1. I le pō mulimuli o Iesu ma ona soo, o le ā le mataupu tāua na latou talanoa ai?

I LE pō mulimuli o Iesu ma ona soo, e toetoe 30 taimi na ia taʻua ai le upu alofa. Na ia faailoa manino mai e tatau i ona soo ona “alolofa o le tasi i le isi.” (Ioa. 15:12, 17) O le mataʻina o lo latou alofa faaleuso, o le a mātaulia ai i latou o soo moni o Iesu. (Ioa. 13:34, 35) O lenei alofa e lē na o ni faalogona, ae na uiga atu foʻi Iesu i le alofa faataulaga lea e sili ona malosi. Na ia fetalai: “E leai lava se tasi e sili atu lona alofa nai lo o lenei, o le foaʻiina atu lea e se tasi o lona ola mo ana uō. O aʻu uō outou pe afai tou te faia mea ua ou poloaʻi atu ai.”​—Ioa. 15:13, 14.

2. (a) O le ā ua mātaulia ai auauna a le Atua? (e) O ā fesili o le a tatou taliina i lenei mataupu?

² Ua mātaulia tagata o Ieova i lo latou alofa moni ma le faataulaga, faapea le autasi. (1 Ioa. 3:10, 11) Maʻeu lo tatou lotofaafetai ona o le faaalia e auauna a Ieova o le alofa e pei ona faaalia e Keriso, e ui i le eseese o o latou atunuu, ituaiga, gagana, ma talaaga! Ae atonu e tatou te taumānatu: ʻAiseā e matuā tāua ai le faaalia o le alofa i aso nei? Ua faapefea ona  atiaʻe i tatou e Ieova ma Iesu e ala i le alofa? E faapefea ona tatou faaalia le alofa na faaalia e Keriso lea e “atiaʻe ai”?’​—1 Kori. 8:1.

3. O le ā le aafiaga o tagata ona o nei “aso e sili ona faigatā”?

³ Ua faatumulia le olaga i “faafitauli ma mea e tigā ai.” O lea, ua mafatia ai tagata i nei “aso e sili ona faigatā” i faafitauli tau faalogona. (Sala. 90:10; 2 Timo. 3:1-5) O le iʻuga, o le toʻatele o tagata ua mananaʻo e pule i o latou ola. E silia i le 800,000 tagata e pule i o latou ola i tausaga taʻitasi, i se fua faatatau e toʻatasi i le 40 sekone. O le itu e faanoanoa ai, ona e iai nisi Kerisiano ua aafia i na faalogona, ma pule ai i o latou ola.

4. O ai tagata o le Tusi Paia na oo i ai faalogona ua lē toe fia ola?

⁴ I taimi o le Tusi Paia, e iai auauna faamaoni a le Atua na lofitūina i faafitauli, ma oo ai faalogona ua lē toe fia ola. O se faaaʻoaʻoga a o maʻi tigāina Iopu, na ia faapea mai: “Ua ou teena lea mea; ou te lē fia ola i aso uma.” (Iopu 7:16; 14:13) Na matuā lē fiafia Iona ona o le iʻuga na oo i ai lona tofiga, ma faapea mai: “A o lenei, Ieova e, faamolemole ia e aveese loʻu ola mai iā te aʻu, auā e sili pe a ou oti nai lo o loʻu ola pea.” (Iona 4:3) E iai foʻi le taimi na matuā mafatia ai le perofeta o Elia ona o lona tulaga ma talosaga ai ina ia oti. Na ia fai mai: “Ua lava lea! Ieova e, ia e aveese loʻu ola.” (1 Tu. 19:4) E ui i lea, na faatāua pea e Ieova ana auauna faamaoni, ma finagalo ina ia latou ola pea. E na te leʻi taʻusalaina i latou, ae na ia fesoasoani iā i latou ina ia manumalo i na faalogona, ma atiaʻe i latou i le alofa ina ia auauna ai pea ma le faamaoni.

5. Aiseā ua matuā manaʻomia ai e uso ma tuafāfine le alofa i aso nei?

⁵ E tusa pe e lē oo i uso ma tuafāfine faalogona ua lē toe fia ola, ae o loo feagai pea le toʻatele ma tulaga faigatā e manaʻomia ai ona atiaʻe i latou i le alofa. O loo onosaia e isi sauāga ma taufaifaiga. Ua mafatia isi i faitioga ma muimuiga i galuega. Ua lagona e isi le vaivai ona o le faigaluega ovataimi, ma taumafai e ausia taimi e tatau ona faamāeʻa ai galuega. Ua feagai isi ma faafitauli tugā i le aiga, atonu o faitioga mai i se paaga lē talitonu. O le iʻuga o nei faafitauli ma isi toʻatugā, ua lagona ai e nisi le vaivai ma manatu ai ua leai so latou aogā. O ai e mafai ona fesoasoani iā i latou?

6. E faapefea ona atiaʻe e Ieova ana auauna i le alofa?

⁶ E atiaʻe e Ieova ona tagata tapuaʻi e ala i le faamautinoa i ai o lona alofa e lē mavae. Seʻi manatu i le faalaeiauina o tagata Isaraelu faamaoni ina ua latou faalogo i le fetalaiga lenei a Ieova: “Auā ua pele oe iā te aʻu, ua taʻua oe e mamalu, ma ua ou alofa iā te oe. . . . Aua e te fefe auā ou te faatasi ma oe.” (Isa. 43:4, 5) I le avea ai o oe ma auauna a Ieova, ia e mautinoa e matuā alofa faapelepele Ieova iā te oe. * O le folafolaga lenei i le Afioga a le Atua e faatatau i ē e naunau i le tapuaʻiga mamā: “E faaolaina e ia auā o ia o Lē e malosi. O le a olioli o ia ma fiafia iā te oe.”​—Sefa. 3:16, 17.

7. O le ā le auala ua pei ai le alofa o Ieova o le alofa o se tinā o loo tausia sana pepe? (Tagaʻi i le ata i luga aʻe o le matua.)

⁷ E tusa po o ā faigatā e feagai ma tagata o Ieova, ae ua Ia folafola mai o le a ia tausia ma faamāfanafanaina i latou. Ua taʻua  i le Isaia 66:12, 13: “E tou te fesusui ai. O le a afisi outou i lona itu ma ave ai, e tausia ma le alofa outou i ona vae. E pei o se tagata e faamāfanafana pea i ai lona tinā, e faapea foʻi ona ou faamāfanafana iā te outou.” Maʻeu se vaaiga faamomoiloto o se tinā o loo afisi lana pepe i lona itu, pe tausia i ona vae! Ua faataʻitaʻi mai i lenā vaaiga le malosi ma le faapelepele o le alofa o Ieova i ona tagata tapuaʻi moni. Ia e mautinoa e matuā tautele ma pele oe iā Ieova.​—Iere. 31:3.

8, 9. E faapefea ona faamalosia i tatou i le alofa o Iesu?

⁸ O se tasi lenei o māfuaaga ua tatou tosina ai i le alofa o le Atua: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” (Ioa. 3:16) Maʻeu le alofa o Iesu ua ia foaʻi mai ai lona ola mo i tatou, ma o lenā alofa ua matuā faamalosia ai i tatou! Ua folafola mai i le Tusi Paia, e lē mafai e ʻpuapuaga po o mafatiaga ona faateʻaeseina i tatou mai i le alofa o Keriso.’​—Roma 8:35, 38, 39.

⁹ Pe a tatou feagai ma faigatā, e tatou te lagona le vaivai i le itu faaletino, faalogona ma le faaleagaga. Peitaʻi, o le malosi o le alofa o Keriso e mafai ona faamalosia ai i tatou ina ia tumau. (Faitau le 2 Korinito 5:14, 15.) O le malosi foʻi o le alofa o Iesu, e mafai ona faatumauina ma uunaʻia ai i tatou e aua le faavaivai pe a feagai ma faigatā e pei o mala, sauāga, o mea e lē taulau ai, ma popolega.

10, 11. O ai e ana le tiute tauave o le faamalosia o ē ua lotovaivai? Faamatala.

¹⁰ O se tasi o auala e atiaʻe ai i tatou e Ieova i le alofa, o le faapotopotoga Kerisiano. E mafai ona tatou tali atu i le alofa o Ieova, e ala i le alolofa i o tatou uso ma atiaʻe i latou e lē gata i le itu faaleagaga, ae faapea le itu tau faalogona. (1 Ioa. 4:19-21) Na faalaeiau atu Paulo i Kerisiano: “Ia outou fefaamāfanafanaaʻi ai pea ma atiaʻe e le tasi le isi, e pei lava ona outou faia nei.” (1 Tesa. 5:11) E lē na o toeaina e gafa ma lenei tiute tauave, ae e mafai e sui uma o le faapotopotoga ona faaaʻoaʻo iā Ieova ma Iesu, e ala i le faamāfanafana ma atiaʻe o tatou uso ma tuafāfine.​—Faitau le Roma 15:1, 2.

 ¹¹ E iai nisi i le faapotopotoga e aafia i maʻi tau faalogona, ma atonu e latou te manaʻomia le fesoasoani mai i fomaʻi ma inu a latou fualaau. (Luka 5:31) E amanaʻia e toeaina ma isi i le faapotopotoga, e leai ni o latou tomai faapitoa e togafitia ai maʻi o le mafaufau. Peitaʻi, e iai se vala tāua e mafai ona latou faia, o le ʻfaamāfanafana i ē mafatia, fesoasoani i ē vaivai, ma faapalepale i tagata uma lava.’ (1 Tesa. 5:14) E manaʻomia e Kerisiano uma ona faaalia le tigā alofa ma le onosaʻi, ma talanoa i se auala faalaeiau ina ia atiaʻe ai ē ua lotovaivai. Po o avea oe ma puna o faalaeiauga ma faamāfanafanaga? O le iloa o le auala e mafai ona e fesoasoani ai, e mafai ona faaleleia ai au taumafaiga.

12. Faamatala se faaaʻoaʻoga o se tasi na faalaeiauina ona o le alolofa o le faapotopotoga.

¹² E faapefea i lo tatou alofa ona atiaʻe ai ē lotomafatia? Ua faapea mai se tuafafine mai i Europa: “E iai taimi ou te mafaufau ai e pule i loʻu ola. Peitaʻi e iai aʻu uō e fesoasoani mai, ma na laveaʻi aʻu e laʻu faapotopotoga. E alolofa ma faalaeiau mai pea uso ma tuafāfine. E ui e lē iloa e le toʻatele ou te aafia i le lotomafatia, ae e fesoasoani mai pea le faapotopotoga. E iai se tasi ulugalii e pei o ni oʻu mātua faaleagaga. E la te tausia lelei aʻu, ma e mafai ona ou tāpā la laʻua fesoasoani i so o se taimi o le aso.” E lē o tagata uma e mafai ona fesoasoani i lenā auala. Peitaʻi, o lo tatou lagolagosua faamaoni, e mafai ona iai se aafiaga telē i ē o loo aafia i le lotomafatia. *

13. O le ā e tatau ona tatou faia pe a faamāfanafana atu i isi?

¹³ Ia avea ma sē e faalogologo lelei. (Iako. 1:19) O se gaoioiga alofa le faalogologo ma le tigā alofa. E mafai ona e fesili i se auala alofa ma faautauta ina ia malamalama ai i faalogona o lē o loo mafatia. O le faia faapea, o le a mafai ona e faaalia ai le tigā alofa ma atiaʻe ai lou uso. Ia atagia atu i ou foliga lou manatu mamafa. Pe afai e na te faamatala auʻiliʻili mai se mea, ia onosaʻi ma aua le taumafai e faasalavei atu. O le faalogologo ma le onosaʻi, o le a e malamalama ai i ona faalogona. O le iʻuga, o le a mafai e le uso po o le tuafafine o loo mafatia ona maufaatuatuaina oe, ma fia faalogo mai ai i se manatu faalaeiau o loo e taumafai e fai atu. Pe a e faaalia le manatu mamafa, o le a matuā faamāfanafana ai lē o loo mafatia.

14. Aiseā e tatau ai ona ʻalofia le uiga faitio?

¹⁴ ʻAlofia le uiga faitio. O le a atili mafatia le tagata pe a tatou faaalia se uiga faitio, ma faalēaogāina ai a tatou taumafaiga e fesoasoani atu. Ua faapea mai le Faataoto 12:18: “O le tagata e tautala lē mafaufau, ua pei o le tutuʻi o le pelu, a o le laulaufaiva o ē e atamamai, e mālōlō ai.” O le tulaga masani, e leai so tatou faanaunauga e “tutuʻi” se tagata mafatia e ala i upu faatigā. Ae e tusa pe faia faapea e aunoa ma le iloaina, e matuā tigā lava ona aafiaga. O le atiaʻe la o isi i le alofa e ala i faalaeiauga, e manaʻomia ai ona tatou faaalia le tigā alofa, ma tuu i tatou i le tulaga o lenā tagata.​—Mata. 7:12.

15. O le ā se meafaigaluega tāua e mafai ona tatou atiaʻe ai isi i le alofa?

¹⁵ Ia faamāfanafana e ala i le Afioga a le Atua. (Faitau le Roma 15:4, 5.) O  Tusitusiga Paia o se punaʻoa o faamāfanafanaga ma faalaeiauga. O le Tusi Paia e mai i “le Atua o lē ua tatou tumau ai ma aumaia ai faamāfanafanaga.” E lē gata e tatou te maua faamāfanafanaga mai i mau o le Tusi Paia, ae e tatou te maua foʻi i le tele o meafaigaluega mo saʻiliʻiliga. O se faaaʻoaʻoga, o le Tusi Taʻiala mo Saʻiliʻiliga a Molimau a Ieova. O nei meafaigaluega e mafai ona e maua ai manatu faale-Tusi Paia e fesoasoani i so o se ituaiga o faafitauli. E mafai foʻi ona faaauupegaina ai i tatou e avatu ni manatu faalaeiau, ma e ono maua ai ni iʻuga lelei.

16. O ā uiga e manaʻomia ona tatou faaalia pe a faalaeiau i se Kerisiano o loo mafatia?

¹⁶ Ia faaalia uiga māfana ma faapelepele. O nisi nei o vala o le alofa lē manatu faapito e tatau ona tatou faaalia pe a faalaeiau ma atiaʻe isi. O Ieova lava ia o “le Tamā o le alofa mutimutivale, ma le Atua o faamāfanafanaga uma,” ma e “alofa faapelepele” o ia i ana auauna. (Faitau le 2 Korinito 1:3-6; Luka 1:78; Roma 15:13) Na faataatia e Paulo se faaaʻoaʻoga lelei i lea vala, na ia tusi e faapea: “Na matou faapelepele iā te outou, e pei ona tausi faapelepele e se failele o lana fanau. O lea la, ona o le alofa māfana iā te outou, sa matou matuā fiafia ai e avatu iā te outou e lē na o le tala lelei a le Atua, ae faapea foʻi ma o matou ola, auā ua matou alolofa iā te outou.” (1 Tesa. 2:7, 8) Pe a tatou faaalia le faapelepele e pei o le Atua, o le a mafai ai ona avea i tatou ma tali o tatalo a se Kerisiano mafatia.

17. O le ā le vaaiga paleni e tatau ona iai iā i tatou e faatatau i o tatou uso, ina ia mafai ai ona atiaʻe i latou i le alofa?

¹⁷ Aua le faatalitalia e lelei atoatoa ou uso. Ia faatumau se vaaiga paleni e faatatau i o tatou uso ma tuafāfine. E lē talafeagai ona tatou faatalitalia e lē faia e o tatou uso se mea sesē, ona e atili ai ona tatou lē fiafia. (Fai. 7:21, 22) Ia manatua, e talafeagai mea e faatalitalia mai e Ieova i ana auauna. Pe a tatou mulimuli la i lana faaaʻoaʻoga, o le a mafai ai ona tatou onosaia tulaga lē lelei atoatoa o isi. (Efe. 4:2, 32) Nai lo o le faia o se faamatalaga e atagia atu ai e lē o tele ni mea o loo latou faia mo Ieova, ia faamālō i a latou taumafaiga, ma e mautinoa o le a faalaeiauina ai i latou. O se faamālō faamaoni, e mafai ona atiaʻe ai isi i le alofa, ma maua ai se “mea e mitamita ai” i la latou lava auaunaga paia. Maʻeu le manaia o lo tatou faia faapea, nai lo o le faatusatusa atu i isi!​—Kala. 6:4.

18. Aiseā e tatou te mananaʻo ai e atiaʻe isi i le alofa?

¹⁸ O auauna uma a Ieova e matuā tautele iā te ia ma Iesu, o lē na saunia le taulaga togiola. (Kala. 2:20) E tatou te matuā alolofa foʻi i o tatou uso ma tuafāfine, ma e tatau ai ona tatou feutagaʻi ma i latou i se auala faapelepele. O lea, ina ia avea i tatou ma puna o faalaeiauga, “seʻi tatou tausisi i mea e faatupu ai le filemu, ma mea e atiaʻe ai e le tasi le isi.” (Roma 14:19) E tatou te tulimataʻia le Parataiso i le lumanaʻi, lea o le a lē toe iai ni mea e lotovaivai ai. O le a lē toe iai ni maʻi, taua, le oti na tuufaasolo mai iā Atamu, sauāga, o faafitauli i le aiga, ma mea e lē taulau ai. I le iʻuga o le Afe Tausaga, o le a maua e tagata le tulaga lelei atoatoa. O i latou o le a sao mai i le tofotofoga faaiʻu, o le a vaetamaina e fai ma atalii o Ieova le Atua, ma o le a latou maua “le saʻolotoga mamalu o le fanau a le Atua.” (Roma 8:21) O lea, seʻi faaauau ona tatou faaalia le alofa lea e atiaʻe ai, ma fesoasoani foʻi i isi ina ia latou maua lenā taui matagofie i le lumanaʻi.