1. O le ā e faasino atu i ai o tatou “manaʻoga faaleagaga,” ma e faapefea ona fesootaʻi i lo tatou mauaina o le fiafia?

 O LE fiafia moni, e lē o se faalogona fiafia e fai ma mou atu, ae o se faalogona e mafai ona iai pea i le olaga atoa o se tasi. O le ā se faamaoniga o lenā manatu? Na faamatala e Iesu i lana Lauga i luga o le Mauga: “E fiafia o ē e manatu mamafa i o latou manaʻoga faaleagaga.” (Mata. 5:3) Na silafia e Iesu, na faia le tagata ma se faanaunauga malosi ia iloa ma tapuaʻi iā Ieova le Atua, o Lē na foafoaina i latou. O lenā faanaunauga e faasino atu i o tatou “manaʻoga faaleagaga.” Talu ai o Ieova o “le Atua fiafia,” e fiafia foʻi i latou e tapuaʻi atu iā te ia.​—1 Timo. 1:11.

2-3. (a) E tusa ai ma upu a Iesu, o ai isi e mafai ona mauaina le fiafia? (e) O le ā o le a tatou iloiloina i lenei mataupu, ma aiseā e tāua ai?

² Pe seʻiloga e leai ni faafitauli ona faatoʻā tatou maua lea o le fiafia? E leai. Na taʻua e Iesu i lana lauga se manatu e faateʻia ai. Na ia faapea mai e mafai ona fiafia “o ē e faanoanoa,” e tusa pe mafatia ona o ni a latou agasala po o ni tulaga faigatā o loo latou fesagaʻia i o latou olaga. O le manatu foʻi lenā na taʻua e Iesu e faatatau i “ē e sauāina ona o le amiotonu,” po o ē e “upuleagaina” ona o le avea ma soo o Keriso. (Mata. 5:4, 10, 11) Ae e faapefea ona maua le fiafia moni e ui i na tulaga?

³ Na aʻoaʻoina i tatou e Iesu, e lē faalagolago le mauaina o le fiafia i le sologa lelei o le olaga, ae e maua i le faamalieina o o tatou manaʻoga faaleagaga ma mafuta vavalalata i le Atua.  (Iako. 4:8) E faapefea ona tatou faia lenā mea? O le a iloiloina i lenei mataupu laasaga e tolu e fesoasoani iā i tatou e maua ai le fiafia moni.

4. O le ā le laasaga muamua i le mauaina o le fiafia moni? (Salamo 1:1-3)

⁴ LAASAGA 1: Ina ia maua le fiafia moni, e tatau ona tatou aai i meaʻai faaleagaga. E manaʻomia uma e tagata ma manu meaʻai faaletino ina ia maua ai le ola. Ae e na o tagata e mafai ona aai i meaʻai faaleagaga, ma o se mea e manaʻomia ona faia. O le māfuaaga lenā na fetalai ai Iesu: “E lē na o meaʻai e ola ai le tagata, ae o afioga uma e tulei mai i le fofoga o Ieova.” (Mata. 4:4) O lea, e lē tatau ona iai se aso e tatou te lē aai ai i ni meaʻai faaleagaga mai i le Afioga tautele a le Atua, le Tusi Paia. Na taʻua e le faisalamo: ʻE fiafia le tagata e naunau i le tulafono a Ieova, ma faitau i ai i le ao ma le pō.’​—Faitau le Salamo 1:1-3.

5-6. (a) O ā upu moni ua tatou aʻoaʻoina mai i le Tusi Paia? (e) E faapefea ona fesoasoani iā i tatou le faitauina o le Tusi Paia?

⁵ O le alofa o Ieova, ua ia saunia mai ai i le Tusi Paia faamatalaga e sili ona tāua i le auala e maua ai se olaga fiafia. Ua tatou aʻoaʻoina ai po o le ā lona finagalo mo i tatou, le auala e mafuta vavalalata ai iā te ia ma maua lana faamagaloga mo a tatou agasala, faapea le faamoemoe matagofie ua ia folafolaina mai i le lumanaʻi. (Iere. 29:11) Ua faatumulia o tatou loto i le olioli, ona o nei upu moni ua tatou aʻoaʻoina mai i le Tusi Paia.

⁶ O loo iai foʻi i le Tusi Paia le tele o fautuaga aogā mo o tatou olaga i aso faisoo. O le  usitaʻia o na fautuaga, o le a tatou maua ai le fiafia. Pe a tatou lagona le lotovaivai ona o faafitauli o le olaga, ia faaalu le tele o le taimi e faitau ai i le Afioga a Ieova ma manatunatu loloto i ai. Na fetalai Iesu: “Amuia i latou e faalogo i le afioga a le Atua ma tausi i ai!”​—Luka 11:28.

7. E faapefea ona e maua le tele o aogā mai i le faitauina o le Tusi Paia?

⁷ A o e faitauina le Afioga a le Atua, ia faaalu se taimi e manatunatu loloto ai i mea o loo e faitauina, ina ia e maua ai le fiafia. O se faataʻitaʻiga, seʻi faapea na kuka e se tasi se meaʻai e te fiafia lava i ai. Ae atonu e iai se mea o loo e fia alu i ai pe e ese le mea o loo e mafaufau ai, ua faatopelau ai lau ʻai ma lē faaalu ai se taimi e iloa ai le manaia o le tofo o le meaʻai. Ina ua uma ona e ʻai, faatoʻā e iloa ai le faatopelau o le auala na e ʻai ai ma e mafaufau ai ana iloa e lē faatopelauina lau ʻai, ae faaalu se taimi e iloa ai le manaia o le tofo o le meaʻai. Pe na iai se taimi na faatopelau ai ona e faitauina le Tusi Paia, ma lē manatunatu loloto ai i le feʻau o loo iai? Ia avea lau faitauga Tusi Paia o se mea e fiafia ai. Ia faaata vaaiga o loo iai, ia pei o loo e lagona atu leo eseese, ma manatunatu loloto i mea o loo e faitauina. O na auala o le a atili ai ona e fiafia i lau faitauga Tusi Paia.

8. Ua faapefea ona faataunuu e “le pologa faamaoni ma le faautauta” lana matafaioi? (Tagaʻi foʻi i le faaopoopoga i le pito i lalo.)

⁸ Ua tofia e Iesu “le pologa faamaoni ma le faautauta” e saunia meaʻai faaleagaga i le taimi tatau, ma e anoanoaʻi taumafa faaleagaga ua fafagaina ai i tatou. * (Mata. 24:45) O le faavae autū o mea uma ua saunia mai e le pologa faamaoni, o le Tusi Paia. (1 Tesa. 2:13) O na meaʻai faaleagaga e fesoasoani iā i tatou e iloa ai manatu o Ieova e pei ona taʻua i le Tusi Paia. O le māfuaaga lea e tatou te faitau ai i mekasini o Le Olomatamata ma le Ala Mai!, ma mataupu o loo iai i le jw.org. E tatou te sauniuni mo sauniga amata o le vaiaso ma sauniga i le faaiʻuga o le vaiaso. E tatou te matamata foʻi i polokalame i masina taʻitasi i le TV i le Initaneti a Molimau a Ieova. O lo tatou aai pea i meaʻai faaleagaga, o le a fesoasoani iā i tatou e uia ai le laasaga lona lua lea e mafai ona maua ai le fiafia moni.

9. O le ā le laasaga lona lua i le mauaina o le fiafia moni?

⁹ LAASAGA 2: Ina ia maua le fiafia moni, e manaʻomia ona tatou ola e ōgatusa ma tapulaa a Ieova. Na tusi le faisalamo: “E fiafia i latou uma e matataʻu iā Ieova, o ē e savavali i Ona ala.” (Sala. 128:1) O le mataʻu iā Ieova e uiga atu i le faaalia o le matuā faaaloalo iā te ia, lea e tatou te ʻalofia ai le faia o so o se mea e lē fiafia ai lona finagalo. (Faata. 16:6) O lea, e tatou te taumafai malosi pea e usitaʻia tapulaa a le Atua i le mea saʻo ma le mea sesē o loo faailoa mai i le Tusi Paia. (2 Kori. 7:1) O le a tatou fiafia pe a faia mea e fiafia i ai Ieova, ma ʻinoʻino i mea e na te inosia.​—Sala. 37:27; 97:10; Roma 12:9.

10. E tusa ai ma le Roma 12:2, o le ā la tatou matafaioi?

¹⁰ Faitau le Roma 12:2. Atonu e iloa e se tasi e iai iā Ieova le aiā e filifili ai le mea saʻo ma le mea sesē, ae e tatau foʻi ona ia talia tapulaa ua faataatia e le Atua mo ia. O se faataʻitaʻiga, atonu e iloa e se tasi e iai i se faigāmalo le aiā e faatulaga ai le saoasaoa e tatau ona alu ai se taavale. Ae atonu e na te lē taliaina lenā mea. O le iʻuga, o le a sili atu le saoasaoa e alu ai lana taavale nai lo o le saoasaoa faatulagaina. O a tatou amioga e  faamaonia atu ai, o le mulimuli i tapulaa a Ieova o le auala sili lea e ola ai. (Faata. 12:28) O faalogona na o Tavita, auā na ia faapea mai e uiga iā Ieova: “Ua e faailoa mai iā te aʻu le ala i le ola. O loo i ou luma le tele o le olioli; o loo i lou itu taumatau le olioli e oo i le faavavau.”​—Sala. 16:11.

11-12. (a) O le ā e tatau ona tatou faaeteete ai, pe a tatou feagai ma faafitauli pe lotovaivai? (e) E faapefea ona fesoasoani upu o loo i le Filipi 4:8 pe a filifili a tatou faafiafiaga?

¹¹ Pe a tatou feagai ma faafitauli pe lotovaivai, e tatou te ono manatu ai e faia se gaoioiga e ʻalofia ai le popole i o tatou faafitauli. E faatalitalia lenā tulaga, ae e tatau ona tatou faaeteete ina neʻi faaosoosoina ai i tatou e faia se mea e inosia e Ieova.​—Efe. 5:10-12, 15-17.

¹² I le tusi a le aposetolo o Paulo i Kerisiano i Filipi, na ia faalaeiauina ai i latou ina ia faaauau ona manatunatu i mea ua “tonu, . . . mamā, . . . e faatupu ai le alofa, [ma] viia ai se tasi.” (Faitau le Filipi 4:8.) E ui e leʻi patino le tusi a Paulo i faafiafiaga, ae e iai lona aogā i aso nei i le auala e tatou te filifili ai faafiafiaga. Ia faataʻitaʻi le mea lenei: O taimi uma lava e aliaʻe mai ai le upu “mea” i le mau faitau, tago e sui i le upu “pese,” “ata tifaga,” “talafatu,” po o “taaloga vitiō.” O lea auala o le a fesoasoani iā te oe e iloa ai mea e talia e le Atua ma mea e na te lē taliaina. E tatou te mananaʻo e faaōgatusa o tatou olaga ma tapulaa maualuluga a Ieova. (Sala. 119:1-3) O le a tatou maua ai se lotofuatiaifo mamā, ma tatou uia ai le laasaga lona tolu lea e mafai ona maua ai le fiafia moni.​—Galu. 23:1.

13. O le ā le laasaga lona tolu i le mauaina o le fiafia moni? (Ioane 4:23, 24)

¹³ LAASAGA 3: Ia faamautinoa e faamuamua i lou olaga le tapuaʻiga iā Ieova. Talu ai o Ieova o Lē na foafoaina i tatou, ua tatau ai la ona tatou tapuaʻi atu iā te ia. (Faaa. 4:11; 14:6, 7) O lea, e tatau ona tatou faamuamua le tapuaʻi atu iā te ia i “le agaga ma le upu moni.” E na o le pau lea o le auala e na te taliaina e tatou te tapuaʻi atu ai. (Faitau le Ioane 4:23, 24.) E tatou te mananaʻo e taʻitaʻia la tatou tapuaʻiga e le agaga o le Atua, ina ia ōgatusa ai ma upu moni o loo i lana Afioga. E tatau ona faamuamua la tatou tapuaʻiga e tusa pe e tatou te nonofo i se vaipanoa e faasāsā pe taofia ai la tatou galuega. E silia ma le 100 o tatou uso ma tuafāfine o loo faafalepuipuiina ona o i latou o ni Molimau a Ieova. * E ui i lea, e latou te fiafia ona o loo latou faia le mea sili e ala i le tatalo, suʻesuʻe, ma taʻu atu i isi e uiga i lo tatou Atua ma lona Malo. Pe a tauemua pe sauāina i tatou, e tatou te fiafia i le iloaina o loo faatasi Ieova ma i tatou ma o le a ia tauia i tatou.​—Iako. 1:12; 1 Pete. 4:14.

14. O le ā na tupu i se uso talavou mai i Tajikistan, ma aiseā?

¹⁴ O tala o mea moni na tutupu e faamautinoa mai ai, o laasaga e tolu sa tatou talanoaina e mafai ona maua ai le fiafia moni, e ui i tulaga faigatā e tatou te fesagaʻia. Seʻi mātau le mea na tupu iā Jovidon Bobojonov e 19 ona tausaga mai i Tajikistan, ona o le lē auai i le vaegaʻau. Iā Oketopa 4, 2019, na aveese faamalosi ai o ia mai i lona fale, faafalepuipui mo ni masina, ma faileagaina e pei o se tagata solitulafono. O lea faiga lē tonu na avea ma mataupu autū o faasalalauga a le tele o atunuu. Na lipotia mai na sasaina o ia ina ia faamalosia ai e auai i le vaegaʻau ma ofuina  togiga a le vaegaʻau. Ina ua uma lenā mea, na molia o ia ma auina atu i se nofoaga o faasalaga seʻia oo ina solofua aloaʻia e le peresitene o le atunuu, ma faatonuina ina ia faasaʻoloto o ia. I lenā taimi atoa, sa faatumauina le faamaoni ma le fiafia o Jovidon, ona sa ia manatu mamafa pea i ona manaʻoga faaleagaga.

15. Na faapefea ona maua e Jovidon meaʻai faaleagaga a o iai i le falepuipui?

¹⁵ A o faafalepuipui Jovidon, na faaauau ona ia ʻai i meaʻai faaleagaga, e ui e leʻi iai sana Tusi Paia po o ni lomiga faale-Tusi Paia. Na faapefea ona tupu lenā mea? Na avatu e uso ma tuafāfine i lenā vaipanoa meaʻai iā te ia, ma tusi mau o le aso i ato na ave ai meaʻai. O lea, na mafai ai ona ia faitau le Tusi Paia ma manatunatu loloto i ai i aso uma. Ina ua faasaʻoloto o ia mai i le falepuipui, na ia avatu ai se fautuaga iā i latou e leʻi feagai ma ni tofotofoga faigatā: “E tāua tele ona faaaogā atoatoa lou saʻolotoga e faalolotoina ai lou poto e uiga iā Ieova, e ala i le faitau o lana Afioga ma a tatou lomiga.”

16. O ā mea na taulaʻi i ai Jovidon?

¹⁶ Na ola lo tatou uso e ōgatusa ma tapulaa a Ieova. Na ia taulaʻi iā Ieova ma mea e tāua iā te Ia, nai lo o le mafaufau pea i faanaunauga sesē ma faia amioga leaga. Na maofa Jovidon  i le matagofie o foafoaga a le Atua. E alafaʻi mai o ia i taeao taʻitasi i le tausagi mai o manulele, ma pe a oo i le pō e na te vaavaai i le masina ma fetu. Na ia faapea mai: “O na meaalofa mai iā Ieova na ou lagona ai le fiafia ma le faalaeiauina.” Pe a tatou lotofaafetai i sauniuniga faaleagaga ma faaletino a Ieova, o le a tatou maua ai le olioli lea e faamalosia ai i tatou ina ia tumau pea.

17. Pe a tatou feagai ma se tulaga e pei ona oo iā Jovidon, o le ā e iʻu i ai pe a faaauau ona tatou tumau? (1 Peteru 1:6, 7)

¹⁷ Na faamuamua foʻi e Jovidon le tapuaʻiga iā Ieova. Na ia iloa le tāua o le faamaoni pea i le Atua moni. Na fetalai Iesu: “E tatau ona e tapuaʻi iā Ieova lou Atua, ma e na o ia foʻi e tatau ona e avatu i ai le auaunaga paia.” (Luka 4:8) Na mananaʻo taʻitaʻiʻau ma fitafita e tuua e Jovidon lana tapuaʻiga. Peitaʻi na ia tatalo faatauanau iā Ieova i le ao ma le pō, e fesoasoani mai iā te ia ina ia aua le faavaivai ma faafitia lona faatuatua. E ui i faiga lē tonu na ia fesagaʻia, ae na tumau pea ma le faamaoni Jovidon. O le iʻuga, ua ia olioli ona ua sili atu ona malosi lona faatuatua i le taimi lenei ina ua uma ona tofotofoina, nai lo o le taimi a o leʻi aveesea faamalosi o ia, sasaina, ma faafalepuipuiina.​—Faitau le 1 Peteru 1:6, 7.

18. E faapefea ona faatumauina lo tatou fiafia?

¹⁸ E silafia e Ieova mea e tatou te manaʻomia ina ia maua ai le fiafia moni. Pe a e uia laasaga e tolu ia e maua ai le fiafia moni, o le a faatumauina ai lou fiafia e ui i tulaga faigatā. O le a mafai foʻi ona e faapea atu: ʻE fiafia le nuu e fai Ieova ma o latou Atua!’​—Sala. 144:15.