1. O le ā le tali atu a le toʻatele i aso nei i le alaga a le atamai? (Faataoto 1:20, 21)

 I LE tele o atunuu, e masani ona vaaia ai tagata talaʻi fiafia o le Malo, o loo ofoina atu lomiga i tagata feoaʻi i magāala pisi. Po ua e faataʻitaʻia lenā vala o le faiva? Afai o lea, e lē taumatea la sa e mafaufau i le faaupuga faafaatusa o loo i le tusi o Faataoto, e faatatau i le alaga leotele a le atamai i nofoaga faitele, ina ia faalogo tagata i ana fautuaga. (Faitau le Faataoto 1:20, 21.) O loo iai i le Tusi Paia ma a tatou lomiga le “atamai moni,” po o le atamai o Ieova. O le atamai lea o loo manaʻomia e tagata ina ia latou maua ai le ola e faavavau. E tatou te fiafia pe a talia e se tasi a tatou lomiga. Ae e lē o tagata uma e latou te faia faapea. O isi e lē mananaʻo e aʻoaʻoina mea o loo taʻua i le Tusi Paia. Ae e toē mai isi iā i tatou ma manatu e lē o toe aogā le Tusi Paia. O nisi e lē ioe i aʻoaʻoga a le Tusi Paia e faatatau i amioga tatau, ma manatu o i latou e mulimuli i na aʻoaʻoga e lē alolofa ma e faafiaamiotonu. Peitaʻi, e agalelei Ieova ma foaʻi mai pea le atamai moni i tagata uma. E faapefea?

2. O fea e tatou te maua ai le atamai moni i aso nei, ae o le ā ua filifili le toʻatele e fai?

² O se tasi o auala ua foaʻi mai ai e Ieova le atamai moni, o lana Afioga le Tusi Paia. E toetoe o tagata uma ua mauaina lenā tusi. Ae e faapefea a tatou lomiga faale-Tusi Paia? O le faamanuia a Ieova, ua maua ai lomiga i le silia ma le 1,000 gagana. O ē e faalogo  pe faitau ma faatatauina mea e latou te aʻoaʻoina, o le a mauaina aogā. Peitaʻi, ua filifili le toʻatele e lē faalogo i le alaga a le atamai moni. Pe a faia a latou filifiliga, e latou te faalagolago iā i latou lava pe e faalogo i isi. E latou te ono manatu faatauvaa iā i tatou, ona ua tatou filifili e usiusitaʻi i taʻiala mai i le Tusi Paia. O le a tatou talanoaina i lenei mataupu, pe aiseā ua tali mai ai faapea tagata. Ae seʻi iloilo muamua le auala e tatou te maua ai le atamai mai iā Ieova.

3. O ā mea e aofia ai i le mauaina o le atamai moni?

³ O le atamai o le tomai lea e tatou te faaaogā ai mea ua tatou iloa e faia ai filifiliga lelei. Peitaʻi, e lē na o le pau lenā o le mea e aofia ai i le mauaina o le atamai moni. Ua faapea mai le Tusi Paia: “O le mataʻu iā Ieova, o le amataga lea o le atamai, ma o le poto i Lē e Sili Ona Paia, o le malamalama lea.” (Faata. 9:10) O lea, pe a tatou faia ni filifiliga tāua, e tatau ona faavae i manatu o Ieova po o “le poto i Lē e Sili Ona Paia.” E mafai ona tatou faia faapea, e ala i le suʻesuʻe o le Tusi Paia ma lomiga faale-Tusi Paia. O le iʻuga, o le a tatou maua ai le atamai moni.​—Faata. 2:5-7.

4. Aiseā e na o Ieova e mafai ona foaʻi mai le atamai moni?

⁴ E na o Ieova e mafai ona foaʻi mai le atamai moni. (Roma 16:27) Aiseā ua taʻua ai o ia o le Puna o le atamai? Muamua, talu ai o ia o Lē na foafoaina mea uma, e lē gata mai la lona atamai ma lona malamalama e faatatau i ana foafoaga. (Sala. 104:24) Lona lua, o gaoioiga uma a Ieova e atagia mai ai le atamai. (Roma 11:33) Lona tolu, o fautuaga atamai a Ieova e maua ai e i latou e faatatauina aogā. (Faata. 2:10-12) Pe a tatou fia maua le atamai moni, e tatau ona tatou talia na upu moni, ma ia faavae ai a tatou filifiliga ma gaoioiga.

5. O ā iʻuga pe a teena e tagata Ieova o le Puna o le atamai moni?

⁵ Ua faapea mai le toʻatele e tatou te feiloaʻi ai i le talaʻiga, e matagofie le auala na foafoaina ai le lalolagi. Peitaʻi, e latou te lē talitonu e iai Sē na foafoaina mea. O nisi e faapea mai e latou te talitonu i le Atua, ae e latou te vaai i tapulaa a le Tusi Paia e lē o toe aogā ma filifili ai e faia mea e latou te mananaʻo ai. O le ā le iʻuga? Po o mafai ona faaleleia le tulaga o le lalolagi, ona o le faalagolago o tagata i lo latou lava atamai nai lo o le atamai o le Atua? Po o latou maua le fiafia moni po o se faamoemoe mautinoa i le lumanaʻi? O mea o loo tutupu, ua tatou mautinoa ai i le mea moni lenei: “E leai se atamai, po o se faautaga loloto, po o se fautuaga e tetee atu iā Ieova.” (Faata. 21:30) O lenā mea e uunaʻia ai i tatou e talosaga atu pea iā Ieova e foaʻi mai le atamai moni. Ae e faanoanoa ona e lē o faia faapea e le toʻatele. Aiseā?

6. E tusa ai ma le Faataoto 1:22-25, o ai i latou e faataligatuli i le alaga a le atamai moni?

⁶ E toʻatele e faataligatuli pe a “alaga leotele le atamai moni i le magāala.” I le Tusi Paia, e tolu vaega o tagata e tetee i le atamai: “o ē ua leai se poto masani,” “o ē e tauemu,” ma “ē e vālea.” (Faitau le Faataoto 1:22-25.) Seʻi o tatou talanoaina auʻiliʻili na uiga lea e māfua ai ona teena e nisi le atamai mai i le Atua, ma le auala e ʻalofia ai le atiaʻe o na uiga.

7. Aiseā ua filifili ai nisi e tumau pea ona “leai [so latou] poto masani”?

⁷ “O ē ua leai se poto masani,” o i latou ia e talitonu i mea uma e latou te faalogo i ai ma faigofie ona faasesēina. (Faata. 14:15) E  masani ona tatou feiloaʻi ma tagata faapena i le talaʻiga. O se faataʻitaʻiga, e faitau miliona i latou ua faasesēina e taʻitaʻi lotu po o taʻitaʻi o malo. E faateʻia nisi pe a iloa ane o loo faasesēina i latou e na taʻitaʻi. Ae ua filifili i latou o loo taʻua i le Faataoto 1:22, e tumau pea ona leai so latou poto masani ona o le mea lenā o loo latou mananaʻo ai. (Iere. 5:31) E latou te faia mea e latou te mananaʻo ai ma lē fia aʻoaʻoina mea o loo taʻua i le Tusi Paia, pe usitaʻia tulafono o loo iai. E toʻatele e manatu e pei o se tasi o fafine mapolotu mai i Quebec i Kanata. Na ia fai i se Molimau na asiasi atu, “Pe afai e taʻitaʻisesēina i matou e la matou faifeʻau, o lona lava sesē lenā ae e lē o matou.” E mautinoa e tatou te lē fia faaaʻoaʻo iā i latou e filifili ma le loto i ai e lē faalogo i le atamai moni.​—Faata. 1:32; 27:12.

8. O le ā e fesoasoani iā i tatou e maua ai le atamai?

⁸ Ua faalaeiauina ai la i tatou i le Tusi Paia, ina ia tumau pea ona iai lo tatou poto masani ma “ia [o tatou] faatagatamatua i le mafaufau.” (1 Kori. 14:20) E tatou te maua le atamai pe a faatatauina mataupu silisili o le Tusi Paia i o tatou olaga. O le faia faapea, o le a tatou iloa ai pe faapefea ona fesoasoani nei mataupu silisili e tatou te ʻalofia ai faafitauli ma faia filifiliga atamai. E tāua la le iloilo o a tatou filifiliga sa fai. Pe afai ua umi se taimi o tatou suʻesuʻe le Tusi Paia ma auai i sauniga, e tatau ona tatou fesili ifo, ʻAiseā la ou te leʻi uia ai lava laasaga ina ia tuuina atu ai iā Ieova ma papatiso?’ Pe afai ua tatou papatiso, po o faaleleia le auala e tatou te talaʻi ma aʻoaʻo atu ai le tala lelei? Po o atagia mai i a tatou filifiliga o loo taʻitaʻia i tatou i mataupu silisili o le Tusi Paia? Po o tatou faaalia uiga faa-Kerisiano i a tatou feutagaʻiga ma isi? Pe a tatou iloa e iai se vala e manaʻomia ona faaleleia, e tatau ona tatou uaʻi atu i faamanatuga a Ieova lea “e atamai ai le tagata e leai se poto masani.”​—Sala. 19:7.

9. Ua faapefea ona teena e “ē e tauemu” le atamai?

⁹ O le vaega lona lua o tagata e teena le atamai mai i le Atua, “o ē e tauemu.” E iai taimi e tatou te feiloaʻi ai ma i latou na i le galuega talaʻi. E latou te fiafia e taufaifai i isi. (Sala. 123:4) Na lapataʻi mai le Tusi Paia, o le a toʻatele ē tauemu i aso e gata ai. (2 Pete. 3:3, 4) E pei isi tagata i aso nei o tane a afafine o Lota le tagata amiotonu, e latou te lē ano i lapataʻiga mai i le Atua. (Kene. 19:14) O le toʻatele o tagata e latou te ulagia i latou e ola i mataupu silisili o le Tusi Paia, ina ia faamalie ai “o latou lava tuʻinanauga i mea leaga.” (Iuta 7, 17, 18) Ua fetaui lelei le auala ua faamatala ai i le Tusi Paia ē tauemu, ma uiga o i latou ua liliuese mai i le upu moni ma isi ua teena Ieova.

10. I le Salamo 1:1, e faapefea ona tatou ʻalofia le mulimuli i le ala o ē e tauemu?

¹⁰ E faapefea ona leoleomalu i tatou mai i le mulimuli i le ala o ē e tauemu? O se tasi o auala, o le ʻalofia lea o le faifaimea faatasi ma i latou e iai uiga faitio. (Faitau le Salamo 1:1.) O lona uiga e tatou te lē faalogo pe faitau i so o se mea mai i ē ua liliuese mai i le upu moni. Pe a tatou lē faaeteete, o le a faigofie ona tatou atiaʻe le uiga faitio, ma amata ai ona lē maufaatuatuaina Ieova ma faatonuga e maua mai i lana faalapotopotoga. Ina ia ʻalofia lenā mea, ia tatou fesili ifo: ʻPe e masani ona ou faitio pe a maua ni taʻiala po o ni faamatalaga fou? Pe ou te vaavaai masei i uso taʻimua?’ Pe a vave ona tatou gaoioi e faasaʻo na ituaiga o mafaufauga, o le a tatou maua ai le finagalo malie o Ieova.​—Faata. 3:34, 35.

11. O le ā le vaaiga a “ē e vālea” i tapulaa tauamio a Ieova?

¹¹ O le vaega lona tolu o tagata e teena le atamai, “o ē e vālea.” E latou te vālea ona e lē  mananaʻo e ola e tusa ma tapulaa tauamio a le Atua. E latou te faia mea e saʻo i o latou lava manatu. (Faata. 12:15) O i latou na e tetee iā Ieova, le Puna o le atamai. (Sala. 53:1) Pe a tatou feiloaʻi ma i latou na i le galuega talaʻi, e masani ona latou matuā faitioina i tatou ona e tatou te faatāuaina tapulaa a le Tusi Paia. Peitaʻi, e lē mafai ona latou faaleleia o tatou olaga. Ua faapea mai le Tusi Paia: “E lē mafai e le tagata valea ona maua le atamai moni; e leai sana faamatalaga e fai i le faitotoʻa o le aai.” (Faata. 24:7) O le tagata valea, e leai ma se fautuaga atamai e mafai ona ia avatuina. E lētioa lapataʻia i tatou e Ieova ina “ia faamamao ese mai i le tagata valea”!​—Faata. 14:7.

12. O le ā e fesoasoani iā i tatou ina ia lē mulimuli ai i le ala o ē e vālea?

¹² E tatou te lē pei o ē e ʻinoʻino i fautuaga a le Atua. Nai lo o lea, e tatou te atiaʻe le fiafia i ala o le Atua e aofia ai ana tapulaa tauamio. E faateleina lenā fiafia, e ala i le faatusatusa o iʻuga o le usiusitaʻi i fautuaga a le Atua ma iʻuga o le lē usiusitaʻi i ai. Ia mātau faafitauli e oo i tagata ona o lo latou teena o fautuaga atamai a Ieova, ona faatusatusa lea i le olaga sili ua e mauaina ona o lou usiusitaʻi i le Atua.​—Sala. 32:8, 10.

13. Pe e faamalosia e Ieova i tatou e usiusitaʻi i ana fautuaga atamai?

¹³ E foaʻi mai e Ieova le atamai i tagata uma, ae e na te lē faamalosia se tasi e taliaina. Peitaʻi, ua ia faamatalaina iʻuga e oo iā i latou e lē faalogo i le atamai. (Faata. 1:29-32) O i latou e filifili e lē usiusitaʻi iā Ieova, o le a ʻselesele i āuga o o latou ala.’ A o faagasolo taimi, o le a latou tofo ai i le tele o tigā ma mafatiaga ona o le auala o loo latou ola ai, ma i le iʻuga, o le a faaumatia i latou e Ieova. Peitaʻi, o i latou e faalogo ma faatatauina fautuaga atamai a Ieova, o le a latou tofo i lana folafolaga lenei: “O lē e faalogo mai iā te aʻu, o le a nofo ma le saogalemu e aunoa ma le fefe i so o se puapuaga.”​—Faata. 1:33.

14-15. O le ā e tatou te aʻoaʻoina mai i le Faataoto 4:23?

¹⁴ Pe a tatou faatatauina le atamai o le Atua, e tatou te maua ai aogā. E pei ona talanoaina, e aumai e Ieova fautuaga atamai i tagata uma. O se faataʻitaʻiga, i le tusi o Faataoto ua ia saunia mai ai fautuaga e aogā i taimi uma, lea e faaleleia ai o tatou olaga pe a faatatauina. Seʻi o tatou iloiloina ni faaaʻoaʻoga se fā o na fautuaga atamai.

¹⁵ Ia puipui lou loto. Ua faapea mai le Tusi Paia: “O le mea e sili ona leoleoina o mea uma, ia leoleoina lou loto, auā e faalagolago i ai lou ola.” (Faata. 4:23) Ia mafaufau i mea e mafai ona tatou faia ina ia puipuia ai o tatou fatu. E manaʻomia ona tatou taumafa i meaʻai paleni, lava le faamalositino, ma ia ʻalofia masaniga leaga. I se tulaga talitutusa, ina ia  puipuia o tatou loto, e tatau ona fafagaina e lē aunoa i tatou i le Afioga a le Atua. E tatou te sauniuni, auai, ma faia se sao i sauniga a le faapotopotoga. E tatou te maelega e ala i le auai e lē aunoa i le galuega talaʻi. E tatou te ʻalofia foʻi le atiaʻe o masaniga leaga, e ala i le taumamao mai i so o se mea e faaleagaina ai o tatou mafaufau, e pei o faafiafiaga lē mamā ma aumea leaga.

16. Aiseā e tāua ai le fautuaga o loo i le Faataoto 23:4, 5 i aso nei?

¹⁶ Ia lotomalie i mea ua e maua. Ua fautua mai le Tusi Paia: “Aua e te soona galue ina ia maua ai le tamaoaiga. . . . Pe a vaai atu i ai ou mata, ua lē toe iai i inā, auā e mautinoa e fai ona apaʻau e pei o le aeto ma lele atu i le lagi.” (Faata. 23:4, 5) E lē tumau ona iai tupe ma meafaitino. Peitaʻi, ua matuā pupū tagata mauʻoa ma tagata matitiva i le saʻilia o tupe. O le māfuaaga lea e latou te faia ai mea e taʻuleagaina ai o latou talaaga, faaleagaina ai a latou faiā ma isi, e oo lava i lo latou soifua mālōlōina. (Faata. 28:20; 1 Timo. 6:9, 10) I le isi itu, e fesoasoani le atamai iā i tatou e maua ai se vaaiga paleni i tupe. O lenā mea e puipuia ai i tatou mai i le manaʻo tele, ma tatou maua ai le faamalieina ma le fiafia.​—Fai. 7:12.

17. E faapefea ona iā i tatou le “laulaufaiva o ē e atamamai,” e pei ona taʻua i le Faataoto 12:18?

¹⁷ Ia mafaufau muamua a o leʻi fai atu se faamatalaga. Pe a tatou lē faaeteete, e mafai e a tatou upu ona matuā faatigā ai i isi. Ua faapea mai le Tusi Paia: “O le tagata e tautala lē mafaufau, ua pei o le tutuʻi o le pelu, a o laulaufaiva o ē e atamamai, e mālōlō ai.” (Faata. 12:18) E tatou te faatumauina ni faauōga lelei pe a tatou ʻalofia le faia o tala e faatatau i masei o isi. (Faata. 20:19) Ina ia mālōlōina isi nai lo o le tigā ona o a tatou faamatalaga, e tatau ona faatumu o tatou loto i le poto mai i le Afioga a le Atua. (Luka 6:45) Pe a tatou manatunatu loloto i manatu o loo iai i le Tusi Paia, o le a pei a tatou upu o se “vaipuna o le atamai” lea e faafouina ai isi.​—Faata. 18:4.

18. E faapefea i le faatatauina o le Faataoto 24:6 ona fesoasoani iā i tatou e taulau ai i le faiva?

¹⁸ Ia mulimuli i taʻiala. Ua aumaia i le Tusi  Paia se fautuaga aogā ina ia tatou taulau ai: “O le taʻitaʻiga atamai e te tau ai lau taua, ma o le toʻatele o ē e faufautua, e taulau ai.” (Faata. 24:6, fpl.) Seʻi mātau le auala e faatatauina ai lenā mataupu silisili i le galuega talaʻi ma le aʻoaʻo atu. Nai lo o le faia o le galuega talaʻi i la tatou lava auala, ia tatou taumafai e mulimuli i taʻiala ua aumai. E tatou te maua le taʻitaʻiga atamai i a tatou sauniga faa-Kerisiano, mai i lauga ma taulimaga e faavae mai i le Tusi Paia a i latou e lava le tomai i nei vaega. Ua saunia mai foʻi e le faalapotopotoga a Ieova meafaigaluega aogā e pei o lomiga ma vitiō, lea e fesoasoani i tagata e malamalama ai i le Tusi Paia. Po ua e aʻoaʻoina le auala e faaaogā lelei ai nei meafaigaluega?

19. O ā ni ou faalogona e faatatau i le atamai ua foaʻi mai e Ieova? (Faataoto 3:13-18)

¹⁹ Faitau le Faataoto 3:13-18. Maʻeu lo tatou lotofaafetai ona o fautuaga aogā o loo iai i le Afioga a le Atua! E tatou te faalagolago i ai, ma e lē mafai ona tatou maua le fiafia pe a aunoa ma na fautuaga. Sa tatou talanoaina i lenei mataupu nisi o fautuaga aogā o loo i le tusi o Faataoto. O le mea moni, e tele fautuaga atamai ua saunia mai e Ieova o loo i le Tusi Paia. Ia tatou maumauaʻi e gaoioi i taimi uma e tusa ma le atamai ua foaʻi mai e Ieova. E lē tāua iā i tatou le auala e vaai ai le lalolagi i lenā atamai, auā e tatou te mautinoa “e fiafia i latou e taofimau pea i [le atamai].”