1. Na faapefea ona faamalosia e le Atua ana auauna faamaoni i le taimi ua teʻa?

 E MASANI ona faamatalaina i le Tusi Paia tane faamaoni o ni ē e malolosi. O lenā malosi e aofia ai le malosi faaletino, lototele, malosi le faatuatua, malosi e onosaia ai mea, ma le maua o le fesoasoani a Ieova. Ae e lē o taimi uma na latou lagona ai le malosi. O se faaaʻoaʻoga, e iai taimi na lagona ai e le tupu o Tavita le “malosi e pei o se mauga,” ae i isi taimi na “atuatuvale ai” o ia. (Sala. 30:7) E ui lava na matuā malosi Samasoni ona o le fesoasoani a le agaga o le Atua, ae na ia iloa pe a aunoa ma le malosi mai i le Atua, o le a ʻvaivai o ia ma pei ai o isi tagata uma lava.’ (Faama. 14:​5, 6; 16:17) E pau le māfuaaga na malolosi ai nei tane faamaoni, ona na faamalosia i latou e Ieova.

2. Aiseā na faapea mai ai le aposetolo o Paulo, pe a ia lagona le vaivai ona ia lagona ai lea o le malosi? (2 Korinito 12:​9, 10)

² Na taʻutino mai e le aposetolo o Paulo, na ia manaʻomia foʻi le malosi mai iā Ieova. (Faitau le 2 Korinito 12:​9, 10.) E pei o le toʻatele o i tatou, na tauivi foʻi Paulo ma faafitauli tau i le soifua mālōlōina. (Kala. 4:​13, 14) Na iai foʻi le taimi na faigatā ai ona ia faia le mea saʻo. (Roma 7:​18, 19) Na iai foʻi taimi na ia lagona ai le popole ma le lē mautonu. (2 Kori. 1:​8, 9) Peitaʻi, ina ua lagona e Paulo le vaivai, ona ia lagona ai lea o le malosi. E faapefea? Na foaʻi mai e Ieova le malosi na manaʻomia e Paulo e onosaia ai na faigatā.

3. O ā fesili o le a taliina i lenei mataupu?

³ Ua folafola mai e Ieova e na te faamalosia foʻi i tatou. (1 Pete. 5:10) Ae e tatou te lē faatalitalia e otometi ona maua lenā malosi. E manaʻomia ona fai ni a tatou taumafaiga. O se faataʻitaʻiga, e lē mafai ona alu le taavale pe afai e leai se afi.  Ae ina ia mafai ona alu, e tatau i le avetaavale ona oomi le vae penisini. I se tulaga talitutusa, e nofosauni Ieova e foaʻi mai le malosi e tatou te manaʻomia. Ae ina ia maua lenā malosi, e tatau ona fai ni a tatou taumafaiga. O ā mea ua saunia e Ieova ina ia tatou maua ai le malosi? O le ā e manaʻomia ona tatou faia ina ia maua ai lenā malosi? O le a taliina na fesili e ala i le iloiloina o auala na faamalosia ai e Ieova le perofeta o Iona, Maria le tinā o Iesu, ma le aposetolo o Paulo. O le a talanoaina ai foʻi auala o loo faamalosia ai pea e Ieova ana auauna i aso nei, e pei ona ia faia i auauna i aso ua mavae.

4. E faapefea ona tatou maua le malosi mai iā Ieova?

⁴ O se tasi o auala e tatou te maua ai le malosi mai iā Ieova, o le tatalo lea iā te ia. E tali mai Ieova e ala i le foaʻi mai o “le mana lea e sili atu i le malosi o tagata.” (2 Kori. 4:7) E mafai foʻi ona faamalosia i tatou, pe a faitau i lana Afioga ma manatunatu loloto i ai. (Sala. 86:11) E faamalosia i tatou e le feʻau a Ieova o loo i le Tusi Paia. (Epe. 4:12) Pe a tatou tatalo iā Ieova ma faitau i lana Afioga, o le a tatou maua le malosi e manaʻomia ina ia tumau ai, faatumauina ai pea lo tatou olioli, pe faataunuu ai se tofiga faigatā. Ia mātau le auala na faamalosia ai e Ieova le perofeta o Iona.

5. Aiseā na manaʻomia ai e le perofeta o Iona le malosi?

⁵ Na manaʻomia e le perofeta o Iona le malosi. Na sola ese o ia mai i se tofiga faigatā na tuuina atu e Ieova iā te ia. O le iʻuga, na toetoe maʻimau lona ola ona o se afā malosi, ma na lamatia ai foʻi ola o ē na latou malaga faatasi i le vaa. Ina ua lafo ifo Iona i le sami, na folo o ia e se iʻa telē. Faamata o ā ni faalogona o Iona? Pe na ia manatu o le a oti ai i inā? Pe na ia tomānatu po ua tuulafoaʻia o ia e Ieova? E mautinoa na matuā atuatuvale Iona.

6. E tusa ai ma le Iona 2:​1, 2, 7, na faapefea ona maua e Iona le malosi a o iai i le manava o le iʻa?

⁶ O le ā na faia e Iona ina ia maua ai le malosi a o iai i le manava o le iʻa? O se tasi o mea na ia faia, o le tatalo. (Faitau le Iona 2:​1, 2, 7.) E ui lava e leʻi usiusitaʻi Iona iā Ieova, ae na ia mautinoa o le a faafofoga mai Ieova i le tatalo a lana auauna lotomaulalo ma ua faaalia le salamō. Na manatunatu loloto foʻi Iona i Tusitusiga Paia. E faapefea ona faamaonia lenā manatu? O le tele o upu ma faaupuga o lana tatalo i le Iona mataupu e 2, e taitutusa ma upu ma faaupuga o loo faaaogā i le tusi o Salamo. (O se faataʻitaʻiga, faatusatusa le Iona 2:​2, 5 i le Salamo 69:1; 86:7.) E manino mai, na iloa lelei e Iona na mau. O lona manatunatu loloto i na mau a o iai i le manava o le iʻa, na ia mautinoa ai o le a fesoasoani Ieova iā te ia. Mulimuli ane, na luai e le iʻa Iona i le laueleele mātūtū. Ua nofosauni nei Iona e talia ma faataunuu lona tofiga.—Iona 2:10–3:4.

7-8. Na faapefea i se uso mai i Taiwan ona maua le malosi a o feagai ma faigatā?

⁷ E mafai ona fesoasoani le faaaʻoaʻoga a Iona iā i tatou, pe a feagai ma luʻi eseese o le olaga. O se faataʻitaʻiga, o se uso i Taiwan e igoa iā Zhiming, b o loo tauivi ma ni maʻi tugā. O loo ia feagai foʻi ma teteega ogaoga mai i lona aiga ona o lona faatuatua iā Ieova. E na te maua le malosi mai iā Ieova, e ala i le tatalo ma suʻesuʻe le Tusi Paia. Ua ia taʻutino mai, “O nisi taimi pe a tulaʻi mai faafitauli, ou te lagona ai le matuā popole ma ou lē maua ai le toʻafilemu e fai ai aʻu lava suʻesuʻega.” Ae e leʻi faavaivai ai o ia. Na ia toe faapea mai, “Muamua, ou te tatalo iā Ieova, ona fai lea o aʻu  earphones ma faalogologo i pese o sauniga. O isi taimi ou te usuina ai na pese i se leo mālū seʻia oo ina ou lagona le toʻafilemu, ona faatoʻā amata loa lea o aʻu suʻesuʻega.”

⁸ O le faia e Zhiming o ana lava suʻesuʻega, ua faamalosia ai o ia i ni auala e na te leʻi faatalitalia. O se faataʻitaʻiga, ina ua uma sona taotoga telē, na taʻu atu ai e se tamaʻitaʻi tausi soifua e na te manaʻomia se tuigātoto ona ua maulalo lona toto. Peitaʻi na ia manatua, i le pō a o loma lona taotoga, na ia faitau ai i le tala e faatatau i se tuafafine na feagai foʻi ma se tulaga tai faapena. Na sili atu le maulalo o le toto o le tuafafine nai lo o Zhiming, ae e leʻi talia e le tuafafine se tuigātoto ma na ia toe maua le malosi. O lenā mea, na faamalosia ai Zhiming e tumau pea ma le faamaoni.

9. O le ā e te faia pe a faavaivaia oe ona o se faigatā? (Tagaʻi foʻi i ata.)

⁹ Pe e te lagona le matuā popole e tatalo atu iā Ieova pe a feagai ma se luʻi? Pe e te lagona le matuā lē lavā ma lē mafai ai ona fai au suʻesuʻega? Ia manatua, e malamalama lelei Ieova i lou tulaga. E tusa pe faigofie upu o au tatalo, ae ia e mautinoa o le a ia foaʻi mai le mea tonu e te manaʻomia. (Efe. 3:20) Pe a faigatā iā te oe ona faitau pe suʻesuʻe le Tusi Paia ona o tigā i le tino po o faalogona, atonu e manaʻomia ona e faalogologo i faitauga Tusi Paia po o lomiga faale-Tusi Paia ua uma ona puʻeina. E ono fesoasoani foʻi le faalogologo i se tasi o a tatou fatuga pe maimoa i se vitiō i le jw.org. O le tatalo iā Ieova ma saʻili tali o au tatalo i sauniuniga faaleagaga ua ia saunia mai, ua e faatagaina ai o ia e faamalosia oe.

10. E faapefea ona faamalosia i tatou e o tatou uso ma tuafāfine Kerisiano?

¹⁰ E mafai e Ieova ona faaaogā o tatou uso ma tuafāfine Kerisiano e faamalosia i tatou. E mafai ona avea i latou o se “puna o faamāfanafanaga tele,” pe a tatou feagai ma se luʻi pe lē faigofie foʻi ona faataunuu se tofiga faigatā. (Kolo. 4:​10, 11) E tatou te matuā manaʻomia lava ni uō i “taimi o puapuaga.” (Faata. 17:17) Pe a tatou lagona le vaivai, e mafai e o tatou uso tapuaʻi ona fesoasoani iā i tatou i le itu faaletino, tau faalogona, ma le  faaleagaga. Seʻi mātau pe na faapefea ona maua e Maria le tinā o Iesu le malosi mai i isi.

11. Aiseā na manaʻomia ai e Maria le malosi?

¹¹ Na manaʻomia e Maria le malosi. E lē taumatea na matuā popole o ia ina ua maua se tofiga tāua mai i le agelu o Kaperielu. E ui lava e leʻi faaipoipo Maria, ae na taʻu atu e le agelu o le a tō o ia. E leʻi iai sona poto masani i le auala e tausia aʻe ai se fanau, ae o lea o le a ia tausia le tamaitiiti o le a avea ma Mesia. Talu ai e leʻi momoe foʻi Maria ma se tane, o le a faapefea nei la ona ia faamatala atu nei mea uma iā Iosefa, o lē o le a ia faaipoipo i ai?—Luka 1:​26-33.

12. E tusa ai ma le Luka 1:​39-45, na faapefea ona maua e Maria le malosi na ia manaʻomia?

¹² Na faapefea ona maua e Maria le malosi na ia manaʻomia e faataunuu ai lenei tofiga tāua ma e lē masani ai? Na ia saʻili atu mo le fesoasoani a isi. O se faaaʻoaʻoga, na ia fesili atu iā Kaperielu mo nisi faamatalaga e faatatau i lenei tofiga. (Luka 1:34) Ina ua mavae sina taimi, ona malaga ai lea o Maria e agaʻi “i atumauga” o Iuta e asiasi i lona tausoga o Elisapeta, ma na iai iʻuga lelei o lenā faigāmalaga. Na faamālō atu Elisapeta iā Maria, ma na uunaʻia o ia e Ieova e faailoa atu se valoaga faalaeiau e faatatau i le pepe e leʻi fanau mai a Maria. (Faitau le Luka 1:​39-45.) Na faapea mai Maria, ua “faia [e Ieova] galuega mamana i lona aao.” (Luka 1:​46-51) Ioe, na faamalosia e Ieova Maria, e ala iā Kaperielu ma Elisapeta.

13. O le ā na tupu ina ua talosaga atu Dasuri mo le fesoasoani a uso ma tuafāfine?

¹³ I le pei o Maria, e mafai foʻi ona e maua le malosi mai i ou uso tapuaʻi. O le mea tonu lenā na manaʻomia e Dasuri o se tuafafine mai i Polivia. Na taofia lona tamā i le falemaʻi ina ua maua i se maʻi tugā, ma na lotomalie Dasuri e tausi o ia. (1 Timo. 5:4) E leʻi faigofie le faia o lenā mea i taimi uma. Ua ia taʻutino mai, “E tele taimi na ou manatu ai e lē mafai ona ou toe tausia loʻu tamā.” Pe na ia talosaga atu mo se fesoasoani? I le taimi muamua, e na te leʻi faia faapea. Ua ia faapea mai: “Ou te leʻi manaʻo e faatigāina uso ma tuafāfine. Na ou mafaufau, ʻO le a saunia e Ieova le fesoasoani ou te manaʻomia.’ Ae na ou iloa ai, ua ou faaesea aʻu lava, ma ou taumafai e taulima na o aʻu oʻu faafitauli.” (Faata. 18:1) Na tusi atu Dasuri i nisi o ana uō Kerisiano ma faamatala i ai lona tulaga. Ua ia toe faapea mai: “E lē mafai e upu ona faamatalaina le auala na matuā faamalosia ai aʻu e oʻu uso pele Kerisiano. Na latou aumaia meaʻai i le falemaʻi ma faasoa mai ni manatu faalaeiau mai i le Tusi Paia. Ua matuā faalaeiauina aʻu i le iloa e lē o tuua na o i tatou. O i tatou uma o se vaega o le ʻauaiga toʻatele o Ieova, o ē lotomalilie e fesoasoani mai, fetagisi faatasi ma i tatou pe a tatou mafatia, ma faalaeiau i tatou e auauna pea iā Ieova faatasi ma i latou.”

14. Aiseā e tatau ai ona tatou talia le fesoasoani mai i toeaina?

¹⁴ O se tasi o auala e faamalosia ai i tatou e Ieova, o toeaina. O i latou o ni meaalofa, ma ua faaaogā i latou e Ieova e faamalosia ma faafouina i tatou. (Isa. 32:​1, 2) O lea, pe a e lagona le popole, ia faailoa atu i toeaina. Pe a latou aumaia le fesoasoani, ia talia ma le lotofaafetai. E mafai e Ieova ona faamalosia oe, e ala mai i toeaina.

15. O le ā le faamoemoe tautele ua maua e Kerisiano uma?

¹⁵ E faamalosia foʻi i tatou i lo tatou faamoemoe o loo taʻua i le Tusi Paia. (Roma 4:​3, 18-20) I le avea ai o ni Kerisiano, ua tatou maua le faamoemoe tautele o le ola e faavavau i le lalolagi parataiso, po o le Malo i le lagi. O lo  tatou faamoemoe e faamalosia ai i tatou e onosaia faigatā, talaʻi le tala lelei, ma faataunuu le tele o tofiga i le faapotopotoga. (1 Tesa. 1:3) O le faamoemoe foʻi lenā na faamalosia ai le aposetolo o Paulo.

16. Aiseā na manaʻomia ai e le aposetolo o Paulo le malosi?

¹⁶ Na manaʻomia e Paulo le malosi. I lana tusi i Kerisiano i Korinito, na ia faatusa ai o ia i se ipu omea e mataʻetaʻe. Na “matuā omia,” “fememeaʻi,” “sauāina,” ma “lafotūina” Paulo. Na iai foʻi taimi na lamatia ai lona ola. (2 Kori. 4:​8-10) Na tusia e Paulo na upu a o faagasolo lana malaga faamisionare lona tolu. Ae atonu e na te leʻi iloa e leʻi gata ai i inā faigatā o le a ia fesagaʻia. Mulimuli ane, na ia feagai ma sauāga mai i tagata tetee, puʻea o ia, afātia ana folauga, ma faafalepuipuiina.

17. E tusa ai ma le 2 Korinito 4:​16-18, na faapefea ona faamalosia Paulo e tumau i faigatā?

¹⁷ Na maua e Paulo le malosi e tumau ai e ala i le taulaʻi i lona faamoemoe. (Faitau le 2 Korinito 4:​16-18.) Na ia faapea atu i Kerisiano i Korinito, e ui lava ina “tauau ina uma atu” lona malosi ae e na te lē faatagaina lenā mea e faavaivaia ai o ia. Na taulaʻi atu pea Paulo i lona faamoemoe o le ola e faavavau i le lagi, “e matuā silisili atu ma e faavavau,” ma na ia lotomalie e onosaia faigatā ina ia maua ai lenā taui. Na manatunatu loloto Paulo i lenā faamoemoe, ma na ia lagona ai le ʻfaafouina mai i lea aso ma lea aso.’

18. Na faapefea i le faamoemoe mo le lumanaʻi ona faamalosia ai Tihomir ma lona aiga?

¹⁸ O Tihomir o se uso i Bulgaria, ma na faamalosia o ia ona o lona faamoemoe mo le lumanaʻi. I ni nai tausaga ua mavae, na maliu ai lona uso laʻitiiti o Zdravko i se faalavelave tau taavale. O lea, na lagona ai e Tihomir le matuā mafatia. Ina ia fesoasoani i ona faalogona mafatia, na faaata ai e Tihomir ma lona aiga le taimi e toetutū mai ai ē ua maliliu. O lana faamatalaga lenei: “E matou te talanoa po o fea o le a matou feiloaʻi ai ma Zdravko, o meaʻai o le a matou saunia mo ia, o tagata o le a iai i le faatasiga e toe faafeiloaʻi o ia, ma mea  o le a taʻu atu iā te ia e faatatau i aso e gata ai.” Ua faapea mai Tihomir, o le taulaʻi atu pea i lo latou faamoemoe ua faamalosia ai lona aiga e tumau pea, ma faatalitali pea i le taimi a Ieova e toe faatūina mai ai lona uso.

19. O le ā e mafai ona e faia e faamalosia ai lou faamoemoe? (Tagaʻi foʻi i le ata.)

¹⁹ E faapefea ona faamalosia lou faamoemoe? O se faataʻitaʻiga, pe afai o lou faamoemoe o le ola e faavavau i le lalolagi, ia faitau ma manatunatu loloto i faamatalaga a le Tusi Paia e uiga i le Parataiso. (Isa. 25:8; 32:​16-18) Ia faaata o loo e iai i le lalolagi fou, ma le ituaiga olaga o le a iai i lenā taimi. O ai o loo e vaai atu i ai? O ā leo o loo e faalogoina? O ā ni ou lagona o le a iai i lenā taimi? Ina ia faaosofia lou naunau e fia iloa atili e faatatau i le Parataiso, ia matamata i ata o le Parataiso o loo i a tatou lomiga pe maimoa i se vitiō o musika, e pei o Le Lalolagi Fou o le a Oo Mai, Toe Nei o se Aga, po o le Faaāta le Taimi. Pe a tāmau i o tatou mafaufau le faamoemoe i le lalolagi fou, o le a “puupuu ma māmā” o tatou faafitauli. (2 Kori. 4:17) O le a faamalosia oe e Ieova, e ala i le faamoemoe ua ia saunia mai.

20. E ui e iai taimi e tatou te lagona ai le vaivai, ae e faapefea ona tatou maua le malosi?

²⁰ E ui e iai taimi e tatou te lagona ai le vaivai, ae “o le Atua e [tatou] te maua ai le malosi.” (Sala. 108:13) Ua saunia e Ieova mea e te manaʻomia ina ia maua ai le malosi mai iā te ia. O lea, pe a e manaʻomia le fesoasoani e faataunuu se tofiga, onosaia se luʻi, pe faatumauina pea lou olioli, ia talosaga atu iā Ieova e ala i le tatalo, ma saʻili atu mo lana taʻitaʻiga e ala i au lava suʻesuʻega. Ia talia faalaeiauga mai i ou uso ma tuafāfine Kerisiano. Ia fai ma masani le faaalu o se taimi e faaata ai lou faamoemoe i le lumanaʻi. O le faia faapea, o le a ʻfaamalosia ai oe i le malosi uma e tusa ma le mana tele o le Atua, ina ia mafai ai ona e tumau atoatoa ma le onosaʻi atoa ma le olioli.’—Kolo. 1:11.