1-2. (a) O le ā ua toeitiiti lava faalauiloa mai e malo? (e) O ā fesili e manaʻomia ona taliina?

SEʻI faaata ua faatoʻā uma lava ona faalauiloa e malo le “filemu ma le saogalemu,” lea ua leva ona latou faatalitali i ai. Atonu e latou te mimita ma faapea mai, ua matuā filemu ma saogalemu le lalolagi. E mananaʻo taʻitaʻi o malo ia tatou manatu, ua mafai ona latou foʻia faafitauli i le lalolagi. Peitaʻi, e matuā lē mafai lava ona latou pulea le mea o le a sosoo mai ai. Aiseā e lē mafai ai? Talu ai ua taʻu mai i le valoaga o le Tusi Paia, ona “oo faafuaseʻi mai loa lea o le faaumatiaga iā i latou, . . . ma e latou te lē sao ai lava.”​—1 Tesa. 5:3.

² E manaʻomia tali o fesili tāua nei: O le ā o le a tupu i le “puapuaga tele”? O le ā e faatalitalia e Ieova e tatou te faia i lenā taimi? E faapefea ona tatou sauniuni i le taimi nei, ina ia tumau faamaoni ai i le taimi o le puapuaga tele?​—Mata. 24:21.

3. E tusa ai ma le Faaaliga 17:5, 15-18, o le ā le auala o le a faaumatia ai e le Atua “Papelonia le Aai Tele”?

³ Faitau le Faaaliga 17:5, 15-18. O le a faaumatia “Papelonia le Aai Tele.” Ae e pei ona taʻua i le amataga, e matuā lē mafai lava ona pulea e malo le mea o le a tupu i lenā taimi. Aiseā? Talu ai o le a“tuuina . . .  e le Atua i o latou loto ina ia faataunuu lona finagalo.” O le ā lona finagalo? O lona finagalo  ia faaumatia lotu sesē uma, e aofia ai Kerisinetoma. * E tuuina e le Atua lona finagalo, i loto o “seu e sefulu” o le “manufeʻai e lanu mūmū sesega.” Ua faaata mai e “seu e sefulu” malo faapolotiki uma o loo lagolagoina le “manufeʻai” po o Malo Aufaatasi. (Faaa. 17:3, 11-13; 18:8) Pe a osofaʻia e nei malo faapolotiki lotu sesē, o le faailoga lenā o le amataga o le puapuaga tele. O se vaaiga e matuā mataʻutia o le a i ai i le lalolagi.

4. (a) O ā faamatalaga atonu o le a faia e malo e taʻutonuina ai lo latou osofaʻia o lotu sesē? (e) O ā mea atonu o le a faia e tagata na auai i na lotu?

⁴ E tatou te lē o iloa po o ā māfuaaga o le a faaaogā e malo e taʻutonuina ai lo latou osofaʻia o Papelonia le Aai Tele. Atonu o le a latou faapea mai, ua fai lotu ma faalavelave i le ausiaina o le filemu i le lalolagi, ma ua aiā tele i faiga faapolotiki. Pe atonu foʻi e latou te faapea mai, ua matuā tele le tamaoaiga ma meafaitino ua faaputu e nei faalapotopotoga faalotu. (Faaa. 18:3, 7) E foliga mai e talafeagai ona faapea atu o le a lē faaumatiaina sui uma o lotu. Nai i lo o lea, e foliga mai o le a faaumatia e malo faalapotopotoga faalotu. O le taimi lava e faaumatia ai nei faalapotopotoga, o le a iloa ai foʻi e tagata le lē taulau o o latou taʻitaʻi lotu, ma atonu o le a latou taumafai ai e faamamao mai i nei lotu.

5. O le ā ua folafola mai e Ieova e faatatau i le taimi o le puapuaga tele, ma aiseā?

⁵ E lē o faailoa i le Tusi Paia le umi o le faaumatiaga o Papelonia le Aai Tele, ae ua tatou iloa o le a tupu i se taimi puupuu. (Faaa. 18:10, 21) Na folafola mai e Ieova o le a ʻfaapuupuuina na aso’ o le puapuaga, ina ia faasaoina ai “ē ua filifilia,” ma le tapuaʻiga moni. (Mare. 13:19, 20) Ae o le ā e faatalitalia e Ieova e tatou te faia i le taimi e amata ai le puapuaga tele, seʻia oo i le taua o Amaketo?

6. Aiseā e lē lava ai le tau ina vavae ese mai i lotu sesē?

⁶ E pei ona tatou talanoaina i le mataupu na mavae atu, e faatalitalia e Ieova ona tagata  tapuaʻi e vavaeese mai iā Papelonia le Aai Tele. Peitaʻi, e lē lava le tau ina vavae ese mai i lotu sesē. E manaʻomia ona tatou maumauaʻi e lagolagoina le tapuaʻiga moni, le tapuaʻiga mamā iā Ieova. Seʻi o tatou talanoaina ni auala se lua e tatou te lagolagoina ai le tapuaʻiga moni.

7. (a) E faapefea ona tatou tutūmausalī e lagolagoina tapulaa amiotonu a Ieova? (e) Ua faapefea ona faamamafa e le Eperu 10:24, 25 le tāua o le faapotopoto faatasi, aemaise lava i le taimi nei?

⁷ Muamua, e manaʻomia ona tatou tutūmausalī e lagolagoina tapulaa amiotonu a Ieova. E tatou te lē taliaina amioga ma tapulaa a le lalolagi. O se faaaʻoaʻoga, e tatou te inoino i so o se ituaiga o feusuaʻiga lē mamā, e aofia ai le faaipoipo o le itupā e tasi, ma isi amioga faatauatane ma tauafafine. (Mata. 19:4, 5; Roma 1:26, 27) Lua, e tatau ona faaauau pea ona tapuaʻi faatasi ma o tatou uso Kerisiano. E tatou te tapuaʻi i so o se nofoaga lava e mafai ai, pe i le Maota mo Sauniga, i se fale o se Molimau pe a talafeagai, pe tapuaʻi foʻi i se nofoaga faalilolilo. Po o le ā lava e tupu, ia aua lava neʻi taofia la tatou masaniga o le faapotopoto faatasi e tapuaʻi. O le mea moni, e manaʻomia ona tatou faapotopoto faatasi, “ia sili foʻi ona faia faapea auā ua [tatou] iloa ua matuā latalata mai lava le aso.”​—Faitau le Eperu 10:24, 25.

8. O le ā le suiga e ono i ai i la tatou feʻau i le lumanaʻi?

⁸ A o faagasolo le puapuaga tele, e foliga mai o le a sui le feʻau o le a tatou talaʻia. I le taimi lenei, o loo tatou talaʻia le tala lelei o le Malo ma fai taumafaiga e fai isi ma soo. Ae i lenā taimi, o le a tatou faailoa atu se feʻau malosi e pei o ni uatoʻa. (Faaa. 16:21) Atonu o le a tatou faalauiloa atu le matuā latalata mai o le faaumatiaga o le lalolagi a Satani. I se taimi, o le a tatou iloa tonu ai la tatou feʻau ma le auala e faailoa atu ai. Po o le a tatou faaaogā le auala lava lea e tasi na tatou faaaogāina i le silia ma le 100 tausaga, e faataunuu ai la tatou faiva? Po o le a tatou faaaogāina nisi auala? E tatou te lē iloa. Po o le ā lava le auala o le a tatou talaʻi atu ai, ae foliga mai o le a iā i tatou le faaeaga e faalauiloa atu ai ma le lototele le feʻau faafaamasinoga a Ieova.​—Eseki. 2:3-5.

9. O le ā le auala e ono tali mai ai malo i la tatou feʻau, ae o le ā ua tatou mautinoa ai?

⁹ O le a feita malo i la tatou feʻau, ma o le a latou taofia atoatoa la tatou galuega talaʻi. E pei ona tatou faalagolago i le lagolagosua a Ieova i la tatou faiva i le taimi nei, o le a faapena foʻi ona manaʻomia lo tatou faalagolago iā te ia i lenā taimi. E tatou te mautinoa o le a faatumuina i tatou e le Atua i le mana, e faataunuu ai lona finagalo.​—Mika 3:8.

10. E pei ona valoia i le Luka 21:25-28, o le a faapefea ona tali mai le toʻatele i mea o le a tutupu i le taimi o le puapuaga tele?

¹⁰ Faitau le Luka 21:25-28. I le taimi o le puapuaga tele, o le a faateʻia tagata i le faaleagaina o mea uma i le lalolagi na latou faamoemoe i ai. O le a “tigā” ma atuatuvale ina neʻi faaumatia i latou, a o ola ai i se vaitaimi e sili ona leaga i le talafaasolopito o tagata. (Sefa. 1:14, 15) Atonu o le a sili foʻi ona faigatā le olaga mo tagata o Ieova i lenā taimi. Talu ai o le a tumau pea ona lē avea i tatou ma vaega o le lalolagi, atonu la o le a tatou mafatia i faigatā. Atonu o le a tatou lē maua foʻi nisi o mea e manaʻomia e ola ai.

11. (a) Aiseā o le a taulaʻi mai ai tagata ma malo i Molimau a Ieova? (e) Aiseā e lē manaʻomia ai ona tatou fefefe i le taimi o le puapuaga tele?

¹¹ O le a iai le taimi o le a matuā feita ai tagata na auai i lotu ia na faaumatia, i Molimau a Ieova ona o loo tumau pea la latou  tapuaʻiga. Seʻi manatu la i tala taufaaleaga o le a faasalalau e tagata, e aofia ai fesootaʻiga i luga o le initaneti. O le a matuā inoino malo ma lo latou taʻitaʻi o Satani iā i tatou, ona e na o le pau lea o le tapuaʻiga o loo sao mai. O le a lē taulau lo latou sini i le faaumatiaina o lotu uma i le lalolagi. O lea, o le a latou taulaʻi mai ai iā i tatou. O le taimi lenā o le a avea ai malo ma Koku o Makoku. * O le a latou auaufaatasi ma le lilivau e osofaʻia tagata o Ieova. (Eseki. 38:2, 14-16) E tatou te fefefe pe a manatu i mea o le a tutupu, ona e tatou te lē o iloa mea uma o le a tutupu i le taimi o le puapuaga tele. Peitaʻi e tasi le mea ua tatou mautinoa i ai: e lē manaʻomia ona tatou fefefe i le taimi o le puapuaga tele. O le a aumaia e Ieova faatonuga e faasaoina ai o tatou ola. (Sala. 34:19) O le a tatou “tutū i luga ma ia ea i luga o [tatou] ulu” ona ua tatou iloa “ua latalata ona laveaʻiina [tatou].” *

12. Ua faapefea ona sauniunia i tatou e le “pologa faamaoni ma le faautauta,” i mea o le a tutupu i le lumanaʻi?

¹² Ua sauniunia i tatou e le “pologa faamaoni ma le faautauta” ina ia tumau ma le faamaoni i le taimi o le puapuaga tele. (Mata. 24:45) E tele auala ua sauniunia ai i tatou, mātau se tasi o faaaʻoaʻoga: o mea na talanoaina i a tatou tauaofiaga i tausaga 2016-2018. I na tauaofiaga, sa faalaeiauina ai i tatou ina ia faamalosia uiga e tatou te manaʻomia, a o tatou latalata atu i le aso o Ieova. Seʻi o tatou autalu puupuu nei uiga.

13. E faapefea ona faamalosia lo tatou faamaoni iā Ieova, ma aiseā e tatau ai ona tatou faia i le taimi nei?

¹³ Faamaoni: O le matua o le polokalame o le tauaofiaga itumalo o le 2016, o le “Ia Tumau Faamaoni iā Ieova!” Na aʻoaʻoina i tatou i lenā tauaofiaga, pe a malosi la tatou faiā ma Ieova, o le a tatou faamaoni ai iā te ia. Na faamanatu mai iā i tatou e mafai ona tatou vavalalata iā Ieova, e ala i tatalo uigā ma maelega e suʻesuʻe lana Afioga. O le faia faapea, o le a tatou maua ai le malosi e foʻia ai faafitauli, e oo lava i luʻi e sili ona faigatā. A o latalata i le iʻuga o le faiga o mea a Satani, e tatou te faatalitalia e feagai ma luʻi e sili ona faigatā o lo tatou faamaoni i le Atua ma lona Malo. Atonu o le a faaauau pea ona avea i tatou ma taulaʻiga o tauemuga. (2 Pete. 3:3, 4) Atonu o le a atili ona tupu lenei mea i le taimi e faatetele ai le tofotofoina o lo tatou solitū. E tatau ona faamalosia lo tatou faamaoni i le taimi nei, ina ia mafai ai ona tatou tutumau faamaoni i le taimi o le puapuaga tele.

14. (a) O le ā o le a tupu i uso faauuina o loo taʻimua i le lalolagi? (e) Aiseā e manaʻomia ai le faamaoni i lenā taimi?

¹⁴ A o faagasolo le puapuaga tele, o le a suia uso e taʻimua i le lalolagi. E iai le taimi, o le a aoaoina ai i le lagi le ʻaufaauuina uma o loo i le lalolagi, ina ia auai i le taua o Amaketo. (Mata. 24:31; Faaa. 2:26, 27) O lona uiga o le a tatou lē toe faatasi ma le Vaega Pule. Peitaʻi, o le a tumau pea ona maopoopo le motu o tagata e toʻatele. O uso agavaa mai i isi mamoe o le a avea ma taʻimua. O lea, e tatau ona tatou lagolagoina ma le faamaoni nei uso, e ala i le usitaʻia o taʻiala a le Atua o le a latou aumaia. O le usitaʻia o la latou taʻitaʻiga, o le a faasaoina ai i tatou.

15. E faapefea ona faamalosia lo tatou tumau, ma aiseā e tāua ai ona faamalosia i le taimi lenei?

 ¹⁵ Tumau: O le matua o le polokalame o le tauaofiaga itumalo 2017, o le “Aua E te Faavaivai!” Na fesoasoani lenā tauaofiaga e faamalosia ai i tatou e onosaia faigatā. Na tatou aʻoaʻoina e lē faalagolago lo tatou tumau i le sologa lelei o tulaga o mea. E faamalosia lo tatou tumau, i le faalagolago iā Ieova. (Roma 12:12) Ia aua lava neʻi galo iā i tatou le folafolaga a Iesu: “O lē e tumau seʻia oo i le iʻuga, o le a faaolaina o ia.” (Mata. 24:13) O le uiga o lenei folafolaga, e tatau ona tatou faamaoni pea e ui i luʻi e tatou te fesagaʻia. Pe a tatou onosaia so o se luʻi, o le a faamalosia ai i tatou a o leʻi amata le puapuaga tele.

16. O le ā e faalagolago i ai lo tatou mauaina o le lototele moni, ma e faapefea ona faamalosia lo tatou lototele i le taimi nei?

¹⁶ Lototele: O le matua o le polokalame o le tauaofiaga itumalo 2018, o le “Ia Lototele!” Na faamanatu mai i lenei tauaofiaga, e lē faalagolago lo tatou mauaina o le lototele i o tatou tomai ma agavaa. E pei o le tumau, e tatou te maua le lototele moni i le faalagolago iā Ieova. E faapefea ona faamalosia lo tatou faalagolago iā Ieova? E ala i le faitauina o lana Afioga i aso taʻitasi, ma manatunatu loloto i le auala na laveaʻiina ai e Ieova ona tagata i aso ua mavae. (Sala. 68:20; 2 Pete. 2:9) Pe a osofaʻia i tatou e malo i le puapuaga tele, o le a sili atu ona manaʻomia lo tatou lototele ma maufaatuatuaina Ieova i lenā taimi. (Sala. 112:7, 8; Epe. 13:6) Pe a tatou faalagolago iā Ieova i le taimi nei, o le a tatou maua le lototele e manaʻomia e fesagaʻia ai osofaʻiga a Koku. *

17. Aiseā e lē tatau ai ona tatou fefefe iā Amaketo? (Tagaʻi i le ata i le faavaa)

¹⁷ E pei ona taʻua i le mataupu na mavae atu, o le toʻatele o i tatou na ola aʻe i le vaitaimi o aso e gata ai. Ae e tatou te faamoemoe foʻi e faasaoina atu i le puapuaga tele. O le taua o Amaketo, o le a faaiʻuina atoatoa ai le iʻuga o lenei faiga o mea. Peitaʻi e leai se mea e tatou te fefefe ai. Aiseā? Talu ai o le a tauina e le Atua lenei taua.  (Faata. 1:33; Eseki. 38:18-20; Saka. 14:3) Pe a avatu e Ieova le faatonuga, ona taʻitaʻi loa lea e Iesu Keriso le ʻautau a le Atua. O le a faatasi atu iā te ia le ʻaufaauuina ua toetutū mai, ma le mano o mano o agelu. O le a latou tau faasaga iā Satani, o ana temoni ma a latou ʻau i le lalolagi.​—Tani. 12:1; Faaa. 6:2; 17:14.

18. (a) O le ā ua faamautinoa mai e Ieova? (e) E faapefea i le Faaaliga 7:9, 13-17 ona faamalosia ai lo tatou mautinoa i lo tatou faamoemoe i le lumanaʻi?

¹⁸ Ua faamautinoa mai e Ieova: “O so o se auupega ua faia e faasagatau iā te oe e lē manuia.” (Isa. 54:17) O le a faasaoolaina “mai i le puapuaga tele” se “motu o tagata e toʻatele,” o ē e tapuaʻi faamaoni iā Ieova. Ma o le a faaauau ai ona latou faia le auaunaga paia iā te ia. (Faitau le Faaaliga 7:9, 13-17.) Maʻeu se faamautinoaga o loo i le Tusi Paia o lo tatou faasaoina i le lumanaʻi! Ua tatou iloa e ʻ leoleo e Ieova o ē e faamaoni.’ (Sala. 31:23) O i latou uma e alolofa ma viiviia Ieova, o le a matuā fiafia i le taimi e na te faasilisilia ai lona suafa paia.​—Eseki. 38:23.

19. O le ā le faamoemoe matagofie ua toeitiiti lava o tatou maua?

¹⁹ Seʻi mafaufau i le auala e ono toe faaupu ai le 2 Timoteo 3:2-5, e faamatala ai tagata i le lalolagi fou ua saʻoloto mai i taaʻiga a Satani. (Tagaʻi i le pusa “ O Uiga o Tagata o le a i Ai”) Ua faamatalaina e le uso o George Gangas, * o lē na avea ma sui o le Vaega Pule: “Maʻeu se lalolagi matagofie pe a tapuaʻi uma tagata iā Ieova! Ua toeitiiti ona e maua lea o le faaeaga e ola ai i le faiga fou o mea. O le a faalagolago le umi ona e ola, i le soifua pea o Ieova. O le a tatou ola e faavavau.” Maʻeu se faamoemoe matagofie!