I LE lalolagi aoao, e faatāua e toeaina o latou faaeaga i le auaunaga i le Atua. Ua avea i latou ma faamanuiaga iā i tatou. Peitaʻi, talu ai nei na faia ai se suiga. Na talosagaina ai toeaina matutua e tuuina atu tiute tauave mamafa o loo latou tauaveina i toeaina e talavou ifo. I le ā le itu?

O lenei faatulagaga fou o le a lē toe galulue ai ovasia matagaluega ma faiaʻoga o aʻoga faale-Tusi Paia i nei faaeaga, pe a atoa le 70 o o latou tausaga. E lē gata i lea, e tatau ona tuuina atu e toeaina ua 80 tausaga i toeaina e talavou ifo isi faaeaga, e pei o le sooupu o le Komiti o le Lālā po o le sooupu o le ʻautoeaina o le faapotopotoga. O le ā le tali atu a nei toeaina matutua peleina i lea suiga? Ua latou faaalia le faamaoni iā Ieova ma lana faalapotopotoga.

Ua faapea mai Ken lea na auauna o se sooupu o le Komiti o le Lālā mo le toetoe 49 tausaga: “Sa ou malie atoatoa i le faaiʻuga. O le mea moni, na ou tatalo iā Ieova e faailoa ai ua manaʻomia se uso talavou ifo e avea ma sooupu, ma o le taeao lava lea na faailoa mai ai lea suiga.” O le tali atu a Ken, o faalogona foʻi na o le toʻatele o toeaina faamaoni matutua  i le lalolagi aoao. E ui i lea, ona e latou te fiafia e auauna mo o latou uso, sa latou lagona lava le faanoanoa i le taimi muamua na faia ai lenei suiga.

Ua faapea mai Esperandio lea na avea ma sooupu o le ʻautoeaina i lana faapotopotoga: “Sa ou lagona le faanoanoa.” Peitaʻi na ia toe faapea mai: “Ua manaʻomia ona ou uaʻi atu i loʻu soifua mālōlōina.” O loo faaauau pea ona auauna faamaoni Esperandio iā Ieova, ma avea ma faamanuiaga i lana faapotopotoga.

Ae e faapefea i latou ua leva ona avea ma ovasia femalagaaʻi lea ua galulue i isi vala o le auaunaga? E 38 tausaga na avea ai Allan ma ovasia femalagaaʻi, ma na ia faapea mai: “Na matuā faateʻia aʻu ina ua ou faalogo i lea faaiʻuga.” E ui i lea, ua ia iloa le tāua o le toleni o uso e talavou ifo mo le galuega, ma o loo faaauau lava ona ia auauna faamaoni iā Ieova.

E 40 tausaga na avea ai Russell ma ovasia femalagaaʻi ma faiaʻoga i aʻoga faale-Tusi Paia. Na ia faailoa mai lo laʻua faanoanoa ma lana avā i le taimi muamua i lenei suiga. Ua ia faapea mai: “E ma te matuā talisapaia lo maʻua faaeaga, ma na ma lagona o loo ma malolosi lava e faaauau le galuega.” O loo faaaogā e Russell ma lana avā i totonu o le faapotopotoga o la tomai ma le toleniga na la maua, ma ua matuā faamanuiaina ai isi tagata talaʻi.

E tusa pe e leʻi oo iā te oe na faalogona, ae e mafai ona fesoasoani se tala o loo i le 2 Samuelu e te malamalama ai iā i latou na oo i ai na faalogona.

Seʻi manatu i le taimi na fouvale ai Apisaloma le atalii o le tupu o Tavita. Na sola ese Tavita mai i Ierusalema agaʻi i Maanaima i le itu i sasaʻe o le vaitafe o Ioritana. O i inā na manaʻomia ai e Tavita ma ona tagata ni mea e tausia ai o latou manaʻoga faaletino. Pe e te manatua le mea na tupu?

E toʻatolu tane na latou foaʻia moega, meaʻai eseese, ma meafaigaluega na manaʻomia, ma o se tasi o i latou o Pasili. (2 Samu. 17:27-29) I le taimi na faalēaogāina ai le fouvalega a Apisaloma, na toe foʻi Tavita i Ierusalema, ma na momoli o ia e Pasili i Ioritana. Na tauanau e Tavita Pasili ina ia latou ō i Ierusalema. Na folafola i ai e le tupu o le a ia saunia meaʻai mo Pasili, e ui o ia “o se tagata e mauʻoa tele” ma e na te lē manaʻomia meaʻai na ofoina atu. (2 Samu. 19:31-33) Peitaʻi, na talisapaia e Tavita uiga lelei o Pasili ma fautuaga lelei e mafai ona ia aumaia. E mautinoa o se faaeaga tautele mo Pasili le nofo ma galue i le maota o le tupu.

O le iai o se vaaiga saʻo ma le faamaulalo o Pasili, na ia amanaʻia ai ua 80 ona tausaga. Na ia faapea mai foʻi: “Pe e mafai ea ona ou toe iloa se lelei ma se leaga?” (2 Samu. 19:35)  O le ā na ia uiga i ai? E mautinoa le telē o le atamai o Pasili ona o lona tulaga matua, ma e mafai foʻi ona ia aumaia fautuaga lelei e pei o “toeaina” sa iai mulimuli ane i taimi o le tupu o Reopoamo. (1 Tu. 12:6, 7; Sala. 92:12-14; Faata. 16:31) O lea, o le faamatalaga a Pasili e faatatau i le iloa o le lelei ma le leaga, atonu e faasino atu i aafiaga ona o lona tino matua. Na ia taʻutino o lona tulaga matua ua aafia ai lana tofo ma lana faalogo. (Fai. 12:4, 5) O lea na uunaʻia ai e Pasili Tavita ina ia ave Kimeama o sē e talavou ifo, atonu o se atalii o Pasili.​—2 Samu. 19:36-40.

O le suiga na taʻua i le amataga ona o le tulaga matua, ua atagia mai ai le vaaiga sa iai iā Pasili. I aso nei, e lē na o le tulaga ma tomai o se tagata e toʻatasi e iloiloina, e pei o le tulaga o Pasili. Ae ua iai le manaʻoga e tatau ona iloiloina, mo le mea e sili ona lelei mo toeaina faamaoni i le lalolagi aoao.

E iloa e nei tane matutua faamaulalo, e mafai ona faamalosia le faalapotopotoga a Ieova mo le lumanaʻi, pe a tuuina atu i uso e talavou ifo tiute tauave ua leva ona taulima e uso matutua. O le tele o taimi, o uso matutua nei e toleniina uso e talavou ifo, e pei ona toleni e Pasili lona atalii, faapea foʻi Paulo iā Timoteo. (1 Kori. 4:17; Fili. 2:20-22) Ua faamaonia le avea o nei uso e talavou ifo ma “meaalofa i tagata,” ma ua latou fesoasoani e “atiaʻe le tino o Keriso.”​—Efe. 4:8-12; faatusatusa i le Numera 11:16, 17, 29.

O le toʻatele o tagata o le Atua i le lalolagi aoao ua tuu atu i isi tiute tauave sa latou taulimaina, ua mafai ona latou faaaogā nisi auala fou pe faalautele atu foʻi la latou faiva i isi vala o le auaunaga iā Ieova.

Ua faapea mai Marco lea na avea ma ovasia femalagaaʻi mo le 19 tausaga: “O loʻu tulaga ua iai nei ua mafai ai ona ou fesoasoani atu i tane lē talitonu a tuafāfine i le faapotopotoga.”

O Geraldo e 28 tausaga na auai ai i le galuega femalagaaʻi, ma ua faapea mai o ia: “O o ma sini fou e aofia ai le fesoasoani i ē ua lē toe talaʻi ma lē toe auai i sauniga, ma faia le tele o suʻesuʻega faale-Tusi Paia.” Ua fai mai o ia e 15 a la suʻesuʻega ma lana avā o loo fai, ma e toʻatele foʻi ē sa lē toe auai i sauniga ua amata ona toe auai mai.

Ua faapea mai Allan lea na taʻua i le amataga: “Ua maua nei le avanoa e faatele ai lo maʻua sao i le talaʻiga. Ua ma fiafia e molimau atu i nofoaga faitele, oganuu pisinisi, ma talaʻi atu i tuaoi. E toʻalua o ma tuaoi ua ō mai i le Maota mo Sauniga.”

Pe afai o oe o se uso tomai ma faamaoni ua maua se faaeaga fou i le auaunaga, e iai se isi auala faapitoa e mafai ona faia ai sou sao. E mafai ona e lagolagoina le galuega a Ieova, e ala i le faasoa atu o ou tomai i tane e talavou ifo i le faapotopotoga. Ua faapea mai Russell lea na taʻua muamua: “O loo toleni ma faaaogā e Ieova uso talavou ifo e iai tomai. Ua maua e le ʻauuso aogā mai i auala lelei e latou te aʻoaʻo ma leoleoina ai le lafu!”​—Tagaʻi i le pusa “ Fesoasoani i Tane e Talavou Ifo e Ausia Mea e Latou te Mafaia.”

Pe afai ua sui se vala o le auaunaga ua e galue ai, ia iai pea iā te oe se vaaiga saʻo. Sa telē le aafiaga o au galuega mamafa i le toʻatele o tagata, ma e mafai lava ona e faia faapea i le taimi lenei. E mautinoa o le a faaauau ona alofagia oe e tagata.

Ae o le vala e sili ona tāua, o loo faaauau lava ona e faafiafiaina le finagalo o Ieova. ʻE na te lē faagalogalo la outou galuega, ma le alofa ua outou faaali mai i lona suafa, auā ua outou auauna i le ʻaupaia, ma o loo outou auauna pea i ai.’ (Epe. 6:10) O lenā mau ua faamautinoa mai ai e lē gata folafolaga a Ieova i au galuega sa fai i le taimi ua teʻa. E tautele oe  iā Ieova, ma e lē mafai ona ia faagaloina au taumafaiga sa fai i le taimi ua teʻa, ma o loo faia pea i le taimi lenei ina ia faafiafia ai o ia.

Ae e faapefea pe afai e leʻi suia sou faaeaga e pei o i latou na taʻua i luga? E mafai lava ona iai se aafiaga o lenei mataupu iā te oe. I le ā le itu?

Pe afai o loo lua galulue ma se uso faamaoni matua ua sui sona faaeaga, e mafai ona e maua aogā mai i le tele o ona tomai ma le poto masani. Ia saʻili mo sana fautuaga, ma fesili mo sona manatu. Ia mātau foʻi le auala o loo ia faaaogā ai ona tomai i lona faaeaga ua iai nei.

E tusa po o oe o se uso matua ua auauna i se isi faaeaga fou, po o se uso po o se tuafafine o loo maua aogā mai iā i latou na, ia manatua e tautele iā Ieova le faamaoni o i latou ua loa ona auauna iā te ia, ma o loo faia pea faapea.