1. O le ā e mafai ona faia e Ieova ina ia faataunuu ai lona finagalo?

E MAFAI e Ieova ona avea o ia ma so o se mea ina ia faataunuu ai lona finagalo. O se faaaʻoaʻoga, ua avea Ieova ma Faiaʻoga, o Lē e Faamāfanafana, ma o se Faievagelia, o nisi na o ana matafaioi. (Isa. 48:17; 2 Kori. 7:6; Kala. 3:8) Ae e na te faaaogā pea tagata e fai lona finagalo. (Mata. 24:14; 28:19, 20; 2 Kori. 1:3, 4) E mafai foʻi e Ieova ona aumai i so o se tasi o i tatou le atamai ma le malosi e tatou te manaʻomia, ina ia avea ai ma so o se mea e faataunuu ai lona finagalo. O nei mea uma e fesootaʻi atu i le uiga o le suafa o Ieova, e pei ona manatu i ai nisi tagata atamamai.

2. (a) Aiseā e tatou te ono masalosalo ai i nisi taimi pe o faaaogā i tatou e Ieova? (e) O ā mea o le a iloiloina i lenei mataupu?

² E tatou te mananaʻo uma ia tatou aogā mo Ieova, ae e ono masalosalo nisi pe o faaaogā i latou e Ieova. Aiseā? E latou te manatu ua itiiti mea e mafai ona latou faia ona ua latou matutua, o tulaga o mea o loo aafia ai po o le itiiti foʻi o o latou tomai. I le isi itu, o isi ua faamalieina i mea ua latou faia, ma latou te lē o iloa e manaʻomia ona faalautele atu la latou auaunaga. I lenei mataupu, o le a talanoaina ai auala e fesoasoani ai Ieova i so o se tasi o i tatou, e faataunuu lona finagalo. O le a tatou talanoaina foʻi faaaʻoaʻoga mai i le Tusi Paia, o auala na avatu ai e Ieova i ana auauna tane ma fafine, le faanaunauga ma le malosi e gaoioi ai. O le a talanoaina mulimuli, pe e faapefea ona tatou faatagaina Ieova e faaaogā i tatou.

3. I le Filipi 2:13, e ono aumaia faapefea e Ieova le faanaunauga e tatou te gaoioi ai?

³ Faitau le Filipi 2:13, * E mafai ona aumai e Ieova le faanaunauga e tatou te gaoioi ai. E faapefea ona ia faia lenei mea? Atonu e tatou te iloa se manaʻoga i le faapotopotoga. Pe e faitau mai foʻi e toeaina se tusi mai i le ofisa o le lālā, e faailoa mai ai se manaʻoga i se isi vaipanoa. O lea, e tatou te ono fesili ifo, ʻO le ā e mafai ona ou faia e fesoasoani ai i lenei manaʻoga?’ Po ua valaaulia foʻi i tatou e galulue i se tofiga faigatā, ae taumānatu pe e mafai ona tatou faia. Po o le māeʻa foʻi ona faitau o se vaega o le Tusi Paia, atonu e tatou te mafaufau, ʻE faapefea ona ou faatatauina lenei mau e fesoasoani atu ai i isi?’ E lē faamalosia e Ieova i tatou e faia se mea. Ae pe a silasila mai o ia o loo tatou lotomalilie e iloilo mea e mafai ona tatou faia, o le a aumai e Ieova iā i tatou le faanaunauga e gaoioi ai.

4. E ono faapefea ona aumaia e Ieova le malosi iā i tatou e gaoioi ai?

⁴ E mafai foʻi ona aumai e Ieova iā i tatou le malosi e gaoioi ai. (Isa. 40:29) E faaleleia e Ieova o tatou tomai e ala i lona agaga paia. (Eso. 35:30-35) E ala i lana faalapotopotoga, e ono toleni i tatou e Ieova i auala e faatino ai ni galuega. Pe a e lē mautinoa pe e faapefea ona faataunuu se tofiga, ia fesili mo le fesoasoani. E lē gata i lea, ia tatalo atu i lo tatou tamā agalelei i le lagi, mo le “mana lea e sili atu i le malosi o tagata.” (2 Kori. 4:7; Luka 11:13) O loo i le Tusi Paia faaaʻoaʻoga e tele o auala na saunia ai e Ieova tane ma fafine, e ala i le tuuina atu i ai o le faanaunauga ma le malosi e gaoioi ai. A o tatou iloiloina nisi o nei faaaʻoaʻoga, ia taumafai e mafaufau i auala e mafai ona faaaogā ai oe e Ieova.

5. O le ā e tatou te aʻoaʻoina mai i le auala, ma le taimi na faaaogā ai e Ieova Mose e laveaʻi Ona tagata?

⁵ Na faaaogā e Ieova Mose e laveaʻi tagata Isaraelu. Ae o anafea na faaaogā ai o ia e Ieova? Pe na faaaogā e Ieova Mose ina ua manatu, ua agavaa ina ua māeʻa ona aʻoaʻoina i le “atamai uma o Aikupito”? (Galu. 7:22-25) E leai, na faaaogā e Ieova Mose ina ua māeʻa ona Ia toleniina o ia, e avea ma se tagata lotomaulalo ma agamalu. (Galu. 7:30, 34-36) Na avatu e Ieova iā Mose le lototele e tū ai i luma o le taʻitaʻi na sili ona malosi o Aikupito. (Eso. 9:13-19) O le ā e tatou te aʻoaʻoina mai i le auala ma le taimi na faaaogā ai e Ieova Mose? E faaaogā e Ieova i latou e faaalia uiga faale-Atua, ma latou faalagolago iā te ia mo le malosi.​—Fili. 4:13.

6. O le ā e tatou te aʻoaʻoina mai i le auala na faaaogā ai e Ieova Pasili e fesoasoani i le tupu o Tavita?

⁶ I senituri mulimuli ane, na faaaogā e Ieova Pasili e fesoasoani i le tupu o Tavita. ʻUa fia aai, lē lavavā ma ua fia feinu Tavita ma tagata,’ a o sosola ese mai i lona atalii o Apisaloma. I lenā taimi, na i ai nisi na fesoasoani iā Tavita. Na aofia ai ma le toeaina matua o Pasili o lē na tuu lona ola i se tulaga lamatia, e saunia le fesoasoani mo Tavita ma isi. E leʻi manatu Pasili, ona ua toeaina, ua leai la sona aogā iā Ieova. Nai lo o lea, na ia foaʻi atu ma le agalelei mea sa iā te ia e fesoasoani ai i manaʻoga o auauna a le Atua. (2 Samu. 17:27-29) O le ā le lesona mo i tatou? Po o le ā lava lo tatou matutua, ae e mafai ona faaaogā pea e Ieova i tatou e fesoasoani i manaʻoga masani o o tatou uso i lo tatou vaipanoa, po o se isi foʻi atunuu. (Faata. 3:27, 28; 19:17) E tusa pe  e lē mafai ona tatou fesoasoani tuusaʻo i ai, ae e mafai lava ona tatou fai se foaʻi tauofo mo le galuega i le lalolagi aoao, ina ia maua ai tupe e faaaogā mo fesoasoani i le taimi ma le nofoaga o loo manaʻomia ai.​—2 Kori. 8:14, 15; 9:11

7. Na faapefea ona faaaogā e Ieova Simeona, ma aiseā e faalaeiauina ai tatou i le iloaina o lenā mea?

⁷ Na folafola atu e Ieova iā Simeona, o se toeaina matua i Ierusalema, o le a ia vaai muamua i le Mesia ae leʻi maliu. Na tatau ona matuā faalaeiauina Simeona i lenā folafolaga, pe a fua i le tele o tausaga na ia faatalitali ai mo le Mesia. Na tauia lona faatuatua ma lona onosaʻi. I se tasi aso, “ona o le taʻitaʻiga a le agaga,” na ia alu ai i le malumalu. O inā sa ia vaai ai i le pepe o Iesu, ma na faaaogā ai e Ieova Simeona e fai se valoaga e faatatau i lenei tamaitiiti o le a avea ma Keriso. (Luka 2:25-35) E ui atonu e leʻi ola Simeona i le taimi o le faiva a Iesu i luga o le lalolagi, ae sa lotofaafetai o ia ona o le faaeaga na ia mauaina, ma o le a tele faamanuiaga o le a ia maua i le lumanaʻi! I le lalolagi fou, o le a vaai ai lenā tane faamaoni i le auala o le a avea ai le pulega a Iesu ma faamanuiaga i aiga uma i le lalolagi. (Kene. 22:18) E tatou te lotofaafetai foʻi i so o se faaeaga e tuu mai e Ieova e tatou te auauna atu ai iā te ia.

8. E ono faaaogā faapefea e Ieova i tatou e pei ona ia faaaogāina o Panapa?

⁸ I le senituri muamua T.A, na lotomalie ai se tane limafoaʻi e igoa iā Iosefa e faaaogā o ia e Ieova. (Galu. 4:36, 37) Talu ai e foliga e lelei tele Iosefa i le faamāfanafana i isi, o lea na faaigoa ai o ia e le ʻauaposetolo o Panapa, lea e uiga atu i le “Atalii o Faamāfanafanaga”. O se faaaʻoaʻoga, ina ua avea Saulo ma se tagata talitonu, e toʻatele uso na fefefe e talanoa i ai ona na ia sauāina faapotopotoga. Peitaʻi, na fesoasoani atu Panapa o se tagata e māfana ona uiga iā Saulo, ma e mautinoa sa matuā talisapaia e Saulo lona agalelei. (Galu. 9:21, 26-28) Mulimuli ane, na mananaʻo toeaina i Ierusalema e faalaeiau i uso na nonofo mamao i Anetioka i Suria. O ai na latou auina atu? O Panapa! Na saʻo lelei la latou filifiliga. Ua taʻu mai na “faalaeiau atu [Panapa] iā i latou uma ina ia tumau pea i le Alii ma le lotofaamaoni.” (Galu. 11:22-24) I aso nei, ua mafai foʻi ona fesoasoani mai Ieova iā i tatou e avea ma “atalii o faamāfanafanaga” i isi o tatou uso Kerisiano. O se faaaʻoaʻoga, e na te ono faaaogā i tatou e faamāfanafana atu i ē ua maliliu nisi e pele iā i latou i le oti. Pe e uunaʻia foʻi i tatou e Ieova, e asiasi atu pe vili i se isi o loo maʻi pe lotovaivai e avatu ni upu faalaeiau. Po o le a e faatagaina Ieova e faaaogā oe e pei ona ia faaaogāina o Panapa?​—1 Tesa. 5:14.

9. O le ā e tatou te aʻoaʻoina mai i le auala na fesoasoani ai Ieova i se uso e igoa iā Vasily, ina ia agavaa e avea ma se leoleo mamoe faaleagaga?

⁹ Na fesoasoani Ieova i se uso e igoa iā Vasily ina ia agavaa e avea ma se leoleo mamoe faaleagaga. Ina ua tofia Vasily o se toeaina i le 26 o ona tausaga, na manatu o ia e lē agavaa e avatu se fesoasoani faaleagaga i le faapotopotoga, aemaise lava i latou na feagai ma tulaga faigatā. Peitaʻi, na ia maua toleniga aogā mai i toeaina ua iai le poto masani, ma le Aʻoga o le Faiva o le Malo. Na galue mamafa Vasily e faaleleia ona tomai. Mo se faataʻitaʻiga, na ia faia se lisi o sini lāiti. A o ia ausiaina na sini taʻitasi, na faasolosolo ai ina foʻia lona fefe. Ua ia faapea mai: “O le mea na ou fefe e fai i le taimi ua teʻa, ua ou maua ai le tele o le olioli i le taimi nei. Pe a fesoasoani mai Ieova ou te saʻili se mau talafeagai e faamāfanafana ai i se uso po o se tuafafine i le faapotopotoga, ou te maua le faamalieina.” Uso e, pe a e lotomalie e faaaogā oe e Ieova e pei o Vasily, e na te avatu iā te oe le tomai e taulima ai tiute tauave tetele i le faapotopotoga.

10. O le ā na faia e Apikaila ma o le ā e tatou te aʻoaʻoina mai i lana faaaʻoaʻoga?

¹⁰ Na manaʻomia e Tavita ma tagata na faamaoni iā te ia le fesoasoani, ina ua tuliloaina i latou e le tupu o Saulo. Na talosaga atu auauna a Tavita iā Napalu se tamāloa mauʻoa mai i Isaraelu, mo si na meaʻai po o so o se mea o iā te ia. Na latou manatu e talosaga atu ona na latou leoleoina le lafumanu a Napalu a o iai i le togāvao. Peitaʻi ona o le manatu faapito o Napalu na ia musu ai e ave se mea mo auauna a Tavita. Sa matuā ita Tavita ma ia manaʻo ai e fasioti Napalu ma tane uma o lona aiga. (1 Samu. 25:3-13, 22) Peitaʻi, o Apikaila le avā a Napalu, o ia o se fafine e i ai le faautaga loloto ma e lalelei foʻi. Sa ia faaalia le lototele, na ifo ma ʻaiʻoi atu iā Tavita, ina ia aua le taui ma sui ina neʻi nofosala ai i le toto. Sa ia fautua atu ma le faautauta iā Tavita e tuu le mataupu iā Ieova. O upu agalelei ma gaoioiga faautauta a Apikaila na pāʻia ai le loto o Tavita. Na tonu le manatu o Tavita, na auina atu Apikaila e Ieova. (1 Samu. 25:23-28, 32-34) Na atiaʻe e Apikaila uiga na mafai ai ona aogā o ia iā Ieova. E faapena foʻi tuafāfine Kerisiano e faautauta ma iai le faautaga loloto, e mafai ona faaaogā i latou e Ieova e faamalosia aiga ma isi i le faapotopotoga.​—Faata. 24:3; Tito 2:3-5.

11. O le ā na faia e afafine o Saluma, ma o ai o loo faaaʻoaʻo iā i latou i aso nei?

¹¹ I le tele o senituri mulimuli ane, na faaaogā ai e Ieova afafine o Saluma e galulue ma ē na toe faaleleia pā o le malumalu o Ierusalema. (Nee. 2:20; 3:12) E ui o se perenise lo latou tamā, ae na lotomalilie afafine o Saluma e faia se galuega faigatā ma mataʻutia. (Nee. 4:15-18) Na matuā eseese lava afafine o Saluma ma tamāloloa taualoa o Tikoa, o ē na “lē fesoasoani” i le galuega! (Nee. 3:5) Seʻi mafaufau i le olioli o afafine o Saluma ina ua iʻu le galuega o le pā i le na o le 52 aso! (Nee. 6:15) I aso nei, e iai foʻi tuafāfine lotomalilie o loo fiafia e fesoasoani i isi vala faapitoa o le auaunaga paia, o le fausiaina ma le tausia lelei o fale ua tuuina atu iā Ieova. O o latou agavaa, lo latou naunau, ma lo latou faamaoni e tāua tele i le faataunuuina o lenei galuega.

12. E ono faaaogā faapefea i tatou e Ieova e pei ona ia faaaogāina o Tapita?

¹² Na uunaʻia Tapita e Ieova e faia “galuega lelei ma foaʻi atu meaalofa,” aemaise lava i fafine ua oti a latou tane. (Galu. 9:36) E toʻatele na faavauvau ina ua maliu Tapita, ona o le mataʻina o lona limafoaʻi ma le agalelei. Ae na latou matuā olioli ina ua toe faatūina o ia e le aposetolo o Peteru. (Galu. 9:39-41) O le ā e tatou te aʻoaʻoina mai iā Tapita? Pe e tatou te talavou pe matutua, uso pe tuafafine, e mafai ona tatou faia uma ni gaoioiga talafeagai e fesoasoani ai i o tatou uso ma tuafāfine.​—Epe. 13:16.

13. Na faapefea ona faaaogā e Ieova se tuafafine matamuli e igoa iā Ruth, ma o le ā lana taʻutinoga?

¹³ Na fia avea ma misionare se tuafafine matamuli e igoa iā Ruth. A o talavou le tuafafine o Ruth na vave lona tufaina o sāvali i le talaʻiga. Na ia faapea mai, “E ese loʻu fiafia i lenei galuega.” Peitaʻi o se luʻi le talanoa atu i tagata e faatatau i le Malo o le Atua. E ui i lona uiga matamuli, ae na avea Ruth ma se paeonia sauatoa ina ua 18 ona tausaga. I le 1946, na auai ai o ia i le Aʻoga Faale-Tusi Paia a le Olomatamata o Kiliata ma mulimuli ane auauna i Hawaii ma Iapani. Ina ua mavae le toetoe 80 tausaga o lana galuega talaʻi, na taʻutino mai Ruth, “Sa avea Ieova ma oʻu fesoasoani. Na ia fesoasoani mai iā te aʻu e foʻia loʻu matamuli. Ua ou matuā talitonu e mafai e Ieova ona faaaogā so o se isi e maufaatuatuaina o ia.”

14. E tusa ai o le Kolose 1:29, o le ā e tatau ona fai ina ia faaaogā ai i tatou e Ieova?

¹⁴ I le talafaasolopito, na faaaogā e Ieova ana auauna i auala eseese. O le ā le auala o le a ia faaaogāina ai oe? E fua lava iā te oe pe e te lotomalie e galue mamafa. (Faitau le Kolose 1:29.) Pe a faaavanoa atu oe, e mafai e Ieova ona faaaogā oe e avea o se faievagelia maelega, o se aʻoaʻo lelei, o sē e faamāfanafana, o sē e talenia, o se uō e lagolagosua, po o so o se mea e na te manaʻomia e faataunuu ai lona finagalo.

15. E tusa ai ma le fautuaga o loo i le 1 Timoteo 4:12, 15, o le ā e tatau ona talosaga atu ai uso talavou iā Ieova?

¹⁵ Ae e faapefea outou uso talavou, ua faasolo ina avea ma tagata matutua? E matuā telē se manaʻoga mo tauleleʻa malolosi e fesoasoani o ni auauna o le faiva i faapotopotoga. O le tele o faapotopotoga e toʻatele atu toeaina nai lo o auauna o le faiva. Pe e mafai e nisi o outou talavou ona atiaʻe le faanaunauga e faatino nisi tiute i le faapotopotoga? E iai taimi e faapea mai ai nisi uso, “E lava a aʻu i le avea ma tagata talaʻi.” Pe afai o ou manatu na, ia e talosaga atu iā Ieova e fesoasoani mai iā te oe e atiaʻe le faanaunauga ina ia e agavaa e avea ma se auauna o le faiva, ma ia maua le malosi e fai ai mea uma e te mafaia i le auaunaga iā te ia. (Fai. 12:1) E matou te manaʻomia la outou fesoasoani!​—Faitau le 1 Timoteo 4:12, 15.

16. O le ā e tatau ona tatou talosaga atu ai iā Ieova, ma aiseā?

¹⁶ E mafai ona faaaogā oe e Ieova ina ia avea ma so o se mea e na te manaʻomia, e faataunuu ai lona finagalo. Ia talosaga atu iā te ia mo le faanaunauga e fai ai lana galuega, ma talosaga iā te ia mo le malosi e te manaʻomia. Pe matua pe talavou, ia faaaogā nei lou taimi, malosi, ma au meatotino e faamamaluina ai Ieova. (Fai. 9:10) Aua lava neʻi faatagaina le fefe ma faalogona lē taulau, e te misia ai avanoa tāua e fai ai mea uma e te mafaia i le auaunaga iā Ieova. Maʻeu se faaeaga ua iā i tatou uma, o le faia o so tatou sao e tusa lava pe itiiti, i le faamamaluina o lo tatou Tamā alofa!