paleni la tatou vaaiga i tupe?

7-9. O le ā e te aʻoaʻoina mai i le mea na tupu i se toeaina e igoa iā David?

⁷ Seʻi manatu i le faaaʻoaʻoga a David mai i le Iunaite Setete, o se toeaina e galue mamafa. Na ia faamatalaina o ia o se tagata e faamaoni i lana galuega. Na siitia lona tulaga i le kamupani na galue ai, ma na lauiloa foʻi i le atunuu atoa ona o lana galuega. Na faapea mai David, “I lenā taimi, na ou manatu o na taui o faamaoniga ia o le faamanuia a Ieova.” Ae e pe mai iā Ieova nei faamanuiaga?

⁸ Na amata ona iloa e David faailoga o le lē lelei o le la faiā ma Ieova ona o lana galuega. Na ia faapea mai, “Ou te mafaufau i faafitauli o le galuega i taimi o sauniga ma talaʻiga. E tele tupe na ou maua, ae na ou matuā popole, ma ua iai foʻi faafitauli i laʻu faaipoipoga.”

⁹ Na iloa e David e tatau ona toe iloilo mea e ao ona ia faamuamua. Na ia taʻua: “Na ou faia se filifiliga maumauaʻi e faasaʻo loʻu tulaga.” Na ia manaʻo e sui le faasologa i lana galuega, ma ia faailoa atu loa i lona pule lana fuafuaga. O le ā le iʻuga? Na tuli David mai i lana galuega.  O le ā na ia faia? Na ia faapea mai, “O le aso lava na sosoo ai, na talosaga ai laʻu paeonia lagolago faaauau.” Ina ia tausia lo la itu faaletino, na galulue David ma lana avā i se galuega faamamā. Ina ua mavae sina taimi, ae avea loa David ma paeonia sauatoa, ma na iʻu ina paeonia faatasi ma lana avā. Na filifili lenei ulugalii e faia se galuega e vaai maulalo i ai le toʻatele, ae e lē tāua iā i laʻua le ituaiga galuega. E ui ina laʻitiiti atu a la tupe na maua nai lo o tupe na maua muamua, ae i masina taʻitasi na lava le la faasoa. Na la mananaʻo e faamuamua Ieova, ma na la tofo totino i le manatu mamafa o Ieova iā i latou e faamuamua manaʻoga o le Malo.—Mata. 6:31-33.

10. E faapefea ona leoleoina o tatou loto?

¹⁰ Pe itiiti pe tele a tatou meafaitino, e manaʻomia ona leoleoina pea o tatou loto. E faapefea? Ia teena le manaʻo tele i ʻoa. Aua foʻi neʻi faamuamua lau galuega totogi, nai lo o le auaunaga iā Ieova. E faapefea ona iloa o loo tupu lenā mea iā i tatou? O nisi nei o fesili e manaʻomia ona e fesili ifo ai iā te oe lava: ʻPe e masani ona ou mafaufau i laʻu galuega a o oʻu auai i sauniga po o le talaʻiga? Pe e fai ma aʻu masani loʻu popole po o lava tupe mo le lumanaʻi? Pe e avea tupe ma meafaitino ma māfuaaga o o ma faafitauli ma laʻu paaga? Po ou te lotomalie e faia galuega e vaai maulalo ai isi, ae e maua ai le tele o taimi e auauna ai iā Ieova?’ (1 Timo. 6:9-12) Pe a iloiloina nei fesili, ia manatua, e alofa Ieova iā i tatou ma ua ia folafola mai iā i latou ua tuutoina atu iā te ia: “Ou te lē tuua lava oe, ma ou te lē tuulafoaʻia lava oe.” O le māfuaaga lea na tusi ai le aposetolo o Paulo: “Ia aunoa o outou olaga ma le manaʻo tele i tupe.”—Epe. 13:5, 6.

11. E faapefea ona aafia se tasi ona o faafiafiaga e na te filifilia?

¹¹ E finagalo Ieova ia tatou olioli i le olaga, ma e fesoasoani faafiafiaga iā i tatou ia faia ai faapea. O le mea moni, ua faapea mai le Afioga a le Atua, “e leai se mea e sili i le tagata nai lo o le ʻai ma inu, ma iloa e ia mea lelei ona o lana galuega mamafa.” (Fai. 2:24) Peitaʻi, o le tele o faafiafiaga i le lalolagi, e mafai ona i ai aafiaga leaga iā i tatou. E faaleagaina ai tapulaa tauamio a tagata, ma uunaʻia ai i latou e talia ma fiafia i mea e taʻusalaina e le Afioga a le Atua.

12. E tusa ai ma le 1 Korinito 10:21, 22, aiseā e tatau ai ona filifili lelei a tatou faafiafiaga?

¹² E tatou te mananaʻo e tuutoina atu atoatoa iā Ieova, o lea, e lē mafai ona tatou aai i le  “laoai a Ieova” ma le “laoai a temoni” i le taimi e tasi. (Faitau le 1 Korinito 10:21, 22.) E masani lava o le taumamafa faatasi ma se tasi, o se faailoga o se faauōga. Pe a tatou filifili faafiafiaga e faaauiluma ai faiga sauā, faiga faaagaga, amioga lē mamā po o isi uiga ma amioga leaga, o lona uiga ua tatou aai faatasi ma fili o le Atua, ma aai i meaʻai na latou saunia. O le iʻuga, ua tatou faaleagaina i tatou lava faapea la tatou faauōga ma Ieova.

13-14. I le Iakopo 1:14, 15, aiseā e lē tatau ai ona tatou filifili faafiafiaga leaga? Ia aumai se faataʻitaʻiga.

¹³ Seʻi mātau nisi o auala e tai pei ai faafiafiaga o se meaʻai. Pe a tatou aai, e mafai ona tatou pulea mea e tatou te aai ai. Ae o le taimi lava e folo ai, e otometi lava ona faaaogā e le tino le meaʻai. E tatou te soifua mālōlōina pe a lelei a tatou meaʻai, ae e tatou te mamaʻi pe a leaga meaʻai. Atonu e lē vave ona iloa aafiaga, ae o le a iloa lava i se taimi.

¹⁴ I se tulaga talitutusa, pe a filifili a tatou faafiafiaga, ua pule i tatou i mea e tuu i totonu o o tatou mafaufau. Ae e otometi lava ona aafia o tatou mafaufau ma loto, i mea ua tatou tuuina i totonu o o tatou mafaufau. O faafiafiaga lelei e faafouina ai, a o faafiafiaga leaga e lamatia ai. (Faitau le Iakopo 1:14, 15.) O aafiaga o faafiafiaga leaga e lē vave iloa, ae e i ai lava le taimi e faaalia ai. O le māfuaaga lea ua lapataʻia ai i tatou i le Tusi Paia: “Aua neʻi faasesēina outou: e lē ulagia le Atua. Auā o le mea e lūlūina e le tagata, o le mea lava lea e na te seleseleina mai; auā o lē e lūlū e tusa ma le tino agasala, e na te selesele mai le tino ua pala.” (Kala. 6:7, 8) Maʻeu le tāua o lo tatou teena o faafiafiaga uma e faaauiluma ai mea e inosia e Ieova!​—Sala. 97:10.

15. O le ā le meaalofa ua saunia e Ieova e tatou te olioli ai?

¹⁵ E toʻatele tagata o Ieova e fiafia e matamata i le TV i le Initaneti a Molimau a Ieova. Na faapea mai se tuafafine e igoa iā Marilyn: “Ua fesoasoani mai le TV i le Initaneti a Molimau a Ieova ina ia iai pea se vaaiga saʻo, ma ou te fiafia e matamata i mea uma e faaali ai. Pe a ou lagona le tuua toʻatasi pe lotovaivai, ou te suʻeina se lauga faalaeiau po o se polokalame o le Morning Worship e matamata ai. Ou te lagona ai le vavalalata iā Ieova ma lana faalapotopotoga. O sauniuniga a le TV i le Initaneti a Molimau a Ieova, ua matuā suia atoatoa ai loʻu olaga.” Po o aogā iā te oe lenei meaalofa mai iā Ieova? E lē gata i le i ai o polokalame fou i masina taʻitasi, ae ua maua foʻi i le TV i le Initaneti a Molimau a Ieova le tele o tala faalogologo, o vitiō ma pese e faalaeiauina ai lea e maua i so o se taimi e te manaʻo ai.

16-17. Aiseā e tatau ai ona tatou pulea lelei le taimi e faaalu i a tatou faafiafiaga, ma e faapefea ona tatou faia faapea?

¹⁶ E tatau ona tatou pulea lelei ituaiga faafiafiaga, ma e tatau foʻi ona pulea le tele o le taimi e faaalu ai. Pe a tatou lē faia faapea, atonu o le a tele le taimi e faafiafia ai i tatou, nai lo o le taimi e auauna ai iā Ieova. Ua avea ma luʻi i le toʻatele le taumafai e pulea le tele o le taimi e faaalu i faafiafiaga. Ua faapea mai se tuafafine e 18 tausaga e igoa iā Abigail e faapea: “O le matamata i le TV, ua fesoasoani lea iā te aʻu e mālōlō mai ai i se aso pisi. Ae pe a ou lē faaeteete, o le a tele le taimi e faaalu ai.” Ua faapea mai se talavou e igoa iā Samuel: “Ou te matamata i le tele o vitiō pupuu i le initaneti. E amata i le tasi o se vitiō, ae faatoʻā ou iloa mulimuli ane e tolu i le fā itula na faaalu ai.”

¹⁷ E faapefea ona e pulea lelei le tele o le taimi e alu i faafiafiaga? O le auala muamua, o le iloa lea o le tele o le taimi e te faaaluina ai. Aiseā e te lē taumafai ai e fai ni au faamaumauga  i se vaiaso se tasi? Ia tusi i lau kalena le tele o le taimi e matamata ai le TV, faaaogā ai le initaneti ma taaalo ai i taaloga i lau masini feaveaʻi. Pe a e iloa ifo e tele le taimi o loo e faaaluina, taumafai loa e fai se faasologa. Ia faatulaga muamua le taimi mo mea e sili ona tāua, ona faatulaga ai lea o se taimi mo au faafiafiaga. Ona e tatalo lea iā Ieova e fesoasoani atu iā te oe, ina ia e pipii i lau faasologa. I lenā auala, o le a e maua ai le taimi ma le malosi mo au lava suʻesuʻega faale-Tusi Paia, tapuaʻiga a le aiga sauniga, ma auauna iā Ieova i le galuega talaʻi. Atonu foʻi o le a faaitiitia ai faalogona nofosala, ona o le taimi na faaalu i faafiafiaga.

18-19. E faapefea ona tatou faamaonia o loo tatou tuutoina atu atoatoa iā Ieova?

¹⁸ Ina ua uma ona tusi le aposetolo o Peteru e faatatau i le iʻuga o le lalolagi a Satani, ma le oo mai o le lalolagi fou, na ia faapea mai: “Le ʻaupele e, a o outou faatalitali i nei mea, ia outou finafinau ai ina ia maua mai outou e ia, e leai so outou ila, e lē ponā, ma e filemu.” (2 Pete. 3:14) Pe a tatou usitaʻia lenā faatonuga ma faia taumafaiga uma e faatumauina ai le mamā tauamio ma le mamā faaleagaga, ua faamaonia atu ai lo tatou tuutoina atu atoatoa iā Ieova.

¹⁹ O le a faaauau pea ona faaosooso e Satani ma lenei faiga o mea i tatou e sui mea e faamuamua. (Luka 4:13) Po o ā lava luʻi e tatou te fesagaʻia, ae e tatou te lē faatagaina se tasi, po o se mea e aveesea le tulaga o Ieova mai i o tatou loto. E tatou te maumauaʻi e tuutoina atu atoatoa iā Ieova, auā e na o ia ua tatau i ai.