A o faagasolo lenā tausaga, na faia ai e le faalapotopotoga nisi o suiga i le auala e tapuaʻi ai ina ia faamalosia atili ai le autasi o Tagata Aʻoga o le Tusi Paia. Na amata ona lomia i le Watch Tower, auala na faamatala ai mau e talanoaina i a latou Sauniga o Tatalo ma Viiga iā Ieova na faia i vaiaso taʻitasi. Na saunia foʻi e Tagata Aʻoga o le Tusi Paia se kalena o loo iai mau mo vaiaso taʻitasi, ma se pese e usuina a o faia suʻesuʻega a le tagata lava ia ma tapuaʻiga a le aiga.

I na sauniga, e faia ai e Tagata Aʻoga o le Tusi Paia “taʻutinoga” ia e aofia ai se tala o se mea na tupu i le talaʻiga, se faamatalaga e faafetai ai iā Ieova, se pese po o se tatalo. Na faapea mai Eva Barney lea na papatiso i le 1923 i le 15 o ona tausaga: “Pe a fia fai sau taʻutinoga, e te tū i luga ma faapea atu, ʻOu te faafetaia le Alii mo mea lelei uma ua ia faia mo aʻu.’” E fiafia nisi o uso e faia a latou taʻutinoga. Ua toe faapea mai Eva: “E tele mea na faafetai ai le uso pele o Godwin i le Alii. Ae ina ua vaai atu lana avā ua lē nofonofo lelei le uso o loo taʻimua i le sauniga, ona ia ʻeu lemū lea o le peleue a lana tane ma ia nofo ai loa i lalo.”

E taʻitasi i masina ona faia i faapotopotoga le Sauniga o Tatalo ma Viiga iā Ieova. Na faamatalaina lenei sauniga i le Watch Tower o Aperila 1, 1923 e faapea: “O le ʻafa o le sauniga e tatau ona faamatala ai mea na tutupu i le talaʻiga ma faalaeiau ai le ʻautalaʻi. . . . E matou te talitonu o nei sauniga faalaeiau o le a atili māfana ai le ʻauuso.”

O Charles Martin e 19 ona tausaga mai i Vancouver i Kanata, ma o se tagata talaʻi o le faapotopotoga. E tele aogā na ia maua mai i na sauniga, ma i se taimi mulimuli ane na ia faapea mai: “O nei sauniga na muamua aʻoaʻoina ai aʻu i le tala e fai atu pe a talaʻi mai i lea fale i lea fale. E masani lava e iai se tasi e faamatala se mea na tupu i le talaʻiga. O na tala na ou iloa ai le faamatalaga e fai ma le auala e tali atu ai i so o se teteega.”

Na faamalosia atili foʻi le autasi o le ʻauuso i le iai o ni “aso e talaʻi” ai. Na faasilasila i le Watch Tower o Aperila 1, 1923: “Ina ia maua pea lo tatou autasi i le galuega e tasi . . . , ua faatulagaina ai le Aso Lua, Me 1, 1923 e talaʻi ai. O lea, o Aso Lua muamua uma o masina taʻitasi o aso na  e talaʻi ai . . . E tatau ona faia se sao o tagata uma o le faapotopotoga i lenei galuega.”

E oo lava i talavou o le faapotopotoga na faia foʻi so latou sao i lenei galuega. O se faataʻitaʻiga, e na o le 16 tausaga o Hazel Burford ina ua ia auai i lenei galuega. Na ia faapea mai: “Na iai i le Bulletin taulimaga faataʻitaʻi e manaʻomia ona matou taulotoina. a O lea, na ma galulue mamafa ai ma le tamā o loʻu tinā fai e faia so ma sao i na vala uma o le talaʻiga.” Peitaʻi, na faateʻia Hazel i le auala na tali atu ai se uso ona o lona auai i le talaʻiga. Na faapea mai Hazel: “Na manatu se tasi o uso matua e lē tatau ona ou talanoa i tagata. I lenā taimi, e leʻi malamalama isi e tatau ona faia se sao o Tagata Aʻoga uma o le Tusi Paia, e aofia ai ʻtauleleʻa ma tamaʻitaʻi talavou,’ i le viia o Lē Sili na Foafoaina i tatou.” (Sala. 148:​12, 13) Ae na faaauau pea ona talaʻi Hazel. Mulimuli ane, na ia auai i le vasega lona lua o le Aʻoga o Kiliata ma auauna o se misionare i Panama. A o faagasolo taimi, na suia ai le manatu o uso e faatatau i le auai ai o talavou i le galuega talaʻi.

Na faamalosia atili foʻi le autasi o le ʻauuso i tauaofiaga. O le tele o nei tauaofiaga na iai aso na faatulaga e talaʻi ai, e pei o le tauaofiaga na faia i Winnipeg i Kanata. Iā Mati 31, na valaaulia ai i latou uma na auai i le tauaofiaga e talaʻi i le aai o Winnipeg. E toʻatele tagata fiafia na maua i lenā talaʻiga ma na iai iʻuga lelei. Iā Aokuso 5, e pe ā ma le 7,000 tagata na auai i se isi tauaofiaga i Winnipeg. O le tauaofiaga pito sili lenā ona toʻatele na faia i Kanata i lenā taimi.

Iā Aokuso 18-26, 1923, na faia ai e tagata o Ieova se tauaofiaga iloga i Los Angeles i Kalifonia. I vaiaso a o lumanaʻi le tauaofiaga, na faasalalauina ai i nusipepa ma e silia ma le 500,000 tamaʻi pepa valaaulia na tufatufaina atu e Tagata Aʻoga o le Tusi Paia. Na faapipii foʻi i taavale faailoilo na faalauiloa ai le tauaofiaga.

I le Aso Toonaʻi Aokuso 25, na faia ai e le uso o Rutherford se lauga na faamatuaina “Sheep and  Goats,” lea na ia faamanino mai ai o “mamoe” o i latou ia ua saunia o latou loto e ola e faavavau i le lalolagi parataiso. Na ia faailoa mai ai foʻi ma se iʻugāfono ua faamatuaina “A Warning.” I lenā iʻugāfono, na taʻusalaina ai lotu ua faapea mai o Kerisiano ma augani atu ai i ē lotofaamaoni, ina ia vavaeese mai iā “Papelonia le Aai Tele.” (Faaa. 18:​2, 4) Mulimuli ane, na tufatufaina ai e Tagata Aʻoga maelega o le Tusi Paia i le lalolagi aoao le faitau miliona o kopi o lenā iʻugāfono.

I le aso faaiʻu o le tauaofiaga, e silia ma le 30,000 i latou na faalogologo i le lauga lautele a le uso o Rutherford na faamatuaina, “All Nations Marching to Armageddon, but Millions Now Living Will Never Die.” Na faatalitalia e Tagata Aʻoga o le Tusi Paia, o le a matuā toʻatele i latou e auai i le tauaofiaga. O lea na latou totogi ai le faaaogāina o le Los Angeles Coliseum, o se fale taalo e leʻi leva ona fausia. Ina ia faamautinoa e lagona e tagata uma le polokalame, na faaaogā ai e le ʻauuso speakers o le fale taalo, o se faiga e fou i lenā taimi. E toʻatele foʻi i latou na faalogologo i le polokalame e ala i le leitiō.

I le 1923, na iai se faatelega mataʻina i le galuega talaʻi i Aferika, Europa, Initia ma Amerika i Saute. E ui lava na tausia e se uso mai i Initia e igoa iā A. J. Joseph lana avā ma lana fanau toʻaono, ae na ia fesoasoani foʻi i le sauniaina o lomiga i gagana Hindi, Tamil, Telugu, ma Urdu.

I Sierra Leone, na tusi atu ai ni Tagata Aʻoga o le Tusi Paia o Alfred Joseph ma Leonard Blackman i le ofisa ulu i Brooklyn i Niu Ioka, e talosaga mo se fesoasoani. Iā Aperila 14, 1923, na maua mai ai le tali o le la talosaga. Na faapea mai Alfred, “I se tasi Aso Toonaʻi i le leva o le pō na ou maua ai se telefoni e leʻi faatalitalia.” Na ia faalogo atu i se tagata leotele o fesili mai, “O oe lea na tusi i le Watch Tower Society e talosaga mo ni tagata talaʻi?” Na tali atu Alfred, “I.” Ona toe faapea mai lea o lenā tagata, “Ia o aʻu lea na latou auina mai.” O le leo lea na ou faalogo atu i ai, o William R. Brown. Na latou taunuu i le Aso Toonaʻi lava lenā mai i le Atu Karipiane faatasi ma lana avā o Antonia, ma le la fanau teine e toʻalua o Louise ma Lucy. Na tulimataʻia e le ʻauuso le taimi e feiloaʻi ai ma le uso o William ma lona aiga.

Na toe faapea mai Alfred: “O le taeao na sosoo ai a o faia le ma suʻesuʻega faale-Tusi Paia ma Leonard e pei ona masani ai i vaiaso taʻitasi, ae ma vaaia se tagata umī o loo tū mai i le faitotoʻa,  o le uso o William. O lona maelega tele i le upu moni, na ia manaʻo ai e faia se lauga lautele i le aso lava na sosoo ai.” E leʻi atoa se masina, ae ua uma ona ofoina atu e le uso o William lomiga uma na ia sau ma aumai. E leʻi umi ae ia maua isi tusi e 5,000, ma ina ua uma ona ofoina atu na tusi na toe manaʻomia ai foʻi nisi tusi. Peitaʻi, e leʻi iloa le uso o William o se tagata e faatauina atu tusi. I le taimi atoa o lana auaunaga faamaoni iā Ieova, e na te faaaogā lava mau i ana lauga ma o le māfuaaga lea na faaigoa ai o ia o “Bible Brown.”

I le taimi lenā, na matuā toʻatele i latou na iai i le ofisa o le lālā i Barmen i Siamani, ma na latou faalogo e lē o toe umi oo atu le vaegaʻau a Falani e faoa lenā aai. Na maua e Tagata Aʻoga o le Tusi Paia se fale i Magdeburg lea na foliga mai e talafeagai lelei mo le lomiaina o lomiga. Iā Iuni 19, na faamāeʻa ai e le ʻauuso le tapenaina o isi mea ma mea e faaaogā mo le lomiaina o lomiga, ma siitia atu loa i le Peteli fou i Magdeburg. O le aso lava na faailoa atu ai i le ofisa ulu ua māeʻa lelei ona siitia uma le aiga Peteli i Magdeburg, ae faasalalau loa i nusipepa ua faoa e Falani le aai o Barmen. Na vaai uso i lo latou siitia atu i lenā aai, o se faamaoniga o le faamanuia ma le puipuiga a Ieova.

E tele vaipanoa i Pasili na malaga ai George Young e talaʻi le tala lelei. Na ia faatūina foʻi se lālā fou ma amata ona lomia le Watch Tower i le gagana Potukali. E na o ni nai masina ae silia ma le 7,000 mekasini ma tamaʻitusi na ia tufatufaina atu. Na matuā fiafia lava Sarah Ferguson ina ua asiasi atu le uso o George i lo latou aiga. Talu mai le 1899, e fiafia tele Sarah e faitau i le Watch Tower, ae e leʻi mafai lava ona faailogaina lona tuuina atu e ala i le papatisoga. I ni nai masina mulimuli ane ai, na papatisoina ai loa Sarah ma lana fanau e toʻafā.

A o lata ina faaiʻuina le tausaga, na faamatalaina ai e le Watch Tower o Tesema 15, 1923, le aafiaga i Tagata Aʻoga o le Tusi Paia ona o le suiga i le auala na faia ai a latou sauniga, talaʻiga ma tauaofiaga: ʻE manino mai le malosi o le faatuatua o loo iai i faapotopotoga. Seʻi o tatou sauniuni mo isi galuega e tele, ma faaauau ona auauna i le Atua ma le maelega ma le fiafia a o faagasolo le tausaga 1924.’

Na avea foʻi le tausaga 1924 o se taimi mataʻina mo Tagata Aʻoga o le Tusi Paia. E tele ni masina na galulue ai uso mai i le Peteli i se fanua i Staten Island, lea e lē mamao mai i le ofisa ulu i Brooklyn. I le amatamataga o le 1924, na faamāeʻa ai le fausiaina o fale i lenā fanua ma na fesoasoani ina ia autasi ai le ʻauuso, ma faailoa atu le tala lelei i auala e latou te leʻi manatu e mafai ona faia ai.