1. O ā mea mataʻina o le a tutupu a o faagasolo le Pulega i le Afe Tausaga?

 MAʻEU se taimi matagofie o le a iai, pe a amata ona toe faatutūina i latou i le lalolagi, a o faagasolo le Pulega a Keriso i le Afe Tausaga! E tatou te naunau uma lava e toe feiloaʻi ma ē e pele ua maliliu, ma o faalogona foʻi na o Ieova. (Iopu 14:15) O se taimi e sili ona fiafia ai, pe a tatou toe faatasitasi ma ē pele ua toe faatutūina mai. E pei ona tatou aʻoaʻoina i le mataupu ua mavae, o “tagata amiotonu” o ē ua tusia o latou igoa i le tusi o le ola, o le a “toetutū i le ola.” (Galu. 24:15; Ioa. 5:29) Atonu o le toʻatele o ē e pele iā i tatou, o le a aofia i ē e muamua ona toe faatutūina mai i le lalolagi. * Peitaʻi, o “tagata amiolētonu” e pei o ē e leʻi maua le avanoa e iloa ai Ieova pe auauna iā te ia a o leʻi maliliu, o le a “toetutū i le faamasinoga.”

2-3. (a) E pei ona faailoa mai i le Isaia 11:9, 10, o le ā le galuega tele tauaʻoaʻoga o le a faia i le lumanaʻi? (e) O le ā o le a tatou iloiloina i lenei mataupu?

² O le a manaʻomia ona aʻoaʻoina i latou uma e toe faatutūina mai. (Isa. 26:9; 61:11) O lea, e tāua ai ona faataunuuina le galuega tele tauaʻoaʻoga, o se galuega e sili ona tāua i le talafaasolopito o le tagata. (Faitau le Isaia 11:9, 10.) Aiseā? O se tasi o māfuaaga, e manaʻomia ona aʻoaʻoina tagata amiolētonu e toe faatutūina mai e faatatau iā  Iesu Keriso, le faatulagaga o le Malo, le togiola, ma le finauga e aafia ai le suafa o Ieova ma lana pule silisili ese. E oo foʻi i tagata amiotonu, e manaʻomia ona aʻoaʻoina i latou i malamalamaga fou, e faatatau i le auala ua faasolosolo ona faailoa mai ai e Ieova lona finagalo mo le lalolagi. Na maliliu nisi o nei auauna faamaoni a o leʻi māeʻa ona tusia le Tusi Paia. Ioe, e tele mea e manaʻomia ona aʻoaʻoina e tagata amiolētonu ma tagata amiotonu.

³ O le a tatou iloiloina i lenei mataupu fesili nei: O ā mea e aofia ai i le faataunuuina o lenei galuega tele tauaʻoaʻoga? E faapefea i le tali atu a tagata i lenā galuega, ona iloa ai pe tusia e faavavau o latou igoa i le tusi o le ola pe leai? E tāua tali o nei fesili iā i tatou i aso nei. O lea, o le a tatou talanoaina nisi o valoaga mataʻina o loo i le tusi o Tanielu ma le Faaaliga, lea o le a faamanino ai lo tatou malamalamaga i le mea o le a tupu pe a toe faatutūina mai ē ua maliliu. Muamua, seʻi o tatou iloiloina mea mataʻina na valoia i le Tanielu 12:1, 2.

4-5. O le ā ua faailoa mai i le Tanielu 12:1 e faatatau i le taimi o le iʻuga?

⁴ Faitau le Tanielu 12:1. Ua faamatalaina i le tusi o Tanielu le faasologa o mea mataʻina o le a tutupu i le taimi o le iʻuga. O se faataʻitaʻiga, o loo faailoa mai i le Tanielu 12:1, o Mikaele o Iesu Keriso lea, ʻo loo tulaʻi mo le nuu o le Atua.’ Na amata ona faataunuuina lenā vaega o le valoaga i le 1914, ina ua tofia Iesu e avea ma Tupu o le Malo o le Atua i le lagi.

⁵ Peitaʻi na faamatalaina foʻi e Tanielu, o le a “tulaʻi” Iesu i “le taimi o puapuaga e leʻi faapea ona tupu talu ona iai se nuu e oo atu i lea taimi.” O lenā “taimi o puapuaga,” e faasino atu i le “puapuaga tele” o loo taʻua i le Mataio 24:21. I le iʻuga o le taimi o puapuaga po o Amaketo, o le a tulaʻi ai Iesu pe gaoioi e puipuia tagata o le Atua. O loo faasino atu le tusi o Faaaliga iā i latou na, o le ʻmotu o tagata e toʻatele ua sao mai i le puapuaga tele.’​—Faaa. 7:9, 14.

6. O le ā o le a tupu pe a uma ona faasaoina le motu o tagata e toʻatele mai i le puapuaga tele? Ia faamatala. (Tagaʻi foʻi i le mataupu “Fesili Mai le ʻAufaitau” e faatatau i le toetū i le lalolagi.)

⁶ Faitau le Tanielu 12:2. O le ā o le a tupu pe a uma ona faasaoina le motu o tagata e toʻatele i le taimi o puapuaga? E lē o faasino atu lenei valoaga i se toetū faafaatusa po o le toetutū faaleagaga o auauna a le Atua, lea e tupu a o faagasolo aso e gata ai e pei o lo tatou malamalamaga sa iai. * Nai lo o lea, e faasino atu i le toetutū mai o ē ua maliliu lea o le a faataunuuina i le lalolagi fou. Aiseā ua talafeagai ai lenā manatu? O le faaupuga “le eleele” o loo faaaogā i le Tanielu 12:2, e tutusa ma le faaupuga “le efuefu” o loo faaaogā i le Iopu 17:16 lea e uiga atu foʻi i le faaupuga “le Tuugamau.” Ua faailoa mai ai i lenā manatu, e faasino atu le Tanielu 12:2 i le toetū lea o le a faia pe a mavae aso e gata ai ma le taua o Amaketo.

7. (a) O le a faapefea ona toe faatutūina nisi “i le ola e faavavau”? (e) Aiseā e faapea atu ai o “se toetū e sili atu ona lelei”?

⁷ O le ā la na uiga atu i ai le Tanielu 12:2  ina ua faapea mai o le a iai nisi e toetutū “i le ola e faavavau”? O lona uiga a o faagasolo le 1,000 tausaga, o ē o le a toe faatutūina mai ma faaauau ona iloa pe aʻoaʻoina pea e faatatau iā Ieova, ma usiusitaʻi iā te ia ma Iesu o le a mauaina le ola e faavavau. (Ioa. 17:3) O “se toetū e sili atu ona lelei,” nai lo o toetū sa faia i le taimi ua mavae. (Epe. 11:35) Aiseā? Talu ai na toe maliliu na tagata lē lelei atoatoa.

8. E faapefea ona toe faatutūina “isi i le faalumaina ma le inosia e faavavau”?

⁸ Peitaʻi e lē o i latou uma e toe faatutūina mai, o le a taliaina le galuega tauaʻoaʻoga a Ieova. Ua taʻua i le valoaga a Tanielu, o le a toe faatutūina “isi i le faalumaina ma le inosia e faavavau.” Talu ai o le a latou faaalia se uiga fouvale, o le a lē tusia la o latou igoa i le tusi o le ola ma lē mauaina le ola e faavavau. Nai lo o lea, o le a ʻinosia i latou e faavavau’ pe faaumatia. O lea, o loo talanoa le Tanielu 12:2 i le taunuuga mo ē uma o le a toe faatutūina mai, e fua i mea e latou te faia pe a mavae ona toe faatutūina mai i latou. * (Faaa. 20:12) O isi o le a mauaina le ola e faavavau, ae o isi o le a lē mauaina.

9-10. O le ā se isi mea o le a tupu pe a mavae le puapuaga tele, ma o ai “o le a susulu atu e pei o le malamalama o le vanimonimo o le lagi”?

⁹ Faitau le Tanielu 12:3. O ā isi mea o le a tutupu pe a mavae “le taimi o puapuaga”? O loo taʻua i le Tanielu 12:3, se isi mea o le a tupu pe a mavae le puapuaga tele.

¹⁰ O ai “o le a susulu atu e pei o le malamalama o le vanimonimo o le lagi”? E tatou te iloa le tali i upu a Iesu o loo i le Mataio 13:43 e faapea: “I lenā taimi, e susulu atu ai ē e amiotonu e pei o le malamalama o le lā, i le Malo o lo latou Tamā.” Pe a fua i le siʻomaga o le mau, o loo faatatau atu upu a Iesu i ʻatalii o le Malo,’ po o ona uso faauuina o ē o le a latou pule faatasi i le Malo i le lagi. (Mata. 13:38) O lea, e tatau ona faasino atu le Tanielu 12:3 i le ʻaufaauuina ma le galuega o le a latou faia a o faagasolo le Pulega i le Afe Tausaga.

11-12. O le ā le galuega o le a faia e le 144,000 a o faagasolo le 1,000 tausaga?

¹¹ O le a faapefea ona faaliliu e le ʻaufaauuina “tagata e toʻatele i le amiotonu”? O le a galulue soosootauʻau Iesu Keriso ma le ʻaufaauuina, i le taʻitaʻia o le galuega tauaʻoaʻoga lea o le a faia i le lalolagi a o faagasolo le 1,000 tausaga. E lē gata o le a pule le 144,000 o ni tupu, ae o le a latou auauna foʻi o ni ositaulaga. (Faaa. 1:6; 5:10; 20:6) O lea ua latou fesoasoani ai i le ʻfaamālōlōina o atunuu,’ ma faasolosolo ona toe faafoʻisia tagata i le tulaga lelei atoatoa. (Faaa. 22:1, 2; Eseki. 47:12) Maʻeu le olioli o le ʻaufaauuina i lenā taimi!

¹² O ai o le a aofia i “tagata e toʻatele” lea o le a faaliliu i le amiotonu? O le a aofia ai i latou e toe faatutūina mai, ma i latou e faasaoina mai iā Amaketo faatasi ai ma tamaiti o le a fananau i le lalolagi fou. E oo ane i le iʻuga o le 1,000 tausaga, o le a lelei atoatoa uma i latou o le a ola i le lalolagi. O le ā la le  taimi o le a tusia ai e faavavau o latou igoa i le tusi o le ola?

13-14. O le ā e manaʻomia ona faamaonia atu e tagata lelei atoatoa uma i le lalolagi, ina ia latou maua ai le ola e faavavau?

¹³ E tatau ona tatou manatua, e lē faapea a lelei atoatoa ona mautinoa ai lea e maua le ola e faavavau. Seʻi mafaufau iā Atamu ma Eva, e ui na avea i laʻua o ni tagata lelei atoatoa, ae na manaʻomia ona la usiusitaʻi iā Ieova le Atua a o leʻi faasafua atu i ai le ola e faavavau. Ae e faanoanoa ona e la te leʻi usiusitaʻi iā te ia.​—Roma 5:12.

¹⁴ O le ā le tulaga o i latou o le a ola i luga o le lalolagi i le iʻuga o le 1,000 tausaga? O le a lelei atoatoa tagata uma. Po o le a lagolagoina atoatoa e na tagata lelei atoatoa le pulega a Ieova e oo i le faavavau? Po o le a iai nisi o le a pei o Atamu ma Eva o ē na lē faamaoni e ui ina lelei atoatoa? O le a faapefea ona taliina nei fesili?

15-16. (a) O le ā le taimi o le a maua ai e tagata uma le avanoa e faamaonia atu ai lo latou faamaoni iā Ieova? (e) O le ā le taunuuga o le tofotofoga faaiʻu?

¹⁵ O le a saisaitia Satani mo le 1,000 tausaga, ma o le a lē mafai ai ona ia taʻitaʻisesēina se tasi. Peitaʻi i le iʻuga o le 1,000 tausaga, o le a faasaʻolotoina o ia, ma taumafai ai e taʻitaʻisesēina tagata lelei  atoatoa. O lenā tofotofoga o le a maua ai e tagata lelei atoatoa uma le avanoa e faamaonia ai, pe e latou te lagolagoina le finauga lea e aafia ai le suafa o le Atua ma lana pule silisili ese. (Faaa. 20:7-10) O le auala e latou te tali atu ai i lenā tofotofoga, o le a iloa ai pe e tatau ona tusia e faavavau o latou igoa i le tusi o le ola.

¹⁶ E iai nisi o le a pei o Atamu ma Eva, o le a teena le pule a Ieova. O le ā o le a tupu iā i latou? Ua faapea mai le Faaaliga 20:15: “O so o se tasi ua iloa e leʻi tusia i le tusi o le ola, e lafoina i le lepa afi.” Ioe, o le a faaumatia aʻiaʻi na tagata fouvale. Peitaʻi o le toʻatele o tagata lelei atoatoa, o le a sao mai i le tofotofoga faaiʻu, ona faatoʻā tusia ai lea e faavavau o latou igoa i le tusi o le ola.

17. O ā mea na faailoa atu iā Tanielu o le a tutupu i o tatou taimi? (Tanielu 12:4, 8-10)

¹⁷ Maʻeu lo tatou olioli pe a mafaufau i mea o le a tutupu i le lumanaʻi! Peitaʻi, na maua foʻi e Tanielu ni faamatalaga tāua mai i se agelu e faatatau i o tatou aso, po o “le taimi o le iʻuga.” (Faitau le Tanielu 12:4, 8-10; 2 Timo. 3:1-5) Na faapea atu le agelu iā Tanielu: “O le a faatuputeleina le  poto saʻo.” Ioe, o le a sili atu ona malamalama tagata o le Atua, i upu faavaloaga o loo i tusi o Tanielu. Na taʻua atili e le agelu, i le taimi o le iʻuga “o le a faia mea leaga e ē amioleaga ma e leai se tasi o ē e amioleaga e malamalama.”

18. O le ā ua toeitiiti ona tupu lea i tagata amioleaga?

¹⁸ I aso nei, atonu e foliga mai e lē o faasalaina tagata amioleaga ona o a latou amioga. (Mala. 3:14, 15) Ae ua toe o se aga ona faamasinoina lea e Iesu o ē e pei o ni ʻoti, ma tuueseeseina mai i ē e pei o ni mamoe. (Mata. 25:31-33) O le a lē faasaoina na tagata amioleaga mai i le puapuaga tele, pe e faatutūina e ola i le lalolagi fou. O le a lē iai o latou igoa i “le tusi e faamanatu ai” o loo taʻua i le Malaki 3:16.

19. O le ā e tatau ona tatou faia i le taimi lenei, ma aiseā? (Malaki 3:16-18)

¹⁹ O lea, o le taimi lenei e faamaonia atu ai e tuese i tatou mai i tagata amioleaga. (Faitau le Malaki 3:16-18.) O loo aoaoina e Ieova i latou e silasila i ai o se “nuu faapitoa,” po o se oloa tāua. E mautinoa e tatou te mananaʻo e iai faatasi ma i latou na.

20. O le ā le folafolaga faaiʻu na taʻu atu iā Tanielu, ma aiseā e te tulimataʻia ai le taimi e faataunuuina ai lenā folafolaga?

²⁰ O le mea moni, o loo tatou ola i taimi e sili ona iloga. Peitaʻi, e iai nisi mea e sili atu ona mataʻina ua toeitiiti ona tutupu lea. E lē o toe umi ona tafiesea lea o mea leaga uma, ona sosoo ai lea ma le faataunuuga o le folafolaga a Ieova iā Tanielu: “E te tū mai i lou tofi i le iʻuga o aso.” (Tani. 12:13) Pe e te tulimataʻia le taimi o le a ʻtutū’ mai ai Tanielu faapea ē e pele iā te oe? Pe afai o lea, ia e faia le mea sili i le taimi lenei e tumau ai ma le faamaoni, ma mautinoa ai o le a tusia e faavavau lou igoa i le tusi o le ola a Ieova.